Ukwakhela Ikamva Elingunaphakade
“Yonke into eyindlu inoyakhayo; ke lowo wazakhayo zonke izinto nguThixo.”—HEBHERE 3:4.
1, 2. (a) Ngubani owayila umkhombe, yaye imiyalelo eyanikelwayo yayineenkcukacha ezingakanani? (b) Kutheni le nto kubalulekile ukuba sithobele, njengoko uNowa wenjenjalo?
KWIMINYAKA enokuba ngama-4 400 eyadlulayo uYehova wayalela uNowa ukuba akhe umkhombe ukuze kulondolozwe ubomi. Kodwa uThixo akazange akushiyele kuNowa ukuba akhe naluphi na uhlobo lwesakhiwo olwalunokudada emanzini. Kunoko, wanikela imiyalelo engqalileyo ngokubhekisele kwizinto ezazinokusetyenziswa, kwindlela yokwakha, kubude, kububanzi, kumphakamo, iindawo zokungenisa umoya, kwanomphakathi nomphandle. “Wenza uNowa konke uThixo abemwisele umthetho ngako, wenza njengoko.”—Genesis 6:13-16, 22.
2 Onjani wona umzekelo ukuba mhle kumangqina kaYehova anamhla! NjengoNowa, sinikwe umsebenzi wokusindis’ ubomi kodwa ngeli xesha sikhangele ekusindisweni ‘kwezigidi eziphilayo ngoku ezisenokungaze zife.’ Hayi indlela ekubaluleke ngayo ukuba sithobele, njengoko uNowa waba njalo! Hayi indlela ekungxamiseke ngayo ukuba silandele umzekelo waLowo umkhulu kunoNowa, uYesu Kristu, ekukhonzeni ‘njengabashumayeli bobulungisa’!—2 Petros 2:5.
Umsebenzi Wokwakha Ngokomoya
3. (a) Uya kuba yintoni umphumo wokwakha kumazwi kaYesu? (b) Kutheni le nto ukushumayela kukaYesu kwakusakha ukholo nje?
3 Ngoku sekuyiminyaka eli-1 956 ukususela kwixesha laxa uYesu wamangalisa ngalo abantu basemaphandleni kwelaseGalili ngala mazwi athi: “Guqukani, kuba ubukumkani bamazulu busondele.” Wafanisa wonk’ ubani owathobelayo amazwi akhe waza wakha phezu kwawo “nendoda eyingqondi, yona yayakhelayo elulwalweni indlu yayo.” Ukholo lwaloo ndoda luqinile, aluxengaxengi yaye alushukumi. Ayiyi kuwa phantsi kwengcinezelo. Ukushumayela kukaYesu kwakusakha ukholo. Kwafikelela iintliziyo zabantu, kwahluke gqitha kwimilembelele yohanahaniso eyayisenziwa ziinkokeli zonqulo zamaYuda. Abantu abaqhelekileyo bamangaliswa yindlela kaYesu yokufundisa. Kwanamajoni awayethunyelwe ukumbamba abuya ephaca, esithi: “Akuzanga kuthethe mntu njengoko athetha ngako lo mntu.”—Mateyu 4:17; 7:24, 25, 28; Yohane 7:46.
4. (a) UYesu walakhela njani ikamva? (b) Nguwuphi umsebenzi omkhulu wokwakha owaqhubeka ngePentekoste yowama-33 C.E.?
4 UYesu wayesakhela ikamva. Wahlanganisa abasebenzi abangoowabo, abanjengoPetros, owayekwabizwa ngokuthi nguKefas, gama elo elithetha “ilitye.” UYesu wathi kulo mfundi: “UnguPetros wena; ndiya kulakhela phezu kolu lwalwa ibandla lam.” Ekuhambeni kwexesha uPetros waba ngomnye ‘wamatye aphilileyo’ amaninzi awayakhelwe phezu koYesu, “ilitye lembombo” lebandla. Elo bandla lamiselwa ngePentekoste yowama-33 C.E. xa uYesu ovusiweyo, ekwisandla sokunene sikaThixo ezulwini, wathulula umoya oyingcwele phezu kwabafundi ababelindile.—Mateyu 16:18; 1 Petros 2:4-6; IZenzo 2:2-4, 32, 33.
