Isahluko 21

Ifumaneka Njani Imali Yokuxhasa Konke Oku?

LICACILE elokuba umsebenzi owenziwa ngamaNgqina kaYehova ufuna imali. Ukwakha iiHolo zoBukumkani, iiHolo zeNdibano, iiofisi zamasebe, imizi-mveliso, amakhaya aseBheteli kufuna imali, ibe kufuneka engakumbi ukuzigcina zisemgangathweni. Kwakhona kuziindleko ukupapasha nokusasaza uncwadi lokufundisisa iBhayibhile. Ifumeka njani imali yokuxhasa konke oku?

Abantu abawuchasileyo umsebenzi wamaNgqina kaYehova baye bapapasha iingcamango ezingachananga ngokuphathelele oku. Kodwa ukuhlolisisa ubungqina boko kuxhasa impendulo amaNgqina ayinikelayo. Ithini leyo? Inkoliso yomsebenzi wenziwa ngabasebenzi bokuzithandela, abangalindelanga nabanganqweneli mbuyiselo yamali ngenkonzo yabo, yaye iindleko zentlangano kuhlangatyezwana nazo ngeminikelo yokuzithandela.

“Kungenwa Ngesisa. Akukho Nkongozelo”

Kwasekuqaleni kwinkupho yesibini yeMboniselo, (yesiNgesi) ngoAgasti 1879, uMzalwan’ uRussell wathi: “Sikholelwa kwelokuba, i-‘Zion’s Watch Tower’ ixhaswa nguYEHOVA, yaye ekubeni oku kunjalo ayisayi kungqiba okanye icele abantu bayixhase. Xa Lowo uthi: ‘Yonke igolide nesilivere yeentaba yeyam,’ esilela ukulungiselela imali efunekayo, siya kuqonda ukuba lifikile ixesha lokuyiyeka le mpapasho.” Ngokuvisisana noko, kuncwadi lwamaNgqina kaYehova kwakungangqitywa mali.

Oko kuqhubekayo ngoncwadi lwawo kukwanjalo nangeentlanganiso zawo. Akuzanywa ukuchukunyiswa iimvakalelo kucelwa imali emabandleni awo nakwiindibano zawo. Akukho zitya zenkongozelo zihanjiswayo; akukhutshwa zimvulophu zakufaka imali; amalungu ebandla awathunyelelwa zileta zicela imali. Amabandla akaze asebenzise iibingo neeraffle ukuze anyuse imali. Kwangowe-1894, xa iWatch Tower Society yayithumela izithethi ezihambahambayo, yapapasha esi saziso ukuze kwaziswe wonk’ ubani: “Makuqondakale zisuka nje ukuba lo Mbutho awuyigunyazisi yaye ungayivumeli inkongozelo okanye ezinye iindlela zokucela imali.”

Ngaloo ndlela, kwasekuqaleni kwimbali yawo yanamhlanje, amaphecana nezinye izimemo ezishicilelweyo ezimemela uluntu kwiintlanganiso zamaNgqina kaYehova bezisoloko zibhalwe ukuba “Kungenwa Ngesisa. Akukho Nkongozelo.”

Kususela ekuqaleni kowe-1914, aBafundi beBhayibhile babeqesha iiholo zemidlalo yeqonga nezinye iiholo baze bameme abantu ukuba baze ukuze babone i-“Photo-Drama of Creation.” Yayiboniswa ibe ngamacandelo amane, ithabatha iiyure ezisibhozo xa iyonke, inemifanekiso yeeslides nemifanekiso eshukumayo ehambelana nesandi. Ebudeni bonyaka wokuqala kuphela, zizigidi zabantu ezayibukelayo kuMntla Merika, eYurophu, eOstreliya, naseNew Zealand. Nangona abanini bezinye iiholo zemidlalo yeqonga babehlawulisa ngezihlalo ezithile ezikhethekileyo, aBafundi beBhayibhile abazange babize imali yokungena. Yaye kwakungaqokelelwa nkongozelo.

Kamva, ngaphezu kweminyaka engama-30, iWatch Tower Society yayineziko losasazo likanomathotholo iWBBR kwisiXeko saseNew York. AmaNgqina kaYehova ayesebenzisa namanye amaziko osasazo amaninzi ukuze asasaze iinkqubo zokufundisa iBhayibhile. Kodwa awazange azisebenzise ezo nkqubo ngenjongo yokucela imali.

Ngoko, ifumaneka njani iminikelo yokuhlawulela imisebenzi yawo?

Ixhaswa Ngeminikelo Yokuzithandela

IBhayibhile imisela umzekelo. Ngaphantsi koMthetho kaMoses, kwakukho iminikelo ethile eyayisenziwa ngokuzithandela. Eminye abantu babemele bayinikele. Ukunikela ngesishumi, ngomnye waleyo eyayimele inikelwe. (Eks. 25:2; 30:11-16; Num. 15:17-21; 18:25-32) Kodwa iBhayibhile ikwabonisa ukuba uKristu wawuzalisekisa uMthetho, waza uThixo wawuphelisa; ngoko amaKristu awabophelelekanga kwimimiselo yawo. Awanikeli ngezishumi, yaye awanambopheleleko yakunikela nawuphi na omnye umnikelo oqingqiweyo okanye omiselwe ixesha elithile.—Mat. 5:17; Roma 7:6; Kol. 2:13, 14.

Kunoko, akhuthazwa ukuhlakulela umoya wesisa nowokunikela ngokuzithandela exelisa umzekelo obalaseleyo owamiselwa nguYehova nanguNyana wakhe, uYesu Kristu. (2 Kor. 8:7, 9; 9:8-15; 1 Yoh. 3:16-18) Ngaloo ndlela, ethetha ngokunikela, umpostile uPawulos wabhalela ibandla lamaKristu laseKorinte wathi: “Elowo makanike njengoko agqibe ngako entliziyweni; makungabi kokuphuma kabuhlungu, nangokunyanzelwa; kuba uThixo uthanda umphi ochwayithileyo.” Xa exelelwe ngentswelo, oku kuwavulela ithuba ‘lokucikida enoba anothando lokwenyaniso kusini na,’ njengokuba uPawulos wacacisayo. Kwakhona wathi: “Kuba intumekelelo, ukuba selikho, yamkeleka kakuhle ngokoko asukuba enako umntu, kungabi ngokoko angenako.”—2 Kor. 8:8, 12; 9:7.

