Okuthethwa Ngamaxesha Namathuba KaYehova Kumhla Wethu
“Wonke umthi ongavelisi ziqhamo zihle uyagawulwa, uphoswe emlilweni.”—MATEYU 7:19.
1. Sinokufunda ntoni ngendlela uYehova awaqhubana ngayo nabalawuli abathile bexa elidluleyo?
INGXELO engokwembali ingqinela isibakala sokuba uYehova unokuwaguqula ‘amaxesha neminyaka; eguzula ookumkani amise ookumkani.’ (Daniyeli 2:21) Kwiinkulungwane ezidlulileyo, xa kwafanelekela injongo yakhe, wamguzula uFaro, uNebhukadenetsare, uBheleshatsare, uHerode Agripa I nabanye. Bambi basenokuthi, ‘Phofu ke, zonke ezo ziziganeko zembali yamandulo. Zinakuthanani nathi?’ Zithetha okuninzi kuthi kuba ziqulethe izifundo ezinamandla. Esikufundayo kwezo ziganeko kukuba xa ixesha likaYehova lifika, uya kuphelisa ulawulo lweenkokeli zehlabathi. Yaye ngokokhetho lwakhe, ubeke emandleni okulawula umlawuli okhethwe nguye.
2. Ixesha likaYehova lifike nantoni kumhla wethu?
2 Kumhla wethu, lifikile kwakhona ixesha likaYehova ‘lokuguzula ookumkani nokumisa ookumkani.’ Ngoku ekubeni emmisile uKumkani okhethwe nguye, kungekudala uYehova uya kushenxisa bonke abalawuli beli hlabathi nenkqubo yezinto abayiphetheyo. Ngoba? Kungenxa yokuba, njengoBheleshatsare waseBhabhiloni yamandulo, ‘babekwe ezikalini baza bafunyanwa belula.’ Imeko yanamhlanje injengokuba yayinjalo xa kanye umkhonzi kaYehova uDaniyeli waxelela uBheleshatsare wathi: “UThixo ububalile ubukumkani bakho, wabuphelisa.” (Daniyeli 5:26, 27) Ngoko ke, kwixesha lethu uYehova ‘uya kuphalusa ookumkani ngemini yomsindo wakhe. Uya kugweba phakathi kweentlanga.’—INdumiso 110:5, 6.
‘Bafunyenwe Belula’
3, 4. Ngokubhekisele kuxolo, abalawuli behlabathi ‘bafunyaniswe belula’ njani kule nkulungwane?
3 Abalawuli behlabathi ‘bafunyenwe belula’ ngayiphi indlela ngokubhekisele kwiziganeko zehlabathi? Banenxaxheba enkulu etyaleni loko kuye kwenzeka kwintsapho yoluntu ngexesha lethu, ixesha elizaliswe ngamashwangusha ngokwahlukileyo kuso nasiphi na esinye isizukulwana. Ngokomzekelo, ukususela nje kowe-1914 kubulewe abantu abamalunga nekhulu lezigidi kwiimfazwe ezahlukahlukeneyo! Namhlanje, izixhobo zenyukliya zisongela ukuqhubeka kobomi emhlabeni. Kanye ngalo mzuzu, amawaka eentolo zomlilo zenyukliya, ezilindwe ngamajoni okuzidubula, zihleli zijoliswe kwiidolophu ezinkulu nezinabantu abaninzi.
4 Libhekisele kwimfazwe yenyukliya, iphephancwadi iScience lanikela olu hlolisiso lungcangcazelisayo: ‘Xa kunokuliwa imfazwe enkulu yenyukliya, kunokubhangiswa inxalenye enkulu yezityalo nezilwanyana emhlabeni. Ukubhangiswa koluntu kuqukiwe apho.’ Igosa laseburhulumenteni eYurophu lathi: “Ilahleko ayinakubalwa ngokwezixeko kodwa inokubalwa ngokwamazwekazi ephela.” Umongameli welizwe laseLatin America wathi ngokubhekisele kwiindleko zomkhosi: “Uluntu luhamba ngenqanawa eyaphukileyo eqalisa ukuzika . . . Ukuba iyazika ngokuzika, inokutshona naye wonke umntu olapho kuyo.” Yaye iphephandaba laseJapan lathi: “Ihlabathi libonakala likude gqitha [noxolo] kunalo naliphi na ixesha embalini.”
