“Izinto Ezityhilekileyo Zezethu”
“Izinto ezisitheleyo zezikaYehova uThixo wethu; izinto ezityhilekileyo zezethu.”—DUTERONOMI 29:29
1, 2. (a) Kutheni uluntu luzifuna kangaka nje iinyaniso ezityhilekileyo zikaYehova? (b) Simele sibe yintoni isimo sethu sengqondo ngolwazi uYehova alwenze lwafumaneka kuthi?
UKUBA umntu uzifumana ekwithafa elinezigcayiseli kodwa enemaphu ebonisa umendo phakathi kwezo zigcayiseli zeziqhushumbisi, unokuyithelekelela na indlela ebeya kuyifundisisa ngenyameko ngayo loo maphu aze alandele lonke ulwalathiso lwayo? Okanye cinga ngothile ova ubuhlungu ngenxa yesifo esinganyangekiyo. Unokuwuthelekelela na umdla wakhe wenene ekulandeleni zonke iinkqubo zonyango zakutshanje ezinikela ithemba lokuphila ekugqibeleni? Kaloku, isibakala esilusizi sesokuba sikuzo zombini ezi meko. Siphila kwihlabathi elizaliswe yimigibe nezabatha ezinokusitshabalalisa. Yaye siyafa sisifo esinganyangekiyo soluntu sokungafezeki okuzuzw’ ilifa. (1 Yohane 2:15-17; Roma 7:20, 24) NguThixo kuphela onokusinceda siqonde le migibe size siyiphephe, yaye nguye kuphela onokunyanga ukungafezeki kwethu.
2 Kwakhona kungenxa yoko le nto umbhali ophefumlelweyo wencwadi yeMizekeliso walulekayo esithi: “Thoba indlebe yakho, uve amazwi ezilumko, uyibhekise intliziyo yakho ekwazini kwam.” (IMizekeliso 22:17) Ngokufanayo, kwiMizekeliso 18:15 sifunda oku: “Intliziyo yonengqondo irhweba ukwazi; nendlebe yezilumko ifuna ukwazi.” Asinakulunikel’ umva naluphi na ulwazi uYehova alwenze lwafumaneka.
Iimfihlelo ZikaYehova Ezityhilekileyo
3. Ziziphi iinyaniso ezingenjongo yakhe uYehova awazityhila kuAdam noEva?
3 Okonwabisayo kukuba, uYehova uye waba ngonobubele gqitha ekutyhileni ulwazi. Ukususela kwixesha lendalo, uThixo ngokuthe ngcembe unike abanquli bakhe yonke inkcazelo efunekayo kubo phantsi kweemeko ezahlukahlukeneyo. (IMizekeliso 11:9; INtshumayeli 7:12) Ekuqaleni, wacacisa ukuba umhlaba nezilwanyana ezikuwo zaziya kuba phantsi kuka-Adam noEva kwanenzala yabo. (Genesis 1:28, 29) Noko ke, uSathana waphembelela uAdam noEva ukuba bone, yaye kwaba nzima ukubona indlela injongo yobuthixo eyayinokuphunyezwa ngayo ukusa kuzuko lukaThixo. Noko ke, ngokukhawuleza, uYehova waqalisa ukuyicacisa imicimbi. Watyhila ukuba, ekuhambeni kwexesha, kwakuya kuvela inzala yobulungisa, okanye “imbewu,” eyayiya kuyiphelisa imisebenzi kaSathana nabalandeli bakhe.—Genesis 3:15.
4, 5. Ziziphi iinyaniso ezingakumbi uYehova awazityhilayo, yaye ingoobani imijelo awayeyisebenzisa?
4 Amadoda nabafazi aboyik’ uThixo bamele babe nemibuzo emininzi ngaloo Mbewu. Yayiya kuba ngubani? Yayiya kufika nini? Lwaluya kungenelwa njani uluntu ngayo? Njengoko iinkulungwane zazihamba, uYehova watyhila iinyaniso ezingakumbi ngeenjongo zakhe, yaye ekugqibeleni wayiphendula yonke le mibuzo. Ngaphambi koNogumbe, waphefumlela uEnoki ukuba aprofete ngentshabalaliso ezayo yembewu kaSathana. (Yuda 14, 15) Malunga nama-2 400 eminyaka ngaphambi kweXesha lethu Eliqhelekileyo, watyhilela uNowa ukuba ubomi negazi lomntu zazingcwele—inyaniso eyayiya kuba yebaluleke ngokuyintloko xa iMbewu ethenjisiweyo ifika.—Genesis 9:1-7.