Xa sijonga konke oku, amagqabaza kaTertullian ngeentlanganiso ezaziqhutywa ngabantu ababezabalazela ukuqhelisela ubuKristu ngomhla wakhe (malunga nowe-155–220 C.E.) abangel’ umdla. Wabhala: “Kwanokuba ukho umkhumbi wokulondoloza imali, awuzaliswanga yimali ehlawulwa xa ubani engena, ngokungathi unqulo lungumcimbi wesivumelwano esibhaliweyo. Ndoda nganye kube kanye ngenyanga izisa umnikelo ongephi—okanye ngelo xesha yona inqwena ngalo, yaye kuphela ukuba inqwenela ukwenjenjalo, yaye inako; kuba akukho mntu unyanzelwayo; ngumnikelo wokuzithandela.” (Apology, XXXIX, 5) Noko ke, ebudeni beenkulungwane ezilandelayo emva koko, iicawa zeNgqobhoko ziye zabandakanyeka kuwo onke amaphulo okunyusa imali onokuwacinga ukuze zixhase imisebenzi yazo.

UCharles Taze Russell akazange afune ukuxelisa iicawa. Wabhala: “Ngokwendlela esibona ngayo imali eyenziwe ngezi ndlela zahlukahlukeneyo zokungqiba egameni leNkosi yethu kukuyimela kakubi, akwamkelekanga kuyo, ibe akubaziseli iintsikelelo abo banikelayo kwakunye nomsebenzi ofezwayo.”

Kunokuzama ukuzicengezela kwabo babenobutyebi, uMzalwan’ uRussell watsho ngokucacileyo, ngokuvisisana neZibhalo, ukuba inkoliso yabantu beNkosi babeya kuba ngamahlwempu kwizinto zeli hlabathi kodwa babe zizityebi elukholweni. (Mat. 19:23, 24; 1 Kor. 1:26-29; Yak. 2:5) Kunokuba agxininise kwimfuneko yemali ukuze kusasazwe inyaniso yeBhayibhile, walathisela ingqalelo kwimbaluleka yokuhlakulela umoya wothando, nomnqweno wokupha, nomnqweno wokunceda abanye, ingakumbi ngokwabelana nabo ngenyaniso. Kwabo babenako ukwenza imali yaye besithi ukuba banokuzinikela ngakumbi kwimicimbi yezoshishino babenokuba nemali engakumbi yokunikela, wathi kwakuya kulunga ngakumbi ukuyisikela umda loo misebenzi baze bazinikele bona nexesha labo ekusasazeni inyaniso. Leyo iseyindlela iQumrhu Elilawulayo lamaNgqina kaYehova eliyijonga ngayo imicimbi.a

Ngokoqobo, abantu banikela kangakanani? Oko bakwenzayo kusisigqibo sobuqu. Noko ke, kumbandela wokunikela, kufanele kuphawulwe ukuba amaNgqina kaYehova akacingi ngezinto eziphathekayo kuphela. Kwiindibano zawo zesithili zowe-1985-86, axubusha ngombandela othi “Ukubeka UYehova Ngezinto Zethu Ezixabisekileyo.” (IMize. 3:9) Kwabethelelwa ukuba ezi zinto zixabisekileyo ziquka kungekuphela nje izinto eziphathekayo kodwa kwanamandla, ingqondo, nezinto zokomoya.

Emva phayaa ngowe-1904, uMzalwan’ uRussell wabonisa ukuba umntu ozinikezele (okanye, ozahlulele, njengokuba sisitsho ngoku) ngokupheleleyo kuThixo “sele enikele ngako konke anako eNkosini.” Ngaloo ndlela, ngoku ufanele “azigqale njengomiselwe yiNkosi njengegosa elifanele linikele ngexesha lalo, libe nempembelelo entle, linikele ngemali yalo, njl. njl., yaye ngamnye umele afune ukusebenzisa ezi zipho kakuhle kangangoko anako, ekuzukiseni iNkosi.” Wongezelela esithi, ukuba ubani ukhokelwa bubulumko baphezulu, “ngokuvisisana nomlinganiselo uthando nenzondelelo yakhe ngeNkosi ezikhula ngawo ngolwazi lweNyaniso nokufikelela umoya wayo, uya kufumanisa ukuba unikela ngexesha elingakumbi, unempembelelo engakumbi, unikela ngakumbi ngobuncwane anabo, kwinkonzo yeNyaniso.”—Studies in the Scriptures, “The New Creation,” iphe. 344-5.

Ebudeni baloo minyaka yokuqala, iWatch Tower Society yayinengxowa-mali ebizwa ngokuthi Tower Tract Fund. Yayiyeyantoni loo ngxowa-mali? Iinkcukacha ezilandelayo ezibangel’ umdla zazibhalwa ngasemva kuncwadi maxa wambi olwalusetyenziwa nguMzalwan’ uRussell: “Le ngxowa-mali iquka iminikelo yokuzithandela yabo baye bondliwa baza bomelezwa ‘yinyama efike ngexesha elifanelekileyo’ ezi mpapasho zingasentla [ezilungiselelwa yiWatch Tower Society], njengezixhobo zikaThixo, ezikubeka phambi kweengcwele ezizinikezeleyo, emhlabeni wonke.

“Le ngxowa-mali isetyenziselwa ngokufuthi ukuthumela, simahla, amawaka eeZION’S WATCH TOWER neeOLD THEOLOGY TRACTS afaneleke ngokwenene kubafundi abatsha. Ikwanceda nasekusasazweni kwemibhalo eshicilelweyo yongcelele oluthi DAWN, ngokunceda abo balusasazayo—oovulindlela nabanye. Ikwalungiselela ‘ingxowa-mali yamahlwempu’ enceda ekubeni abantwana beNkosi, ngenxa yobudala, okanye ukugula, okanye ezinye izizathu, abangakwaziyo ukurhumela IMBONISELO banikwe ngesisa, ukuba nje ekuqaleni konyaka ngamnye, bathumela ileta okanye iqweqwe, elichaza umnqweno wabo nobulwelwe babo.

“Akuze kucelwe namnye ukuba anikele kule ngxowa-mali: yonke iminikelo imele ibe yeyokuzithandela. Abafundi bethu sibakhumbuza amazwi omPostile (1 Kor. 16:1, 2) yaye sibakhuthaza ngokuthi abo banako yaye banikelayo ukuze kusasazwe inyaniso ngokuqinisekileyo baya kufumana iingenelo zokomoya.”

