IZambia

IAfrika injengesambatho esikhulu esilukiweyo. Ukusuka kuNxweme lweMeditera olunentlabathi emhlophe uye kwintlambo ebugolide yeSahara uhamba unqumla kumahlathi aluhlaza de uye kufika kunxweme olunamaza amhlophe eCape of Good Hope, eli lizwekazi linabemi abalinganiselwa kwishumi ekhulwini labemi behlabathi. Ixananaze apho ke imilambo emininzi enjengomNayile, iNiger, iCongo neZambezi. Kwimimandla esembindini ufumana oovimba begolide, ubhedu namatye anqabileyo.

Xa ugugutha kumahlathi amakhulu eCongo Basin (Amazwe Aphahle Umlambo ICongo) usenjenjeya ukuya kwithafakazi lombindi weAfrika, ugaleleka kwilizwe laseZambia. Bambi baye bathi iZambia le ifana nqwa nebhabhathane elikhulu elithe naa amaphiko lisiya kuthi ngcu kwimaphu. Eli lizwe lingaphezulu kwilizwe laseTexas, eUnited States.

Kumntla-mpuma weZambia kumi iNtlambo eNkulu enguMwonyo. Entshona nasemazantsi nguMlambo iZambezi. De kwangasekupheleni kweminyaka yee-1800, abantu abasuka kwamanye amazwe abeze kuhlutha igolide, iimpondo zendlovu, ukanti nabeze kufuna amakhoboka babengangeni lula kweli lizwe. Ngowe-1855, enye indoda eyayingumhloli wamazwe uDavid Livingstone, oyise owayengumSkotlani nowayesebenza kwilitye lokuguba yabonisa ihlabathi indawo eyayibizwa ngokuba “Ngumsi Oneendudumo”—ummangaliso wendalo othi ndijonge, awathi kamva lo kaLivingstone wawuthiya ngokuba ziiVictoria Falls, igama likaKumkanikazi uVictoria waseNgilani.

Akuzange kube kudala kwafika abavangeli beNgqobhoko ababezimisele ukuqala kanye embindini weli lizwe behlwayela imbewu “yobuKristu, ushishino nenkcubeko.” Indlela ababezenza ngayo izinto yayibangela ukuba umsebenzi wabo wobuvangeli ungaqondwa ncam. Kusajongwe kubo, kwafika abanye abazingqina bengabavangeli bokwenene ngenxa yoncedo lukaThixo.—2 Kor. 6:3-10.

Kwiintsuku Zamandulo

Ngowe-1890, imibutho emihlanu yabavangeli yamis’ imizi kwindawo ngoku eyaziwa ngokuba yiZambia. Ekuqaleni kweminyaka yee-1900, abantu abaninzi baseAfrika babelangazelela nantoni na eza kubabonisa indlela efanelekileyo ngenxa yokuba babexhalatyiswe zizinto ezazisenziwa ngabaphathi kwinkqubo yamathanga nezorhwebo. Kwakusithi gqi iicawa ezingaziwayo kulo lonke elo. Noko ke, uncedo lokwenene lwalusemnyango. Ngowe-1911, abantu abanyanisekileyo baseZambia bafumana incwadi ethi Studies in the Scriptures. Kungekudala iinyaniso zeBhayibhile ezikwezo ncwadi zazisele zisasazwe kumantla eZambia, phofu zingasasazwa ngabantu abanomdla wokwenene ekukhonzeni uThixo nje kuphela.

Ngowe-1910, uCharles Taze Russell, owayevelela umsebenzi wokushumayela ngoBukumkani ngaloo mihla, wathumela uWilliam W. Johnston waseGlasgow, eSkotlani, umzalwana owayethembekile nowayezimisela kuyo yonke into ayenzayo, ukuba aye kunceda eNyasaland (ngoku eyiMalawi). Okulusizi kukuba, iqela labazalwana elalilapho ngaphambi kokuba lo mzalwana afike—iinzalelwane zalapho kuquka abo baphuma kwamanye amazwe—lazigqwetha iZibhalo ngenxa yezilangazelelo zalo. Kwiminyaka eyalandelayo, emNtla Rhodesia (ngoku eyiZambia) kwafika abantu ababesithi bangabashumayeli nabefundisi, besiza neecawa zabo ezinehlombe, bethembisa inkululeko, besenza nezinto ezingacocekanga kwangaxeshanye. Ngoxa uMzalwan’ uJohnston wayeseNyasaland, enceda abantu awayesithi “bakulangazelela ngokwenene ukulazi ngakumbi iLizwi likaThixo,” kwakunganikelwanga ngqalelo kangako kwimimandla esentshona. KumaNtla eRhodesia, iincwadi ezisekelwe eBhayibhileni zazithunyelwa ngeposi futhi ziphathiswa abantu abasebenza kwamanye amazwe, kodwa ngaloo mihla kwakungekho lwalathiso kwindlela owenziwa ngayo umsebenzi wokushumayela.

Ixesha Lamathandabuzo

Ekuqaleni kweminyaka yee-1920 kwakukho ukungaqiniseki okuthile. “Imibutho YeWatch Tower” yasekuhlaleni yayinyelisa ubulungiseleli bobuKristu babakhonzi bakaThixo. Abantu abangayaziyo inyaniso nababezibiza ngokuba ngaBafundi beBhayibhile, njengoko amaNgqina kaYehova ayebizwa njalo ngaloo maxesha, babetshintshiselana ngabafazi, besenza nezinye izinto ezimbi. Okuphawulekayo kukuba, baninzi ababephila ubomi ngemilinganiselo yeBhayibhile nababezinikele ngokwenene ekushumayeleni ngenzondelelo.

Olona celomngeni yayikukwazi abo bakufuna ngokwenene ukukhonza uThixo. Ngowe1924, uThomas Walder noGeorge Phillips, ababesuka eBritani, bagaleleka kwisebe laBafundi beBhayibhile laseMzantsi Afrika elaliseKapa. UMzalwan’ uWalder, owayesekuqaleni kwiminyaka yama-30 ubudala, walityhutyha lonke elaseRhodesia ekhangela abo babebizwa ngokuba ngamaWatch Tower. Kunyaka olandelayo, kwathunyelwa omnye umzalwana owayevela eYurophu, uWilliam Dawson, ukuba atyelele amaqela asakhulayo. Waphawula ukuba kukho abantu ababezenza abefundisi nababebhaptiza izihlwele zabantu abangayaziyo inyaniso yeBhayibhile nabangenaxesha layo. Kamva uLlewelyn Phillips (akazalani noGeorge Phillips) wabhala: “Kwacaca okwekat’ emhloph’ ehlungwini ukuba inyambalala yabantu yayifana nabantu baseNinive ‘ababengawazi umahluko phakathi kwesandla sabo sasekunene nesasekhohlo.’” (Yona 4:11) Baninzi ababenyanisekile, kodwa kwakunzima ukuba bayazi inyaniso kuba iimpapasho zolwimi lwabo zazingekho. Ekubeni zazingade ziphumelele izicelo zokuba urhulumente akwamkele ngokusemthethweni ukuvelelwa komsebenzi, kwenziwa isigqibo kwiofisi yaseKapa sokuba abazalwana bakhe bayeke ukushumayela esidlangalaleni nokubhaptiza. Nangona wayengabatyhafisi abazalwana ekubeni bafunde iBhayibhile nokuba bahlanganisane, uMzalwan’ uWalder wabhalela amaqela abantu abanomdla ebabongoza ukuba basebenzisane neli lungiselelo lokwexeshana de kumiselwe ummeli osisigxina waBafundi beBhayibhile.

Ngasesiporweni Sikaloliwe

Kangangeenkulungwane, abantu balapha bebesebenzisa iintsimbi ezilahliweyo ukuze bazenzele izixhobo zokusebenza nezinto zokuhombisa. Phakathi kwiminyaka yee-1920, iNkampani yaseBritani eseMzantsi Afrika, eyayiphethe loo mmandla kwanemigodi yalapho, yaqalisa ukusebenzisa indyebo yeli lizwe ephantsi komhlaba. Kwakufuneka abasebenzi, yaye amawaka abantu abasuka ezilalini beza kuhlala ezidolophini nakwizixeko ezikufuphi nesiporo sikaloliwe esasiza kusuka eKapa siye kutsho eCairo.

UJames Luka Mwango ukhumbula oku: “Yayahluke kakhulu indlela awayemiselwa ngayo amabandla kwindlela amiselwa ngayo ngoku. Ngaphambi kowe-1930, iintlanganiso zesifundo seBhayibhile zaziqhutywa ngokwamaqela amancinane. Abantu abanomdla babeqhagamshelana neofisi eseKapa, ukanti abanye babeodola uncwadi eBrooklyn. Ekubeni uncwadi lwalufumaneka ngesiNgesi kuphela, kwabanye yayingade ikhanye inyaniso.” Nangona amaqela ayemancinane, ayeqhubela phambili yaye inzondelelo yawo nendlela awayezimisele ngayo yayibangela ukuba umsebenzi wokushumayela wenziwe ngendlela elungeleleneyo. INgqobhoko yakubek’ esweni oku.

Ingcinezelo

NgoMeyi 1935, amaqela onqulo nanempembelelo aye anyanzelisa ukuba abo bahambisa nabasasaza uncwadi oluvukela urhulumente banikwe isigwebo esiqatha emNtla Rhodesia. Kambe ke, indlela abantu abayiqonda ngayo imvukelo okanye ubhukuqo-mbuso ixhomekeka koko bakuxelelwa zezopolitiko okanye unqulo. Ekuhambeni kwexesha iziganeko ezenzekayo zabonisa ukuba aba bachasi babezingela nezizathu ezingekhoyo ezazinokubangela ukuba amaNgqina kaYehova avalwe umlomo.

Xa abasebenzi basemigodini bagwayimbela ukuhlawula irhafu, abachasi babambelel’ apho betyhola amaNgqina njengachasa urhulumente. Ekuqaleni kwaloo nyanga, kwakukho indibano yamaNgqina eLusaka. Ngandlel’ ithile abachasi bathi loo ndibano yayihambisana nezixholoxholo ezazisenzeka kumgama ongaphezu kweekhilomitha ezingama-300 ukuya emantla. UThomson Kangale, owayelityendyana lomfana ngelo xesha, uthi: “Saqonda ukuba lixubayele. Sagqiba ekubeni singashumayeli, koko sihlale ezindlwini sicule iingoma zoBukumkani. Sasisazi ukuba asifanele sibandakanyeke kwimvukelo okanye kugonyamelo.” Sekunjalo, abazalwana babanjwa, yaye kwiidolophu ezininzi babesukelwa ezindlwini zabo kuthatyathwa uncwadi lwabo lweBhayibhile ngenkani okanye lutshatyalaliswe. Irhuluneli yakhupha umyalelo wokuba iimpapasho zethu ezingama-20 zingaphinde zibonwe kwelo.

Kwathunyelwa ikomishini yophando ukuba ikhe iphande ngolu qhushululu. Usodolophu walapho wathi: “AmaNgqina kaYehova nentlangano yeWatch Tower ayizange ifak’ isandla kwimvukelo.” Akukho nelinye iNgqina likaYehova elalikho kwezo zixholoxholo. Noko ke, incwadi ethi Christians of the Copperbelt yathi: “IKomishini Yophando . . . yamkela izityholo ezininzi ezazingenabungqina bubambekayo, yaye ingxelo yayo yabangela ukuba uncwadi lwamaNgqina kaYehova luvalwe. Kwimimandla eliqela, iinkosi zaziyiphathel’ iflegi ingcinezelo, zitshisa iindawo ahlanganisana kuzo amaWatchtower.”

Ngelo xesha, iofisi yaseKapa yayibeth’ ibuyelela kusosiba worhulumente wamathanga waseBritani icela ukuba “kuvunyelwe amalungelo anawo [amaNgqina] okunqula uYehova uThixo, ngaphandle kokuphazanyiswa.” Kwakhona yenza isicelo seofisi yommeli osisigxina. UYehova wazisikelela ezi nzame. NgoMatshi 1936 usosiba wakwamkela ngokusemthethweni ukumiselwa kwendawo yokothula uncwadi eLusaka nokuba uLlewelyn Phillips abe ngummeli.

Izinto Ezine Ezifunekayo

Ukumiselwa kwendawo yokothula uncwadi eLusaka yayiluloyiso lokwenene. Noko ke, irhuluneli ayizange iwamkele ngokusemthethweni amaNgqina kaYehova njengentlangano yonqulo de ichazelwe indlela alawulwa nasebenza ngayo amabandla. Kwiminyaka elandelayo, uMzalwan’ uPhillips nabanye abazalwana abathembekileyo bazibhokoxa ngamandla benceda futhi besomeleza abo banyanisekileyo, yaye babasusa kubudlelane abo babekhuthaza izenzo ezichaseneyo nezibhalo. Oovulindlela banikwa imiyalelo ngeemfundiso, ukuziphatha, kwanangemibandela ephathelele intlangano, baza emva koko baya kunceda amaqela namabandla.

Omnye umzalwana wathi xa wayethetha ngezinto ezazisenzeka ngelo xesha: “Oyena nyaka wawubalasele kubavakalisi baseZambia ngowe-1940. Kaloku, lo ngunyaka olwaphinda lwaqaliswa ngawo ubhaptizo olwayekwa ukususela ngowe-1925.”

UJames Mwango uthi: “Ngoku kwakufuneka umfundi weBhayibhile afunde oko sasikubiza ngokuba ziimfuneko ezine ngaphambi kokuba abhaptizwe. Emva kokuba ezifundile, wayebuzwa intsingiselo yazo ngumzalwana oza kumbhaptiza okanye omnye omiselwe sisicaka sebandla. Okokuqala kwakufuneka ayiqonde aze ayikholelwe inyaniso; okwesibini aguquke; okwesithathu afunde iLizwi likaThixo; okwesine azahlulele. Xa umfundi ezenze ngokupheleleyo ezi zinto, unokubhaptizwa. Le nkqubo yayisenzelwa ukuba kuqinisekwe ukuba abo bantywiliselwa emanzini bayabuqonda ubunzulu boko bakwenzayo.”

Ukwalelwa Koncwadi

Amagosa karhulumente acinga ukuba amaNgqina awathabathi cala kwizinto zawo ngenxa yokuba echasene norhulumente. NgoDisemba 1940, lwavalwa lonke uncwadi olupapashwe ngamaNgqina kaYehova. Kwanqunyanyiswa nokuba afumane uncwadi oluvela kwamanye amazwe. Ngentwasahlobo yowe-1941, urhulumente wawisa umyalelo wokuba bonke abaneempapasho zeWatch Tower bazizise ngaphambili ukuba abafuni kutshutshiswa nokuvalelwa entolongweni.

USolomon Lyambela, owayengumveleli ohambahambayo nowathi kamva waya kwiSikolo saseGiliyadi ukhumbula oku: “Safihla uncwadi kumaphenyane akuMlambo iZambezi. Olunye salubophelela phantsi kweebhedi saza safihla olunye koovimba bombona ocoliweyo namazimba.”

Omnye umzalwana wathi: “Kwakufuneka sizombele iincwadi zethu. Noko ke, kwakungekho sizathu sokuba siyifihle iBerean Bible esasiyithanda ngokwenene kuba yona yayingavalwanga. Salahlekelwa ziincwadi ezininzi—ezinye zatyiwa ziintubi yaye ezinye zabiwa. Ngenxa yokuba sasingapheli kwiindawo esasizembele kuzo iincwadi, amasela ayecinga ukuba sombele izinto zexabiso. Ndikhumbula ukuba ngeny’ imini ndathi ndiye kufunda etyholweni, ndafika iincwadi zethu zithe saa. Saziqokelela saza saya kuzifihla kwenye indawo.”

ULlewelyn Phillips waba nesibindi sokubhalela irhuluneli ekhalazela iimpapasho ezivaliweyo. Ekubeni wayesele esentolongweni ekuqaleni kwaloo nyaka ngenxa yokwala ukungenelela emkhosini, uMzalwan’ uPhillips wagwetywa ezinye iinyanga ezintandathu. Umzalwana owayekhonza ngokuzithandela kwindawo yokothula uncwadi eLusaka wathi: “Kwakusoloko kufika abantu beSebe Eliphanda Ngolwaphulo-mthetho [Criminal Investigation Department], yaye uMzalwan’ uPhillips wayesoloko ebizwa kwisikhululo samapolisa.” Sekunjalo, uMzalwan’ uPhillips akazange aphele mandla ekukhuthazeni ulungelelwano nenzondelelo emabandleni. Kwabakho abazalwana abafanelekayo abaqeqeshelwa ukuba ngabaveleli abahambahambayo baza bathunyelwa kwizabelo zabo. Umsebenzi ababewenza wabangela ukuba, ngowe-1943 kufikelelwe incopho yabavakalisi abangama-3 409.

Inkqubela Ethe Ngcembe Ekhokelela Kwinkululeko Yokwenene

Emva kwemfazwe, iofisi yamaNgqina kaYehova eseBritani neseMzantsi Afrika zaqhubeka zicela ukuba iOfisi Yamathanga eseLondon izimisele ngokusemthethweni iimpapasho zethu. Urhulumente wathi akufumana isibongozo esityobelwe ngabantu abangaphezu kwama-40 000 ababexhasa umsebenzi wokufundisa owawusenziwa ngamaNgqina kaYehova, wavuma ukuba ezinye zeempapasho ezazivaliwe zisetyenziswe. Sekunjalo, IMboniselo yaqhubeka ivaliwe.

NgoJanuwari 1948, uNathan Knorr noMilton Henschel ababesuka kwikomkhulu lamaNgqina kaYehova eBrooklyn batyelela kwelo lizwe. Emva kwendibano yeentsuku ezine eyayiseLusaka, badibana nonobhala wemicimbi yezangaphakathi kunye negqwetha likarhulumente elabaxelela ukuba neminye imiqathango esaseleyo iza kususwa kungekudala. Hayi imincili ababa nayo abantu bakaYehova xa umsebenzi wabo wada wamiselwa ngokusemthethweni! NgoSeptemba 1, 1948, kwamiselwa iofisi yesebe entsha ngegama elithi amaNgqina kaYehova endaweni yelithi Watch Tower Society. Abasemagunyeni, abemi balapho, nditsho nabazalwana ngokwabo baqonda ukuba ngoku uza kucaca umahluko phakathi kwamaNgqina kaYehova namahlelo anamathele kwezomthonyama nazibiza ngokuba ngama-“Watch Tower.”

Kwiminyaka engama-40 edluleyo, abachasi bonqulo, ababengenamdla wokwenza abafundi bakaKristu, bazabalazela ukuphelisa ukholo lwabo babephulaphula iindaba ezilungileyo. AmaNgqina kaYehova ekwakusithiwa “ngabakhohlisi” aqhubeka ezingqina njengabalungiseleli bakaThixo abanenyaniso. (2 Kor. 6:8) Besazi ukuba babeza kusebenza ngokukhululekileyo emva kwemfazwe, bakulungela ukunyamekela ulwando olwaluza kubakho.

Inkonzo Yobuvangeli

UIan (John) Fergusson, owakhonza eZambia iminyaka wathi, “Omnye wemivuzo oyifumanayo xa ungumvangeli wasemazweni kukubona indlela uYehova azisebenzisa ngayo iintlobo ezahlukeneyo zamadoda nabafazi ekuzalisekiseni injongo yakhe. Kwakhona kuyavuyisa ukubona indlela abantu abaluxabisa ngayo uncedo lokomoya abalufumanayo.” Abavangeli bezinye iicawa bazixakekise kakhulu ngezentlalo noqoqosho, ngoxa abavangeli abangamaNgqina kaYehova bemilise iingqondo zabo ekwenzeni abafundi abangamaKristu. Baye babonisa ukuba lo msebenzi wobuthixo bawenza “ngothando olungenaluhanahaniso.”—2 Kor. 6:6.

Lo moya wobuvangeli ubonakala kubantu abafana noWilliam Johnston, owathi ngaphambi kweMfazwe Yehlabathi 1 walityhutyha lonke elikumazantsi eAfrika. Ngowe-1921 uPiet de Jager, uParry Williams nabanye, baya kufikelela eSalisbury (ngoku eyiHarare), ikomkhulu loMzantsi weRhodesia (ebizwa ngokuba yiZimbabwe). Ngeminyaka yee-1920, uGeorge Phillips, uThomas Walder noWilliam Dawson banikel’ ingqalelo kumNtla weRhodesia. Nabanye abaziinzalelwane zomNtla Rhodesia abadibana naBafundi BeBhayibhile kwezinye iindawo ababesebenza kuzo babuya beze kusasaza “iindaba ezilungileyo zezinto ezilungileyo.” (Roma 10:15) Abanye abazibhokoxayo kulo msebenzi ngaloo mihla nguManasse Nkhoma no-Oliver Kabungo. UJoseph Mulemwa, ongummi womthonyama waseZambia, wafumana inyaniso kumgodi waseWankie (ngoku oyiHwange), emantla eZimbabwe, yaye kamva wakhonza ngokuthembeka kummandla osentshona weZambia. UFred Kabombo waba ngumveleli ohambahambayo wokuqala kuloo mmandla. Aba bazalwana yayingoovulindlela bokwenene abaya kwimimandla enabantu abangenalo nofifi ngeendaba ezilungileyo baza babeka isiseko esiqinileyo solwando olwaluseza kubakho.

Ngasekupheleni kwemfazwe yehlabathi yesibini, uCharles Holliday waseMzantsi Afrika wasabela kwisimemo sikaGeorge Phillips owayekwiofisi eseKapa sokutyelela amaqela abantu abanomdla ababekwiPhondo eliseNtshona. Ekunye nomzalwana wasekuhlaleni owayeza kumtolikela, bahamba ngololiwe owayethwele imithi yamaplanga, ngephenyane nangenqwelwana ethile kaloliwe. Ekufikeni kwabo eSenanga, idolophana ekumgama oziikhilomitha ezingama-250 emantla eVictoria Falls, bahlangatyezwa yindimbane yabantu. Abanye kuloo ndimbane bahamba iintsuku ezininzi beze kuphulaphula iinyaniso zeBhayibhile eziziswe ngulo mntu wasemzini.

Kufika Abavangeli BaseGiliyadi

Ngowe-1948, abavangeli basemazweni ababini, uHarry Arnott noIan Fergusson bagaleleka eZambia. Ngesi sihlandlo ingqalelo yayinikelwe kumawaka abantu abamhlophe ababeze kusebenza kumgodi wobhedu. Intsabelo yayincumisa ngokwenene. AmaNgqina akhuthalele intsimi anda aya kutsho kuma-61 ekhulwini ngaloo nyaka.

Kwiindawo ezininzi babedla ngokuba noludwe lwabantu abalindele ukuqhutyelwa izifundo zeBhayibhile. Iofisi yesebe yathenga ilori encinane evalekileyo, iDodge eneminyaka eli-10 ubudala, eyayisetyenziswa ngabanye abaveleli abahambahambayo abangabavangeli xa besiya kwimimandla ethe qelele kwiindawo zoshishino. Enye ingxelo ephuma kwisebe yathi, “Yayisebenza ngokwenene, ngoxa maxa wambi yayibuya seyibik’ amahlaba.”

