Ngoobani Ngokwenene Abanobizo Lwasezulwini?

UYEHOVA uyasithanda isizwe esingabantu. Kaloku, olu thando lukhulu kangangokuba wanikela ngoNyana wakhe, uYesu Kristu, njengentlawulelo yokubuyisela oko kwalahlwa ngubawomkhulu wethu uAdam! Ibe yayiyintoni leyo? Ubomi bomntu obuhlala buhleli, obugqibeleleyo bunawo onke amalungelo namathemba abo. (Yohane 3:16) Le ntlawulelo yayikwayimbonakaliso yothando uYesu analo ngoluntu.—Mateyu 20:28.

Uthando lukaThixo luye lwabonakaliswa ngezithembiso ezibini ezinikelwa nguThixo nezisekelwe kwixabiso lentlawulelo likaYesu. (1 Yohane 2:1, 2) Ngaphambi kokuba uYesu afe njengomntu, ekuphela kwethemba elalivulekele abo banenkoloseko kaThixo yayilelo lobomi kumhlaba oyiparadisi. (Luka 23:43, NW) Noko ke, emva kwePentekoste yowama-33 C.E., uYehova wanikela ithemba lasezulwini kwabo ‘bomhlambi omncinane.’ (Luka 12:32) Kodwa kwenzeke ntoni kula maxesha akutshanje? Ukususela ngowe-1931 isigidimi soBukumkani siye sanikela ingqalelo engakumbi ‘kwezinye izimvu,’ yaye ukususela ngowe-1935 ukusa phambili uThixo ubehlanganisela kuye “isihlwele esikhulu” sabo babumvu ngoKristu. (Yohane 10:16; ISityhilelo 7:9) UThixo uye wabeka ezintliziyweni zaso ithemba lobomi obungunaphakade kumhlaba oyiparadisi. Sifuna ukudla ukutya okugqibeleleyo, silawule izilwanyana ngokunothando size sinandiphe unxulumano nabantu abangoowaso abalungileyo ngonaphakade.

Ababingeleli Nookumkani Abanolwazelelelo

Ekubeni uthando lwashukumisela uYesu ukuba anikele ngobomi bakhe njengentlawulelo, ngokuqinisekileyo uya kuba nguKumkani wasezulwini onolwazelelelo. Kanti, uYesu akayi kuba yedwa ekubuyiseleni uluntu emfezekweni ebudeni boLawulo lwakhe Lweminyaka Eliwaka. UYehova wenze ilungiselelo labanye ookumkani abanolwazelelelo ezulwini. Ewe, “baya kusuka babe ngababingeleli bakaThixo nabakaKristu, babe ngookumkani kunye naye iminyaka eliwaka.”—ISityhilelo 20:1-6.

Bangaphi abalawuli uKristu aya kulawula nabo, ibe banyulwa njani ukulungiselela ilungelo elimangalisa kangako? Kaloku, umpostile uYohane wabona abali-144 000 bemi phezu kweNtaba yeZiyon esezulwini beneMvana, uYesu Kristu. Ekubeni ‘bethengwe bephuma ebantwini,’ baya kukwazi okuthethwa kukuba namava eemvavanyo, ukunyamezela iinzima zokungafezeki, ukubandezeleka nokufa njengabantu. (ISityhilelo 14:1-5; Yobhi 14:1) Ngoko ke, olunjani lona ulwazelelelo aba kumkani abangababingeleli abaya kuba nalo!

Ubungqina Bomoya

Abali-144 000 ‘banentambiso evela koyiNgcwele,’ uYehova. (1 Yohane 2:20) Kukuthanjiselwa ithemba lasezulwini. UThixo ‘ubatywinile wabaqinisa, wabanika isinyaniso soMoya, saba sezintliziyweni zabo.’—2 Korinte 1:21, 22.

Ewe, abo banobizo lwasezulwini banobungqina bomoya kaThixo ngoko. Ngokuphathelele oku, uPawulos wabhala oku kumaRoma 8:15-17: “Anamkelanga moya wabukhoboka, ukuba nibuye noyike; namkele umoya wokwenziwa oonyana, esidanduluka ngawo sithi, Abha, Bawo. UMoya ngokwakhe ungqinelana nomoya wethu, ukuba singabantwana bakaThixo. Ukuba ke singabantwana, sikwaziindlalifa; iindlalifa zikaThixo, iindlalifa ke kunye noKristu; ukuba okunene siva ubunzima kunye naye, ukuze sizukiswe nokuzukiswa kunye naye.” Kungomoya kaThixo, okanye amandla asebenzayo, abathi abathanjisiweyo badanduluke besithi, “Abha, Bawo!”