Umsebenzi owenziwa emhlabeni wonke ngamaNgqina kaYehova wokuvakalisa iindaba ezilungileyo zoBukumkani bukaThixo usaqhubeka uxhaswa ngeminikelo yokuzithandela. Ukongezelela kumaNgqina, abantu abaninzi abanomdla nabanoxabiso bakugqala kulilungelo ukuxhasa lo msebenzi wamaKristu ngeminikelo yabo yokuzithandela.

Ukuxhasa Ngemali Iindawo Zeentlanganiso Zasekuhlaleni

Bandla ngalinye lamaNgqina kaYehova lineebhokisi zeminikelo ezifanelekileyo abantu abanokufaka kuzo nawuphi na umnikelo abanqwenela ukuwufaka—xa benqwenela ukwenjenjalo yaye ukuba banako. Oku kwenziwa ngasese ukuze ngokuqhelekileyo abanye bangakwazi oko kusenokwenziwa ngomnye umntu. Nguloo mntu noThixo abaziyo.

Akukho mivuzo imele ihlawulwe, kodwa kufuneka imali ukuze kugcinwe indawo yokuhlanganisana isemgangathweni. Ukuze kufezwe oko, amalungu ebandla amele aziswe ngako oku. Noko ke, ngaphezu kweminyaka engama-70 eyadlulayo, IMboniselo yakwenza kwacaca ukuba ngokuphathelele iminikelo, akumele kucengwe mntu—kumele kuchazwe nje izibakala ngokucacileyo nangokunyaniseka. Ngokuvisisana nale mbono, kwiintlanganiso zebandla akusoloko kuxutyushwa ngemicimbi yemali.

Noko ke, maxa wambi kubakho iintswelo ezikhethekileyo. Kusenokwenzeka ukuba kwenziwa amalungiselelo okuba kulungiswe okanye kwandiswe iHolo yoBukumkani okanye mhlawumbi kwakhiwe entsha. Ukuze kuqinisekwe ngemali enokufumaneka, abadala basenokucela abo basebandleni ukuba babhale kumaphetshana oko umntu ngamnye acinga ukuba unokukwazi ukukunikela kuloo msebenzi okanye, mhlawumbi, anokukunikela iminyaka eliqela. Ukongezelela, abadala basenokucela umntu ngamnye okanye iintsapho ukuba zibhale emaphepheni oko zivakalelwa kukuba zinokukunikela ngeveki okanye ngenyanga, ngentsikelelo kaYehova. Akubhalwa magama. La maphetshana awathembisi nto, kodwa anikela isizinzi sokwenza amalungiselelo ngobulumko.—Luka 14:28-30.

ETarma, eLiberia, ibandla layifumana ngendlela eyahlukileyo noko imali eyayifuneka. Abathile ebandleni balimela elinye iNgqina irayisi entsimini yalo ngoxa lona unyaka wonke laligawula imithi lize lisarhe amaplanga, nto ezo ezathengiswa ukuze kufunyanwe imali yesakhiwo sabo. EParamaribo, eSuriname, nangona kwafuneka kuthengwe impahla yokwakha, akuzange kufuneke ukuba ibandla lalapho libe nemali yokuthenga umhlaba, ngenxa yokuba elinye iNgqina lanikela ngomhlaba walo ukuze kwakhiwe iHolo yoBukumkani laza lacela nje ukuba ikhaya lalo lifuduselwe ngasemva kweso siza. Amaxabiso ezindlu aphakame ngokwenene eTokyo, eJapan, nto leyo eyabangela kwaba nzima ukuba amabandla alapho afumane umhlaba wokwakha iiHolo zoBukumkani. Ukuze kuconjululwe le ngxaki, iintsapho eziliqela zanikela ngemihlaba ekwakwakhiwe kuyo amakhaya azo ukuze isetyenziswe. Zacela nje ukuba emva kokuba amakhaya azo ethatyathelw’ indawo yiHolo yoBukumkani, zilungiselelwe amagumbi phezulu.

Njengoko amabandla ekhula yaye esahlulwa, lawo akummandla omnye ngokufuthi ayancedisana ukuze alungiselele iiHolo zoBukumkani ezifanelekileyo. Phezu kwawo nje loo moya wesisa, kwakufuneka nokunye. Amaxabiso emihlaba neendleko zokwakha axhoma, yaye amabandla ngamanye ngokufuthi ayekufumanisa kunzima ukuhlangabezana nazo. Yintoni eyayinokwenziwa?

KwiiNdibano zeSithili “zoManyano LoBukumkani” ngowe-1983, iQumrhu Elilawulayo lachaza ilungiselelo elalifuna kusetyenziswe umgaqo owandlalwe kweyesi-2 kwabaseKorinte 8:14, 15, okhuthaza ukuba abo banezinto ngokuphuphumayo banelise ukusilela kwabanye ukuze “kubekho ukulingana.” Ngaloo ndlela abo bangenazinto abayi kuswela kangangokuba bathinteleke kwimigudu yabo yokukhonza uYehova.

Bandla ngalinye lakhuthazwa ukuba lilungiselele ibhokisi ephawulwe ngokuthi “Iminikelo yeNgxowa-Mali yoMbutho yeeHolo zoBukumkani.” Konke okwakufakwa kuloo bhokisi kwakuya kusetyenziselwa loo njongo kuphela. Ngaloo ndlela imali enikelwe kulo lonke ilizwe yayiya kusetyenziselwa iintswelo zamabandla awayeyifuna ngokwenene iHolo yoBukumkani kodwa engenakukwazi ukufikelela oko kwakufunwa ziibhanki zasekuhlaleni. Ngemva kokuhlolisisa ngenyameko ukuze kuqondwe apho ifuneka ngokungxamisekileyo khona, uMbutho waqalisa ukulungiselela ukuba amabandla ekwakufuneka akhe okanye ngandlel’ ithile afumane iiHolo zoBukumkani ezintsha afumane imali. Njengokuba kwakufumaneka iminikelo engakumbi yaye (kumazwe ekwakunokwenzeka kuwo) imali-mboleko ibuyiswa, kwakunokuncedwa amabandla angakumbi.

