Unokuzilawula Njani Iimvakalelo Zakho?

ABANINZI namhlanje banqwenela ukuhlaziya iimvakalelo. Bafuna ukuba nemincili ngokuqhuba kakhulu, ngemidlalo eyingozi, ngesini esingekho mthethweni nangeziyobisi ezihlaziyayo. Enyanisweni, ihlabathi lezorhwebo nelokuzonwabisa likhuthaza imfuneko yokulawulwa ziimvakalelo. Ngaloo ndlela, abaninzi abakunyamezeli ukuba noxolo nokuthi cwaka, baziva befanele bafumane ukuchwayita okungakumbi okungokweemvakalelo ebomini.

Kakade ke, sonke sinazo iimvakalelo. Ngokomzekelo, xa sincuma, sihleka, okanye sikhala, sibonisa imeko yethu engokweemvakalelo ngelo xesha. Kodwa ngaba ubusazi ukuba iimvakalelo zisenokuchaphazela kwanomzimba wakho, njengokubangela ukuguquka koxinzeleko lwegazi, ukubetha kwentliziyo nokubila? Zinokubangela nokungakhululeki komzimba, njengentloko ebuhlungu, isisu esingazolanga neengxaki zomqolo. Ngenxa yoko, abantu jikelele bafuna iimvakalelo ezimyoli ukuze baphephe ezingemyoli. Bambi abantu bazama ukuphepha iimvakalelo ezingemyoli ngokuvumel’ ingqondo ibhadule, ngokutya kakhulu nangokusela ngokugqithiseleyo. Kwelinye icala, imeko efanelekileyo engokweemvakalelo ikhulisa impilo entle. IMizekeliso 14:30 ithi: “Bubomi benyama intliziyo epholileyo.”

Okubangel’ umdla kukuba, iLizwi likaThixo likhankanya zonke iintlobo zeemvakalelo zomntu, ezinjengothando, intiyo, uvuyo, usizi, inkalipho noloyiko. Unokukhumbula ukuba ngesinye isihlandlo “uYesu walila,” ebonisa iimvakalelo zakhe ngokufa komhlobo. (Yohane 11:35) UYosefu wazama ukuzithintela iinyembezi “kuba wasikwa yimfesane ngomninawa wakhe,” awayengazange ambone kangangeminyaka.—Genesis 43:30.

Kutheni Ufanele Uzilawule Nje Iimvakalelo Zakho?

Ekubeni siphila ‘kumaxesha aneengcinezelo’ yaye singafezekanga, iimvakalelo ezingakumbi ezingemyoli zichwechwela kubomi bethu kuneemvakalelo ezimyoli. (2 Timoti 3:1-5 Revised Standard) Kunjengokuba iBhayibhile isitsho, “ukucudisa kugezisa isilumko.” (INtshumayeli 7:7) Ngoko ukuba asizami ukuzilawula iimvakalelo ezinganqwenelekiyo, sinokonakalisa ulwalamano Iwethu nentsapho, abantwana esifunda nabo, abantu esisebenza nabo nezinxulumani zethu ezingamaKristu.

Ngokwemvelo, kuyasichaphazela sonke ngokweemvakalelo oko iBhayibhile ikubiza ngokuthi ‘lixesha nesihlo.’ (INtshumayeli 9:11) Ngokomzekelo, isibini esitshatileyo, esasikubulungiseleli bexesha elizeleyo, sabuyela kwigumbi laso saza safumanisa ukuba uninzi lwezinto zaso zaziphangiwe. Oku kwasikhathaza, ukusa kwinqanaba lokuba sizive singaphilanga. Kwasithabatha iintsuku ezithile ukuba sikwazi kwakhona ukulawula iimvakalelo zaso. Sakuba sichachile, saqhubeka nomsebenzi waso ‘wokuthuthuzela abanesijwili.’—Isaya 61:2.

