Isondele Inkululeko Ezukileyo Yabantwana BakaThixo

“Kuba indalo yathotyelwa kokuphuthileyo . . . ngesizinzi sethemba lokuba nayo indalo ngokwayo iya kukhululwa ekukhotyokisweni kukonakala ize ibe nenkululeko ezukileyo yabantwana bakaThixo.”—ROMA 8:20, 21.

1. Idini likaYesu lalifuziselwa njani ngoMhla Wocamagushelo?

UYEHOVA wanikela ngokuphela koNyana amzeleyo njengedini lentlawulelo elavula indlela esa kubomi basezulwini kubantu abali-144 000 nakumathemba asemhlabeni angunaphakade kuluntu luphela. (1 Yohane 2:1, 2) Njengoko kuboniswe kwinqaku elingaphambilana, kumaKristu azelwe ngomoya idini likaYesu lalifuziselwa xa umbingeleli omkhulu wakwaSirayeli wayenyusa idini lenkunzi njengedini lesono esenzela yena, indlu yakhe kunye nohlanga lukaLevi ngoMhla Wocamagushelo waminyaka le. Kwangolo suku lunye, wayenyusa idini lebhokhwe njengedini lesono lawo onke amanye amaSirayeli, kanye njengokuba idini likaKristu liza kuba yingenelo kuluntu luphela. Ngelifuziselayo ibhokhwe ephilayo yayisusa zonke izono zabantu zonyaka odluleyo, ize iye kunyamalala nazo entlango.a—Levitikus 16:7-15, 20-22, 26.

2, 3. Athetha ntoni amazwi kaPawulos abhalwe kweyabaseRoma 8:20, 21?

² Emva kokuchaza ithemba labantu abaza kuba “ngoonyana bakaThixo,” umpostile uPawulos wathi: “Ngolindelo lwentumekelelo indalo ilindele ukutyhilwa koonyana bakaThixo. Kuba indalo yathotyelwa kokuphuthileyo, kungengakuthanda kwayo kodwa ngalowo wayithobelayo, ngesizinzi sethemba lokuba nayo indalo ngokwayo iya kukhululwa ekukhotyokisweni kukonakala ize ibe nenkululeko ezukileyo yabantwana bakaThixo.” (Roma 8:14, 17, 19-21) Athetha ukuthini la mazwi?

³ Xa ukhokho wethu uAdam wayedalwa njengomntu ofezekileyo, ‘wayengunyana [okanye umntwana] kaThixo.’ (Luka 3:38) Ngenxa yokona, wangena “ekukhotyokisweni kukonakala” waza wadlulisela loo meko kuhlanga loluntu. (Roma 5:12) UThixo wavumela abantu ukuba bazalwe belindelwe ‘kokuphuthileyo’ ngenxa yokungafezeki kwabo abakuzuz’ ilifa, kodwa wabanika ithemba ‘ngembewu,’ uYesu Kristu. (Genesis 3:15; 22:18; Galati 3:16) ISityhilelo 21:1-4 salatha kwixesha ekungayi kubakho ‘kufa, kukhedama, kukhala nantlungu.’ Ekubeni eli ilidinga elibhekiswe ‘kuluntu,’ lisiqinisekisa ukuba ibutho labantu bomhlaba omtsha eliphila phantsi kolawulo loBukumkani iingqondo nemizimba yabo iya kubuyiselwa empilweni epheleleyo nakubomi obungunaphakade ‘njengabantwana bakaThixo’ abasemhlabeni. Ebudeni boLawulo Lwewaka Leminyaka lukaKristu, abantu abathobelayo “baza kukhululwa ekukhotyokisweni kukonakala.” Emva kokuzingqina benyanisekile kuYehova ebudeni bovavanyo lokugqibela, baza kukhululwa ngonaphakade kwisono nakukufa abakuzuz’ ilifa. (ISityhilelo 20:7-10) Emva koko abo basemhlabeni baza ‘kuba nenkululeko ezukileyo yabantwana bakaThixo.’

Bathi “Yiza!”

