Inceba KaYehova Iyasisindisa Ekuphelelweni Lithemba

“Tarhu, Thixo, ngokwenceba yakho! Ngokobuninzi benceba yakho, cima ukreqo lwam!”—INDUMISO 51:1.

1, 2. Omnye wabakhonzi bakaYehova unokuchatshazelwa njani sisono esinzulu?

UMTHETHO kaYehova awunakwaphulwa nje ngaphandle kokufumana isohlwayo. Hayi indlela ekubonakala ngayo oko ukuba sithi simone ngokunzulu uThixo! Nangona kusenokuba siye samkhonza ngokuthembeka uYehova kangangeminyaka emininzi, ukwaphula umthetho wakhe kusenokubangela ukukhathazeka okukhulu okanye udandatheko olunzulu. Sisenokuvakalelwa kukuba uYehova usilahlile nokuba asisakufanelekelanga ukumkhonza. Isono sethu sisenokubonakala njengengqimba yelifu elivalela ukukhanya kobabalo lukaThixo.

² UKumkani uDavide woSirayeli wamandulo wakha wazifumana ekwimeko enjalo. Yabakho njani le meko?

Amanyathelo Aphosakeleyo Anokukhokelela Kwisono Esinzulu

3, 4. Yintoni eyenzekayo kuKumkani uDavide ngethuba lokuphumelela kwakhe?

³ UDavide wayemthanda uThixo kodwa wathabatha amanyathelo aphosakeleyo awakhokelela kwizono ezinzulu. (Thelekisa amaGalati 6:1.) Oku kunokwenzeka nakuwuphi na umntu ongafezekanga, ngokukodwa ukuba unegunya phezu kwabanye. Njengokumkani owayenempumelelo, uDavide wayedumile ibe enegunya. Ngubani na owayenokulinga ukuphikisana nelizwi lakhe? Wayenamadoda anobunkunkqele awayesoloko esecaleni kwakhe, yaye abantu babekwenza ngenzondelelo oko wayefuna bakwenze. Sekunjalo, uDavide wona ngokuzithabathela abafazi abaninzi nangokubala abantu.—Duteronomi 17:14-20; 1 Kronike 21:1.

⁴ Ebudeni beli thuba lokuphumelela kwakhe ngokwezinto eziphathekayo, uDavide wenza izono ezinzulu kuThixo nasebantwini. Ewe, esinye isono sakhokelela kwesinye njengemisonto ephotheneyo yelaphu eliyilwe nguSathana! Ngoxa amaSirayeli ayesilwa idabi nama-Amori, eseluphahleni lwendlu yakhe uDavide wondela umfazi omhle kaUriya, uBhatshebha, ehlamba. U-Uriya esemfazweni, lo kumkani wathi makaziswe lo mfazi kwibhotwe lakhe waza wakrexeza naye. Khawuthelekelele indlela awothuka ngayo xa kamva wafumanisa ukuba wayekhulelwe! UDavide wathumela ukuba kubizwe u-Uriya, enethemba lokuba wayeya kuchitha ubusuku noBhatshebha nokuba wayeya kugqala loo mntwana njengowakhe. Nangona uDavide wamseza wada wanxila, u-Uriya wala ukulala nomkakhe. Ngoku ngelokuncama, uDavide wathumela kumphathi-mkhosi uYowabhi imiyalelo eyimfihlo yokuba abeke u-Uriya phambili emfazweni apho ngokuqinisekileyo wayeya kufa khona. U-Uriya wabulawa edabini, umhlolokazi wakhe wamzilela ithuba elaliqhelekile lokuzila waza uDavide wamtshata ngaphambi kokuba abantu bazi ngokukhulelwa kwakhe.—2 Samuweli 11:1-27.

