Musa Ukuyiyeka Inyaniso Idlule

MHLAWUMBI uPontiyo Pilato wagqala ukuba ukwamkela inyaniso kwakuya kufuna okuthile kuye. Ukuba ngumlandeli kaKristu kwakunokuthetha ukwamkela ulawulo lukaKristu yaye ngokungathandabuzekiyo nokwenza inguqulelo ekhawulezileyo ngokokuziphatha. Sekunjalo, uSolomon, umbhali weMizekeliso 23:23 wathetha oku: “Thenga inyaniso, ungathengisi ngayo; nobulumko, noqeqesho, nengqondo.”

‘Ndithenge inyaniso?’ uyabuza ukhwankqisiwe. Ewe, kuba iBhayibhile apha iyasinceda sibone ukuba ubani ufumana inyaniso, ubulumko nengqondo kuphela ngendleko! Noko ke, inyaniso yeyona nto ixabiseke gqitha enokuthengwa. Ewe, uSolomon wacebisa oku, “Ungathengisi ngayo!” Kwakungathi uthi ayikho enye into ekunokwenzeka ifane nayo ngexabiso.

‘Kodwa iyintoni yona inyaniso?’ abaninzi bayabuza, bephinda umbuzo kaPilato. Kwabaninzi namhlanje, ‘inyaniso’ iyingcamango ekunzima ukuyifumana. Ngokomzekelo, qwalasela oko uAlbert Einstein wakha wakuthetha: “Kunzima kwaukunamathelisa intsingiselo echanileyo kwigama elithi ‘inyaniso engokwenzululwazi.’ Ngaloo ndlela intsingiselo yegama elithi ‘inyaniso’ iyahlukahluka, kuxhomekeka kwinto yokuba sixubusha ingcamango engokwezobalo, okanye ingcamango yenzululwazi. ‘Inyaniso yonqulo’ ayidluliseli nto ecacileyo konke konke kum.” (Ideas and Opinions, nguAlbert Einstein) Kodwa ngaba isibakala sokuba uEinstein engazange ayifumane inyaniso sithetha ukuba nawe imele ikuphose? Akunjalo konke konke.

Ngokucacileyo uYesu wathi: “Ndim indlela, ndim inyaniso, ndim ubomi.” (Yohane 14:6) Ewe, “inyaniso” isekelwe kuKristu Yesu nakwindawo yakhe kwiinjongo zikaYehova uThixo njengoMzalisekisi weziprofeto, uMhlanguli woluntu olunesono, uKumkani omisiweyo woBukumkani bukaThixo, uMbingeleli Omkhulu, noMtshabalalisi wabangendawo. (Roma 15:8; 1 Timoti 2:5, 6; Yohane 3:16; Efese 1:20-22; Daniyeli 7:13, 14; Mateyu 6:9, 10; Hebhere 4:14; ISityhilelo 19:11-21; 2 Tesalonika 1:7-9) Phofu ke, umntu ‘unokuyithenga’ njani le nyaniso?

‘Ukwazi’

Umntu uqalisa ukuyithenga inyaniso ngokulandela amazwi kaYesu akuYohane 17:3 athi: “Bubo ke obu ubomi obungunaphakade, ukuba mabakwazi, wena ukuphela koThixo oyinyaniso, naye uYesu Kristu omthumileyo.” Eneneni, lo ibingaba ngumsebenzi onzima gqitha ukuba umntu ebenokuwenza eyedwa. Emva kwinkulungwane yokuqala, kwakukho ithenwa elingumTiyopiya, okanye igosa lenkundla, elazama ukwenza oko. Kodwa umvangeli uFilipu ebona ithenwa lizama ukufundisisa isiprofeto seBhayibhile esinzima, walibuza, “Uyaziqonda na kodwa izinto ozilesayo?” Le ndoda yaphendula ngala mazwi, “Ndingaba nako njani na, kungekho undikhokelayo nje?” (IZenzo 8:28-31) Mhlawumbi nawe uvakalelwa ngendlela efanayo.

