Ukuvuya NgoMdali Wethu Ozukileyo

“USirayeli makavuye ngoMenzi wakhe; usapho lwaseZiyon malugcobe ngoKumkani walo.”—INDUMISO 149:2.

1. Phezu kwazo nje izibhengezo zokuba “ide yafika inkululeko,” injani imeko yokwenene yoluntu?

IHLABATHI lanamhlanje lithwaxwa ‘yinimba.’ Elo libinzana uYesu awalisebenzisayo kwisiprofeto sakhe esiphathelele “ukuqosheliswa kwale nkqubo yezinto,” ixesha lentlekele elaqala ngemfazwe yehlabathi yokuqala ngowe-1914. (Mateyu 24:3-8, NW) Abaninzi kwezobupolitika babona ikamva elimfiliba kuphela. Phezu kwazo nje izibhengezo zokuba “ide yafika inkululeko” eMpuma Yurophu, owayekhe wangumongameli waloo mmandla wayishwankathela ngolu hlobo imeko ekhoyo: “Ukwanda kwabemi nokuba shushu komoya ojikeleze umhlaba, imingxuma kucwecwe lweozone noGawulayo, isisongelo sabagrogrisi abasebenzisa izixhobo zenyukliya nomsantsa ovuleka ngokuphawulekayo phakathi kwamazwe afumileyo asentla nahlwempuzekileyo asemazantsi, ingozi yendlala, ukonakaliswa kommandla wobomi nemveliso yezimbiwa zesi sijikelezi-langa, ukwanda kwabantu abaphila ubomi ababubona kwiinkqubo zikamabonwakude nokwanda kwesisongelo seemfazwe zamakhaya—konke oku, kudibene namawaka abanye oothunywashe, kusisisongelo kuluntu ngokubanzi.” Abantu abanawo amandla okushenxisa esi sisongelo sentlekele yokugqibela.—Yeremiya 10:23.

2. Ngubani onesicombulo seengxaki zoluntu esiya kuhlala ngokusisigxina, yaye ngawaphi amanyathelo asele ewathabathile?

² Noko ke, sinokuvuya kuba uMdali wethu Ozukileyo unesicombululo esiya kuhlala ngokusisigxina. Kwisiprofeto sikaYesu “ukuqosheliswa kwale nkqubo yezinto” kuhambisana ‘nobukho’ bakhe obungabonakaliyo. (Mateyu 24:3, 37-39, NW) Ukuze adale “amazulu amatsha,” uYehova uye wabeka uYesu kwitrone yakhe njengoKumkani onguMesiya, ubungqina besiprofeto bubonisa ukuba esi siganeko singokwembali senzeka emazulwini ngonyaka we-1914.a (2 Petros 3:13) Ngoku, njengomlawuli onxulumene neNkosi enguMongami uYehova, uYesu unikwe umyalelo wokugweba iintlanga nokwahlula abantu abalulamileyo, ababumvu basemhlabeni koontamo-lukhuni abanjengeebhokhwe. “Iibhokhwe” ezingahloneli Thixo ziphawulelwe ‘ubetho olungunaphakade’ yaye zona “izimvu” ziphawulelwe ubomi obungunaphakade kummandla wasemhlabeni woBukumkani.—Mateyu 25:31-34, 46.

3. Sisiphi isizathu sokuvuya amaKristu okwenyaniso anaso?

³ Intsalela yoSirayeli wokomoya esemhlabeni, ngoku eye yathelelwa sisihlwele esikhulu sezi zimvu zithobelayo, inezizathu ezininzi zokuvuya ngoYehova, uKumkani wamaphakade, njengoko ezisa iinjongo zakhe kwincopho ngoBukumkani boNyana wakhe. Banokuthi: “Ndinemihlali ndanemihlali ngoYehova, umphefumlo wam uya kugcoba ngoThixo wam; kuba endinxibe iingubo zosindiso . . . Kuba njengoko ilizwe livelisa izilimo zalo, njengoko umyezo untshulisa intlwayelelo yawo, yenjenjalo iNkosi uYehova ukuntshulisa ubulungisa nendumiso phambi kweentlanga zonke.” (Isaya 61:10, 11) Oku ‘kuntshulisa’ kubonakala kwizigidi ngoku ezihlanganiswayo ziphuma kwiintlanga ukuze zivume indumiso kaYehova.

