“Izinto Ezenza Sibe Nolindelo Olukhulu”

KWAKUNGENTSASA efudumeleyo yangeCawa, ngoSeptemba 10, xa kwakuhlanganisene abantu abangama-4 155 kwiHolo entle yeNdibano yamaNgqina kaYehova ekwisiXeko saseJersey, eNew Jersey, belungele ukuvuyisana nabo babephumelele kwiklasi yama-87 yeSikolo seBhayibhile seWatchtower saseGiliyadi. Kwabo babezile kwakukho abafundi abangama-24 neendwendwe ababezimemile ndawonye namalungu entsapho yaseBheteli eseBrooklyn nekwiifama zoMbutho.

Ngentsimbi ye-10 kusasa abaphulaphuli bacelwa nguAlbert Schroeder ukuba bazole, owayekhonza njengosihlalo ngolu suku. Emva kwengoma yokuvula, uJohn Barr wenza umthandazo. Bobabini aba bazalwana bangamalungu eQumrhu Elilawulayo. UMzalwan’ uSchroeder wathi gqabagqaba ngeklasi leyo waza wayithi thupha into yokuba abo babephumelele “babelungele ukuba nesabelo kumsebenzi owenziwa kwihlabathi lonke ngamaNgqina kaYehova, ngoku kumazwe angama-210.” Wandula ke watshayelelela izithethi ezisixhenxe ezaziza kugalela apho.

URobert Wallen, owayesebenza kwiiOfisi zeQumrhu Elilawulayo kwikomkhulu laseBrooklyn, intetho yakhe wayeyisekele kumxholo othi, “Thandanani Ngothando Olunyamekileyo,” ngokusekelwe kweyoku-1 kaPetros 4:8. Wathi abavangeli basemazweni kufuneka bancedane, ibe ekubeni bonke abafundi baloo klasi babetshatile, waba ngathi uyatsolisa kwezo zibini zitshatileyo. Waluleka ngelithi, “umfazi kufuneka ayithande indoda yakhe nakubeni esenokufunda msinyane ulwimi lwasemzini kunendoda yakhe. Ufanele abe ngoqondayo nonolwazelelelo. Kwakhona, ufanele azame ukuba ngoqondayo ukuba ibisebenza kumsebenzi wosuku lwayo lokupheka evekini!” (Ngokuqhelekileyo, umvangeli wasemazweni ngamnye wabelwa usuku oluthile lokulungiselela izidlo zosuku ukwenzela bonke abakwikhaya labavangeli basemazweni.) Sandula ke isithethi senza amava ezinto ezibangela udandatheko nezihlekisayo ngamadoda athile xa efunda ukupheka, njengenye eyathi yasebenzisa ibaking soda kunokuba isebenzise ibaking powder. UMzalwana uWallen wakwalatha kwinto yokuba indoda ifanele “ibonakalise ingqiqo ngeemfuno zomfazi wayo,” ekubeni indoda inokuchithela ixesha elininzi ekunyamekeleni iimbopheleleko zebandla. Kumadoda nakubafazi, wathi: “Yakhanani ngalo lonke ixesha; musani ukunukunezana. Kuphepheni ukuzahlula. Ibe xa nenze iimpazamo, zivumeni.”

Isithethi esalandelayo, uDaniel Sydlik, olilungu leQumrhu Elilawulayo, wakhetha umxholo othi: “Wugcineni Uvutha Umoya KaThixo,” ngokusekelwe kweyoku-1 yabaseTesalonika 5:19. Wathi, “Umlilo unokufudumeza uze utshabalalise. Maxa wambi abavangeli basemazweni bayakhuthaza yaye maxa wambi bayoyikisa. Esinye isankonde esiNtsundu sakhe sathi: ‘Vuthela kancinane,’ ngokungathi uvuthela intlantsi ofuna yokhele umlilo! Xa ndithetha ngezinto eniya kuzifumana kwiindawo enabelwe kuzo—imibhobho yamanzi angcolileyo, iimpukane, ingxolo ebangelwa zizithuthi, ilizwe eningalaziyo, unqulo eningaqhelananga nalo—yibani nentlonelo. Akulungisi zinto ngokubhabhazela. Fundani ‘ukuvuthela kancinane’ nize niwugcine uvutha umoya kaYehova.”

