UYehova Akayideli Intliziyo Eyaphukileyo
“Imibingelelo kaThixo ngumoya owaphukileyo, intliziyo eyaphukileyo, etyumkileyo, Thixo, akuyi kuyidela.”—INDUMISO 51:17.
1. UYehova ubajonga njani abakhonzi bakhe abona ngokunzulu kodwa abaguqukayo?
UYEHOVA ‘unokuzigqubuthela ngelifu, ukuze kungaphumeli mthandazo kuye.’ (Izililo 3:44) Kodwa ufuna ukufumaneka ebantwini bakhe. Nokuba omnye wabanquli bakhe unokona ngokunzulu kodwa aguquke, uBawo wethu osemazulwini uyakukhumbula ukulunga okwenziwa nguloo mntu. Ngenxa yoko, umpostile uPawulos wayenokuwaxelela oku amaKristu awayekhonza nawo: “Akanantswela-bulungisa uThixo, ukude awulibale umsebenzi wenu, nomzamo wothando enalubonakalalisa kulo igama lakhe.”—Hebhere 6:10.
2, 3. Yintoni abadala abangamaKristu abafanale banikel’ ingqalelo kuyo ekuqhubaneni namakholwa akhonza nabo awonayo?
2 Kwakhona abadala abangamaKristu bafanele banikel’ ingqalelo kwiminyaka yenkonzo yokuthembeka enikelwa kuThixo ngamakholwa akhonza nabo. Oku kuquka inkonzo engcwele yabantu abaguqukayo abaye bathabatha inyathelo eliphosakeleyo okanye abade bona ngokunzulu. Abalusi abangamaKristu bafuna impilo-ntle yokomoya yabo bonke abo bakumhlambi kaThixo.—Galati 6:1, 2.
3 Umenzi-bubi oguqukayo ufuna inceba kaYehova. Sekunjalo kufuneka okungakumbi. Oku kwenziwa kucace ngamazwi kaDavide akwiNdumiso 51:10-19.
Intliziyo Ehlambulukileyo Iyafuneka
4. Kwakutheni ukuze uDavide athandazele intliziyo ehlambulukileyo nomoya ohlaziyiweyo?
4 Ukuba umKristu ozahluleleyo ukwimeko embi yokomoya ngenxa yesono, yintoni anokuyifuna ngaphandle kwenceba nokuxolelwa nguYehova? UDavide wabongoza: “Dala phakathi kwam, Thixo, intliziyo ehlambulukileyo, uhlaziye umoya oqinisekileyo phakathi kwam.” (INdumiso 51:10) Kuyabonakala ukuba uDavide wenza esi sicelo kuba wayeqonda ukuba wayenotyekelo olunamandla lwesono esinzulu entliziyweni yakhe. Sisenokuba asizange sibandakanyeke kwiintlobo zesono ezabambisa uDavide ngokuphathelele uBhatshebha noUriya, kodwa sifuna uncedo lukaYehova ukuze siphephe ukuwela kwisihendo sokubandakanyeka kuyo nayiphi na ihambo enzulu yesono. Ngokubhekele phaya, sisenokufuna ngokobuqu uncedo lukaThixo ukuze sisuse entliziyweni yethu iimpawu zesono ezinjengokubawa nentiyo—izenzo zolwaphulo-mthetho ezifana nobusela nokubulala.—Kolose 3:5, 6; 1 Yohane 3:15.
5. (a) Kuthetha ukuthini ukuba nentliziyo ehlambulukileyo? (b) Wayenqwenela ntoni uDavide xa wacela umoya ohlaziyiweyo?
5 UYehova ufuna ukuba abakhonzi bakhe babe ‘nentliziyo ehlambulukileyo,’ oko kukuthi, ukuhlambuluka kwentshukumisa okanye injongo. Eqonda ukuba akazange akubonakalise ukuhlambuluka okunjalo, uDavide wathandazela ukuba uThixo ahlambulule intliziyo yakhe aze ayivumelanise nemilinganiselo yobuthixo. Kwakhona lo mdumisi wayefuna umoya, okanye utyekelo lwengqondo oluhlaziyiweyo noluthe tye. Wayefuna umoya owawuya kumnceda axhathise isilingo aze abambelele ngokuqinileyo kwimithetho nemigaqo kaYehova.