5 Ngemva komhla kaNowa, uYehova watyhila ulwazi olubalulekileyo ngabanye oosolusapho abathembekileyo. Kwinkulungwane yama-20 B.C.E., uAbraham waqonda ukuba iMbewu ethenjisiweyo yayiya kuba ngomnye wenzala yakhe. (Genesis 22:15-18) Eli dinga laba lelixabiseke kunene kunyana ka-Abraham uIsake nakumzukulwana wakhe uYakobi (kamva owabizwa ngokuba nguSirayeli). (Genesis 26:3-5; 28:13-15) Emva koko, ngoYakobi, uYehova watyhila ukuba le Mbewu, “uShilo,” yayiya kuba ngumlawuli onamandla ozelwe kumnombo wonyana wakhe uYuda.—Genesis 49:8-10.
6. Kwinkulungwane ye-16 B.C.E., ngoobani ababa ngumjelo ‘wezinto ezityhilekileyo,’ yaye ziziphi ezinye zezinto ezintsha abazifundayo?
6 Kwinkulungwane ye-16 B.C.E., uYehova wabumba abantwana bakaSirayeli baba luhlanga. Ukutyhileka okuqhubekayo kwenyaniso kwakuya kuba kokoobani? UMoses wawuphendula lo mbuzo ngala mazwi awawabhekisa kolo hlanga luncinane: “Izinto ezisitheleyo zezikaYehova uThixo wethu; izinto ezityhilekileyo zezethu nezoonyana bethu kude kuse ephakadeni.” (Duteronomi 29:29) Ewe, emva kokuzalwa kwalo ngowe-1513 B.C.E., uhlanga lwakwaSirayeli lwaba ngumjelo ‘ophathiswe izihlabo ezingcwele zikaThixo.’ (Roma 3:2, NW) Yaye onjani umkhukula wezihlabo owawunguwo! UThixo wathabathela amaSirayeli kumnqophiso woMthetho, owabangela kwaba nokwenzeka ukuba abe luhlanga lwababingeleli nookumkani. (Eksodus 19:5, 6) UMthetho wawuquka umyalelo wokuziphatha owawubanceda ukufanisa baze baphephe izibatha zesono yaye wawukwaquka nenkqubo yamadini ekwakusetyenziswa kuyo igazi lezilwanyana elingcwele ukugubungela izono zabo ngendlela efuziselayo.
7, 8. (a) Yiyiphi inkcazelo eyongezelelekileyo uYehova awayityhilayo ngeMbewu ezayo? (b) “Izinto ezityhilekileyo” zalondolozwa njani, yaye ngubani owatyhila ulwazi olufanelekileyo lwezinto ezinjalo?
7 Njengoko ixesha lalihamba, uYehova watyhila iinyaniso ezingakumbi ngale Mbewu. Ngomdumisi, uThixo watyhila ukuba iintlanga zaziya kuyichasa iMbewu yakhe kodwa watyhila nokuba le Mbewu yayiya koyisa ngoncedo lukaYehova. (INdumiso 2:1-12) Ngolsaya, watyhila ukuba iMbewu yayiya kuba “nguMthetheli woxolo” kodwa kwakhona watyhila nokuba yayiya kuva ubunzima ngenxa yezono zabanye. (Isaya 9:6; 53:3-12) Kwinkulungwane yesibhozo Ngaphambi kweXesha Eliqhelekileyo, uYehova wade watyhila nendawo eyayiza kuzalelwa kuyo le Mbewu yaye, kwinkulungwane yesithandathu Ngaphambi kweXesha Eliqhelekileyo, watyhila ucwangciso lwexesha lobulungiseleli bayo.—Mika 5:2; Daniyeli 9:24-27.
