Imini Yomgwebo—Ixesha Lethemba!

UKUBA ingcamango yemini yomgwebo iyakoyikisa, kutheni ungahlolisisi oko iBhayibhile ikuthethayo ngayo? Ngokomzekelo, ngaba kuyinyaniso ukuba xa uThixo esohlwaya aboni, ubaphosa esihogweni somlilo?

Kaloku, umzekelo wokuqala obhaliweyo womgwebo kaThixo wawusekuqaleni kanye kwembali yoluntu. UAdam noEva babevulekelwe lithuba lokuphila ngonaphakade emhlabeni oyiparadisi. (Genesis 1:26-28; 2:7-9, 15-25) Noko ke, bona baza bafumana umgwebo obuhlungu kaThixo. Waba yintoni umphumo? UThixo wasirhoxisa isipho sobomi. Ngamanye amazwi, bafa. UThixo wabaxelela oku: “Uya kudla ukudla kokubila kobuso bakho, ude ubuyele emhlabeni, kuba uthatyathwe kuwo; ngokuba uluthuli, uya kubuyela kwaseluthulini.”—Genesis 3:16-19.

Lo yayingumgwebo oqatha, kodwa wawungowobulungisa. Ibe ngokuqinisekileyo awuzange uquke isihogo somlilo. Xa uAdam noEva bafayo, babuyela kwaseluthulini. Bayeka ukuphila. Akukho ndawo eBhayibhileni ethi inxalenye ethile ka-Adam okanye yakhe nawuphi na omnye umntu yasinda ekufeni yaza yathuthunjiswa ndaweni ithile ngonaphakade. Kunoko, sifunda oku: “Ke bona abadla ubomi bayazi ukuba baya kufa; ke bona abafileyo abazi lutho.”—INtshumayeli 9:5.

Ngaba ubusazi ukuba iBhayibhile iyakuthetha oku? Kwakhona, ngaba ubusazi ukuba iBhayibhile ayizange nakanye ilisebenzise ibinzana elithi “umphefumlo ongafiyo”? Kunoko, ithi: “Umphefumlo owonayo, kuya kufa wona.” (Hezekile 18:4) Oku kuvisisana ngokupheleleyo nalo mgaqo weBhayibhile: “Umvuzo wesono kukufa.” (Roma 6:23) Lo mgaqo uyasichaphazela sonke. Sonke siyinzala ka-Adam owayenesono, ngoko sonke siyona size sifumane umvuzo wesono, ukufa. Kunjengokuba iBhayibhile isithi: “Isono sangena ngamntu mnye ehlabathini, kwangena ke ukufa ngaso isono; kwaza ngokunjalo ukufa kwabatyhutyha abantu bonke, ekubeni bonke bonayo.” (Roma 5:12) IMini Yomgwebo ngundoqo welungiselelo likaThixo lokusisindisa kule meko.

Isiseko SeMini Yomgwebo

Ngokutsho kweBhayibhile, phantse ukuba kwakukwiminyaka engama-2 000 eyadlulayo awathi uThixo wabeka isiseko soko kuza kwenzeka ngeMini yoMgwebo. Oku kwakuxa uYesu weza emhlabeni waza wanikela ngobomi bakhe bobuntu obufezekileyo ngenxa yethu. UYesu ngokwakhe wacacisa esithi: “Kuba wenjenje uThixo ukulithanda kwakhe ihlabathi, ude wancama uNyana wakhe okuphela kwamzeleyo, ukuze bonke abakholwayo kuye bangatshabalali, koko babe nobomi obungunaphakade.”—Yohane 3:16.

Ukuba siyakholwa kuYesu, kwanangoku siyangenelwa ngokomoya kwidini lakhe. UThixo uyasixolela izono zethu ibe uyasivumela ukuba size kuye. (Yohane 14:6; 1 Yohane 2:1, 2) Kodwa asikafezeki, sisengaboni, yaye ekubeni sinjalo, sisagula ngokomzimba size ekugqibeleni sife. Asikabufumani ubomi obungunaphakade uYesu awabuthembisayo. Buya kufumaneka ngemva kweMini Yomgwebo.

