Isahluko 5
Ukhanyiso Olwenzelwe ‘Ukupheliswa Kwephakade’
1. Nguwuphi umtshato ophawulekayo “uMthetheli woxolo” awawuxela kwangaphambili njengoza kwenzeka ‘ekuphelisweni kwephakade eli,’ ibe wawuxela kuwuphi umzekeliso?
ETHETHA ‘ngokupheliswa kwephakade,’ “uMthetheli woxolo” wathi kuMateyu 24:38 ‘abantu babeya kuzeka, bendise.’ Kodwa ebudeni bexesha elifanayo, ezulwini kwakuya kuqalisa owona mtshato mkhulu. Ngumtshato okhankanywe kumzekeliso kaYesu wabaphathi bezibane abalishumi, iintombi ezilishumi.—Mateyu 24:3; 25:1-12.
2. (a) Lo mtshato ukumzekeliso uqhubeka ngaliphi ixesha lemini? (b) Yintoni elandela umtshato, ibe ukukhanya kulungiselelwa njani?
2 Kusetyenziswe uMbindi-Mpuma njengendawo oqhubeka kuyo lo mtshato. Uqhubeka ebusuku kakhulu, uqhubeke de uye ezinzulwini zobusuku. Umtshato womtshakazi nomyeni wakhe okokuqala uyaqhutywa uze ulandelwe lungcelele lwabantu abaya endlwini yesidlo. Indlela ayikhanyiswa zizibane zasesitratweni. Ukukhanya kulungiselelwa ngabo banesabelo kungcelele lomsitho, ibe abantu ababukeleyo banokulubona olu ngcelele luqhubeka, benqwenelela abasandul’ ukutshata ulonwabo.
3, 4. (a) Ngoobani abanomdla kungcelele olulandelayo, ibe balungiselela ntoni? (b) Ukuzaliseka kwalo mzekeliso kongeza ubungqina basiphi isibakala? (c) Sinokuvuya ukuba senza ntoni?
3 Njengoko zingamabhinqa, ezi ntombi zinomdla kulo mtshato. Ngoko, ngakwindawo ekwenziwa kuyo olu ngcelele, iintombi ezilishumi ziyalinda de abantu bomtshato abenze ungcelele bafike kwindawo yazo. Zinqwenela ukukhanyisa kwesi sihlandlo, ibe ngenxa yesi sizathu zonke ziza ziphethe izibane zokukhanyisa, kodwa zintlanu kuphela kuzo ezineoli yokukhanyisa egcinelwe xa iphelile ekhoyo. Ezi ntombi zintlanu ziziingqondi. Ukuzaliseka kwalo mzekeliso kumele kubangel’ umdla kuthi namhlanje, kuba ngokutsho kukaYesu Kristu, oku kuqinisekisa ngokungakumbi ukuba sisekuphelisweni kwale nkqubo indala.—Mateyu 25:13.
4 Sinokuvuya ukuba siziingqondi size siqonde ukuzaliseka kwalo mtshato obaluleke kuyo yonke imitshato nabantu abeze kuwo! Ngoobani namhlanje abababalwe ngokwamkelwa kwesi sidlo? Ngaba nguye nawuphi na kuthi? Makhe sibone!
5. Yintoni eyayingumahluko kwabo babumba iintombi ezilishumi, ibe kwenzeka ntoni akulibazisa umyeni?
5 Umzekeliso owanikelwa nguYesu weentombi ezilishumi unokuthanani ‘nobukumkani bamazulu,’ urhulumente wehlabathi wokusikelela lonke uluntu. Ngoko uYesu Kristu wahlabela mgama wathi: “Ubukumkani bamazulu buya kufanekiswa neentombi ezilishumi, ezazithabathayo izibane zazo, zaphuma zaya kumkhawulela umyeni. Ezintlanu ke kuzo zaye ziziingqondi, ezintlanu ziziziyatha. Ezo ziziziyatha zaphatha izibane zazo, azaphatha oli nazo; kodwa eziziingqondi zaphatha ioli ezityeni zazo, kwanezibane zazo. Ke kaloku, akubon’ ukuba ulibele umyeni, zozela zonke zalala.”—Mateyu 25:1-5.
6. (a) Iintombi ezilishumi zazifanekisela oobani? (b) Kutheni le nto umtshakazi engakhankanywa nje kulo mzekeliso?