Ngowe-1951 kwakukho abavangeli basemazweni abathandathu kweli lizwe. NgoDisemba 1953 kwafika abanye abathandathu. Kweli qela kwakukho uValora noJohn Miles abakhonza eZambia iminyaka emithandathu ngaphambi kokuba bathunyelwe eZimbabwe naseLesotho. Kwiminyaka eyalandelayo kwafika abavangeli basemazweni abangakumbi: UJoseph Hawryluk, uJohn noIan Renton, uEugene Kinaschuk, uPaul Ondejko, uPeter noVera Palliser, uAvis Morgan nabanye, yaye bonke aba bazibhokoxa ngokwenene. Ewe, ukuze baphumelele kwinkonzo yabo ekhethekileyo kwakufuneka bancame izinto ezininzi yaye benze uhlengahlengiso.

“Useyidyongo!”

Ecinga ngendlela awavakalelwa ngayo xa efumana isabelo sokuba aye eZambia, uWayne Johnson uthi, “Ndandiqinisekile ukuba kuphazanyiwe.” Ngowe-1962, kwafika uWayne, owayephumelele kwisikolo saseGiliyadi seklasi yama-36, ehamba noEarl Archibald. Sithetha nje, ungumveleli ohambahambayo eKhanada kunye nomfazi wakhe uGrace. Uthi: “Ndandineminyaka engama-24 kuphela ubudala yaye ndandikhangeleka ndingaphantsi nalapho. Xa ndandifika ebandleni, ndisafunda isiChinyanja [ngoku sisiChichewa], ndandidla ngokuva oodade besebezelana besithi: ‘akali mwana’—‘Useyidyongo!’”

UWayne uthi: “Ndaqonda ukuba kuza kufuneka ndayame ngoYehova nentlangano yakhe. Ndandifuna bonke bazi ukuba ngokutsho kweZenzo 16:4, ndandidlulisela ulwalathiso nenkcazelo elungiselelwe nguYehova nentlangano yakhe. Kwakhona ndandizama ukwenza izinto ngendlela eyamkelekileyo kwabanye. Andikayikholelwa nangoku into yokuba ndafumana ilungelo elinjalo.”

Ukugxothwa!

Izinto zatshintsha ngeminyaka yee-1960 neyee-1970. Ngamaxesha athile kwakuqhambuka intshutshiso kwelo lizwe. Emva kokuba iZambia ifumene inkululeko ngowe-1964, abazalwana baba sengxakini enkulu yokukhahlela indwe nokuvuma umhobe wesizwe. Ngasekupheleni kweminyaka yee-1960, amanye amalungu ezobupolitika athi abavangeli basemazweni baphembelela abantu ukuba bachase iinjongo zikarhulumente. Ingxelo esuka kwisebe ithi naku okwenzekayo: “Ngenj’ ixukuxa ngoJanuwari 20, 1968, abaveleli abahambahambayo abakhonza kumabandla athetha isiNgesi bafowunela iofisi yesebe beyixelela ukuba bayagxothwa. Okubangel’ umdla kukuba, kwakungagxothwa nje amaNgqina kaYehova aphuma kumazwe angaphandle, kodwa nalawo ayinzalelwane yaseZambia, njengoGeorge Morton noIsaac Chipungu.”

Yonke le nto yenzeka ngephanyazo. Ngaloo mini ngentsimbi yeshumi kusasa, kwiofisi yesebe kwagaleleka amagosa ajongene nabantu abasuka kwamanye amazwe ephethe amaphepha abonisa ukuba izibini ezingabavangeli basemazweni ezihlanu ezazilapho maziphume ziphele. UFrank Lewis ukhumbula oku: “Bafika ngequbuliso. Kwagqitywa kwelokuba abazalwana abangabavangeli abasebenza eofisini baphume ngomnyango ongasemva babalekele kwikhaya lomnye umzalwana. Ukufika kwabo apho babeza kuqalisa ukwenza izinto ekwakugqitywe ukuba zenziwe xa kunokwenzeka ukuba umsebenzi uvalwe. Sekunjalo, sathandabuza ukumka kuba omnye udade ongumvangeli wasemazweni wayenemalariya yaye imphethe ngendlela engaginyisi mathe. Kodwa abazalwana basekuhlaleni basicenga ukuba sihambe, besithi baza kumnyamekela. Sasisazi ukuba abasiqhathi.

“Hayi indlela ezasikhwankqisa ngayo iindaba ezazikwiphepha iTimes of Zambia zokuba iWatchtower, njengoko babesibiza njalo, ivaliwe yaye ‘abaphathi’ bayo bazimele. Amagama ethu ayekwiphepha lokuqala kwelo phephandaba, kusithiwa abasemagunyeni basigqogqa kuzo zonke izindlu ezikuloo dolophu! Abazalwana basekuhlaleni ababesebenza eofisini benza umsebenzi omhle kakhulu. Bathutha iifayile noncwadi bazisa kwiindawo ezahlukeneyo. Bathi bakugqiba ukwenza yonke loo nto, sabuyela kwisebe ukuze siziveze kwabasemagunyeni.”

Kwathunyelwa ipolisa kwiofisi yesebe, ibe kwagxothwa abathile kubavangeli nabanye abazalwana abasuka kwamanye amazwe. UMzalwan’ uLewis uthi: “Saba ngabokugqibela ukuhamba. Sisenesingqukru nangoku xa sicinga ngeqela loodade esasingabazi ababehambe umgama weekhilomitha ezingama-25 besuka eKalulushi bekunye nabantwana babo beze kuthi ndlela-ntle!”

Kuyagxothwa Kwakhona

Ladlula ixesha. Ngowe-1975, uAlbert Musonda, ngoku olilungu leKomiti yeSebe eZambia, wayeneminyaka engama-22 ubudala yaye ekhonza eBheteli kwiSebe Lezemali. Ngenye imini ngaloo nyaka kwagaleleka amapolisa eBheteli ngequbuliso. Uthi: “La mapolisa athi kwiintsuku nje ezimbini abavangeli basemazweni kufuneka babe bengabonakali nangomkhondo kweli lizwe.”

UJohn Jason walek’ umsundulo ngelithi: “NgoDisemba 1975, nathi safumana isiqwengana seleta evela kwiofisi ejongene nabantu abaphuma kwamanye amazwe eyayisithi kwiiyure nje ezingama-36 kufuneka sibe sesingasekho kwelo.” Kwafakwa isibheno kusetyenziswa igqwetha lasekuhlaleni, laza lanyenyiswa elo xesha ukuze bakwazi ukuqoqosha izinto zabo kakuhle. UMzalwan’ uJason uthi: “Emva koko, sashiya abantu esasibathanda ngokwenene.”

Umfazi ka-Albert, uDailes, ukhumbula oku: “Sapheleka abazalwana bethu ngoxa babesiya kwiSikhululo Senqwelo-moya saseSouthdown siye kuthi ndlela-ntle kubo. UJohn Jason wakhwela inqwelo-moya eya eKenya, waza yena uIan Fergusson wakhwela kwesinge eSpeyin.” Yintoni eyabangela ukuba baphinde babagxothe abavangeli?

Abaninzi bacinga ukuba yaba yindibano eyayingowe-1975. UJohn Jason ukhumbula oku: “Yayiyenye yeendibano ezinkulu ezazikho ngexesha lezidubedube, ekwakuze kuyo abantu abangaphezu kwama-40 000.” Ngelo xesha, kwakukho nentlanganiso yezobupolitika eyayikufuphi nendawo eyayinendibano. Abanye ababekuloo ntlanganiso babefuna ukuba amaNgqina kaYehova ohlwaywe ngokuqatha ngenxa yokuba engathabathi cala kwezobupolitika. UMzalwan’ uJason ukhumbula ukuba kwakusithiwa yiloo ndibano eyabangela ukuba abantu abaninzi bangabikho kwintlanganiso yezobupolitika.

Ukubuya Kwabavangeli Basemazweni

Kwadlula iminyaka elishumi ngaphambi kokuba abavangeli basemazweni babuyele eZambia. Ngeminyaka yee-1980 ezobupolitika zazinza, yancitshiswa nemiqathango. Ngowe-1986, kwafika uEdward Finch nomkakhe uLinda bevela eGambia. Kwakuseza kufika abanye, kuquka uAlfred noHelen Kyhe; kunye noDietmar noSabine Schmidt.

NgoSeptemba 1987, kwafika uDayrell noSusanne Sharp abadlula eMzantsi Afrika bevela eZaire, ngoku eyiDemocratic Republic of the Congo. Babephumelele eGiliyadi ngowe-1969 baza baya kumsebenzi wokuhambahamba eCongo. Babeqhelene nendlela ekuphilwa ngayo kumbindi weAfrika. Sithetha nje uDayrell, owayesisigantsontso sendoda, ngoku uneminyaka engaphezu kwengama-40 ekwinkonzo ekhethekileyo yexesha elizeleyo. Uthi: “Kangangeminyaka ikhaya lethu labavangeli basemazweni laliseLubumbashi, kufuphi neZambia, ngoko sasisiya rhoqo eZambia.”

USusanne uzikhumbula kakuhle izinto ezazisenzeka ngelo xesha. Uthi: “Ekuqaleni kweminyaka yee-1970, sasisiya kuthenga ukutya eZambia rhoqo emva kweenyanga ezimbalwa kuba kwakunqongophele ngokwenene eCongo. Ekuqaleni kowe-1987, iQumrhu Elilawulayo lasinika isabelo esitsha—sasiza kuya phi? EZambia!” Ngenxa yokuba umsebenzi wabakwaSharp wawusemiqathangweni kakhulu eCongo, bakuvuyela ukuya kwilizwe elalinenkululeko yonqulo.

Sekunjalo, kwakufuneka kwenziwe uhlengahlengiso entsimini nakwisebe. Ngenxa yokuba kwakuvalwe iinxalenye ezithile zomsebenzi wokushumayela esidlangalaleni, abazalwana abaninzi babeqhuba izifundo zeBhayibhile kuphela. Abavakalisi abaninzi babengakuqhelanga ukushumayela ngokukhululekileyo kwindlu ngendlu—eyona ndlela ashumayela ngayo esidlangalaleni amaNgqina kaYehova—ngoko babezibambile. Ekugqibeleni, abazalwana bakhuthazwa ukuba bashumayele ngesibindi kwindlu ngendlu, ekubeni ngoku sele kulula ukushumayela kwelo lizwe yaye namapolisa engasenaxesha lomsebenzi wethu.

Ukuqhubela Phambili, Singahlehleli Emva

IKomiti yeSebe yayixhalatyiswe kukungabikho kolwando kwiminyaka yee-1970. Isithethe sasekuhlaleni sabangela ukuba kube nzima ukuba abazali bafundele abantwana babo, yaye ekubeni umsebenzi wendlu ngendlu wawuvaliwe, ootata babedla ngokucela abanye abavakalisi ukuba babafundele. Ngoku kwakufuneka umntu abe nesibindi sokuzenzela isigqibo. Kwiminyaka eyalandelayo, kwakhuthazwa abavakalisi ukuba bazikhwebule kwizithethe nezenzo ezichaseneyo nezibhalo. Amabandla asikelelwa ngenxa yokuba asabela kakuhle kolu khuthazo, yaye abazalwana bazama ngako konke ukuba baphile ngokuvisisana nemigaqo yeBhayibhile nobuzalwana behlabathi lonke.

Kwiminyaka emihlanu emva kokugxothwa kwabazalwana ngowe-1975, inani labavakalisi lehla nge-11 ekhulwini. Ngokwahlukileyo koko, kwiminyaka emihlanu emva kokubuya kwabavangeli basemazweni ngowe-1986, incopho yabavakalisi yayingaphezu kwama-50 ekhulwini. Ukususela kuloo nyaka, inani labavakalisi laphindaphindeka.

Ebhalela iofisi yesebe, uSilas Chivweka, owayesakuba ngumveleli ohambahambayo wathi: “Ukususela ngeminyaka yee-1950 ukuya phambili, abavangeli basemazweni abaqeqeshwe eGiliyadi banceda abanye abazalwana ukuba babe ngabantu abaqolileyo. Aba bavangeli babenomonde, ingabantu abaqondayo nabanobubele. Ngenxa yokuba babesondelelene nabavakalisi, babezazi izinto ezazifuna ukulungiswa.” Olo ncedo lwalusenziwa ngothando nangokunyaniseka lwabangela ukuba ulwando luqhubeke de kube ngulo mzuzu.

Ilizwi Elibhaliweyo

NjengoPawulos namaqabane akhe, namhlanje amaNgqina kaYehova azingqina engabalungiseleli bakaThixo ngokusebenzisa ‘izixhobo zobulungisa kwisandla sasekunene nesasekhohlo.’ (2 Kor. 6:7) Aqhubeka esilwa imfazwe yokomoya “ngezixhobo” zobulungisa okanye ngeendlela zokuhambisela phambili unqulo lokwenyaniso.

Ngaphambili, iimpapasho zethu zazifumaneka ngesiNgesi kuphela. Nangona babekho abantu ababerhumela IMboniselo kumazantsi eAfrika ekuqaleni kowe-1909, ubukhulu becala inyaniso yeBhayibhile yayisasazwa ngomlomo. Omye umzalwana owayephila ngaloo maxesha uthi: “Kwilali nganye kwakukho [indawo yokuhlanganisana] ukuze abantu baxelelwe izinto abanomdla kuzo. Umzalwana osaziyo isiNgesi wayeguqulela iziqendu ngolwimi lwasekuhlaleni. Kwakuphendulwa nemibuzo abanayo abantu.” Kakade ke, abantu babexhomekeka kwindlela oguqulelwa ngayo umbandela nakwiintshukumisa zalowo uguqulelayo ukuze bayiqonde ngokuchanileyo inyaniso. Ngoko ke, ukuze abantu abanomdla bamanyane yaye babe nolwazi oluchanileyo lweBhayibhile, kwakufuneka bafumane iincwadi ezisekelwe eBhayibhileni ngolwimi lwabo.

Iimpapasho Ziyafumaneka

Ngowe-1930 kwakhutshwa incwadi ethi The Harp of God kunye neencwadana ngesiChinyanja. Ngowe-1934 iqaqobana labavakalisi abakhutheleyo lasasaza uncwadi olungaphezu kwe-11 000. Oku kwabacaphukisa abachasi, abathi kamva ‘bayila inkathazo ngommiselo.’ (INdu. 94:20) Sekunjalo, ngasekupheleni kowe-1949, ngoxa iphephancwadi IMboniselo lalisele livunyelwe ukuba lisetyenziswe, ngoko iphephancwadi lesiCibemba eliphuma kanye ngenyanga lalikhutshelwa lize lithunyelwe kwabo balirhumeleyo.

UJonas Manjoni ukhumbula indlela awayesebenza ngayo ekuqaleni kweminyaka yee-1950. Uthi: “Yayindim ndedwa owayeguqulela ngesiCibemba. Ndandifumana umbhalo wesiNgesi, ndiwuguqulele, ndize emva koko ndilungise iimpazamo. Ndakugqiba ndandiwukhuphela kwistensile ndize ndenze eminye imibhalo. Ukwenza oko kwakufuna ixesha; maxa wambi kwinkupho nganye kwakufuneka imibhalo engama-7 000. Ndandisenza yonke into ngesandla kwiphephancwadi ngalinye, ndize ndakugqiba ndidibanise amaphepha. Emva koko ndandiwathumela emabandleni loo maphephancwadi. Kwakungeyondlwan’ iyanetha ukufaka izitampu kwizixa zamaphephancwadi, uzifake ebhokisini uze uzise eposini.”

Nakuba ubugcisa babungekho kangako ngaloo maxesha, abaguquleli babezinikela kumsebenzi wabo, becinga ngemiphumo yawo. Ngoxa uJames Mwango wayengumveleli ohambahambayo, wayeguqulela ngesandla yaye izihlandlo ezininzi wayesebenzisa amakhandlela. Uthi: “Akukho nanye imini endakhe ndaziva ndidiniwe ngulo msebenzi. Ndandivuyiswa kukwazi ukuba ukuzibhokoxa kwam kubangela ukuba abazalwana bafumane ukutya kokomoya okubanceda babe ngabantu abaqolileyo.”

‘Ukutshintshana Ngezandla’

Ukuze umguquleli adlulisele inkcazelo echanileyo kufuneka azi ulwimi lwakhe nesiNgesi ngendlela echanileyo. UAaron Mapulanga uthi: “Xa uguqulela, kubakho amabinzana anentsingiselo eyahlukileyo kwindlela abhalwe ngayo. Ndikhumbula sixoxa ngebinzana lesiNgesi elithi, ‘to change hands,’ elalikwimpapasho eyayithetha ngoEliya owaphos’ iintambo kuElisha. Omnye umzalwana waliguqulela njengokuba linjalo eli binzana. Ndandingaqinisekanga enoba umbandela lowo wawuthetha ‘ngokutshintshana ngezandla’ ngokoqobo kusini na. Emva kokuba sibuze uluvo lwabanye abazalwana ngeli binzana, yatsho yathi tha eyona ntsingiselo yalo echanileyo. Ndikhumbula nokuba sasiyalelwe ukuba singaguquleli igama negama kuba inguqulelo yethu yayiza kuvakala ngathi sisiNgesi. Sazabalazela ukuguqulela ngendlela esithetha ngayo.”

Ubugcisa Buyanceda

Ngowe-1986 iofisi yesebe yaqala ukusebenzisa iMEPS (indlela elifinyezwa ngayo ibinzana elithi multilanguage electronic phototypesetting system). Le nkqubo iye yawukhawulezisa ngokwenene umsebenzi wokuguqulela, ukuhlola ukuchana kwenguqulelo nokushicilela. Ngoku kusetyenziswa iWatchtower Translation System neetranslation tools. Sithetha nje amaqela aguqulela ngezona lwimi zisetyenziswa ekuhlaleni aguqulela iimpapasho ezisekelwe eBhayibhileni abakwaziyo ukuzifunda abantu abaninzi baseZambia. INguqulelo Yehlabathi Elitsha nezinye ‘izixhobo zobulungisa’ ziza kuqhubeka zifak’ isandla ekuncedeni abantu abaneentliziyo ezinyanisekileyo bamazi uYehova.—2 Kor. 6:7.

Ukunceda Iimbacu

Abantu abaninzi baseAfrika bonwabile yaye baseluxolweni. Okulusizi kukuba ubomi babaninzi bonakaliswe ziimfazwe. Ngokuqhwanyaza kweliso abamelwane baba ziintshaba, abantu abangenatyala bayasaba kumakhaya abo, uluntu luxhwalekile. Iimbacu zisaba nemigodlwana yazo zifuna indawo ekhuselekileyo. Abantu abaninzi namhlanje baphila le mpilo.

NgoMatshi 1999, eZambia kwagaleleka amawaka abantu ababesaba ungquzulwano olwalukwiDemocratic Republic of the Congo. Njengakwiimfazwe ezininzi, amajoni ayephanga izinto zabantu, enyanzelisa amadoda ukuba athwale imithwalo enzima yaye exhaphaza abafazi nabantwana. Ekubeni amaNgqina kaYehova engaziphakamisi izixhobo zokulwa, amaninzi ayesenziwa intlekisa yaye ebethwa ngenkohlakalo. UKatatu Songa, uvulindlela othe ngxi onenzondelelo okwiminyaka yama-50 ubudala uthi: “Bandilalisa phambi kwabafazi nabantwana baza bandityakatya de ndamkelwa ziingqondo.”

Iintsapho ezininzi zasaba ngenxa yale mpatho. UMapengo Kitambo walahlekana noonyana bakhe kumatyholo axineneyo. Uthi: “Kwakungekho xesha lokube ukhangelana nomnye umntu. Kwakusiyiwa phambili nje qha, nangona iintliziyo zaziba buhlungu xa sicinga ngabantu esibathandayo.” Abaninzi babaleka amakhulu eekhilomitha ngeenyawo okanye ngeebhayisikile befuna indawo ekhuselekileyo.

Idolophana yaseKaputa yayizel’ iphuphuma ziimbacu. Kwezo mbacu kwakukho abazalwana abaphantse babe ngama-5 000 bekunye neentsapho zabo, bedinwe bephelile lolo hambo lude nolunzima. Abavakalisi boBukumkani abangama-200 ababehlala kuloo dolophana babamkela ngezandl’ ezishushu abazalwana noodade nangona babengabalindelanga. Omnye umzalwana owayeyimbacu uManda Ntompa ukhumbula oku: “Sasingawuvali umlomo luthando nobubele esenzelwa bona. Bathi bakuva ukuba singamaNgqina kaYehova, abazalwana basekuhlaleni bawavula amakhaya abo. Njengomhlolokazi waseTsarefathi, babesibonelela ngokusiwa phantsi kwempumlo, sisity’ into abayityayo.”

Kufuphi nonxweme lweChibi iMweru elisemantla, iqaqobana lamaNgqina ahlala apho lalinyamekela amakhulu eembacu. Azilungiselela ukutya neendawo zokufak’ iintloko. Amabandla akufuphi ayesiza necassava kunye nentlanzi. Ekugqibeleni, emva kweenyanga ezintathu, amaNgqina aseCongo abhaliswa ngokusemthethweni aza athunyelwa kwiinkampu zeembacu.

Abantu ababaleka imfazwe akufane kwenzeke ukuba bahambe neencwadi namaphephancwadi. Xa bezimela buphuthuphuthu bayazishiya izinto ezixabisekileyo. Kwenzeka into eyahlukileyo kubantu bakaThixo. Nangona babebhuduzela, kodwa iqaqobana labo lakwazi ukufaka iincwadi kwimigodlwana yalo. Nakuba kunjalo, iiBhayibhile kunye neencwadi zazinqongophele. Abantu abali-150 abeze ezintlanganisweni babedla ngokwabelana ngeencwadi ezintlanu kuphela. Babeza kukwazi njani ukuba nenxaxheba? Omnye umzalwana uthi: “AbaneeBhayibhile babeye bakhangele iZibhalo, baze abangenazo babaze iindlebe. Ngaloo ndlela bonke babedumisa uYehova yaye bekhuthazana ngamagqabaza abo.”

Kunyanyekelwa Iimfuno Zenyama

Iimbacu ezininzi ngabafazi nabantwana. Basoloko benempilo enkenenkene yaye bengenako okusiwa phantsi kwempumlo. AmaNgqina kaYehova aye abanceda njani? Iphephandaba iTimes of Zambia lathi: “Okuvuyisayo kukuba uMbutho WamaNgqina KaYehova oseZambia uye wathumela abasebenzi bokuzithandela ukuba baye kunciphisa umthwalo weembacu kummandla weGreat Lakes, eZaire.” Eli nqaku lathi amaNgqina aseBelgium, eFransi naseSwitzerland “anikela ngamayeza anobunzima obuziikhilogram ezingama-500, iitoni ezili-10 zezinto ezineevithamini, iitoni ezingama-20 zokutya, iimpahla eziziitoni ezingaphezu kwama-90, izihlangu ezili-18 500 neengubo ezili-1 000. Xa zizonke ezo zinto zixabisa malunga nesigidi seedola.”

UMzalwan’ uNtompa uthi: “Sachulumanca ngokwenene ukufika kwezo zinto yaye ukholo lwethu lomelela. Hayi indlela ebanyamekela ngayo abantu bayo le ntlangano! Oku kwazitshintsha iimbono zamalungu eentsapho angengomaNgqina. Abanye basithelela ukususela ngoko, ibe ngoku benza inkqubela ekukhonzeni uThixo.” Ezo mpahla naloo mayeza abelwa zonke iimbacu kungakhethwa buso.

