Yintoni Na Eya Kukwahlula Eluthandweni LukaThixo?

“Kuba ndeyisekile kukuba nakufa, nabomi, nazithunywa zezulu, nazilawuli, naziphathamandla, nanto zikhoyo, nanto zizayo, nabuphakamo, nabunzulu, nasinye isidalwa esisimbi, asiyi kuba nako ukusahlula thina eluthandweni lukaThixo, olukuye uKristu Yesu, iNkosi yethu.”—ROMA 8:38, 39.

1. Ziziphi iindlela uthando lukaThixo olubonakaliswa ngazo mihla le?

UTHIXO uluthando. Oku kubonakaliswa kuthi imihla ngemihla ngeendlela zokuzimasa ubomi. Umoya esiwuphefumlayo, amanzi esiwaselayo, ukutya esikudlayo—konke kuza njengezinto ezibonakalisa uthando lukaThixo. Ngaphezu koko, zifikela abalungileyo nababi ngokufanayo, enoba bayazixabisa ezi zinto okanye abazixabisi. UYesu wakungqinela oku xa wathetha oku ngoYise wasezulwini: “Ilanga lakhe [ulenza] liphume phezu kwabakhohlakeleyo nabalungileyo; nemvula eyinisa phezu kwabalungisayo nabangalungisiyo.” (Mateyu 5:45) Sonke isidalwa esiphilileyo emhlabeni sifanele simbulele uThixo ngokuzinyaswa kwaso.—INdumiso 145:15, 16.

2. Lwabonakaliswa njani uthando lukaYehova olukhulu ngoluntu, yaye uYesu wakubonakalisa njani ukukuxabisa kwakhe ukuthanda kukaYehova?

² Ukuthanda kukaThixo izidalwa ezingabantu kwadlulela ngaphaya kokuzimasa nje obu bomi bubunayo njengentyatyambo yaye bomayo njengengca. (1 Petros 1:24) Uluntu walenzela ilungiselelo lokuphila ngonaphakade: “Wenjenje uThixo ukulithanda kwakhe ihlabathi, ude wancama uNyana wakhe okuphela kwamzeleyo, ukuze bonke abakholwayo kuye bangatshabalali, koko babe nobomi obungunaphakade.” (Yohane 3:16) Eli lungiselelo lenziwa ngendleko enkulu kuYise nakuNyana. EGetsemane ngobusuku bangaphambi kokufa kwakhe, uYesu wawa emhlabeni waza wathandaza esekungcungcuthekeni kangangokuba “ukubila kwakhe kwanga kungamathontsi amakhulu egazi, esiwa emhlabeni.” Ngeli thuba loxinezeleko, uYesu wayecinga ngehlazo elaliziswe kwigama likaThixo, yaye wade wacela nokuba indebe idluliswe. Kodwa wongezelela oku: “Noko ke makungabi kokuthandwa ndim, makube kokuthandwa nguwe.” (Luka 22:44; Marko 14:36) Nakubeni uYesu wayengcungcutheke gqitha, ukuthanda kukaYehova kwakusiza kuqala kuye. Nokwazi ukuba wayeza kubethwa yaye eza kufa ngokuthe ngcembe ngokubethelelwa kumthi wentuthumbo kwakungenakumahlula eluthandweni lukaThixo.

3. Ngawaphi amazwi kaPawulos amaNgqina kaYehova namhlanje awathabatha njengawawo, yaye ngayiphi imiphumo kuwo?

³ Kwakhona ukuthanda kukaYehova kuza kuqala kumaNgqina kaYehova namhlanje ahamba emanyathelweni kaYesu. Esamkela amazwi ompostile uPawulos, athi: “Ukuba uThixo ungakuthi, ngubani na ongasichasayo? Ngubani na oya kusahlula eluthandweni lukaKristu? Yimbandezelo na, luxinaniso na, yintshutshiso na, yindlala na, bubuze na, yingozi na, likrele na? Kanti ke kwezo zinto zonke, sisuka soyise sigqithisele, ngaye owasithandayo.” (Roma 8:31, 35, 37) Ebudeni bale nkulungwane amaNgqina kaYehova aye ahlaselwa ngamahlokondiba, abethwa, adyojwa ngetela aza afakwa iintsiba, enzakaliswa emzimbeni, adlwengulwa, abulawa ngendlala, abulawa ngamajoni adubulayo yaye kwiikampu zoxinaniso zamaNazi ade anqunyulwa iintloko—konke ngenxa yokwala kwawo ukuzahlula eluthandweni lukaThixo.