IMini Yomgwebo

Umpostile uYohane wabona umbono weMini Yomgwebo, ibe wayichaza ngokulandelayo: “Ndabona itrone emhlophe enkulu, nalowo uhleli phezu kwayo, owathi umhlaba nezulu wasaba ebusweni bakhe, azafunyanelwa ndawo ezo zinto. Ndababona abafileyo, abancinane nabakhulu, bemi phambi koThixo. Zavulwa iincwadi; kwavulwa nenye incwadi, bagwetywa abafileyo ngokubhaliweyo ezincwadini ezo, ngokwemisebenzi yabo.”—ISityhilelo 20:11, 12.

Ewe, ngokombono kaYohane iMini Yomgwebo iya kube ichotshelwe nguThixo ngokwakhe. Kodwa kukho omnye umntu obandakanyekileyo. Umpostile uPawulos wacacisa: “Ngokuba [uThixo] emise umhla, aza kuligweba ngawo elimiweyo ngobulungisa, ngendoda awayimisayo.” (IZenzo 17:31) Yayingubani loo ndoda? YayinguYesu, owathi ngokwakhe: “Kuba kananjalo uYise akagwebi namnye; uthe umgwebo wakhe wawunikela kuNyana.” (Yohane 5:22) Ngoko uYesu uza kuba nguMgwebi omiswe nguThixo ngeMini Yomgwebo.

Ezi ziindaba ezilungileyo ebantwini. Iincwadi zeVangeli zimtyhila uYesu njengomntu onemfesane enkulu. Akangomntu onekratshi okanye ongqwabalala koko ‘unobulali yaye uthobekile ngentliziyo.’ (Mateyu 11:29; 14:14; 20:34) Siyakuvuyela ukunyanyekelwa ngumgwebi onjalo.

Iya Kufika Nini?

Noko ke, iya kufika nini le Mini Yomgwebo? ISityhilelo sithi iya kufika ‘ekusabeni komhlaba nezulu.’ Oku kusikhumbuza ngamazwi ompostile uPetros athi: “Izulu langoku, nawo umhlaba lo, kwangelo lizwi ezo zinto ziqwetyelwe, zigcinelwe, umlilo, kuse kwimini yomgwebo nentshabalalo yabantu abangahloneli Thixo.” (2 Petros 3:7) Ngaba umhlaba wokoqobo uza kutshiswa? Akunjalo, iBhayibhile icacile kule nkalo. Umhlaba wokoqobo awusokuze utshatyalaliswe. “Umhlaba . . . [awusokuze] ushenxiswe ngonaphakade.” (INdumiso 104:5, KJ) Umongo wamazwi kaPetros ubonisa ukuba yinkqubo yezinto yeli hlabathi likhoyo nelingahloneli Thixo eza kutshatyalaliswa. Ngabantu abangahloneli Thixo abaza kutshabalala, kungekhona uMhlaba.—Yohane 12:31; 14:30; 1 Yohane 5:19.

Aba bantu bangahloneli Thixo baza kutshatyalaliswa koko iBhayibhile ikubiza ngokuba yimfazwe yeArmagedon—eza kufika kamsinya, njengoko eli phephancwadi belisoloko libonisa. (ISityhilelo 16:14, 16) Ngemva koko, uSathana ngokwakhe uya kuphoswa enzonzobileni aze athintelwe ekuphazamiseni uluntu kangangeminyaka eliwaka, ibe eli waka leminyaka libubude bokwenene bexesha leMini Yomgwebo. (ISityhilelo 19:17–20:3) Kwenzeka ntoni kwabathembekileyo xa abantu abangahloneli Thixo betshabalala eArmagedon? Basindela kanye kwiMini yoMgwebo. Sifunda oku: “Basale kulo [ilizwe] abagqibeleleyo, banqanyulwe ezweni abangendawo.”—IMizekeliso 2:21, 22.