5. Ziziphi iziganeko zanamhla ezilibandakanya nzulu ibandla lamaKristu?
5 Namhlanje, ibandla lamaKristu libandakanyeke ngokunzulu ekuphunyezweni kweenjongo zikaYehova. Eli lixesha “lesityhilelo,” okanye “lokubonakaliswa,” xa “izinto ezimele ukubakho kamsinya” zityhilwa ‘kubakhonzi’ bakaThixo emhlabeni. (ISityhilelo 1:1-3, Umbhalo osemazantsi kwiRef. Bi.) Eli lixesha lokuba aba bakhonzi ‘bashumayele iindaba ezilungileyo zoBukumkani kwelimiweyo liphela zibe bubungqina,’ ngaphambi kokuba aphumeze umgwebo kwinkqubo kaSathana engendawo. Kulixesha lokuba uKumkani, uYesu Kristu, ngoku omiselwe etroneni emazulwini, ahlule abantu abalulamileyo nababumvu kubantu abaneenkani nababubhokhwe abangabufuniyo obo Bukumkani, aze ahlanganise ezi “zimvu” kwibandla lakhe ‘labazalwana’ bokomoya ngaphambi kokuqhambuka ‘kwembandezelo enkulu.’—Mateyu 24:14, 21; 25:31-40.
6. Namhlanje uyintoni “umkhombe,” ibe sisenokusinda njani?
6 Uyintoni umkhombe wanamhlanje wokusinda? Yimeko yokomoya athe amaNgqina kaYehova azifumana ekuyo ukususela kowe-1919, iparadisi yokomoya. Njengamalungu entsapho kaNowa, intsalela yamaKristu athanjisiweyo namaqabane ayo imele ihlale ngaphakathi kwemida yayo, isebenze ngokuthobekileyo, ngentliziyo epheleleyo, ekugqibeni umsebenzi omkhulu wokomoya uYehova anenjongo yawo. Lo msebenzi ‘ngowokuhlanganisa zonke izinto kuye uKristu, ezisemazulwini [ukususela ngowama-33 C.E. ngokuhlanganiswa kwabathanjisiweyo basezulwini] nezisemhlabeni [ngokuphawulekayo ukususela ngowe-1935 ‘isihlwele esikhulu’ sezizwe ngezizwe esimiselwe ukufumana ubomi obungunaphakade emhlabeni].’—Efese 1:10; ISityhilelo 7:9, 14.
‘Ukwakha Nokutyala’
7. Nguwuphi umsebenzi ontlumbini ngoku oqhubekayo, ibe sisenokulufumana njani ulonwabo olwafunyanwa nguNowa noYeremiya?
7 UYehova uthume amaKristu athanjisiweyo asaseleyo emhlabeni, kanye njengokuba wenjenjalo kumprofeti uYeremiya, ukuba ‘avelele iintlanga nezikumkani, ukuba anyothule, adilize, atshabalalise, agungxule; ukuba akhe, atyale? Ngoko kuqhubeka umsebenzi ontlumbini ngoku: (1) kukuvakalisa umgwebo kaYehova nxamnye nenkqubo yehlabathi elingendawo likaSathana ibe (2) kukwakha nokumisela ibutho labantu bakaThixo abaza kusindiswa. (Yeremiya 1:10; 24:6, 7; Isaya 26:20, 21) Hayi indlela eyonwabe ngayo intsalela yabathanjisiweyo namaqabane ayo asisihlwele esandayo njengoko besiba nesabelo kulo msebenzi namhlanje! Olu luhlobo lolonwabo uNowa nentsapho yakhe ekhutheleyo ekumele ukuba balufumana ngomhla wabo.
8. (a) Luluphi ulwando lwabavakalisi kwiminyaka edluleyo engama-22 oluphawulekayo? (b) Xa sibhekisela kwiphepha 20-3, ngawaphi amanye amazwe anandiphe ulwando olubalaseleyo ebudeni bowe-1985?