4. Uchukunyiswa njani kukwala komnye umfana ukuzahlula eluthandweni lukaThixo?

⁴ Kwiminyaka engamashumi amane anesine eyadlulayo, umfana olelinye lamaNgqina kaYehova, wabhalela abazali bakhe ekwikampu yoxinaniso yamaNazi, esithi, ngokuyinxenye:

“Ngoku yintsimbi yesi-9 entloko kusuku lwetyala lam, kodwa kusafuneka ndilinde de kube li–11:30. Le leta ndiyibhala ndikwisisele sentolongo kwinkundla yomkhosi. Ndinoxolo, ekunzima ngokwenene ukulukholelwa; kodwa kwakhona ndinikele konke eNkosini, yaye ngoko ndinokuyilindela ngenzolo le yure yaye ndisoloko ndisemakhamandeleni. Banixelele ukuba andiyi kufakwa makhamandela. Ibibubuxoki obo! Ubusuku nemini: Ndikhululwa kuphela xa ndinxiba, ndikhulula yaye ndicoca isisele . . .

“12:35. Konke sekudlulile ngoku. Ngenxa yesibakala sokwala kwam [kwisicelo sabo sokuba akuncame ukunqula kwakhe uYehova uThixo], kuwiswe isigwebo sokufa. Ndaphulaphula, yaye emva kokuthetha la mazwi ‘Thembeka kude kube sekufeni’ namanye amazwi ambalwa eNkosi yethu, konke kwakudlulile. Kodwa musani ukuzikhathaza ngoku. Ndinoxolo, inzolo, ekungenakwenzeka ukuba niyithelekelele. . . . Olu xolo, olu vuyo olwandifikela ndisenkundleni, vuyo olo ihlabathi elingenakuluqonda, lwandizalisa lwaza lwandigubungela njengoko ndandibuyela kwakhona esiseleni sam . . . Ningakhali. . . . Oku kokona kulungileyo endinokuninika kona, nabo bonke abazalwana abathandekayo namhlanje, kule Cawa yokugqibela ngaphambi kokubulawa kwam (ukunqunyulwa intloko), ngosuku endikhululwe ngalo emakhamandeleni.”a

‘Uya Kukuzimasa, Uya Kukomeleza’

5, 6. Ziziphi iziqinisekiso ezanikelwa nguPawulos noPetros ezithuthuzela abo bavavanywe ngokuqatha ngenxa yokubambelela kwabo kuthando lukaThixo?

⁵ Lo mfana wahlukaniswa nobomi kodwa akazange ahlukaniswe nothando lukaThixo. Inkohlakalo efanayo iye yeziswa phezu kwamaNgqina kaYehova iinkulungwane ezininzi. Amandla abakhonzi bakaThixo okunyamezela iintshutshiso ezinjalo, kude kuse nasekufeni, asingomandla awo kodwa ngakaThixo. UPawulos usiqinisekisa ngelithi: “Uthembekile ke uThixo, ongayi kuvumela ukuba nilingwe ngaphezu kweninako; owothi, kunye nesilingo eso, avelise ithuba lokuphuma kuso, ukuba nibe nako ukuthwala.” (1 Korinte 10:13) Xa ephantsi kovavanyo, amangqina kaYehova athembekileyo namhlanje aye akwazi ukuthetha njengoko umpostile uPawulos wathethayo xa wayebanjiwe: “INkosi yandinceda, yandomeleza.”—2 Timoti 4:17.