Okanye usenokwazi abantu abaziyekelayo ukuba bavuseleleke ngokweemvakalelo ngokubukela imidlalo echukumis’ iimvakalelo kamabonwakude. Ngoko bazifanisa nabadlali kangangokuba ngokufuthi bakhaliswa yile nto iyintsomi nje. Kwakhona, qwalasela imeko yomfazi ongatshatanga ozihlalela yedwa. Ngobunye ubusuku waqalisa ukubukela umfanekiso owoyikisayo. Nangona “wayefile luloyiko,” wayengenakuyeka ukuwubukela. Kamva kwaba nzima ukuba alale. Xa ekugqibeleni wathi walala obentlombe, unokukuthelekelela oko waphupha ngako: izithunzela amagongqongqo. Ingongoma kukuba: Siyachatshazelwa ngokweemvakalelo koko kwenzeka kufuphi nathi. Ngoko, ngokuqinisekileyo sifanele sibe ngabakhethayo, sikuphepha oko kuyingozi okanye okuthi ngokungeyomfuneko kuphazamise ukulungelelana kweemvakalelo zethu.

Ukukhuthaza Iimvakalelo Ezinqwenelekayo

Kwelinye icala, ilizwi likaThixo lincomela ukuba sibe “ziingcathu,” sisebenzisa ‘ingqiqo.’ (Tito 2:2; Roma 12:1) Oko akuthethi ukuba sifanele sizicinezele ukusa kwinqanaba lokuphelelwa ngumdla ngobomi. Iimvakalelo ezilawulwa ngokufanelekileyo zongezelela uncuthu ebomini. Ngokomzekelo, iBhayibhile ithi: “Akukho nto ilunge ngaphezu kokuba umntu avuye ezenzweni zakhe.”—INtshumayeli 3:22.

Ngoko ke, ukuze senze ubomi bonwabise ngenene, sinokufuna indlela yokuhlakulela iimvakalelo ezikhuthazayo. Oku kunokusinceda ukuba ‘sizondelele imisebenzi emihle kuneengcinga ezingakhiyo.’ (Tito 2:14) Iingcamango ezibukhali nezinik’ impilo zomeleza uzimiselo nonyamezelo ukuze sizuze okufanelekileyo. Kambe ke, amaKristu ayazi ukuba kwinkonzo kaThixo izinto akaziphumezi ngokucinga okuhle kuphela. Kunoko ayayiqonda imfuneko yokukholosa ngokupheleleyo ngomoya kaYehova ukuze ahlangabezane nekamva. (Luka 11:13; IMizekeliso 19:21) Sinokuzilawula njani ke iimvakalelo zethu ukuze sibonakalise eziluncedo?

‘Ungathingazi’

Ngenxa yemiphumo yazo eyingozi, iimvakalelo ezinjengengqumbo, ikhwele, intiyo noloyiko kufuneka zilawulwe. Ukuzekelisa indlela esinokukwenza ngayo oku, qwalasela nje le mvakalelo inye: ixhala.

Amandla kaThixo asebenzayo omeleza abakhonzi bakhe ababenomoya ovumayo nabathembekileyo kwixesha elidluleyo, njengoko esenza namhlanje. Ekhokelwa ngumoya oyingcwele, uYesu walondoloza imbono entle ngokuba nolangazelelo olunzulu ngemicimbi yokomoya. Wakhuthaza abalandeli bakhe ukuba ‘bangathingazi.’ (Luka 12:29) Akazange ayithandabuze inyameko kaYise yothando. (Yohane 15:9, 10) Inzondelelo nehlombe lakhe azizange ziminxwe kukukruquka nokatyo. Ngokukwanjalo nawe, ukuba ufuna ukulilawula ixhala eligqith’ emgceni, zalisa ingqondo yakho ‘ngezinto ezincomekayo.’ (Filipi 4:8) Ewe, ukuthembela ngoYehova kunokuzishenxisa iingcinga ezingakhiyo.