8 Ekugqibeleni, “izinto ezityhilekileyo” zabhalwa kwiincwadi ezingama-39 zeZibhalo zesiHebhere. Kodwa kwiimeko ezininzi, elo yayilinyathelo nje lokuqala. Ngokufuthi izinto ezabhalwayo kwakunzima ukuziqonda, kwanangabo babesetyenziswa ukuzibhala! (Daniyeli 12:4, 8; 1 Petros 1:10-12) Noko ke, xa ekugqibeleni ukukhanya kwafikayo, akuzange kuxhomekeke kwingcaciso yomntu. Njengakwimeko yamaphupha esiprofeto, ‘izityhilelo zezikaThixo.’—Genesis 40:8.
Umjelo Omtsha
9. Kwakutheni ukuze uSirayeli wokwenyama aphulukane nelungelo lokuba ngumjelo ‘wezinto ezityhilekileyo,’ yaye kwenzeka nini oku?
9 Xa uYesu Kristu wayesemhlabeni, uSirayeli wayesengumjelo kaThixo. Nabani na owayenqwenela ukukhonza uYehova kwakufuneka enjenjalo ngokunxulumana nohlanga lwakhe olunyuliweyo. (Yohane 4:22) Kodwa uMoses wayebonisile ukuba ilungelo lokuba ngamagosa ‘ezinto ezityhilekileyo’ lalikwazisa iimbopheleleko. Wathi: “Izinto ezityhilekileyo zezethu, nezoonyana bethu kude kuse ephakadeni [kwixesha elingenamda, NW], ukuze siwenze onke amazwi alo myalelo.” (Duteronomi 29:29) Elo ‘xesha lingenamda’ laphela ngowama-33 C.E. Ngoba? Ngenxa yokuba, njengohlanga, amaYuda asilela ‘ukuphumeza onke amazwi omyalelo.’ Ngokukhethekileyo, akazange ayamkele iMbewu, uYesu Kristu, nakubeni uMthetho,ngokungathi kunjalo, ‘wawungosikhaphela kuKristu.’ (Galati 3:24) Ngenxa yoku kusilela, uYehova wanyula omnye umjelo ‘wezinto ezityhilekileyo.’
10. Wawuyintoni umjelo omtsha weenyaniso zikaYehova ezityhiliweyo?
10 Waba yintoni lo mjelo mtsha? UPawulos wawuchaza kumaEfese xa wabhala ukuba “babaziswe ngalo ibandla ubulumko bukaThixo, obuziintlobo ezininzi, ngokokwengqibo yakhe yasemaphakadeni, awayenzayo kuKristu Yesu, iNkosi yethu.” (Efese 3:10, 11) Ewe, yayilibandla lobuKristu, elazalwa ngePentekoste yowama-33 C.E., elaliphathiswe “izinto ezityhilekileyo” ezintsha. Njengeqela, amaKristu athanjisiweyo akhonza ‘njengomkhonzi othembekileyo noqondayo’ omiselwe ukuba alungiselele ukutya kokomoya ngexesha elifanelekileyo. (Mateyu 24:45) Ngoku amaKristu ‘ayengamagosa ezihlabo ezingcwele zikaThixo.’—1 Korinte 4:1.
11, 12. Ziziphi ezinye zeenyaniso ezimangalisayo ezatyhilwa ngalo mjelo mtsha?
11 Isibakala esibalulekileyo sezi ‘zihlabo zingcwele’ nezitsha yayisesokuba uYesu Kristu, iMbewu ethenjisiweyo, wayebonakele. (Galati 3:16) UYesu ‘wayenguShilo,’ lowo unelungelo lokulawula uluntu, yaye uYehova wammisela wanguKumkani woBukumkani obabuya kuthi ekugqibeleni bubuyisele iParadisi kulo mhlaba. (Isaya 11:1-9; Luka 1:31-33) Kwakhona uYesu waba nguMbingeleli Omkhulu omiselwe nguYehova, owanikela ubomi bakhe obucocekileyo nobufezekileyo njengentlawulelo yoluntu—okona kusebenza kumangalisayo komgaqo wobungcwele begazi. (Hebhere 7:26; 9:26) Ukususela ngoko ukusa phambili, uluntu olukholwayo lwaba nethemba lokuphinda luzuze obo bomi bobuntu obufezekileyo balahlwa nguAdam.—1 Yohane 2:1, 2.