5. Yintoni eyenzekayo emva kokuba uDavide one noBhatshebha, yaye izono zakhe zaba nawuphi umphumo kuye?

⁵ Esebenzisa umprofeti uNatan, uThixo wazibhenca izono zikaDavide waza wathi: “Ndikuvelisela ububi obuya kuphuma endlwini yakho.” Ngokuvisisana noko, umntwana owazalwa nguBhatshebha wafa. (2 Samuweli 12:1-23) Izibulo likaDavide, uAmnon, wadlwengula uTamare owayengudade wabo ngoyise waza wabulawa ngumnakwabo. (2 Samuweli 13:1-33) UAbhisalom unyana kakumkani wazama ukuthabathela kuye itrone waza wahlazisa uyise uDavide ngokuba neentlobano zesini namashweshwe akhe. (2 Samuweli 15:1–16:22) Imfazwe yamakhaya yaphumela ekufeni kuka-Abhisalom nakwintlungu engakumbi kuDavide. (2 Samuweli 18:1-33) Noko ke, izono zikaDavide zamenza wathobeka yaye zamenza wayiphaphela imfuneko yokuhlala esondele kuThixo wakhe onemfesane. Xa kungenzeka sone, ngentobeko masiguquke size sisondele kuYehova.—Thelekisa uYakobi 4:8.

6. Kutheni uKumkani uDavide wayenetyala ngokukhethekileyo?

⁶ UDavide wayebekek’ ityala ngokukhethekileyo kuba wayengumlawuli wamaSirayeli owayewazi ngokupheleleyo uMthetho kaYehova. (Duteronomi 17:18-20) Wayengengofaro waseYiputa okanye ukumkani waseBhabhiloni owayengenalo ulwazi olunjalo nowayesenokuthi ngokuqhubekayo enze izinto angakholiswayo zizo uThixo. (Thelekisa amaEfese 2:12; 4:18.) Njengelungu lohlanga oluzahlulele kuYehova, uDavide wayeqonda ukuba ukukrexeza nokubulala kuzizono ezinzulu. (Eksodus 20:13, 14) NamaKristu ayawazi umthetho kaThixo. Noko ke, njengoDavide, amanye ayawophula ngenxa yokuba nesono awakuzuz’ ilifa, ubuthathaka babantu kunye nesilingo esingaxhathisekiyo. Ukuba oko kunokwenzeka kuye nabani na kuthi, asifanele sihlale ebumnyameni obusitha umbono wethu wokomoya nobusigubungela ngokuphelelwa lithemba okunzulu.

Ukuvuma Izono Kuyahlaziya

7, 8. (a) Yintoni eyenzekayo kuDavide xa wazama ukufihla izono zakhe? (b) Kutheni kufuneka ubani asivume aze asishiye isono sakhe?

⁷ Ukuba siziva sinetyala lokwaphula ngokunzulu imithetho kaThixo, sisenokukufumanisa kunzima ukuvuma izono zethu, kwanakuYehova. Yintoni enokwenzeka kwiimeko ezinjalo? KwiNdumiso 32, uDavide wavuma oku: “Ndithi ndakuthi cwaka [kunokuvuma izono zam], aluphale amathambo am ngokubhonga kwam imihla yonke. Ngokuba imini nobusuku, besinzima phezu kwam isandla sakho, baguquka ubumanzi bam, baba kukubalela kwasehlotyeni.” (Nd 32 Indinyana 3, 4) Ukuzama ukufihla isono sakhe nokucinezela isazela esinetyala kwamqoba uDavide owayetyekile. Ukubandezeleka kwawanciphisa amandla akhe kangangokuba wafana nomthi obethwe yimbalela ongenako ukufuma okunik’ ubomi. Enyanisweni, usenokuba wada weva nemiphumo ebuhlungu yokugula engqondweni nasemzimbeni. Nokuba imeko yayiyintoni na, waphulukana novuyo lwakhe. Ukuba nabani na kuthi uzifumanisa ekwimeko efanayo, yintoni esifanele siyenze?