8 Ngaba izigidi ziya kusinda kumhla womsindo kaYehova? Kukho ithemba elihle loko, njengoko Ingxelo Yonyaka Wenkonzo we-1985 yamaNgqina kaYehova ibonisa. Iinkcukacha zale ngxelo zibonakala apha kwiphepha 20-3. Kuchulumancisa gqitha ukuphawula ulwando olukhulu kubasebenzi basentsimini abalinani eliyincopho. Ngoku oku kukhule kwaya kufikelela kwizi-3 024 131 zabashumayeli boBukumkani. I-1 000 000 safikelelwa okokuqala ngowe-1963, izi-2 000 000 zafikelelwa ngowe-1974, ibe ngoku kukho ngaphezu kwezi-3 000 000 ngowe1985. Kuloo minyaka ingama-22, kubekho ulwando lwama-200 ekhulwini. Hayi indlela esinombulelo ngayo kuYehova othi, ngomoya wakhe, azenze izinto zikhule!—Zekariya 4:6; 1 Korinte 3:6.
9. (a) Kutheni le nto ulwando loovulindlela luphawuleka ngokude kwangakumbi? (b)Yintoni enconyelwayo kubo bonke abanokubenzela ithuba, ibe ngoba?
9 Into ebibalasele ngokungakumbi ebudeni baloo minyaka ibe kukwanda kwabavakalisi boBukumkani bexesha elizeleyo. Phezu kwazo nje iimeko zoqoqosho eziya zisiba mbi zwenibanzi, inani leli qela likhaliphileyo “elingoovulindlela” liye lenyuka ukususela kumlinganiselo weenyanga ngeenyanga wama-38 573 ngowe-1963 laya kutsho kuma-322 821 ngowe-1985—nto leyo elulwando lwama-737 ekhulwini! Kubonisa ntoni oku? Kubonisa ukuba kukho umoya ozukileyo wokuzincama kubantu bakaThixo, ngokuvisisana namazwi kaYesu akuLuka 9:23. Ngokuqhelekileyo, kufuneka ukuba umntu acebe ngenyameko aze azincame ukuze aphumelele kwinkonzo yobuvulindlela. Kodwa imivuzo mikhulu.—Roma 12:1, 2; Malaki 3:10.
10. (a) Abavakalisi bebandla bamele banconywe ngenxa yantoni? (b) Ziziphi iincopho ezintathu ezintsha zomsebenzi ezichazwayo apha, ibe zibonisa ntoni?
10 Izigidi zabavakalisi bamabandla nazo zilwa neengcinezelo eziziswa phezu kwazo nguSathana nehlabathi lakhe. Kodwa nazo, zinikela kuThixo “umbingelelo wendumiso” ongowazo. (Hebhere 13:15; Roma 10:9, 10) Ezo yure, enoba zininzi okanye zimbalwa, enithi nina bavakalisi abathembekileyo nizibike nyanga nganye zibe yinxalenye yencopho entsha yeeyure ezingama-590 540 205 kwinkonzo yasentsimini ngowe-1985. Olu lulwando lwe-16,8 ekhulwini kunowe-1984! lincopho ezintsha kumabuyelo angama-224 725 918 nezifundo zeBhayibhile zamakhaya ezizi-2 379 146 zabantu abanomdla zibonisa ukuba kuzo zonk’ iindawo abavakalisi boBukumkani bazabalazela ukuba ngabafundisi abalungileyo kwanabashumayeli abanenzondelelo.—Mateyu 28:19, 20.