4. Kuthetha ntoni ‘ukuthabatha amanzi obomi ngesisa’?

⁴ Elinjani ukumangalisa ithemba elibekwe phambi koluntu! Akumangalisi ngoko ukuba amaKristu azelwe ngomoya asesemhlabeni ekhokela ngenzondelelo ekuxeleleni abantu ngalo! Njengabo baza kuba yinxalenye ‘yomtshakazi’ weMvana ezukisiweyo, uYesu Kristu, intsalela ethanjisiweyo ibandakanyekile ekuzalisekisweni kwala mazwi esiprofeto: “Umoya nomtshakazi bahlala besithi: ‘Yiza!’ Kwaye nabani na ovayo makathi: ‘Yiza!’ Ibe nabani na onxaniweyo makeze; nabani na onqwenelayo makathabathe amanzi obomi ngesisa.” (ISityhilelo 21:2, 9; 22:1, 2, 17) Ewe, iingenelo zedini lentlawulelo likaYesu azipheleliselwanga kubathanjiswa abali-144 000 kuphela. Umoya kaThixo usaqhubeka usebenza ngentsalela yodidi lomtshakazi esemhlabeni usithi “Yiza.” Nabani na ovayo nonxanelwe ubulungisa uyamenywa ukuba athi “Yiza,” azenze afumanekele ilungiselelo likaYehova lesisa losindiso.

5. Ngoobani amaNgqina kaYehova akuvuyelayo ukuba nabo?

⁵ AmaNgqina kaYehova anokholo kwilungiselelo likaThixo lobomi alenze ngoYesu Kristu. (IZenzo 4:12) Ayakuvuyela ukuba nabantu abantliziyo zinyanisekileyo phakathi kwawo abanqwenela ukufunda ngeenjongo zikaThixo baze benze ukuthanda kwakhe. Bonke abanqwenela ‘ukuza baze bathabathe amanzi obomi ngesisa’ kweli ‘xesha lokuphela’ bamkelekile kwiiHolo zawo zoBukumkani.—Daniyeli 12:4.

Iinguqu Ezenzeke Ekuhambeni Kwexesha

6. Umoya kaThixo uye wasebenza njani kubakhonzi bakaYehova ebudeni bamaxesha ahlukeneyo?

⁶ UThixo unexesha alimiseleyo lokuphumeza iinjongo zakhe, ibe loo nto iyayichaphazela indlela aqhubana ngayo nabantu. (INtshumayeli 3:1; IZenzo 1:7) Nangona umoya kaThixo wehla kubakhonzi bakhe bexesha elingaphambi kwelamaKristu, babengazalwa njengoonyana bokomoya. Noko ke, ukususela kuYesu, kwakufike ixesha likaYehova lokuba asebenzise umoya oyingcwele ukuze azale amadoda namabhinqa azinikeleyo aza kuzuza ilifa lasezulwini. Kuthekani ke ngomhla wethu? Lo moya ukwamnye uyasebenza ‘kwezinye izimvu’ zikaYesu, kodwa awuzenzi zibe nethemba nomnqweno wokuphila ezulwini. (Yohane 10:16) Ekubeni ubomi obungunaphakade bulithemba ezilinikwe nguThixo, ziyakuvuyela ukuxhasa intsalela ethanjisiweyo ekunikeleni ubungqina ebudeni beli xesha leenguqu zokusuka kwihlabathi elidala ukuya kwihlabathi elitsha likaThixo elinobulungisa.—2 Petros 3:5-13.