Eli lungiselelo laqalisa ukusebenza eUnited States naseKhanada, yaye ukususela ngoko liye lanwenwela nakwamanye amazwe angama-30 eYurophu, eAfrika, kuMbindi noMzantsi Merika, nakwiMpuma Ekude. Ngowe-1992, kwasibhozo kuphela ala mazwe, le mali ibisele isetyenziselwe ukunceda ekwakhiweni kweeHolo zoBukumkani ezingama-2 737, ezi zisetyenziswa ngamabandla angama-3 840.

Nakumazwe elalingasebenzi kuwo eli lungiselelo, kodwa ekwakukho imfuneko engxamisekileyo yeeHolo zoBukumkani eyayingenakuxhaswa ngemali ekuhlaleni, iQumrhu Elilawulayo lazabalazela ukwenza amanye amalungiselelo okuqinisekisa ukuba kwakunikelwa uncedo. Ngaloo ndlela kuye kwakho ukulingana, ukuze abo bangenanto bangabi ngabaswele kakhulu.

Ukunyamekela Ukwandiswa Kwekomkhulu Lehlabathi

Ukusebenza kwekomkhulu lehlabathi nako kuye kwafuna imali. Emva kweMfazwe Yehlabathi I, xa iWatch Tower Bible and Tract Society yakufumanisa kuyingenelo ukuzishicelela ize izidibanise ngokwayo iincwadi zayo, kwenziwa ilungiselelo lokuba oomatshini ababefuneka bathengwe egameni labantu abazimeleyo—nabo ababengabakhonzi bakaYehova. Kunokuhlawula ingeniso kwinkampani yezorhwebo evelisa ezi ncwadi, uMbutho wasebenzisa le mali nyanga nganye ekunciphiseni ityala laba matshini. Njengokuba zazisiya zifumaneka, iingenelo zoku, iindleko zoncwadi oluninzi oluhanjiswa ebantwini zancitshiswa ngesiqingatha. Eyona nto yayisenziwa kukuhambisela phambili ukushunyayelwa kweendaba ezilungileyo, kungekhona ukutyebisa iWatch Tower Society.

Kwiminyaka engephi, kwacaca ukuba kwakufuneka izakhiwo ezikhudlwana kwikomkhulu lehlabathi ukuze kunyanyekelwe umsebenzi wokushumayela ngoBukumkani emhlabeni wonke. Amathuba ngamathuba, njengokuba intlangano iye yanda yaye umsebenzi wokushumayela uye wanda, kuye kwafuneka ezi zakhiwo zandiswe. Kunokuba kuyiwe ezibhankini ukuze kufumaneke imali efunekayo yokwandisa nokuxhobisa iiofisi nemizi-mveliso yekomkhulu kwanezakhiwo eziyimfuneko eNew York nakufutshane nakhona, uMbutho uye wachazela abazalwana ngale ntswelo. Oku bekungenziwa rhoqo, kodwa kwenziwa izihlandlo ezili-12 kuphela kwiminyaka engama-65.

Bekungacelwa mali. Nabaphi na abebefuna ukwenza iminikelo kwakusithiwa bangenjenjalo. Abo bebekhetha ukubolekisa ngemali bebeqinisekiswa ukuba xa kunokuvela ingxaki engxamisekileyo, imali-mboleko yabo iya kubuyiswa sisakufika isicelo sabo. Ngaloo ndlela uMbutho, ekusingatheni imicimbi, ubuzabalazela ukuphepha ukubathwalisa ubunzima abantu namabandla athi ngobubele anikele ngemali. Inkxaso enikelwa ngamaNgqina kaYehova ngeminikelo yawo isoloko iwunceda uMbutho ukwazi ukubuyisa zonke iimali-mboleko. Ngalo lonke ixesha kuvakaliswa umbulelo ngeminikelo enjalo ethunyelwa kuMbutho. Kangangoko kunokwenzeka, le minikelo ibulelwa ngeeleta okanye ngamanye amazwi okuvakalisa uxabiso.

Umsebenzi wentlangano awuxhaswa yiminikelo yeqela lezityebi ezinikelayo. Inkoliso yeminikelo ivela kubantu abangenazinto kangako—inkoliso yabo, enezinto ezimbalwa gqitha zeli hlabathi. Kuquka abantwana abaselula abafuna ukuba nesabelo ngale ndlela ekuxhaseni umsebenzi woBukumkani. Iintliziyo zabo bonke abo banikelayo zishukunyiswa luxabiso olunzulu ngokulunga kukaYehova nomnqweno wokunceda abanye bafunde ngelungiselelo lakhe elizukileyo.—Thelekisa uMarko 12:42-44.

Ukuhlawulela Ukwandiswa Kwezakhiwo Zamasebe

Njengokuba umsebenzi wokushumayela ngoBukumkani uye wanda kakhulu kwimimandla eyahlukahlukeneyo yomhlaba, kuye kwaba yimfuneko ukwandisa izakhiwo zamasebe zentlangano. Oku kwenziwa ngaphantsi kolwalathiso lweQumrhu Elilawulayo.

Ngaloo ndlela, emva kokuhlola uncomelo olwaluvela kwisebe laseJamani, kwanikelwa ulwalathiso ngowe-1978 lokuba kufunwe isiza esifanelekileyo kuze kwakhiwe isakhiwo esitsha ngokupheleleyo. Ngaba amaNgqina aseJamani ayenokukwazi ukuzinyamekela iindleko ezazibandakanyekile? Eli lungelo lashiyelwa kuwo. Ekugqityweni kweso sakhiwo ngowe-1984, eSelters, ngasekupheleni kweeNtaba zeTaunus kwicala elingasentshona, iofisi yesebe yanikela le ngxelo: “Amashumi amawaka amaNgqina kaYehova—azizityebi nangamahlwempu, aselula namadala—anikele ngezigidi zeerandi ukuze ancede ekuhlawuleni iindleko zesi sakhiwo sitsha. Ngenxa yesisa sawo, esi sakhiwo sonke sigqitywe kungakhange kube yimfuneko ukuba kubolekwe imali kwimibutho yehlabathi okanye kubekho amatyala.” Ukongezelela, iNgqina elinye kwasixhenxe kwiFederal Republic of Germany liye lanesabelo kumsebenzi wokwakha eSelters/Taunus.