‘Ukukukhawulezisa Oku’

4, 5. (a) Ukuhlanganiswa kwabantu bakaThixo kwaxelwa njani kwangaphambili? (b) Luluphi ulwando olumangalisayo oluye lwakho ebudeni bonyaka wenkonzo we-1992?

⁴ Ukuhlanganisa kuyakhawuleza njengoko isiphelo sale nkqubo kaSathana sisondela. UMdali wethu Ozukileyo uthi: “Abantu bakho baya kuba ngamalungisa bonke bephela, . . . besisithole esityalwe ndim, isenzo sesandla sam sokuba ndihombe. Omncinanana uya kuba liwaka, noweyeleyo abe luhlanga olunamandla. Mna, Yehova, ndiya kukukhawulezisa oko ngexesha lako oko.” (Isaya 60:21, 22) Oku kukhawulezisa kubonakaliswe ngendlela emangalisayo kwiNgxelo Yonyaka Wenkonzo We-1992 YamaNgqina KaYehova Emhlabeni Wonke, epapashwe kwiphepha 12 ukusa kwele-15 kweli phephancwadi.

⁵ Okubalaseleyo kule ngxelo yincopho entsha yabavakalisi boBukumkani abazizi-4 472 787, ulwando lwe-193 967—isi-4,5 ekhulwini ngaphezulu kunonyaka ophelileyo. Kwakhona incopho yabangama-301 002 ababhaptiziweyo ebudeni bowe-1992 ibonisa isibakala sokuba izihlwele ziyayamkela inyaniso yeBhayibhile. Hayi indlela esivuya ngayo kuba kule ‘mini enobumnyama nesithokothoko, kukho abantu abaninzi abanamandla,’ abathi, njengomkhosi weenkumbi, bandise ubungqina boBukumkani “kude kuse nasekupheleni komhlaba.”! (Yoweli 2:2, 25; IZenzo 1:8) Ukususela kwiAlaska enomkhenkce—apho inqwelo-moya yeWatch Tower Society iye yatyelela izihlandlo ezingaphezu kwama-50 kwimimandla evalelwe likhephu—ukusa kwintlango embatshileyo yaseMali neyaseBurkina Faso nakwiziqithi ezigqagqeneyo zeMicronesia, abakhonzi bakaYehova bakhanya ‘njengesikhanyiso seentlanga, ukuze usindiso [lwakhe] lufikelele eziphelweni zehlabathi.’—Isaya 49:6, NW.

6, 7. Kukuphi ukuguquka kwemeko obekungalindelekanga okuye kwakho kwiminyaka yakutshanje, yaye abakhonzi bakaYehova baye basabela njani kuko?

⁶ UYehova uye wanjengenqaba nengxonde eyomeleleyo ekukhuseleni nasekuxhaseni abantu bakhe. Kwiindawo ezininzi zomhlaba, kuye kwafuneka ukuba amaNgqina kaYehova anyamezele amashumi eminyaka okucinezelwa nokutshutshiswa ngenkohlakalo. (INdumiso 37:39, 40; 61:3, 4) Kodwa kutshanje, ngokungathi kungommangaliso, kuye kwashenxiswa imiqathango nemiqobo kumazwe anokuba ngama-21, kangangokuba ngoku abantu bakaThixo banokuvakalisa ngokukhululekileyo ukuba uMdali wethu Ozukileyo uye wamisela uKristu njengoKumkani phezu komhlaba.—INdumiso 2:6-12.

⁷ Ngaba abantu bakaYehova bayisebenzisa kakuhle inkululeko abasandul’ ukuyifumana? Khawuphos’ iliso kwisicangca ubone ulwando eBulgaria, eRomania nakummandla owawusakuba yiSoviet Union eMpuma Yuropu yaye jonga iAngola, iBenin neMozambiki eAfrika. KwanaseZaire, kukho ulwando oluphawulekayo. Benovuyo ezintliziyweni zabo, abazalwana bethu abakhululekileyo baye basabela kolu bizo: “Bulelani kuYehova, ngokuba elungile: . . . kulo Menzi wemisebenzi ebalulekileyo, emikhulu yedwa: ngokuba ingunaphakade inceba yakhe.” (INdumiso 136:1, 4) Oku kubulela kubonakaliswa ngenkonzo yenzondelelo ekuhlanganiseleni abanye abantu abanjengezimvu kwicala loBukumkani.