7. Nguwuphi umsebenzi wokuvuna aBafundi beBhayibhile ababezixakekise ngawo, kodwa yintoni ababeyazi ngeparadesi?

⁷ UThixo waqalisa ‘ukuzisa oonyana abaninzi eluzukweni’ ngokuthululwa komoya oyingcwele ngePentekoste yowama-33 C.E., ibe kuyabonakala ukuba wamisela ixesha lokutywina “uSirayeli kaThixo” wokomoya oli-144 000 xa ewonke. (Hebhere 2:10; Galati 6:16; ISityhilelo 7:1-8) Ukususela ngowe-1879, ngokufuthi eli phephancwadi belikhankanya umsebenzi wokuvuna obandakanya amaKristu athanjisiweyo. Kodwa aBafundi beBhayibhile (ngoku ababizwa ngokuba ngamaNgqina kaYehova) babesazi nokuba iZibhalo ziqulethe ithemba lobomi obungunaphakade kwiparadesi esemhlabeni. Ngokomzekelo, inkupho yeMboniselo (yesiNgesi) kaJulayi 1883 yathi: “Xa uYesu ebumisele ubukumkani bakhe, watshabalalisa ubungendawo, njalo njalo, lo mhlaba uza kuba yiparadesi, . . . ibe bonke abo basemangcwabeni baza kuphumela kuwo. Yaye ngokuthobela imithetho yawo banokuphila ngonaphakade.” Ekuhambeni kwexesha, ukuvunwa kwabathanjiswa kwancipha, ibe ngokuthe ngcembe kwavunwa abantu ababengenalo ithemba lokuphila ezulwini baza bangeniswa kwintlangano kaYehova. Kwelinye icala, uThixo wanika abakhonzi bakhe abathanjisiweyo, amaKristu azelwe ngokutsha, ingqiqo ebalaseleyo.—Daniyeli 12:3; Filipi 2:15; ISityhilelo 14:15, 16.

8. Ukuqondwa kwethemba lasemhlabeni kwahambela phambili njani ngasekuqaleni kweminyaka yee-1930?

⁸ Abo banethemba lokuphila emhlabeni bebenxulumana nebandla lamaKristu ngokukodwa ukususela ngowe-1931. Ngaloo nyaka, uYehova wakhanyisela amaKristu azelwe ngomoya ukuze abone ukuba isahluko 9 sikaHezekile sibhekisela kudidi olunethemba lokuphila emhlabeni, oluphawulelwa ukusindela kwihlabathi elitsha likaThixo. Ngowe-1932 kwagqitywa kwelokuba abo banjengezimvu namhlanje babefuziselwa sisinxulumani sikaYehu uYonadabhi (uYehonadabhi). (2 Kumkani 10:15-17) Ngowe-1934 yenziwa yacaca gca into yokuba “amaYonadabhi” afanele “azingcwalise,” okanye azinikele kuThixo. Ngowe-1935 “indimbane enkulu,” okanye “isihlwele esikhulu”—ngaphambili ekwakucingelwa ukuba silolunye udidi lokomoya olwaluza kuba “ngamaqabane” omtshakazi wasezulwini kaKristu—safaniswa njengezinye izimvu ezinethemba lokuphila emhlabeni. (ISityhilelo 7:4-15; 21:2, 9; INdumiso 45:14, 15) Kwaye ngokukodwa ukususela ngowe-1935 abathanjiswa baye bakhokela ekufuneni abantu abathe tye abalangazelela ukuphila ngonaphakade kumhlaba oyiparadesi.

9. Emva kowe-1935, kwakutheni ukuze amanye amaKristu ayeke ukuthabatha imifuziselo yeSidlo SeNkosi Sangokuhlwa?

⁹ Emva kowe-1935 amanye amaKristu abethabatha isonka newayini kwiSidlo SeNkosi Sangokuhlwa ayeka ukuthabatha. Kwakutheni? Kungokuba aqonda ukuba ayenethemba lokuphila emhlabeni, kungekhona ezulwini. Elinye ibhinqa elabhaptizwa ngowe-1930 lathi: “Nangona [ukuthabatha] kwakugqalwa njengento efanelekileyo, ngokukodwa kubalungiseleli bexesha elizeleyo abanenzondelelo, andizange ndiyamkele into yokuba ndinethemba lokuphila ezulwini. Kwandula ke, ngowe-1935, kwacaciswa ukuba kuhlanganiswa isihlwele esikhulu esinethemba lokuphila ngonaphakade emhlabeni. Uninzi lwethu lwaba nemincili lwakuqonda ukuba siyinxalenye yesihlwele esikhulu, ibe sayeka ukuthabatha imifuziselo.” Kwanomongo weempapasho zamaKristu watshintsha. Ngoxa kwiminyaka engaphambili ngokuyintloko zazilungiselelwa abalandeli abazelwe ngomoya bakaYesu, ukususela ngowe-1935 ukusa phambili IMboniselo nezinye iincwadi ‘zekhoboka elithembekileyo’ zalungiselela ukutya kokomoya okwakuza kwanelisa iintswelo zabathanjiswa kunye nezezinxulumani zabo ezinethemba lokuphila emhlabeni.—Mateyu 24:45-47.