Kwamanye amazwe, imeko yezoqoqosho yasekuhlaleni okanye imeko yezimali yamaNgqina kaYehova ibangele kwanzima kakhulu, kwada kwayinto engenakwenzeka, ukuba akhe iiofisi zamasebe ezifunekayo ukuze kuvelelwe umsebenzi okanye imizi-mveliso yokupapasha uncwadi lweBhayibhile ngeelwimi zasekuhlaleni. AmaNgqina akwelo lizwe aye anikwa ithuba lokwenza oko anako. (2 Kor. 8:11, 12) Kodwa ukunqongophala kwemali kwilizwe elithile akuvunyelwa kusithintele isigidimi soBukumkani ukuba loo mali ifunekayo inokufumaneka kwenye indawo.

Ngaloo ndlela, ngoxa amaNgqina asekuhlaleni esenza oko anako, kwinkoliso yeendawo ezininzi zomhlaba inxalenye enkulu yemali efunekayo yokwakha izakhiwo zamasebe ifunyanwa ngeminikelo eyenziwa ngamaNgqina kaYehova akwamanye amazwe. Oko kwaba njalo xa kwakusakhiwa izakhiwo ezikhulu ezagqitywa ngowe-1987 eMzantsi Afrika, eNigeria ngowe-1990, nakwiiPhilippines ngowe-1991. Bekunjalo naseZambia, ngowe-1992 apho bekusakhiwa izakhiwo ezinokusetyenziselwa ukushicilela. Kwakunjalo nangezinye izakhiwo ezincinane noko, njengezo ziye zagqitywa eIndiya ngowe-1985; eChile ngowe-1986; eCosta Rica, e-Ecuador, eGuyana, eHaiti, nasePapua New Guinea ngowe-1987; eGhana ngowe-1988; naseHonduras ngowe-1989.

Noko ke, kwamanye amazwe abazalwana baye bamangaliswa koko babenokukufeza ekuhlaleni ngentsikelelo kaYehova kwimigudu yabo emanyeneyo. Ngokomzekelo, ekuqaleni kweminyaka yee-1980 isebe laseSpeyin lalilungiselela ukuzandisa kakhulu izakhiwo zalo. Eli sebe lacela ukuba iQumrhu Elilawulayo lililungiselele imali efunekayo. Kodwa ngenxa yokuba kwakusetyenziswa imali eninzi kwezinye izinto ngeloo xesha, uncedo olunjalo aluzange lufumaneke. Ukuba ayenokunikwa ithuba, ngaba amaNgqina aseSpeyin, afumana imivuzo ephantsi, ayenokulungiselela imali eyaneleyo yaloo msebenzi mkhulu?

Bachazelwa ngale meko. Ngovuyo bazisa izinto zabo ezenziwe ngamatye anqabileyo, imisesane, nezacholo ukuze zithengiswe kuze kufunyanwe imali. Xa elinye iNgqina elisele likhulile labuzwa ukuba lalifuna ukunikela ngokwenene na ngesacholo esikhulu segolide elalinikele ngaso, laphendula: “Mzalwana, siza kwenza umsebenzi omhle gqitha xa sihlawulela iBheteli entsha kunokuba besiya kwenza esihlahleni sam!” Omnye udade osel’ ekhulile wakhupha imali engamaphepha endala awayeyifihle ngaphantsi komgangatho wekhaya lakhe ukutyhubela iminyaka. Izibini ezitshatileyo zanikela ngemali ezaziyigcinele ukhenketho. Abantwana bathumela imali ababeyilondolozile. Omnye oselula owayeceba ukuthenga isiginkci wanikela ngaloo mali ekwakhiweni kwesebe. NjengamaSirayeli ngexesha lokwakhiwa komnquba entlango, amaNgqina aseSpeyin angqineka engabo banikela ngesisa nabaneentliziyo ezivumayo xa ayenikela konke okwakufuneka ngokwezinto eziphathekayo. (Eks. 35:4-9, 21, 22) Aza ke azinikela—ixesha elizeleyo, ebudeni bekhefu, ngeempela-veki—ukuze eze kusebenza ngokwawo. Esuka kulo lonke elaseSpeyin eza—amawaka awo. Amanye amaNgqina aseJamani, eSweden, eBritani, eGrisi, naseUnited States, xa sikhankanya ambalwa, ancedisa ukuze kugqitywe oko ekuqaleni kwakubonakala kungumsebenzi ongenakwenzeka.

Ngaba Kukho Ngeniso Efumanekayo Ngoncwadi?

Ngowe-1992, uncwadi lweBhayibhile belupapashwa kwikomkhulu lehlabathi nakumasebe angama-32 emhlabeni wonke. Izixa zalo ezikhulu bezilungiselelwa ukuba zisasazwe ngamaNgqina kaYehova. Kodwa konke oku bekungenzelwa ukuze kufunyanwe ingeniso. Izigqibo ezingeelwimi uncwadi oluya kushicilelwa ngazo namazwe oluya kuthunyelwa kuwo bezingenziwa kuba kujongwe inzuzo kodwa kuphela ngenjongo yokufeza umsebenzi uYesu Kristu awawabela abalandeli bakhe.

KwangoJulayi 1879, xa kwapapashwa inkupho yokuqala yeMboniselo, (yesiNgesi) yayinesaziso esithi abo bahlwempuzeke kakhulu ukuba bangakhupha umrhumo wayo (ngoko owawungama-50¢, U.S. kuphela, ngonyaka) babeya kuyifumana ngesisa ukuba babenokubhala bacele. Injongo ephambili yayikukunceda abantu bafunde ngenjongo kaYehova ezukileyo.

Ukuze kufezwe oko, ukususela ngowe-1879 kusasazwe uncwadi lweBhayibhile oluninzi kuluntu ngokubanzi ngesisa. Ngowe-1881 nasemva koko, kwasasazwa malunga nesi-1 200 000 semibhalo yempapasho ethi Food for Thinking Christians simahla. Inkoliso yayo yayiziincwadi ezinamaphepha ali-162; ezinye, zinjengamaphephandaba. Ebudeni beminyaka eyalandelayo kwapapashwa amaphecana amaninzi angalinganiyo ngobukhulu. Inkoliso yawo (amakhulu ezigidi) isasazwa ngesisa. Inani lamaphecana nezinye iimpapasho ezazisasazwa laqhubeka lisanda. Ngowe-1915 kuphela, ingxelo yabonisa ukuba ngamaphecana azizi-50 000 000 ngeelwimi ezingama-30 awayekhutshiwe ukuze asasazwe ngesisa emhlabeni wonke. Yayivela phi imali yako konke oku? Ubukhulu becala yayivela kwiminikelo yokuzithandela eyenziwa kwiTract Fund yoMbutho.