6 Ke zazifanekisela bani ezo ntombi zilishumi? Zazifanekisela abaza kuba ngamalungu omtshakazi woMyeni wokomoya, uYesu Kristu. Ngokungathandabuzekiyo ngenxa yesi sizathu umtshakazi akakhankanywa kumzekeliso kaYesu; ngumyeni nje kuphela obalaseliswayo. Ngaloo ndlela, akukho kudideka ngokubhekisele kwingcaciso, ngokungathi iintombi bezisafanekisela olunye udidi.
7. Kusebudeni baliphi ithuba awathi uMyeni wabonakala elibazisile ukuza kulanda umtshakazi, yaye ngoba?
7 Ukumanyaniswa kwabaza kuba ngamalungu odidi lomtshakazi noMyeni wabo wasezulwini emtshatweni akuzange kwenzeke, njengoko kwakulindelwe, ekupheleni ‘kwamaxesha eentlanga’ ngowe-1914. (Luka 21:24) Ngokusengqiqweni, kwabonakala kuzo ngokungathi uMyeni wayekulibazisile ukuza kwakhe, nangona wathi wabakho kuBukumkani bakhe basezulwini ngowe-1914. Loo minyaka ibuhlungu yeMfazwe Yehlabathi I yangqineka injengobusuku obumnyama thsu kumava odidi lweentombi.
8. (a) Kwenzeka njani ukuba, ngokufuziselayo, iintombi zozele zize zilale? (b) UMyeni weza ngayiphi injongo etempileni, ibe kutheni oku kwaluxhalabisa nje udidi lomtshakazi?
8 Ngokufuziselayo, iintombi zaqalisa ukozela nokulala. Ukushunyayelwa ekuhleni kweendaba ezilungileyo zolawulo lukaKristu oluzayo lweminyaka eliwaka ukwenzela ukusikelelwa koluntu lonke kwaphantse kwayekwa. Ukususela kunyaka wokugqibela weMfazwe Yehlabathi I, kwabakho ithuba elibalulekileyo lokugwetywa kwezo ntombi zokomfuziselo. Oku kwakungenxa yokuba uKumkani olawulayo uYesu Kristu wayefikile kwitempile yokomoya. Ekufikeni kwakhe apho, waqalisa ukugweba ukuze acoce abo bamiselwe ukunikela inkonzo yasetempileni kuYehova uThixo. (Malaki 3:1-3) Eli xesha yayilelokuzibonakalisa kwakhe xa, njengoMyeni wasezulwini, wayefanele ukufumana ezulwini amalungu akholekileyo odidi lomtshakazi awayesele efile.
9. Lafika nini ixesha lokuba udidi lweentombi luvuswe ekungasebenzini, ibe ngoba?
9 Ngowe-1919, emva kokukhululwa kwamalungu asibhozo abalaseleyo eWatch Tower Bible and Tract Society eluvalelweni olungekho sikweni, kwakulixesha elifanelekileyo lokuba udidi lweentombi olusesemhlabeni luvuswe kubuthongo balo bokungasebenzi. Umsebenzi wokukhanyisela ihlabathi lonke wawusengaphambili. Lusebenzisa izibane zokukhanyisa, kwakulixesha lokuba luhlangabeze uMyeni, owayefikile kwitempile yokomoya. Oku kwakunjalo ukuze abantu abaphuma kuzo zonke iintlanga babe ngumsinga ukuya ‘endlwini kaYehova’ eye yathi ngokungathi kunjalo, yaphakamela ngaphezu kweencopho zeentaba.—Isaya 2:1-4.
Ukulungisa Izibane Zazo
10. Yayifuzisela ntoni ioli eyakhutshwa kwizitya zeentombi eziziingqondi?
10 Eziziingqondi kudidi lweentombi kwizitya zazo zazineoli yokukhanyisa xa iphelile ekhoyo. Azizange zilibazise ekuzaliseni kwakhona izibane zazo. Ioli elulwelo yokukhanyisa yafanekisela iLizwi likaYehova lokukhanyisa nomoya wakhe oyingcwele. Ngoko, yayifanekisela ntoni ioli eyakhutshwa kwizitya zezi ntombi ziziingqondi? Yafanekisela isixa esilondoloziweyo somoya kaYehova esibangela ukukhanya kwiLizwi lakhe elibhaliweyo ababenawo abafundi boMyeni abayintsalela ethanjisiweyo nabazelwe ngomoya xa kwaqalisa umsebenzi wasemva kwemfazwe wokukhanyisa zwenibanzi ‘ngobukumkani bamazulu.’