8. Abadumisi bakaYehova abatsha baye ‘beza njani bebaleka njengelifu’ eMpuma Yurophu? eAfrika?

⁸ Ebudeni behlobo elidluleyo eYurophu, iyamangalisa indlela abebebaninzi ngayo abantu ebebekho kwiindibano zabantu bakaYehova eziqhutywe kwimimandla eyayisakuba phantsi kobuKomanisi. Okumangalisa kwanangakumbi ngamanani abantu ababhaptiziweyo kuloo mimandla. Ngokufanayo, eTogo, eAfrika, umthetho wokuvalwa komsebenzi uye washenxiswa ngoDisemba 10, 1991. Kwinyanga elandelayo kuye kwaqhutywa indibano kwelo lizwe. Xa bethelekiswa nomlinganiselo wenyanga ngeenyanga wabavakalisi abakuloo ntsimi abangama-6 443 abebekho kule ndibano bafikelela kuma-25 467, kwaza kwabhaptizwa abangama-556—isi-8,6 ekhulwini senani labavakalisi. Njengoko uIsaya 60:8 ebonisa, abadumisi abatsha bakaYehova “beza bebaleka njengelifu, njengamavukuthu esiza emakrobeni awo” kumabandla abantu bakaYehova.

9. Ngawaphi amalungiselelo aye enziwa ukuze amaKristu kumazwe asandul’ ukukhululwa abe ‘nokudla aze ahluthe’?

⁹ Kwakhona ukulambela ukutya kokomoya eMpuma Yurophu naseAfrika kuye kwaneliswa. Imizi-mveliso yeWatch Tower Society eJamani, eItali naseMzantsi Afrika iye yathumela iilori ngeelori zoncwadi, ngeelwimi ezininzi, kumazwe athwaxwa yindlala ngokomoya. Ngaphambili, amaNgqina amaninzi kuye kwafuneka ebolekisene ngemibhalo engacacanga nekhutshelweyo yamaphephancwadi, kodwa ngoku afumana intabalala yokutya kokomoya. Achwayitiswa kukuba nesabelo ekuzalisekeni kwesi siprofeto: “Niya kudla nidlile, nihluthe, nilidumise igama likaYehova uThixo wenu, oniphethe ngokubalulekileyo.”—Yoweli 2:26.

Ukunyamekela Ulwando Olungakumbi

10. Ngenxa yokuphakama kwenani labebeze eSikhumbuzweni, sisiphi isimemo esinikelwa kubo bonke abanomdla?

¹⁰ Ngokwenene liyamangalisa inani labebeze eSikhumbuzweni sokufa kukaYesu emhlabeni wonke, abali-11 431 171, ulwando lwama-781 013, okanye isi-7,3 ekhulwini ngaphezulu kunonyaka ophelileyo. Siyanamkela, nonke nina batsha! Hayi indlela ekuya kuba kuhle ngayo ukuba bonke abantu abanjalo abasandul’ ukuba nomdla banokunandipha ingenelo yesifundo seBhayibhile sekhaya nomnye wamaNgqina kaYehova! (Bona uIsaya 48:17.) Ingxelo Yonyaka Wenkonzo ibonisa izi-4 278 127 zezifundo ezinjalo eziqhutywa nyanga nganye, ulwando oluhle lwesi-8,4 ekhulwini. Noko ke, abaninzi ngakumbi banokuzenza bafumaneke kule nkonzo. AmaNgqina kaYehova ayakuvuyela ukutyelela abantu abanomdla rhoqo ukuze abaqhubele isifundo seBhayibhile sesisa ekhaya, ngaloo ndlela ebanceda aba ukuba bamilisele iinyawo zabo kwindlela esa ebomini obungunaphakade. (Yohane 3:16, 36) Kutheni ungaceli isifundo esinjalo? Yaye khumbula, usoloko ulindelwe ngezandla ezifudumeleyo kwiHolo yoBukumkani!—INdumiso 122:1; Roma 15:7.

11, 12. (a) Ziziphi iingxaki ezikhoyo kwamanye amazwe? (b) “Ukulingana” kwenzeka njani phakathi kwamazwe afumileyo nahlwempuzekileyo?