⁸ Ukusivuma isono kuThixo kunokubangela ukuxolelwa kuze kuhlaziye. UDavide wavuma ingoma esithi, “Ndikwazisile isono sam, ubugwenxa bam andabugquma; ndathi, Ndoluvuma ukreqo lwam kuYehova; wabuxolela ke wena ubugwenxa besono sam.” (INdumiso 32:5) Ngaba uxinezelekile ngenxa yesono esithile osifihlileyo? Ngaba bekungayi kuba kokona kulungileyo ngakumbi ukusivuma uze ungabi sasenza ukuze uzuze inceba kaThixo? Kutheni ungabizi abadala bebandla uze ufune unyango lokomoya? (IMizekeliso 28:13; Yakobi 5:13-20) Umoya onawo wokuguquka uya kwamkelwa, yaye ekuhambeni kwexesha unokuphinda uzuze uvuyo lwakho lobuKristu. UDavide wathi, “Hayi, uyolo lwakhe olukreqo luxolelweyo, osono siselelweyo! Hayi, uyolo lomntu angabubaleliyo uYehova kuye ubugwenxa, ekungekho kukhohlisa emoyeni wakhe!”—INdumiso 32:1, 2.

9. Yaqanjwa nini INdumiso 51, yaye ngoba?

⁹ UDavide noBhatshebha babenetyala kuYehova uThixo ngesenzo sabo esiphosakeleyo. Nakuba babenokubulawa ngenxa yezono zabo, uThixo wabonakalisa inceba kubo. Waba nenceba ngokukodwa kuDavide ngenxa yomnqophiso woBukumkani. (2 Samuweli 7:11-16) Isimo sengqondo senguquko awaba naso uDavide ngokuphathelele izono zakhe ezazibandakanya uBhatshebha sibonwa kwiNdumiso 51. Le ndumiso ichukumisayo yaqanjwa ngulo kumkani owayezisola emva kokuba umprofeti uNatan wayenze isazela sakhe sabuqonda ubukhulu bokwaphula kwakhe umthetho kaThixo. Kwafuneka inkalipho ngoNatan ukuze akwazi ukuzisa izono zikaDavide engqalelweni yakhe, kwananjengokuba abadala abamiselweyo abangamaKristu befanele babe nenkalipho ukuze benze izinto ezifanayo namhlanje. Kunokukhanyela ityala awayebekwa lona nokuyalela ukuba uNatan abulawe, ngokuthobekileyo lo kumkani wazivuma izono zakhe. (2 Samuweli 12:1-14) INdumiso 51 ibonisa oko wakuthethayo kuThixo emthandazweni ngokuphathelele izenzo zakhe ezilihlazo yaye ifaneleke kakuhle ukuba sicamngce ngayo ngomthandazo, ngokukodwa ukuba siye sona kwaye sifuna inceba kaYehova.

Sifanele Siphendule KuThixo

10. UDavide wayenokuchacha njani ngokomoya?

¹⁰ UDavide akazange afune ukusithethelela isono sakhe kodwa wabongoza esithi: “Tarhu, Thixo, ngokwenceba yakho! Ngokobuninzi benceba yakho, cima ukreqo lwam!” (INdumiso 51:1) Ngokona, uDavide wayeyitsibile imida yoMthetho kaThixo. Noko ke, lalikho ithemba lokuba achache ngokomoya, ukuba uThixo wayebonakalisa ukukholiswa kwakhe nguye ngokuvisisana nobubele Bakhe obunothando, okanye uthando olunyanisekileyo. Ubuninzi bezenzo zikaThixo zenceba zangaphambili banika lo kumkani uguqukayo isiseko sokuba nokholo ekubeni uMenzi wakhe wayeya kucima izikreqo zakhe.

11. Yintoni eyayithethwa ngamadini oMhla Wocamagusho, yaye yintoni efunekayo ukuze umntu asindiswe namhlanje?

¹¹ Esebenzisa imifuziselo engokwesiprofeto yamadini oMhla Wocamagusho, uYehova wabonisa ukuba wayenendlela yokuhlambulula abaguqukayo kwisono sabo. Ngoku siyazi ukuba inceba nokuxolela kwakhe zidluliselwa kuthi ngesizinzi sokholo lwethu kwidini lentlawulelo likaYesu Kristu. Ukuba uDavide wathi ecinga kuphela ngezinto ezazifanekisela nezazifuzisela eli dini, wakwazi ukukholosa ngobubele obunothando nangenceba kaYehova, hayi indlela abafanele abakhonzi bakaThixo banamhlanje babe nokholo ngakumbi ngayo kwintlawulelo eyenzelwe ukusindiswa kwabo!—Roma 5:8; Hebhere 10:1.