Emva koko kwalandela uKenneth Flodin ongumveleli weKhaya laseBheteli kwiiFama zeWatchtower, etyatyadula ngomxholo othi, “Kwizabelo Zenu Yibani Nehlombe Nobulumko Obukhulu.” Ekubeni ngoku iSikolo saseGiliyadi sikwiiFama zeWatchtower, bonke abo babephumelele babeqhelene kakhulu noMzalwan’ uFlodin. Kwintetho yakhe wathetha ngeenkalo ezimbini ekufuneka kubonakaliswe ubulumko kuzo: (1) ukuthanda izinto eziphathekayo (2) intetho nengcinga etenxileyo. Waluleka ngelithi kubo “kuphepheni ukuzingca nizenizincame. Tsolisani amehlo enu kulonwabo nakwizinto ezintle kwihlabathi elitsha; musani ukuzifuna ngoku.” Ukuze eso sithethi sincede abafundi baphephe isimo sengqondo esingakhuthaziyo, sacaphula iNumeri 13:28, 32. Sathi, “Maxa wambi, abantu babona into efanayo, ibe abanye baya kuba nembono engafanelekanga ngayo, abanye bona baya kuba nembono entle ngayo. NjengoKalebhi wamandulo, kholosani ngoYehova. Xelelani abanye ngeengcamango zenu ezintle. Ibe ukuba nihlangabezana nentetho edimazayo, tshintshani umbandela ukuze niphephe ingcamango engafanelekanga eninokuba nayo.”

ULloyd Barry, olilungu leQumrhu Elilawulayo nowayesakuba ngumvangeli wasemazweni, wanikela icebiso elisebenzisekayo. Wathi, “Uthando, uvuyo noxolo ziimpawu ezifunekayo kubavangeli basemazweni abatsha. Niza kuba neliso elibukhali ekuboneni iintsilelo zabanye kwikhaya lenu labavangeli basemazweni.” Wabalisa ngezakhe iintsuku eJapan xa abavangeli basemazweni babenandipha isidlo sentlanzi imihla ngemihla, kodwa emva koko kwafika abavangeli basemazweni ababesalana nentlanzi. Ngoko ngenxa yothando kwababesandul’ ukufika kwasetyenziswa izidlo ezizezinye. Wakwacebisa ngelithi: “Yibani ngabasoloko belungele ukuhleka: ningaze nivumele ilanga ukuba litshone nineengxaki. Gcinani ikhaya likwimeko yoxolo, ibe ke niya konwaba kubomi bokuba ngabavangeli basemazweni.”—Efese 4:26.

UJack Redford, ongomnye wabahlohli eGiliyadi, emva koko wathetha ngombandela othi: “UYehova Uya Kuluphelelisa Uqeqesho Lwenu,” esekela amagqabaza akhe kweyoku-1 kaPetros 5:10. Wathi: “UYehova unokuniqeqesha ngokuvumela ukuba kuvele iimeko ekunzima ukuba ningazisingatha. Njengoko waqeqesha abapostile ukuba bakwazi ukusingatha iingxabano, uya kuniqeqesha nani. Musani ukulahla ithemba xa kukho ukungavisisani ngembono ethile. Kulungeleni ukuhlanganisela ubuntu benu. Ikratshi lenza kube nzima ukwenza oku, kodwa ngokuthobeka kunokwenzeka. Fundani ukuba bhetyebhetye. Kwakhona uYehova uya kuniqeqesha ngendlela yokuba niqhubane kakuhle nabanye. ‘Musani ukunikela intliziyo yenu kuko konke okusenokuthethwa ngabantu’ ngani.” (INtshumayeli 7:21, 22) Intshutshiso ikwaluqeqesho. Abavangeli basemazweni abaye banyamezela intshutshiso bonwabile yaye abazisoli nganto, kuphela banovuyo njengoko beye baqeqeshwa yintshutshiso.

U-Ulysses Glass, okwangomnye umhlohli, waphosa amazwi akhe okugqibela kwabo babephumelele. Wabek’ umnwe kweyabase-Efese 4:1-3, encoma iklasi leyo ngokubonakalisa iimpawu ezimanyanisayo ezichazwe apho yaye ebakhuthaza ukuba baqhubeke besenjenjalo, ngokuthi: “Uxolo nguthunywashe omanyanisayo, ibe lubalulekile ukuze kubekho umanyano.” Wahlabela mgama neyabase-Efese 4:4-6 waza wagxininisa kubungangamsha bomoya kaThixo, ebakhumbuza bonke ukuba “uYehova unguMthombo wawo onke amandla amakhulu. Sifanele sihlale simoyika; kuyintlekele ukuwela ezandleni zakhe.”—Hebhere 10:31.