Ngoko ke amaNgqina kaYehova ayazinikela ukufundisisa iBhayibhile kunye nawe ekhayeni lakho.a Izifundo ezinjalo azihlawulelwa. UYesu wathetha oku, “Namkele ngesisa, yiphani ngesisa.” (Mateyu 10:8) Kodwa ukuthenga inyaniso kuya kukudla ngenye indlela—kuya kufuna ixesha nomgudu wakho. Noko ke, khumbula ukuba uYesu Kristu—ophilileyo nosebenzayo emazulwini—ufuna ukukunceda ufunde inyaniso. (Thelekisa uLuka 5:13.) Wathembisa abafundi bakhe bokuqala ukuba umoya kaThixo wawuya kubakhokela “kuyo yonke inyaniso.” (Yohane 16:13) Ngokubanzi, oku kusenokusebenza nakuwe. Ngoko musa ukuvakalelwa kukuba ukufunda inyaniso kuya kuba nzima gqitha kuwe.

Ufundisiso olunzulu lweBhayibhile kwakhona lwenziwe lwalula ngakumbi ngamancedo okufundisisa iBhayibhile aveliswe ngamaNgqina kaYehova. Ukubonisa nje imizekelo yemixholo ethile yezi mpapasho zakha umdla wabafuni abanyanisekileyo benyaniso: INyaniso eKhokelela kuBomi obungunaPhakade, Unokuphila Ngonaphakade KwiParadisi Esemhlabeni, Ukusindela Kumhlaba Omtsha, Ukumanyana Ekunquleni Okuphela KoThixo Oyinyaniso, nothi Life—How Did It Get Here? By Evolution or by Creation? ukukhankanya nje ezimbalwa.b

Ezi mpapasho ngokusengqiqweni zicacisa iZibhalo ngolwimi ekulula ukuluqonda, azivuyisi nje kuphela engqondweni yakho kodwa kwanasentliziyweni yakho. Inyaniso icacile kuzo ngobunyulu, uphengululo, nesiluleko sazo esisebenzisekayo. Njengoko ufunda iinyaniso zeBhayibhile ngoncedo lwezi mpapasho, uya kukuqonda oko kanye uYesu wayekuthetha xa wathi: “Naniya kuyazi inyaniso, yaye inyaniso iya kunikhulula.” (Yohane 8:32) Apha igama elithi “inyaniso” ligubungela zonke iimfundiso zamaKristu njengoko ngoku zifumaneka kwiLizwi elibhaliweyo likaThixo lenyaniso—iBhayibhile. (2 Timoti 2:15; Efese 1:13) Noko ke, kutheni ukufunda inyaniso kukhulula kangaka nje?

Njengomzekelo, qwalasela ukuba ‘ukoyika ukufa’ kuye kwagcina uluntu ‘lungamakhoboka ngalo lonke ixesha lokudla kwalo ubomi.’ (Hebhere 2:15) Oku kunjalo phezu kwaso nje isibakala sokuba inkoliso yabantu izibanga inethemba elingacacanga lobomi emva kokufa kulonwabo lwasezulwini. Noko ke, iinyaniso zeBhayibhile zikhulula umntu kuloyiko olungemyoli ngolo hlobo. Umntu ufunda ukuba abafileyo ababandezeleki kwindawo etshisayo yomlilo, kuba “abafileyo abazi lutho.” (INtshumayeli 9:5, 10; bona kwaneNdumiso 146:4 neNtshumayeli 3:19, 20.) IBhayibhile ikwabonisa ukuba umntu akanamnqweno azelwe nawo wokufa aze aye ezulwini. Ngokuchaseneyo noko, uThixo uye ‘wanikela iphakade ezintliziyweni zoluntu’; umntu ophilileyo unqwenela ukuphila ngonaphakade!—INtshumayeli 3:11; bona kwanamaRoma 5:12; 6:23.

Loo mnqweno uya kuzalisekiswa koko iBhayibhile ikubiza ngokuthi ‘umhlaba omtsha.’ (2 Petros 3:13; thelekisa uMateyu 6:9, 10.) UYesu wabonisa ukuba abo bafikelela kubomi ‘kumhlaba omtsha’ babeya kunandipha ‘iParadisi.’ (Luka 23:43) Ezinye izibhalo ziyasinceda sibone ukuba eli iya kuba lihlabathi elingenazintlungu nelingenazinyembezi! (ISityhilelo 21:4; Isaya 11:6-9) Khawucinge nje ngendlela eli themba elinokubuguqula ngayo ubomi bakho! Kodwa kuqala umele ‘wazi.’