12. Kuthetha ukuthini ukona, yaye uDavide wavakalelwa njani ngokwenza kwakhe okuphosakeleyo?

¹² Ebongoza uThixo, uDavide wongezelela oku: “Ndixovule kunene, busuke ubugwenxa bam, undihlambulule esonweni sam. Ngokuba ndiyalwazi mna ukreqo lwam, nesono sam siphambi kwam ngamaxesha onke.” (INdumiso 51:2, 3) Ukona kukusilela ukufikelela kwimilinganiselo kaYehova. Ngokuqinisekileyo uDavide wayenze oko. Sekunjalo, wayengafani nombulali okanye umkrexezi ongasikhathalele isono sakhe, osuke nje abe buhlungu kuba eza kufumana isohlwayo okanye kuba kusenokwenzeka abe ufumene isifo esithile. Njengomthandi kaYehova, uDavide wayekuthiyile okubi. (INdumiso 97:10) Wayesenyanya isono sakhe ibe wayefuna ukuba uThixo amhlambulule kuso ngokupheleleyo. UDavide wayeziqonda ngokupheleleyo izikreqo zakhe ibe wayebuhlungu ngokunzulu kuba wavumela umnqweno wakhe wesono ukuba umoyise. Isono sakhe sasisoloko siphambi kwakhe, kuba isazela esinetyala somntu owoyika uThixo asize sikhululeke de kubekho inguquko, ukuvunywa kwesono nokuxolelwa nguYehova.

13. Kutheni uDavide wayenokuthi wona uThixo kuphela?

¹³ Evuma ukuba netyala kwakhe kuYehova, uDavide wathi: “Ndonile kuwe, kuwe wedwa, ndenza okubi emehlweni akho; ukuze ube lilungisa ekuthetheni kwakho, ucace ekugwebeni kwakho.” (INdumiso 51:4) UDavide wayeyophule imithetho kaThixo, engasihlonelanga isihlalo sobukhosi, waza “ngokungathandabuzekiyo wamphatha ngokungenantlonelo uYehova,” emenza isisulu sokugculelwa. (2 Samuweli 12:14, NW; Eksodus 20:13, 14, 17) Izenzo zikaDavide zokona zazikwakukona ibutho labantu bakwaSirayeli namalungu entsapho yakowabo, kanye njengokuba umenzi wobubi obhaptiziweyo namhlanje ebangela intlungu okanye ukubandezeleka kwibandla lamaKristu naphakathi kwabathandekayo. Nangona lo kumkani uguqukayo wayesazi ukuba wona abanye abantu abanjengoUriya, waqonda ukuba uYehova wayemone kakhulu. (Thelekisa iGenesis 39:7-9.) UDavide wayeqonda ukuba umgwebo kaYehova wawuya kuba ngowobulungisa. (Roma 3:4) AmaKristu aye ona afanele abe nembono efanayo.

Iimeko Ezinokubangela Ukuxolelwa

14. Ziziphi iimeko ezazinokubangela ukuxolelwa uDavide awazicaphulayo?

¹⁴ Nangona uDavide engazange azame ukuzithethelela, wathi: “Uyabona, ndizalelwe ebugwenxeni, ndakhawulwa nguma esonweni.” (INdumiso 51:5) UDavide wazalelwa ebugwenxeni, ibe unina weva iintlungu zokuzala ngenxa yokuba nesono awakuzuz’ ilifa. (Genesis 3:16; Roma 5:12) Amazwi akhe awathethi ukuba iintlobano zomtshato ezifanelekileyo, ukukhawula nokuzala kusisono, ekubeni inguThixo owalungiselela umtshato nokuzala abantwana; yaye uDavide wayengabhekiseli nakusiphi na isono esikhethekileyo sikanina. Wakhawulelwa esonweni kuba abazali bakhe babenesono njengabo bonke abantu abangafezekanga.—Yobhi 14:4.

