Abavangeli Basemazweni BaseGiliyadi—Bazinikele Kwinjongo Enye
“KWIVEKI ephelileyo beningabafundi, kwiveki elandelayo niya kube ningabavangeli basemazweni!” Loo mazwi aziphawula kakuhle iimvakalelo zabafundi abangama-23 ababethwesw’ imbasa bodidi lwama-81 lweSikolo seBhayibhile seWatchtower saseGiliyadi. Kubo, kwanabanye abangama-4 262 ababekho, umsebenzi wothweso-mbasa owawuqhutyelwa kwisiXeko iJersey kwiHolo yeNdibano yamaNgqina kaYehova, ngoSeptemba 7, 1986, uya kuba lusuku oluya kuhlala lukhunjulwa.
UMartin Poetzinger wavula ngomthandazo waza ke uCarey Barber, owayengusihlalo wothweso-mbasa, watshayelela ucwangciso ngokuthi kwiminyaka eyadlulayo amawakawaka aba bashumayeli aye afumana uqeqesho lwawo lwaseGiliyadi ezinikele kwinjongo enye eyile: ukuba athunyelwe eziphelweni zomhlaba njengabavangeli basemazweni bokwenyaniso beshumayela ithemba loBukumkani. Hayi indlela esivuya ngayo kukuba aba bavangeli basemazweni batsha, ngenxa yentsingiselo yegama elithi “Giliyadi,” baya kuba yinxalenye ‘yemfumba yamangqina’!
Evula ucwangciso, uMilton Henschel wacacisa ukuba aba bathwesw’ imbasa, njengabapostile bomhla kaYesu, babelungiselelwe umsebenzi omkhulu. Umsébenzi owayengumvangeli wasemazweni uPawulos waluvakalisa kakuhle uluvo lwakhe ngalo msebenzi xa wathi: “Kuba ndikhululekile nje kubo bonke, ndizikhonzisile kubo bonke, ukuze ndibazuze abona baninzi.”—1 Korinte 9:19.
Abonisa ntoni la mazwi kaPawulos? Abonisa ukuba aba bavangeli basemazweni batsha bamele babe nomdla ebantwini. Kumele kube ngumnqweno wabo ukunceda zonke iintlobo zabantu ngesigidimi senyaniso esisindisa ubomi—kwanabo basenokuba banxulumene ngokusondeleyo nenye intlangano yonqulo.
Isithethi esalandelayo, uTheodore Jaracz, sakhumbuza abavangeli basemazweni abatsha ukuba, ngokungafaniyo nabakhenkethi abaya ezindaweni ukuze batyebise iliso, bona babethunyelwa kwizixeko ezininzi ezahlukahlukeneyo zehlabathi ukuya kushumayela iindaba ezilungileyo. Wabakhuthaza ukuba bakhumbule umzekelo kaYesu nabafundi bokuqala kwanowalowo wabavangeli basemazweni banamhla, uninzi lwabo olusaqhubekayo lukhonza ngokuthembeka kwizabelo zabo ezahlukahlukeneyo. Wacacisa ngelithi, “Yibani ngcinganye. Musani ukuvumela ukusukela izinto eziphathekayo kunityekise. Ukuba nineliso ‘elingenakumbi,’ ngoko ke ningcinga-nye.” (Luka 11:34) Walek’ umsundulo ngokuthi: “Njengabavangeli basemazweni abaphuma eGiliyadi, ninikelwe kwinjongo enye—ukufuna abafanelekayo nokushumayela iindaba ezilungileyo.”
Isiluleko esisexesheni sanikelwa nguMax Larson weKomiti yoMzi-mveliso esingamanyathelo amakathatyathwe xa iingxaki zivela kwisabelo somntu sobuvangeli. Wacacisa ngelithi, “Musani ukuncama nize ke nisishiye isabelo. Zicombululeni iingxaki zenu.” Njani? “Ngokuba nengqiqo kaThixo ngemicimbi.” (1 Korinte 2:11-16) ULarson wagxininisa ukubaluleka kokuthandaza kuYehova ucela uncedo lwakhe yaye wagxininisa imfuneko yokuba abavangeli basemazweni ngokuthe rhoqo baluxabise ulwalamano lwabo noThixo.