⁶ Umpostile uPetros, emva kokusilumkisa ukuba sizilinde nxamnye noMtyholi, ochwechwa njengengonyama egqumayo efuna ukusiqwenga, unikela esi siqinisekiso: “Ke kaloku uThixo walo lonke ubabalo, owasibizelayo eluzukweni lwakhe olungunaphakade, sikuKristu Yesu, wanga angathi ngokwakhe, nakuba nive ubunzima umzuzwana, anilungise nigqibelele, anizimase, anomeleze, anisekele.” (1 Petros 5:8-10) Ekuqwalaseleni yonke le nkxaso yobuthixo, inye into ecacileyo: Uthando lukaThixo aluze lusilele; sithi abanokuzahlula kuthando lwakhe, yena akanakuze asahlule.

7. Ngawaphi amacebo uSathana awawasebenzisa kuYesu, yaye uYesu wamoyisa njani?

⁷ USathana akasoloko ehlasela njengengonyama egqumayo. Izihlandlo ezininzi uza ‘njengenyoka enobuqhophololo’ yaye ude eze ‘njengesithunywa sokukhanya’ esiwexukileyo. Unamaqhinga amabi, yaye simele siphaphe khon’ ukuze singakhohliswa nguye. Simele sixhobe sonke isikrweqe sikaThixo ‘ukuze sime sibuchase ubuqhinga boMtyholi.’ (Genesis 3:1; 2 Korinte 2:11; 11:13-15; Efese 6:11) Ekuqaleni kobulungiseleli bukaYesu, uSathana weza kuye ecaphula izibhalo, ezisebenzisa kakubi ezama ukuhenda uYesu ukuba enze okubi. Izihlandlo ezithathu wamhenda uYesu yaye izihlandlo ezithathu wasilela. UYesu wakuthintela ukugqwetha kukaSathana iZibhalo ngezibhalo ezisetyenziswa ngokufanelekileyo. Ngoko uYesu waxelela uSathana ukuba emke. Kodwa uSathana “wesuka kuye umzuzu” kuphela.—Luka 4:13; Mateyu 4:3-11.

8, 9. Ziziphi iindlela ezikhohlisayo uSathana awabuyela ngazo ukuza kuhlasela uYesu, yaye yintoni uPawulos asalathisela ukuba siyenze ukuze sikhuseleke?

⁸ USathana uyazingisa. Usoloko ebuyela ngeendlela ezahlukahlukeneyo. Wabuyela kuYesu ngokusebenzisa abefundisi bonqulo belo xesha. UYesu wakuqonda oku waza wabaxelela ngokuphandle esithi: “Nina ningaboyihlo uMtyholi.” Bambi abantu basenokude benze imisebenzi kaSathana ngokungaqondi. Nangona wayenenjongo entle, umpostile uPetros wakwenza oku, ekhalimela uYesu esithi: “Makube camagu kuwe, Nkosi; oko akuyi kukha kubekho kuwe.” Kwafuneka ukuba uYesu amyale ngokungqongqo uPetros athi: “Suka uye emva kwam, Sathana, usisikhubekiso kum.” (Yohane 8:44; Mateyu 16:22, 23) Ngokufanayo, iinjongo zikaSathana zisenokuphunyezwa ngokungaqondi ngumqeshi, ngumntu osebenza naye, ngumntwana ofunda naye, ngumhlobo, sisalamane, ngumzali okanye liqabane lomtshato. Simele sihlale sizilinda size singavumeli nayiphi na into yenze buthathaka ulwalamano lwethu noYehova.

⁹ Ngoko kubalulekile ukuba ‘sixhobe sonke isikrweqe sikaThixo, ukuze sibe nako ukumisa sibuchase ubuqhinga boMtyholi. Ngokuba umzamo wethu asingowokuzamana nenyama negazi kodwa ngowokuzamana nayo imikhosi yoomoya abakhohlakeleyo kwezasezulwini iindawo.’—Efese 6:11, 12.