¹¹ Amabandla aneeHolo zoBukumkani ezintle asikeleleke ngokutyebileyo. Le meko yahlukile kumazwe apho amaNgqina anyanisekileyo aye anyamezela iminyaka emininzi evalwe umlomo, eqhuba iintlanganiso ngokufihlakeleyo engamaqela amancinane. Kwiindawo ezininzi ezinjalo, ngoku akhululekile kodwa aneeHolo zoBukumkani ezimbalwa. Ngokomzekelo, kwelinye ilizwe laseAfrika, elinamabandla angama-93, kukho iiHolo zoBukumkani ezintathu kuphela. Ngoko iintlanganiso adla ngokuziqhubela kumabala amakhulu avulekileyo. Kwibandla elinabavakalisi abali-150 kusenokubakho abantu abangama-450 abeza rhoqo kwezi ntlanganiso.

¹² EMpuma Yurophu ngokufuthi kuba nzima ukuthenga isakhiwo okanye ukwakha, kodwa ikho inkqubela ethile eyenziwayo. Kuye kwenziwa amalungiselelo okunikezelwa kwesakhiwo esitsha seofisi yesebe ePoland ngoNovemba 28, 1992. Iminikelo yobubele kumsebenzi womhlaba wonke wamaNgqina kaYehova isetyenziselwa ukunceda ukwakha iiholo nezinye izakhiwo. Ngaloo ndlela, kubakho “ukulingana” ngenxa yokuba ububele babazalwana abanikela ‘ngokuphuphumayo’ ngezinto zabo eziphathekayo bunceda ekulungiseleleni iintswelo zokomoya zamabandla akwimimandla ehlwempuzekileyo.—2 Korinte 8:13, 14.

Iiyure Eziliwaka Lezigidi!

13. Zingaphi iiyure eziye zachithelwa ekushumayeleni nasekufundiseni ngowe-1992, yaye eli nani liquka imigudu yoobani?

¹³ Yintoni obunokuyenza ngeeyure eziliwaka lezigidi? Bonke abaya kuzuza ubomi obungunaphakade baya kukwazi ukuchithela iiyure ezininzi kangako, kwanangaphezulu, kwinkonzo enemveliso neyanelisayo kuYehova. Kodwa khawufan’ ucinge ngokusebenza iiyure ezininzi kangako kunyaka omnye! Oko koko kufezwe ngabantu bakaYehova ebudeni bowe-1992. Xa sidibanisa iingxelo zabo bonke abavakalisi boBukumkani, sifumana incopho entsha yeeyure ezili-1 024 910 434 eziye zachithwa ngeyona ndlela ilungileyo ezinokuchithwa ngayo iiyure—kudunyiswa uMdali wethu Ozukileyo, ‘kufundiswa ekuhleni nakwizindlu ngezindlu.’ (IZenzo 20:20) Ngokomlinganiselo, ngamaNgqina azizi-4 289 737 abefaka ingxelo nyanga nganye. Aphuma kuzo zonke iindidi zobomi. Amanye anexesha elilinganiselweyo anokulinikela kumsebenzi woBukumkani. Aba baquka iintloko-ntsapho, ezifanele zilungiselele iintsapho zazo; abalupheleyo; nabaninzi abaneengxaki zempilo kwanabantwana abasesesikolweni. Sekunjalo, ingxelo enikelwe ngumntu ngamnye yimbonakaliso exabisekayo yothando ngoYehova.—Thelekisa uLuka 21:2-4.

14. Abaselula ‘bamkhumbula njani uMdali wabo Ozukileyo’?

¹⁴ Kukho isizukulwana esiselula esikhulela enkonzweni kaYehova, ibe ngokuvuyisayo inkoliso yaba iyawasebenzisa amazwi kaSolomon akwiNtshumayeli 12:1 athi: “Uze umkhumbule ke uMdali wakho ngemihla yobutsha bakho.” Bayazibhokoxa kumsebenzi wabo wesikolo, nasekuqeqeshweni kwimicimbi yokomoya ngabazali abazinikeleyo. Kuye kwaluvuyo ukubona inani elikhulu labaselula abakwishumi elivisayo besukuma kwiindibano zakutshanje, bezinikela ukuze babhaptizwe. Kwakhona kuyavuyisa ukwazi ukuba abaninzi, ngokufundela umsebenzi okanye ubugcisa obuthile, bazilungiselela kakuhle ukuba babe ngoovulindlela bakugqiba esikolweni. Ngaloo ndlela, baya kukwazi ukuzixhasa, njengoko umpostile uPawulos wayesenza ngamathuba athile ngokwenza iintente.—IZenzo 18:1-4.

15, 16. Oovulindlela nabanye abakhonzi bexesha elizeleyo baye banegalelo njani kwinkqubela yomsebenzi woBukumkani, ibe abanye babo banandiphe yiphi intsikelelo?

