Yandisa Uxolo Lwakho Ngolwazi Oluchanileyo

Makwandiswe kuni ubabalo noxolo, ngokumazi [ngokuchanileyo, NW] uThixo, noYesu, iNkosi yethu.”—2 PETROS 1:2.

1, 2. (a) Kutheni le nto ulwalamano oluseluxolweni noThixo lunokuthelekiswa nomtshato nje? (b) Sinokulomeleza njani uxolo lwethu noThixo?

KWIINKALO ezithile, ulwalamano loxolo olumiselwa noYehova uThixo ngokubhaptizwa kwakho lufana nomtshato. Nangona umhla womsitho uluyolo, usisiqalo nje kuphela solwalamano oluxabisekileyo. Ngomgudu, ngexesha nangamava, ulwalamano lomtshato luya kude lube loluthandeka ngakumbi, lusiba likhusi ebudeni bamaxesha enkxwaleko. Ngokunjalo, ngokukhuthala nangoncedo lukaYehova, unokulwandisa uxolo lwakho naye.

² Umpostile uPetros wabacacisela indlela abo “baluzuzileyo ukholo” ababenokulomeleza ngayo uxolo noThixo. Wabhala oku: “Makwandiswe kuni ubabalo noxolo, ngokumazi [ngokuchanileyo, NW] uThixo, noYesu, iNkosi yethu.”—2 Petros 1:1, 2.

‘Ukumazi Ngokuchanileyo UThixo’

3. Ukuba nolwazi oluchanileyo ngoYehova noYesu kuthetha ntoni?

³ Igama lesiGrike elithetha ukuthi ‘ulwazi oluchanileyo’ (e·piʹgno·sis) elisetyenziswe kwesi sibhalo lithetha ulwazi olunzulu ngakumbi, olubalasele ngakumbi. Isenzi sinokubhekisela kulwazi oluzuzwa ngamava obuqu ibe kuLuka 1:4 siguqulelwe ngokuthi ‘uyazi kakuhle.’ Umphengululi ongumGrike uCulverwel ucacisa ukuba kuye eli gama lithetha “ukuqhelana kakuhle nento endandiyazi ngaphambili; ukuyibona kakuhle into endandiyibonela kude ngaphambili.” Ukuzuza ‘ulwazi oluchane’ ngolo hlobo kubandakanya ukumazi uYehova noYesu ngokusondele ngakumbi njengabantu, ukuqhelana kakuhle neempawu zabo.

4. Sinokulwandisa njani ulwazi lwethu ngoThixo, ibe kutheni le nto oku kuluphucula nje uxolo lwethu naye?

⁴ Iindlela ezimbini zokuzuza olu lwazi kungendlela elungileyo yofundisiso lobuqu nokuya ngokuthe rhoqo kwiintlanganiso zabantu bakaThixo. Ngezi ndlela uya kuyiqonda ngokucace ngakumbi indlela uThixo aziphatha ngayo noko akucingayo. Uya kuba nomfanekiso-ngqondweni ocace ngakumbi wobuntu bakhe. Kodwa ukumazi ngokusenyongweni uThixo kuthetha ukuxelisa nokubonakalisa lo mfanekiso. Ngokomzekelo, uYehova wamchaza umntu owabonakalisa ukungazingci okufana nokukaThixo, waza ke Wathi: “Asikuko na oko ukundazi?” (Yeremiya 22:15, 16; Efese 5:1) Ukumxelisa ngokubalaseleyo ngakumbi uThixo kwandisa uxolo lwakho naye ngenxa yokuba wenza uphuculo ekwambatheni umntu omtsha, ‘ohlaziyelwe ekwazini okuhle, ngokomfanekiselo walowo wamdalayo.’ Umkholisa ngakumbi uThixo.—Kolose 3:10.

5. (a) Ulwazi oluchanileyo lwamnceda njani omnye umfazi ongumKristu? (b) Kungaziphi iindlela esinokuthi ngazo simxelise ngokusondeleyo uYehova?