Ukwakhela Uxolo Nonqabiseko Lokwenyaniso
11. Ithemba loxolo nonqabiseko livakaliswa njani, ibe ukusa kuwuphi umlinganiselo?
11 Ekupheleni kowe-1985, iZizwe Ezimanyeneyo zavakalisa owe-1986 njengoNyaka Woxolo weZizwe Ngezizwe. Kumaxesha akutshanje, iZizwe Ezimanyeneyo zithethe lukhulu ngoxolo nonqabiseko. kodwa uvakaliso olubaluleke ngakumbi, olo lungethemba leZibhalo loxolo nonqabiseko, luye lwavakaliswa kanobom ebudeni bo we-1985 njengoko amaNgqina kaYehova eshiye kwintsimi yehlabathi iiBhayibhile, iincwadi neencwadana ezingama-38 805 561, namaphephancwadi angama-300 545 609, aza afumana imirhumo yeMboniselo noVukani! engama-1 719 930. Ngeempapasho ezishicilelweyo nangokuvakalisa ngomlomo, uBukumkani obumiselweyo ‘boMthetheli woxolo’ lokwenene buye bavakaliswa gqitha ukuza kuthi ga ngoku. Ngokwenyaniso, ‘ukuthethela oko kuyanda, kubakho uxolo olungenakuphela.’—Isaya 9:6, 7.
12. Ulwando luye lwaphumela kuyiphi imfuneko enkulu, ibe abantu bakaYehova baye bamanyana njani ekuzameni ukuhlangabezana naloo mfuneko?
12 Ulwando olukhulu entsimini lubangele ukuba kubekho ukwanda ekuxhasweni kwentlangano. Ebudeni bo we-1985 inani lamabandla amaNgqina kaYehova zwenibanzi landa ukususela kuma-47 869 laya kutsho kuma-49 716. Oku kuye kwabangela ukuba kufuneke amakhulukhulu eendawo ezintsha zokuhlanganisana. Hayi indlela ekukuhle ngayo ukuba, kumazwe amaninzi, amaNgqina aye asikelelwa kwimigudu yawo yokuxhasa ngemali iiHolo zoBukumkani! Apho kuye kwabakho imfuneko, abantu ngabanye namabandla ngokungazingci baye baxhasana kucwangciso lwabo lokwakha, ukuze kubekho “ukulingana” phakathi kobuzalwana bazwenibanzi.—2 Korinte 8:14, 15.
13. Abantu banokufak’ isandla njani ekwakhiweni kweeHolo zoBukumkani?
13 Kumazwe apho iimeko zingembi khona, iiofisi zamasebe zeWatch Tower Society ziye zakuxhasa ukwakhiwa kweeHolo zoBukumkani. EUnited States naseKhanada, abantu abaninzi banikela kwiNgxowa-mali ekhethekileyo yeHolo yoBukumkani, eye yabangela kwaba nokwenzeka ukuba kubekho iimali-mboleko zokwandiswa kwezakhiwo zeeHolo zoBukumkani. Abanye baye banikela ngamandla abo nangobugcisa babo, ukuze kwaneeHolo zoBukumkani ezakhiwe ngokukhawulezileyo zimiswe ebudeni bempelaveki nje enye. Ngokusebenza kwizakhiwo ezinjalo “ngokwasemphefumlweni, kunge kukwiNkosi,” amaNgqina akhe anokufeza oko abantu behlabathi bakugqala kungenakwenzeka.—Kolose 3:23.
14. limfuneko zeeHolo zeNdibano kuye kwahlangatyezwana njani nazo?
14 Kumazwe aliqela, ukungabikho kweendawo ezifanelekileyo zeendibano zesiphaluka eziqhutywa kabini ngonyaka zamaNgqina kaYehova kuye kwabangela ingxaki enkulu. Kwakhona, ngovuyo amaNgqina aye ahlangabezana nocelomngeni ngocwangciso lokwakha, enesimo sengqondo esifanayo neso sabonakaliswa ngabakhonzi bakaThixo kumaxesha angaphambili. Ngokomzekelo, xa kwaba yimfuneko ukufumana izinto zokwakha umnquba, ibandla lakwaSirayeli ngokumanyeneyo lathobela lo myalelo: “Thabathani phakathi kwenu, nise umrhumo kuYehova; bonke abantliziyo zibaqhubayo mabazise umrhumo kaYehova.” Elo bandla lanikela okuninzi gqitha kunokwakufuneka, yaye umsebenzi wafezwa ngokukhawulezileyo.—Eksodus 35:5-19; 36:7.
