INDLELA YOKUPHELISA INZONDO EQHUBEKAYO

1 | Sukuba Nomkhethe

Into Ethethwa YiBhayibhile:

“UThixo akakhethi, kodwa kuzo zonke iintlanga [kuye wonke umntu] wamkela nabani na omoyikayo nowenza izinto ezilungileyo.”—IZENZO 10:34, 35.

Into Ethethwa Sesi Sibhalo:

UYehovaa uThixo akagqibi ukuba singabantu abanjani ngenxa yelizwe esihlala kulo, uhlanga, ibala lethu, okanye indlela esikhule ngayo. Endaweni yoko, ujonga eyona nto ibalulekileyo—umntu esinguye ngaphakathi. IBhayibhile iphinde ithi, “umntu ubona nje okubonakalayo emehlweni, kodwa uYehova ubona okusentliziyweni.”—1 Samuweli 16:7.

Indlela Esinokukunceda Ngayo Esi Sibhalo:

Nangona singayazi into esentliziyweni yomntu, sinokuxelisa uThixo size singabi namkhethe kwabanye abantu. Zama ukwazi umntu ngamnye endaweni yokugqiba ukuba ungumntu onjani ngenxa yabantu abasondeleyo kuye. Xa ubona ingathi awubathandi abanye abantu—mhlawumbi ngenxa yohlanga okanye ilizwe abasuka kulo—thandaza kuThixo akuncede uyeke ukuvakalelwa ngaloo ndlela. (INdumiso 139:23, 24) Ukuba umcela ngokusuka entliziyweni uYehova ukuba akuncede uyeke ukuba nomkhethe, unokuqiniseka ukuba uza kuyimamela imithandazo yakho aze akuncede.—1 Petros 3:12.

a Igama likaThixo nguYehova.—INdumiso 83:18.

“Ngaphambili zange ndakhe ndahlala nomntu omhlophe ngoxolo. . . Ngoku ndandingomnye wabazalwana abanobuhlobo bamanyhani emhlabeni wonke.”—UTITUS

Ibali Lobomi—UTITUS

Wayoyisa Inzondo

UTitus wayekwiqela labantu abanobundlobongela ababecatshukiswa yimithetho yobuhlanga eyayibacinezela. Uthi: “Sasidla ngokuya kwiindawo edolophini apho amadoda amnyama awayengamkelekanga khona njengakwii hotele neendawo zokusela kuba nje sifuna ukuqala umlo.” UTitus uyavuma ukuba yonke le nto wayeyenza eqhutywa yinzondo ibe wongeza athi: “Ukuba ukhona umntu endiye ndaxabana naye, enoba yindoda okanye ngumfazi, yayisoloko iba ndim umntu oqale ambethe.”

UTitus watshintsha xa waqalisa ukufunda iBhayibhile namaNgqina kaYehova. Uthe xa efunda iBhayibhile watshintsha indlela acinga ngayo. Wasithanda kakhulu nesithembiso esithetha ngento eza kwenzeka kwixesha elizayo apho ‘kungazobakho kufa, kungazobakho kuzila nakukhala nantlungu.’—ISityhilelo 21:3, 4.

Ekuqaleni, kwakunzima ukuba uTitus ayeke ukucaphukela abanye. Uthi: “Kwakungelulanga ukutshintsha indlela endicinga nendenza ngayo izinto.” Kodwa wancedwa yinto ayifunde kwiZenzo 10:34, 35, ezichaza uThixo njengongenamkhethe.

Kwenzeka ntoni? UTitus uthi xa ecacisa: “Xa ndabona indlela anothando ngayo amaNgqina kaYehova enoba umntu ngowoluphi uhlanga okanye ibala, ndaye ndaqiniseka ukuba akhonza ngendlela efanelekileyo. Nangaphambi kokuba ndibhaptizwe njengeNgqina, omnye umzalwana omhlophe wandimemela endlini yakhe ukuze sitye kunye. Yayingathi ndiyaphupha. Zange ndakhe ndahlala nomntu omhlophe ngoxolo nanini na, kodwa ngoku ndandisitya kunye naye ekhayeni lakhe. Ngoku ndandingomnye wabazalwana abanobuhlobo bamanyhani emhlabeni wonke.”