Ngasekupheleni kowe-1999, inani labantu abangenandawo zokuhlala landa laya kutsho kuma-200 000. Iphephandaba lasekuhlaleni lathi: “IZambia iye yaba lelinye lamaziko amakhulu eembacu zaseAfrika ezisaba iimfazwe eziqhubeka kumazwe azo.” Nangona abasemagunyeni bezama ngako konke abanako ukuhlangabezana neentswelo zeembacu, udandatheko nokungabikho kolwaneliseko kuye kwabangela ukuba iimbacu zaseAfrika ziqhankqalaze. Emva kolunye uqhankqalazo, abaphathi benkampu batyhola umveleli wesiphaluka besithi woyisakele ukufak’ isandla ekubeni kubekho ucwangco, nangona amaNgqina kaYehova engazange abandakanyeke kolo qhushululu. Lo mveleli waphendula ngesibindi kodwa ngokuzithoba esithi: “Ndinincedile! Khanicinge indlela ebekuza kuba kubi ngayo ukuba bekongezeleleke abanye abantu abangama-5 000 kweli hlokondiba! Nina ngenibulela nje ukuba iimbacu ezingama-5 000 ezingamaNgqina bezingekho kolo qhankqalazo. Ngabazalwana bam ke aba ndithetha ngabo!”

AmaNgqina kaYehova ayesaziwa njengabantu ababangela ukuba kubekho uxolo kwinkampu yeembacu. Elinye igosa laseburhulumenteni lathi: “Sivile ukuba amaNgqina kaYehova ngabantu abaluthanda ngokwenene unqulo, yaye ngenxa yoko amaninzi kuwo siwanike imbopheleleko yokuba abone ukuba izinto zenzeka ngocwangco kwiinxalenye ezithile zeenkampu. Athe akuphath’ iintambo, kwakho ucwangco enkampini, yaye wonk’ umntu umilisel’ ingqondo ekufundeni iBhayibhile. Ndiyambulela uThixo ngokusinika abantu abanjalo nangoxolo olukule nkampu.”

Ukuthobela Umthetho Wokungatyiwa Kwegazi

Nakubeni ungeyonto intsha umyalelo weZibhalo wokuba ‘sizikhwebule egazini,’ kodwa umbandela wokungatofeli gazi uye awangena ncam ezingqondweni zabo bakwimimandla yeAfrika ekumazantsi eSahara. (IZe. 15:28, 29) Okulusizi kukuba, amaNgqina kaYehova aye aphathwa ngenkohlakalo aza enziwa intlekisa. Umntwana osesibhedlele wayedla ngokutofelwa igazi ebusuku xa abazali bengekho.

UMichael owayehlala noninakhulu uJenala Mukusao, owayeneminyaka emithandathu ubudala, walaliswa esibhedlele eneanemia. Oogqirha bathi makatofelwe igazi. Wathi akungavumi udade Mukusao bamoyikisa ngezinto ezininzi baza bamphatha kakubi kangangeentsuku ezine. Uthi: “Ndabacenga ndibabonisa ikhadi iMedical Directive, kodwa babengafuni nokuva. Abongikazi bathi ndiligqwirha elifuna ukubulala umzukulwana walo.”

Ngenxa yaloo nkohlakalo, abanye babengafuni nokulubek’ unyawo esibhedlele. Oogqirha abaninzi babengalise so ilungelo labaguli lokunyangwa ngaphandle kwegazi. Iqaqobana loogqirha lalixolele ukwenziwa amakheswa ngabanye oogqirha ababesithi lenza into engamkelekanga kwezonyango. Kwakhona ucelomngeni yayikukunqongophala kwezibhedlele ezisemgangathweni nezinto ezinokusetyenziswa endaweni yegazi. Noko ke, ngowe-1989, igosa eliphambili lezonyango kwimigodi yobhedu lathi, “Abantu abafanele batofelwe igazi xa bengafuni.” Kuyabonakala ukuba oogqirha abaninzi babesele beyekelele.

Iikomiti Ezinegalelo

Ngowe-1995, eZambia kwamiselwa iSebe Lenkcazelo Yezibhedlele kunye neeKomiti Zokunxibelelana Nezibhedlele (Hospital Liaison Committees [HLC]). Bambalwa ababelibona igalelo ezaziza kuba nalo ezi komiti kwisimo sengqondo sabezonyango ngokuphathelele ukunyangwa ngaphandle kwegazi namalungelo abaguli. Omnye umsebenzi weHLC kukutyelela izibhedlele, ukudlan’ indlebe noogqirha nokuthetha nabezonyango, konke oku ikwenzela ukuba kubekho intsebenziswano kuze kuphetshwe ungquzulwano. Abezonyango bachukumiseka lulwazi nobuchule abanabo abazalwana ababethetha nabo. Ngenxa yoku, elinye igosa lesibhedlele esikumazantsi eli lizwe laziva selisithi, “Ningoogqirha nina—qha anifuni kutsho.”

Ugqirha waseNetherlands osebenza kwisibhedlele esikhulu esikwintshona yeZambia wathi: “Kwiiveki ezimbini ezidluleyo besixubusha ngento esinokuyenza ukuze sinciphise ukusetyenziswa kwegazi ngenxa yeengozi okuzibangelayo. Namhlanje, besiwuxubusha neengcungela lo mbandela.” Kungekudala emva koko, abezonyango ababekwintlanganiso yeHLC bakhuthaza abanye abasebenza nabo ukuba baqiniseke ukuba abaphoswa. Le nkqubo yaqhwatyelw’ izandla ngabezonyango yaye endaweni yokuba bangquzulane nokungasetyenziswa kwegazi, basebenzisana nathi.

Amanye amalungu ekomiti kwakufuneka aqweb’ isibindi xa eza kuthetha noogqirha ababegqalwa njengoothixo kangangeminyaka. UMzalwan’ uSmart Phiri, owayengusihlalo wekomiti yaseLusaka uthi, “Ndakhula ndingazi nokuba kuyasa ngezonyango yaye oko kwakundenza ndizive ndimadolw’ anzima.”

Noko ke, ekuhambeni kwexesha ukunyamezela nokukholosa ngoYehova kwavuzwa. Elinye ilungu lekomiti lithi xa likhumbula ezo ntsuku: “Abathathu kuthi baya kudibana nogqirha, indoda ekwakungelula ukuthetha nayo neyayingumphathiswa wezempilo. Sasigevezel’ amadolo. Sathi xa siphambi komnyango weofisi yaloo gqirha, sacela uYehova ukuba asincede sithethe ngesibindi. Sancokola kamnandi naloo gqirha yaye wayevumelana kakhulu noko sasikutsho. Ndaqonda ukuba uYehova ungakuthi yaye asinasizathu sakoyika.”

Intsebenziswano yeHLC nabezonyango ibonakala kwindlela oogqirha abakulungele ngayo ukunyanga isigulo esinobuzaza ngaphandle kwegazi, nto leyo ababengenakuyenza kwiminyaka edluleyo. Ngo-Oktobha 2000, oogqirha ababini baba nesibindi sokwenza utyando kuBeatrice, imveku eyayineenyanga ezintandathu yaseDemocratic Republic of the Congo. Nangona olo tyando lwebiliary atresia lwenziwa ngempumelelo ngaphandle kwegazi, abantu basekuhlaleni babekugxeka kakhulu oko.

Noko ke, loo moya wehliswa liphephandaba elalinengxelo kaNjingalwazi uLupando Munkonge, owayesongamela iqela elalisenza olo tyando. Wayibek’ elubala indlela asihlonela ngayo isigqibo sabazali bakaBeatrice. Oku kwaba negalelo elikhulu ekuthothiseni ugculelo lwamajelo eendaba. Kwiinyanga ezimbini kamva, inkqubo kamabonwakude eyayithetha ngesi senzo yayincoma indlela esilumela ngayo unyango kwanotyando ngaphandle kwegazi.

“Ndicela Nikhawulezise”

Bambalwa oogqirha abangekayiqondi nangoku indlela esisebenza ngayo isazela samaNgqina ngokuphathelele igazi. Ngoku abaninzi bayaqonda ukuba ukusebenzisa ezinye izinto endaweni yegazi akuyongozi, kulula yaye kuyaphumelela—kwanakwimimandla yaseAfrika esezilalini. Abaguli abaninzi baye bawamela ngenkalipho amalungelo abo. Oku kuye kwafuna ukuba bafunde imibandela ebalulekileyo baze bafunde ukuthetha ngokholo lwabo.

Kwanabantwana baye ‘banikwa ulwimi lwabafundileyo.’ (Isa. 50:4) Ngaphambi kokuba atyandwe, uNathan, inkwenkwana eneminyaka esibhozo ubudala eyayine-osteomyelitis kwithambo lethanga elisekhohlo, yathi koogqirha: “Ndicela nikhawulezise xa nindityanda ukuze ndingophi kakhulu. Nincede ninganditofel’ igazi, kuba abazali bam noYehova soze banixolele.” Ukugqitywa kolo tyando, omnye woogqirha ababelapho wabancoma abazali bakaNathan ngendlela abamqeqeshe ngayo unyana wabo. Esitsho ngeliphantsi lo gqirha wathi: “Ndiyaqala ukukhunjuzwa sisigulana esincinane kangaka ngokubaluleka kokuhlonela uThixo.”

Umpostile uPawulos wathi: “Siyazincomela njengabalungiseleli bakaThixo, . . . ngokungalali ebusuku.” Ukungalali kwabakhonzi bakaThixo kusoloko kubangelwa kukuxhalabela abanye abakholwa nabo nokuhambisela phambili unqulo lokwenyaniso. (2 Kor. 6:3-5) Kusoloko kunjalo kwabo bakwiHLC. Ukuzincama okunjalo akusithelanga emehlweni abanye. Omnye udade wathi: “Andinamazwi okubulela. Kuyakhuthaza yaye kuyathuthuzela ukubona indlela abazincama ngayo abazalwana abakwiHLC, abangakhange balibazise xa bendifuna uncedo lwabo nabebezenza bafumaneke nanini na ndibafuna. Zange ndoyike xa kwakufuneka ndiphindele kwigumbi lotyando kwiiyure ezingama-24. Abazalwana babendomeleze ngokwenene.” Ewe, nakubeni kunikelwa ‘iingxelo ezimbi’ ngamaNgqina kaYehova, aye aqhubeka ezincomela njengabalungiseleli bakaThixo ngokusebenzisana ngokukhululekileyo nabezonyango. (2 Kor. 6:8) Esomelezwa ‘ziingxelo ezintle’ ezinikelwayo ngawo, aye azimisela ukuthobela umyalelo kaThixo wokuba ‘azikhwebule egazini.’

ISikolo Sokuqeqesha Abalungiseleli

Ilungu leKomiti yeSebe laseZambia, uCyrus Nyangu lithi: “Kumazwe amaninzi xa kubonwa iqela labafana abamalunga nama-25 nangaphezulu kuye kucingwe ukuba linenyakanyaka. Noko ke, kwiiklasi ezingama-31 zeSikolo Sokuqeqesha Abalungiseleli [Ministerial Training School (MTS)] kuye kwaqeqeshwa amaqela amadoda angamaKristu anamandla nazahluleleyo naye ayingenelo ngokwenene kwiindawo akhonza kuzo.” Ama-600 abo baphumelele kwesi sikolo sezizwe ngezizwe akhonza kwiinkalo ezahlukeneyo zenkonzo yexesha elizeleyo kumazwe amathandathu akumazantsi eAfrika. EZambia, bangaphezu kwesiqingatha ekhulwini abaveleli abahambahambayo abaphumelele kwesi sikolo. Kutheni sifuneka nje, ibe yintoni esiyiphumezayo?

Ukususela kwiklasi yokuqala eyaphumelela ngowe-1993, abavakalisi abakhutheleyo baye banda ngomlinganiselo ophantse ube ngama-60 ekhulwini eZambia. Sekunjalo, kusafuneka amadoda afanelekayo aza kunyamekela amabandla, ingakumbi kwingcinezelo ekhoyo ngoku yezithethe namasiko asekuhlaleni angqubanayo nemigaqo yeBhayibhile. Egxininisa indlela afuneka ngayo amadoda afanelekayo aza kwalusa naza kufundisa, omnye umzalwana ophumelele kwesi sikolo wathi: “Ingxaki esinayo entsimini kukuba abantu basoloko bebunyamezela ububi. Ndifunde ukuba kufuneka siyimele into elungileyo, singenzi nto echaseneyo nezibhalo.”

Okokuqala, abafundi bafundiswa izinto ezininzi ezintsha ezindlebeni zabo nezinzulu. Sekunjalo, abazalwana ababaqeqeshayo bakulungele ukubanceda. Omnye wabo bazalwana, uSarel Hart uthi: “Kum ukufundisa iklasi nganye kwakufana nokunyus’ abantu intaba. Ekuqaleni, bonke bajonge kuwe kuba bayaqala ukuhamba kule ntaba, bazama ukuqhelana nale ndawo yoyikekayo. Ngamathub’ athile, kubakho imiqobo endleleni. Bayayitsiba baze bathi xa bekude baphos’ iliso kwezo ndawo bacinga ukuba beziyimiqobo, bangaziboni.”

Abanye bachaza inkqubela yabo yokomoya ebangelwe sesi sikolo njengotshintsho ebomini babo. UElad, ngoku onguvulindlela okhethekileyo uthi: “Ndandizibona njengongakufanelekelanga ukufundisa nokuba ndisemncinane kakhulu ukuba ndinganeembopheleleko zebandla ezingakumbi. Isikolo sindenze ndazibona ukuba ndikufanelekele ukusetyenziswa. Kwibandla endabelwa kulo kuqala, abavakalisi abali-16 babengakwazi ukuqhuba izifundo zeBhayibhile ezinenkqubela. Sasidla ngokusebenzisa amacebiso esiwanikwayo size siqhelisele iintshumayelo ezithile ngaphambi kokuba siye entsimini. Ngowama-2001 elo bandla lakhula lanabavakalisi abangama-60 neqela elikwanti labantu abangama-20.”

Indlela Yokuhlola Impumelelo

Ziziphi ezinye izinto ezibangela ukuba esi Sikolo Sokuqeqesha Abalungiseleli sibe yimpumelelo? URichard Frudd, ongomnye wabazalwana abafundisayo uthi: “Sibethelela ukubaluleka kokuthobeka ngalo lonke ixesha, nokuba umntu angazicingeli ngaphezu koko amelwe kukuzicingela ngako. Kufuneka umntu oqolileyo, onemfesane nonobuchule bokusingatha iingxaki ezinzima ngobuso obukhululekileyo. Ukuba abazalwana bayakwazi ukuqhubana kakuhle nabanye, bebonisa ukuba bafuna ukubakhonza kunokuba bakhonzwe ngabo, siyaqiniseka ukuba injongo yesikolo iphumelele.”

Abafundi bayakuqonda ukuchana kwala mazwi. UEmmanuel, owaphumelela kwiklasi ye-14, uthi: “Ebandleni esabelwe kulo akufuneki sifike sesingxamele ukulungisa yonke into. Kunoko, simele sinikel’ ingqalelo ekufaken’ isandla kumsebenzi obalulekileyo owenziwa libandla, ukushumayela iindaba ezilungileyo.”

Uvulindlela ogama linguMoses uthi: “Ndiye ndabona ukuba uYehova unokusebenzisa nawuphi na umntu othobekileyo yaye maxa wambi ukuba nolwazi namava akubalulekanga. Eyona nto ibalulekileyo kukuthanda abantu abasebandleni nokusebenzisana kakuhle nabanye.”

Iindibano Ezinkulu

Imibhiyozo ‘neendibano ezingcwele’ ezazisenziwa ngamaSirayeli ngaphambi kwexesha lobuKristu yayiba zizihlandlo zolonwabo, zibangela ukuba abo bezileyo banikel’ ingqalelo kwizinto zokomoya. (Lev. 23:21; Dut. 16:13-15) Kusenjalo nangeendibano zale mihla zabantu bakaThixo. EZambia iindibano ziqhutyelwa kwiindawo ezingacacanga. Abazalwana bakha izindlu zokwexeshana kuquka ezokulala kwindawo abaye bayibize ngokuba yidolophana yendibano.

Ngokuhamba kwexesha kuye kwakhiwa izindlu zokoqobo kwezo ndawo. Kwiminyaka yangaphambili kwakukho iingxaki ezininzi ezazifuna ukulungiswa ngobuchule. Omnye umveleli wesithili uthi, “Abazalwana babendakhela indlu efulelwe ngengca kweso siza sendibano. Emva koko babeyibiyela ngocingo loo ndawo. Izihlalo yayiba ziziduli zomhlaba ekwakubekwa ‘imiqamelo’ yengca ngaphezu kwazo. Maxa wambi abazalwana babeye benze iqonga ngesiduli seentubi. Baze emva koko bagxumeke intente encinane.”

Umvangeli wasemazweni uPeter Palliser, uthi: “Kwenye indibano abazalwana banqwenela ukuba khe babe neqonga eliphakamileyo. Omnye wabo wayenobuchule bokusebenzisa iziqhushumbisi. Walungisa loo ndawo yayiza kuba neqonga waza waqhekeza isiduli seembovane esasingasenanto esasimalunga neemitha ezintandathu ukuphakama. Ngoko safumana induli ephakamileyo esalakha kuyo iqonga lethu.”

Ukwenza Imigudu Yokubakho

Iindawo ezininzi ezaziqhutyelwa kuzo iindibano zazikude nendlela yeemoto, nto leyo eyayibangela ukuba kube nzima ukuya kuzo. URobinson Shamuluma ukhumbula indibano awayeye kuyo ngowe-1959. Uthi: “Abali-15 kuthi baya eKabwe ekuMda welo Phondo ngeebhayisikile. Sasiphethe umgubo ocoliweyo nentlanzi eyomileyo. Sasilala ematyholweni. Xa sifika eKabwe sakhwela uloliwe owasifikisa emva kweentsuku eziphantse zibe ne kuloo ndawo yayiza kuba nendibano.”

ULamp Chisenga ukhumbula omnye umzalwana owayehamba nabantwana bakhe umgama oziikhilomitha ezimalunga nama-50 ngeenyawo nangebhayisikile xa esiya endibanweni. Uthi: “Babezilungiselela umphako wendlela—icassava egcadiweyo, amandongomane nepeanut butter. Babedla ngokulala ematyholweni.”

Ngoxa wayengumveleli wesithili, uWayne Johnson waphawula ukuba kubantu abaninzi akubi lula ukuya endibanweni. Wabhala: “Omnye uvulindlela okhethekileyo wayesiya ngebhayisikile endibanweni, ehamba isithuba esiphantse sibe ngangeveki. Abanye babekhwela elorini ngasemva. Abaninzi babefika ekuqaleni kweveki yendibano. Ebusuku babevuma iingoma bengqonge umlilo. Maxa wambi sasiba ngumMbo nomXesibe entsimini kangangokuba ummandla esisebenza kuwo sasiye siwuphinde kathathu ngaloo veki.”

Ukuya Endibanweni Ngoxa Kukho Inkcaso

Iindibano ezinkulu ziqhubeka zibomeleza yaye zibakhuthaza abazalwana. Namhlanje abaninzi baziqhwabel’ izandla iindibano ezinkulu. Ngexesha lokutshintsha kwemeko yezobupolitika ngokukodwa kwiminyaka yee-1960 neyee-1970, iziganeko ezifana nesi zazingaginywa ncam. Abantu baseburhulumenteni babesenza konke okusemandleni abo ukuze balubeke emiqathangweni unqulo lwethu. Ngenxa yokuba abazalwana babengafuni ukuvuma umhobe wesizwe, amapolisa ayengabaniki mvume yokuqhuba iindibano. Kamva, kwamiselwa inani labantu abamele babekho endibanweni. UDarlington Sefuka ukhumbula oku: “AmaNgqina kaYehova agqibela ukuhlanganisana empengempengeni ngowe-1974. Umphathiswa wemicimbi yezangaphakathi wakhupha umyalelo wokuba kungabikho zintlanganiso zasesidlangalaleni eziqhutywa kungakhange kuvunywe umhobe wesizwe kuze kuphakanyiswe indwe.” Sekunjalo, kwakuvumelekile ukuba abazalwana bahlanganisane kwiiHolo ZoBukumkani ezisekuhlaleni ezibiyelwe ngengca. Ngenxa yoku, isebe lalungiselela ukuba indibano yesiphaluka iqhutyelwe kwiiHolo ZoBukumkani, apho kuza kuhlanganisana ibandla elinye okanye amabini.

Nakwiindibano zesithili kwakuhlanganisana amabandla ambalwa. Omnye umzalwana owayelungiselela indibano uthi, “Endaweni yokuba sibe nendibano enye enkulu, sasiba nezincinane ezingama-20. Kwakuqeqeshwa abazalwana abaninzi abaza kusetyenziswa kucwangciso nabaza kusebenza kumasebe, ukuze xa uphinde wavunyelwa ngokusemthethweni umsebenzi, sibe namadoda amaninzi anamava aza kulungiselela iindibano ezinkulu nezincinane.”

Ubhaptizo

Ukususela ngeminyaka yee-1940, kwaqinisekiswa ukuba abo baza kubhaptizwa bayakuqonda ukubaluleka kwenyathelo abalithabathayo. Kwabanye kwakunzima ukuyishiya ngokupheleleyo ‘iBhabhiloni Enkulu’ nezenzo zonqulo lobuxoki. (ISityhi. 18:2, 4) Enye into eyayifak’ isandla kule ngxaki kukuba bambalwa abantu ababekwazi ukufunda kakuhle, ibe amabandla amaninzi ayengenazo ngokwaneleyo iincwadi ezisekelwe eBhayibhileni. Ngenxa yoko, abaveleli besiphaluka nabesithili babedlan’ indlebe nomntu ngamnye oza kubhaptizwa ukuze baqiniseke ukuba uyafaneleka. UGeoffrey Wheeler, owaphumelela kwiklasi yama-33 yaseGiliyadi, uthi: “Sasihlola neentsana zoomama abafuna ukubhaptizwa ukuba azifakwanga amaso ahambisana neenkolelo okanye amakhubalo kusini na. Sasilala ezinzulwini zobusuku ngeveki yendibano kuba kwakusiza abantu abaninzi gqitha.” Indlela abaveleli abahambahambayo ababebanceda ngayo abadala; iimpapasho ezifana nethi “Your Word Is a Lamp to My Foot”; nendlela eyayisiya ihlaziya ngayo intlangano zabangela ukuba kungabikho mfuneko yolo dliwano-ndlebe.

Ukoyika Iqonga!