⁵ Omnye umfazi ongumKristu nogama linguLynn wakufumanisa kunzima ukuba ngoxolelayo ngenxa yokuqondana phosakeleyo nomKristu onguwabo. Kodwa ufundisiso lobuqu nolwenyameko lukaLynn lwambangela ukuba ahlolisise isimo sakhe sengqondo. Wavuma ukuba, “ndakhumbula uhlobo loThixo uYehova alulo, kuba akananqala. Ndacinga ngazo zonke izinto ezincinane esimenza zona uYehova mihla le, kanti akasenzi siphendule ngazo. Lo mcimbi wawuphakathi kwam nodade wethu ongumKristu wawumncinane gqitha ngokwentelekiso. Ngoko nanini na ndimbona, ndandicinga oku ngaphakathi, ‘UYehova umthanda kanye njengokuba endithanda mna.’ Oku kwandinceda ukuba ndiyoyise loo ngxaki.” Ngaba uyazibona iinkalo nawe ekufuneka ukuba kuzo umxelise ngokubalasele ngakumbi uYehova?—INdumiso 18:35; 103:8, 9; Luka 6:36; IZenzo 10:34, 35; 1 Petros 1:15, 16.

Ukumazi Ngokuchanileyo UKristu

6. UYesu Kristu wabonisa njani ukuba umsebenzi wokushumayela wawungowona ubaluleke gqitha kuye?

⁶ Ukuba nolwazi oluchanileyo ngoYesu kufuna ukuba ube ‘nengqiqo kaKristu’ yaye umxelise. (1 Korinte 2:16) UYesu wayengumvakalisi wenyaniso onehlombe. (Yohane 18:37) Umoya wakhe wenzondelelo wokuvakalisa iindaba ezilungileyo awuzange uminxwe likhethe labantu. Nangona amanye amaYuda ayewathiyile amaSamariya, wanikela ubungqina kumSamariyakazi ngasequleni. Ewe, kwanokuthetha kakhulu kunye naye nawuphi umfazi ekuhleni kusenokuba kwakungathandwa!a Kodwa uYesu akazange avumele iimvakalelo zabantu bebutho ukuba zimthintele ekunikeleni ubungqina. Umsebenzi kaThixo wawumhlaziya. Wathi: “Okwam ukudla kukuba ndenze ukuthanda kowandithumayo, ndiwufeze umsebenzi wakhe.” Uvuyo lokubona intsabelo yabantu, njengaleyo yomSamariyakazi neyabantu abaninzi bedolophu, lwamzimasa uYesu njengokutya.—Yohane 4:4-42; 8:48.

7. (a) Ukwazi uYesu kufanele kusishukumisele ukuba senze ntoni? (b) Ngaba uThixo ulindele ukuba bonke abakhonzi bakhe benze umlinganiselo ofanayo wokushumayela? Cacisa.

⁷ Ngaba uvakalelwa ngohlobo uYesu awavakalelwa ngalo? Kuyavunywa ukuba, ukuqalisa incoko engeBhayibhile nomntu ongamqhelanga kunzima kwabaninzi yaye kudla ngokungathandwa ngabanye ebuthweni Kanti, ukuze sibe nesimo sengqondo esifana nesikaYesu, asinakuyiphepha le nyaniso: Simele sibunikele ubungqina. Kakade ke, asingabo bonke abanokwenza umlinganiselo ofanayo wokushumayela. Oku kuyahluka ngokwamandla nangokweemeko zethu. Ngoko musa ukuvakalelwa kukuba uThixo akaze aneliswe yinkonzo yakho engcwele. Phofu ke, ukumazi kwethu uYesu kufanele kusishukumisele ukuba senze unakonako. UYesu wayincoma inkonzo yomphefumlo uphela.—Mateyu 13:18-23; 22:37.

Imfuneko Yokuthiya Okubi

8, 9. Ziziphi ezinye zezinto uThixo azithiyileyo, ibe sinokukubonakalisa njani ukuzithiya ngendlela efanayo ezo zinto?