Ukuncama Ikratshi

KwiNdumiso 25:9 iBhayibhile ithi: “Uyabanyathelisa abalulamileyo emasikweni akhe, abafundise abalulamileyo indlela yakhe.” Hayi, uThixo akayi kuthi ngokulula nje anike inyaniso abantu abazidlayo nabanekratshi. “UThixo uyabachasa abanekratshi, abababale ke abazithobileyo.” (1 Petros 5:5) Kunokwenzeka ukuba uPontiyo Pilato ubuncinane wayefuna ukwazi ngenyaniso. Kodwa ababhali bakudala bamchaza uPilato njengendoda eyayiziphakamisile. KumaRoma, amaYuda ayengabantu abaphantsi nabanonqulo olungaqhelekanga awayekholiswa kukubacinezela! Ikratshi nebhongo lobupolitika zibonakala ukuba zaye zaba yimiqobo kuPilato.—IMizekeliso 16:18.

Kwangokunjalo abaninzi namhlanje bayafuna ukwazi ngesigidimi amaNgqina kaYehova asithweleyo. Noko ke, basenokuphawula ukuba amaNgqina kaYehova ngokufuthi angabantu abathobekileyo, ukuba iindawo zawo zokuhlangana ezindilisekileyo (iiHolo zoBukumkani) azinakuthelekiswa neecawa ezimbetshembetshe zeNgqobhoko, ukuba bambalwa kumaNgqina abanokuzibanga benemfundo ephakamileyo. Kodwa phawula oko iBhayibhile ikutshoyo kweyoku-1 yabaseKorinte 1:26-29: “Kuba luboneni ubizo lwenu, bazalwana, ukuba azizininzi izilumko ngokwenyama, ababaninzi abanamandla, akamaninzi amanene. UThixo usuke wanyula izinto ezibubudenge zehlabathi, ukuze azidanise izilumko; nezinto ezingenamandla zehlabathi usuke uThixo wazinyula, ukuze azidanise izinto ezomeleleyo; nezinto zehlabathi ezingenabuntu, nezingento yanto, wazinyula uThixo, nezingathi azikho, ukuze aziphuthise izinto ezikhoyo; ukuze kungaqhayisi namnye umntu emehlweni akhe.”

Ngoko ke ukufunda kwaba ‘balulamileyo’ kusenokufuna ukuba ulahle ikratshi lakho. Kodwa ngaba elo lixabiso eliphakame gqitha lokuhlawulela inyaniso?

Ukusebenzisa Ulwazi

Ngokulula ukwamkela nje inkcazelo—kwanenyaniso—akwanele. Kungenxa yoko le nto sibongozwa ukuba ‘sithenge ubulumko.’ (IMizekeliso 23:23) Ubulumko kukusebenzisa ulwazi! Enyanisweni, uSolomon wathi “ubulumko yinto yokuqala.” (IMizekeliso 4:5-7, NW) Ewe, lulunge ngantoni ulwazi ukuba alusetyenziswa? Ngoko emva kokufunda iindlela zikaThixo, imiyalelo, imithetho, amazwi akhumbuzayo, nesiluleko, funda ukuzisebenzisa ezi ebomini bakho. “Ubulumko bugwetyelwa ngemisebenzi yabo,” watsho uYesu.—Mateyu 11:19, NW.

UPontiyo Pilato wayichasa inyaniso. Noko ke, akufanele uyenze loo mpazamo. Eneneni ukuyeka inyaniso idlule ngenxa yekratshi, ukuzingca, okanye ukuthanda ububi obuthile obungekho ngokwezibhalo bekuya kuba bubudenge. Yiba njengomdumisi owathandaza wathi, “Ndiqondise, ndiphile.” (INdumiso 119:144) Ewe, umntu okuvumayo ukuhlawula ixabiso lokufumana inyaniso nobulumko ‘unokuphila,’ kuba umntu ozithengayo ‘uya kufumana ubomi; azuze okukholekileyo kuYehova.’—IMizekeliso 8:35.

Enye indoda eyaqalisa ukufundisisa iBhayibhile namaNgqina kaYehova yathi: “Kuyintsikelelo ukuthi inyaniso iye yabuguqula ubomi bethu.” Inokubuguqula nobakho. Ngoko musa ukuyiyeka inyaniso idlule! Thabatha eli thuba likhethekileyo ukuba uthenge inyaniso, ubulumko, nengqondo. Akusayi kuzisola kuba wenze ngolo hlobo.

[Imibhalo esemazantsi]

[Umfanekiso okwiphepha 4]

Ikratshi kusenokuba labangela uPontiyo Pilato ukuba ayiyeke inyaniso idlule