15. Nangona uThixo esenokuzithabathela engqalelweni iimeko ezinokubangela ukuxolelwa, yintoni esingafanele siyenze?

¹⁵ Ukuba siye sona, sinokuchaza kuThixo emthandazweni naziphi na iimeko ezinokubangela ukuxolelwa ezisenokuba ziye zafak’ isandla ekwenzeni kwethu okuphosakeleyo. Kodwa masingaguquleli ubabalo lukaThixo ekuthetheleleni ihambo embi okanye sisebenzise ukuba nesono esikuzuz’ ilifa njengesebe lenkawu lokusikhusela singabi netyala ngenxa yesono sethu. (Yuda 3, 4) UDavide wakwamkela ukuba netyala ngenxa yokuhlala neengcinga ezingacocekanga nokunikezela kwisilingo. Masithandazele ukuba singayekelwa esilingweni size ke sithabathe inyathelo ngokuvisisana nomthandazo onjalo.—Mateyu 6:13.

Isibongozo Sokuhlanjululwa

16. Luluphi uphawu uThixo aluthandayo, yaye oko kufanele kuyichaphazele njani ihambo yethu?

¹⁶ Abantu basenokubonakala bengabantu abahle abazinikele kuThixo, kodwa yena ubona ngaphaya kokubonakala ngaphandle aze abone oko bakuko ngaphakathi. UDavide wathi: “Uyabona, ufuna inyaniso ezintsweni, esitheni undazisa ubulumko.” (INdumiso 51:6) UDavide wayenetyala lokuxoka nelokukhohlisa ekuphembeleleni ukufa kukaUriya nokuzama ukufihla inyaniso ngokukhulelwa kukaBhatshebha. Sekunjalo, wayesazi ukuba uThixo uthanda inyaniso nobungcwele. Oku kufanele kuyichaphazele ihambo yethu ngendlela elungileyo, kuba uYehova uya kusilahla ukuba sinenkohliso. (IMizekeliso 3:32) Kwakhona uDavide wayeqonda ukuba ukuba uThixo ‘wayenokumazisa ubulumko,’ njengokumkani oguqukayo, wayeya kukwazi ukwenza ngokuvisisana nemilinganiselo kaThixo ubomi bakhe bonke.

17. Yayiyintoni intsingiselo yokuthandazela ukuhlanjululwa ngehisope?

¹⁷ Kuba umdumisi wayibona intswelo awayenayo yoncedo lukaThixo ekoyiseni utyekelo lwesono, ngokubhekele phaya wabongoza esithi: “Ndihlambulule isono ngehisope, ndihlambuluke; ndixovule, ndibe mhlophe kunekhephu.” (INdumiso 51:7) Phakathi kwezinye izinto, isityalo sehisope (mhlawumbi imarjoram, okanye iOriganum maru) sasisetyenziswa ekuhlambululeni abantu ababeneqhenqa. (Levitikus 14:2-7) Ngoko kwakufanelekile ukuba uDavide athandazele ukuhlanjululwa esonweni ngehisope. Kwakhona ingcamango yokuhlanjululwa inxulumene nesibongozo sakhe sokuba uYehova amhlambe ukuze acoceke ngokupheleleyo, ade abe mhlophe kunekhephu elingenamle okanye okunye ukungcola. (Isaya 1:18) Ukuba nabani na kuthi udliwa sisazela ngenxa yokwenza okuthile okubi, masibe nokholo lokuba ukuba ngokuguqukayo sifuna ukuxolelwa nguThixo, unokusihlambulula aze asicoce ngesizinzi sedini lentlawulelo likaYesu.

Isibongozo Sokuhlaziywa

18. Yayinjani imeko kaDavide ngaphambi kokuba aguquke aze avume izono zakhe, yaye ukwazi oku kunokusinceda njani namhlanje?