12 Le Mbewu ithenjisiweyo yayikwangumlamli, owabangela ukuba kusebenze umnqophiso omtsha phakathi kwabalandeli bayo noYise wasezulwini, mnqophiso lowo owawuthabathel’ indawo umnqophiso omdala woMthetho. (Hebhere 8:10-13; 9:15) Ngokwesi sizinzi salo mnqophiso mtsha, ibandla lamaKristu elisandul’ ukuyilwa lathabathel’ indawo uhlanga loSirayeli wokwenyama, lisiba nguSirayeli wokomoya, ‘imbewu ka-Abraham’ yokomoya kunye noYesu, yaye lisiba ngamagosa ‘ezinto ezityhilekileyo.’ (Galati 3:29; 6:16; 1 Petros 2:9) Ngaphezu koko iintlanga zamenyelwa ukuba yinxalenye yaloo Sirayeli mtsha wokomoya—nto leyo amaYuda ayengayicingi nokuyicinga! (Roma 2:28, 29) Bebonke, amaYuda namaSirayeli okomoya angemaYuda athunywa ukwenza abafundi bakaYesu kuwo wonke umhlaba. (Mateyu 28:19, 20) Ngaloo ndlela, “izinto ezityhilekileyo” zaqalisa ukufikelela kwizizwe ngezizwe.
13. Izizukulwana ezilandelayo zazilondolozelwa njani ezi “zinto zityhilekileyo” zintsha?
13 Ekuhambeni kwexesha, ezi ‘zinto zityhilwe’ ngebandla lamaKristu zabhalwa kwiincwadi ezingama-27 zeZibhalo zamaKristu zesiGrike ezaphelelisa iBhayibhile ephefumlelweyo. Kodwa kwakhona, kwezi ncwadi kwakukho iziprofeto ezininzi ezingenjongo kaYehova eyayiya kuqondwa ngokupheleleyo kwiinkulungwane ezininzi kamva. Kwakhona, ababhali bezi Zibhalo ngokwenyaniso babelungiselela izizukulwana ezazingekazalwa.
“Izinto Ezityhilekileyo” Namhlanje
14. Emva kowexuko olukhulu, uYehova wayeya kukukhanyisa nini kwakhona ukukhanya ‘kwizinto ezityhilekileyo’?
14 Emva kokufa kwabapostile, uwexuko olukhulu lwavela phakathi kwamaKristu azibabazayo, njengoko kwakuprofetiwe. (Mateyu 13:36-42; IZenzo 20:29, 30) Kwalandela iinkulungwane ezininzi ekwathi ebudeni bazo ukuqondwa ‘kwezinto ezityhilekileyo’ kwaya kufiphala ngokufiphala, nangona uYesu engazange abashiye abo babezama ukuhlala bethembekile. (Mateyu 28:20) Noko ke, uYesu wayethembise ukuba le meko yayingayi kuhlala ikho ngonaphakade. Ekuphelisweni kwale nkqubo yezinto, abangendawo namalungisa kwakhona babeya kwahlulwa ngokubonakalayo, yaye ‘amalungisa ayeya kubengezela njengelanga ebukumkanini boYise wawo.’ (Mateyu 13:43) Kanye njengokuba uDaniyeli wayeprofetile, ‘kwixesha lokuphela, ulwazi oluyinyaniso lwaluya kwanda.’ (Daniyeli 12:4) Kwakhona ukukhanya kwakuya kubengezela ‘kwizinto ezityhilekileyo.’
15. Kutheni iinkonzo zeNgqobhoko zingqineke zingakufanelekelanga ukukhonza njengomjelo wokuqondwa kwakutshanje ‘kwezinto ezityhilekileyo’?
15 Ukususela ngowe-1914, besiphila kwixesha lokupheliswa kwale nkqubo yezinto. Ngenxa yoko, kubalulekile ukwazi lowo uYehova amsebenzisayo namhlanje njengomjelo wokukhanya okutsha kokomoya. Ngokuqinisekileyo, akasebenzisi iinkonzo ezimiselweyo zeNgqobhoko. Ezi zingqineke zingenamdla wokushenxisa iimfundiso eziphosakeleyo ezafumba ebudeni bowexuko olukhulu. Namhlanje, inkoliso yeenkokeli zazo zisabambelele kwizithethe nakwizivumo zokholo kangangokuba aziluqondi ulwazi olutsha, okanye zichatshazelwe gqitha ngamathandabuzo kangangokuba zithandabuza kwanokuphefumlelwa kweBhayibhile nokusebenza kwemilinganiselo yayo yokuziphatha.