⁸ Ulwazi oluchanileyo kwakhona luyasinceda siziqonde izinto uYesu noYehova abazithileyo. (Hebhere 1:9; Isaya 61:8) “Izinto ezintandathu uzithiyile uYehova, ezisixhenxe zingamasikizi emphefumlweni wakhe: Ngamehlo aqwayingayo; lulwimi oluxokayo; zizandla eziphalaza igazi elimsulwa; yintliziyo eyila iingcinga zobutshinga; ziinyawo ezikhawulezayo ukugidimela ebubini; lingqina elixokayo, elifutha amanga; nongenisa ingxabano phakathi kwabangabazalwana.” (IMizekeliso 6:16-19) Esi simo sengqondo nezi ntlobo zehambo “zingamasikizi emphefumlweni wakhe.” Igama lesiHebhere apha eliguqulelwe ngokuthi “zingamasikizi” livela kwigama elithetha “ukuba nezothe, ukunyanyeka,” “ukuba netyheneba kwento engathandekiyo ngazo zonke iindlela; ukuba lisikizi, ukuthiyeka.” Ngoko ukuze sibe seluxolweni noThixo, simele sizithiye ngolo hlobo izinto.

⁹ Ngokomzekelo, waphephe “amehlo aqwayingayo” nako nakuphi na ukubonakalisa ikratshi. Emva kokuba bebhaptiziwe bambi baye banoluvo lokuba abasalufuni uncedo oluthe rhoqo lwabo babebafundisa. Kodwa amaKristu asematsha ngokuthobekileyo afanele alwamkele uncedo njengokuba esiba nganesiseko esihle enyanisweni. (Galati 6:6) Kwakhona, kuphephe ukuhleba, okunokuthi ngokulula kubangele “ingxabano phakathi kwabangabazalwana.” Ngokusasaza umingimingi olungelolwabubele, ukugxeka okungathethelelekiyo, okanye ubuxoki, sisenokuba ‘asiphalazi gazi elimsulwa’, kodwa ngokuqinisekileyo sinokulutshabalalisa udumo olulungileyo lomnye umntu. Asinakuba seluxolweni noThixo ukuba asikho luxolweni nabazalwanabethu. (IMizekeliso 17:9; Mateyu 5:23, 24) ELizwini lakhe uThixo ukwathi “ndikuthiyile ukwala.” (Malaki 2:14, 16) Ngoko ke, ukuba utshatile, ngaba uzabalazela ukugcina umtshato wenu womelele? Ngaba ukuba nomdla kwiqabane lomnye nokuba nenkululeko engafanelekanga nalo kulisikizi kuwe? Ngokufanayo noYehova, ngaba ukuthiyile ukuziphatha okubi ngokwesini? (Duteronomi 23:17, 18) Ukuthiya izinto ezinjalo akulula, ekubeni zisenokuba nomtsalane kwinyama yethu enesono ibe ihlabathi lizivuyela.

10. Sinokukuhlakulela njani ukuthiya okungendawo?

¹⁰ Ukuze uncedakale ekuhlakuleleni ukuthiya okungendawo, kuphephe ukonwatyiswa yimifanekiso eshukumayo, ziinkqubo zikamabonwakude, okanye luncwadi olubalaselisa ukukhafula, ukuziphatha okubi, okanye ugonyamelo. (Duteronomi 18:10-12; INdumiso 11:5) Ngokwenza ihambo ephosakeleyo ibonakale ‘ingembi kangako’ okanye ibe yehlekisayo, ukuzonwabisa okunjalo kudodobalisa imigudu yokuvelisa uphawu lokuhlonel’ uThixo ngokuthiya oko. Kwelinye icala, umthandazo wokunyaniseka uya kunceda, kuba uYesu wathi: “Lindani nithandaze, ukuze ningangeni ekuhendweni; umoya wona okunene unentumekelelo, ke yona inyama ithambile.” (Mateyu 26:41) Ngokuphathelele ukujongana nenkanuko enamandla yasenyameni, omnye umKristu wathi: “Ndiyathandaza. Maxa wambi ndiziva ndingakufanelekelanga ukusondela kuYehova, kodwa ngokuzishukumisela ekuthandazeni, ngokubhenela kuye, ndizuza amandla endiwafunayo.” Uya kusiqonda kakuhle isizathu sokuba uYehova ekuthiyile ukwenza okubi ukuba uyayihlolisisa engqondweni yakho imiphumo yako ebuhlungu.—2 Petros 2:12, 13.