¹⁸ Nawuphi na umKristu owakha wadliwa sisazela esinetyala unokuwaqonda amazwi kaDavide athi: “Ndivise imihlali nemivuyo [Yehova], agcobe amathambo owacolileyo.” (INdumiso 51:8) Ngaphambi kokuba uDavide aguquke aze avume izono zakhe, isazela sakhe esikhathazekileyo samenza walusizana. Akazange afumane nolonwabo kwiingoma zendumiso zemihlali nezemigcobo ezaziculwa yimilonji neemvumi ezinamava. Ukungcungcutheka kukaDavide owonileyo ngenxa yokungakholiswa kukaThixo nguye kwakukukhulu kangangokuba wayefana nomntu owayecolwe amathambo kabuhlungu. Wayekufuna ngamandla ukuxolelwa, ukuchacha ngokwasemoyeni nokuphinda azuze uvuyo awayenalo ngaphambili. Kwakhona umenzi wobubi oguqukayo namhlanje ufuna ukuxolelwa nguYehova ukuze azuze kwakhona uvuyo awayenalo ngaphambi kokuba enze into efaka engozini ulwalamano lwakhe noThixo. Ukubuyiselwa ‘kovuyo lomoya oyingcwele’ kumntu oguqukayo kubonakalisa ukuba uYehova uye wamxolela yaye uyamthanda. (1 Tesalonika 1:6) Enjani yona intuthuzelo oko okuyizisayo!

19. UDavide wayenokuvakalelwa njani ukuba uThixo wayenokubususa bonke ubugwenxa bakhe?

¹⁹ Ngokubhekele phaya uDavide wathandaza esithi: “Sithelisa ubuso bakho ezonweni zam, ubucime bonke ubugwenxa bam.” (INdumiso 51:9) Asinakulindela ukuba uYehova akholiswe sisono. Ngenxa yoko, wacelwa ukuba abufihle ubuso bakhe kwizono zikaDavide. Kwakhona lo kumkani wabongoza uThixo ukuba abususe bonke ubugwenxa bakhe, akucime konke ukungalungisi kwakhe. Akwaba nje uYehova ebenokukwenza oko! Bekuya kumenza adlamke uDavide, kuwushenxise umthwalo wesazela esikhathazekileyo, kuze kwenze lo kumkani uguqukileyo ngoku azi ukuba uye waxolelwa nguThixo wakhe onothando.

Kuthekani Ukuba Uye Wona?

20. Yintoni enconyelwayo kuye nawuphi na umKristu oye wona ngokunzulu?

²⁰ INdumiso 51 ibonisa ukuba nabaphi na kubakhonzi bakaYehova abazahluleleyo abaye bona ngokunzulu kodwa abaguqukileyo banokumcela ngentembelo ukuba abonakalise ubabalo kubo aze abahlambulule kwisono sabo. Ukuba ungumKristu oye wona ngaloo ndlela, kutheni ungaceli ukuxolelwa nguBawo wethu wasemazulwini ngomthandazo wokuzithoba? Yiqonde intswelo onayo yokuncedwa nguThixo ukuze akholiswe nguwe, uze umcele ukuba akubuyisele uvuyo owawunalo ngaphambili. Ngentembelo amaKristu aguqukayo anokuya kuYehova ngomthandazo ecela oko, kuba “woxolela ngokukhulu.” (Isaya 55:7; INdumiso 103:10-14) Kakade ke, kufanele kubizwe abadala bebandla ukuze banikele uncedo olufunekayo lokomoya.—Yakobi 5:13-15.

21. Yintoni esiya kuyihlolisisa ngokulandelayo?

²¹ Inceba kaYehova iyabasindisa abantu bakhe ekuphelelweni lithemba. Kodwa makhe sihlolisise ezinye izibongozo ezisuka entliziyweni zikaDavide oguqukileyo kwiNdumiso 51. Isifundo sethu siya kubonisa ukuba uYehova akayideli intliziyo eyaphukileyo.

Unokuphendula Njani?

◻ Nguwuphi umphumo esinokuba nawo isono esinzulu komnye wabakhonzi bakaYehova?

◻ UDavide kwamchaphazela njani ukuzama ukufihla isono sakhe?

◻ Kwakutheni ukuze uDavide athi wayone uThixo kuphela?

◻ Nangona uThixo esenokuzithabathela engqalelweni iimeko ezinokubangela ukuxolelwa ukuba siyona, yintoni esingafanele siyenze?

◻ Yintoni umKristu afanele ayenze ukuba uye wona ngokunzulu?