5, 6. Injani imeko engokoqoqosho kumazwe nakwizizwe ezininzi?
5 Kanti, iintlanga zisaqhubeka zichitha imali eninzi ngakumbi kwizixhobo. Ngoku iindleko zinyukele ngaphezu kwesigidi sezigidi zeerandi ngonyaka! Omnye umthombo weendaba uthi ihlabathi lichitha imali ephindaphindeka izihlandlo ezingama-50 kwijoni ngalinye ngaphezu kwaleyo liyichithela kumntwana ngamnye wesikolo. Kwakhona, qwalasela ingxelo yeZizwe Ezimanyeneyo ebonisa ukuba ubuncinane ngabantu abangama-450 ezigidi abalambayo ehlabathini jikelele, yaye inani labo liyanda. Enye ingxelo ichaza ukuba “nyaka ngamnye abantu abangama-30 ukusa kuma-40 ezigidi bafa yindlala” kumazwe asakhasayo. Ikwachaza nokuba malunga nesiqingatha sabo bantu bafayo ngabantwana abangaphantsi kweminyaka emihlanu.
6 Igosa laseburhulumenteni kwelinye ilizwe elikhulu kuMzantsi Merika lithi “ama40 ekhulwini kubaphangeli bangamahlwempu ngokupheleleyo.” Kwelinye ilizwe apho, ukunqaba komsebenzi kwisixeko salo esilikomkhulu kuchaphazela abaphangeli abangama-51 ekhulwini. Ingxelo iqukumbela ngokuthi: “Ilizwekazi elinabantu abangama-260 ezigidi lithwaxwa bubunzima obungokoqoqosho kule minyaka ingamashumi amahlanu.” Kwakhona phawula le mixholo mikhulu mithathu evela kumazwe ahlukahlukeneyo: “Ubuhlwempu Kuthiwa ‘Buxhomisa Amehlo.’” “Ubuhlwempu Buyanda.” “Ubuhlwempu Bungamava Abuhlungu.” Ngaba ezi ngxelo zazivela kumazwe asakhasayo? Hayi, zazivela kumagosa aseburhulumenteni eKhanada, eUnited States nakwiRiphabliki yaseJamani. Ewe, kwanamazwe ekuthiwa asebutyebini atyumpatyumpeka kwiingxaki.
7. Kuye kwathethwa ntoni ngolwaphulo-mthetho nogonyamelo oluxhaphake gqitha kwixesha lethu?
7 Kumazwe amaninzi ezi ngxaki zibhencwa kukwanda kolwaphulo-mthetho, ugonyamelo nobugrogrisi. Ngokomzekelo, eUnited States Amaziko Elizwe Okuthintela Izifo athi amaMerika angaphezu kwama-50 000 ayabulawa okanye azibulale nyaka ngamnye! Ngaloo ndlela inqaku lomhleli kwiThe New York Times laqukumbela ngelithi: “Imeko ixakile.” Omnye umhleli wathi: “Eli lixesha lombhodamo wehlabathi.” Ngoko, phezu kwawo nje umgudu weenkulungwane, amava nenkqubela kubugcisa, iinkokeli zehlabathi azikwazi ukulungiselela abantu abaninzi iimfuneko zabo ezisisiseko.
8. Ingxelo engokwembali ingqinela ntoni?
8 Ngokuqinisekileyo, ingxelo yembali yamandulo neyanamhlanje, ingqinela ukuba umntu ngokunokwakhe, akanazo izicombululo. Ubunkokeli beli hlabathi obungokobupolitika, obungokoqoqosho nobungokonqulo abunakuze buzise uxolo, unqabiseko, ulonwabo, impilo nobomi esibufunayo. Ngoko ke, eli hlabathi limele limke! Yaye liza kumka kuba oko koko uYehova anenjongo yako ngalo. Kunjengokuba iBhayibhile isithi: “Kananjalo izembe selibekiwe engcanjini yemithi; ngoko umthi wonke ongavelisi siqhamo sihle, uyagawulwa, uphoswe emlilweni.”—Luka 3:9.