Ubungqina obuyintloko bokuba umntu uye wathanjiselwa ubizo lwasezulwini ngumoya, okanye imvakalelo enzulu, yokuba kulwalamano lonyana noyise. (Galati 4:6, 7) Umntu onjalo uqiniseke ngokupheleleyo ukuba uye wazalelwa kulwalamano lokomoya loyise nonyana nguThixo njengomnye weendlalifa ezimanyeneyo ezili-144 000 zoBukumkani basezulwini. Unokunikela ubungqina bokuba ithemba lakhe lokuphila ezulwini asingomnqweno ohlakulelwe nguye okanye intelekelelo yakhe; kunoko, lithemba elivela kuYehova ngenxa yokusebenza komoya kaThixo kuye.—1 Petros 1:3, 4.

Phantsi kwempembelelo yomoya oyingcwele kaThixo, umoya, okanye isimo sengqondo esinzulu, kwabo bathanjisiweyo sisebenza njengamandla abashukumisayo. Sibashukumisela ukuba basabele ngendlela efanelekileyo koko kuthethwa liLizwi likaThixo ngethemba lokuphila ezulwini. Bakwasabela ngendlela efanelekileyo kwiinkqubano zikaYehova nabo ngomoya oyingcwele. Ngaloo ndlela, baqinisekile ukuba bangabantwana neendlalifa zokomoya zikaThixo.

Xa abo bathanjisiweyo befunda oko kuthethwa liLizwi likaThixo ngabantwana bakhe bokomoya nangethemba lokuphila ezulwini, utyekelo lwabo olungathintelwa nto lukukuthi, ‘Ndim lowo!’ Ewe, basabela ngovuyo xa iLizwi loYise lithembisa ngomvuzo wasezulwini. Bathi, ‘Ndim lowo!’ xa befunda oku: “Zintanda, ngoku singabantwana bakaThixo.” (1 Yohane 3:2) Ibe xa abo bathanjisiweyo befunda ukuba uThixo uye wazala abantu ukuba babe “yintlahlela yazo izidalwa zakhe,” utyekelo lwabo olungokwasengqondweni lukukusabela ngale ndlela, ‘Ewe, wandizalela loo njongo.’ (Yakobi 1:18) Bayazi ukuba baye ‘babhaptizelwa kuKristu Yesu’ nasekufeni kwakhe. (Roma 6:3) Ngoko banolweyiseko oluqinileyo lokuba bayinxalenye yomzimba wokomoya kaKristu yaye banethemba lokudlula kukufa okunjengokwakhe nokuvuselwa kubomi basezulwini.

Ukuze babudle ilifa uBukumkani basezulwini, abo bathanjisiweyo bamele ‘kube kokukhona bekhuthalele ukulwenza luqine ubizo nonyulo lwabo.’ (2 Petros 1:5-11) Bahamba ngokholo baze bazigcine bekhula ngokomoya, njengoko besenjenjalo abo banamathemba okuphila emhlabeni. Ngoko, yintoni enye ekhoyo engqinelana nomoya?

Isizathu Sokuba Bathabathe Esidlweni

AmaKristu athanjisiweyo akafuni kuya ezulwini kuba enganeliswa bubomi basemhlabeni bale mihla. (Thelekisa uYuda 3, 4, 16.) Kunoko, umoya oyingcwele uyangqina ngomoya wawo ukuba angabantwana bakaThixo. Akwaqinisekile ukuba aye angeniswa kumnqophiso omtsha. Abo bakulo mnqophiso nguYehova uThixo noSirayeli wokomoya. (Yeremiya 31:31-34; Galati 6:15, 16; Hebhere 12:22-24) Lo mnqophiso, owenziwa wasebenza ngegazi likaYesu elaphalalayo, uthabathela uYehova abantu begama lakhe yaye wenza la maKristu athanjisiweyo ukuba abe yinxalenye ‘yembewu’ ka-Abraham. (Galati 3:26-29; IZenzo 15:14) Umnqophiso omtsha uhlala usebenza de onke amaSirayeli okomoya avuselwe kubomi bokungafi ezulwini.