11. Ziziphi izinto ezisenokusikhathaza maxa wambi?

¹¹ Phezu kwayo nje into yokuba unoxolo noThixo, maxa wambi uya kukhathazwa ziingcinezelo nezilingo zamihla le kwanabubuthathaka bakho. Khumbula ukuba, uye wazenza ixhoba elikhethekileyo likaSathana. Ulwa nabo bagcina imithetho kaThixo yaye abo bangamaNgqina kaYehova! (ISityhilelo 12:17) Ngoko, lunokulondolozwa njani uxolo lwakho lwangaphakathi?

Ukuhlangabezana Nobubi Obuphazamisa Uxolo

12. (a) Yintoni eyashukumisela ukubhalwa kweNdumiso 34? (b) IZibhalo zizichaza njani iimvakalelo zikaDavide ebudeni bala mava akhe?

¹² KwiNdumiso 34:19 uDavide wabhala oku, “Buninzi ububi obulihlelayo ilungisa.” Ngokutsho kombhalo osemantla wale ndumiso, uDavide wayibhala emva kokuba ejike emlonyeni wengcwaba. Xa wayesaba kuKumkani uSawule, uDavide wabalekela kuAkishe, ukumkani waseGati ongumFilisti. Abakhonzi baloo kumkani bamazi uDavide baza, bekhumbula ubugorha bakhe bangaphambili esekumkhosi wakwaSirayeli, bakhalaza kuAkishe. Xa uDavide wayivayo incoko yabo, “wawagcina loo mazwi entliziyweni yakhe, woyika kunene ebusweni buka-Akishe, ukumkani waseGati.” (1 Samuweli 21:10-12) Ngapha koko, le yayiyidolophu yakulo Goliyati, yaye uDavide wayelibulele igorha labo—wayede waphatha ikrele leso sigebenga! Ngaba ngoku babeza kusebenzisa eli krele likhulu ukuze banqumle intloko yakhe? Wenza ntoni?—1 Samuweli 17:4; 21:9.

13. Yintoni uDavide awayenzayo ebudeni bobu bubi, ibe sinokuwulandela njani umzekelo wakhe?

¹³ UDavide wakhunga kuThixo ngesijwili esikhulu ukuze afumane uncedo. UDavide wathi, “Usizana lwadanduluka, weva uYehova, walusindisa ezimbandezelweni zalo zonke.” Kwakhona wathi: “Wandihlangula kwiinto zonke endinxunguphala zizo.” (INdumiso 34:4, 6, 15, 17) Ngaba nawe ufunde ukukhunga kuYehova, uzityand’ igila kuye ebudeni bamaxesha osizi? (Efese 6:18; INdumiso 62:8) Nangona unxunguphalo lwakho lusenokungabi lolukhwankqisa njengokuba kwakunjalo kuDavide, sekunjalo uya kufumanisa ukuba uThixo uya kukunika uncedo ngexesha elifanelekileyo. (Hebhere 4:16) Kodwa uDavide wenza okungakumbi kunokuthandaza nje.

14. UDavide wawasebenzisa njani “amandla okucinga,” ibe yintoni uThixo asinike yona ukuze asincede senze akufunayo?

¹⁴ “[UDavide] waziphambanisa ingqondo phambi kwabo, wazigezisa esandleni sabo . . . wathi uAkishe kubakhonzi bakhe, Khangelani, nantsi le ndoda isisihiba; yini na ukuba niyizise kum?” (1 Samuweli 21:13-15) UDavide wacinga icebo awathi wasaba ngalo. UYehova wayisikelela imigudu yakhe. Ngokukwanjalo, xa sijongene neengxaki ezintsonkothileyo, uYehova usilindele ukuba sisebenzise iingqondo zethu size singasuke nje silindele kuye ukuba asicombululele zona. Uye wasinika iLizwi lakhe eliphefumlelweyo, eliya ‘kunika isidenge ubuqili, ukwazi nokunkqangiyela [amandla okucinga, NW],’ (IMizekeliso 1:4; 2 Timoti 3:16, 17) Kwakhona uThixo ulungiselele abadala bamabandla, abanokusinceda sazi indlela yokulondoloza imilinganiselo kaThixo. (1 Tesalonika 4:1, 2) Ngamathuba athile, la madoda anokukunceda ekuphengululeni kwiimpapasho zeWatch Tower Society ukuze ufumane uncedo ekwenzeni isigqibo esifanelekileyo okanye ekuhlangabezaneni nengxaki.

