Izifundo Ezivela KwiZibhalo: Amosi 1:1–9:15

Ukuphanziswa Kohlanga

“ZILUNGISELELE ukuhlangabeza uThixo wakho,” utsho “uYehova uThixo wemikhosi” kuhlanga lwakwaSirayeli. (Amosi 4:12, 13) Siyintoni isizathu soko? Emfanyekiswe kukuma kakuhle ngakwezoqoqosho, amaSirayeli ayewulibele uMthetho wakhe ibe ayenetyala lokungcolisa ilizwe lakhe elingcwele ngonqulo lwezithixo, ngokuziphatha kakubi, ngokuphalaza igazi nangogonyamelo.

Njengomprofeti kaYehova, uAmosi uyaphakanyiswa ukuze avakalise isigidimi esilumkisayo kungekuphela nje kuhlanga lwakhe lwakwaYuda kodwa ngokukhethekileyo kubukumkani bangasentla bakwaSirayeli. Uyamgweba uSirayeli ngenxa yokuphila kwakhe ubomi bokwenza unothanda ibe umxelela kwangaphambili ukuba ekugqibeleni uza kuphanziswa ziintlanga ezilutshaba. Incwadi ka-Amosi, eyabhalwa kwixesha eliphakathi kowama-829 B.C.E. nowama-804 B.C.E., isenza siwaqonde amandla kaThixo okuzibona kusengaphambili iintlekele ezizayo, ibe ikwanikela izilumkiso ezithile ezisexesheni.

Intshabalalo Yeentshaba ZikaThixo Enjengomlilo

Akukho namnye unokusinda kwimigwebo kaThixo. Hayi indlela okwangqineka kuyinyaniso ngayo oku kwiintlanga zaseDamasko (eSiriya), eGaza (kwelamaFilisti) eTire, kwaEdom, kwa-Amon, kwaMowabhi nakwaYuda! UYehova akayi ‘kusibuyisa umva’ isandla sakhe nxamnye nabo ngenxa yokwenza kwabo okubi. Sekunjalo, ukuxelelwa kwabo kwangaphambili ngentlekele kwanceda kuphela ekugxininiseni umgwebo uSirayeli awayejamelene nawo ngenxa yokusilela kwakhe ukulondoloza ulwalamano lwakhe lomnqophiso noThixo nokugcina imithetho yakhe.—Amosi 1:1–2:16.

Sithobele isilumkiso sikaThixo. “Ndaze nina nedwa emizalwaneni yonke yehlabathi,” utsho uYehova kuSirayeli. (Amosi 3:2) Noko ke, ikhondo labo lesono labonakalisa ukungabi nantlonelo kwigama nolongamo lukaThixo. Abaninzi babezimisele ukuba zizityebi, bephila kubuncwane obungenamsebenzi ‘benezindlu zasebusika kunye nezindlu zasehlotyeni,’ ngemali yabazalwana babo. (Amosi 3:15) Belinganisa ngezikali zenkohliso, bathi ngokuzingca bawaqhatha amahlwempu. Ukulushiya kwabo unqulo oluyinyaniso kwakuthetha ukuba isohlwayo sikaYehova sasifanelekile. Ukanti, ‘uYehova wayengayi kwenza nto engathanga aluhlekeze ucweyo lwakhe kubakhonzi bakhe.’ Ngaloo ndlela, uAmosi uyixela kwangaphambili imigwebo kaYehova aze abalumkise: “Zilungiselele ukuhlangabeza uThixo wakho.”—Amosi 3:1–4:13.