Ukubambisa Kwesono Inyama Ebuthathaka

10. Lisingisele entwenini igama elithi “isono”, yaye luluphi uqheliselo oluya kusahlula eluthandweni lukaThixo?

¹⁰ USathana uhlasela kwindawo esibuthathaka kuyo. Ngokuvisisana noko ukutyekela kwethu esonweni ngokwenyama ukwenza ixhoba elibalaseleyo. (INdumiso 51:5) Igama lesiGrike eliguqulelwe ngokuthi isono lelithi ha·mar·tiʹa. Isenzi sithi ha·mar·taʹno, ngokusisiseko esithetha “ukuphosa uphawu.” (Roma 3:9, Umbhalo osemazantsi weNW eneembekiselo) Okukhona siluphosa uphawu size singayigcini imiyalelo kaThixo, kokukhona siya simka eluthandweni lukaThixo, kuba “ukumthanda uThixo kuko ukuthi, siyigcine imithetho yakhe.” (1 Yohane 5:3) Ukukrexeza, ukuhenyuza, ukugqwetheka kwesini, ubunxila, amatheko anobundlobongela, ukungazilawuli iinkanuko zenyama, amakhwele, imisindo, ukubawela izinto eziphathekayo—zonke izinto ezinjalo ziyasahlula eluthandweni lukaThixo, yaye “abazenzayo izinto ezinjalo abayi kubudla ilifa ubukumkani bukaThixo.”—Galati 5:19-21.

11. Isono sinokusibambisa njani ngokuthe ngcembe, ngayiphi imiphumo ekugqibeleni?

¹¹ Imifanekiso eshukumayo, iincwadi, imidlalo (plays), iinkqubo zikamabonwakude—ezinongwe ngorhwebo lwezinto eziphathekayo, ngokuba ndim phambili nangesini—zikhulisa usukelo loyolo olungalawulekiyo nolungathintelekiyo. Isono sokuqala sivulela indlela esesibini, kulandele esesithathu nesesine, yaye kungekudala ukutshona nzulu ehlabathini kuza ngesantya esipheleleyo. Ekugqibeleni, abo ‘bangabathandi beziyolo kunokuba bathande uThixo’ bazaliswa ‘kukukhwezelela iinkanuko zenyama.’ (2 Timoti 3:4; Roma 13:14) Abadala nabancinane bakhukuliselwa esonweni, yaye isazela sabo siba sesitshe ngokupheleleyo. “Abathe bona, bengasaziva, bazinikela eburheletyweni, ukuze basebenze ukungcola konke, bebawa.”—Efese 4:19; 1 Timoti 4:2.

12. Ziziphi izibhalo ezibonisa amandla esono phezu kwethu, yaye uPawulos wabuvakalisa njani ubuhlungu ngenxa yoku?

¹² Abo bazimisele ukungahlulwa eluthandweni lukaThixo bamele bazomeleze nxamnye nokubambisa kwesono inyama ebuthathaka. Isono silutshaba oloyikekayo, njengoko iBhayibhile ngokuphindaphindiweyo ibethelela oku: “Bonke abenza isono bangamakhoboka esono,” “baphantsi kwesono bonke,” “bonile bonke,” “isono masingalawuli emzimbeni wenu onokufa,” “ningabakhonzi ngoko kulowo nimlulamelayo,” “umvuzo wesono kukufa,” yaye bonke ‘baphantsi kwesono.’ (Yohane 8:34; Roma 3:9, 23; 6:12, 16, 23; Galati 3:22) UPawulos ‘wayethengiswe esonweni,’ ‘ethinjelwe emthethweni wesono,’ nto leyo eyambangela ukuba avakalise ubuhlungu ngala mazwi: “Okulungileyo endikuthandayo, andikwenzi; khona okubi, endingakuthandiyo, oko ndiyakwenza.” (Roma 7:14, 19, 23) Ngoko udanduluka athi: “Athi ke mna, mntu uludwayi! Azi, ngubani na oya kundihlangula kulo mzimba woku kufa?” Ngoko kufika impendulo evuyisayo ethi: “Ndiyabulela kuThixo ngoYesu Kristu, iNkosi yethu.”—Roma 7:24, 25.