15. Kutheni le nto INdumiso 34:18 iyethuthuzelayo nje?

¹⁵ Kwanaxa intliziyo yethu isithuthumbisa ngenxa yobuthathaka okanye ukusilela kwethu, ukuba sinesimo sengqondo esifanelekileyo, sinokululondoloza uxolo lwethu noThixo. KwiNdumiso 34:18 uDavide wabhala oku: “Usondele uYehova kwabantliziyo zaphukileyo, abasindise abamoya utyumkileyo.” Ukuba sicela ukuxolelwa size sithabathe nawaphi na amanyathelo afunekayo ukuze silungise imicimbi (ingakumbi xa ilukreqo olunzulu), uYehova uya kuhlala esondele kuthi, esixhasa ngokweemvakalelo.—IMizekeliso 28:13; Isaya 55:7; 2 Korinte 7:9-11.

Ulwazi Lobuqu Lunikela Uxolo

16. (a) Yiyiphi enye indlela esithi sizuze ngayo ulwazi oluchanileyo ngoThixo? (b) Cacisa la mazwi kaDavide: “Yivani, nibone ukuba ulungile uYehova.”

¹⁶ Enye indlela esithi ngayo sizuze ulwazi oluchanileyo ngoThixo, ngaphandle kokwamkela inkcazelo yokomoya, kukulubona ngokobuqu uncedo lwakhe lothando. (INdumiso 41:10, 11) Into yokuba uhlangulwe kunxunguphalo ayisoloko ithetha ukuba ingxaki iphele ngokukhawuleza okanye ngokupheleleyo; kusenokufuneka ukuba uqhubeke uyinyamezela. (1 Korinte 10:13) Nangona ubomi bukaDavide bahlangulwayo eGati, wahlala engunothwal’ impahlana kangangeminyaka eliqela, ejongana neengozi ezilandelelanayo. Kuko konke oku, uDavide wakubona ukunyanyekelwa nokuxhaswa nguYehova. Wayelusukele uxolo noThixo waza walufumana, yaye waqonda ukuba abo benjenjalo “abasweli nanye into elungileyo.” Eyiqonda ngokuphuma kumava obuqu indlela uYehova awamxhasa ngayo ebudeni bobubi, UDavide wayenokuthi: “Yivani, nibone ukuba ulungile uYehova. Hayi, uyolo lomfo ozimela ngaye!”—INdumiso 34:8-10, 14, 15.

17. Ukuzimela ngoYehova ebudeni bobubi kwaba nawuphi umphumo kwenye intsapho?

¹⁷ Ukuzimela ngoYehova ebudeni beenzima kuya kukunceda nawe ukuba ‘uve uze ubone ukuba uYehova ulungile.’ Ngenxa yengozi, umKristu okumbindi-ntshona weUnited States waphulukana nomsebenzi owawuhlawula kakuhle awayekuwo kangangeminyaka eli-14. Ekubeni babengenamali, yena nentsapho yakhe bakhunga kuThixo. Noko ke, kwangaxeshanye bazinciphisa iindleko, bebhikica kumasimi akufuphi, ibe beloba ukuze bafumane ukutya. Ngokuncedwa ngabathile abasebandleni nangokusebenza umsebenzi wesingxungxo xa ufumaneka, le ntsapho yabantu abane yakwazi ukuphila. Kunyaka emva kwengozi, umama wekhaya wathi: “Sinokuzikhohlisela ekucingeni ukuba sikholose ngoYehova, ngoxa ngokwenene sikholose ngamandla ethu, ngeqabane lethu, okanye ngomsebenzi wethu. Noko ke, thina okunene sifunde ukukholosa nje Ngaye. Zonke ezinye izinto zinokususwa, kodwa uYehova akasokuze asishiye—nangaliphi na ithuba. Nangona izinto esizifunayo zinqongophele, ulwalamano Iwethu noYehova njengentsapho lusondele ngakumbi.”