¹⁵ Elinjani lona igalelo elenziwa ngoovulindlela nabanye abakhonzi bexesha elizeleyo kwinkqubela yomsebenzi woBukumkani! Amanani oovulindlela aye anda ukuya kufikelela kwincopo yama-931 521 kulo nyaka uphelileyo. Njengoko aba beshumayela imihla ngemihla kwindlu ngendlu yaye beqhuba izifundo zeBhayibhile kumakhaya abantu, baye baphumelela gqitha ekuthetheni ngeZibhalo. Ngaphezu koko, abaninzi baye bafanelekela ukuya kwiSikolo Senkonzo Yobuvulindlela esiqhutywa iiveki ezimbini, esibanceda bahlakulele ubuchule novuyo olungakumbi ekwenzeni umsebenzi kaThixo.

¹⁶ Ngamnye waba vulindlela bathembekileyo unokuvumelana namazwi akuIsaya 50:4 athi: “INkosi uYehova indinike ulwimi lwabafundileyo, ukuze ndikwazi ukuzimasa otyhafileyo ngelizwi.” Baninzi abantu namhlanje abadiniweyo lihlabathi elonakeleyo elibangqongileyo kodwa abafumana ukuphumla ngelizwi elithethwa ngoovulindlela bethu abathembekileyo.—Thelekisa IMizekeliso 15:23; Hezekile 9:4.

Umsebenzi Omkhulu Wokwakha

17. Ukongezelela ekwakheni ngokomoya, kukuphi ukwakha kokoqobo okuye kwabonakala kwiminyaka yakutshanje?

¹⁷ Kwakhona ukuphumelela ngokomoya kwamaNgqina kaYehova emhlabeni wonke kufuna ukwandiswa kwezinto zokoqobo. Kuye kwafuneka ukuba kwandiswe izakhiwo zokushicilela, iiofisi namakhaya aseBheteli kuze kwakhiwe iiHolo zoBukumkani neeHolo zeeNdibano. Ngoko kufuneka ukuba amaNgqina kaYehova abe ngabakhi bokoqobo. Umsebenzi wokwakha onjalo wawuqhubeka ngomhla kaKumkani uSolomon. USolomon wakha itempile yonqulo lukaYehova ngokuvumelana ‘neplani yokwakha awayifumana ngempefumlelo,’ uYehova awayeyinikele kuyise, uKumkani uDavide. (1 Kronike 28:11, 12, NW) Ngaloo ndlela, uSolomon akazange abomeleze abo babemphulaphula ngamazwi angenakuthelekiswa nanto obulumko kuphela kodwa wakwalathisa ukwakhiwa kwesakhiwo esibalaseleyo nesingazange sakhiwa lihlabathi.—1 Kumkani 6:1; 9:15, 17-19.

18, 19. (a) Yiyiphi imisebenzi yokwakha intlangano kaYehova eyenzayo? (b) Umoya kaYehova uye wabonakaliswa njani kumsebenzi wokwakha wokoqobo nowokomoya?

¹⁸ Namhlanje, amaNgqina kaYehova awasebenzisi iiplani zokwakha azifumana ngempefumlelo kaThixo, kodwa anawo umoya kaThixo. Njengakwimihla kaSirayeli, lo moya uwashukumisela ukuba akhe ngendlela ebatsho babamb’ ongezantsi abantu behlabathi. (Zekariya 4:6) Ixesha lifinyele. IiHolo zoBukumkani nezinye izakhiwo zifuneka ngokukhawuleza. Kwamanye amazwe iiHolo zoBukumkani ezakhiwa ngokukhawuleza yinto yomhla nezolo. Ngokomzekelo, kwiminyaka eli-10 edluleyo, kunikelwe ingxelo yokuba eKhanada kwakhiwe iiholo ezingama-306, nganye kuzo yakhiwe ngaphantsi kweentsuku ezimbini. Ngenxa yokwanda ngokuphindaphindiweyo komsebenzi kaYehova emhlabeni wonke, kukho izakhiwo zamasebe ezitsha okanye ezandisiwayo ezingama-43 ezakhiwayo okanye ezicetywayo kanye ngoku sithethayo. Ngaphezu koko, isakhiwo sokuhlala esinemigangatho engama-30, nesinokuhlala abasebenzi bokuzithandela baseBheteli abanokuba liwaka, sele siza kugqitywa eBrooklyn. Kwakhona kwiLizwe laseNew York, ePatterson, ukwakhiwa kweziko lokufundisa iBhayibhile, owona msebenzi wokwakha mkhulu wakha wenziwa yiWatch Tower Society, uhambela phambili gqitha kunokuba kwakucwangcisiwe.