11. Zaziziintoni izitya zokomfuziselo ezaziqulethe ioli?
11 Izitya zafanekisela iintombi eziziingqondi zokomfuziselo njengabaphathi beoli yokomfuziselo neyiyeyokukhanyisa. Oku akuthethi ukuba udidi lweentombi lwathanjiswa kuphela ngelo xesha ngomoya kaYehova. Akunjalo, iintombi azizithambisi ngokwazo ngomoya wakhe. Nguye ozithambisayo!—Isaya 61:1, 2; Luka 4:16-21.
12. (a) Sisiphi isiprofeto sikaYoweli esasifanele ukuzaliseka kwiintombi eziziingqondi? (b) Lafika nini ixesha lokuba zikhanyise ngezibane zazo?
12 Ukuxhasa ukwabelwa kwazo umsebenzi omkhulu wokukhanyisela ihlabathi ‘ngobukumkani bamazulu,’ iintombi eziziingqondi zababalwa ngokuzaliseka kukaYoweli 2:28, 29 kuzo. Le yindlela umpostile uPetros azicaphula ngayo ezo ndinyana: “Kuya kuthi ngayo imihla yokugqibela, utsho uThixo, Ndimthulule umoya wam phezu kwayo yonke inyama, baprofete oonyana benu neentombi zenu, athi amadodana enu abone imibono, namadoda enu amakhulu aphuphe amaphupha.” (IZenzo 2:17) Ngoko ukususela kowe-1919 ukubhekisa phambili iintombi eziziingqondi zodidi lweentombi zokomfuziselo zaziza kuthabatha izinto zazo zokukhanyisa, izibane zazo zokomfuziselo—zona ngokwazo. Oku zakwenza ukuze kukhanyiselwe bonke abo babehleli kubumnyama bokomoya. Ngenxa yohlobo lobomi ababebuphila phantsi kwempembelelo yeLizwi nomoya kaThixo, baba ‘zizikhanyiselo ehlabathini.’ (Filipi 2:15) Ngaloo ndlela balandela emanyathelweni oMyeni njengoko wayelungiselela ukuthabathela kuye onke amalungu odidi lomtshakazi kuBukumkani basezulwini emva kokufa kwawo emhlabeni.—Mateyu 5:14-16.
Imiphumo Yobuyatha Bokomoya
13. Zasabela njani iintombi eziziingqondi kwisicelo seentombi eziziziyatha?
13 Ke, kuthekani ngeziziziyatha zolo didi lweentombi? UYesu uhlabela mgama athi: “Zathi ke eziziziyatha kweziziingqondi, Sipheni kwioli yenu leyo, ngokuba izibane zethu zicima. Zaphendula ke eziziingqondi, zathi, Hayi, hleze inganeli kuthi nakuni; yiyani kanye kwabathengisayo, nizithengele.”—Mateyu 25:8, 9.
14. Kutheni le nto iintombi ezazingazange zivume ukuphisa ngeoli yazo ziziingqondi kunokuba zibe zezizingcayo?
14 Ezo zazingazange zivume ukupha eziziziyatha zazingezizo ezizingcayo, kodwa zaziziingqondi. Zazinamathela ekuphumezeni injongo yazo yangaphambili entle yokukhanyisa kwiindawo ezimnyama ukwenzela uMyeni. Zazinganyanzelekanga ukuba zilalanise, ngokunciphisa isixa sazo somoya oyingcwele kaYehova ukuze zibonelele ezo zaziziziyatha ngokomoya. Eziziziyatha ngolo hlobo zazingazilungiselelanga ukulamkela ngokukhawuleza ilungelo lenkonzo ezazilivulelwe ngowe-1919.
15. (a) Xa lathi lafika ixesha loxolo, ngoobani phakathi kodidi lweentombi abaqalisa ukubonakalisa utyekelo lobuyatha bokomoya? (b) Kutheni le nto iintombi eziziingqondi zingazange zikwazi ukuzinceda iintombi eziziziyatha ngokomoya?