Ayiphel’ emilonyeni imidlalo yeBhayibhile enabadlali abanesinxibo samandulo eyenziwa ezindibanweni. Uninzi lwabantu baseZambia luyazinikela kwindima eliyidlalayo. UFrank Lewis, owayengumvangeli wasemazweni, ngoku oseBheteli eUnited States uthi: “Imidlalo yamandulo yayingarekhodwa. Kwakufuneka abazalwana bacengceleze oko baza kukuthetha. Ndikhumbula umdlalo wokuqala esasinawo kwindibano eyayikwiPhondo elisemaNtla owawuthetha ngoYosefu. Abazalwana bawafumana emva kwexesha amaphepha omdlalo ngenxa yokucotha kweposi, ngoko kwakufuneka sisebenze de kube sebusuku sinceda abazalwana ukuba bacengceleze konke ababeza kukuthetha. Ngexesha lomdlalo, kwafika ixesha laxa umkaPotifare wayekhalela umyeni wakhe emxelela ukuba uYosefu wayefuna ukumdlwengula. Umzalwana owayedlala indima kaPotifare woyika ukuya eqongeni waza wemka. Ndathi ndisanceda abazalwana ngasemva kweqonga ndathi ntla ngalo mzalwana kanye xa elishiya iqonga. Ngokukhawuleza ndamkhumbuza imigca embalwa aza kuqala ngayo ndaza ndamtshovela eqongeni. Xa ebuyela, wafika sele esitsho ngamazwi abonisa ukuyenyanya loo ndoda yayimi phambi kwakhe ityholwa ngokudlwengula umkayo! Nangona oku kwaphantse kwaphazamisa kuloo ndibano, kodwa ngalo lonke ixesha ndifunda iBhayibhile ndiye ndithi: ‘Mhlawumbi yindlela eyayifanele idlalwe ngayo le ndima. Mhlawumbi uPotifare waphuma kuloo ndlu babekuyo nomkakhe waya kwehlisa umsindo, wabuya sele ekhalimela uYosefu!’”

Ngowe-1978, yasuswa imiqathango yeminyaka emine eyayimiselwe ngurhulumente ngokuphathelele inani labantu abamele babekho endibanweni, ngoko iNdibano ‘Yokholo Olweyisayo’ yaba lucelomngeni. Omnye umzalwana owayengumveleli ohambahambayo ukhumbula oku: “Kuloo ndibano kwenziwa yonke imidlalo esasingazange sibe nayo kwiminyaka edluleyo ngenxa yokuba sasinyanzelwa ukuba sihlanganisane kwiiHolo ZoBukumkani. Loo ndibano yaqhutywa iintsuku ezintlanu, ibe suku ngalunye sasibukela umdlalo. Sabukela yonke imidlalo esasingazange sibe nayo! Kwakumnandi ngokwenene kodwa oko kwakulucelomngeni kumzalwana waseBheteli ekwakufuneka ayihlole yonke loo midlalo. Kwakungeyondlwan’ iyanetha!”

Elinye ilungu leKomiti yeSebe lathi: “Andizange ndizinandiphe ngolu hlobo iindibano. Ekuseni iintsapho zaziphuma kwiindawo ezilala kuzo zinxibe kakuhle. Zazisiza kuYehova zinxibe ngondiliseko. Zazihlala kwingqatsini yelanga. Sekunjalo, zazihlala imini yonke ziphulaphule. Soze ungachukumiseki xa ubona loo mbono.” Ukunxulumana yinxalenye ebalulekileyo yonqulo lwamaNgqina kaYehova. (Heb. 10:24, 25) Nokuba iingxaki zobuqu okanye inkcaso ibenza babe ‘neenzingo’ okanye akunjalo, abantu bakaYehova bayazi ukuba iindibano ezinkulu zibenza ‘bahlale benemihlali.’—2 Kor. 6:10.

Ukwakhiwa KweHolo YoBukumkani

“Le leta igunyazisa ukuba eli bandla lichazwe ngasentla linikwe isiza salo. Siza kubizwa ngegama leli bandla ngokusisigxina, yaye ndilinike imvume yokuba lingasisebenzisa kangangeminyaka eli-150. Akukho mntu umele akhathaze aba bantu ngale ndawo de kufike iParadesi.”—INkosi uKalilele.

Ukususela ekuqaleni kwale nkulungwane idluleyo, abantu abakumazantsi eAfrika abafuna inyaniso baye basiqonda isizathu sokuba bahlanganisane ngenjongo yokunqula. Malunga nowe-1910, uWilliam Johnston wathi amaqela akhulayo akha iindawo zokuhlanganisana esebenzisa izinto zokwakha ezisetyenziswa ekuhlaleni, ezinye zezi zakhiwo ngoobhaza-bhaza ekunokungena abantu abangama-600 kubo. Asingabo bonke ababekufuna ngamehlw’ abomvu ukuba neendawo zokunqula. UHolland Mushimba, owafunda inyaniso ekuqaleni kweminyaka yee-1930 uthi: “Nangona abazalwana babekhuthaza ukuba kuziwe ezintlanganisweni, babengagxininisi kangako ekubeni sibe neendawo zokuhlanganisana. Sasidla ngokuhlanganisana ethafeni phantsi komthi okanye ebaleni lomzi womzalwana. Imbono ababenayo abanye abazalwana yayikukuba kwanoYesu wayengenandawo awayeyibiza ngokuba yeyokuhlanganisana njengokuba uLuka 9:58 esitsho, ngoko babengasiboni isizathu sokuba sizikhathaze ngokwakha iholo.”

Ngaphambi kowe-1950, iindawo ezininzi ekwakuhlanganiswana kuzo zazingenabugocigoci yaye zingomelelanga kuba zazakhiwe ngamaplanga nodaka. Kummandla oxakekileyo waseCopperbelt, uIan Fergusson wathetha nomphathi womgodi walapho emeyisela ekubeni abanike inxalenye ethile yomhlaba waloo mgodi ukuze bakhe iHolo yoBukumkani. IHolo yoBukumkani yokuqala yakhiwa eWusikili ngowe-1950. Kwiminyaka elishumi emva koko abazalwana bazoba iiplani zeeHolo ezisemgangathweni. IHolo yoBukumkani yokuqala eyakhiwa ngokusuka kwezi plani yayiyiholo entle enophahla olusicaba eyayibiza iikwacha zaseZambia ezili-12 000. Nangona leyo yayiyimali eninzi ngelo xesha, kodwa ngoku, ngenxa yemeko yezoqoqosho nokunyuka kwamaxabiso, loo mali ingaphantsi kancinane kwee-R20 00!

Ngenxa yokuba ayengafuni ukuthenga amakhadi amaqela ezobupolitika, amaNgqina ayephethwe ngogonyamelo olwaluphenjelelwa ngoophuma-silwe abathand’ izwe labo. Kwatshiswa iindawo zokunqula. Besoyika ukuphinda bahlaselwe, abanye abazalwana bacinga ukuba khe bathi xha ngokwakha, baqhubele iintlanganiso ethafeni. Emva kokuba kongezelelwe eminye imiqathango ekuqaleni kweminyaka yee-1970, kwakusiya kusiba nzima ukuba abazalwana bafumane isiza. Nangona kwakusaziwa ukuba amaNgqina kaYehova awaxhasi nalinye iqela lezopolitiko, kweminye imimandla abasemagunyeni bema ngelithi ileta nganye efaka isicelo mayibe neqweqwe leqela lezopolitiko.

UWiston Sinkala uthi: “Kwakunzima ukuba sifumane isiza, andisathethi ke ngemvume yokwakha. Ibhunga ledolophu lacinga ukuba siyadlala xa sisithi siza kulimangalela. Safumana ingcungela yegqwetha, yaye emva kweminyaka emibini inkundla yaba ngakwicala lethu yaza yayalela elo bhunga ukuba lisinike isiza. Elo tyala laba yindlela esa enkululekweni.”

Ihashe Elimnyama

Amabandla ayengawanikwa amaphepha eziza. Ngokufuthi abazalwana babenikwa imihlaba engacacanga, kodwa babengenakukwazi ukwakha kuloo mihlaba benganikwanga maphepha-mvume. Izinto zokwakha zazifumaneka ngamaxabiso aphezulu, yaye ngenxa yoko abanye babesebenzisa amacangci okanye basike imigqomo baze bayenze sicaba, emva koko bayibethelele kwizibonda zomthi. Ethetha ngenye iholo eyayakhiwe ngezi zinto omnye umdala wathi: “Saqaba amacangci ngetela [tar], ngoko xa ukude loo holo yayiba ngathi lihashe elikhulu elimnyama. Yayitshisa ngendlela engathethekiyo.”

Omnye umzalwana owayesakuba ngumveleli wesiphaluka wathi: “Xa ndithetha ngaloo minyaka, kuba nzima ukulikhupha elokuba ezo yayiziiHolo zoBukumkani. Eneneni, zazingammeli Oyena Thixo Uphakamileyo, uYehova.”

Amanye amabandla agqiba kwelokuba aqeshe iiholo. Nangona oku kwakubonakala kungezondleko, kodwa kwakuneengxaki zako. UEdrice Mundi, owayekwibandla lesiNgesi ekwakukuphela kwalo eLusaka ngeminyaka yee-1970 uthi: “Saqesha iholo eyayisetyenziswa xa kuza kubakho idisco. Abantu babesela bajuxuze ngemiGqibelo de kube sezinzulwini zobusuku, ngoko kwakufuneka sifike ngaphambi kwexesha lokungena kweentlanganiso ngeeCawa ukuze sikwazi ukucoca. Kwakunuka utywala necuba; ingeyondawo ifanelekileyo yokuba kunqulwe uYehova konke konke.”

Umyeni kaEdrice, uJackson, ukhumbula oku: “Kwathi ngenye intsasa yangeCawa kusaqhubeka iintlanganiso, kwangena omnye umfana owangqala ngqo phambili engenaxesha lamntu, wafika wathabatha ibhokisi yeebhiya awayeyishiye kubusuku obungaphambili, akugqiba waphuma.” Zizinto ezinjalo ezazibangela ukuba abazalwana bafune ukuba neeHolo zoBukumkani.

Ucwangciso Olwaba Yimbali

Iiholo zazifuneka ngokwenene kuba baninzi abantu ababesabela kwisigidimi soBukumkani. Noko ke, nakubeni abazalwana babenenzondelelo, abanye babengenayo imali yokondla iintsapho zabo, kungasathethwa ke ngeyokwakha iHolo yoBukumkani. UYehova ohlala esivulile isandla sakhe, wayebagcinele okuthile okuncumisayo.

Emva kokuba uhlolisiso lubonise ukuba kufuneka iiHolo zoBukumkani ezingama-8 000 kumazwe ehlabathi asakhasayo angama-40, iQumrhu Elilawulayo lagqiba ekubeni umsebenzi wokwakha ukhawuleziswe. Kwabonakala ukuba kweminye imimandla ambalwa amadoda angamagcisa anokuzenza afumaneke kwimisebenzi efuna ubugcisa. Kusenokwenzeka ukuba kwakunqongophele nezixhobo zokwakha. Ukongezelela, kwakuza kuba nzima ukuba amabandla amaninzi akumazwe asakhasayo abuyisele isixa semali ekwakufuneka esibolekile. Nangenxa yokwanda kwabavakalisi okwakuthabath’ unyawo, kwakungelula ukwenza ucwangciso olulungelelaniswe kakuhle kumasebe akweminye imimandla. Ngenxa yazo zonke ezi zinto, iQumrhu Elilawulayo lamisela ikomiti yokuzoba nokwakha eUnited States ukuze ivelele umsebenzi wokwakhiwa kweeHolo zoBukumkani ehlabathini lonke. Kwamiselwa iindlela zokwakha iiHolo zoBukumkani kumazwe ahlwempuzekileyo kwaza kwathunyelwa amatsha-ntliziyo angamagcisa ukuba aye kwimimandla ephesheya kolwandle.

Maxa wambi kwakuye kufuneke ukuba kwenziwe uhlengahlengiso kwiindlela zokwakha eziqhelekileyo ekuhlaleni. Ngokomzekelo, xa kusakhiwa eZambia umsebenzi wamabhinqa kukukha amanzi, ukuthutha intlabathi nokupheka. Sekunjalo, abazalwana abakumaqela akhayo babefuna ukuba noodade babek’ isitena ukuze wonke umntu oseqeleni enze into ebonakalayo.

Enye inkosi yePhondo eliseMpuma yayingawakholelwa amehlo ayo xa yayibukele udade owayesakha udonga lweHolo yoBukumkani. Yathi: “Andizange ndibone umntu obhinqileyo obeka isitena kakuhle ngolu hlobo oko ndazalwa! Yeny’ into le ndiyibon’ apha.”

“Isibhedlele Sethu Sokomoya”

Indlela ekwakusakhiwa ngayo yaba negalelo elikhulu kubantu basekuhlaleni. Abantu abaninzi abebengawafuni nalapho ebenyathele khona amaNgqina kaYehova batshintsha indlela ababewajonga ngayo. Ngokomzekelo, enye inkosi yePhondo eliseMpuma eyayifudula ingafuni ukuba kwakhiwe iiHolo zoBukumkani kummandla wayo yathi: “Yayingabefundisi bezinye iicawa ababebangela ukuba ndingavumi ukuba nakhe iiholo zenu, mna ndandingenangxaki. Ngoku ndiyabona ukuba anizanga ngenjongo embi. Ngoku esi sakhiwo sihle sisibhedlele sethu sokomoya.”

Owona msebenzi wamaKristu obalulekileyo ngowokushumayela ‘iindaba ezilungileyo zobukumkani.’ (2 Kor. 6:5; Mat. 24:14) Nakuba kunjalo, kanye njengokuba umoya oyingcwele ukhuthaza abantu bakaThixo ukuba bashumayele, kwakhona ubakhuthaza ukuba bazibhokoxe ekuhambiseleni phambili izilangazelelo zoBukumkani ngokwakha iindawo ezifanelekileyo zokuhlanganisana. Itsho ibonakale injongo yamabandla. Omnye umzalwana wathi: “Ngoku siya entsimini sinelunda yaye simemela abantu ezintlanganisweni sisazi ukuba baza kuza kwiHolo yoBukumkani ezukisa uYehova, kungekhona etyotyombeni.”

Omnye umzalwana wathi: “Kusenokuba akufaneleki ukuba neHolo yoBukumkani entle kangaka ezilalini, kodwa ifanelekile kuYehova. Ndivuyiswa kukuba uYehova uzukiswa kwiindawo ezifanelekileyo.”

Umsebenzi Wokuhambahamba

Kufuneka abakhonzi bakaThixo banyamezele. (Kol. 1:24, 25) Umzekelo wabantu abazinikela ekuhambiseleni phambili izilangazelelo zoBukumkani ngowabaveleli abahambahambayo. Umsebenzi abawenzayo wokomeleza amabandla uye wabangqina ‘njengezipho ezingabantu.’—Efe. 4:8; 1 Tes. 1:3.

Ekupheleni kweminyaka yee-1930, kwakuqeqeshwa amadoda afanelekayo ukuba abe zizicaka zecandelo nezenqila, ezo zaziwa njengabaveleli besiphaluka nabesithili namhlanje. UJames Mwango uthi: “Ukuya emabandleni kwakungeyondlwan’ iyanetha. Sasineebhayisikile, kodwa kwakufuneka abazalwana abaza kusiphathisa imigodlwana yethu, kodwa bona bebetha ngezikaTshiwo. Sasihamba iintsuku ngaphambi kokuba siye kufika kuloo ndawo siya kuyo. Sasiqhele ukuhlala iiveki ezimbini kwibandla ngalinye.”

‘Wafa Isiqaqa’

Ukutyelela amabandla asezilalini kwakunzima, njengokuba kunjalo nanamhlanje. URobinson Shamuluma oneminyaka engaphezu kwama-80 ubudala ungumveleli ohambahambayo nomfazi wakhe uJuliana. Ukhumbula mhla banethwa zizantyalantyala zemvula enesaqhwithi. Njengoko sasidamba eso saqhwithi, latyhila, nangona kwakufuneka bahambe kudaka olwalufikelela kwizihlalo zeebhayisikile zabo ukuphakama! Bathi befika kwibandla elilandelayo, wabe uJuliana edinwe eyimfe kunzima nokuba asele amanzi.

UEnock Chirwa, owayengumveleli wesiphaluka nowesithili ukutyhubela iminyaka yee-1960 neyee-1970 uthi: “Usuku olwaluba nzima ngokwenene lolwangoMvulo; sasiba sendleleni. Noko ke, sasisithi sakufika ebandleni silibale ngohambo. Sasikuvuyela ukuba kunye nabazalwana.”

Imiqobo esasidibana nayo yayingeyomigama esasiyihamba nobunzima esidibana nabo nje kuphela. Xa wayesiya kwibandla elikumantla elizwe, uLamp Chisenga wayephelekwa ngabanye abazalwana ababini. Bekwindlela eyayinothuli, babona isilwanyana kumgama othe qelele. UMzalwan’ uChisenga uthi: “Abazalwana babesibona luzizi. Sasihleli kanye apha endleleni okwenja. Ndababuza, ‘Niyasibona? Anikasiboni?’ Omnye umzalwana wathi ingathi yingonyama. Wasitsho isikhalo waza wafa isiqaqa. Sagqiba kwelokuba khe siphumle ithutyana de loo ngonyama ihambe iye kutshona ematyholweni.”

UJohn Jason owachitha inxalenye yeminyaka engama-26 engumveleli wesithili eZambia kunye nenkosikazi yakhe uKay, wafunda ukuba nomonde xa ejamelene neengxaki ezinzima. Uthi: “Ndikhumbula mhla ndaqhuba imoto eqhawukelwe yisuspension umgama oziikhilomitha ezili-150 kuba ndandingenayo enye, kungekho nendawo esasinokufowuna kuyo. Ngesinye isihlandlo sonakalelwa yimoto. Inye kuphela into esasinokuyenza kuloo moto iqhumayo: Yayikukugalela onke amanzi esasiwaphethe kuloo njini ukuze sehlise ubushushu bayo, yaye sazishiyela nje ikomityi yamanzi ukuze siphunge. Sikwanti kwingqatsini yelanga yaye sidinwe siyimfe, sahlala kuloo moto saza sacela uncedo kuYehova. Ngentsimbi yesithathu emva kwemini, kwathi gqi imoto yabasebenzi bendlela, sasiqala ukubona imoto ngaloo mini. Baphawula ukuba sisengxakini, baza basitsala. Safika kubazalwana kungekabi mnyama.”

Ukufunda Ukukholosa

Kwiimeko ezinjalo abaveleli abahambahambayo bafunda ukukholosa ngoYehova uThixo nabazalwana abangamaKristu, kungekhona ngamandla omntu okanye ngezinto eziphathekayo. (Heb. 13:5, 6) UGeoffrey Wheeler uthi: “Sajamelana nolunye ucelomngeni sineeveki nje ezintathu kumsebenzi wesithili. Sasikwindawo yendibano sikhangele ngamehlw’ abomvu kucwangciso lwempelaveki. Ndandiphiwe iPrayimasi eyayinamakhwinibana ayo. Lalitshisa ngaloo mini yaye kukho umoya. Ndathi xa ndilayita eso sitovu kwathi dungu umlilo owenyukela eluphahleni. Kungemizuzu mingaphi loo mlilo wawusele ungaphezu kwamandla ethu. Wanwenwela kwivili langaphambili leLand Rover yethu waza wayitsho yangamalahle yonke.”

Kwakubuhlungu ukuphulukana nemoto ngolo hlobo, kodwa kwakungaphelelanga apho. UGeoffrey uthi: “Iimpahla zethu zazisetyesini emnyama eyenziwe ngentsimbi ngaphakathi kuloo Land Rover. Azizange zitshe kodwa zashwabana nje! Abazalwana bangena ngakwicala elingenamlilo baza bakhupha ibhedi, ihempe kunye nomatshini wam wokuchwetheza. Hayi indlela esabancoma ngayo ngaloo nto bayenza ngokukhawuleza!” Baphulukana nezinto ababenazo kuloo moto, yaye ngokocwangciso babeza kudibana nedolophu emva kweenyanga ezimbini, ngoko babeza kwenza njani? UGeoffrey uthi: “Omnye umzalwana wandiboleka iqhina, ndaya kunikela intetho yesidlangalala ngezihlangu ezikhulu ezenziwe ngerabha. Saphila kuloo meko, ibe abazalwana benza konke okusemandleni abo bezama ukuthuthuzela lo mveleli wabo wesithili ungenamava.”

Ibhedi Ekwakungenakuqabela Nyoka Kuyo

Abaveleli abahambahambayo namakhosikazi abo bayomelezwa luthando nenkxalabo yamabandla ‘alandela ikhondo lokubuk’ iindwendwe,’ yaye lubenza baqhubeke nomsebenzi wabo abawenza ngokuzincama. Kungaphel’ imini sibalisa iindlela amabandla ahlangabezana ngazo ngothando neemfuneko zaba bazalwana nakubeni nawo eswele, yaye kuxatyiswa ngokwenene oko.—Roma 12:13; IMize. 15:17.

Ngokuqhelekileyo abaveleli abahambahambayo banikwa nje iindawo zokufihl’ iintloko ezingenabunewunewu, kodwa konke oku kusenziwa ngothando. UFred Kashimoto, owayengumveleli ohambahambayo kwiminyaka yee-1980, ukhumbula mhla wafika ebusuku kwenye ilali yaseZambia ekwiPhondo elisemaNtla. Abazalwana bamamkela ngezandl’ ezishushu. Bangena kwenye indlu encinanana, kwaza kwabekwa imigodlo yakhe phezu kwetafile enkulu eyayenziwe ngezibonda eziziimitha ezisisi-1, 5 ukuphakama. Ebona ukuba ubusuku buyahamba, uMzalwan’ uKashimoto wabuza, “Ndiza kulala phi?”

Besalatha loo tafile, abazalwana bathi, “Yibhedi yakho leyo.” Ngenxa yokuba iinyoka zazixhaphakile kuloo ndawo, abazalwana benza ibhedi ekhuselekileyo. Ngobo busuku uMzalwan’ uKashimoto walala kuloo bhedi yayinomatrasi owenziwe ngezithungu zengca.

Ngokufuthi ezilalini niphiwa umphako weenkuku. Encumile uGeoffrey Wheeler uthi, “Ngesinye isihlandlo abazalwana basipha inkuku. Kwathi xa kuqala ukurhatyela sayibeka kwisihlalo sendlu yangasese eyayingaphandle. Yaxhuma kweso sihlalo yaya kuwela ngaphakathi kumngxuma wendlu yangasese. Sayikhupha apho ngomhlakulo isaphila. Umfazi wam wayihlamba ngamanzi ashushu anesepha neyeza lokukhupha iintsholongwane. Ekupheleni kweveki sayipheka, ibe yayimnandi ngokwenene!”

NabakwaJason benzelwa ububele obufanayo. UJohn uthi, “Izihlandlo ezininzi abazalwana babesipha inkuku ephilayo. Sasinebhaskithi encinane esasiyifaka kuyo loo nkuku xa sihambahamba. Ntsasa nganye yayibeka iqanda, ngoko sasingazimiselanga kuyitya. Xa sipakisha imigodlwana yethu silungiselela ukuya komnye ummandla, yayisenza siqonde ukuba ayisali.”

Imifanekiso Eshukumayo

Ukususela ngowe-1954, umboniso onomxholo othi The New World Society in Action kunye neminye emininzi yafaka ifuthe kumsebenzi wokufundisa. Ngelo xesha ingxelo yeofisi yesebe yathi: “Le miboniso yakhuthaza abaninzi ukuba bazibhokoxe entsimini nasebandleni.” Emva kokuba kubukelwe lo mboniso, bambi babedla ngokuthi xa beqhaqha izakhiwo zendibano: “Masiqhaqhe ngokungathi siyi-‘The New World Society in Action,’” okuthetha ukuthi “ngamandla ethu onke!” Kunyaka wokuqala owakhululwa ngawo lo mboniso, wabukelwa ngabantu abangaphezu kwama-42 000, waza wachukumisa neentliziyo zamagosa karhulumente nabezemfundo. Ekugqibeleni, abantu baseZambia abangaphezu kwesigidi bawaqonda amaNgqina kaYehova nentlangano yawo yamaKristu.