Ukuxhasa oku, iBhayibhile isixelela ‘ngesihlwele esikhulu, ebekungekho namnye unako ukusibala, siphuma kuzo zonke iintlanga, nezizwe, nabantu, neelwimi’ nesiya kubakho emhlabeni ngaphambi kweArmagedon. Aba “ngabaphumayo embandezelweni enkulu”; ngamanye amazwi, bayasinda kwisiphelo seli hlabathi lingahloneli Thixo kanye njengokuba uNowa wasindayo kwisiphelo sehlabathi lomhla wakhe. (ISityhilelo 7:9-17; 2 Petros 2:5) Ngaba ubusazi ukuba esi sihlwele sikhulu sezizwe ngezizwe samaKristu akhutheleyo sikho kwanangoku? La maKristu anethemba lokusinda kwimbandezelo enkulu aze aphile emhlabeni ngonaphakade. Ubukho bawo bubungqina obuqinisekileyo bokuba iMini Yomgwebo isondele.

Ngoobani Abaza Kugwetywa?

Esi sihlwele sikhulu siza kugwetywa ngeMini Yomgwebo. Kodwa ayizi kuba siso kuphela. Ingxelo kaYohane ihlabela mgama isithi: “Lwathi ulwandle lwabakhupha abafileyo abakulo, kwathi ukufa nesihogo kwabakhupha abafileyo abakhona; bagwetywa elowo ngokwemisebenzi yakhe.” (ISityhilelo 20:13, KJ) Apha kukho ubungqina obungakumbi bokuba abantu abathuthunjiswa esihogweni ngonaphakade. Ukuba isihogo siyabakhupha abafileyo abakuso, kwenzeka njani ukuba ubani abe lapho ngonaphakade? Enyanisweni, isihogo seBhayibhile silingcwaba eliqhelekileyo loluntu, apho abafileyo bahlala khona bengazi lutho belindele uvuko. NgeMini Yomgwebo, baza kukhutshwa ngokupheleleyo bonke abafileyo abasesihogweni.—INtshumayeli 9:10.

Ngoobani abaza kuvuswa ekufeni ngeMini Yomgwebo? Umpostile uPawulos wathi: “Kuza kubakho uvuko lwabafileyo, lwamalungisa kwanolwabangemalungisa.” (IZenzo 24:15) Ngenxa yoko, abakhonzi bakaThixo abathembekileyo “amalungisa,” baza kuvuswa. Kodwa kuza kuvuswa nabanye abangenakubalwa, “abangemalungisa.” Kuyabonakala ukuba, uvuko luza kuquka bonke abo bafayo yaye basesengcwabeni—ngaphandle kwabo nabaphi na abazono zabo zazinzulu kangangokuba uThixo sele ebagwebe njengabangabufanele ngokupheleleyo ubomi.—Mateyu 12:31.

UMgwebo

Noko ke, kwenzeka ntoni kwisihlwele esikhulu sabasindi nabavusiweyo ngeMini Yomgwebo? IBhayibhile ithi: “Bagwetywa abafileyo ngokubhaliweyo ezincwadini ezo, ngokwemisebenzi yabo.” Eli lixesha lokucikidwa. Bonke abavumayo ukwenza ngokuvisisana ‘nokubhaliweyo ezincwadini’—ngokucacileyo izinto eziya kufunwa nguThixo kuluntu ngelo xesha—baya kubhalwa ‘encwadini yobomi.’ (ISityhilelo 20:12) Baza kuba semendweni wokufumana ubomi obungunaphakade!

Ngoko, ekugqibeleni, ukufa kukaYesu okulidini kuza kuzisa iingenelo zokwenyama! Abo badweliswe encwadini yobomi ngelo xesha abasayi kubuye bawele kwimeko yokugula nokufa. Kunoko, baza kubuyiselwa ngokuthe ngcembe emfezekweni yoluntu, benobomi obungunaphakade obuthenjiswe abo bakholwayo kuYesu. Elinjani lona ukubalasela elo themba! Sekunjalo, kubonakala ukuba abathile abayi kukuthobela ‘okubhaliweyo ezincwadini.’ Kwenzeka ntoni kubo? Ababufumani ubomi obungunaphakade. Kunoko, isibhalo sithi: “Ongafunyanwanga ebhaliwe encwadini yobomi, waphoswa edikeni lomlilo.”—ISityhilelo 20:15.