Esinye Isizathu Somgwebo
9. Iinkokeli zehlabathi zizijonga njani ngokuqhelekileyo iinjongo zikaYehova?
9 Isiqhamo esibi esiveliswe leli hlabathi neenkokeli zalo sesinye sezizathu zokuba uYehova elibeke esikalini, walifumana lilula, yaye ke eza kulitshabalalisa. Kodwa sikho nesinye isizathu: Iinkokeli zehlabathi zimshiyile uYehova—uMdali noMongami wendalo iphela—zimkhuphela ngaphandle kumacebo azo. Azinamdla kwaphela kwiinjongo zakhe okanye kumaxesha namathuba akhe. Kungenxa yoko le nto eyokuQala yabasengokuchanileyo isithi ngazo: ‘Obu bulumko akubangakho namnye wabaphathi beli hlabathi ubaziyo.’ Ngaloo ndlela, INdumiso 146:3 isiluleka isithi: “Musani ukukholosa ngamanene, ngonyana womntu, yena ungenalo usindiso.”
10, 11. (a) Yintoni efanele yenziwe ngabo bafuna ukwazi uYehova? (b) Abakhonzi bakaThixo bakwazi njani ukwazi okungaziwayo ngabanye?
10 Kunoko, IMizekeliso 3:5, 6 ibongoza isithi: “Kholosa ngoYehova ngentliziyo yakho yonke, ungayami okwakho ukuqonda. Uze umazi yena ezindleleni zakho zonke; wowulungelelanisa umendo wakho.” Abantu abakwenzayo oku abayi kuhlala bezizibhadubhadu ezingenathemba nezingenakukhanya zeli hlabathi. UYehova uya kubasikelela ngomoya wakhe ukuze bazazi iinjongo zakhe namaxesha kwanamathuba akhe. Njengokuba IZenzo 5:32 zisitsho, uYehova unika umoya wakhe oyingcwele “kwabo bamvayo yena.”
11 Ngoko abakhonzi bakaThixo bazi izinto ezingaziwayo ngabalawuli beli hlabathi. Bayazazi iinjongo zikaYehova namaxesha akhe. EyokuQala kaPetros 1:11 ithi kwixa elidluleyo, abakhonzi bakaThixo “baphengulula ukuba wayesalatha xesha liphi na, linjani na, uMoya.” Eboniswa ngumoya kaThixo, umpostile uPawulos wayenokuthi kubanquli bokwenyaniso abangoowabo: “Silazi nje ixesha eli.” (Roma 13:11) Ekubeni abakhonzi bakaYehova banamhlanje bemthobela njengomlawuli, umoya oyingcwele kaThixo nawo uyabatyhilela ukuba kuxesha lini na ngokwembono yakhe. UAmos 3:7 uthi: “Inene, ayikhe yenze into iNkosi uYehova, ingathanga iluhlakaze ucweyo lwayo kubakhonzi bayo abaprofeti.”
Kusekho Esinye Isizathu
12, 13. Sisiphi esinye isizathu esinamandla esibangela ukuba uYehova alifumanise eli hlabathi neenkokeli zalo zilula?
12 Oku kusizisa kwesinye isizathu sokuba uYehova efumanise eli hlabathi neenkokeli zalo zilula yaye eza kuzitshabalalisa. Khumbula okwenziwa nguFaro, uBhelesbatsare, uHerode nabanye abalawuli kwixesba elidluleyo kubakbonzi bakaYebova. Babachasa, babatshutsbisa bada bababulala. UThixo wabaphendulisa ngaloo nto.
13 Kuyafana nakumhla wethu. Abalawuli abahlukahlukeneyo behlabathi babachasile, babatshutshisa bada bababulala abakhonzi bakaYehova abanoxolo. Abalawuli abanjalo “bathethe amazwi okuchasana nOsenyangweni, . . . bonakalise abangcwele bOsenyangweni.” (Daniyeli 7:25; 11:36) Kodwa ingxelo ephefumlelweyo ekuIsaya 54:17 ithi: “Zonke izixhobo ezikhandelwa ukulwa nawe aziyi kuba nampumelelo . . . Lilo eli ilifa labakhonzi bakaYehova.” Ngenxa yoko, bonke abachasi baya kuthotywa, njengokuba kwaba njalo ngabanye kwixesba elidluleyo. Kwelinye icala, uYehova uthembisa ukusinda nokucbuma kwabantu bakhe.
Ixesha Lokuphela Lisondele
14, 15. (a) Siphila kuliphi ithuba lexesha, yaye ziziphi izilumkiso esifanele sizithobele? (b) Phezu kwayo nje nayiphi imigudu yeenkokeli zehlabathi, yintoni eza ngokukhawuleza?