13, 14. (a) Sikhululwe njani esonweni? (b) Sinokuhlala njani eluthandweni lukaKristu?

¹³ De kwafika uKristu Yesu, ‘isono sasilawula ngokufa.’ (Roma 5:14, 17, 21) Kodwa ngokufa nokuvuka kukaYesu, isono esingukumkani sakhiqwa esihlalweni ukwenzela abo basabelayo kwisipho sikaThixo sothando soNyana Wakhe. Wasisindisa ezonweni zethu, wazihlamba, wasicoca kuzo, wasikhulula kuzo waza wazishenxisa ngokupheleleyo kuthi. (Mateyu 1:21; IZenzo 3:19; 22:16; 2 Petros 1:9; 1 Yohane 1:7; ISityhilelo 1:5) Ngaloo ndlela asingompostile uPawulos nje kuphela ofanele abulele kuThixo ngoYesu Kristu iNkosi yethu ngokusivulel’ indlela yokukhululeka kubukhoboka obulusizi besono nokufa kwenyama koko ngabo bonke abo bakholwayo kwigazi likaKristu Yesu elaphalalayo.

¹⁴ Ngoko sinyanzelekile ukuba singaphephi nje kuphela nakuphi na ukwahlulwa kuthando lukaThixo kodwa sikwamele sihlale sikuthando lukaKristu. Indlela yokuhlala sisondele kuYesu ifana nqwa neyokusondela kuThixo. UYesu wakucacisa ngokuphandle oku, esithi: “Njengoko uBawo wandithandayo, nam ndanithanda; hlalani ke eluthandweni lwam. Ukuba nithi niyigcine imithetho yam, hlalani eluthandweni lwam; njengokuba mna ndayigcinayo imithetho kaBawo, ndahlala eluthandweni lwakhe.”—Yohane 15:9, 10.

Ingozi Yokukhukuliseka

15. Yintoni le sichanabeke kuyo, yaye yintoni esimele siyenze ukuze siphephe ingozi?

¹⁵ Ungaphulukani nale nkululeko yokukhululeka kubukhoboka besono nobokufa ngokurhoxa okanye ngokukhukuliseka. Kunokwenzeka ngokuthe ngcembe kangangokuba sinokufunyanwa singaphaphanga. Kunjengokuba amaGalati 6:1 esithi: “Bazalwana, ukuba umntu uthe waqutyulwa nokuqutyulwa sisiphoso esithile, nina bangaboMoya, mlulekeni onjalo ninomoya wobulali; uzilumkela ukuba ungahendwa nawe.” Kwananjengokuba omnye eluleka omnye, umele ‘azilumkele.’ Sonke sinokwenzakaliswa! “Simele ukuzinyamekela ngokugqithiseleyo izinto esazivayo, hleze sikhukuliswe simke kuzo.”—Hebhere 2:1.

16, 17. Ingozi yokukhukuliseka ngokomoya izekeliswa ngantoni, yaye sifanele senze ntoni ukuze siyiphephe?

¹⁶ Ukukhukuliseka akufuni mgudu. Kungenxa yoko le nto kulula kangaka—yaye kuyingozi gqitha ngokomoya. Unokuzifumana usahluka eluthandweni lukaThixo ngaphambi kokukuqonda oko. Kufana negusha elahlekayo. Ilahleka njani? Umalusi ucacisa esithi: ‘Izilahla ngokwayo. Ibona ingca eluhlaza iimitha ezimbalwa qelele kwelinye icala, iya apho ukuze itye loo ngca. Ibona enye indawo entle kwiimitha ezilishumi qelele ize ihambe ukuya kutya apho. Indawo yesithathu ibonakala inomtsalane, yaye igusha iyahamba ukuya kutya kuyo. Kungekudala ikude lee nomhlambi. Izilahle ngokwayo.’