Ngaphezu koko, abo ngokwenyaniso banobizo lwasezulwini abathandabuzi ukuba bakwakumnqophiso woBukumkani basezulwini. UYesu wabhekisela kulo mnqophiso uphakathi kwakhe nabalandeli bakhe xa wathi: “Nina ke ningabo basoloko behleli nam ekulingweni kwam. [Ndenza umnqophiso kunye nani kanye njengokuba uBawo enze umqophiso wobukumkani kunye nam, NW], ukuze nidle, nisele, esithebeni sam ebukumkanini bam, nihlale ezitroneni, nigweba izizwe ezilishumi elinazibini zakwaSirayeli.” (Luka 22:28-30) Lo mnqophiso waqalisa ukusebenza kubafundi bakaYesu ngokuthanjiswa kwabo ngomoya oyingcwele ngomhla wePentekoste yowama-33 C.E. Usaqhubeka usebenza phakathi kukaKristu nookumkani abazizinxulumani zakhe ngonaphakade.—ISityhilelo 22:5.

Abo banobizo lwasezulwini baqinisekile ukuba bakumnqophiso omtsha nakumnqophiso woBukumkani. Ngoko ke, ngokufanelekileyo bayathabatha kwisonka newayini zokomfuziselo kwizikhumbuzo zaminyaka le zeSidlo SeNkosi Sangokuhlwa, okanye kwiSikhumbuzo sokufa kukaYesu Kristu. Isonka esingenagwele sifanekisela umzimba wobuntu kaYesu ongenasono, ibe iwayini ifanekisela igazi lakhe eligqibeleleyo elaphalazwayo ngokufa nelalimisela ngokusemthethweni umnqophiso omtsha.—1 Korinte 11:23-26.

Ukuba uYehova uye wahlakulela kuwe ithemba elingenakukhanyelwa lobomi basezulwini, uqukiwe apho. Imithandazo yakho ibonisa ukuba unelo themba. Lendele kuwe, ibe akunako ukulisusa kwinkqubo yakho. Unezilangazelelo zokomoya ezilawula bonke ubomi bakho. Kodwa ukuba akuzinzanga koku, kwaye akuqinisekanga, ngoko ngokuqinisekileyo ufanele ungathabathi kule mifuziselo yeSidlo SeNkosi Sangokuhlwa.

Kutheni Kukho Iinkolelo Ezingafanelekanga?

Bambi basenokuthi ngokungafanelekanga bathabathe kwimifuziselo yeSikhumbuzo kuba bengakuvumi ngokwenene ukuba ukuthanjiswa “asikokothandayo, kanjalo asikokobalekayo; kokukaThixo.” (Roma 9:16) Asikokomntu ukugqiba kwelokuba yena ubengathanda ukungeniswa kumnqophiso omtsha aze abe yindlalifa emanyene noKristu kuBukumkani basezulwini. Lukhetho lukaYehova olubalayo. KuSirayeli wamandulo, uThixo wanyula abo babeza kukhonza njengababingeleli bakhe, yaye wamtshabalalisa uKora ngenxa yokuthi ngekratshi afune ububingeleli uThixo awayebubeke phezu kwentsapho ka-Aron. (Eksodus 28:1; Numeri 16:4-11, 31-35; 2 Kronike 26:18; Hebhere 5:4, 5) Ngokufanayo, bekungayi kumkholisa uYehova ukuba umntu uzimisa njengalowo ubizelwe ukuba phakathi kookumkani nababingeleli basezulwini ngoxa uThixo engamnikanga ubizo olunjalo.—Thelekisa eyoku-1 kuTimoti 5:24, 25.

Umntu usenokuthi ngempazamo acinge ukuba unobizo lwasezulwini ngenxa yentshukumisa enamandla eveliswa ziingxaki ezinzulu. Ukufa kweqabane okanye enye intlekele isenokubangela umntu ukuba aphelelwe ngumdla wokuphila emhlabeni. Okanye isinxulumani esisondeleyo sisenokuthi singumthanjiswa, ibe loo mntu usenokunqwenela isiphelo esifanayo. Oothunywashe abanjalo basenokumenza avakalelwe kukuba ubomi ezulwini bumlungele. Kodwa le asiyondlela kaThixo yokunika nabani na umoya wolwalamano lonyana noyise. Bekuya kubonakalisa ukungabi nambulelo ngenjongo kaThixo ngomhlaba ukuba ubani ubenqwenela ukuya ezulwini ngenxa yeemeko ezingathandekiyo okanye ukubandezeleka ngokweemvakalelo okukhoyo kubomi basemhlabeni.

