Ngoobani Ngenene Abazibalekayo Iimeko Zobomi?

“UBALEKA iimeko zobomi.” Satsho njalo isalamane xa umlungiseleli oselula wafuduka esiya kuMzantsi wePasifiki ukuze enze umsebenzi wobuvangeli basemazweni. Yaye abaninzi bebengayixhasa le ngcamango. Ngokomzekelo, umsasazi kunomathotholo eNew Zealand, kutshanje wathi xa iimeko zoqoqosho ziba nzima, umMbo nomXesibe uphethukela ekukholelweni kuThixo njengohlobo lokubaleka iimeko zobomi.a

Kodwa ngaba abo banikela ubomi babo kusukelo lwezilangazelelo zokomoya ngenene babaleka iimeko zobomi? Ngokutsho kukaYesu Kristu akunjalo. Akazange akujonge ukukholelwa kuThixo kuyimbono elahlekisayo, into nje evelisiweyo, okanye ibali eliyintelekelelo. KuYohane 7:28 wathi: “Andizanga ngokwam; uyinyaniso owandithumayo.”

Phofu ke, kwimeko kaYesu, ukukholelwa kuThixo akuzange kumchaphazele ngendlela engenamandla. Washukunyiselwa ukunikela ubomi bakhe kuThixo, esithi: “Yabona, ndiyeza, . . . ndiza kwenza ukuthanda kwakho, Thixo.” (Hebhere 10:7) AmaKristu okwenyaniso akachaphazeleki ngokungaphantsi kunoko namhlanje. Ngokomzekelo, qwalasela isiluleko uPawulos awasibhalela uTimoti, umdala obalaseleyo kwibandla lenkulungwane yokuqala. UPawulos wayesazi ukuba bambi ebandleni babemi kakuhle ngokwezinto eziphathekayo. Kodwa ngenxa yokuba ukholo lwabo lwalusekelwe kwizinto zokwenyani zobomi, babeya kushukunyiseIwa ukuba ezi zinto ziphathekayo bazisebenzise. UPawulos wathi: “Abazizityebi kweli phakade langoku bathethele bangakratshi, bangathembeli butyebini bungagqalekiyo; mabathembele kuThixo ophilileyo, obeka phambi kwethu izinto zonke ngokobutyebi, ukuba zidliwe; benze okulungileyo, babe zizityebi zemisebenzi emihle, babe nokwaba kakuhle, babe nobudlelane; baziqwebele isiseko esihle, base exesheni eliza kuza, ukuze babubambe ubomi obungunaphakade.”—1 Timoti 6:17-19.

Ngoko ke ubuKristu asikokubaleka iimeko zobomi. Bubandakanya ukujongana nembopheleleko ngendlela yobudoda. UThixo esimnqulayo akanto ingeyiyo eyokwenene; ungowokwenene. Uhlobo lwenkonzo esiyenzayo yenentsingiselo yaye iyanelisa. Ithemba lethu lomvuzo ongaphambili, kunokuba libe yingqikelelo engenasiseko, linamadinga asisiseko esiqinisekileyo kaThixo ongenako ukuxoka.—Hebhere 6:18.

Noko ke, kuthekani ngabo bakhanyela imfuneko yokukhonza uThixo nabakhela ubomi babo kwizinto eziphathekayo okanye kuhlobo oluthile lomsebenzi wokuzingca? Bekungebi kanti eneneni ngabo aba bazibalekayo iimeko zobomi?

Indoda esisilumko uSolomon yasebenzisa amabinzana anjengala athi “amampunge” nelithi “nokusukelana nomoya” ukuchaza ubomi apho zithi izinto eziphathekayo neziyolo zenyama zibe yeyona nto iphambili. Uchaza umphumo, esithi: “Andiwabandezanga into yonke ayibizayo amehlo am; andiyivimbanga intliziyo yam namnye umvuyo; ngokuba intliziyo yam yayivuya emigudwini yam yonke, saba sesi ke isabelo sam emigudwini yam yonke. Ndabheka mna ezenzweni zam zonke, ezazenzayo izandla zam, nasemigudwini yam endaphuka yiyo ukuyenza; ndayibona ukuba yonke loo nto ingamampunge nokusukelana nomoya; akukho lungelo phantsi kwelanga.”—INtshumayeli 2:10, 11.

Ewe, kwanobomi bokuba nezinto eziphathekayo bamzisela uhlobo oluthile lovuyo. Kodwa ulwaneliseko lokwenene nolonwabo olusisigxina zazingekho. Ubomi obunjalo “ngamampunge” okwenene. Eneneni, igama lesiHebhere elithetha “amampunge” lidlulisela intsingiselo yokoqobo “yomoya” yaye ngoko ke libhekisela koko kuyinto engazinzanga nengesosigxina. Ngaloo ndlela iThe New English Bible isebenzisa igama elithi “ilize”.

Ngoko ke, ngaba umntu ophila uhlobo lobomi uSolomon awaluchaza ‘lungamampunge’ ukwisigxina sokutyhola umKristu ngokuthi ubalekela kwimeko yolwaneliseko lwenkohliso? Kungangenkankulu. Enyanisweni, umpostile uPawulos ngokubhekele phaya ubonisa ukuba “ukumila kweli hlabathi kuyadlula.” (1 Korinte 7:31) Apha ufanisa ihlabathi elingazani naThixo likwimo ekumila kwayo kuguquguqukayo. Namhlanje oko kubonakala kukuhle, kuthandeka, noko kubukekayo kusenokungabikho ngomso. “Abantu abazenzela igama” banamhlanje bathi ekuhambeni kwexesha bathatyathelw’ indawo ngabanye. Kanti kuwo wonke umgudu wabo, ubomi babo abunanto ixabiseke ngokusisigxina. Abanalo ithemba lokwenene ngekamva.

Kunjengokuba uPhilip Chesterfield, wenkulungwane ye-18 osisicaka nesithethi sendlu yasebukhosini yamaNgesi, ngokuchanileyo wathi: “Ndilunandiphile uyolo oluyimpambano, ndingcamle zonke iintlobo zalo. Ndizinandiphile zonke iziyolo zehlabathi, yaye ndizilinganisile ngokwendlela eziyiyo, ezo zinto enyanisweni ndizifumanise ziphantsi . . . Xa ndicinga ngoko ndikubonileyo, . . . nangoko ndikwenzileyo, andikwazi kuzithuthuzela kwinto yokuba konke okuluyolo lwehlabathi kwakuyinto yokwenyani nangayiphi na indlela.”

Phofu ke, amaKristu anjengoAbraham ‘owayewulindele umzi lo uneziseko, ungcibi, umbangi wawo, inguThixo.’ (Hebhere 11:10) Ngenxa yokuba ukholo lwawo luqinisekile, akanasizathu sokuzibaleka iimeko zobomi kodwa azalisa ubomi bawo ngomsebenzi owanelisayo. Kuthekani ngobakho ubomi? Ngaba bobokubaleka nje iimeko zobomi, okanye ngaba bakhelwe ngokuqinileyo kwinto eyinene?

[Umbhalo osemazantsi]