10. Sinokuvalwa njani isikhewu esivulwe ngumthanjiswa ongathembekanga?

¹⁰ Masithi ke omnye wabathanjisiweyo uye akathembeka. Ngaba ukho onokungena ezihlangwini zakhe? UPawulos wachaza kanye oko kwingxubusho yakhe engomthi womnquma wokomfuziselo. (Roma 11:11-32) Ukuba kukho imfuneko yokufaka omnye endaweni yothile ozelwe ngomoya, ngokunokwenzeka uThixo ebeya kunikela ubizo lwasezulwini kubani onokholo olungumzekelo ekunikeleni inkonzo engcwele kuye kangangeminyaka.—Thelekisa uLuka 22:28, 29; 1 Petros 1:6, 7.

Izizathu Ezininzi Zokuba Nombulelo

11. Kungakhathaliseki ukuba sinaliphi na ithemba, yintoni uYakobi 1:17 asiqinisekisa ngayo?

¹¹ Enoba kuphi na apho sikhonza khona uYehova ngokuthembeka, uya kuzanelisa iintswelo neminqweno yethu ethe tye. (INdumiso 145:16; Luka 1:67-74) Enoba sinethemba lokwenene lokuphila ezulwini okanye sinethemba lokuphila emhlabeni, sinezizathu ezininzi ezivakalayo zokuba nombulelo kuThixo. Usoloko esenza izinto eziyingenelo kwabo bamthandayo. Umfundi uYakobi wathi “sonke isipho esilungileyo naso sonke isipho esigqibeleleyo sivela phezulu, kuba sihla sivela kuYise wezikhanyiso zesibhakabhaka,” uYehova uThixo. (Yakobi 1:17) Makhe sihlole ezimbalwa nje kwezi zipho neentsikelelo.

12. Kutheni sinokuthi uYehova unike ngamnye kubakhonzi bakhe abathembekileyo ithemba elingummangaliso?

¹² UYehova unike ngamnye kubakhonzi bakhe abathembekileyo ithemba elingummangaliso. Abanye ubabizele kubomi basezulwini. Amangqina akhe awayephila ngaphambi kwexesha lobuKristu, uYehova uwanike ithemba elibalaseleyo lokuvuselwa kubomi obungunaphakade emhlabeni. Ngokomzekelo, uAbraham wayenokholo kuvuko ibe walindela “isixeko esasineziseko zokwenene”—uBukumkani basezulwini aza kuthi phantsi kwabo avuselwe kubomi basemhlabeni. (Hebhere 11:10, 17-19) Kwakhona, kweli xesha lesiphelo, uThixo unika izigidi zabantu ithemba lobomi obungunaphakade kumhlaba oyiparadesi. (Luka 23:43; Yohane 17:3) Ngokuqinisekileyo, nabani na onikwe elo themba lizukileyo nguYehova ufanele abe nombulelo onzulu ngalo.

13. Umoya oyingcwele kaThixo uye wasebenza njani kubantu bakhe?

¹³ UYehova uthulula umoya oyingcwele wakhe njengesipho ebantwini. AmaKristu anikwe ithemba lokuphila ezulwini athanjiswa ngomoya oyingcwele. (1 Yohane 2:20; 5:1-4, 18) Sekunjalo, abakhonzi bakaThixo abanethemba lokuphila emhlabeni bafumana uncedo nolwalathiso lomoya. Omnye wabo yayinguMoses, owayenomoya kaYehova, njengamadoda amiselweyo angama-70 awayemncedisa. (Numeri 11:24, 25) Eqhutywa ngumoya oyingcwele, uBhetsaleli wakhonza njengengcungela yegcisa kumnquba wakwaSirayeli. (Eksodus 31:1-11) Umoya kaThixo wehla phezu koGidiyon, uYifeta, uSamson, uDavide, uEliya, uElisha nabanye. Nangona aba bantu bamandulo bengenakuze baziswe eluzukweni lwasezulwini, babesalathiswa yaye bencedwa ngumoya oyingcwele, njengezinye izimvu zikaYesu namhlanje. Ngoko ke, ukuba nomoya kaThixo akuthethi kuthi sibizelwe ezulwini. Ukanti, umoya kaYehova uyasalathisa, uyasinceda ukuze sishumayele yaye siphumeze nezinye izabelo esizinikwe nguThixo, usinika amandla angaphaya kwaqhelekileyo, kwaye uvelisa isiqhamo sawo sothando, uvuyo, uxolo, ukuzeka kade umsindo, ububele, ukulunga, ukholo, ubulali nokuzeyisa. (Yohane 16:13; IZenzo 1:8; 2 Korinte 4:7-10; Galati 5:22, 23) Ngaba asifanele sibe nombulelo ngesi sipho sobabalo esivela kuThixo?

