‘Sinokumkholisa’ Njani UYehova?

NAMHLANJE, hayi indlela abambalwa ngayo abo bakuxhalabeleyo ukwazi enoba iingcinga, amazwi nezenzo zabo ziyamkholisa na uThixo! Kwanabo bazibabaza benenkxalabo enjalo ikakhulu babonakala benikela nje inkonzo yomlomo kuThixo. Enyanisweni, ngenyambalala kunokuthiwa, ‘ayimkholisi uThixo.’—1 Tesalonika 2:15.

Bambi abazibanga bengamaKristu banemvo yokuba lo gama nje bengayaphuli iMithetho Elishumi, bayamkholisa uThixo. Kodwa akunjalo! UMzekelo wethu uYesu Kristu wathetha oku ngoThixo: “Ndihleli ndizenza izinto ezikholekileyo kuye.” (Yohane 8:29) Ewe, wamkholisa uYise ngokwenza izinto ezithile. Isenzo esingqalileyo siyafuneka, kwananjengokuba kunokubonwa kumthandazo wompostile uPawulos ethandazela amakholwa angoowabo eKolose. Wathandazela ukuba ‘ahambe ngokuyifaneleyo iNkosi [uYehova], ase kuko konke ukuyikholisa [ngokupheleleyo, NW], axakathe isiqhamo kuwo wonke umsebenzi olungileyo.’—Kolose 1:9, 10.

Kanti, ngaba kunokwenzeka ngenene ‘ukumkholisa ngokupheleleyo’ uYehova? Kaloku, ekubeni engafezekanga, amaKristu akanako ukumkholisa ngokugqibeleleyo uThixo ngoku. Phofu ke, anokusebenzela oko ngokunyaniseka, enembono ‘yokumkholisa ngokupheleleyo.’ Ekubeni uPawulos wakhankanya ‘ukuxakatha isiqhamo kuwo wonke umsebenzi olungileyo, imisebenzi engqalileyo ibandakanyekile. Kambe ke, asinakwandlala apha yonke loo misebenzi. Kodwa sinokunikela inkcazelo efanele icingisiswe. Ukuba ezi ngongoma zibonisa ukuba kukho iinkalo ezithile zobomi ofanele wenze uhlengahlengiso kuzo, qiniseka ukuba uYehova uya kuyisikelela imigudu yakho yokumkholisa. Inyaniso kukuba ‘ukumkholisa’ uYehova kufuna ukuba silinde iingcinga, amazwi nezenzo zethu.

Kuthekani Ngeengcinga Zethu?

ILizwi likaThixo lisixelela ukuba “akukho sidalwa singabonakaliyo emehlweni akhe; izinto zonke zize, zityhilekile, emehlweni alowo sinokuthana ni naye.” (Hebhere 4:13) Akukho bantu nazidemon zinokuzifunda iingcinga zethu, kodwa uThixo unako. Ekubeni oko kunjalo, sifuna ukuba kwaiingcinga zethu zimkholise. Ngoko senza kakuhle ukuzibuza oku: Yintoni endithanda ukucinga ngayo xa kungekho msebenzi ndiwenzayo ekufuneka ndimilisele ingqondo kuwo? Ngokungathi kunjalo, liliphi icala isalatha-mbombo (compass) sengqondo yam ngokwemvelo esalatha kulo?

Kwakhona sinokuzibuza oku: Ngaba ndithanda ukuphupha ngezinto ezingenakwenzeka yaye ndiphuphe ndinandipha ubutyebi, udumo, okanye ukudunyiswa ngenxa yezinto endizenzileyo? Ngaba ndicinga phosakeleyo, njengokusoloko ndikhalaza, ndiziphindaphinda izihlandlo ezininzi? Ngaba ndityekele ekuvumeleni iingcinga zam phantse ngokuthe rhoqo zisoloko zingoyolo lwesini? Okanye ngaba ndisoloko ndizalisa ingqondo yam ngamacebo namalungiselelo okwenza imali?

Ngoku qwalasela oku: Ngaba ‘sinokumkholisa’ uYehova ngokuzalisa iingqondo zethu ngeengcinga ezinjalo? Kakade ke akunjalo! Ngoko ngomthandazo onyanisekileyo nangoncedo lukaThixo, zikhuphe ezo ngcinga ngokuzalisa ingqondo ngeengcinga ezilungileyo, ezifanelekileyo, ezihlaziyayo, ezinyulu nezothando. (Filipi 4:8) Hayi indlela ekulunge ngakumbi ngayo ukuba siqeqeshe iingqondo zethu ukuze sicinge ngezinto ezinxulumene nokunqula kwethu uYehova! Cinga ngoBukumkani bukaThixo, obusondele kangaka. Khumbula iingongoma ezifundwe kutshanje kwiLizwi likaThixo. Cinga ngombandela oza kuqwalaselwa kwiintlanganiso zebandla ezizayo, yaye ngokukodwa nayiphi na inxaxheba oza kuba nayo kucwangciso. Cinga ngendlela onokuphucula ngayo ubulungiseleli bakho basentsimini. Kuqala, khumbula ukuba ungumlungiseleli ongumKristu.