16. Ngoobani abagqineke bengumjelo kaYehova wanamhla?
16 UYesu wathi uBukumkani bukaThixo babuya kushenxiswa kumaYuda buze “bunikwe uhlanga oluzivelisayo iziqhamo zabo.” (Mateyu 21:43) Kwinkulungwane yokuqala, olu hlanga lwangqineka lulibandla elincinane lamaKristu oSirayeli wokomoya. Namhlanje, linye kuphela iqela elivelisa iziqhamo ezifana nezo zebandla lokuqala. La maSirayeli okomoya angamalungu odidi ‘lomkhonzi othembekileyo noqondayo’ kaMateyu 24:45-47. NjengamaKristu okuqala, la maKristu anamhlanje akoyikanga ‘ukukhanyisa ukhanyiselo lwawo.’ (Mateyu 5:14-16) Ukususela ngowe-1919, ngenkalipho aqalisa umsebenzi wokushumayela iindaba ezilungileyo zoBukumkani kuwo wonke umhlaba ukuze zibe bubungqina. (Mateyu 24:14) Ekubeni eye avelisa iziqhamo zoBukumkani bukaThixo, uYehova uwasikelele ngokutyebileyo ngokuwenza abazi ‘ubulumko bukaThixo, obuziintlobo ezininzi.’—Efese 3:10.
17, 18. Kukuphi ukuqonda okuqhubekayo uYehova akwenzileyo ngomjelo wakhe wanamhla?
17 Ngaloo ndlela, ngowe-1923 isiprofeto sikaYesu esikhulu esingezimvu neebhokhwe saqondwa ngokufanelekileyo, yaye kwaqondwa ukuba ihlabathi lonke lalisahlulwa. (Mateyu 25:31-46) Ngowe-1925 abakhonzi bakaThixo basemhlabeni bafumana ulwazi oluchanileyo lweSityhilelo isahluko 12 yaye bakuqonda ngokuchanileyo oko kwenzeka ngonyaka ophawulekayo we-1914. Ngowe-1932 ulwazi lwabo lwenziwa nzulu ngakumbi. UYehova watyhila ukuba iziprofeto ezazingokubuyiselwa kwamaYuda eYerusalem zazingabhekiseli kuSirayeli wenyama, owathi ukususela kudala wangqineka engathembekanga yaye elahliwe, kodwa kunoko zazibhekisela kuSirayeli wokomoya, ibandla lamaKristu. (Roma 2:28, 29) Ngoko, ngowe-1935 ulwazi olulungisiweyo lombono kaYohane ‘ongesihlwele esikhulu’ kwiSityhilelo isahluko 7 lwavula amehlo abathanjiswa ukuba babone umsebenzi omkhulu wokuhlanganisa owawusengaphambi kwabo.—ISityhilelo 7:9-17.
18 Oku kwabangela ulwando kumsebenzi wokushumayela zwenibanzi, njengoko ukuhlanganiswa ‘kwezinto ezisemhlabeni’ ekugqibeleni kwakuqhubeka ngenene. (Efese 1:10) Ngowe-1939, njengoko elaseYurophu laligutyungelwe ngamafu emfazwe, imbambano yobundilele yenziwa yacaca ngakumbi kunangaphambili. Ngowe-1950 “abathetheli” bakaIsaya 32:1, 2 bafaniswa ngokuchane ngakumbi. Ngowe-1962 ukufaniswa okuchanileyo ‘kwamagunya awongamileyo’ nolwalamano olufanelekileyo lomKristu kuwo kwaqondwa ngokucace ngakumbi ngokuphuma ‘kwizinto ezityhilekileyo.’ (Roma 13:1, 2) Yaye ngowe-1965 lwaqondwa ngokuchane ngakumbi uvuko lwasemhlabeni nabo bangenelwayo lulo.—Yohane 5:28, 29.