18. Yintoni eya kukunceda ukuba unyamezele kwaneengxaki ezizingisayo?

¹⁸ Ewe, ubunzima bokufumana imali busenokuzingisa. Okanye umntu usenokuthwaxwa sisigulo sasemzimbeni esinganyangekiyo; ukungavisisani komntu nomnye umntu; ukuphazamiseka kweemvakalelo, okunjengokudandatheka; okanye enye yeengxaki ezininzi. Kanti, ngokumazi ngokwenyaniso uThixo, uya kuba nokholo lokuxhaswa nguye. (Isaya 43:10) Le ntembelo ingenakwaphulwa iya kukunceda ukuba unyamezele uze ube ‘noxolo lukaThixo, olugqithisele kuko konke ukuqonda.’—Filipi 4:7.

19. Sazi njani ukuba uYehova akazithabathi lula iimbandezelo zethu?

¹⁹ Xa ufumana ubunzima, ungaze ulibale ukuba uYehova uyakwazi oko kukubandezelayo. Kwindumiso awayibhala xa wayecinga ngamava akhe eseseGati, uDavide wamcela uYehova esithi: “Yitha iinyembezi zam entsubeni yakho; azisencwadini yakho na?” (INdumiso 56:8) Ngokuqinisekileyo, uThixo wasiphulaphula isicelo sikaDavide. Hayi indlela ekuthuthuzela ngayo ukwazi ukuba uThixo wayengazihlanganisa ezo nyembezi zazibangelwe kukuba lusizana nalunxunguphalo aze, ngokungathi kunjalo, azithe entsubeni yakhe, kanye njengokuba umntu engagalela iwayini exabisekileyo okanye amanzi okusela kwinto elolo hlobo! linyembezi ezinjalo zazingasoloko zikhunjulwa, ewe, zibhalwe encwadini kaThixo. Hayi indlela eyeyothando ngayo inkathalo kaYehova!

20. Sinokulwandisa njani uxolo lwethu noThixo?

²⁰ Ngoko ukubhaptizwa kwakho kusisiqalo nje solwalamano oluseluxolweni noThixo. Ngokuqhelana kakuhle neempawu zobuqu zikaThixo nezikaYesu, nangokukubona ngokobuqu ukuxhaswa nguYehova ebudeni beemvavanyo, uya kulwandisa uxolo lwakho noThixo. Akuyi kuthi nje kuphela ube nolwalamano noYehova oluthi lube likhusi lokunqabiseka kodwa kwakhona uya kuba nethemba elixabisekileyo lokuphila ngonaphakade eParadisi, apho uya ‘kuziyolisa ngobuninzi boxolo.’—INdumiso 37:11, 29.

[Umbhalo osemazantsi]

Uyakhumbula Na?

◻ Kungaziphi iindlela esinokuzuza ngazo ulwazi oluchanileyo ngoThixo noYesu?

◻ Ukuxelisa uThixo noYesu kuya kusibangela ukuba senze ntoni?

◻ Simxelisa njani uThixo ekuthiyeni okubi?

◻ Sinokululondoloza njani uxolo phezu kwazo nje iinzima?

[[Umfanekiso okwiphepha 17]

UYesu wakwala ukuvumela intiyo yebutho labantu ukuba ithintele ukunikela kwakhe ubungqina. Ngaba uyayixelisa inzondelelo yakhe ngokushumayela?

[Imifanekiso ekwiphepha 18]

Xa wayejongene nengxaki enzulu, uDavide wakhunga kuYehova . . . . . . ibe wasebenzisa amandla akhe okucinga ukuze acebe indlela yokusaba. UYehova wawuva umthandazo kaDavide