14 Ngoko, kuxesha lini na ngokwembono kaThixo? Lixesha lokupheliswa kweli hlabathi. Ilanga lalo liyatshona. Ubusuku balo bungena ngokukhawuleza. Ubusika balo abufikanga bugalelekile. Bonke ubungqina obuzalisekisa isiprofeto seBhayibhile nocwangciso lukaYehova Iwexesha bubonisa ukuba siphila ‘kwimihla yokugqibela, yokupheliswa kwale nkqubo yezinto.’ (2 Timoti 3:1-5; Mateyu 24:3-14) Ngaloo ndlela kufuneka sisithabathele entliziyweni isilumkiso sikaYesu esithi: “Thandazani ke, ukuba intsabo yenu ingabi khona ebusika.” (Mateyu 24:20) Xa ubusuku, okanye ubusika beli hlabathi bufika, liya kuba lingasekho ixesha lokufuna inkoliseko kaYehova.
15 Ixesha lokupheliswa kweli hlabathi lidel’ uThixo liza ngokukhawuleza. Xa lifika, uYehova uya kubashenxisa ngetshova bonke abalawuli behlabathi abasesihlalweni. Nokuba bebezimisele kangakanani na, amacebo abo angenasiqhamo nanganiki themba aya kuphelelwa. Kuyinyaniso ukuba, abalawuli banokuzama ukuvuyisa abantu babo ngezivumelwano zokunqumamisa izixhobo nangamacebo awahlukeneyo oxolo nokunqaba, bethembisa ‘nangeminyaka engcwele.’ Kodwa ukugidimela kwidabi lemfazwe yokugqibela kaThixo eArmagedon kuqhubeka ngamandla.—ISityhilelo 16:13-16.
16. UYehova ulunike bani ulawulo Iwehlabathi?
16 Kwakhona, khumbula ukuba uYehova ‘akaguzuli nje ookumkani’ kodwa kwakhona ‘umisa ookumkani.’ (Daniyeli 2:21) Imikhosi yasezulwini eza kusetyenziswa nguYehova ukuphumeza imigwebo yakhe eArmagedon iya kukhokelwa nguMlawuli ‘ammisileyo’ emhlabeni wonke. Loo Mlawuli nguNyana wakhe othembekileyo, uKristu Yesu, ngoku osegunyeni nakuzuko lwasemazulwini. ISityhilelo 19:16 simbiza ngokuthi “uKumkani kakumkani, uNkosi kankosi.” UDaniyeli 7:14 uthi: “Wanikwa igunya, nobuhandiba, nobukumkani, ukuze zonke iintlanga, nezizwe, neelwimi, zimbuse; igunya lakhe ligunya elingunaphakade, elingapheliyo; ubukumkani bakhe bobungayi konakaliswa.”—Bona kwanoDaniyeli 2:44.
17, 18. (a) ILizwi likaThixo lithi kuza kwenzeka ntoni kwabo bangamgqaliyo yena noMlawuli wakhe womhlaba omiselweyo? (b) Ngubani omnye owaziyo ukuba akusekho xesha lininzi liseleyo?
17 Ngentetho elula iLizwi likaThixo lesiprofeto lichaza okuza kwenzeka kwabo balayo ukwamkela uYehova nomLawuli wakhe omiselweyo womhlaba wonke. Lithi: “Ndabona sithunywa sithile sasezulwini, simi elangeni; sadanduluka ngezwi elikhulu, sisithi kuzo zonke iintaka eziphaphazelayo esazulwini sezulu, Yizani nizihlanganisele esidlweni sikaThixo omkhulu; ukuze nidle inyama yookumkani, nenyama yabathetheli-waka, nenyama yamagorha, nenyama yamahashe, neyabakhweli bawo, nenyama yabo bonke abakhululekileyo nabangamakhoboka, neyabancinane neyabakhulu.”—ISityhilelo 19:17, 18.
18 Oku uYeremiya 25:33 ukuchaza ngale ndlela: “Ababuleweyo nguYehova ngaloo mini, bathabathele ekupheleni kwehlabathi, bese ekupheleni kwehlabathi, bangambanjazelelwa, bangahlanganiswa, bangangcwatywa; baya kuba ngumgquba phezu komhlaba.” Ewe, liyaphela ixesha layo yonke inkqubo yezinto eyonakeleyo kaSathana. Naye uyakwazi oku! ISityhilelo 12:12 sichaza ukuba uyazi ukuba “ixesha analo lincinane.”