ULon Schilling weKomiti yeeFama zeWatchtower wabethelela ukuxabiseka kokuba nesimo sengqondo esifanelekileyo nokusilondoloza. Wabuza esithi, “Ziya kusebenza njani iingqondo zenu xa nijongene nocelomngeni okanye imeko efuna ukuba kuhlengahlengiswe?” “Njengabantu abanelungelo lokuzikhethela, ngokwabantu ngabanye sibophelelekile ngendlela izinto eziguquka ngayo.” Waphawula ukuba uThixo “akasilawuli ngenkqubo eyilelwe ukusilawula yona ikude lee.” Ngaloo ndlela, abavangeli basemazweni abanakulindela okungakumbi kuThixo kunoko kusengqiqweni. Abo babonakalisa ukukuvuma ukukhokelwa nguYehova uThixo ngeLizwi lakhe, ngomoya wakhe nangentlangano yakhe baya kukwazi ukulondoloza isimo sengqondo esifanelekileyo.
“Ingqiqo yenu ngakwizinto ezixabisekileyo ibukhali kangakanani?” Loo mbuzo waphakanyiswa ngu-Ulysses Glass, ongomnye wabayaleli kwiSikolo saseGiliyadi. Ngongcelele lwemizekeliso, lo myaleli osele enexesha elide wabonisa ukuba “ingqiqo elungeleleneyo, yobulumko nengaxengaxengiyo yokuxabiseka kwezinto iya kusoloko ibanceda [abavangeli basemazweni] batsolise kwizilangazelelo zoBukumkani.” Ephakamisa isitampu sokuposa ukuze bonke basibone, wathi, nangona ngokwexabiso sisincinane, ukusebenziseka kwesitampu sokuposa kuquka amandla aso okuncamathela kwinto enye de ifike phaya. Wathi, “Zenzeni nifane nesitampu sokuposa, nize nincamathele kwinto enye—uthumo lwenu lokushumayela—de ngokukhuselekileyo nifike apho niya khona, ngaphaya kwembandezelo enkulu.”
UJack Redford, umyaleli weSikolo saseGiliyadi nowayengumvangeli wasemazweni ngaphambili, kwintetho yakhe yokugqibela waxubusha ngolunye locelomngeni abavangeli basemazweni abatsha abaya kuhlangabezana nalo. Wabethelela ukuba ngokukholosa ngokupheleleyo ngoYehova babenokoyisa nawuphi na umqobo, enoba kukufunda ulwimi olutsha, kukukhumbula ikhaya, kukuhlala nabanye abantu, kukuzivisisanisa nemekobume eyahlukileyo, okanye kukucombulula ukungavisisani kobuntu. Ingongoma awayiphuhlisayo yile: “Musani ukuzama ukuphumelela ngamandla enu. Eyoku-1 yabaseKorinte 3:9 ithi, ‘Singabasebenzisi bakaThixo.’” Wabaqinisekisa ngelithi: “Yenzani eyenu indima yaye ningaqiniseka ukuba uYehova uya kuyenza eyakhe.”
“ISikolo seBhayibhile seWatchtower saseGiliyadi sisipho esivela kuThixo!” Ngaloo mazwi uFrederick W. Franz, ongumongameli woMbutho, waqalisa intetho yokugqibela ngaloo ntsasa. Wathi, iSikolo saseGiliyadi, “sasisesokulungiselela abantu ababengakhonza njengamangqina, ubungqina obuphilileyo besibakala sokuba uBukumkani bukaThixo obulawulwa nguYesu Kristu ngoku babusebenza.” Wathi ke wakhumbuza iqela lama-81 ukuba into yokuba benikelwe kule njongo inye kwakusithi zinzi phezu kwabo imbopheleleko enkulu “ngenxa yokuba niya kwintsimi yokunikela ubungqina kwelona xesha linomngcipheko kwimbali yoluntu. Ngoko ke uYehova uye wathi zinzi phezu kwethu imbopheleleko yokubhengeza iindaba ezilungileyo zobo Bukumkani nokwalatha kulo lonke uluntu kuzo zonke iimbombo ezikude zomhlaba indlela kaThixo yokusinda.”