Ngokomzekelo, intwazana enesiphene eSao Paulo, eBrazil, yayikhathazekile ngokuswela kwayo ubuchule nangekamva layo. Yayinyamekela abantwana abancinane endlwini ngoxa bobabini abazali bayo babephangela. Iziva ingeloncedo kangako yabhala isithi: “Ndinexhala ngathi ekugqibeleni ndiza kuphunguleka ingqondo, ndenze izinto zobudenge. Ndade ndacinga nangokuzibulala. Ndinemvo yokuba andisokuze ndikwazi ukutshata.” Emva kokufumana ileta eyayibongoza ukuba yandise ufundisiso lwayo lweBhayibhile, yabhala oku: “Ndaqalisa ukuvakalelwa kukuba ekugqibeleni uthile waba nomdla ekuhlolisiseni iingxaki zam. Undibonise indlela ekubaluleke ngayo ukuphila kwinkqubo entsha kaYehova.” Ngaloo ndlela, endaweni yokusuka nje ukhathazeke, kutheni ungamiseli usukelo olululo ngokukodwa olokomoya, olunjengokwenza okungakumbi ekusasazeni iindaba ezilungileyo zoBukumkani okanye uchithele ixesha elingakumbi ekufundisiseni iLizwi likaThixo?

Kuyinyaniso ukuba, ukukhululeka kokwexeshana kunokuziswa kukuphumla, ukuhambahamba, ukuguqula umsebenzi okanye ummandla okuwo, okanye ukuphulaphula kumculo othuthuzelayo. Sekunjalo, sisenokutyekela ekucingeni phosakeleyo okanye ekunxunguphaleni, ukuxhomekeka kwizinto esizifundisiweyo okanye esinamava azo. Ngenxa yesi sizathu, ubuchule namandla engqondo akanele ukuvelisa uxolo lwengqondo okanye ukuzisa ubani kwinkoliseko kaThixo. Simele sifunde ‘ukulahlela lonke ixhala lethu kuYehova.’ Sinokukwenza oku ‘ngokuba esikhathalele yena.’—1 Petros 5:7.

Umdla Wobuqu KaThixo Kuwe

Yayingeyonjongo yoMdali ukuba bonke abantu bafane baze basabele ngendlela efanayo. EBhayibhileni, wanikela imigaqo ekhokelayo efanelekele nelungele bonke. Kwakhona wasinika imizekelo ebalaseleyo yokubonakalisa kwakhe umdla wobuqu kwimpilontle yabakhonzi bakhe. “Usondele uYehova kwabantliziyo zaphukileyo, . . . Buninzi ububi obulihlelayo ilungisa, ke uYehova ulihlangula kubo bonke.” (INdumiso 34:18, 19) Enyanisweni, uYehova uyazazi iimvakalelo zethu zangaphakathi, kwaneenkathazo neenyembezi zethu. INdumiso 56:8 ikuvakalisa oku ngale ndlela: “Yitha iinyembezi zam entsubeni yakho; azisencwadini yakho na?” Ngenxa yoko, xa siswele ngenene, nokuba ‘silusizana yaye singamahlwempu,’ uYehova unokuba ‘ngumncedi nomsindisi’ wethu. (INdumiso 40:17) Kodwa yintoni kanye kanye efunekayo kuwe ukuze uzuze olu ncedo?

Ukuxabisa iimpawu zikaThixo ezibalaseleyo, ‘iimfefe’ zakhe, kuyasinceda sikuphephe ukuzicingela ngokungafanelekanga. (2 Korinte 1:3, 4) Asinakuthi ngokuzingca silandele iimvakalelo zethu ngobumfama ngenxa yokuba intliziyo yomntu inokuba ‘nenkohliso,’ ikhokelela kwizenzo zobuyatha, kwanakwiintlobano zokuziphatha okubi. (Yeremiya 17:9) Ngokomzekelo, umfazi otshatileyo eLatin America waba nomdla kwindoda engummelwane wakhe. Eshukunyiswa ziimvakalelo zakhe, wawuthethelela umnqweno wakhe “wokuyinceda.” Ngethamsanqa, wafuna isiluleko so komoya kumaKristu akhulileyo. Ngokuzixabisa ngakumbi iimpawu zikaThixo, wabuphelisa obo buhlobo. Ngoku ngovuyo uthi: “Umtshato wam wasinda.” Ngokuqinisekileyo, sonke senza kakuhle ukuhlakulela ukukuvuma ukufundiswa nguYehova size sisondele kuye.—INdumiso 19:7-11.