Umoya Oyingcwele Ubalulekile
6. Kwakutheni ukuze uDavide abongoze uYehova ukuba angawususi kuye umoya wakhe oyingcwele?
6 Xa siphelelwe lithemba ngenxa yeempazamo okanye isenzo sethu esiphosakeleyo, sinokuvakalelwa kukuba uThixo ulungele ukusilahla aze awurhoxise kuthi umoya wakhe oyingcwele, okanye amandla asebenzayo. UDavide wayevakalelwa ngaloo ndlela, kuba wabongoza uYehova esithi: “Musa ukundilahla ebusweni bakho, uMoya wakho oyiNgcwele ungamsusi kum.” (INdumiso 51:11) UDavide owayezisola nowayethobekile wayevakalelwa kukuba izono zakhe zazimenze akakufanelekela ukukhonza uYehova. Ukulahlwa ebusweni bukaThixo kwakuya kuthetha ukuphulukana nenkoliseko, intuthuzelo nentsikelelo yakhe. Ukuze uDavide ahlaziyeke ngokomoya, wayefuna umoya oyingcwele kaYehova. Enawo, lo kumkani wayenokuthandazela ukhokelo lukaThixo ukuze akholise uYehova, wayenokusiphepha isono, yaye wayenokulawula ngobulumko. Eziqonda izono zakhe nxamnye noMniki womoya oyingcwele, ngokufanelekileyo uDavide wabongoza uYehova ukuba angawususi kuye.
7. Kutheni sifanele sithandazele umoya oyingcwele size sizilinde ekubeni siwenze buhlungu?
7 Kuthekani ngathi? Sifanele sithandazele umoya oyingcwele yaye sifanele sizilinde ekuwenzeni buhlungu ngokusilela ukulandela ukhokelo lwawo. (Luka 11:13; Efese 4:30) Kungenjalo, sinokuphulukana naloo moya size singakwazi ukubonakalisa isiqhamo sawo esinikelwa nguThixo sothando, uvuyo, uxolo, ukuzeka kade umsindo, ububele, ukulunga, ukholo, ubulali nokuzeyisa. UYehova uThixo uya kuwuthabatha kuthi umoya wakhe ngokukodwa ukuba ngokungaguqukiyo siqhubeka simona.
Imihlali Yosindiso
8. Ukuba siyona kodwa sifuna ukuba novuyo losindiso, sifanele sibe nantoni?
8 Umoni oguqukileyo ohlaziyekileyo ngokomoya unokuphinda avuyele ilungiselelo likaYehova losindiso. Elangazelela oku, uDavide wambongoza uThixo esithi: “Buyisela kum imihlali yosindiso lwakho, undixhase ngomoya wentumekelelo.” (INdumiso 51:12) Hayi indlela ekukuhle ngayo ukuba nemihlali ngethemba eliqinisekileyo lokusindiswa nguYehova uThixo! (INdumiso 3:8) Emva kokuba one uThixo, uDavide wafuna ukuba abuyisele kuye uvuyo losindiso. Kamva, uYehova walungiselela usindiso ngedini lentlawulelo loNyana wakhe, uYesu Kristu. Ukuba njengabakhonzi bakaThixo abazahlulelelyo sona ngokunzulu kodwa sifune ukuba uvuyo losindiso lubuyiselwe kuthi, sifanele sibe nesimo sengqondo sokuguquka ukuze sikuphephe ukona umoya oyingcwele.—Mateyu 12:31, 32; Hebhere 6:4-6.
9. Wayecela ntoni uDavide xa wacela uThixo ukuba amxhase “ngomoya wentumekelelo”?
9 UDavide wacela ukuba uYehova amxhase “ngomoya wentumekelelo.” Kubonakala ukuba oku kubhekisela, kungekhona ekukulungeleni kukaThixo ukunceda okanye kumoya wakhe oyingcwele, kodwa kutyekelo lwengqondo lukaDavide olwalumqhubela esenzweni. UDavide wayefuna ukuba uThixo amxhase ngokumnika umoya wentumekelelo ukuze enze okufanelekileyo aze angaphindi awele esonweni. UYehova uThixo uyaqhubeka ebaxhasa abakhonzi bakhe yaye ebaphakamisa abo bawiswa zizilingo ezahlukahlukeneyo. (INdumiso 145:14) Hayi indlela ekuthuthuzela ngayo ukuqonda oku, ngokukodwa ukuba siye sona kodwa sazisola saza sanqwenela ukuphinda sikhonze uYehova ngokuthembeka ngonaphakade!
Wobafundisa Ntoni Abakreqayo?
10, 11. (a) Yintoni uDavide awayenokuyifundisa abakreqayo bakwaSirayeli? (b) UDavide wayenokubafundisa aboni emva kokuba enze ntoni yena?