15. (a) Luluphi ulwando obeluqhubeka kumasebe eWatch Tower Society? (b) Lo msebenzi ubufezwa njani?
15 Njengoko imfuneko yeeBhayibhile neempapasho ezisekelwe eBhayibhileni isanda, uninzi lwamasebe eWatch Tower angama-94 ukutyhubela ihlabathi kuye kwafuneka andise izakhiwo zawo. Iindawo zokushicilela zaseBrooklyn nakwiiFama zeWatchtower zisezezona zinkulu, kodwa amasebe oMbutho angama-36 ngoku ashicilela amaphephancwadi awo, ibe amasebe ama-6 akwaxhotyiselwe ukushicilela nokuhlanganisa iincwadi. La masebe, iJamani, i-Itali, neJapan avelisa iiBhayibhile. Umzi-mveliso omtsha eSelters, eJamani, usebenza ngokwenene. E-Ebina, eJapan, kwakhiwa isongezelelo somzi-mveliso esimigangatho mithandathu nesihlomelo seKhaya laseBheteli esimigangatho isibhozo ukuze kuhlaliswe abanye abasebenzi abangama-280. Kanye njengokuba abantu bakaYehova baxhasa isakhiwo setempile kaSolomon ‘ngentliziyo epheleleyo,’ ngokukwanjalo namhlanje abantu bakaThixo emazweni awahlukahlukeneyo ‘banikela ngokuqhutywa yintliziyo kuYehova,’ ibe wongezelela intsikelelo yakhe ukuze umsebenzi ufezwe.—1 Kronike 22:14, 15; 29:7, 9.
16. Kutheni oku kwakha kongezelelekileyo nokulungelelaniswa kwezinto kuye kwaba yimfuneko?
16 Ngaba konke oku kwakha nokulungelelaniswa kwezinto kuyimfuneko ngokwenene? Kuyimfuneko, ukuba ‘umkhonzi othembekileyo noqondayo’ uza kuqhubeka elungiselela ‘ukudla kokomoya ngexesha elifanelekileyo.’ Ukudla okunjalo kuyimfuneko ngokwenene ukuze kukhule ‘indlu kaThixo’ nokushunyayelwa zwenibanzi ngeelwimi ezingaphezu kwama-200. (Mateyu 24:45; Efese 2:19; 4:15, 16) Abantu bakaYehova banikele ngobuchule babo ekuveliseni inkqubo yombane yokubhala amagama ngokufota ehlanganisa iilwimi ezininzi (MEPS), ngoku ekumasebe eWatch Tower angama-26. Oku kubangele kwabakho oomatshini bokushicilela abakho zwenibanzi, ibe kuye kwanceda ekuvakaliseni isigidimi soBukumkani kwangaxeshanye kwiindawo ezininzi zomhlaba.—Thelekisa uIsaya 52:7-9.
17. Yiyiphi imfuneko ekhoyo kwikomkhulu laseBrooklyn, ibe oku kusingathwa njani?
17 Kubonakala kungekho siphelo kulwando lwanamhla lwentlangano kaYehova. Kwanangoku, intsapho yaseBheteli eBrooklyn, eNew York, kwikomkhulu loMbutho iye yanda yafikelela kumlinganiselo wokuzalisa zonke iindawo zokuhlala ezikhoyo. Ukuba kukuthanda kukaThixo, kunokwakhiwa isakhiwo esiphakamileyo sokuhlalisa iwaka elongezelelekileyo labasebenzi baseBheteli kwindawo yoMbutho eseColumbia Heights. Kodwa ukuba oku akuphumeleli, siya kukhangela kulwalathiso lukaYehova olubhekele phaya ngalo mcimbi. Imithandazo nenkxaso yokunyaniseka yobuzalwana bazwenibanzi ngokunxibelelene nalo lonke olu lwando ixatyiswa ngokwenene.—Thelekisa IZenzo 21:14; 2 Tesalonika 3:1.