Kwakukwakho noncwadi olwalufunyanwa ngomnikelo ebudeni bamashumi okuqala embali yoMbutho, kodwa umnikelo ocetyiswayo wawugcinwa uphantsi kangangoko kunokwenzeka. Olu ncwadi lwaluquka iincwadi ezinoqweqwe olulukhuni nezinamaphepha angama-350 ukuya kwangama-744. Xa iicolporteurs (oovulindlela njengokuba abashumayeli bexesha elizeleyo babesaziwa njalo ngoko) zoMbutho zazinikela ngezi kubantu, zazichaza umnikelo ocetyiswayo. Noko ke, injongo yabo yayingekokwenza imali kodwa yayikukudlulisela iinyaniso zeBhayibhile ezibalulekileyo ebantwini. Babefuna abantu bafunde uncwadi baze bangenelwe kulo.

Babekulungele gqitha ukunika umntu uncwadi (bawuhlawule ngokwabo umnikelo) ukuba umninimzi wayehlwempuzekile. Kodwa kwaphawuleka ukuba abantu abaninzi batyekele ngakumbi ekuyifundeni impapasho ukuba bayihlawulele okuthile, yaye, kakade ke, oko bakunikeleyo ngayo kunokusetyenziselwa ukushicilela uncwadi olungakumbi. Sekunjalo, ukugxininisa isibakala sokuba aBafundi beBhayibhile babengafuni nzuzo yamali, uxwebhu loMbutho olunemiyalelo yenkonzo, iBulletin, kaOktobha 1, 1920, lathi: “Emva kweentsuku ezilishumi unikele incwadana [enamaphepha ali-128], buyela kwakhona kwabo bantu uze uqinisekise ukuba bayifundile kusini na. Ukuba abayifundanga, bacele ukuba bayibuyise incwadi uze ubabuyisele imali yabo. Baxelele ukuba akungomthengisi weencwadi, kodwa unomdla wokunikela esi sigidimi sentuthuzelo novuyo kumntu wonke, yaye ukuba abanamdla ngokwaneleyo kwisibakala esimele sibaxhalabise kangako . . . , unqwenela ukuyinikela loo ncwadi kuthile oya kuba nomdla.” AmaNgqina kaYehova awazange aqhubeke esebenzisa loo ndlela, kuba afumanise ukuba maxa wambi amanye amalungu entsapho ayaluchola olo ncwadi aze angenelwe kulo; kodwa oko kwakusenziwa ngoko kuyayibalaselisa injongo yokwenene yamaNgqina.

Kangangeminyaka emininzi umsebenzi wawo wokusasaza uncwadi ayewubiza ngokuthi “kukuthengisa.” Kodwa eli gama lalibangela ukudideka, ngoko ukususela ngowe-1929, ngokuthe ngcembe layekwa. Eli gama lalingawufanelekeli ngokwenene umsebenzi wawo, kuba umsebenzi wawo wawungekokurhweba. Injongo yawo yayingekokwenza mali. Ekuphela kwentsusa-senzo yawo yayikukushumayela iindaba ezilungileyo zoBukumkani bukaThixo. Ngenxa yoku, ngowe-1943 iNkundla Ephakamileyo yaseUnited States yathi amaNgqina kaYehova ayengamele anyanzelelwe ukuba afumane imvume yokuthengisa ngaphambi kokuba asasaze uncwadi lwawo. Yaye inkundla yaseKhanada emva koko yacaphula yaza yavumelana nendlela eyaqiqa ngayo iNkundla Ephakamileyo yaseUnited States kweso sigwebo.b

Kumazwe amaninzi amaNgqina kaYehova ngokuthe rhoqo ebenikela uncwadi lwawo ngomnikelo. Umnikelo ocetyiswayo ubuphantsi kakhulu xa uthelekiswa nezinye iincwadi namaphephancwadi, kangangokuba abantu abaninzi baye bafuna ukukhupha umnikelo othe kratya. Kodwa intlangano ibisenza umgudu omkhulu wokugcina umnikelo ocetyiswayo uphantsi kangangokuba ube nokufikeleleka kwizigidi ezininzi zabantu abangenazinto zingako eziphathekayo kodwa abakuxabisayo ukufumana iBhayibhile okanye uncwadi lweBhayibhile. Noko ke, injongo yomnikelo ocetyiswayo ibingekokutyebisa intlangano yamaNgqina kaYehova.

Kumazwe apho umthetho uthi nakuphi na ukusasazwa koncwadi lweBhayibhile kukurhweba ukuba lowo ulusasazayo uyawuchaza umnikelo woncwadi, amaNgqina kaYehova ngovuyo alushiyela nabani na obonisa umdla wokwenyaniso nothembisa ukulufunda. Abo bafuna ukunikela okuthile ukuze bahambisele phambili umsebenzi wokufundisa iBhayibhile basenokunikela nantoni na abangathanda ukuyinikela. Ngokomzekelo, benza njalo eJapan. ESwitzerland, de kwakutshanje, iminikelo yoncwadi ibisamkelwa, kodwa ingadluli kwimali ethile echaziweyo; ngoko ukuba abaninimzi bafuna ukunikela engakumbi, amaNgqina ebesuka nje ayibuyise okanye anike loo mninimzi uncwadi olungakumbi. Umnqweno wawo, ibingekokuqokelela imali, kodwa kukushumayela iindaba ezilungileyo zoBukumkani bukaThixo.

Ngowe-1990, ngenxa yobuqhophololo obubandakanya imali obupapashwe kakhulu obenziwa kwezinye iinkonzo zeNgqobhoko, kunye notyekelo olwandayo loorhulumente lokufaka imisebenzi yonqulo ngaphantsi kwezorhwebo, amaNgqina kaYehova enza uhlengahlengiso oluthile kumsebenzi wawo ukuze aphephe ukungaqondakali kwezinto. IQumrhu Elilawulayo layalela ukuba eUnited States, lonke uncwadi olusasazwa ngamaNgqina—iiBhayibhile, kwanamaphecana, iincwadana, amaphephancwadi, neencwadi ezinkulu ezicacisa iBhayibhile—lunikelwe kubantu kuphela nje ukuba baza kulufunda, kungacetyiswa mnikelo. Umsebenzi wamaNgqina kaYehova awungowokurhweba nangayiphi na indlela, yaye eli lungiselelo liye lanceda ukuwahlula ngakumbi kumaqela onqulo enza unqulo lube lurhwebo. Kambe ke, inkoliso yabantu iyaqonda ukuba kufuneka imali ukuze kushicilelwe uncwadi olunjalo, yaye abo bayixabisayo inkonzo efezwa ngamaNgqina basenokufuna ukunikela okuthile ngenjongo yokunceda kulo msebenzi. Abantu abanjalo bayacaciselwa ukuba umsebenzi wokufundisa iBhayibhile oqhutywa ngamaNgqina kaYehova emhlabeni wonke uxhaswa ngeminikelo yokuzithandela. Iminikelo yamkelwa ngovuyo, kodwa ayicelwa.