UWayne Johnson ukhumbula igalelo eyaba nalo le miboniso. Uthi: “Kwakusiza abantu abavela kwimimandla ethe qelele beze kubukela le miboniso yaye yabafundisa okuninzi ngentlangano kaYehova. Kwakuye kuqhwatywe izandla ngehlombe umboniso usaqhubeka.”

Kangangethuba elide, kwindibano yesiphaluka kwakuye kubukelwe omnye wemiboniso kucwangciso lwangorhatya ngoMgqibelo. Abantu ababehlala kwimimandla ekwanti babeyivuyela ngokwenene le miboniso. Eli phulo laba negalelo elikhulu ngokwenene, nangona abantu ababengaqhelananga nendlela ekuphilwa ngayo kwezinye iindawo babezitolika ngenye indlela ezinye zezinto abazibonayo. Omnye umboniso wawunabantu ababephuma beyimiqodi kwisikhululo sikaloliwe ohamba phantsi komhlaba kwiSixeko saseNew York. Abanye babecinga ukuba baboniswa into eza kwenzeka eluvukweni! Sekunjalo, loo mifanekiso yanceda abantu bawaqonda ngakumbi amaNgqina kaYehova. Kodwa izinto zatshintsha, indlela abantu baseZambia ababemfuna ngayo uzimele-geqe yabangela ukuba abaninzi bangabafuni nalapho bebenyathele khona abazalwana. Amabandla kuquka abaveleli abahambahambayo babejamelana neemeko ezinzima ngakumbi ezazifuna ukuba banyamezele.

Ukungenelela Kwezopolitiko

Ngo-Oktobha 24, 1964, iRhodesia esemaNtla yakhululeka kwiBritani yaza yaba yiRepublic of Zambia. Ngesi sihlandlo, kwakunyukw’ umnqantsa kwezobupolitika. Kwakusithiwa amaNgqina kaYehova axhasa ulawulo lwamathanga ngenxa yokuba ayengathabathi cala.

ULamp Chisenga ukhumbula etyelela ummandla woNxweme iBangweulu. Wayecebe ukuba uza kukhwela iphenyane aye kutyelela amaNgqina awayengabalobi beentlanzi kwimimandla esesiqithini. Wakhwela ibhasi eyamothula ngaselunxwemeni. Ukwehla kwakhe kuloo bhasi kwathiwa makaveze ikhadi leqela lakhe lezopolitiko. Laliza kuvela phi! Loo madoda eqela lezopolitiko athabatha ibhegi yakhe. Enye yawo yabona ibhokisi ebhalwe “Watchtower.” Yatsho ngekhwelo yaye imemeza isithi: “Watchtower! Watchtower!”

Lisoyikela isidubedube, elinye igosa latshovela uLamp kunye neebhegi zakhe ngaphakathi ebhasini. Ngelo xesha kwakusele kukho ihlokondiba elaligibisela ibhasi, libetha ucango, amavili kunye neefestile zayo ngamatye. Umqhubi wawanyathela amafutha malunga nomgama oziikhilomitha ezingama-90 waya kufika eSamfya engakhange amise. Ngokuhamba kobusuku kwathi cwaka. Zathi zakwehla izibilini ngentsasa elandelayo, uLamp wakhwela iphenyane waya kutyelela amabandla amancinane angqonge unxweme.

Abaveleli abahambahambayo baye baqhubeka bezincomela njengabalungiseleli bakaThixo “ngokunyamezela okukhulu.” (2 Kor. 6:4) UFanwell Chisenga, owayetyelela ummandla okufuphi noMlambo iZambezi, uthi, “Umveleli wesiphaluka kufuneka azinikele ngentliziyo epheleleyo.” Xa utyelela amabandla akulo mmandla wawuhamba umgama omde ngamaphenyane amadala nangena amanzi kumlambo oneemvubu ezikhohlakeleyo ezazinokulidlakaza ngokulula iphenyane. Wancedwa yintoni uFanwell ukuze ahlale kumsebenzi wokuhambahamba? Encumile ngoxa eqwalasele iifoto zebandla elalimkhaphile xa wayesiya kukhwela iphenyane, uyavuma ukuba wakhuthazwa ngabazalwana noodade. Ebonakala ekwezinzulu iingcinga ubuza lo mbuzo, “Yiyiphi enye indawo onokubona kuyo abantu abonwabe ngolu hlobo kweli hlabathi linengqumbo?”

Ukungathabathi Cala

“Akukho joni lizibandakanya kumashishini ezorhwebo, ukuze likholise umphathi walo.” Watsho njalo umpostile uPawulos. (2 Tim. 2:4) Ukuze amaKristu ahlale evisisana ngokupheleleyo neNkokeli yawo uYesu Kristu, kufuneka acezele kude kwimicimbi yezopolitiko nakunqulo lwehlabathi. Oku kuye kwalucelomngeni ‘nembandezelo’ kumaKristu afuna ukuhlala engoondilele kwimicimbi yehlabathi.—Yoh. 15:19.

NgeMfazwe Yehlabathi II, abaninzi baphathwa ngenkohlakalo ngenxa yokuba babengenawo “umoya wokuthand’ izwe.” UBenson Judge, owathi kamva waba ngumveleli ohambahambayo onenzondelelo ukhumbula oku, “Sabona amadoda akhulileyo ephoswa elorini okweengxowa zombona ngenxa yokuba ayengafuni ukuba ngamajoni. Saweva la madoda esithi, ‘Tidzafera za Mulungu’ (Sixolele ukufa ngenxa yokuba simela uThixo).”

Nangona wayengekabhaptizwa ngexesha lemfazwe, uMukosiku Sinaali ukhumbula kakuhle ukuba kwakusoloko kuphakama umbandela wobundilele. “Kwakufuneka wonke umntu embe aze aqokelele iingcambu zemambongo, isidiliya ekwakusenziwa ngaso ilaphu elixabisekileyo lelatex. Iingcambu zesi sidiliya zaziye zihlutywe zize zilungiswe kakuhle kusenziwa amabhanti awayedityaniswa kuze kuphume irabha ekwakusenziwa ngayo izihlangu zamajoni. AmaNgqina akazange avume ukuya kuncothula ezi ngcambu ngenxa yokuba zazisetyenziselwa into enokwenza nemfazwe. Ekugqibeleni, abazalwana bohlwaywa kusithiwa abanantsebenziswano. ‘Babengathandwa.’”

Omnye wabo bazalwana ‘babengathandwa’ nguJoseph Mulemwa. Lo mzalwana wayeyinzalelwane yakuMzantsi weRhodesia oweza kwiPhondo eliseNtshona kumNtla weRhodesia ngowe-1932. Bambi bathi wayekhuthaza abantu ukuba bayeke ukulima amasimi abo kuba ‘uBukumkani busemnyango.’ Obu buxoki basasazwa ngumfundisi wecawa owayehlala kwimishini yaseMavumbo nowayengafuni nokumbona uJoseph. UJoseph wabanjwa waza wafakwa emakhamandeleni kunye nendoda eyayiphazamisekile engqondweni. Abanye babezixelele ukuba uJoseph uza kuhlaselwa yile ndoda. Noko ke, uJoseph wayithomalalisa. Emva kokuba ekhululwe entolongweni, uJoseph waqhubeka eshumayela yaye etyelela amabandla. Wafa ethembekile phakathi kwiminyaka yee-1980.

Ukomelezelwa Ukujamelana Neemvavanyo

Ubuhlanga noxinezeleko ababenalo abantu basekuhlaleni lwabagevezelis’ amadolo abo izazela zabo zazingabavumeli ukuba babandakanyeke kwezopolitiko. Nangona lalixubayele kwelo lizwe, iNdibano Yezizwe Ngezizwe ‘Yabalungiseleli Abanenkalipho’ eyayiseKitwe ngowe-1963 yabonisa indlela amanyene nahlelisene ngoxolo ngayo amaNgqina kaYehova. Abantu abaphantse babe ngama-25 000 ababekuloo ndibano yeentsuku ezintlanu, abanye kubo ababeze neentente kunye neekharavani, balunandipha olo cwangciso lwaluqhutywa ngeelwimi ezine. Intetho kaMilton Henschel eyayiphum’ emagqabini yayinikel’ ingqalelo kulwalamano lomKristu noRhulumente. UFrank Lewis uthi: “Sikhumbula esixelela ukuba masincede abazalwana bawuqonde umbandela wokungathabathi cala. Hayi indlela awasivuyisa ngayo amacebiso esawafumanayo kuloo ndibano kuba abazalwana abaninzi baseZambia baphumelela iimvavanyo ezinzima abazifumana emva koko baza bahlala bethembekile kuYehova!”

Ukutyhubela iminyaka yee-1960, amaNgqina kaYehova ayetshutshiswa ngogonyamelo yaye kutshiswa izinto zawo. Kwatshatyalaliswa amakhaya awo neeHolo zoBukumkani. Okuncomekayo kukuba inyambalala yabo babehlasela amaNgqina yavalelwa entolongweni. Xa iRhodesia esemNtla yaba yiRepublic of Zambia, amaNgqina kaYehova aba nomdla okhethekileyo kwilungiselelo lomgaqo-siseko omtsha ophathelele amalungelo abantu asisiseko. Sekunjalo, iliza lokuthand’ izwe elaliza kuhlasela ixhoba elingalindelanga lalisemnyango.

Imifuziselo Yohlanga

Ngemihla yamathanga, abantwana bamaNgqina kaYehova babephethwe kabuhlungu ngenxa yokungavumi ukukhahlela indwe okwakungamkelekanga kunqulo lwabo, ngelo xesha kwakusetyenziswa iUnion Jack. Babesohlwayelwa nokungaculi umhobe wesizwe. Emva kokuba kuthethwe nabasemagunyeni, isebe lezemfundo layekelel’ umxakatho, laza labhala lenjenje: “Indlela [iqela] lenu elikujonga ngayo ukukhahlela indwe yaziwa ngokubanzi yaye iyahlonelwa, yaye akukho mntwana ufanele ohlwaywe nangayiphi na indlela ngenxa yokuba engavumi ukukhahlela indwe.” Umgaqo-siseko omtsha owamiselwa yiriphabliki entsha wanika abantu ithemba lokuba baza kukhululeka kwizinto ezingundoqo, eziquka isazela, indlela umntu acinga ngayo nakunqulo. Noko ke, indwe kwanomhobe wesizwe omtsha zabangela ukuba ukuthand’ izwe kuye kuthabath’ unyawo. Mihla le ezikolweni kwakusenziwa imibhiyozo yokukhahlel’ indwe neyomhobe wesizwe. Nangona abanye abantwana bamaNgqina babekhululekile ukuba bangathabathi nxaxheba, bambi babo babebethwa bade bagxothwe nasesikolweni.

Umthetho wemfundo omtsha, owamiselwa ngowe-1966, wabangela ukuba kubekho ithemba. Kuloo mthetho kwakuqukwe nokuba umzali okanye umntu ogcine umntwana unelungelo lokucela ukuba umntwana wakhe angabandakanyeki kwizinto zonqulo okanye kwizikhumbuzo zalo. Ekugqibeleni, abantwana abaninzi ababegxothiwe babuyela esikolweni. Sekunjalo, kungekudala emva koko, ngokufihlakeleyo kongezelelwa imithetho yezemfundo eyayibonisa ukuba indwe kunye nomhobe wesizwe ziluphawu olubonisa ukuba ubani uyayiqonda imithetho yelizwe lakhe. Nakubeni abazalwana babewuxubushile lo mbandela namagosa karhulumente, ekupheleni kowe-1966, abantwana abangaphezu kwama-3 000 bagxothwa esikolweni ngenxa yokuba bengathabathi cala.

UFeliya Akanakwamkelwa Esikolweni

Kwafika ixesha lokuba kuhlolwe enoba eso senzo sivumelekile na ngokwasemthethweni. Kwakhethwa umhla eliza kuxoxwa ngawo ityala. UFeliya Kachasu wayesiya rhoqo eSikolweni saseBuyantanshi, eCopperbelt. Nangona wayesaziwa njengomfundi ongumzekelo, wagxothwa. UFrank Lewis ukhumbula indlela elasiwa ngayo enkundleni elo tyala, uthi: “Sasimelwe nguMnu. Richmond Smith kwelo tyala lalinzima ngokwenene kuba yayingumbandela owawunxamnye norhulumente. Wathi akuva isizathu sokuba uFeliya angayikhahleli indwe wafuna ukulithabathel’ ezandleni zakhe ityala.”

UDailes Musonda, owayefunda eLusaka ngelo xesha, uthi: “Lathi lakusiwa enkundleni ityala likaFeliya, sazithembisa ukuba inkundla iza kuba ngakwicala lethu. Xa liza kuxoxwa kwakusiza abazalwana abasuka eMufulira. Kwathiwa mna nodade wethu singaya enkundleni. Ndikhumbula uFeliya esiya enkundleni ethwele umnqwazi omhlophe enxibe nelokhwe embatshileyo. Elo tyala lathabatha iintsuku ezintathu. Babekho nabavangeli basemazweni kwelo tyala; uMzalwan’ uPhillips noMzalwan’ uFergusson. Sasicinga ukuba ubukho babo buya kuba lulutho.”

Ijaji eyintloko yagqiba ngelithi: “Kweli tyala akukho nto ibonisa ukuba amaNgqina kaYehova enza izinto ezibonisa ukungawuhloneli umhobe wesizwe okanye indwe.” Sekunjalo, yathi imibhiyozo eyayisenziwa esikolweni yayiyekarhulumente, ngoko ngokuphathelele umthetho wezemfundo uFeliya akamele amangalele ukugxothwa kwakhe esikolweni ngenxa yokunyaniseka kwiinkolelo zakhe. Yathi ikholelwa ekubeni loo mibhiyozo yenzelwa ukulondoloza uhlanga. Asizange sibekw’ elubala isibakala sokuba uhlanga luya kulondolozwa njani na xa abantwana benyanzelwa ukuba babhiyoze. Kwathiwa uFeliya akanakwamkelwa esikolweni ukuba usabambelele kwiinkolelo zakhe zobuKristu!

UDailes uthi: “Sasidimazeke ngokwenene. Sekunjalo, konke sakuyekela kuYehova.” Ingcinezelo yaya ithabath’ unyawo, yaye uDailes nodade wabo basishiya isikolo ngowe-1967. Wathi uphela owe-1968, kwabe sele kugxothwe abantwana bamaNgqina kaYehova abamalunga nama-6 000.

Iintlanganiso Zasesidlangalaleni Zimiselwa Imiqathango

UMthetho Wocwangco Wowe-1966 wawusithi kuzo zonke iintlanganiso zasesidlangalaleni makuvulwe ngomhobe wesizwe. Oku kwabangela ukuba kube nzima ukumema abantu ukuba beze kwiindibano. Abazalwana bathobela urhulumente ngokuba babe neentlanganiso ezinkulu kwiindawo ezifihlakeleyo, ngokufuthi kwiiHolo ZoBukumkani ezibiyelwe ngengca. Abantu abaninzi abanomdla bazama ukuqonda ukuba kwenzeka ntoni, yaye inani labantu abeza kwiindibano laya likhula ngokuthe ngcembe kangangokuba ngowe-1967 abantu ababeze kwiSikhumbuzo sokufa kukaKristu babeli-120 025.

ULamp Chisenga uthi, “Ngamathub’ athile kwakuqhambuka inkcaso enogonyamelo. ESamfya, uMzalwan’ uMabo owayekwiBandla laseKatansha wahlaselwa lihlokondiba laza lambulala. Ngamathub’ athile abazalwana babehlaselwa ngoxa bekwiintlanganiso, yaye iiHolo zoBukumkani ezininzi zatshiswa zangamabhodlo. Sekunjalo, abasemagunyeni abazange bayeke ukuwahlonela amaNgqina, yaye abanye abachasi bavalelwa entolongweni baza bohlwaywa.”

Banomkhosi Womoya!

Abachasi abazange bayeke ukuwatyhola ngobuxoki amaNgqina kaYehova, besithi azizityebi ngendlela engaqhelekanga nokuba anokubumba urhulumente wexesha elizayo. Ngenye imini unobhala weqela elilawulayo wafika kwiofisi yesebe yaseKitwe engalindelwanga. Into yokuqala ababona ngayo abazalwana ukuba ukho, luthotho lwamapolisa awayesesangweni. Yamonwabisa ngokwenene intlanganiso awayenayo nabameli besebe. Ethethela phezulu wathi, “Sininike imvume yokuba nakhe ezi zakhiwo. Nenza ntoni ngazo? Ziiofisi zenu zikarhulumente?”

Abanye abasemagunyeni baqhubeka bekholelwa kwizinto ezigqwethekileyo abazivayo. KwiPhondo elikumNtla-Ntshona weZambia, amapolisa azama ukuchitha indibano esebenzisa izintywizisi. Abazalwana bathumela ucingo olukhawulezileyo kwiofisi yesebe. Omnye umlimi owalinikel’ umva elakowabo walanda abanye abameli kwisebe wabasa eKabompo ngenqwelo-moya yakhe ukuze baye kuthothisa loo moya nokuze balungise zonke izinto ezazingaqondwa kakuhle. Ngelishwa, oko akuzange kube nagalelo lingako ekupheliseni izikrokro ababenazo abo bathi bakubona le nqwelo-moya basasaza amarhe okuba ngoku amaNgqina anomkhosi womoya!

Kuloo ndawo yendibano, abazalwana baqokelela amaqokobhe ezintywizisi. Kamva, abameli besebe baya kumagosa karhulumente ukuze bawaxelele ngezinto ezibaxhalabisayo, yaye bephethe la maqokobhe njengobungqina bokusetyenziswa kogonyamelo ngokungeyomfuneko. Eso siganeko sasasazwa ngokubanzi, yaye bonke abantu bayiphawula indlela awayezole ngayo amaNgqina ngeso sihlandlo.

Ukucacisa Ukuma Kwethu

Iinzame zokuwaval’ umlomo amaNgqina kaYehova zazihambela phambili okomlilo wedobo. Isebe lalifuna ukucacisela urhulumente ngokuma kwethu. Ngoko kwanyulwa uSmart Phiri noJonas Manjoni ukuba baye kuthetha nabaphathiswa. Phakathi kuloo ngxoxo, omnye umphathiswa wathetha rhabaxa esithi, “Ukuba bendinendlela ngendinikhupha ndiye kunitywatyusha kanobom! Niyayiqonda phofu into eniyenzileyo? Nithabathe abona bemi babhetele beli, nasishiya nababulali, abakrexezi namasela!”

Bengachithanga xesha abazalwana bathi: “Kodwa abaninzi kwabo bemi babhetele ngoku, babenjalo! Babengamasela, abakrexezi, nababulali, kodwa ngenxa yamandla eBhayibhile baye batshintsha indlela abebephila ngayo baza baba ngabona bemi babhetele eZambia. Yiloo nto kanye ebangela ukuba size kuguqa ngamadolo phambi kwenu sicela ukuba nisivumele sishumayele ngokukhululekileyo.”—1 Kor. 6:9-11.

Ukugxothwa Nokuyekiswa Kweenkalo Ezithile Zomsebenzi

Njengoko sesifundile ngaphambili, abavangeli basemazweni banikwa uphum’ aphele kweli lizwe. UFrank Lewis uthi, “Asinakuze siyilibale inyanga kaJanuwari wowe-1968. Satsalelw’ umnxeba ngomnye umzalwana esixelela ukuba emzini wakhe kusandul’ ukuphuma igosa elijongene nabantu abavela kumazwe angaphandle. Limshiye neziqinisekiso zokuba kwiintsuku ezisixhenxe makabe sele engabonakali nalapho ebenyathele khona kweli laseZambia. Emva koko kwangena umnxeba emva komnye. Ekugqibeleni, satsalelw’ umnxeba ngomnye umzalwana esixelela ukuba uve kusithiwa emva koku baya kwisakhiwo esikhulu saseKitwe.” Kuyabonakala ukuba ezo zinto zazisenzelwa ukuphazamisa umanyano lwamaNgqina nokuwadimaza kumsebenzi azibhokoxe kuwo.

Kunyaka olandelayo, umongameli weli wagunyazisa uMthetho Wokhuseleko Lwabantu, owayekisa umsebenzi wokushumayela kwindlu ngendlu. Ngenxa yoku, abazalwana kwafuneka bawulungelelanise ngokutsha umsebenzi wokushumayela, yaye eyona ndlela yayiza kusetyenziswa kukushumayela ngokungacwangciswanga. UBulungiseleli Bethu BoBukumkani babubizwa ngokuba YiLeta Esiyifumana Nyanga Zonke, yaye inxalenye ekuBulungiseleli ethi “Ukunikela Iindaba Ezilungileyo” yabizwa ngokuba ‘Bubulungiseleli Bethu Bangaphakathi.’ Oku kwazilalisa iingqondo zamagosa ahlolayo karhulumente. NgoAprili wowe-1971 kwanikelwa ingxelo yezifundo zeBhayibhile ezingama-48 000, nto leyo eyayibubungqina obucacileyo bokuba imigudu yokuthintela umsebenzi ayizange ibatyhafise abazalwana.

UClive Mountford, ngoku ohlala eNgilani, wanxulumana nabavangeli basemazweni abaninzi. Uthi: “Enye indlela esasishumayela ngayo kukuthetha nabantu esibakhwelisa ezimotweni zethu. Iimoto zethu zazisoloko zinamaphephancwadi, ukuze abe semehlweni abo sibakhwelisileyo.”

Nangona kwakuvumelekile ukuncokola ngeBhayibhile, kodwa kwakufuneka sifumane imvume ngaphambi kokuba siye kumntu onomdla. Maxa wambi sasiye sityelele izalamane, abantu esasifunda nabo, esasisebenza nabo kunye nabanye. Kolo tyelelo nje lobuhlobo, kwakufuneka sibe nobuchule bokukhokelela incoko kwiZibhalo. Ekubeni sasinenkitha yezalamane ezisondeleyo, sasisiya kwizalamane ezininzi ezingakholwayo nakwabanye abantu basekuhlaleni.