Bambi baye bancedwa ngokuphindaphinda izibhalo abazicengcelezileyo, nangokububula iingoma zoBukumkani. Njengento yokumkhumbuza, omnye umlungiseleli ongumKristu wakufumanisa kuluncedo ukwenza aze acinge ngesi siqendu:

“Khawundincede Thixo ndithobele,

Oko umthetho nothando lwakho lukuvumelayo.

Kwanga andingeze ndivukele nakanye,

Ekubeni uzenza kakuhle zonke izinto.”

Ewe, qhubeka uthandaza njengoko uKumkani uDavide wakudala wenzayo: “Mazikholeke izicamango zentliziyo yam”—oko kukuthi, zikukholise—“phambi kwakho, Yehova.”—INdumiso 19:14.

Kuthekani Ngamazwi Ethu?

UDavide wakwathandaza wathi: “Makakholeke amazwi omlomo wam . . . phambi kwakho, Yehova.” (INdumiso 19:14) Njengoko sifunda kuYakobi 3:2-12, kuphela ngumntu ofezekileyo onokululawula ngokupheleleyo ulwimi. Kodwa simele silwele ukululawula ukuba siza ‘kumkholisa’ uYehova.

Kambe ke, sithetha amazwi amaninzi mihla le, yaye asinakulindela ukuba onke amazwi ethu alinganiselwe kwimibandela engokweZibhalo. Phofu ke, kungakhathaliseki oko sobe sithetha ngako, sinokucinga ngokukholisa uYehova. Ngokomzekelo, siyazi ukuba ukunyelisa, intetho engamanyala, okanye erhabaxa nekrwada akunakwenzeka ukuba imkholise uBawo wethu osezulwini. Ngoko sifanele siyiphephe intetho enjalo.—Efese 5:3, 4.

Kwakhona ke, ukuba besiya kumkholisa ngokupheleleyo uMenzi wethu ngentetho yethu, simele silumke ukuba singathethi izinto ezingeyonyaniso, nezibonakalisa ukubathiya abanye. Kufanele kuthethwe oku ngathi: “Ngongahlebiyo ngolwimi lwakhe, ongamenziyo into embi uwabo, ongamngcikiviyo ummelwane wakhe.” Nakubeni sisenokuva ubunzima ngokungekho sikweni, sifanele sikulumkele ‘ukunyelisa nabani na.’—INdumiso 15:3; Tito 3:2.

Sinamathuba azuke ngenene ‘okumkholisa’ uYehova ngentetho yethu ngamaxesha ezidlo! Ngokwemvelo, eli asiloxesha lamazwi abantu abakhathazekileyo okanye iintetho ezicaphukisayo. Zininzi ngolona hlobo izinto ezilungileyo esinokuxubusha ngazo! Sifanele siwalumkele ngokukodwa amathuba anjalo ukuba siziindwendwe okanye sineendwendwe. Kuqheleke gqitha ukuba ibe ngamapholopholo kunokuba kube ngamaKristu akhulileyo alawula incoko. Ngaba uya kuba nondwendwe olungumKristu oluneminyaka emininzi yamava kwinkonzo yexesha elizeleyo? Ngaba lunolwazi gqitha ngeLizwi likaThixo? Ngoko sebenzisa ingqondo ukulwenza lulukhuphe. “Ngamanzi anzulu icebo entliziyweni yendoda, kanti indoda enengqondo iyalirhola,” ukuze kungenelwe bonke abakhoyo.—IMizekeliso 20:5.

Ukongezelela, ukuze ‘simkholise’ uYehova kwintetho yethu, simele siphaphele namathuba okunikela ubungqina obungacwangciswanga ngegama likaThixo nangoBukumkani. Enyanisweni, maxa wambi umlungiseleli ongumKristu unokuphumeza okuninzi ngobungqina obunjalo obungacwangciswanga. Phofu ke, indlela ephambili yokukholisa uYehova ngentetho, ngoxa kusikeleleka nabanye, kungokuya kwindlu ngendlu nesigidimi soBukumkani.—IZenzo 20:20.

Ukuze amazwi ethu ‘amkholise’ uYehova xa sibandakanyeke kubulungiseleli basentsimini bobuKristu, simele sihlale silwela ukuphucula ukunikela kwethu isigidimi soBukumkani. Njengoko siphathiswe “iindaba ezilungileyo,” thina, njengompostile uPawulos, sifuna “ukuthetha; singangi sikholisa abantu, kuba sikholisa uThixo ozicikidayo iintliziyo zethu.” Yaye okungamele kutyeshelwe sisinyanzelo sokusebenzisa imilomo yethu ukuze sivume ekuhleni ukholo Iwethu kwiintlanganiso zamaKristu, apho sinokulola abanye eluthandweni nasemisebenzini emihle.—1 Tesalonika 2:4; Hebhere 10:23-25.

