Ubomi Nobulungiseleli BukaYesu

Umthandazo Nokuthembela NgoThixo

NJENGOKUBA uYesu eqhubeka nentshumayelo yakhe, ugxeka ukuhanahanisa kwabantu ababonakalisa ukuhlonela kwabo uThixo okuqikelelwayo. Uthi: “Xa sukuba uliza abantu, ungahlokomisi xilongo phambi kwakho, njengoko benza ngako abahanahanisi.”

UYesu uhlabela mgama esithi, “Naxa sukuba uthandaza, uze ungabi njengabahanahanisi; ngokuba bethanda ukuthandaza bemi ezindlwini zesikhungu nasezimbombeni zezitrato, ngokokuze babe nokubonwa ngabantu.” Kunoko, uyalela oku: “Xa sukuba uthandaza, ngena egumbini lakho, uthi, uluvalile ucango lwakho, uthandaze kuYihlo osemfihlekweni.” UYesu ngokwakhe wayethandaza ekuhleni, ngoko akakugxeki ukuthandaza ekuhleni. Akugxekayo kukuthandaza okwenzelwa ukuze kuchukunyiswe abaphulaphuli nokwenza ukuba bakuncome.

Ngokungakumbi uYesu ululeka ngokuthi: “Nithandaza njalo ke, maningenzi milembelele ingeyanto, njengabeentlanga.” UYesu akathethi kuthi ukuphindaphinda kona ngokwako kuphosakele. Ngasihlandlo sithile, naye ngokwakhe ngokuphindaphindiweyo wasebenzisa ‘amazwi afanayo’ xa wayethandaza. Kodwa athi akwamkelekanga kukuthetha amabinzana acengcelezwayo ‘ngokuphindaphindiweyo,’ njengabo badlalisa ngeminwe njengokuba bephindaphinda imithandazo yabo egcinwe entloko.

Ukuze ancede abaphulaphuli bakhe bathandaze, uYesu unikela umthandazo ongumzekelo oquka izicelo ezisixhenxe. Ezokuqala ezithathu ngokufanelekileyo zibonisa ukugqalwa kolongamo lukaThixo neenjongo zakhe. Zizicelo zokuba lingcwaliswe igama likaThixo, bufike uBukumkani bakhe, nesokuba kwenziwe ukuthanda kwakhe. Ezine zokugqibela zizicelo zobuqu, zezi, ukucela isonka semihla ngemihla, ukuxolelwa kwezono, ukungalingwa kukabani ngaphezu kwanokukuthwala nokuhlangulwa kongendawo.

Ehlabela mgama, uYesu uthetha ngomgibe wokugxininisa ngokungafanelekanga kwizinto eziphathekayo. Ubongoza oku: “Ningaziqwebeli ubutyebi emhlabeni, apho konakalisa inundu nomhlwa, nalapho amasela agqobhozayo ebe.” Asikukuba ubutyebi obunjalo buyatshabalalisa nje kuphela kodwa abakhi nto inokuzuzisa kuThixo.

Ngenxa yoko, uYesu uthi: “Ziqwebeleni ke ubutyebi emazulwini.” Oku kwenziwa ngokubeka inkonzo kaThixo tanci ebomini bakho. Akukho bani unokubuhlutha ubutyebi obufunjwe ngaloo ndlela kuThixo okanye umvuzo wabo ozukileyo. Ngoko uYesu walek’ umsundulo ngokuthi: “Apho bukhona ubutyebi benu, yoba lapho nentliziyo yenu.”

Ethetha ngokubhekele phaya ngomgibe wezinto eziphathekayo, uYesu unikela lo mzekeliso: “Isibane somzimba liliso; xa sukuba iliso lakho ngoko lingenakumbi, umzimba wakho uphela wokhanyiseleka. Kodwa xa sukuba iliso lakho likhohlakele, umzimba wakho uphela woba bubumnyama.” Iliso elisebenza kakuhle emzimbeni lifana nesibane esikhanyisiweyo kwindawo emnyama. Kodwa ukuze libone ngokuchanileyo, iliso limele lingabi nakumbi, oko kukuthi, limele lijoliswe kwinto enye. Iliso elilaqazayo likhokelela ekuqikeleleni izinto ngempazamo, ekubekeni usukelo lwezinto eziphathekayo ngaphambi kwenkonzo kaThixo, nto leyo ephumela ekubeni ‘umzimba uphela’ ube bubumnyama.

UYesu uqukumbela lo mbandela ngalo mzekeliso unamandla: “Akukho mntu unako ukukhonza nkosi mbini; kuba eya kuyithiya le ayithande leya, athi mhlawumbi abambelele kule ayidele leya. Aninako ukukhonza uThixo nobutyebi.”

Emva kokunikela esi siluleko, uYesu uqinisekisa abaphulaphuli bakhe ukuba akuyomfuneko ukuba babe nexhala ngeemfuno zabo zezinto eziphathekayo ukuba babeka inkonzo kaThixo kuqala. Uthi, “Yondelani ezintakeni zasezulwini; ngokuba azihlwayeli, azivuni, azibutheli koovimba; ukanti ke uYihlo wasemazulwini uyazondla.” Wandula ke abuze oku: “Nina anizidlule kakhulu na?”

Ngokulandelayo, uYesu walatha kwiinyibiba zasendle aze aphawule ukuba “noSolomon kubo bonke ubunewunewu bakhe, wayengavathiswanga nanjenganye kuzo ezi.” Uyaqhubeka esithi, “Ukuba ke ingca leyo yasendle, . . . wenjenjalo uThixo ukuyambathisa, akayi kunambathisa kakhulu ngakumbi na, bantundini balukholo luncinane?”

Ngoko uYesu uqukumbela ngokuthi: “Musani ukuxhala ngoko, nisithi, Sodla ntoni na, sosela ntoni na, sokwambatha ntoni na? . . . kuba uYihlo wasemazulwini uyazi ukuba ezo zinto zonke ziyafuneka kuni. Funani ke tanci ubukumkani bukaThlxo nobulungisa bakhe, zaye zonke ezo zinto ziya kongezelelwa kuni.” Mateyu 6:1-34; 26:36-45.

◆ Yiyiphi imiyalelo engomthandazo uYesu awayinikelayo?

◆ Kutheni le nto ubutyebi basemazulwini bubalasele, yaye bunokufunyanwa njani?

◆ Yiyiphi imizekelo eyanikelwayo ukunceda ubani aphephe ukuthanda izinto eziphathekayo?

◆ Kwakutheni ukuze uYesu athi akukho mfuneko yokuba nexhala?