Funa UYehova Ngoku
19. Nguwuphi umhla nethuba elichwayitisayo eliya kuqalisa emva kokuba le nkqubo iphelisiwe?
19 Xa ubusuku, okanye ubusika, benkqubo kaSathana budlulile, kuya kwenzeka ntoni? Kuya kwandula ke kube lixesha likaYehova lokungenisa usuku olutsha oluqaqambileyo, ixesha elitsha lentwasahlobo elichwayitisayo. Kuya kuba lixesha lokuqalisa kwenkqubo entsha kaYehova phantsi kolawulo loKumkani wakhe wasemazulwini, uKristu Yesu. Kuloo nkqubo intsha, ugonyamelo, okungekho sikweni, ukubandezeleka, ukugula nokufa azisayi kubakho. Abantu baya kuphakanyiselwa emfezekweni, bejonge kubomi obungunaphakade. Enjani yona ukuhlaziya imbono!—INdumiso 37:10, 11, 29; ISityhilelo 21:4.
20, 21. Amanani amakhulu abantu bazo zonke iintlanga bamfuna njani uYehova ngoku?
20 Phofu ke, ngaphambi kokuphela kwale nkqubo nokuqalisa kwenkqubo entsha, kulithuba likaYehova lokubenzela into ebaluleke gqitha abalulamileyo bomhlaba. Lithuba lakhe lokuhlanganisa abo bafuna ukufunda ngaye, abavumayo ukuzithoba ekuthandeni kwakhe nabaya kuqubuda kuKumkani onyulwe nguye. Ngokwenza oku, bazifaka kwinkuselo kaYehova eyile: “Yinqaba ende eliqele igama likaYehova; ilungisa ligidimela kulo, libe sengxondeni.”—IMizekeliso 18:10.
21 Namhlanje, amanani amakhulu abantu enza oku—enyanisweni, bazizigidi. Baphuma kuzo zonke iintlanga zomhlaba. Aba bachazwa kuZekariya isahluko 8, indinyana 20, neyama-21 ngokuthi: “Utsho uYehova wemikhosi ukuthi, Kusaya kuza izizwe, nabemi bemizi emininzi. Baya kuhamba abemi bomnye baye komnye, bathi, Masihambe siye kumbongoza uYehova, simquqele uYehova wemikhosi.” yongezelela isithi: “Ngezo mini [ewe, ngexesha lethu] aya kuthi abambe amadoda alishumi aseziIwimini zonke zeentlanga, abambe esondweni lengubo yendoda engumYuda [abanquli bakaYehova abathanjisiweyo], athi, Siya kuhamba nani, ngokuba sivile ukuba uThixo unani.”
22. Simele sixabise size senze ntoni ukuba sifuna ukusinda kwimini yomsindo kaYehova?
22 Ngoko ke, nqula uYehova nabantu bakhe uze kwindawo yakhe yonqabiseko. Yiba nenxaxheba kowona msebenzi ubalulekileyo owenziwayo emhlabeni namhlanje—ukuhlanganiswa nokuqeqeshwa kwabo baya kusinda eArmagedon nabaya kuba nethemba elimangalisayo lokwenza umhlaba ube yiparadisi nokuphila kuyo ngonaphakade. Kuxabise oko amaxesha namathuba akuko uze wenze okubongozwa nguIsaya 55:6 othi: “Funani uYehova esenokufunyanwa; mbizeni esekufuphi.” Ewe, “funani uYehova, nina balulamileyo belizwe, bakwenzileyo okusesikweni kwakhe; funani ubulungisa, funani ululamo, mhlawumbi nositheliswa ngemini yomsindo kaYehova.”—Zefaniya 2:3.
Imibuzo Yempinda
◻ Abalawuli behlabathi bafunyaniswe ‘belula’ ngayiphi indlela nguThixo?
◻ Kutheni le nto abakhonzi bakaYehova bewazi amaxesha namathuba Akhe ngoxa abalawuli behlabathi bengawazi?
◻ Kutheni le nto abalawuli behlabathi befanelwe ngumgwebo kaThixo oqatha?
◻ Ngokwembono kaYehova liliphi ixesha nethuba eselifikile?
◻ Kutheni yaye kukanjani esinokumfuna ngoku uYehova?
[Umfanekiso okwiphepha 18]
Abantu abaninzi ngoku abaqhelisela ukholo baya kusinda ekuphelisweni kweli hlabathi