Ulindelo Olukhulu

Emva koko bonke baphulaphula ngolangazelelo olukhulu kuTheodore Jaracz, olilungu leQumrhu Elilawulayo lamaNgqina kaYehova, owathetha ngomxholo obalaselisiweyo othi: “Izinto Ezenza Sibe Nolindelo Olukhulu.” Ethetha ngokusekelwe kweyoku-1 yabaseKorinte 2:9, wathi: “Le ndinyana ayithethi ngezinto eziphathekayo, kuba indinyana elandelayo, eyoku-1 yabaseKorinte 2:10 ithetha ‘ngeenzulu zikaThixo.’ Oku kuquka ‘ubulumko bukaThixo’ ngokunxulumene ‘nemfihlelo engcwele,’ ‘ubulumko bakhe obusemfihlekweni’ obuye babonakala ngaphaya kwenkqubo yamazulu, ewe, kuThixo ngokwakhe.” (1 Korinte 2:7) Abaphulaphuli bacelwa ukuba batyhile kuIsaya 64:4, owayesisikhumbuzo sokuba ‘nolindelo’ olunjalo kuThixo nangezinto azilungiseleleyo.

Ezinjani zona izinto abazilindeleyo ngokwenene abantu bakaThixo! UMzalwan’ uJaracz waphuhlisa ezi zinto zilandelayo: “Ngowe-1919 yayikukuwa kweBhabhiloni Enkulu; ngowe-1922 kwahlatyw’ ikhwelo kwiphulo elibangel’ imincili kusithiwa ‘makuvakaliswe uKumkani noBukumkani,’ kushunyayelwe uBukumkani obumiselweyo kulo lonke ihlabathi; ngowe-1935 abantu bakaThixo bafunda ngembaluleka ‘yesihlwele esikhulu’ kwiSityhilelo 7:9; ngowe-1943 babona iSikolo saseGiliyadi siqalisa ukuthumela abavangeli basemazweni kwiziphelo zomhlaba; namhlanje, ngowe-1989, nina baphumeleleyo ninelungelo lokuxelela abantu abakulangazelelayo ukuphulaphula izinto ezilungileyo kwiindawo enabelwe kuzo.”

Emva kokuba benikwe iidiploma zabo, omnye umfundi wafunda ileta echukumis’ intliziyo yokubonakalisa uxabiso egameni leklasi leyo.

Emva kwemini, uLon Schilling, umlungelelanisi weKomiti yeeFama zeWatchtower, waqhuba ushwankathelo lweMboniselo. Emva koko abafundi bacula uncuthu lweengoma baza benza imiboniso yamava abo enkonzo yasentsimini. Emva koku, abavakalisi basekuhlaleni benza umdlalo weBhayibhile osexesheni onomxholo othi: “Ukuhlangabezana Namaqhinga KaSathana.” Ekuqukumbeleni, emva kokuphulaphula udliwano-ndlebe lwabathandathu abasandul’ ukuphumelela, isihlwele esasonwabile savuma ingoma yokuqukumbela ibe sakuvuyela ukuthelela kumthandazo owawusenziwa ngumongameli weSikolo saseGiliyadi oneminyaka engama-96 ubudala, uFrederick Franz.

[Ibhokisi ekwiphepha 23]

ISILINGANISELO SAMANANI EKLASI:

Inani lamazwe awayenabameli: 5

Inani lamazwe ababelwa kuwo: 10

Inani lezibini ezitshatileyo: 12

Isimbuku sabafundi: 24

Umlinganiselo wobudala: 30,9

Umlinganiselo weminyaka besenyanisweni: 13,4

Umlinganiselo weminyaka kubulungiseleli bexesha elizeleyo: 9,2

[Umfanekiso okwiphepha 23]

Ukuphumelela KweKlasi Yama-87 KwiSikolo SeBhayibhile SeWatchtower SaseGiliyadi

Kuludwe olungezantsi, kubalwa ukusuka kwabemi kuluhlu olungaphambili ukuya kwabangasemva, yaye amagama adweliswe ukusuka ngasekholo ukuya ngasekunene kuluhlu ngalunye.

(1) Heindel, E.; Andrews, D.; Casavant, D.; Montanez, E.; Nale, P.; Koukaras, S. (2) Miell, T.; Heithaus, M.; Melton, T.; Hagberg, N.; Kettinen, M. (3) Kettinen, L.; Andrews, W.; Koukaras, E.; McCollough, S.; Melton, G.; McCollough, J. (4) Heindel, W.; Casavant, G.; Miell, G.; Montanez, J.; Nale, M.; Hagberg, I.; Heithaus, K.