10 Ukuba uThixo wayenokukuvumela oko, ngokungazingci uDavide wayefuna ukwenza into eyayiya kubonakalisa uxabiso awayenalo ngenceba kaYehova neyayiya kunceda abanye. Ngokuthandaza kuYehova ebuhlungu, lo kumkani uguqukileyo wathi ngokulandelayo: “Ndobafundisa abangendawo [“abakreqayo,” NW] iindlela zakho, babuyele kuwe aboni.” (INdumiso 51:13) UDavide onesono wayenokubafundisa njani abakreqayo uMthetho kaThixo? Yintoni awayesenokubaxelela yona? Yaye yintoni elungileyo oku okwakunokuyifeza?
11 Xa wayebonisa abakreqi bakwaSirayeli iindlela zikaYehova ngethemba lokubabuyisa kwindlela engendawo, uDavide wayesalatha indlela esibi ngayo isono, oko kuthethwa yinguquko nendlela yokufumana inceba kaThixo. Ebuvile ubuhlungu bokungakholiswa kukaYehova nguye nobesazela esinetyala, ngokungathandabuzekiyo uDavide wayenokuba ngumfundisi onemfesane waboni abaguqukayo nabaphuke intliziyo. Kakade ke, wayenokusebenzisa umzekelo wakhe ukuze afundise abanye kuphela emva kokuba yena eye wayamkela imilinganiselo kaYehova waza waxolelwa nguYe, kuba abo bangakuvumiyo ukuzithoba koko uThixo akufunayo abanalungelo ‘lokuxela imimiselo kaThixo.’—INdumiso 50:16, 17.
12. UDavide wangenelwa njani ngokwazi ukuba uThixo wayemhlangule kwityala legazi?
12 Ephinda evakalisa iinjongo zakhe ngenye indlela, uDavide wathi: “Ndihlangule emagazini, Thixo, Thixo ondisindisayo; lomemelela ngobulungisa bakho ulwimi lwam.” (INdumiso 51:14) Ukuba netyala legazi kwakuhambisana nesigwebo sokufa. (Genesis 9:5, 6) Ngoko ulwazi lokuba uThixo wosindiso lwakhe uye wamhlangula kwityala legazi ngokuphathelele u-Uriya lwaluya kunika uDavide uxolo lwentliziyo nolwengqondo. Ngoko ulwimi lwakhe lwalunokucula ngovuyo ngobulungisa bukaThixo, ingebubo obakhe. (INtshumayeli 7:20; Roma 3:10) UDavide wayengenakukucima ukuziphatha okubi kwakhe okanye abuyise u-Uriya engcwabeni, kwananjengokuba umntu wanamhlanje engenakukwazi ukubuyisela ubunyulu bomntu aye wamlukuhlela ekuziphatheni okubi okanye avuse ekufeni umntu aye wambulala. Ngaba asifanele sicinge ngoko xa silingwa? Yaye hayi indlela esifanele sibonakalise uxabiso ngayo ngenceba kaYehova ayibonakalisayo kuthi ngobulungisa! Enyanisweni, uxabiso lufanele lusiqhubele ekwalathiseleni abanye kulo Mthombo wobulungisa nokuxolela.
13. Kuphantsi kwaziphi iimeko kuphela anokuthi umoni ayivule ngokufanelekileyo imilebe yakhe ukuze adumise uYehova?
13 Akukho moni onokuyivula ngokufanelekileyo imilebe yakhe ukuze adumise uYehova ngaphandle kokuba ngenceba uThixo uyayivula, ngokungathi kunjalo, ukuze athethe iinyaniso Zakhe. Ngoko ke uDavide wavuma esenjenje: “Nkosi yam, vula imilebe yomlomo wam, uyixele indumiso yakho umlomo wam.” (INdumiso 51:15) Enesazela esikhululekileyo ngenxa yokuxolelwa nguThixo, uDavide wayenokushukunyiselwa ukuba afundise abakreqayo iindlela zikaYehova, yaye wayenokumphakamisa Yena ngokukhululekileyo. Bonke abaye baxolelwa izono zabo njengoDavide bafanele baluxabise ubabalo lukaYehova olubonakaliswe kubo, yaye bafanele balisebenzise kakuhle naliphi na ithuba lokuvakalisa inyaniso kaThixo baze ‘baxele indumiso yakhe.’—INdumiso 43:3.
Imibingelelo Eyamkelekileyo KuThixo
14. (a) Ngawaphi amadini awayefuneka ngokomnqophiso woMthetho? (b) Kutheni bekuya kuba kokuphosakeleyo ukucinga ukuba isenzo esiphosakeleyo esiqhubeka sisenza sinokusibuyekeza ngezinto ezithile ezilungileyo?