¹⁹ Lo msebenzi wokwakha uhambela phambili yaye umsebenzi wenziwa ngobuchule nangokusemgangathweni nto leyo ebangela ukuba iinkampani zehlabathi ezinolwazi ngomsebenzi wokwakha zingabi nakuyivala imilomo. Kutheni? Kungenxa yegalelo elikhulu elenziwa ngamaNgqina kaYehova azahluleleyo. Umoya wakhe uwashukumisela ukuba anganikeli ngezinto eziphathekayo kuphela kodwa kwakhona uwashukumisela ukuba anikele ngeentliziyo ezipheleleyo ngexesha nangamandla awo. Kwiziza zokwakha kunyakazela abasebenzi abaqeqeshwe kakuhle nabazinikeleyo. Akukho kugwayimba kwabasebenzi yaye akukho kunqena emsebenzini. Bashukunyiswa ngumoya kaYehova, kanye njengokuba washukumisa abakhi bomnquba ngomhla kaMoses kwanabo bakha itempile ngemihla kaSolomon. Aba basebenzi kufuneka babe nophawu olubalaseleyo lokutyekela kwizinto zokomoya.—Thelekisa iEksodus 35:30-35; 36:1-3; 39:42, 43; 1 Kumkani 6:11-14.

20. (a) Iindaba ezilungileyo zisaya kushunyayelwa ukusa kuwuphi umkhamo? (b) Liliphi ithemba elisikelelekileyo elilindele abantu bakaYehova?

²⁰ USolomon waqhubeka nomsebenzi wakhe wokwakha emva kokugqiba ukwakha itempile. (2 Kronike 8:1-6) Asazi ukuba umsebenzi wanamhlanje wokunikela ubungqina usaya kwanda ukusa kuwuphi umkhamo—kwakunye nemfuneko oyibangelayo yokwakhiwa kweeholo nezinye izakhiwo. Noko ke, into esiyaziyo kukuba kuya kuthi xa ezi ndaba zilungileyo zoBukumkani zishunyayelwe ukufikelela kumkhamo uYehova awumiseleyo, kwandule ukufika ukuphela, “imbandezelo enkulu.” (Mateyu 24:14, 21) Kwihlabathi elingasonakaliswa ngabantu ababawayo, ilungiselelo likaYehova ‘lamazulu amatsha nehlabathi elitsha’ liya kwandula lizise iintsikelelo ezimangalisayo kuluntu. Ngoko ke kwanga ‘singanemihlali, sigcobe nanini yiloo nto uThixo ayidalayo,’ sinikela yonke indumiso kuMdali wethu Ozukileyo!—Isaya 65:17-19, 21, 25.

[Umbhalo osemazantsi]

Ngaba Unokucacisa?

◻ Ziziphi izizathu esinazo zokuvuya ngoMdali wethu Ozukileyo?

◻ Luluphi ulwando oluye lwakho ebudeni bonyaka wenkonzo we-1992?

◻ Kumazwe umsebenzi wokunikela ubungqina obuvaliwe kuwo, ziziphi iintsikelelo ezityebileyo eziye zakho?

◻ Ulutsha noovulindlela baye banegalelo njani kulwando kwintlangano kaYehova?

◻ Abantu bakaYehova bebexakeke njani kwimisebenzi yokwakha ngokoqobo nangokomoya?

[Ibhokisi ekwiphepha 17]

Nyakenye kuye kwachithwa iiyure ezingaphezu kwewaka lezigidi kumsebenzi wokushumayela nowokufundisa

[Isicangca esikwiphepha 12-15]

INGXELO YONYAKA WENKONZO WE-1992 YAMANGQINA KAYEHOVA EMHLABENI WONKE

(Bona imiqulu)

[Umfanekiso okwiphepha 10]

Amakhulu amawaka abantu ababhaptizwe kunyaka ophelileyo abonisa ukusikelela kukaYehova umsebenzi wokushumayela nowokufundisa

[Umfanekiso okwiphepha 16]

Abantu abaselula abaninzi ‘bakhumbula uMdali wabo Ozukileyo’