Abo banesabelo kubulungiseleli basentsimini abakwenzi oko ngenxa yenzuzo yemali. Bayanikela ngexesha labo, ibe iindleko zabo zokuhamba bazihlawulela ngokwabo. Ukuba uthile ubonisa umdla, balungiselela ukubuyela veki nganye, konke oku bekwenza simahla, ukuze bamfundise iBhayibhile ngokobuqu. Kuphela luthando ngoThixo nangabanye abantu olunokubashukumisela ukuba baqhubeke besiba nesabelo kumsebenzi onjalo, ngokufuthi bejongene nokungasiwa so nenkcaso ekrakra.

Imali efunyanwa likomkhulu lehlabathi lamaNgqina kaYehova okanye ziiofisi zalo zamasebe, ayisetyenziselwa ukutyebisa intlangano okanye nawuphi na umntu, kodwa isetyenziselwa ukuhambisela phambili ukushunyayelwa kweendaba ezilungileyo. Emva phayaa ngowe-1922, IMboniselo (ngesiNgesi) yanikela ingxelo yokuba ngenxa yemeko yezoqoqosho eYurophu, iincwadi ezishicilelwe apho zoMbutho ngokuyintloko zazihlawulelwa yiofisi eseMerika yaye ngokufuthi zazishiywa ebantwini ngemali engaphantsi kwaleyo zenziwe ngayo. Nangona amaNgqina kaYehova ngoku enamaziko okushicilela kumazwe amaninzi, amanye amazwe athunyelelwa uncwadi awakwazi kuthumela imali ngaphandle kwelo lizwe ukugubungela iindleko. Iminikelo yokuzithandela yothando yamaNgqina kaYehova akumazwe apho kukho ubuncwane obaneleyo inceda kwintswelo ekhoyo kumazwe angenazinto ziphathekayo.

IWatch Tower Society ibisoloko izabalazela ukusebenzisa ubuncwane enabo ukuze ihambisele phambili ukushunyayelwa kweendaba ezilungileyo. Ngowe-1915, umongameli woMbutho, uCharles Taze Russell wathi: “UMbutho wethu awuzamanga kuziqwebela ubuncwane basemhlabeni, kodwa, kunoko, ubungumbutho oyisebenzisayo imali. Konke oko sikufumene ngolwalathiso lukaThixo singakucelanga siye sakhetha ukukusebenzisa ngobulumko kangangoko ngokuvisisana neLizwi noMoya weNkosi. Kwakudala sachaza ukuba xa imali iphela, imisebenzi yoMbutho ethile nayo iya kuyekwa; nokuba njengokuba imali isanda, imisebenzi yoMbutho iya kwandiswa.” UMbutho uye waqhubeka usenza kanye oko.

De kube namhlanje, intlangano isebenzisa imali enayo ukuze ithumele abaveleli abahambahambayo bokomeleza amabandla nokuwakhuthaza kubulungiseleli bawo basesidlangalaleni. Iyaqhubeka ithumela abavangeli basemazweni nabo baphumelele kwiSikolo Sokuqeqesha Abalungiseleli kumazwe ekukho intswelo ekhethekileyo kuwo. Ikwasebenzisa nayiphi na imali ekhoyo ukuze ithumele oovulindlela abakhethekileyo kwiindawo esishunyayelwe kancinane okanye esingekashunyayelwa kuzo isigidimi soBukumkani. Njengokuba kunikelwa ingxelo kwi1993 Yearbook of Jehovah’s Witnesses, ebudeni bonyaka we­nkonzo odluleyo, imali ezizi-$45 218 257,56 (U.S.) iye yasetyenziswa ngezi ndlela.

Abakhonzi Ngenxa Yenzuzo Yobuqu

Akukho ngeniso yemali yenziwayo lilo naliphi na kumalungu eQumrhu Elilawulayo, amagosa emibutho yalo esemthethweni, okanye abanye abantu ababalaseleyo abanxulumene nentlangano ngenxa yomsebenzi wamaNgqina kaYehova.

Ngokuphathelele uC. T. Russell, owaba ngumongameli weWatch Tower Society iminyaka engaphezu kwengama-30, esinye sezinxulumani zakhe sathi: “Ukuze abone enoba ikhondo lakhe lalivisisana kusini na neZibhalo, yaye nokuze abonise ukunyaniseka kwakhe, wagqiba kwelokuba ayivavanye inkoliseko yeNkosi ngezi ndlela zilandelayo: (1) Anikele bonke ubomi bakhe kulo msebenzi; (2) Asebenzise bonke ubutyebi bakhe ukuze ahambisele phambili lo msebenzi; (3) Angakuvumeli ukwenziwa kwenkongozelo kuzo zonke iintlanganiso; (4) Axhomekeke kwiminikelo engacelwanga (eyokuzithandela ngokupheleleyo) ukuze umsebenzi uqhubeke emva kokuba ubutyebi bakhe buphelile.”

Kunokusebenzisa umsebenzi wonqulo ukuze azizuzele ubutyebi, uMzalwan’ uRussell wachithela bonke ubuncwane bakhe emsebenzini weNkosi. Emva kokufa kwakhe IMboniselo yanikela le ngxelo: “Wanikela ngobutyebi bakhe bonke kumsebenzi awayenikele ngobomi bakhe kuwo. Ebefumana imadlana encinane ezii-$11,00 ngenyanga ukwenzela iindleko zakhe zobuqu. Wafa, engashiyi nento le ngasemva.”