Ngowe-1975 iofisi yesebe yanikela le ngxelo: “Amawaka abavakalisi abakwintsimi yethu abazange bashumayele kwindlu ngendlu. Sekunjalo, kwenziwa abafundi abatsha, yaye kwanikelwa ubungqina obumangalisayo.” Ngenxa yemiqathango eyayibekwe kumsebenzi wendlu ngendlu, abazalwana bashumayela ngezinye iindlela. Umzekelo woku ngowomnye umzalwana owayegcina iingxelo kwisebe laseburhulumenteni. Umsebenzi wakhe wawuquka ukubhala amagama kwaneenkcukacha zabantu basekuhlaleni. Wayesiba nomdla ngokukhethekileyo kubantu abanamagama abantu abaseBhayibhileni aze ababuze ukuba yintoni abayaziyo ngabo bantu banamagama afana nawabo ekuthethwa ngabo eBhayibhileni. Oku kwavula amathuba amaninzi okushumayela. Ngenye imini kwafika omnye umama nentombi yakhe kwelo sebe wayesebenza kulo, waza lo mzalwana waphawula ukuba igama lale ntombazana nguEden. Wabuza lo mama enoba uyayazi kusini na intsingiselo yegama elithi “Eden,” kwabonakala ukuba akayazi. Lo mzalwana wathi nje gqaba-gqaba ngentsingiselo yalo waza wamxelela nokuba kwixa elizayo, lo mhlaba uza kufana neParadesi yantlandlolo eyayise-Eden. Eli bhinqa laba nomdla laza lamnika idilesi yalapho lihlala khona. Nomyeni walo waba nomdla, yonke intsapho yaya ezintlanganisweni yaye ekugqibeleni abanye kuloo ntsapho babhaptizwa.

Abanye abavakalisi babeshumayela kwiindawo abaphangela kuzo. URoyd, owayesebenza emgodini, wayesebenzisa ixesha lesidlo sasemini exubusha nabo asebenza nabo aze ababuze ngeendinyana ezahlukahlukeneyo zeBhayibhile. “Nicinga ukuba ngubani olu ‘lwalwa’ kuthethwa ngalo kuMateyu 16:18?” Okanye “Ngubani ‘ilitye lesikhubekiso’ ekuthethwa ngalo kumaRoma 9:32?” Kwakudla ngokubakho iqela labantu abasebenza emgodini elize kuphulaphula oko kuthethwa ziZibhalo. Ngenxa yezi ngxubusho zingacwangciswanga, abaninzi abasebenza noRoyd bazahlulela baza babhaptizwa.

Abanye bafumana amathuba okuva inyaniso ngenxa yokuzimisela kwabaselula esikolweni. Elinye iqela labantwana alizange livume ukucula iingoma zokuthand’ izwe, yaye oku kwamcaphukisa umfundisi-ntsapho wabo bantwana waza wathi mayiphumele phandle yonke loo klasi. Omnye umntwana owayekwelo qela uthi: “Kusenokwenzeka ukuba umfundisi-ntsapho wayecinga ukuba asikwazi ukucula neengoma zonqulo lwethu. Kuyabonakala ukuba oku kwamvulel’ ithuba lokusenza intlekisa. Wathi masime ngokwamaqela eenkonzo zethu. Iqela ngalinye kwathiwa malicule ingoma yecawa yalo ibe nye okanye zibe mbini. Athi akungakhumbuli nokuba libe linye kumaculo eecawa zalo amanye amaqela amabini, loo mfundisi-ntsapho wathi masicule awolwethu unqulo. Saqala ngengoma ethi ‘Le Yimini KaYehova!’ Kuyabonakala ukuba sacula kamnandi kuba abantu ababedlula ngasesikolweni babesima baphulaphule. Emva koko sacula ethi ‘UYehova NguKumkani!’ Bonke batsho ngentswahla yezandla, kuquka umfundisi-ntsapho. Sabuyela kwigumbi lokufunda. Abantwana abaninzi esifunda nabo basibuza ukuba sizifunde phi iingoma ezimnandi ngolu hlobo, yaye abanye baya ezintlanganisweni kunye nathi baza kamva baba ngamaNgqina akhutheleyo.”

“Abo Bashiya Iincwadi”

Ngalo lonke eli xesha abazalwana ‘babelumke njengeenyoka ukanti bemsulwa njengamahobe.’ (Mat. 10:16) Ngenxa yoncwadi lwawo olwahlukileyo nokuzisebenzisa ngenzondelelo iincwadi ezisekelwe eBhayibhileni, amaNgqina kaYehova ayethiywe igama elithi Abaponya Ifitabo, elithetha ukuthi “Abo Bashiya (okanye, Bahambisa) Iincwadi.” Phezu kwayo nje imigudu yabachasi yokubaval’ umlomo abazalwana, umsebenzi wokushumayela ngoBukumkani awuzange uyekelele. Nangona abazalwana babetshutshiswa ngogonyamelo kangangeminyaka, ekuqaleni kweminyaka yee-1980, loo ntshutshiso yadamba.

Kwiminyaka engama-25 emva kokufunyanwa kwenkululeko, kwabhaptizwa abantu abaphantse babe ngama-90 000. Sekunjalo, abavakalisi abakhutheleyo banda baba ngama-42 000 kuphela. Sasiyintoni isizathu? Iyinyaniso into yokuba abanye bafa yaye kusenokwenzeka ukuba bambi bafudukela kwamanye amazwe. Kodwa uNeldie owayesebenza kwiofisi yesebe ngelo xesha uthi, “Undoqo yayikukoyika umntu.” Abaninzi bayekelel’ umxakatho entsimini. Ngaphezu koko, inkululeko yeza neenguqu. Kwakuvuleke izithuba zabaphathi emisebenzini, ezazifudula zinikwa abantu abasuka kwamanye amazwe. Ekubeni ngoku abantu babefumana izindlu, imisebenzi nemfundo, iintsapho ezininzi zanikel’ ingqalelo kwizinto zokwenyama kunezinto zokomoya.

Umsebenzi wona awuzange uyekiswe zezo zinto. UKumkani uSolomon osisilumko wabhala: “Kusasa hlwayela imbewu yakho, yaye ungasiphumzi isandla sakho de kube ngokuhlwa; kuba akuyazi indawo oya kuphumelela kuyo, enoba kulapha okanye phaya, okanye enoba ziya kulunga zombini ngokufanayo.” (INtshu. 11:6) Abazalwana babezimisele ukutyala imbewu yenyaniso eyayiza kuchuma njengoko iimeko zaziya zincumisa noko. Ngenxa yolwando olwaluqhubeka ngokuthe ngcembe, ngowe-1976 kwafuneka kuthengwe ilori entsha ukuze kusiwe uncwadi nakwezinye iindawo ezongezelelekileyo. Ngowe-1982, kwakhiwa indawo entsha yokushicilela eyayimganyana neBheteli. Zonke ezo zinto zazisisiseko solwando olwaluseza kubakho.

Ambalwa amazwe akumbindi weAfrika aye aba seluxolweni aza akhululeka kungquzulwano olufana nolo lwaseZambia. Ngoxa ngoku ‘kuvakaliswa iindaba ezilungileyo zezinto ezilungileyo’ ngokukhululekileyo, ukucinga ‘ngeembandezelo’ abatyhubele kuzo abo bathembekileyo kubangela ukuba baqhubele phambili ‘ekuhlanganiseni isiqhamo sobomi obungunaphakade.’—Roma 10:15; 2 Kor. 6:4; Yoh. 4:36.

Ukwandiswa Kwesebe

Kwiminyaka yee-1930, uLlewelyn Phillips kunye nabanye abazalwana babesebenzela kwindlu eqeshiswayo eyayinamagumbi amabini, eLusaka. Kwakungafiki nokufika ezingqondweni zabo ngelo xesha ukuba kungaze kubekho isakhiwo saseBheteli esiziihektare ezili-110, esinamagumbi ahlala abasebenzi bokuzithandela abangaphezu kwama-250. Aba bazalwana noodade banyamekela iimfuno zokomoya zabavakalisi noovulindlela abangaphezu kwe-125 000. Makhe sithi gqaba-gqaba ngendlela olwabakho ngayo olu lwando.

Njengoko sesifundile ngaphambili, ngowe-1936 abasemagunyeni baye baphelelwa ngamandla kangangokuba bade bavuma nokuba kuvulwe indawo yokothula uncwadi eLusaka. Ulwando lwabangela ukuba kufudukelwe kwisakhiwo esikhudlwana. Safumana indawo yokuhlala ngakwisikhululo samapolisa. UJonas Manjoni uthi, “Sasinamagumbi okulala amabini. Indawo yokutyela yayisetyenziswa njengeSebe Lenkonzo, yona iveranda njengeSebe Lokuthumela.” Ngowe-1951, uJonas wafumana ikhefu leeveki ezimbini emsebenzini waza elo xesha walisebenzisela ukukhonza eBheteli, yaye kamva waba lilungu laseBheteli ngokusisigxina. Uthi, “Kwakulungelelaniswe kakuhle, yaye kwakonwatyiwe. Ndandisebenza noMzalwan’ uPhillips kwiSebe Lokuthumela, sisenza imirhumo yaye sifaka izitampu kwimiqulu yamaphephancwadi. Sasichulumanciswa kukukhonza abazalwana bethu.” Kamva uLlewelyn Phillips wadibana noHarry Arnott, yaye babesebenza nabazalwana basekuhlaleni abafana noJob Sichela, uAndrew John Mulabaka, uJohn Mutale, uPotipher Kachepa kunye noMorton Chisulo.

Ekubeni iZambia yayinemigodi emininzi neemeko ziphucuka ngokukhawuleza yaye abantu bevela macala onke ukuza kummandla onemigodi, ingqalelo yasuswa eLusaka yasiwa eCopperbelt. UIan Fergusson wancomela ukuba kuthengwe umhlaba kwidolophu enomgodi, yaye ngowe-1954 iofisi yesebe yafudukela eKing George Avenue, eLuanshya. Noko ke, kungekudala loo ndawo ayizange ikwazi ukunyamekela intsimi eyanda ngendlela emangalisayo nenabela kwinxalenye enkulu yaseMpuma Afrika ngenxa yokuba yaba ncinane kakhulu. Ngowe-1959, ngoxa uNathan Knorr owayesuka kwikomkhulu lehlabathi wayekwiNdibano yeSithili ‘Yabapapashi BakaVukani,’ wahlola indawo elaliza kwakhiwa kuyo isebe elitsha waza wathi makwakhiwe. UGeoffrey Wheeler ukhumbula oku, “Ndahamba noFrank Lewis, uEugene Kinaschuk, nelinye igcisa lokwakha saya kwisiza esitsha eKitwe ukuze siphawule indawo eza kwakhiwa kuyo iBheteli entsha.” NgoFebruwari 3, 1962, kwanikezelwa kuYehova iofisi yesebe entsha eyayinezakhiwo ekuza kuhlalwa kuzo, igumbi lokushicilela kunye neHolo yoBukumkani. Xa wayequkumbela olo cwangciso, uHarry Arnott, owayesisicaka sesebe ngelo xesha watsalel’ ingqalelo kwisakhiwo esibaluleke ngakumbi, esokomoya, apho wonk’ ubani afanele azibhokoxe ekusebenziseni izitena zokholo, ithemba nothando.

Kwiminyaka elishumi eyalandelayo ezi zakhiwo zaba zincinane ngenxa yokwanda kwabavakalisi boBukumkani besusela kuma-30 129 ukusa phantse kwabangama-57 000. UIan Fergusson uthi, “UMzalwan’ uKnorr wasikhuthaza ukuba sandise isakhiwo sokushicilela. Ndaya kudibana nabazalwana ababekwisebe lase-Elandsfontein, eMzantsi Afrika. Kungekudala bathumela umatshini wokushicilela ngenqwelo-moya eKitwe.”

Ukongezelela kuncwadi kunye namaphephancwadi, eKitwe kwenziwa UBulungiseleli Bethu BoBukumkani obuthunyelwa eKenya nakweminye imimandla ekwiAfrika eseMpuma. Kungekudala indawo yokushicilela yabonakala ixinene kakhulu, ngoko kwafuneka kufudukelwe kwenye indawo. Usodolophu akazange avume ukusinika isiza esasikho ngelo xesha, ngoko omnye umzalwana wasipha indawo kumhlaba wakhe. Kwagqitywa ukwakhiwa ngowe-1984. Kangangeenkulungwane ezintathu iKitwe ibiliziko lokomoya lomsebenzi wokushumayela eZambia.

Kwiminyaka eyayinzima ngokwenene yasemva kokugxothwa kwabavangeli basemazweni, inani lababesebenza kwiofisi yesebe landa kangangokuba amalungu aseBheteli ali-14 ayehlala emakhayeni awo. Kwakufuneka kwenziwe uhlengahlengiso ukuze kunyanyekelwe umsebenzi owawuseza kwenziwa. Ekuhambeni kwexesha, kwathengwa izindlu ezimbini, kwaza kwaqeshwa enye, nto leyo eyenza kwalula ukubiza amalungu angakumbi entsapho. Sekunjalo, kwakufuneka ezinye izakhiwo. Okuvuyisayo kukuba, iimeko zaphucuka ngendlela engathethekiyo. Ngowe-1986, kwacelwa abazalwana ababehlala kweminye imimandla ukuba bafune umhlaba ekuza kwakhiwa kuwo isebe elitsha. Bafumana ifama eyayiziihektare ezili-110 neyayikumgama omalunga neekhilomitha ezili-15 ukusuka kwintshona yekomkhulu lelo. Le yayiyindawo entle kakhulu kuba loo mmandla wawunoovimba abaninzi bamanzi aphantsi komhlaba. UDayrell Sharp uthi, “Ndicinga ukuba nguYehova owasalathisa le ndawo intle kangaka.”

Unikezelo Nolwando

Eso sakhiwo sitsha sanikezelwa ngoMgqibelo, Aprili 24, 1993, yaye apho kwakukho amakhulu-khulu abantu abakhonze uYehova kangangeminyaka. Kwakukho abazalwana noodade basekuhlaleni abangama-4 000, iindwendwe ezili-160 ezisuka kumazwe ngamazwe kunye nabavangeli basemazweni ababemke kwiminyaka engama-20 edluleyo kweli laseZambia. UTheodore Jaracz, omnye wamalungu amabini eQumrhu Elilawulayo awayelapho, wanikela intetho enomxholo othi, “Siyazincomela Njengabalungiseleli BakaThixo.” Wathi abo babekhonze ngokuthembeka kangangeminyaka mabakhumbule ukuba eso sakhiwo sibekho ngenxa yokunyamezela kwabo. Ebhekisela kumazwi awathethwa nguPawulos kwabaseKorinte, wathi umlungiseleli wokwenyaniso uhlakulela isiqhamo somoya, esibangela ukuba anyamezele ubunzima, iimvavanyo neembandezelo. Wathi, “Niye nazincomela njengabalungiseleli bakaThixo. Kuye kwafuneka ukuba sakhe eli sebe litsha ngenxa yokwanda komsebenzi.”

Isakhiwo esinemigangatho emine, namagumbi angama-32 sagqitywa ukwakhiwa ngowama-2004. Kwahlaziywa indawo yokushicilela ezizkwekhilomitha ezili-1 000, kwaza kwenziwa iiofisi zokuguqulela ezingama-47 kunye neendawo zokugcina uncwadi, amagumbi ekuqhutyelwa kuwo iintlanganiso nethala leencwadi.

Nakubeni amaNgqina kaYehova aseZambia ephila kwiimeko ezinzima zoqoqosho nezinye iingxaki, azizityebi ekukhonzeni uThixo, yaye aneqhayiya lokwabelana nabanye ngobutyebi bawo bokomoya.—2 Kor. 6:10.

Ukuncomela Inyaniso Kubo Bonke

Indlela exatyiswe ngayo intsapho eZambia iye yavula ithuba lokuba abaninzi bakhuliselwe enyanisweni. KwiPhondo eliseNtshona eZambia kukho intetho eqhelekileyo ethi, Inkomo ayisindwa ziimpondo zayo. Ngamany’ amazwi, akumele kube ngumthwalo ukunyamekela intsapho yakho. Abazali abangamaKristu bayazi ukuba baya kuphendula kuThixo ngabantwana babo yaye banempembelelo entle kubo, bakhuthaza ubulungiseleli bamaKristu ngamazwi nangezenzo. Namhlanje amaNgqina amaninzi anenzondelelo ngabantwana baloo maKristu anyanisekileyo.—INdu. 128:1-4.

AmaNgqina kaYehova aseZambia avuyiswa koko kuye kwafezwa ngenxa yomonde nenkxaso kaYehova. (2 Pet. 3:14, 15) Kwiintsuku zamandulo, iinkolelo ezisekelwe eBhayibhileni, ‘neziyinyaniso’ ziye zabanceda batyhubela ixesha lamathandabuzo. ‘Uthando olungenaluhanahaniso’ luyaqhubeka lumanyanisa abantu abavela kwizizwe ezahlukahlukeneyo yaye ngokuthe ngcembe luye lwabangela ukuba abantu bakhule ngokomoya ngaphandle kweentlungu. Baye bazikhusela ‘ngezixhobo zobulungisa’ baza bathetha “ngobubele” nabanye abantu, nto leyo eye yazivula iingqondo zabaninzi, kuquka abasemagunyeni, yaye oko bekusoloko kusizisa ‘ingxelo entle.’ Ngoku kumiselwe amabandla angaphezu kwama-2 100 njengoko abazalwana abaphumelele kwiSikolo Sokuqeqesha Abalungiseleli befak’ isandla kumsebenzi wokuvelela. Nangona kusenokwenzeka ukuba ziseza ‘iimbandezelo’ ezinkulu, amaNgqina kaYehova anethemba lokuba aya ‘kuhlala evuya’ logama nje esahlanganisana kunye.—2 Kor. 6:4-10.

Kunyaka wenkonzo we-1940, abangama-5 000 bathobela umyalelo kaYesu wokukhumbula ukufa kwakhe. Ngokomlinganiselo yayingumntu omnye kubemi abangama-200. Kwiminyaka yakutshanje, abangaphezu kwesiqingatha sesigidi—ababengama-569 891 ngowama-2005—umntu omnye kwabangama-20, bazukisa uYehova ngobo busuku bukhethekileyo. (Luka 22:19) Kwakutheni ukuze kubekho abantu abangako? Lonke uzuko silusa kuYehova uThixo kuba nguye okhulisayo.—1 Kor. 3:7.

Noko ke, amaNgqina kaYehova aseZambia akwenzile ebekufuneka kuwo. Elinye ilungu leKomiti yeSebe lithi, “Asinazintloni ngeendaba ezilungileyo; sizijonga njengelungelo.” Iindwendwe azithandabuzi ukuba amaNgqina kaYehova azimisele ukwenza ubulungiseleli bawo ngentlonelo. Akumangalisi ke ngoko ukuba ngokomlinganiselo iNgqina elinye lijongene nabemi abali-90! Sekunjalo, umsebenzi usemninzi.

“Yinqaba eyomeleleyo igama likaYehova. Ilungisa libalekela kulo lize likhuseleke.” (IMize. 18:10) Ngoku kungxamisekile ukuba abantu abanotyekelo olufanelekileyo babalekele kuYehova. Sithethanje, nyanga nganye eZambia kuqhutywa izifundo zeBhayibhile ezingama-200 000, nto leyo eya kunceda abantu abangakumbi ukuba bazahlulele kuYehova baze babe ngabalungiseleli bakhe abanenzondelelo. AmaNgqina akhutheleyo aseZambia angaphezu kwe-125 000 anesizathu sokubakhuthaza ukuba benjenjalo.

[Ibhokisi ekwiphepha 168]

Iinkcukacha NgeZambia

Ukuma Komhlaba: IZambia lilizwe elithe tyaba, elingqongwe ngamanye amazwe, linemithi emininzi yaye likwihewu elimalunga neemitha ezili-1 200 ukuphakama. UMlambo iZambezi ngumda owahlula ummandla ongasezantsi.

Abantu balapho: Abantu abaninzi baseZambia bafundile yaye bangamaKristu ngokutsho kwabo. Abantu basemaphandleni bahlala kwizindlu ezifulelwe ngengca yaye ukutya kwabo bayakulima.

Ulwimi lwabo: Ulwimi olusetyenziswayo ngokusemthethweni sisiNgesi nangona kuthethwa nezinye iilwimi zomthonyama ezingaphezu kwama-70.

Indlela abazixhasa ngayo: Ushishino oluphambili kukumbiwa kobhedu nokunyityilikiswa kwalo. Ezinye zezinto ezilinywayo ngumbona, amazimba, irayisi namandongomane.

Ukutya kwabo: Umbona uyathandwa. Okunye kokona kutya kuthandwa kakhulu yinshima, ipapa eyenziwe ngombona.

Imozulu: Ngenxa yokuba eli lizwe limi kwindawo ephakamileyo, imozulu yalapho ipholile nto leyo engalindelekanga kwilizwe elisezantsi kumbindi weAfrika. Ngamaxesha athile kubakho imbalela.

[Ibhokisi/Umfanekiso okwiphepha 173-175]

Ndagwetywa Iinyanga Ezili-17, Ndakatswa Nemivumbo Engama-24

UKosamu Mwanza

Wazalwa: Ngowe-1886

Wabhaptizwa: Ngowe-1918

Ingxelo ngobomi: Wanyamezela intshutshiso nabazalwana bobuxoki. Wakhonza ngokuthembeka njengovulindlela nomdala de waligqiba ikhondo lakhe lasemhlabeni ngowe-1989.

Ndabhalisa emkhosini yaye ndandisebenza kwicandelo labagulayo kuMkhosi womNtla Rhodesia ekuqaleni kwemfazwe yehlabathi yokuqala. NgoDisemba 1917 ngoxa ndandisekhefini, ndadibana namadoda amabini avela kuMzantsi Rhodesia, awayengaBafundi beBhayibhile. Andinika imiqulu emithandathu yeStudies in the Scriptures. Ndazifunda ngomdla omkhulu ezi ncwadi, kangangeentsuku ezintathu. Andizange ndibuyele emfazweni.

Kwakunzima ukunxibelelana neofisi yesebe yamaNgqina kaYehova ngenxa yoko mna nabanye abazalwana endandikunye nabo sasingafumani lwalathiso. Sasisiya kwiidolophana ngeedolophana, siqokelele abantu size sishumayele kubo siphendule nemibuzo yabo. Kamva, sakhetha indawo esasiza kuhlanganisana kuyo kwicala elingasentla yaye sayibiza ngokuba yiGalili. Emva koko, samema abantu abanomdla ukuba beze kuphulaphula ingcaciso yeBhayibhile. Ndamiselwa ukuba ndibe ngumalathisi. Okubuhlungu kukuba, kwavela abazalwana abaninzi bobuxoki baza babangela ukudideka.

Sasizimisele ukushumayela kodwa kwacaca ukuba siyabaphazamisa abavangeli bamaKatolika nabamaProtestanti ababekuloo ngingqi. Saqhubeka sisiba neentlanganiso ezinkulu yaye ndikhumbula ukuba xa sasihlanganisene kwiinduli ezikufuphi neIsoka ngoJanuwari 1919, sasimalunga nama-600. Engaqinisekanga ngenjongo yokuhlanganisana kwethu apho, amapolisa namajoni afika akrazula iiBhayibhile neencwadi zethu aza abamba abaninzi kuthi. Abanye bavalelwa kwintolongo ekufuphi neKasama, abanye bavalelwa eMbala ukanti abanye baya kulahlwa kwesemazantsi, eLivingstone. Abanye bagwetywa iminyaka emithathu. Mna ndagwetywa iinyanga ezili-17 entolongweni, ndakatswa nemivumbo engama-24 ezimpundu.