¹⁷ Ngoko kunjalo ngabo bakhukulisekayo ngokomoya. Ngokungaqondi kunokuqalisa ngokufuna izinto ezimbalwa eziphathekayo, okanye isinxulumani sehlabathi, okanye ukucacisa izibhalo ezithile ngokwembono yakho. Ngokuthe ngcembe, abanjalo baye besimka ngokumka kumhlambi kaThixo, yaye kungekudala bayazahlula ngokupheleleyo kwibandla naseluthandweni lukaThixo. Abazange basinikel’ ingqalelo isibongozo sikaPawulos esithi: “Zilingeni, ukuba niselukholweni olu na; zicikideni ngokwenu.”—2 Korinte 13:5.

18, 19. Simenza njani uMtyholi asibaleke, yaye sisondela njani kuThixo?

¹⁸ Sixelelwa oku: “Mchaseni ke uMtyholi, wonibaleka.” Ngokulisebenzisa ngobuchule “ikrele lomoya, elililizwi likaThixo,” sinokuzoyisa iintlaselo ezinobuqhophololo zikaSathana. Leyo yindlela uYesu awamgxotha ngayo uSathana entlango. Kwakhona sixelelwa oku: “Sondelani kuye uThixo, wosondela kuni.” (Yakobi 4:7, 8; Efese 6:17) Njengababhali beeNdumiso, sifanele sihlale sisondele kuThixo ngokubambelela kwilizwi lakhe: “Isingqino sikaYehova sinyanisekile, sinika isiyatha ubulumko.” “Mna ndigqale izingqiniso zakho. Lisisibane seenyawo zam ilizwi lakho, likukukhanya emendweni wam. . . . Andithi gu bucala ezingqinisweni zakho.”—INdumiso 19:7; 119:95, 105, 157.

¹⁹ Ngomthandazo, ngokulifundisisa iLizwi likaThixo, ngokuthanda abazalwana bethu nangokuhlanganisana rhoqo kunye nabo, ngokuxelela abanye ngoBukumkani bukaThixo—ngazo zonke ezi ndlela sinokusondela kuThixo nakuthando lwakhe njengoko lwabonakaliswa kuKristu Yesu iNkosi yethu.—1 Tesalonika 5:17; Roma 12:2; Hebhere 10:24, 25; Luka 9:2.

20. Sisiphi isigqibo uPawulos awasivakalisayo eso amaNgqina kaYehova namhlanje asenza esawo?

²⁰ Kwisibhengezo esiyinyaniso nesinamandla, uPawulos wavakalisa ukuzimisela kwawo onke amaNgqina kaYehova athembekileyo asemhlabeni namhlanje, esithi: “Ndeyisekile kukuba nakufa, nabomi, nazithunywa zezulu, nazilawuli, naziphathamandla, nanto zikhoyo, nanto zizayo, nabuphakamo, nabunzulu, nasinye isidalwa esisimbi, asiyi kuba nako ukusahlula thina eluthandweni lukaThixo, olukuye [olubonakaliswe kuye, JB] uKristu Yesu, iNkosi yethu.”—Roma 8:38, 39.

[Umbhalo osemazantsi]

Uyakhumbula Na?

◻ Uthando lukaYehova luboniswa njani kumalungiselelo akhe obomi?

◻ Ziziphi iindlela uSathana azizamileyo ukuze ahlule amaNgqina kaYehova eluthandweni lukaThixo?

◻ Ziziphi izibhalo ezibonisa ukulawula kwesono kuthi, yaye olu lawulo lunokuqhawulwa njani?

◻Kutheni ukukhukuliseka kuyingozi nje, yaye kunokuthintelwa njani?

[Umfanekiso okwiphepha 13]

Imvu imka ngokuthe ngcembe de ilahleke