Ngokuphathelele abo babeya kuqhubeka nomsebenzi woMbutho, uMzalwan’ uRussell wathi kumyolelo wakhe: “Mayela nembuyekezo, ndicinga ukuba kububulumko ukubambelela kwikhondo loMbutho langaphambili ngokuphathelele umvuzo—ukuba kungahlawulwa namnye; kuphela nje abo bakhonza uMbutho okanye umsebenzi wawo nangayiphi na indlela bavunyelwe iindleko ezisengqiqweni.” Abo babeya kukhonza kumakhaya aseBheteli, kwiiofisi, nakwimizi-mveliso yoMbutho, kwakunye nabameli bawo abahambahambayo, babemele banikwe ukutya, ikhusi, nemali yeendleko engephi kuphela—eyanele iintswelo zabo zelo xesha kodwa “kungalungiselelwa . . . ukugcina imali.” Kusasebenza loo mgaqo nanamhlanje.

Abo bamkelwayo kwinkonzo yexesha elizeleyo ekhethekileyo kwikomkhulu lehlabathi lamaNgqina kaYehova bonke benza isifungo sobuhlwempu, njengokuba enzile onke amalungu eQumrhu Elilawulayo nawo onke amanye amalungu entsapho yaseBheteli apho. Oku akuthethi ukuba baphila ubomi bokungonwabi, obungenazinto zakuzonwabisa. Kodwa kuthetha ukuba bayabelana, ngaphandle komkhethe, amalungiselelo okutya, ekhusi, nawembuyiselo-ndleko angephi enzelwa bonke abakuloo nkonzo.

Ngaloo ndlela intlangano iyaqhubeka nomsebenzi wayo ixhomekeke ngokupheleleyo kuncedo uThixo alunikelayo. Ngaphandle kokunyanzelwa kodwa njengobuzalwana bokomoya obufikelela kuyo yonke imimandla yomhlaba, ngovuyo amaNgqina kaYehova asebenzisa ubuncwane bawo ukuze afeze umsebenzi uYehova, uYise wasezulwini ozukileyo, awanike ukuba awenze.

[Footnotes]

[Blurb on page 340]

‘LoMbutho awukugunyazisi yaye awukuvumeli ukucela imali’

[Blurb on page 342]

Ngokuyintloko kugxininiswa kwimbaluleka yokwabelana nabanye ngenyaniso

[Blurb on page 343]

Ukuchazwa ngokucacileyo nangokunya-nisekileyo kwezibakala

[Blurb on page 344]

Amabandla ayancedisana ukuze afumane iiHolo zoBukumkani ezifunekayo

[Blurb on page 345]

Inkoliso yeminikelo ivela kubantu abangenazinto kangako

[Blurb on page 348]

Uncwadi oluninzi luhanjiswa ngesisa—luhlawulelwa ngubani?

[Blurb on page 349]

Ngovuyo uncwadi alushiyela nabani na obonisa umdla wokwenyaniso nothembisa ukulufunda

[Blurb on page 350]

Kwenziwa ntoni ngemali enikelwayo?

[Blurb on page 351]

“Wanikela ngobutyebi bakhe bonke kumsebenzi awayenikele ngobomi bakhe kuwo”

[Box on page 341]

UThixo Akangqibi

“Lowo uthi, ‘Ukuba bendilambile, ndibe ndingayi kukuxelela; ngokuba lelam elimiweyo nenzaliseko yalo. . . . Andiyi kuthabatha zinkunzi zankomo endlwini yakho, nazinkunzi zabhokhwe esibayeni sakho; ngokuba zezam zonke iinyamakazi zehlathi, neenkomo ezisezintabeni eziliwaka’ (INdu. 50:12, 9, 10), unako ukuqhubeka nomsebenzi wakhe omkhulu ngaphandle kokuba angqibe ecela imali ehlabathini okanye kubantwana bakhe. Yaye akayi kubanyanzela abantwana bakhe ukuba banikele nangantoni na enkonzweni yakhe, engayi kwamkela nantoni na kubo kungenguwo umnikelo owenziwe ngokuchwayita nangokuzithandela.”—“Zion’s Watch Tower,” Septemba 1886, iphe. 6.

[Box on page 347]

Iminikelo Yayingasoloko Iyimali

AmaNgqina ahlala kumantla eQueensland alungiselela aza athumela kwisiza sesakhiwo seWatch Tower esasiseSydney, eOstreliya, ngeenqwelwana ezirhuqwayo ezine amaplanga awayenexabiso eliqikelelwa phakathi kwee-A$60 000 nee-A$70 000.

Xa umzi-mveliso weWatch Tower owawuse-Elandsfontein, eMzantsi Afrika, wawusandiswa, umzalwana womIndiya watsal’ umnxeba waza wabacela ukuba bancede baye kuthabatha umnikelo weengxowa zesamente ezingama-500 (nganye iziikhilogram ezingama-50)—ngexesha kanye eyayinqongophele ngalo kwelo lizwe. Abanye banikela ngeelori zabo ukuba zisetyenziswe nguMbutho. Udade oNtsundu wahlawula enye inkampani ukuba ize kothula iikyubhikhimitha zentlabathi yokwakha ezili-15.

ENetherlands xa kwakusakhiwa izakhiwo ezitsha zesebe e-Emmen, kwanikelwa ngezixhobo zokwakha nempahla yokusebenza eninzi. Omnye udade, nangona wayegula kakhulu, wabenzela iikawusi zoboya bonke abasebenzi ngexesha lasebusika.

Ukuze kwakhiwe iofisi entsha yesebe nomzi-mveliso eLusaka, eZambia, impahla yokwakha yathengwa ngemali enikelwe ngamaNgqina akwamanye amazwe. Impahla nezixhobo zokwakha ezazingafumaneki ekuhlaleni zathunyelwa eZambia njengeminikelo kumsebenzi owenziwa apho.

Elinye iNgqina e-Ecuador, ngowe-1977, lanikela umhlaba oziihektare ezingama-34. Apha kwakhiwa iHolo yeNdibano nesakhiwo esitsha sesebe.

AmaNgqina asekuhlaleni ePanama avula amakhaya awo ukuze ahlalise abasebenzi bokuzithandela; amanye awayenoodula-dula alungiselela izinto zokuhamba; amanye aba nenxalenye ekulungiseleleni izidlo ezingama-30 000 ezazidliwa esizeni sesakhiwo.

Elinye ibandla lababhakela laza labathumelela amaqebengwana angama-4 500 abasebenzi kwisakhiwo saseArboga, eSweden. Abanye bathumela ubusi, iziqhamo, ne-“jam.” Umlimi ohlala kufutshane nesiza sesakhiwo, nangona wayengeloNgqina, wanikela ngeetoni ezimbini zeminqathe.