Ngaba eli dike sisihogo somlilo iNgqobhoko ethetha ngaso? Akunjalo, kuba kwindinyana eyandulelayo, sifunda oku: “Kwaza ukufa nesihogo kwaphoswa edikeni lomlilo. Oku kukufa kwesibini.” (ISityhilelo 20:14, KJ) Ukuba isihogo siphoswa edikeni lomlilo, idike alinakuba sisihogo somlilo. Ngaphezu koko, ukufa akuyonto iphathekayo enokuthatyathwa ize iphoswe ndaweni ithile. Ngoko idike lomlilo limele ukuba lifuzisela okuthile. Lifuzisela ntoni? IBhayibhile ithi: “Oku kukufa kwesibini.” Xa ukufa nelabafileyo kuphoswa edikeni lomlilo, ‘kuyafa,’ kungabikho. Ngokufanayo, abantu abavukelayo abaphelela edikeni lomlilo bayafa, okanye bayayeka ukuphila. Noko ke, oku kukufa kwesibini ekungekho themba lovuko kuko.

IMini Yomgwebo—Ixesha Lethemba

Ngoko xa sicinga ngeMini Yomgwebo, asifanele soyike okanye sicaphuke. IMini Yomgwebo ilixesha lethemba, lixesha lokubuyisela kuluntu ubomi obungunaphakade uAdam awaphulukana nabo. Phulaphula iintsikelelo eza kuzizisa kwabo bagwetywa njengabathembekileyo: “Yabona, umnquba lo kaThixo unabantu; uya kuhlala nabo emnqubeni, bona babe ngabantu bakhe, yena uThixo abe nabo, enguThixo wabo; azisule uThixo zonke iinyembezi emehlweni abo, kungabi sabakho kufa, kungabi sabakho nasijwili, nakukhala, nantlungu, ngokuba izinto zokuqala zigqithile.”—ISityhilelo 21:3, 4.

Ekupheleni kweMini Yomgwebo yeminyaka eliwaka, abantu abathembekileyo abaphuma kuzo zonke iindawo zomhlaba ekugqibeleni baza kufezeka. Baza kube ‘besidla ubomi’ ngengqiqo epheleleyo, ibe iMini Yomgwebo iya kube iyifezile injongo yayo. (ISityhilelo 20:5) IBhayibhile ithi, uya kwandula ke uSathana avunyelwe ukuhlasela uluntu ithuba lokugqibela. (ISityhilelo 20:3, 7-10) Abo bazixhathisayo iintlaselo zakhe kweli thuba lokugqibela baya kunandipha inzaliseko epheleleyo yesithembiso seBhayibhile sokuba: “Amalungisa aya kulidla ilifa lizwe, ahlale kulo ngonaphakade.”—INdumiso 37:29.

Elinjani lona ukumangalisa eli lungiselelo leMini Yomgwebo! Ibe hayi indlela ekukuhle ngayo ukuba sinako ukuyilungiselela kwanangoku, ngokufundisisa iBhayibhile, ngokufunda ukuthanda kukaThixo nokusebenzisa oku kuthanda kukaThixo ebomini bethu! Akumangalisi ukuba umdumisi wayebonakalisa uvuyo akucinga ngomgwebo kaThixo xa wabhala oku: “Liya kuvuya izulu, ligcobe ihlabathi; luya kugquma ulwandle, nenzaliseko yalo. Liya kudlamka ilizwe, nento yonke ekulo, ize imemelele yonke imithi yehlathi phambi koYehova, ngokuba esiza, ngokuba esiza kugweba ihlabathi.”—INdumiso 96:11-13.