15 Njengoko ixesha loxolo lathi lavuleka, bambi babo babesithi bazizinxulumani ezizahluleleyo nezibhaptiziweyo baqalisa ukubonakalisa ubuyatha bokomoya. Emva kokufa kukamongameli wokuqala weWatch Tower Society, uCharles Taze Russell, abazange bavisisane ngokupheleleyo nendlela izinto ezaziqhutywa ngayo ngesixhobo esibonakalayo sikaYehova uThixo phantsi komongameli waso omtsha, uJ. F. Rutherford. Iintliziyo zabo zazingavisisani ngokwenene nendlela izinto ezaziqhutywa ngayo. Babonakalisa ukungabi naluxabiso ngendlela uYehova awayeqhubana ngayo nabantu bakhe. Ngaloo ndlela, abo babenjengeentombi eziziingqondi babengenakuphembelela umoya wokwenene wentsebenziswano esuk’ entliziyweni kwezi ziziziyatha ezazizikhwebula ngokungakumbi nangakumbi.
16. Ubuyatha bokomoya babonakaliswa njani ziintombi eziziziyatha?
16 Ngaloo ndlela ubuyatha bokomoya bathi babonakaliswa. Njani? Ngokungabi nayo ioli yokomfuziselo ngexesha elibalulekileyo laxa kwakukho imfuneko enkulu yokukhanya kokomoya njengoko iziganeko ezitsha zazihambela phambili, nto leyo eyayibonisa ukuba uMyeni wayekho. Ngoko eli yayilixesha lokuphuma kuhlangatyezwe yena, ngokufuziselayo, mntu ngamnye enesakhe isibane sikhanyise ngokuqaqambileyo. Kodwa kunoko, abo banjengeentombi eziziziyatha, abanezibane ezazicima, bahlukana neziziingqondi.
17. Abo bafanekiselwa ziintombi eziziziyatha bafumana yiphi ilahleko engenakubuyiselwa, njengoko kuboniswe kuMateyu 25:10?
17 Enjani ilahleko engenakubuyiselwa ethi ibekho xa ubani ozibanga ephakathi kodidi lweentombi ephoswa lilungelo elingenakuphindwa nethuba lokwamkela uMyeni wokomoya, uYesu Kristu! Ilahleko enjalo ifunyanwa ziintombi eziziziyatha phakathi kwezanamhla, njengoko kuboniswa ngamazwi abhekele phaya omzekeliso kaYesu: “Kuthe ke, zisaya kuthenga, wafika umyeni; zaza ezo bezisezilungile zangena naye emsithweni, lwavalwa ke ucango.”—Mateyu 25:10.
18. (a) Liliphi ilungelo iintombi eziziziyatha zale nkulungwane ezizibandeza lona? (b) Kutheni le nto eziziziyatha zishiywe gqitha lixesha ukuba zingenelele kungcelele lwabantu bomtshato nasekungeneni kwisidlo?
18 Anjani wona amava ukuba yintlekele afunyanwa ziintombi zanamhla eziziziyatha! Kweli thuba lizaliswe bubumnyama obukhulu kuyo yonke imbali yabantu, azinasabelo kumsebenzi wokukhanyisela abo bakubumnyama bokomoya nakwithunzi lokufa ‘kwimfazwe yaloo mini inkulu kaThixo uSomandla’! (ISityhilelo 16:14) Njengoko bezingenayo ioli kwizibane zazo zokomfuziselo zokukhanyisa kumendo wazo, zahamba zaza zafathula kubumnyama basezinzulwini zobusuku. Ngenxa yesi sizathu zishiywe lixesha lokuba zilandele emanyathelweni oMyeni kungcelele oluvuyisayo olungena emnyango nolusa kwisidlo somtshato esikhanyiselwe ngokuqaqambileyo. Azikwazi ukufaniswa njengabalandeli bakhe abaza kutshatiswa kunye naye kuBukumkani basezulwini. Azifunyanwa ‘zilungile’ ngexesha elityunjiweyo. Onjani umzekelo ukulumkisa eziwunikelayo!
19. Ngawaphi amava esiza kuwafumana ngokuqhubeka nalo mbandela de kube sekupheleni kwawo?
19 Esi sibakala sibuhlungu sichazwa kakuhle kwinqanaba lokugqibela lomzekeliso owanikelwa nguYesu Kristu, uMyeni, ingakumbi kuchazelwa thina baphila ‘ekuphelisweni kwephakade eli.’ Ngoko masihlabele mgama nalo mbandela! Ngokwenza oku silindelwe kukukhanya okubangela uvuyo, njengoko siza kubona kwisahluko esilandelayo.
[Umfanekiso okwiphepha 45]
Abo banjengeentombi eziziziyatha abayi kungena kwisidlo somtshato