Iimbono zangaphambili ezingokonqulo zisekwanokubangela umntu ukuba agqibe ngokungafanelekanga ngokuthi unobizo lwasezulwini. Mhlawumbi wakha wanxulumana nonqulo lobuxoki olwalusithi ubomi ezulwini kuphela kwethemba labathembekileyo. Ngenxa yoko, kufuneka ukuba umKristu azilinde nxamnye nokuphetshethwa yintshukumisa neembono ezingalungileyo zexesha elidluleyo.

Uhlolisiso Lwenyameko Lubalulekile

Ingongoma ebaluleke gqitha yakhankanywa ngumpostile uPawulos xa wabhala wathi: “Osukuba esidla eso sonka, ayisele indebe yeNkosi, ngokungafanelekileyo, woba netyala lomzimba negazi leNkosi. Makazicikide ke ngokwakhe umntu, aze ngokunjalo adle kwisonka eso, asele kwindebe leyo; kuba lowo udlayo, uselayo, ngokungafanelekileyo, uzidlela aziselele ukugwetywa, engawucaluli nje umzimba.” (1 Korinte 11:27-29) Ngoko ke, umKritu obhaptiziweyo othe kwiminyaka yakutshanje waqalisa ukucinga ukuba ufumene ubizo lwasezulwini ufanele lo mbandela awucingisise ngenyameko aze awuthandazele.

Umntu onjalo usekwanokuzibuza oku: ‘Ngaba abanye baye bandiphembelela ukuba ndibe nembono yobomi basezulwini?’ Oku bekungayi kuba kokufanelekileyo, kuba uThixo akabelanga nabani na ukuba atsalele abanye kwilungelo elinjalo. Utyekelo lwentelekelelo belungayi kuba yimbonakaliso yokuthanjiswa nguThixo, ibe akazithambisi iindlalifa zoBukumkani ngokuzibangela ukuba zive amazwi avakalisa oko.

Bambi basenokuzibuza oku: ‘Ngaphambi kokuba ndibe ngumKristu, ngaba ndakha ndabandakanyeka ekusebenziseni kakubi iziyobisi? Ngaba ndisebenzisa amayeza achaphazela iimvakalelo? Ngaba ndiye ndafumana unyango lweengxaki ezingokwasengqondweni okanye ezingokweemvakalelo?’ Bambi baye bathi ekuqaleni balwa nxamnye noko babecinga ukuba lithemba lokuphila ezulwini. Abanye baye bathi kangangethuba elithile uThixo waliphelisa ithemba labo lokuphila emhlabeni waza ekugqibeleni wabanika elokuphila ezulwini. Kodwa inkqubo enjalo yahlukile kwiindlela azisebenzisayo uThixo. Ngaphezu koko, ukholo asinto engaqinisekanga; luqinisekile.—Hebhere 11:6.

Umntu usekwanokuzibuza oku: ‘Ngaba ndinqwenela ukuba ngobalaseleyo? Ngaba ndinqwenela ukuba kwisigxina sokulawula ngoku okanye njengomnye wookumkani nababingeleli abanxulumene noKristu?’ Ngenkulungwane yokuqala yeXesha Eliqhelekileyo, xa isimemo sikawonke-wonke sokungena kuBukumkani basezulwini sakhutshwayo, asingawo onke amaKristu athanjisiweyo awafumana izigxina zembopheleleko njengamalungu equmrhu elilawulayo okanye njengabadala okanye izicaka zolungiselelo. Amaninzi ayengamabhinqa, yaye ayengenagunya likhethekileyo; ungazange umoya othambisayo ubabangele ukuba bazuze ukuqonda okukhetheke ngokugqithiseleyo kweLizwi likaThixo, kuba uPawulos wakufumanisa kuyimfuneko ukuyala nokululeka abathile kwabathanjisiweyo. (1 Korinte 3:1-3; Hebhere 5:11-14) Abo banobizo lwasezulwini abazigqali njengabantu ababalaseleyo, yaye bengaqhayisi ngokuba ngabathanjiswa kwabo. Kunoko, babonakalisa ukuzithoba ngokufanelekileyo okulindeleke kwabo ‘banengqiqo kaKristu.’ (1 Korinte 2:16) Kwakhona bayaqonda ukuba onke amaKristu amele ahlangabezane neemfuneko zobulungisa zikaThixo, enoba ithemba lawo likukuphila ezulwini okanye emhlabeni.