18. Kutheni le nto kukho imisebenzi emininzi kangaka yokwakha namhlanje, phezu kwako nje ukusondela kweArmagedon?
18 Ubani usenokubuza athi, ‘Kodwa kutheni kukho izakhiwo ezininzi kangaka zolwandiso xa sijongene ngolu hlobo neArmagedon?’ Impendulo yeyokuba intlangano kaYehova ‘ayiyeki ukushumayela’ ngenxa yokusondela kweArmagedon. Oko ‘kukuphela’ nje kwentlangano kaSathana. Intlangano kaYehova yakhela ikamva elingunaphakade. Enoba izakhiwo ezakhiwe ngumntu zosinda na kuqhwithelo lweArmagedon okanye akunjalo, siyazi ukuba intlangano kaYehova iya kusinda iqhubeke ibe uYehova uya kuyisebenzisa nabo bayixhasa ngokunyanisekileyo, kumiselwe uxolo nonqabiseko olungunaphakade kwiParadisi ezukileyo yasemhlabeni ethenjiswe nguThixo.—ISityhilelo 7:9, 14-17; 21:1, 4, 5.
Ukwakha Ngenjongo
19. Luluphi ucelomngeni olunokubonwa kwingxelo yeSikhumbuzo yowe-1985?
19 UNowa wakha ngenjongo, nathi simele sibe njalo. Enye inkalo yeNgxelo Yonyaka Wenkonzo yowe-1985 inikela into emele icingwe. Lolo ziwo lumangalisa gqitha labantu abazizi-7 792 109 abeza kwiSikhumbuzo sokufa kukaYesu ngoAprili 4, 1985—ulwando lwama-375 134 kunesimbuku sowe-1984. Ngokwenene kuyamangalisa oku! Kodwa elo nani linocelomngeni. Njengoko kukho incopho yabavakalisi abazizi-3 024 131 abanesabelo kwinkonzo yoBukumkani, kukho abanokuba zizi-4 000 000 abanxulumana nathi, ubuncinane ngomlinganiselo othile, ekusafuneka bakhele ikamva ngokuba nesabelo kubulungiseleli bobuKristu. Sinokubanceda njani?
20. Yiyiphi imfuneko engxamisekileyo ekhoyo yokuhlangabezana nolu celomngeni, ibe oku sinokukwenza njani ngendlela esebenzisekayo?
20 Uninzi lwaba bantu banomdla siyabazi ngokobuqu. Basenokuba ngamalungu entsapho, abantu esibaqhubela izifundo zeBhayibhile, abarhumeli bamaphephancwadi ethu, okanye abanye. Bambi basenokuba bade baba nomdla ukususela kwiSikhumbuzo esidluleyo. Ngaba ngeli thuba sinokwenza umgudu okhethekileyo wokubondla, sibakhe ngezifundo zeBhayibhile, ukuze bafumane ikhusi kwilungiselelo likaYehova “kude kudlule inkxwaleko”? (INdumiso 57:1) “Imbandezelo enkulu” yoba sisenzo sikaThixo sokuzithethelela, ibe inentsingiselo yaye iqoshelisa ngakumbi kunoMkhukula kaNowa. Sifuna ukubakha aba bantu banomdla ngeenyaniso ezinikel’ ubomi, ukuze babe baya ‘kunqula igama likaYehova’ baze bangatshayelwa. (Mateyu 24:21, 22, 39; Zefaniya 2:3; 3:8, 9) Masifundisise iLizwi likaThixo nabo, sisebenzise incwadi yesikhokelo ethi Unokuphila Ngonaphakade KwiParadisi Esemhlabeni okanye olunye uncwadi lweBhayibhile olwakha ukholo.