UYehova Ulusindiso

UThixo uya kubonisa inceba kwabo baguqukayo. UYehova ubongoza uSirayeli esenjenje, “Quqelani kum, niphile.” (Amosi 5:4) “Thiyani okubi, nithande okulungileyo.” (Amosi 5:15) Phofu ke, amazwi anjalo, ayatyeshelwa. Abawexuki bakhetha ukuya eBheteli naseGiligali, iindawo zonqulo lwezithixo, ukuze banikele amadini koothixo bobuxoki. (Amosi 5:26; 1 Kumkani 12:28-30) Ezingqengqelweni zeempondo zendlovu eziyokoyoko, abenzi bobubi abajongeka bebahle basela iwayini enencasa baze bazingxale ngokutya nangeoli eyiyeyona ikhethiweyo. (Amosi 5:11; 6:4-6) “Imini kaYehova” iyeza, ibe uThixo ‘uzifungile’ ukuba uya kumtshabalalisa uSirayeli. (Amosi 5:18; 6:8) UYehova uza kuvelisa uhlanga ukuba lumbandezele uSirayeli luze lumkhokelele ekuthinjweni.—Amosi 5:1–6:14.

Yoyika uYehova, kungekhona abachasi. Intshabalalo kaSirayeli yayinokuziswa libubu leenkumbi okanye umlilo obulalayo. UAmosi wambongoza uThixo ngenxa kaSirayeli, ibe “wazohlwaya uYehova” ngenxa yomgwebo wakhe, ngoko awuzange uphunyezwe ngale ndlela. Noko ke, njengomakhi okhangela ukulungelelana kodonga ukusuka emgangathweni ukuya phezulu esebenzisa ilothe yokulinganisa, uYehova ‘akayi kubuya aphinde adlule’ kuSirayeli. (Amosi 7:1-8) Uhlanga lumele lutshatyalaliswe. Ecatshukiswe sisigidimi somprofeti, uAmatsiya, umbingeleli wonqulo lwethole, ngobuxoki utyhola uAmosi ngokungcatsha aze amyalele ukuba ‘ahambe aye ezweni lakwaYuda, aze angaphindi aprofete’ eBheteli. (Amosi 7:12, 13) Ngaba uAmosi uba nentaka? Nakanye! Ngokungenaloyiko ukuxela kwangaphambili ukufa kuka-Amatsiya nentlekele ezela indlu yakhe. Njengoko iziqhamo zihlanganiswa ngelixa lokuvuna, ngoko lixesha lokuba uYehova abonisane noSirayeli. Akuyi kubakho kusinda.—Amosi 7:1–8:14.

Kukho ithemba ngabo bakholose ngoYehova. UYehova uthi, “Andiyi kuyitshabalalisa iphele indlu kaYakobi.” Kusekho ithemba ngabathile kwinzala kaYakobi kodwa kungekhona ngaboni. Ukutshatyalaliswa kwabo kuqinisekisiwe. Sekunjalo, uYehova uza ‘kubabuyisela abathinjiweyo’ bakwaSirayeli.—Amosi 9:1-15.

Oko kusisifundo namhlanje: Abo bazenza iintshaba zikaThixo baya kukufanelekela ukugwetyelwa ukufa. Noko ke, nabani na osithobelayo isigidimi esisisilumkiso sikaThixo sokuguquka uya kwenzelwa inceba nguYehova aze ahlale ephila. Ukuba siyamoyika uThixo, asiyi kubavumela abachasi ukuba basithintele ekwenzeni ukuthanda kwakhe.

[Ibhokisi ekwiphepha 22]

UKUHLOLISISWA KWEENDINYANA ZEBHAYIBHILE

○ 1:5—Izixeko zamandulo zazineendonga eziphakamileyo namasango amakhulu. Ukuze la masango atshixwe, imivalo emide eyenziwe ngeentsimbi okanye ngobhedu yayisanyiswa ukuze iwaxhase ngaphakathi. ‘Ukwaphulwa komvalo weDamasko’ kwathetha ukuba ikomkhulu laseSiriya laliya kuwela kuma-Asiriya. Kwakuya kuba ngathi amasango esixeko ayengenakutshixwa ngenxa yokuba imivalo yawo yayaphukile.—2 Kumkani 16:8, 9.