Ukuthi unobizo lwasezulwini akuziseli mntu izityhilelo ezikhethekileyo. UThixo unejelo lonxibelelwano athi ngalo anikele ukutya kokomoya okulungiselelwe intlangano yakhe yasemhlabeni. (Mateyu 24:45-47) Ngoko akukho mntu ufanele acinge ukuba ukuba ngumKristu othanjisiweyo kumnika ubulumko obungaphezu kobo ‘besihlwele esikhulu’ esinethemba lokuphila emhlabeni. (ISityhilelo 7:9) Ukuthanjiswa ngomoya akubonakaliswa ngobuchule ekunikeleni ubungqina, ekuphenduleni imibuzo engokweZibhalo, okanye ekunikeleni iintetho zeBhayibhile, kuba amaKristu anethemba lokuphila emhlabeni nawo enza kakuhle gqitha kwezi nkalo. Njengabathanjisiweyo, nawo aphila ubomi bobuKristu obungumzekelo. Ngapha koko, uSamson kunye nabanye ababephila kumaxesha angaphambi kobuKristu babenomoya kaThixo yaye babenenzondelelo nokuqonda okugqithiseleyo. Kanti, akukho namnye kwelo ‘lifu likhulu lamangqina’ owayenethemba lokuphila ezulwini.—Hebhere 11:32-38; 12:1; Eksodus 35:30, 31; ABagwebi 14:6, 19; 15:14; 1 Samuweli 16:13; Hezekile 2:2.

Khumbula Lowo Wenza Ukhetho

Ukuba ikholwa elinguwabo libuza ngobizo lwasezulwini, umdala omiselweyo okanye omnye umKristu okhulileyo unokuwuxubusha lo mcimbi kunye nalo. Kodwa omnye umntu akanakumenzela omnye esi sigqibo, ibe nguYehova onika ithemba lokuphila ezulwini. Umntu onalo ngokwenyaniso ithemba lokuphila ezulwini akuze kufuneke abuze amaKristu angoowabo ukuba unalo kusini na elo themba. Abo bathanjisiweyo ‘bazelwe ngokutsha, kungengokwasembewini enokonakala, kungokwasembewini engenakonakala, ngelizwi likaThixo eliphilileyo, elihleliyo ngonaphakade.’ (1 Petros 1:23) Ngomoya nangeLizwi lakhe, uThixo utyala “imbewu” eyenza umntu abe ‘sisidalwa esitsha,’ esinethemba lokuphila ezulwini. (2 Korinte 5:17) Ewe, nguYehova owenza ukhetho.

Ngoko ke, xa ufundisisa iBhayibhile nabantu abatsha, akunto ilungileyo ukubaxelela ukuba mabazame ukugqiba enoba banobizo lwasezulwini kusini na. Kodwa kuthekani ukuba umKristu othanjisiweyo ungqineke engathembekanga ibe kwafuneka athatyathelwe indawo? Ngoko bekuya kuba sengqiqweni ukugqiba kwelokuba uThixo ebeya kudlulisela ubizo lwasezulwini kuthile obengumzekelo ekunikeleni inkonzo ethembekileyo kuBawo wethu wasezulwini kangangeminyaka emininzi gqitha.

Namhlanje, uthumo oluyintloko lwesigidimi sikaThixo asikuko ukuba abantu babe ngamalungu omtshakazi wasezulwini kaKristu. Kunoko, “uMoya nomtshakazi bathi, Yiza.” Esi sisimemo sokuphila ubomi kumhlaba oyiparadisi. (ISityhilelo 22:1, 2, 17) Njengoko abathanjisiweyo bekhokela kulo msebenzi, babonakalisa “ukuthobeka kwentliziyo” yaye basebenzela ‘ukuze balwenze luqine ubizo nonyulo lwabo.’—Efese 4:1-3; 2 Petros 1:5-11.