Ukukhululwa kwam entolongweni, ndabuyela kwidolophana yakowethu ndaza ndaqalisa apho ndandiyeke khona ukushumayela. Kamva ndaphinda ndabanjwa ndavalelwa entolongweni emva kokutywatyushwa eminye imivumbo. Inkcaso yayibhokile. Inkosi yaloo dolophana yagqiba ekubeni ibafak’ uphum’ aphele abazalwana. Sonke safudukela kwenye idolophana yaye inkosi yalapho yasamkela ngezandla ezishushu. Sahlala apho yaye yasivumela ukuba sizakhele ilali yethu esayibiza ngokuba yiNazarete. Le nkosi yathi singahlala apho logama nje umsebenzi wethu ungaphazamisi uxolo. Inkosi yalapha yayanelisekile yindlela esasiziphethe ngayo.

Ngasekupheleni kowe-1924, ndabuyela ngasentla eIsoka, apho ndafundiswa isiNgesi ngumphathi wedolophu owayenovelwano. Ngelo xesha, kwavela abanye ababezenza iinkokeli zonqulo, befundisa iimfundiso ezigqwethekileyo, belahlekisa nabaninzi. Noko ke, saqhubeka sihlanganisana ngokufihlakeleyo kumakhaya abazalwana. Emva kweminyaka ethile, ndamenywa ukuba ndiye kudibana noLlewelyn Phillips eLusaka owandimisela ukuba ndityelele amabandla agudle umda ophakathi kweZambia neTanzania. Ndandihamba ndiye kuthi xhaxhe ngeMbeya eTanzania, ndisomeleza abazalwana. Emva kokutyelela isiphaluka ngasinye, ndandisiya ebandleni lam. Ndakwenza oku de kwamiselwa abaveleli besiphaluka, kwiminyaka yee-1940.

[Ibhokisi/Imifanekiso ekwiphepha 184-186]

Ukunceda Abamelwane Abangasentla

Ngowe-1948, isebe elikumNtla Rhodesia elalisandul’ ukusekwa, lalisalathisa kumsebenzi wokushumayela ngoBukumkani kwinxalenye enkulu yommandla owawubizwa ngokuba yiBritish East Africa. Ngelo xesha, abavakalisi ababehlala kwimimandla yaseZambia eneentaba ekwicala elingasentla, babeliqaqobana nje. Ekubeni abasemagunyeni ngelo xesha babengabavumeli abavangeli basemazweni abavela kwamanye amazwe ukuba bangene kwelo, ngubani owayeza kunceda abantu abathobekileyo ukuba bafunde inyaniso?

Xa uHappy Chisenga wafaka isicelo sokukhonza njengovulindlela othe ngxi kwiPhondo Elikumbindi weZambia, wamangaliswa kukuba athunyelwe kumhlaba okwanti okufuphi naseNjombe, eTanzania. “Sathi sakubona igama elithi ‘okwanti,’ nenkosikazi yam, sacinga ukuba siza kusebenza nabavakalisi abakummandla osemagqagaleni. Sakhawuleza safumanisa ukuba singabokuqala ukushumayela apho. Xa sibonisa abantu igama likaYehova negama elithi Armagedon eziBhayibhileni zabo, baqalisa ukuba nomdla. Inkosikazi yam babeyibiza ngokuba nguArmagedon yaye mna bendibiza ngokuba ndinguYehova. Xa sasitshintshelwa eArusha, sashiya kukho iqela labavakalisi abazimiseleyo apho.”

Ngowe-1957, uWilliam Lamp Chisenga wathunyelwa ukuya kukhonza njengovulindlela okhethekileyo kummandla weentaba okufuphi neMbeya, eTanzania. “Mna nenkosikazi yam uMary, nabantwana bethu ababini safika ngoNovemba yaye sahlala ubusuku bonke kwisitishi sebhasi kuba iihotele zazizele. Nangona kwakubanda nemvula isina ngobo busuku, sasikhangele phambili kwindlela uYehova aza kuyalathisa ngayo imicimbi. Ngentsasa elandelayo, ndashiya intsapho yam esitishini, ndaya kufuna indawo yokuhlala. Ndandingaqinisekanga ukuba ndiyaphi kodwa ndathabatha iiMboniselo. Ndathi ndifika ngaseposini ndabe sele ndihambise amaphephancwadi aliqela yaye ndadibana nendoda egama linguJohnson. Yabuza yathi, ‘Uvelaphi yaye usinge phi?’ Ndayixelela ukuba ndize kushumayela iindaba ezilungileyo. Emva kokuva ukuba ndiliNgqina likaYehova, yandixelela ukuba yazalelwa eLundazi kwiPhondo Elingasempuma laseZambia yaye yayiliNgqina elibhaptiziweyo kodwa yaphola. Salungiselela ukuba sithuthe intsapho nempahla yethu siyise emzini wayo. Ekuhambeni kwexesha, uJohnson nenkosikazi yakhe baphinda bomelela ngokomoya yaye basifundisa isiSwahili. Ekugqibeleni wabuyela eZambia waza waba ngumshumayeli okhutheleyo weendaba ezilungileyo. La mava andifundisa ukuba ndingaze ndiwajongele phantsi amandla kaYehova okusinceda yaye ndingaze ndiyithabathe lula into yokunceda abanye.”

UBernard Musinga owayekwinkonzo yexesha elizeleyo, waya kufikelela kwiindawo ezifana neUganda, iKenya, ne-Ethiopia ehamba nenkosikazi yakhe uPauline kunye nabantwana babo. Ngokuphathelele utyelelo lwabo eSeychelles, uBernard uthi: “Ngowe-1976 ndabelwa ukuya kutyelela iqela elalikwisiQithi esihle sasePraslin. Abantu balapho babengamaKatolika azinikeleyo yaye kwabakho ukungavisisani. Ngokomzekelo, unyana omncinane womvakalisi osemtsha wala ukusebenzisa uphawu lokudibanisa xa esenza izibalo esikolweni, esithi: ‘Ngumnqamlezo yaye andikholelwa emnqamlezweni.’ Ngenxa yoko, iinkokeli zonqulo zeza nesityholo esitsha sokuba ‘amaNgqina kaYehova akafuni ukuba abantwana bawo bafunde izibalo.’ Kwintlanganiso esasinayo nomphathiswa wezemfundo, sachaza iinkolelo zethu ngentlonelo yaye loo ngxaki yacombululeka. Ngenxa yokuhlakulela ubuhlobo nalo mphathiswa kwaba lula ukuba abavangeli basemazweni bangene kulo mmandla.”

[Umfanekiso]

UHappy Mwaba Chisenga

[Umfanekiso]

UWilliam Lamp Chisenga

[Umfanekiso]

UBernard noPauline Musinga

[Ibhokisi/Umfanekiso okwiphepha 191, 192]

“Ulibeka Esichengeni Ikamva Lakho!”

UMukosiku Sinaali

Wazalwa: Ngowe-1928

Wabhaptizwa: Ngowe-1951

Ingxelo ngobomi: Waphumelela kwisikolo saseGiliyadi yaye wayefudula engumguquleli, ngoku ungumdala webandla.

UHarry Arnott owayengumvangeli wasemazweni wathetha nam ngemini endabhaptizwa ngayo. Kwakufuneka abaguquleli beSilozi. Wabuza wathi: “Ngaba ungakwazi ukunceda?” Kungekudala ndafumana ileta yesabelo nephephancwadi IMboniselo. Ngolangazelelo olukhulu ndaqalisa ukuguqulela ngaloo njikalanga. Umsebenzi wokuguqulela wawunzima, ndandichitha ixesha elide ndibhala ngosiba lweinki oludala. Ndandingenaso isichazi-magama seSilozi. Emini ndandiphangela eposini ndize ebusuku ndiguqulele. Maxa wambi ndandifumana isikhumbuzo esivela kwiofisi yesebe, esithi: “Nceda uthumele ngokukhawuleza amanqaku osele uwaguqulele.” Ndandidla ngokuzibuza, ‘Yintoni endithintelayo ukuba ndingenele inkonzo yexesha elizeleyo?’ Ekugqibeleni, ndayeka ukusebenza eposini. Nangona abaqeshi bam babendithembile ndathi ndakuyeka ukusebenza baba nesikrokro. Ngaba bethu ndibe imali? Abaphathi beposi bathumela amagosa karhulumente amabini aMhlophe ukuba azokwenza uphando. Emva kokuhlolisisa ngokucokisekileyo akazange afumane nto iphosakeleyo. Ayengasiqondi isizathu sokuba ndifune ukuyeka emsebenzini. Abaqeshi bam bathi mandihlale baza kundinyusela kwisikhundla esiphezulu, ndathi ndakungavumi, bandilumkisa ngelithi: “Ulibeka esichengeni ikamva lakho!”

Yayingeyonyaniso leyo. Ngowe-1960, ndabizwa ukuba ndiye kukhonza eBheteli. Ngokukhawuleza emva koko ndabizwa kwiSikolo saseGiliyadi. Ndaba novalo. Ndiqala ngqa ukuhamba ngenqwelo-moya—ndaqala eParis, ndadlulela eAmsterdam, yaye emva koko ndaya eNew York—ndathi ngaphakathi, ‘Ngaba bethu kuba nje xa abathanjiswa besiya ezulwini?’ Ndachukumiseka bububele endamkelwa ngabo kwikomkhulu lehlabathi—abazalwana babethobeke ngeyona ndlela yaye babengenakhethe. Ndabuyiselwa eZambia, ndaza ndaqhubeka nomsebenzi wokuguqulela.

[Ibhokisi/Umfanekiso okwiphepha 194]

Amendu Angaphezu Kwaweenkozi

UKatuku Nkobongo unesiphene, akakwazi kuhamba. Ngenye iCawa, ngotyelelo lomveleli wesiphaluka, kwavakala iindaba zokuba iqela labavukeli lisondela ngakwidolophana awayehlala kuyo. Kwabaleka wonk’ umntu. Omnye wabantu bokugqibela ukumka apho yayingumveleli wesiphaluka, uMianga Mabosho. Wathi xa ekhwela kwibhayisikile yakhe esaba, weva umntu okhwazayo kwindlu eyayikufuphi, esithi, “Mzalwana wam, uza kundishiya apha?” YayinguKatuku. Ngokukhawuleza umveleli wesiphaluka wamkhwelisa kwibhayisikile yakhe baza baphuma kuloo dolophana.

Kwafuneka bahambe ngendlela engamaxethuka xa besiya ngakumzantsi weZambia. UMzalwan’ uNkobongo kwafuneka akhase kuloo maqhina. Umveleli wesiphaluka uthi: “Nangona mna ndandinyuka ngeenyawo, waya kufika kuqala encotsheni! Ndathi, ‘Le ndoda sisiqhwala kodwa ingathi inamaphiko!’ Ekufikeni kwethu kwindawo engenangozi saphiwa ukutya yaye ndacela lo mzalwana ukuba athandaze. Umthandazo wakhe osuk’ entliziyweni wandichukumisa kangangokuba ndalila. Ecaphula incwadi kaIsaya isahluko sama-40, wathandaza wenjenje: ‘Yehova, oko wakuthethayo kuyinyaniso. Amakhwenkwe aya kudinwa aze atyhafe, nabafana nakanjani na baya kukhubeka, kodwa abo bathembela kuwe baya kufumana amandla kwakhona. Baya kunyuka ngamaphiko njengeenkozi. Baya kubaleka baze bangatyhafi; baya kuhamba bangadinwa.’ Wongezelela wathi, ‘Enkosi, Yehova ngokundinika amendu angaphezu kwaweenkozi zezulu.’”

[Ibhokisi/Umfanekiso okwiphepha 204, 205]

Ibhulukhwe Emfutshane Yekhaki Neeteki Ezimbala Umdaka

UPhilemon Kasipoh

Wazalwa: Ngowe-1948

Wabhaptizwa: Ngowe-1966

Ingxelo ngobomi: Ngumveleli ohambahambayo, ukwangumhlohli nomalathisi kwiSikolo Sokuqeqesha Abalungiseleli eZambia.

Ndaqeqeshwa nguTatomkhulu kubulungiseleli. Wayedla ngokuya nam kubantwana endandifunda nabo aze athi mandinikele ubungqina kubo. UTatomkhulu wayedla ngokuqhuba isifundo sentsapho rhoqo yaye akukho namnye owayevumelekile ukuba alale! Ndandisoloko ndikhangele phambili ngolangazelelo kwisifundo sentsapho.

Ndabhaptizwa kumlambo owawukufuphi nasekhaya. Emva kwenyanga ndanikela intetho yam yokuqala ebandleni. Ndisakhumbula ukuba ndandinxibe ibhulukhwe emfutshane entsha yekhaki neeteki ezimbala umdaka. Into ebuhlungu kukuba imitya yezihlangu ndandiyiqinise nkqi kangangokuba kwakunzima nokushukuma. Isicaka sebandla sakuphawula oku. Seza eqongeni sayinyenyisa ngoxa ndandimile ndizolile. Ndayinikela kakuhle intetho yaye ndafunda lukhulu kobo bubele ndabenzelwa sisicaka sebandla. Ngokwenene uYehova uye wandiqeqesha ngendlela ebalaseleyo.

Ndiye ndakubona ukuzaliseka kwamazwi akuIsaya 60:22. Ngenxa yokwanda kwamabandla, kufuneka abadala nezicaka zolungiselelo ezingakumbi eziqeqeshwe kakuhle ukuze zisingathe iimbopheleleko. ISikolo Sokuqeqesha Abalungiseleli siluncedo kule nkalo. Kuluvuyo ngokwenene ukuqeqesha aba bafana. Ndiye ndafunda ukuba xa uYehova ekunika umsebenzi, ukunika nomoya wakhe oyingcwele.

[Ibhokisi/Imifanekiso ekwiphepha 207-209]

“Suka Wethu, Yinto Engenamsebenzi Leyo”

UEdward NoLinda Finch

Bazalwa: Ngowe-1951

Babhaptizwa: Ngowe-1969 nowe-1966 ngokulandelelana kwabo

Ingxelo ngobomi: Baphumelela kwiklasi yama-69 yaseGiliyadi. UEdward ngumalathisi kwiKomiti yeSebe laseZambia.

Ngesinye isihlandlo, ngexesha leendibano sasihamba ngemoto kummandla okumntla weli. Iindlela zalapha ziindledlana zomhlaba ezimbalwa. Kumgama weekhilomitha eziliqela ngaphandle kwedolophana ethile, sabona abantu besiza ngakuthi. Omnye wabo yayilixhego elikhokhobayo elalisimelela ngentonga. Lalixwaye iibhutsi zalo nebhegi encinane. Xa sisondela, saphawula ukuba aba bantu banxibe iibheji zendibano. Samisa saza sababuza ukuba bavela phi na. Lo mzalwana osele ekhulile waphakamisa intloko waza wathi: “Inokuba usilibele. Besisonke endibanweni eChansa. Sele siza kufika ekhaya ngoku.”

“Nisuke nini endibanweni?” sabuza.

“Ekupheleni kocwangciso ngeCawa.”

“Kodwa ngoku kusemva kwemini ngoLwesithathu. Nihambe iintsuku ezintathu zonke?”

“Ewe, yaye izolo siye seva iingonyama zigquma.”

“Siyanincoma nonke ngomoya wenu omhle nemigudu eniyenzayo ukuze nibekho kwiindibano.”

Lo mzalwana osele ekhulile wathatha izinto zakhe wathi chu. “Suka wethu, yinto engenamsebenzi leyo,” waphendula ngelitshoyo. “Nisibulelele kwiofisi yesebe ngendawo entsha ebekuqhutyelwa kuyo indibano. Kulo nyaka uphelileyo siye sahamba iintsuku ezintlanu kodwa kulo sihambe iintsuku ezintathu kuphela.”

Abaninzi bakhumbula owe-1992 njengonyaka wembalela eZambia. Sasikwindibano eyayikufuphi noMlambo iZambezi malunga neekhilomitha ezingama-200 ukusuka kwiiVictoria Falls. Ngokuhlwa satyelela iintsapho ezazilapho yaye ezininzi zazothe umlilo phambi kwamanqugwalana azo. Elinye iqela labantu abamalunga nama-20 lalicula iingoma zoBukumkani. Seva ukuba abo bantu bahambe iintsuku ezisibhozo ukuza endibanweni. Babengacingi ukuba kukho nto ikhethekileyo bayenzileyo. Kwizilwanyana zabo babekhwelise abantwana babo abancinane, ukutya, izinto zokupheka nezinye izinto yaye kwakusithi kwakuhlwa balale endleleni.

Ngosuku olulandelayo endibanweni kwenziwa isaziso sokuba abaninzi bathwaxwe kanobom yimbalela yaye kunikelwa uncedo kwabo basweleyo. Ngaloo ngokuhlwa kweza abazalwana abathathu kwinqugwala lethu. Babebetha ngezikaTshiwo, benxibe iimpahla ezindala. Sasilindele ukuba baze kusixelela indlela abathwaxwe ngayo yimbalela. Kunoko basixelela indlela abakhathazeke ngayo kukuva imeko abakuyo abanye abazalwana. Omnye wathi rhuthu imvulophu ezaliswe yimali kwipokotho yebhatyi waza wathi: “Abazalwana bethu mabangabulawa yindlala. Nantsi imali yokuthenga ukutya.” Ngenxa yesingqukru, asizange sikwazi nokubulela yaye baphuma bahamba siseneso singqukru. Beza endibanweni bengazilungiselelanga ukuba baza kwenza lo mnikelo, ngoko oko bakwenzayo kwakuncomeka gqitha. Amava afana nala asenza sisondele nangakumbi kubazalwana bethu.

[Imifanekiso]

Nangona bejamelene nobunzima, abaninzi bahamba imigama emide xa besiya kwiindibano zesiphaluka nezesithili

Ngasentla: Kuphekwa isidlo sangokuhlwa kwibala lendibano

Ekhohlo: Ubhaka amaqebengwana

[Ibhokisi/Umfanekiso okwiphepha 211-213]

Sasizimisele Ukuhlanganisana

UAaron Mapulanga

Wazalwa: Ngowe-1938

Wabhaptizwa: Ngowe-1955

Ingxelo ngobomi: Wayefudula eseBheteli engumguquleli, ekwalilungu leKomiti yeSebe. Ngoku unentsapho yaye ungumdala webandla.

Ngowe-1974 indibano yethu yayikumgama oziikhilomitha ezili-10 kwicala elingakwimpuma yeKasama. Nangona inkosi yasekuhlaleni yayisivumele ukuba sihlanganisane, amapolisa afika athi mayichithakale loo ndibano. Kungekudala, kwafika umphathi-mkhosi, ingxilimbela yendoda eyayihamba namajoni alikhulu baza barhangqa le ndawo sasihlanganisene kuyo. Saqhubeka nocwangciso ngoxa kwiofisi eyenziwe ngengca kwakuxutyushwa ngokuphathelele imvume yokuqhutywa kwale ndibano nokuba uza kuculwa kusini na umhobe wesizwe.

Ngexesha lokuba ndisingathe isabelo sam, umphathi-mkhosi wandilandela xa ndisiya eqongeni ezama ukundithintela ukuba ndingayinikeli intetho engumxholo. Abaphulaphuli babezibuza ukuba kuza kwenzeka ntoni. Wema waza wajonga ntsho abaphulaphuli ababemalunga ne-12 000 emva koko wee gwiqi wemka. Emva kokuba ndinikele intetho ndafika endilinde emva kweqonga, ecaphuka ngeyona ndlela. Wayalela umkhosi wakhe ukuba uchithe indibano kodwa kwabakho impikiswano phakathi kweengqwayingqwayi zomkhosi emva koko bemka. Kungekudala, babuya bephethe incwadi enkulu. Umphathi-mkhosi wayibeka etafileni phambi kwam waza wathi mandifunde indawo ekrwelelweyo. Ndafundela ngaphakathi.

“Inyanisile le ncwadi,” ndatsho. “Ithi: ‘Ipolisa linegunya lokuchitha nayiphi na intlanganiso ebonakala iza kudubaduba uxolo.’” Ndijonge ibhanti lakhe elinemipu, ndathi: “Ekuphela kwesisongelo esinaso apha nguwe nala madoda uhamba nawo kuba nixhobile. Thina siphethe nje iiBhayibhile.”

Ngoko nangoko wakhangela kumcuphi awayehamba naye waza wathi: “Benditheni kuwe? Masihambe!” Bahamba nam bandisa kwisikhululo samapolisa.

Ekufikeni kwethu eofisini yalo, eli polisa lathabatha ifowuni lathetha nelinye ipolisa. Sasithetha isiNgesi ngalo lonke ixesha. Lajika lathetha iSilozi. Lalingazi ukuba nam ndithetha sona! Bathetha ngam efowunini. Ndathi cwaka ndingafuni lindibone ukuba ndiyayiqonda le nto liyithethayo. Labeka phantsi ifowuni laza lathi, “Phulaphula ke!”

Ndaphendula ngeSilozi ndathi, “Eni sha na teeleza!” okuthetha ukuthi “Ewe mhlekazi, ndiphulaphule!” Limangalisiwe ngokuqinisekileyo, lathi cwaka lindithe ntsho. Emva koko laphakama laya kwifriji enkulu eyayisekoneni kule ofisi yalo laza lakhupha isiselo landipha. Zathi gingxi izibilini.

Kamva kwafika omnye umzalwana owayengusomashishini ohlonelwayo kuloo ngingqi. Sanikela amacebiso awalitsho layeka ukuxhalaba eli polisa yatsho yaphela yonke loo ngxwabangxwaba. Ngoncedo lukaYehova kwaba lula ukulungiselela indibano.

[Ibhokisi/Umfanekiso okwiphepha 221]

Ndandibhitye Ndingamathambo

UMichael Mukanu

Wazalwa: Ngowe-1928

Wabhaptizwa: Ngowe-1954

Ingxelo ngobomi: Wayengumveleli ohambahambayo ngoku ukhonza kwiBheteli yaseZambia.

Kwisiphaluka endandikuso ndandihamba ndiye kufikelela kummandla okwintlambo engaphaya kwamathambeka. Into eyayindiphethe kakubi apho ziingcongconi. Ukuze ndiphephe ezo ngcongconi nokutshisa kwemini, ndandidla ngokuvuka ngentsimbi yoku-1:00 kusasa ndingene endleleni, ndinyuke iinduli neentaba ndisiya kwibandla elilandelayo. Kuba ndandihamba imigama emide, ndandiphatha umthwalo nje olingeneyo. Ukutya kwakunqongophele ngenxa yoko ndandibhitye ndingamathambo. Abazalwana bacinga ngokubhalela iofisi yesebe bacele ukuba nditshintshelwe kwesinye isabelo kuba babecinga ukuba ndiza kufa kungekudala. Bakundixelela oku, ndathi: “Licebiso elihle elo, kodwa nimele nikhumbule ukuba nguYehova ondinike esi sabelo ngoko siza kutshintshwa nguye. Phofu ke, andiyi kuba ngumntu wokuqala ukufa. Ndiza kuqhubeka nomsebenzi. Ukuba ndiyafa, nize nazise iofisi yesebe.”

Kwiiveki ezintathu emva koko, ndafumana isabelo esitsha. Eneneni, ukukhonza uYehova kunokuba lucelomngeni kodwa umele uqhubeke. UYehova nguThixo owonwabileyo; ukuba abakhonzi bakhe abonwabanga unokwenza okuthile ukuze baqhubeke bemkhonza ngovuyo.

[Ibhokisi/Umfanekiso okwiphepha 223, 224]

Asihambisani Neenkolelo

UHarkins Mukinga

Wazalwa: Ngowe-1954

Wabhaptizwa: Ngowe-1970

Ingxelo ngobomi: Wayengumveleli ohambahambayo, ekunye nomfazi wakhe, ngoku ukhonza kwiBheteli yaseZambia.