Ukholo olomeleleyo, oko kukuthi, ulindelo nethemba eliqinisekileyo, lufak’ isandla kwisimo sengqondo esikhuthazayo, ngoxa okungaziwayo kukhulisa ixhala noloyiko. (Hebhere 11:6) Eneneni, ukucinga okungakhuthaziyo okanye amathandabuzo kunokusenza singaphumeleli apho besinokuphumelela khona. Ukuswela ukholo kubonisa imfuneko yokukhulisa intembelo engakumbi kumandla kaYehova okwenza izinto. (1 Yohane 5:10) Ngoko, hayi indlela ekubaluleke ngayo ukukholosa ngoThixo, ngokuthe rhoqo sithandazele uncedo lokulawula iimvakalelo zethu!—Yakobi 1:5.

Ukuzeyisa nokuthantamisa, nazo, ziimpawu ekufuneka sizihlakulele ukuze sikhulise ulwalamano olumyoli nabanye. “Omoya upholileyo yindoda enengqondo,” ezilawulayo iimvakalelo zayo. (IMizekeliso 17:27) Ngaphandle koku, umpostile uPawulos wabhala oku: “Ukuthantamisa kwenu makwazeke kubantu bonke,” ngaloo ndlela sifak’ isandla kubomi obulungeleleneyo nobunoxolo.—Filipi 4:5.

Ukuthanda abanye kukhulisa ezona mvakalelo zimyoli, sivuma ukukhuthaza abanye nokubenza bazive bekhululekile. “Mayela nothando olu lobuzalwana, yenzelanani ububele; mayela nembeko leyo, phangelanani.” “Uthando luzeka kade umsindo, lunobubele; uthando alunamona; uthando alugwagwisi; alukhukhumali; alwenzi okuziintloni; alufuni okukokwalo kodwa; alunanzondo.”—Roma 12:10; 1 Korinte 13:4, 5.

Ukuba uyaqhubeka uzihlakulela ezi mpawu, unokuqiniseka ngoncedo lukaYehova. Kunjengokuba uPawulos wabhalayo wathi: “Uxolo lukaThixo, olugqithisele kuko konke ukuqonda, luya kuzigcina iintliziyo zenu neengqiqo zenu kuKristu Yesu.”—Filipi 4:7.

Yintoni Ofuna Ukuyenza?

Nangona ngamnye kuthi esenokuqonda ukuba kufuneka ezilawule ngokulunge ngakumbi iimvakalelo ezithile, sinokuba nentembelo yokuba sinokuyizuza inkqubela nolonwabo olungakumbi. Ukuze sikwenze oko, sifanele sikulumkele ngakumbi ukuvumela ingqondo ibhadule okanye sinikezele kwiimvakalelo ezingalawulekiyo ezinjengokukhathazeka ngokungeyomfuneko. Kunoko, masilwele ukuhlakulela iimvakalelo ezikhuthazayo nezinik’ impilo ukuze sibe noxolo kuthi, kwizinxulumani ezingoowethu nakuThixo.

Ewe, kuyingenelo ukuzimisela ukwenza oko, sikhangele phambili kusuku lwaxa uYehova ‘aya kuzihluthisa zonke izinto eziphilileyo.’ (INdumiso 145:16) Ngenxa yoko, ngokuthe ngcembe sebenzela ukunandipha ubomi kwinkqubo entsha yezinto kaThixo nenoxolo. Ukwenza oko kuya kude kufak’ isandla kulonwabo lwakho lwangoku, into leyo ngokuqinisekileyo eyiyeyona mvakalelo inqwenelekayo.