‘Ukukholisa’ UYehova Ngehambo Nangezenzo Zethu

Ukuze thina ‘simkholise’ uYehova, simele kwakhona silumkele ihambo yethu yemihla ngemihla, kuquka ukuzihlaziya kwethu. Ewe, kwanaxa sifuna ukuzihlaziya, asinako ukumkhuphela ngaphandle uThixo koku. Ngaba oku kuvakala ikukugqithisa? Akunjalo konke konke, kuba uPawulos wathi: “Nokuba niyadla, nokuba niyasela, nokuba nenza nayiphi na into, zenzeleni uzuko lukaThixo izinto zonke.” Simele sisigcine engqondweni isilumkiso sokuba “abo ke bakwinyama, abanakumkholisa uThixo.” Ngoko, ngaphezu kwako konke okunye, ukuzihlaziya kwethu kufanele kube kokunik’ impilo.—1 Korinte 10:31; Roma 8:8.

Asinakuyityeshela inkalo yobungcathu nexesha. Ukuze ‘simkholise’ uYehova, sifanele sigcine ukuzihlaziya kukwindawo yako, njengento engaxabisekanga kangako nengenambaluleka iyintloko. Asifanele sisukele ukuzihlaziya, enoba kukubukela umdlalo okhethekileyo kumabonwakude okanye ukuya kubukela imidlalo, ukusa kwinqanaba lokukuvumela ukuba kuthabathel’ indawo ukuya kwethu kwiintlanganiso zamaKristu okanye ukuba nesabelo rhoqo kwinkonzo yasentsimini.—Mateyu 6:33.

‘Ukukholisa’ uYehova kukwaquka ukwenza okulungileyo kubazalwana bethu abangamaKristu, njengoko singathi sifumane ithuba okanye kube yimfuneko. Ngokuphathelele oku, siyafunda: “Ukwenza okuhle nobudlelane, musani ukukulibala; kuba imibingelelo enjalo uyakholiswa kakuhle yiyo uThixo.” Umpostile uPawulos wathi ububele amaKristu aseFilipi awayebubonakalisa kuye ‘babungumbingelelo owamkelekileyo, okholekileyo kakuhle kuye uThixo.’—Hebhere 13:16; Filipi 4:18.

Abantwana ‘banokumkholisa’ njani uYehova ngokuphathelele ihambo yabo? UPawulos ubonisa ukuba eyona ndlela ibalaseleyo kungokuthobela abazali babo “ngokwabaseNkosini.” Wakwathetha oku: “Nina bantwana, balulameleni abazali benu ezintweni zonke; kuba oko kukholekile kuyo iNkosi.”—Efese 6:1-3; Kolose 3:20.

Bonke abakhonzi bakaThixo abazahluleleyo banamava obubele obuvela kuYehova nangejelo lakhe elisemhlabeni kangangokuba, ngothando olupheleleyo nangombulelo, sifanele sisoloko sixhalabele ‘ukumkholisa ngokupheleleyo.’ Ngokuqinisekileyo, umbulelo wothando ufuna ukuba ‘singamkeli ubabalo lukaThixo size siphulukane nenjongo yalo.’ (2 Korinte 6:1, NW) Ukuxhalabela ukukhonza uYehova ngokupheleleyo kukwayinto elungileyo, efanelekileyo ukuba yenziwe, ekubeni enguMongami Wendalo iphela. Ngaphezu koko, ukufuna ‘ukukholisa’ uYehova likhondo lobulumko, kuba ukwenza oko kuyingenelo kuthi ngoku yaye kunedinga lobomi obuza kuza.—1 Timoti 4:8.

Ewe, sifuna ukulinda iingcinga zethu, amazwi ethu, ihambo nezenzo zethu. Ngoncedo lukaYehova, oku siya kukwenza ukuze simkholise ngokuphelele ngakumbi. Yaye ekwenzeni oko, masingancami. Kunoko, kwanga singasoloko sithobela isiluleko sompostile uPawulos esiya kumaKristu aseTesalonika: “Elokugqiba ngoko, bazalwana, siyanicela siniyala siseNkosini uYesu ukuba nithi, njengokuba nakwamkelayo kuthi, okokuba nimelwe kukuthini na ukuhamba nokumkholisa uThixo, nikhule kuko ngakumbi.”—1 Tesalonika 4:1.

[Umfanekiso okwiphepha 23]

Musa ukuvumela ukuzihlaziya kuphazamisane nomsebenzi wobukristu