14. Singenelwa njani kwizipho zikaThixo zolwazi nobulumko?

¹⁴ Ulwazi nobulumko zizipho ezivela kuThixo esifanele sibe nombulelo ngazo, enoba sinethemba lokuphila ezulwini okanye emhlabeni. Ulwazi oluchanileyo ngoYehova lusinceda ‘siqiniseke ngezinto ezibaluleke ngakumbi’ size ‘sihambe ngokumfaneleyo uYehova size simkholise ngokuzeleyo.’ (Filipi 1:9:11; Kolose 1:9, 10) Ubulumko bobuthixo buyasikhusela yaye buyasalathisa ebomini. (IMizekeliso 4:5-7; INtshumayeli 7:12) Ulwazi nobulumko bokwenene zisekelwe kwiLizwi likaThixo, kwaye liqaqobana elisaseleyo labathanjiswa elitsaleleka ngokukhethekileyo koko ikutshoyo ngobomi basezulwini. Noko ke, ukuthanda iLizwi likaThixo nokuliqonda kakuhle akuyondlela kaThixo yokubonisa ukuba sibizelwe kubomi basezulwini. Amadoda anjengoMoses noDaniyeli ade abhala iinxalenye zeBhayibhile, kodwa aza kuvuselwa kubomi basemhlabeni. Enoba sinethemba lokuphila ezulwini okanye emhlabeni, sonke sifumana ukutya kokomoya ‘ngekhoboka elithembekileyo neliyingqondi’ elikholekileyo kuYehova. (Mateyu 24:45-47) Hayi indlela sonke esinombulelo ngayo ngolwazi esiye saluzuza ngalo!

15. Sisiphi esinye sezona zipho zibalaseleyo zikaThixo, kwaye usijonga njani wena?

¹⁵ Esinye sezona zipho zibalaseleyo zikaThixo lilungiselelo lothando ledini lentlawulelo likaYesu, eliyingenelo kuthi enoba sinethemba lokuphila ezulwini okanye lokuphila emhlabeni. UThixo walithanda ihlabathi loluntu “kangangokuba wanikela ngoNyana wakhe okuphela kwamzeleyo, ukuze wonk’ ubani oqhelisela ukholo kuye angatshabalali kodwa abe nobomi obungunaphakade.” (Yohane 3:16) Kwaye uthando lukaYesu lwamshukumisela ukuba “anikele ngomphefumlo wakhe ube yintlawulelo ngenxa yabaninzi.” (Mateyu 20:28) Njengoko umpostile uYohane wachazayo, uYesu Kristu “ungumbingelelo wokucamagushela izono zethu [abathanjisiweyo], kanti kungekhona ezethu kuphela kodwa kwanezehlabathi liphela.” (1 Yohane 2:1, 2) Ngenxa yoko, sonke sifanele sibe nombulelo onzulu ngeli lungiselelo lothando lokusisindisela kubomi obungunaphakade.b

Ngaba Uza Kube Ukho?

16. Sisiphi isiganeko esibalaseleyo esiya kukhunjulwa emva kokutshona kwelanga ngoAprili 11, 1998, ibe ngoobani abafanele babekho?