Uvuyo nombulelo wokuba nelungelo lokuya kwiSikolo saseGiliyadi wacaca njengokuba abafundi ababethwesw’ imbasa babesamkela iziqinisekiso zabo. Xa injongo yabo njengabavangeli basemazweni yayicacile, iqela lama-81 laseGiliyadi, kwileta eyayibhalelwe iQumrhu Elilawulayo nentsapho yaseBheteli, laligqibe kwelokuba likhonze ngokunyaniseka izilangazelelo zikaYehova uThixo lize ‘livume kwigama lakhe’ phakathi kweentlanga. (2 Samuweli 22:50) Ngenjikalanga, emva kokwenziwa kwemiboniso engendlela yokunikela ubungqina kwizabelo zangaphambili, eNew York nakwintsimi yabavangeli basemazweni, nasemva komdlalo ochukumisayo wale mihla, ucwangciso lwaseGiliyadi lwaqukunjelwa ngomthandazo nguLyman Swingle.
Abafundi abangama-23 ababethwesw’ imbasa ngolangazelelo balindele uvuyo olukhulu lwenkonzo yobuvangeli basemazweni. Ngoba? Kunjengokuba omnye owayethwesw’ imbasa wacacisa ngelithi:
“UYesu wathi, ‘[Thengisa] ngeempahla zakho . . . uze ke undilandele . . . uye kushumayela ubukumkani bukaThixo.’ [Mateyu 19:21; Luka 9:60] Usukelo lwenkonzo yobuvangeli lwaxhokonxwa ngumnqweno wethu wokunceda abaninzi kangangoko sinako ngokomoya, naphi na apho sasifuneka yaye sinokusetyenziswa kakhulu khona.”—UFredrick Steiner, owabelwe eGuatemala.
Ngaba unokuyandisa inkonzo yakho kuThixo uze uyenze ibe nemveliso ngakumbi? Ukuba kunjalo, ngoko zibhokoxe, njengokuba aba bafundi bathwesw’ imbasa benjenjalo ukuze babe bangafanelekela intsimi yobuvangeli. Olona vuyo lwabo lukhulu, kwanolwakho, lumele lufunyanwe kubomi obupheleleyo benkonzo enikelwe kuYehova.—Malaki 3:10.
[Ibhokisi ekwiphepha 22]
“Intetho kaMzalwan’ uLarson ngenene ibethelele kum imfuneko yokuvuma ukwenza uhlengahlengiso. Ukuze ndiphumeze indima yam njengomvangeli wasemazweni, ndimele ndiphephe ‘ingqiqo yasenyameni’ ndize kunoko, ndifune ingqiqo kaYehova neyoNyana wakhe, uYesu.”—UAlain Saint-Jean, owabelwe eNew Caledonia.
[Ibhokisi ekwiphepha 23]
“Intetho kaMzalwan’ uGlass indincedile ukuba ndibone ukubaluleka kokuba nengqiqo efanelekileyo ngokuxabiseka kwezinto. Asimele sityekiswe zizinto ezingabalulekanga. Simele silungelelane.”—UHumphrey Hermanus, owabelwe eSuriname.
[Ibhokisi ekwiphepha 24]
“Njengoko bendiphulaphule uMzalwan’ uFiedford, ndibe noluvo lokunqabiseka ngokwazi ukuba iingxaki esiya kuhlangabezana nazo asizizo ezintsha. Abanye baye baphumelela ekuzoyiseni, yaye nathi sinako ukuba sikholosa ngamandla kaYehova kungekhona ngawethu.”—UVeronica Lipham, owabeIwe ePapua New Guinea.
[Ibhokisi ekwiphepha 24]
AMANANI EKLASI:
Inani lamazwe amelweyo: 7
Inani lamazwe ababelwe kuwo: 12
Umlinganiselo wobudala: 30.3
Umlinganiselo weminyaka yokuba senyanisweni: 13.4
Umlinganiselo weminyaka yokuba kubulungiseleli bexesha elizeleyo: 9.3
[Imifanekiso ekwiphepha 23
COSTA, Alan and Betty BaseUnited States
GANSLMEIER, Anton and Rita BaseGermany
GONZALES, John and Cynthia BaseUnited States
GRAULICH, Uwe and Katherine BaseGermany
HERMANUS, Humphrey and Ludmila BaseNetherlands Antilles
JOHANSEN, Bård and Ester BaseNorway
KLOOSTERMAN, Otto and Yvonne BaseNetherlands
LARSON, Gary and Annette BaseCanada
LIPHAM, Mark and G. Veronica BaseUnited States
SAINT-JEAN, Alain WaseFrance
STEINER, Fredrick and Helen BaseUnited States
SZYMANSKI, Cynthia WaseUnited States
WILKE, David WaseUnited States