21. Sisenokulwakha njani ukholo olunjengolukaNowa kuthi nakwabanye?
21 UYehova uThixo unguMakhi Olichule noMlungiseleli Ozukileyo woluntu. (INdumiso 127:1; 145:16; INtshumayeli 3:10-13) Nguye owayalela uNowa ngokubhekisele ekuyilweni nasekwakhiweni komkhombe. Ngentsebenziswano evumayo kaNowa Omkhulu, uYesu Kristu, ulungiselele ukuhlawulela abantu abathobekileyo esonweni nasekufeni. Ngalo Nyana uye wakha ‘nomkhombe’ wanamhla, iparadisi yokomoya ephumelelayo apho amadoda nabafazi bokholo basenokusindiswa khona, bejonge ekufumaneni ubomi obungunaphakade. (Mateyu 20:26-28; Yohane 3:16; 17:3) Kwanga singanceda abanye abaninzi ukuba bakhe ukholo baze bazenzele ulwalamano olusenyongweni noluqinileyo noYehova noNyana wakhe. Kwanga singabanceda ukuba bathande ubulungisa baze bathiye okungendawo. (Hebhere 1:9) Ngaloo ndlela, ngokholo olunjengolukaNowa, sinokuqhubeka sisakha kunye ngenxa yekamva elingunaphakade.—1 Timoti 4:15, 16.
IMIBUZO YEMPINDA—
◻ UYesu walakhela njani ikamva?
◻ Yintoni oyifumanise ibalasele kwingxelo yowe-1985?
◻ Kutheni le nto iinkqubo zokwakha phantsi kolawulo lobuthixo zifuneka nje?
◻ Thina sonke sinokwakha njani ngenjongo?
[Ibhokisi ekwiphepha 24]
Ibandla kwilizwe laseAfrika apho umsebenzi kaYehova ubhangisiweyo khona linabavakalisi abangama-95, bonke banesabelo enkonzweni nyanga nganye. Banomlinganiselo woziwo wabantu abali-130 kwiintlanganiso zabo kodwa babali-160 kwiintetho zabo zesidlangalala. Banoovulindlela abathe ngxi abathathu ibe kutshanje bebenoovulindlela babancedani abasibhozo. Kwiinyanga ezintandathu nje kuphela, abavakalisi abatsha abangama-21 baye baqalisa kwinkonzo yasentsimini
[Ibhokisi/Umfanekiso okwiphepha 16, 17]
UKWAKHA KWAZWENIBANZI KWAMANGQINA KAYEHOVA
Zwenibanzi, oovulindlela abangama-322 821 bebebika nyanga nganye (ulwando lwama-24,7 ekhulwini)
Zwenibanzi abavakalisi banda bafikelela kwizi-3 024 131 (ulwando lwe-6,4 ekhulwini)
Ukubuyela kubantu abanomdla, 224 725 918 ngonyaka (ulwando lwe-14,8 ekhulwini)
Izifundo zeBhayibhile zamakhaya ezaqhutywayo nyanga nganye zazingama-2 379 146 (ulwando lwe-16,2 ekhulwini)
[Imifanekiso]
Oovulindlela besiya kubulungiseleli bendlu ngendlu, eBrooklyn, eNew York
Indibano yeelwimi ezilishumi elinesine, eMontreal, Quebec, eKhanada
Ukunikela ubungqina, eCastle Comb, eWiltishire, eNgilani
Iqela lesifundo, eYap, eMicronesia
Izakhiwo ezithile ezusetyenziselwa ukuxhasa umsebenzi wazwenibanzi wokwakha ngokomoya.
EBrooklyn, ukuthunyelwa kweeBhayibhile noncwadi lweBhayibhile kwenziwa kwesi sakhiwo sizisquare-foot ezisi-1 000 000 esuse-360 Furman Street
Le holo yoBukumkani (eDownpatrick, eMntla Ireland) yakhiwa ngeeyure ezingama-31
Le holo yeNdibano eRome iyenye yeeholo ezininzi ezinjalo ezisetyenziswa emhlabeni jikelele
Esi sihlomelo seKhaya laseBheteli eJapan ngoku siyakhiwa
[Itshati ekwiphepha 20-23]
NGXELO YONYAKA WENKONZO WE-1984 YAMANGQINA KAYEHOVA ZWENIBANZI
(Bona imiqulu)
[Itshati ekwiphepha 25]
Amazwe asibhozo abike incopho yabavakaiisi abangaphezu kwe-100 000 ngowe-1985
IU.S.A. 723 220
IBrazil 177 904
IMexico 173 037
I-Itali 127 526
INigeria 121 729
IJamani 115 604
IBritani 103 522
IJapan 103 117