¹⁶ Ukuba nombulelo ngentlawulelo elungiselelwe nguThixo ngoNyana wakhe kufanele kusishukumisele ekubeni sibekho kwiiHolo zoBukumkani okanye apho amaNgqina kaYehova aza kuhlanganisana khona emva kokutshona kwelanga ngoAprili 11, 1998, ukuze akhumbule ukufa kukaKristu. Xa wayeseka lo mbhiyozo nabapostile bakhe abathembekileyo ngobusuku bokugqibela bobomi bakhe basemhlabeni, uYesu wathi: “Hlalani nisenza oku nindikhumbula.” (Luka 22:19, 20; Mateyu 26:26-30) Abambalwa abasaseleyo kubathanjiswa baza kuthabatha isonka esingenagwele, esimela umzimba ongenasono kaYesu, kunye newayini ebomvu engenaziyobisi, efuzisela igazi lakhe elaphalazwa xa wayesenziwa idini. NgamaKristu azelwe ngomoya kuphela afanele athabathe kuba ngawo kuphela akumnqophiso omtsha nakumnqophiso woBukumkani yaye anobungqina obungenakukhanyelwa mntu bomoya oyingcwele kaThixo bokuba ithemba lawo lelokuphila ezulwini. Abanye abazizigidi baza kube bekho njengababukeli abanentlonelo nabanombulelo ngothando olubonakaliswe nguThixo noKristu ngokuphathelele idini likaYesu elenza ubomi obungunaphakade bufumaneke.—Roma 6:23.

17. Yintoni esifanele siyikhumbule ngokuphathelele ukuthanjiswa ngomoya?

¹⁷ Iinkolelo zonqulo ababekade benazo, iimvakalelo ezinamandla ezibakho emva kokufelwa nguthile othandwayo, iingxaki zangoku ezinxibelelene nobomi basemhlabeni, okanye imvakalelo yokuba bafumene intsikelelo ekhethekileyo evela kuYehova zisenokukhokelela abanye ekubeni ngempazamo bazigqale njengabaza kuphila ezulwini. Kodwa sonke simele sikhumbule ukuba iZibhalo azisiyaleli ukuba sithabathe imifuziselo yeSikhumbuzo ukuze sibonakalise ukuba nombulelo kwethu ngedini lentlawulelo likaKristu. Ngaphezu koko, ukuthanjiswa ngomoya “kuxhomekeke, kungekhona kulowo unqwenelayo nakulowo ubalekayo, kodwa kuThixo,” Lowo wazala uYesu njengoNyana wokomoya nongenisa abanye oonyana abali-144 000 kuphela eluzukweni.—Roma 9:16; Isaya 64:8.

18. Ziziphi iintsikelelo eziza kufunyanwa yinkoliso yabo bakhonza uYehova namhlanje?

¹⁸ Ubomi obungunaphakade emhlabeni bulithemba elivela kuThixo lenkoliso yabantu abakhonza uYehova kule mihla yokugqibela. (2 Timoti 3:1-5) Kungekudala, baza kunandipha ukuphila kule paradesi intle. Baya kwandula ke abathetheli banikele ulwalathiso kwizinto zasemhlabeni bephantsi kolawulo lwasezulwini. (INdumiso 45:16) Kuza kube kwesamele uxolo emhlabeni njengoko abemi bawo bethobela imithetho kaThixo yaye befunda okungakumbi ngeendlela zikaYehova. (Isaya 9:6, 7; ISityhilelo 20:12) Kuza kube kukho umsebenzi omninzi omele wenziwe, ukwakha amakhaya nokulungisa umhlaba. (Isaya 65:17-25) Kwaye khawube nombono nje wamalungu eentsapho ephinda ebonana njengoko abafileyo bebuyela ebomini! (Yohane 5:28, 29) Emva kovavanyo lokugqibela, bonke ubungendawo buya kube bungasekho. (ISityhilelo 20:7-10) Ukususela ngoko kude kuse emaphakadeni, umhlaba uya kube uzaliswe ngabantu abafezekileyo ‘abakhululwe ekukhotyokisweni kukonakala baza baba nenkululeko ezukileyo yabantwana bakaThixo.’

[Imibhalo esemazantsi]

Ubungaphendula Uthini?

◻ Kuthetha ukuthini ‘ukuthabatha amanzi obomi ngesisa’?

◻ Enoba sinethemba lokuphila ezulwini okanye lokuphila emhlabeni, ziziphi izizathu esinazo zokuba nombulelo kuThixo?

◻ Nguwuphi umbhiyozo waminyaka le esifanele sonke siye kuwo?

◻ Liyintoni ikamva lenkoliso yabantu bakaYehova?

[Umfanekiso okwiphepha 18]

Izigidi zabantu ziqalisile ‘ukuthabatha amanzi obomi ngesisa.’ Ngaba ungomnye wazo?