Ngoxa mna nenkosikazi yam uIdah sasikumsebenzi wokuhambahamba, sasihamba nonyana wethu okuphela kwakhe, owayeneminyaka emibini ubudala. Xa sifika kwelinye ibandla, abazalwana basamkela ngobubele. Kusasa ngoLwesine, unyana wethu waqalisa ukukhala yaye wayengathuthuzeleki. Ngentsimbi yesi-8:00 kusasa ndashiya uIdah emnyamekela ndaya kwintlanganiso yenkonzo yasentsimini. Emva kweyure, ngoxa ndandiqhuba isifundo seBhayibhile, ndeva iindaba ezibuhlungu zokuba unyana wethu ufile. Into eyaba buhlungu kakhulu kukuba, abazalwana abaninzi babekholelwa ukuba kukho umntu omthakathileyo. Sazama ukubanceda ukuba bangacingi ngaloo ndlela kodwa ezi ndaba zanwenwa okomlilo wedobo kuloo mmandla. Ndachaza ukuba uSathana unamandla kodwa akanamandla ngaphezu koYehova nabakhonzi bakhe abanyanisekileyo. Sonke sehlelwa “lixesha nasisihlo esingenakubonwa kwangaphambili,” kodwa uloyiko alufanele lusiqhubele ekwenzeni izigqibo ngokukhawuleza.—INtshu. 9:11.

Unyana wethu wayeza kungcwatywa ngosuku olulandelayo. Abazalwana bacebisa ukuba iintlanganiso zebandla zinqunyanyiswe. Kodwa ke, saziqhuba iintlanganiso emva komngcwabo. Abazalwana bafunda okuthile koku: Bafunda ukuba imimoya engendawo asiyoyiki yaye asihambisani neenkolelo. Nangona sasibuhlungu ngenxa yokufelwa ngunyana wethu, saqhubeka nemisebenzi yethu yeveki ekhethekileyo emva koko sadlulela kwibandla elilandelayo. Kunokuba sithuthuzelwe emabandleni ngentlungu yokufelwa ngunyana wethu, sithi ababethuthuzela abazalwana sibaqinisekisa ukuba kungekudala, ukufa kuza kuphela.

[Ibhokisi/Umfanekiso okwiphepha 228, 229]

Saba Nesibindi

ULennard Musonda

Wazalwa: Ngowe-1955

Wabhaptizwa: Ngowe-1974

Ingxelo ngobomi: Waqalisa inkonzo yexesha elizeleyo ngowe-1976. Wachitha iminyaka emithandathu engumveleli ohambahambayo ngoku ukhonza kwiBheteli yaseZambia.

Ndikhumbula ndityelela amabandla malunga nowe-1985 kummandla welizwe ongasentla. Kwiminyaka engaphambili, inkcaso yamaqela ezobupolitika yayikrakra. Ndandisandul’ ukumiselwa njengomveleli ohambahambayo yaye kwabakho imeko eyafuna ndibonise ukholo nesibindi. Ngenye imini xa sigqiba ukuqhuba intlanganiso yenkonzo yasentsimini, salungiselela ukuya kwilali ekufuphi. Omnye umzalwana wathi uve kusithiwa, ukuba amaNgqina kaYehova akhe angena kuloo lali aza kubethwa ngumntu wonke walapho. Nangona abantu babedla ngokuhlaselwa ngamahlokondiba ngasekupheleni kweminyaka yee-1960 nasekuqaleni kweyee-1970, andizange ndiyicinge into yokuba singahlaselwa yilali yonke.

Sekunjalo, bathi abanye abavakalisi bakuva ezi ndaba, boyika baza barhoxa. Abanye bethu—abaninzi—baba nesibindi baza benjenjeya ukuya kuloo lali. Xa sifika apho sasuka samangaliswa. Sahambisa amaphephancwadi amaninzi, saxubusha kamnandi nabantu ababekho. Noko ke, abanye abantu bathi bakusibona singena elalini, bababelek’ abasicatyana. Sasifika kukho iimbiza ezibila zodwa yaye izindlu zazingatshixwanga. Ngoko, kunokuba abantu basihlasele basuka babaleka.

[Ibhokisi/Umfanekiso okwiphepha 232, 233]

Kwafuneka Ndibaleke Ukuze Ndisindise Ubomi Bam

UDarlington Sefuka

Wazalwa: Ngowe-1945

Wabhaptizwa: Ngowe-1963

Ingxelo ngobomi: Wayenguvulindlela okhethekileyo, waba ngumveleli ohambahambayo yaye ngoku ukhonza kwiBheteli yaseZambia.

Ngowe-1963, iimeko zazimaxongo. Xa sisiya kubulungiseleli basentsimini ulutsha olwalunomoya wezopolitiko lwaludla ngokuhamba phambi kwethu luxelela abantu ukuba bangasiphulaphuli, lubatyityimbisel’ umnwe lusithi ukuba bakhe basiphulaphula kuza kufika umntu aze kwaphula iifestile neengcango zabo.

Ngenye injikalanga, emva kweentsuku ezimbini ndibhaptiziwe, ndabethwa ngabantu abasebatsha abali-15 ndathi nca. Ndandiphum’ igazi ngomlomo neempumlo. Ngenye injikalanga, mna nomnye umzalwana sahlaselwa ngabantu abamalunga nama-40 abasilandela sada saya kufika apho ndandihlala khona. Ndomelezwa kukukhumbula amava eNkosi uYesu. Kwintetho yobhaptizo uJohn Jason wayenza yacaca into yokuba amaKristu aya kuhlangabezana neengxaki ebomini. Xa kusenzeka ezi zinto, andizange ndothuke koko ndafumana ukhuthazo.

Ngelo xesha, abaququzeleli bezopolitiko babefuna inkxaso kumlo wabo wokufun’ inkululeko yaye kuba sasingathabathi cala, babecinga ukuba sixhasa iYurophu neMerika. Iinkokeli zonqulo ezazixhasa amaqela ezopolitiko zazixhasa nayiphi na into embi ethethwayo ngathi. Kwakunzima ngaphambi kokuba eli lizwe lifumane uzimele-geqe yaye kwaqhubeka kunzima nasemva koko. Abazalwana abaninzi baphulukana namashishini abo kuba bengenawo amakhadi ezopolitiko. Abanye bafuduka ezidolophini babuyela kumakhaya abo asezilalini besamkela imali encinane kuba bengafuni ukucelwa imali yokuxhasa ezopolitiko.

Ngoxa ndandikwishumi elivisayo, ndandinyanyekelwa ngumzala wam owayengeloNgqina. Ngenxa yokuba ndingathabathi cala, intsapho yakhe yayifumana izisongelo. Yayisoyika. Ngenye imini, phambi kokuba ahambe aye emsebenzini, umzala wathi, “Xa ndibuya emsebenzini ngokuhlwa, ndifike ungekho apha.” Ndaqala ndacinga ukuba uyadlala kuba ndandingenaso esinye isizalwana apho kuloo dolophu. Kwakungekho ndawo ndinokuya kuyo. Ndakhawuleza ndabona ukuba akadlali. Xa ebuya emsebenzini wafika ndikho, waba lugcwabevu ngumsindo. Wacholachola amatye wandigxotha. “Hamba uye kwezinye izinja ezifana nawe!” wankqangaza ngelitshoyo. Kwafuneka ndibaleke ukuze ndisindise ubomi bam.

Ezi ndaba zaya kufikelela ezindlebeni zikaTata yaye wathumela umyalezo othi: “Ukuba usaqhubeka ungundilele, ungakhe uwubeke umcondo wakho apha kwam.” Kwathanda ukuba nzima noko. Ndandineminyaka eli-18 kuphela ubudala. Ngubani bethu oza kundamkela emzini wakhe? Ndamkelwa libandla. Ndidla ngokucinga ngala mazwi awathethwa nguKumkani uDavide: “Nokuba ubawo noma bangandishiya, ke yena uYehova uya kundithabatha.” (INdu. 27:10) Ngokwenene, uYehova uyasigcina isithembiso sakhe.

[Ibhokisi/Umfanekiso okwiphepha 236, 237]

Ndahlonelwa Ngootitshala Abaninzi Ngenxa Yokuziphatha Kakuhle

UJackson Kapobe

Wazalwa: Ngowe-1957

Wabhaptizwa: Ngowe-1971

Ingxelo ngobomi: Ngumdala webandla.

Abantwana baqala ukugxothwa ezikolweni ngowe-1964. Iofisi yesebe yanceda abazali babona imfuneko yokuxhobisa abantwana babo. Ndikhumbula ngenye imini uTata ehleli nam ukuphuma kwesikolo sixubusha iEksodus 20:4, 5.

Xa kuthandazwa esikolweni, ndandisima ngasemva ukuze ndingabhaqwa. Ababhaqiweyo ukuba abawuculi umhobe wesizwe babemiswa ngaphambili. Yathi inqununu yakundibuza ukuba kutheni ndingafuni ukucula, ndaphendula ngeBhayibhile. “Uyakwazi ukufunda kodwa akufuni kucula!” yandikhankqula ngelitshoyo. Yathi ndimele ndinyaniseke kurhulumente kuba wenze isikolo esindifundise ukulesa.

Ekugqibeleni ngoFebruwari 1967, ndagxothwa esikolweni. Ndadana noko kuba ndandikuthanda ukufunda yaye ndandingumfundi ozimiseleyo. Nangona babempheka bemophula abo wayesebenza nabo namalungu entsapho angakholwayo, uTata wandiqinisekisa ukuba ndenza into efanelekileyo. NoMama wayegxekwa. Xa ndihamba naye siye kusebenza emasimini, amanye amabhinqa ayesigculela athi, “Uhlalele ntoni lo angayi esikolweni?”

Noko ke, andizange ndiyeke ukufunda. Ngowe-1972, kwagxininiswa kumba wokuqhutywa kweeklasi zabangafundanga ebandleni. Kwangaxeshanye, izinto zaba bhetele esikolweni. Isikolo sasisecaleni kwasekhaya. Inqununu yayidla ngokuza kucela amanzi abandayo okusela okanye iboleke imitshayelo yokutshayela amagumbi okufundela. Ngenye imini yada yaza kuboleka nemali! Inokuba yachukunyiswa bububele esasiyenzela bona ekhaya, kuba ngenye imini yabuza, “Unyana wakho usafuna ukuya esikolweni?” UTata wayikhumbuza ukuba ndiseliNgqina likaYehova. Inqununu yathi: “Akukho ngxaki. Ufuna ukuqala kweliphi ibanga?” yandibuza. Ndakhetha ukuqala kwibanga lesine. Ndabuyela kwakwesiya sikolo, phantsi kwenqununu enye yaye ndandifunda nabantwana endandifunda nabo kwiminyaka engaphambili—ngaphandle nje kokuba abaninzi ndandifunda bhetele kunabo ngenxa yokuncedwa ziiklasi zabangafundanga ezaziqhutyelwa kwiHolo yoBukumkani.

Ndahlonelwa ngootitshala ngenxa yokukhuthalela umsebenzi wesikolo nokuziphatha kakuhle yaye ngenxa yoko izinto zandihambela kakuhle esikolweni. Ndandizibhokoxa kumsebenzi wesikolo yaye ndabhala iimviwo ezithile ezandincedayo ukuba ndifumane umsebenzi oncumisayo emgodini yaye kamva ndakwazi ukuxhasa intsapho yam. Ndiyavuya ukuba ndingazange ndilalanise ndicule.

[Ibhokisi/Umfanekiso okwiphepha 241, 242]

“Singayeka Njani Ukushumayela?”

UJonas Manjoni

Wazalwa: Ngowe-1922

Wabhaptizwa: Ngowe-1950

Ingxelo ngobomi: Wakhonza kwiBheteli yaseZambia iminyaka engaphezu kwama-20. Ngoku ungumdala yaye ukwanguvulindlela othe ngxi.

Ebudeni bemfazwe yehlabathi yesibini, umntakwethu wabuya eTanzania eneBhayibhile neencwadi eziliqela kuquka ethi Government nethi Reconciliation. Ngenxa yokuba iincwadi zamaNgqina kaYehova zazingavumelekanga ngokusemthethweni, ndandinomdla wokubona ukuba yintoni unobangela woku. Ndafunda incwadi ethi Reconciliation kodwa andizange ndiyiqonde kakuhle. Kwiminyaka ethile elandelayo, ndatyelela umntakwethu ndaza ndaya naye kwiintlanganiso zebandla. Kwakungekho Holo yoBukumkani; sasihlanganisana kwithafa elibiyelwe ngoqalo (bamboo). Kwakungekho lwandlalo lubhaliweyo kodwa kwakumnandi ukuphulaphula intetho ethatyathwe eZibhalweni! Indlela eyayicaciswa ngayo iBhayibhile yayahlukile kuleyo yasecaweni endandihamba kuyo ngaphambili, kuba eyona nto yayiphambili apho kukukhahlela indwe nokubetha amagubu. Kaloku ecaweni kwakusiliwa ngezinto zobuhlanga nolwimi ekumele kuculwe ngalo! Noko ke, kwezi ntlanganiso ndeva iingoma ezimnandi zokudumisa uYehova, ndabona iintsapho zihleli ziphulaphule ukutya kokomoya.

Ndabhaptizwa ndaza ndaqhubeka nomsebenzi wam wempangelo wokunyamekela abagulayo owawubangela ukuba ndiye kwiidolophu ezahlukahlukeneyo ezazinemigodi. Ngowe-1951, ndathabatha ikhefu leeveki ezimbini ndaya kuncedisa kwiofisi yesebe eLusaka. Kungekudala emva koko, ndabizwa ukuba ndiye kukhonza eBheteli. Ekuqaleni, ndandisebenza kwisebe lokuthumela uncwadi yaye kamva xa iofisi yafuduselwa eLuanshya, ndancedisa kwisebe lembalelwano nelokuguqulela. Nangona kwabakho utshintsho kwimeko yezopolitiko ekuqaleni kweminyaka yee-1960, abazalwana babesenza inkqubela kumsebenzi wokushumayela yaye bengathabathi cala kwezopolitiko.

UMatshi 1963 wayesesinye sezihlandlo ezininzi endadibana ngazo noGqr. Kenneth Kaunda owayesele eza kumiselwa njengomongameli waseZambia. Ndamchazela isizathu sokungavumi kwethu ukungenela imibutho yezopolitiko nokuthenga amakhadi ezopolitiko. Samcela ukuba asincede asihlangule ekusongelweni ngamaqela ezopolitiko asichasileyo yaye wacela ukuba simnike inkcazelo engakumbi. Kwiminyaka ethile kamva, uGqr. Kaunda wasibizela kwiNdlu yowiso-Mthetho apho safumana ilungelo lokuthetha nomongameli kunye nabaphathiswa bakhe abaphambili. Loo ntlanganiso yatsala de kwangokuhlwa. Nangona wayengawachasanga amaNgqina kaYehova njengeqela lonqulo, umongameli wacebisa ukuba sihlanganisane ngokufanayo namanye amaqela onqulo, siyeke ukushumayela. “Singayeka njani ukushumayela?” sabuza. “UYesu wayeshumayela. Akazange asuke nje akhe itempile ecaleni kweyabaFarisi.”

Nangona sabhena izihlandlo eziphindaphindiweyo, kwamiselwa imiqathango ethile kubulungiseleli bethu. Sekunjalo, njengesiqhelo, sasizifumana iindlela zokuzukisa nokudumisa uYehova, osebenzisa abakhonzi bakhe ukuphumeza injongo yakhe.

[Ibhokisi/Umfanekiso okwiphepha 245, 246]

Ndandinomdla Wokufunda

UDaniel Sakala

Wazalwa: Ngowe-1964

Wabhaptizwa: Ngowe-1996

Ingxelo ngobomi: Ngumdala webandla.

Ndandililungu leCawa yaseZiyon ukufumana kwam umbhalo wencwadana ethi Funda Ukulesa Nokubhala. Nangona ndandingafundanga, ndandinomdla wokufunda. Ngoko emva kokufumana le ncwadana, ndazinika ithuba lokuyifunda. Ndandidla ngokucela abantu bandifundise amagama amatsha. Ngenxa yoko, nakuba kwakungekho mntu undifundisayo, ndenza inkqubela yaye ngethutyana nje ndafunda ukulesa nokubhala.

Ndandisele ndikwazi ukufunda iBhayibhile! Noko ke, ndafunda izinto eziliqela ezazingqubana nezithethe ezazisenziwa ecaweni yam. Usibali wam, owayengomnye wamaNgqina kaYehova wandithumelela incwadana ethi Imimoya Yabafileyo—Ngaba Inokukunceda Okanye Inokukwenzakalisa? Ngaba Ikho Ngokwenene? Oko ndakufunda apho kwandishukumisela ukuba ndibuze umfundisi wecawa yam imibuzo ethile. Ngenye imini ndisecaweni, ndafunda iDuteronomi 18:10, 11 ndaza ndabuza, “Kutheni sisenza izinto ezigatywayo yiBhayibhile?”

“Simele senze eyethu indima,” waphendula ngelitshoyo umfundisi. Andizange ndimve ukuba uthetha ukuthini.

Emva koko ndafunda INtshumayeli 9:5 ndaza ndabuza, “Kutheni sikhuthaza abantu ukuba bahlonele abafi ekubeni iBhayibhile isithi abafileyo ‘abazi nto konke konke’?” Umfundisi nebandla lakhe abazange batsho nelimdaka.

Amanye amalungu ecawa, eza kum kamva. Athi, “AsingomaNgqina kaYehova thina, ngoko kutheni simele siyeke ukuhlonela abafi, siyeke namasiko ethu?” Yandimangalisa noko le nto. Nangona ndandisebenzisa iBhayibhile kuphela xa ndixubusha nabantu becawa, bafikelela kwisigqibo sokuba ndinxulumana namaNgqina kaYehova! Ukususela ngoko, ndaqalisa ukuya kwiHolo yoBukumkani namanye amalungu amabini ecawa endandihamba kuyo. Kwiinyanga ezintathu zokuqala, ndakhuthaza abaliqela kwizalamane zam ezisondeleyo ukuba baye kwiintlanganiso zamaKristu. Abathathu kubo ngoku babhaptiziwe, kuquka inkosikazi yam.

[Isicangca/Igrafu ekwiphepha 176, 177]

IZAMBIA—ULUHLU LWEZIGANEKO

1910

Ngowe-1911: Abemi baseZambia bafumana iStudies in the Scriptures.

Ngowe-1919: UKosamu Mwanza nabanye abali-150 bayakatswa baze bavalelwe entolongweni.

Ngowe-1925: Iofisi yaBafundi BeBhayibhile eseKapa inciphisa ubhaptizo nokushumayela.

Ngowe-1935: Urhulumente umisela imiqathango ngokuphathelele ukungeniswa kweencwadi ezivela kwamanye amazwe. Iincwadi ezingama-20 azivumelekanga ngokusemthethweni.

Ngowe-1936: Kuvulwa indawo yokugcina uncwadi eLusaka phantsi kolwalathiso lukaLlewelyn Phillips.

1940

Ngowe-1940: Urhulumente uyekisa ngokusemthethweni ukungeniswa koncwadi lwethu oluvela kwamanye amazwe nokusasazwa kwalo. Ubhaptizo luyaqalisa kwakhona.

Ngowe-1948: Kufika abokuqala abaphumelele eGiliyadi.

Ngowe-1949: Urhulumente uvumela ngokusemthethweni ukusasazwa kweMboniselo.

Ngowe-1954: Iofisi yesebe ifuduselwa eLuanshya.

Ngowe-1962: Iofisi yesebe ifuduselwa eKitwe.

Ngowe-1969: Urhulumente uyekisa ngokusemthethweni umsebenzi wethu wokushumayela esidlangalaleni.

1970

Ngowe-1975: Abavangeli basemazweni bayagxothwa.

Ngowe-1986: Abavangeli basemazweni bayavunyelwa ukubuyela kweli kwakhona.

Ngowe-1993: Kunikezelwa isakhiwo sesebe esiseLusaka.

2000

Ngowama-2004: Kunikezelwa icandelo elandisiweyo lesakhiwo sesebe eLusaka.

Ngowama-2005: Bali-127 151 abavakalisi abakhutheleyo eZambia.

[Igrafu]

(Yiya kwimpapasho)

Isimbuku Sabavakalisi

Isimbuku Soovulindlela

130 000

65 000

1910 1940 1970 2000

[Iimaphu ezikwiphepha 169]

(Ukuba ufuna inkcazelo ehlahlelwe kakuhle, yiya kwimpapasho)

DEMOCRATIC REPUBLIC OF THE CONGO

ZAMBIA

Kaputa

Mbala

Isoka

Kasama

Samfya

Lundazi

Mufulira

Kalulushi

Kitwe

Luanshya

Kabwe

LUSAKA

Senanga

Zambezi River

Livingstone

BOTSWANA

ZIMBABWE

MOZAMBIQUE

MALAWI

[Umfanekiso ozalise iphepha, kwiphepha 162]

[Umfanekiso okwiphepha 167]

UThomson Kangale

[Umfanekiso okwiphepha 170]

ULlewelyn Phillips

[Umfanekiso okwiphepha 178]

UHarry Arnott, uNathan Knorr, uKay noJohn Jason, kunye noIan Fergusson, ngowe-1952

[Umfanekiso okwiphepha 193]

Ekunene: UManda Ntompa nentsapho yakhe kwinkampu yeembacu ebizwa ngokuba yiMwange, ngowama-2001

[Umfanekiso okwiphepha 193]

Ngezantsi: Inkampu yeembacu

[Umfanekiso okwiphepha 201]

Iklasi yokuqala yeSikolo Sokuqeqesha Abalungiseleli eZambia, ngowe-1993

[Umfanekiso okwiphepha 202]

URichard Frudd noPhilemon Kasipoh abangabahlohli bakunye nomfundi

[Umfanekiso okwiphepha 206]

Iindawo ekwakuqhutyelwa kuzo indibano zazisakhiwa ngodaka, ingca nezinye izinto ezifumaneka ekuhlaleni

[Umfanekiso okwiphepha 215]

Ekhohlo: Umdlalo weBhayibhile onabadlali abanxibe impahla yamandulo, ngowe-1991

[Umfanekiso okwiphepha 215]

Ngezantsi: Abantu ababeza kubhaptizwa kwiNdibano YeSithili ‘Yabathunywa Boxolo Lobuthixo’ ngowe-1996

[Umfanekiso okwiphepha 235]

UMnu. Richmond Smith noFeliya Kachasu, kunye noyise kaFeliya, uPaul

[Imifanekiso ekwiphepha 251]

Abasebenzi abachwayitileyo bakha isebe eLusaka

[Imifanekiso ekwiphepha 252, 253]

(1, 2) IiHolo zoBukumkani ezisandul’ ukwakhiwa

(3, 4) Isebe laseZambia, eLusaka

(5) UStephen Lett xa kwakunikezelwa izakhiwo ezandisiweyo zesebe, ngoDisemba 2004

[Umfanekiso okwiphepha 254]

IKomiti YeSebe, ukusuka ekhohlo: uAlbert Musonda, uAlfred Kyhe, uEdward Finch, uCyrus Nyangu, uDayrell Sharp