19. Udidi ‘lomkhonzi’ kaYehova lungqineke njani namhianje lungabakhuseli abafanelekileyo beLizwi likaThixo?
19 Ukongezelela koku, ibandla lamaKristu athanjisiweyo kule nkulungwane yama-20 liye langqineka lingabakhuseli abafanelekileyo beLizwi likaThixo, incwadi ebhaliweyo ‘yezinto ezityhilekileyo.’ Amalungu angabameli beli bandla aqalisa ukuguqulela iBhayibhile eyisa kwisiNgesi sanamhlanje, yaye, ukuza kuthi ga namhlanje, iNew World Translation of the Holy Scriptures iye yabonakala ngeelwimi ezili-11, kushicilelwe nemibhalo engama-40 000 000. Olu didi ‘lomkhonzi’ lwamaKristu athanjisiweyo lukwakhokela kucwangciso lokufundisa lwezizwe ngezizwe yaye lupapasha iincwadi zesikhokelo namaphephancwadi asekelwe eBhayibhileni. Lulungelelanisa iintlanganiso zeeveki ngeeveki, iindibano ezithe rhoqo, nezikolo ezahlukahlukeneyo—zonke ziyilelwe ukunceda abafuni benyaniso ukuba bazuze ulwazi oluchanileyo ‘lwezinto ezityhilekileyo.’ Enyanisweni, ngoku ‘amalungisa abengezela njengelanga’ ngokwengqiqo yokomoya, ezingqina ebufanelekele ubugosa bawo.—Mateyu 13:43.
Imbopheleleko Yethu
20, 21. (a) Umdumisi washukunyiswa njani ukuba asabele kwiLizwi likaYehova elityhiliweyo? (b) Yiyiphi imicimbi eya kuxutyushwa kwinqaku elilandelayo?
20 Ngoko uYehova akasishiyanga sixakiwe kwithafa elinezigcayiseli zeli hlabathi. Kunoko, usinike iLizwi lakhe ukuba likhanyise umendo wethu lize lisincede siphephe ingozi yokomoya. (INdumiso 119:105) UYehova akasishiyelanga ukuba sife ngenxa yesono nokungafezeki. Kunoko, uye wasivulela ithuba lobomi obungunaphakade kumhlaba oyiparadisi yaye wenze ulwazi olungeli thuba lwafumaneka ngokukhawuleza. (Yohane 17:3) Akumangalisi ukuba umdumisi, ethetha ‘ngezinto ezatyhilekayo’ ngomhla wakhe, abe wadanduluka wathi: “Hayi, ukuwuthanda kwam umyalelo wakho! Imini le yonke ndiyacamngca ngawo.”—INdumiso 119:97.
21 Ngaba le yindlela ovakalelwa ngayo ‘ngezinto ezityhilwe’ nguYehova neziqondwayo kumhla wethu? Ngaba uzixabisa ngokunzulu iinyaniso ozifundileyo? Ngaba uyakubona ukufuneka kwezi nyaniso ekukuncedeni ukuba wenze izigqibo, uphephe izilingo yaye ukhonze uYehova? Lingakanani ixesha olichithela ekuleseni ngokoqobo nasekufundisiseni ezi “zinto zityhilekileyo”? Ngaba kukho nayiphi na indlela onokuphucula ngayo indlela olwenza ngayo ufundisiso? Le micimbi iya kuxutyushwa kwinqaku elilandelayo.
Uyakhumbula Na?
◻ Ngaphambi kwexesha likaYesu, yayiyintoni eminye imijelo ‘yezinto ezityhilekileyo’?
◻ Emva kowama-33 C.E. “izinto ezityhilekileyo” yayizezoobani?
◻ Ziziphi ezinye zeenyaniso ezibalulekileyo ezatyhilwa ngalo mjelo mtsha?
◻ Kutheni le nto “izinto ezityhilekileyo” zimele ukuba zezoSirayeli wokomoya namhlanje?
◻ Ibandla lamaKristu athanjisiweyo lingqineke njani lingabakhuseli abafanelekileyo beLizwi likaThixo?
[Amagama acatshuliweyo akwiphepha 12]
Ibandla lamaKristu athanjisiweyo laba ngabakhuseli abatsha beenyaniso zikaYehova ezityhilekileyo
[Amagama acatshulweyo akwiphepha 13]
Udidi ‘lomkhonzi’ kaYehova wamangqina athanjisiweyo lusebenze kakuhle njengabakhuseli beLizwi likaThixo
[Umfanekiso okwiphepha 10]
UYehova watyhila ulwazi olubalulekileyo ngamadoda athembekileyo akudala