○ 4:1—Abafazi abathanda ubunewunewu ababehlala eSamariya kwakubhekiselwa kubo ‘njengeemazi zaseBhashan.’ Amadlelo aseBhashan achumileyo ayefak’ isandla kwimveliso yohlobo oluhle lwezilwanyana ezifuyiweyo. (Duteronomi 32:14; Hezekile 39:18) Kuyabonakala ukuba ezi ‘mazi zaseBhashan’ zizingcayo zazinyanzelela ‘iinkosi’ zazo, okanye amadoda, ukuba zifune ngenkani imali yamahlwempu ukuze zizalise ‘izindlu zazo zeempondo zeendlovu.’ (Amosi 3:15) Noko, izenzo ezinjalo, zaphumela kwimpindezelo kaThixo.

○ 4:6—Ibinzana elithi “ubumsulwa bamazinyo” licaciswa libinzana elinxusene nalo elithi ‘ukusweleka kwesonka.’ Ngaloo ndlela libonakala libhekisela kwixesha lendlala, xa amazinyo ayecocekile ngenxa yokuba kwakungekho nto ingatyiwayo. Kuyabonakala ukuba, uYehova wayekubonakalisile ukungakholiswa kwakhe bubukumkani bezizwe ezilishumi obabunqula izithixo ngokubangela ukuba kubekho indlala kwelo lizwe, kwanjengokuba wayelumkisile kude kudala ngaphambili. (Duteronomi 28:48) Noko ke, le mbonakaliso yomgwebo wobuthixo kwanezinye iimbonakaliso azizange ziyifikelele intliziyo yaba bantu bophula umnqophiso.—Amosi 4:6, 8-11.

○ 5:2—Xa uAmosi wavakalisa isiprofeto sakhe, abantu kunye nelizwe lakwaSirayeli babengoyiswanga yaye bengaphangwanga sisizwe sasemzini. Ngaloo ndlela, babemntwiswa njengeentombi ezinyulu. Noko ke, kwiminyaka nje embalwa, uSirayeli oyintombi enyulu wayeza kuwela kuma-Asiriya aze ‘afuduselwe kude ngaphaya kweDamasko.’ (Amosi 5:27) UAmosi uqiniseke gqitha ngokutshatyalaliswa kukaSirayeli ngenxa yokungathembeki kwakhe kangangokuba ukuchaza njengokusele kwenzekile.

○ 7:1—‘Ukusikelwa kukakumkani ingca’ ngokunokwenzeka kwakubhekisela kwirhafu okanye umnikelo ofunwa ngegunya ngukumkani ukuze anike izilwanyana namahashe akhe omkhosi ukutya. Irhafu yokumkani yayifanele ihlawulwe kuqala, yaye emva koko abantu babenokufumana “ingca,” okanye imifuno ababenokuyisebenzisa, ukulungiselela ingenelo yabo. Kodwa phambi kokuba babe nokwenjenjalo, kwafika iinkumbi zayitshayela loo mifuno.

○ 8:2—Iziqhamo zasehlotyeni zazikhiwa ngasekupheleni kwexesha lokuvuna. Ngaloo ndlela ukuphela konyaka wezolimo kwafuzisela ukuba uSirayeli wayefikelele esiphelweni sakhe. UYehova wavakalisa oku, “Andiyi kubuya ndiphinde ndidlule kubo.” Olu hlanga lwaluyifanelekele intshabalalo yomgwebo wakhe.

○ 9:7—Ngenxa yoomawokhulu bawo abathembekileyo, uYehova wawanyula amaSirayeli, wabahlangula ookhokho bawo kubukhoboka baseYiputa, waza wawazisa kwilizwe lakwaKanan. Kodwa ayengenaso isiseko sokuba nekratshi ngenxa yoku, kuba ububi bawo bawenza afana namaKushi. (Thelekisa amaRoma 2:25.) Ngokukwanjalo, ukuhlangulwa kwawo eYiputa kwakungesosiqinisekiso sokuba ayeya kuhlala engawamkelekileyo kuThixo kanye njengokuba amaFilisti namaSiriya ayehlala kwimimandla awayengahlali kuyo ngaphambili. Ukuba kumnombo woosolusapho abathembekileyo kwawo kwakungayi kuwasindisa amaSirayeli. Ukuma okwamkelekileyo kuThixo kuxhomekeke ekuzithobeni ekuthandeni kwakhe.—Amosi 9:8-10; IZenzo 10:34, 35.