14 UDavide wafumana ukuqonda okunzulu okwamenza wathi: “Ngokuba [Yehova] akunanze mibingelelo, bendiya kukunika; akalikholo kuwe amadini anyukayo.” (INdumiso 51:16) Umnqophiso woMthetho wawufuna ukuba kunikelwe amadini ezilwanyana kuThixo. Kodwa izono zikaDavide zokukrexeza nokubulala, ezazifanelwe sisohlwayo sokufa, zazingenakucinywa ngamadini anjalo. Kungenjalo, ngewayengazange alibazise ukunikela amadini ezilwanyana kuYehova. Ngaphandle kwenguquko esuka entliziyweni, amadini awafezi nento le. Ngoko ke bekuya kuba kokuphosakeleyo ukucinga ukuba isenzo esiphosakeleyo esiqhubeka sisenza sinokusibuyekeza ngokwenza izinto ezithile ezilungileyo.
15. Siyintoni isimo sengqondo somntu ozahluleleyo onomoya owaphukileyo?
15 UDavide wongezelela oku: “Imibingelelo kaThixo ngumoya owaphukileyo, intliziyo eyaphukileyo, etyumkileyo, Thixo, akuyi kuyidela.” (INdumiso 51:17) Kwimeko yomoni oguqukayo, ‘imibingelelo eyamkelekayo kuThixo ngumoya owaphukileyo.’ Umntu onjalo akanasimo sengqondo sokuzithemba. Intliziyo yomntu ozahluleleyo enomoya owaphukileyo ibuhlungu ngokunzulu ngenxa yesono sakhe, ithobekile kuba ivakalelwa kukuba uThixo akakholiswa yiyo, yaye ikulungele ukwenza nantoni na ukuze uThixo aphinde akholiswe yiyo. Akukho nto ixabisekileyo esinokuyinika uThixo de siguquke kwizono zethu size simnike iintliziyo zethu ngozinikelo olupheleleyo.—Nahum 1:2.
16. UThixo umjonga njani umntu owaphuke intliziyo ngenxa yesono sakhe?
16 UThixo akalilahli idini elinjengentliziyo eyaphukileyo netyumkileyo. Ngoko ke, phezu kwabo nabuphi na ubunzima esibufumanayo njengabantu bakhe, masingayekeleli ekuphelelweni lithemba. Ukuba siye sakhubeka emendweni wobomi ngendlela ethile eyenza intliziyo yethu ukuba ililele inceba kaThixo, imeko enjalo inokulungiseka. Nokuba siye sona ngokunzulu kodwa saguquka, uYehova akayi kuyijongela phantsi intliziyo yethu eyaphukileyo. Uya kusixolela ngesizinzi sedini lentlawulelo likaKristu yaye uya kuphinda akholiswe sithi. (Isaya 57:15; Hebhere 4:16; 1 Yohane 2:1) Noko ke, njengoDavide, sifanele sithandazele ukuphinda sikholiseke kuThixo kungekhona ukubaleka isohlwayo okanye ukulungiswa okuyimfuneko. UThixo wamxolela uDavide, kodwa kwakhona wamohlwaya.—2 Samuweli 12:11-14.
Ukuxhalabela Unqulo Olunyulu
17. Ngaphandle kokubongoza ukuxolelwa nguThixo, yintoni aboni abafanele bayenze?
17 Ukuba siye senza isono esithile esinzulu, ngokungathandabuzekiyo siya kukhathazeka kakhulu ngenxa yoku, yaye intliziyo ezisolayo iya kusiqhubela ekubongozeni uThixo ukuba asixolele. Sekunjalo, masithandazele nabanye. Nangona uDavide wayekhangele phambili ekunikeleni kwakhona unqulo olwamkelekileyo kuThixo, kwindumiso yakhe akazange ngokuzingca ababekele ecaleni abanye. Iquka esi sibongozo kuYehova: “Yenzele okulungileyo iZiyon ngokukholekileyo kuwe; yakha iindonga zeYerusalem.”—INdumiso 51:18.
18. Kwakutheni ukuze uDavide oguqukileyo athandazele iZiyon?
18 Ewe, uDavide wayekhangela phambili ekubeni uThixo aphinde akholiswe nguye. Noko ke, yayikwangumthandazo wokuthobeka walo mdumisi ukuba ‘uThixo ayenzele okulungileyo iZiyon,’ isixeko esilikomkhulu lakwaSirayeli, iYerusalem, apho uDavide wayenethemba lokwakha itempile kaThixo khona. Izono ezinzulu zikaDavide zazisongela lonke uhlanga, kuba bonke abantu ngebabandezeleka ngenxa yesono salo kumkani. (Thelekisa eyesi-2 kaSamuweli, isahluko 24.) Ngokungathi kunjalo, izono zakhe zazidiliza “iindonga zeYerusalem,” kangangokuba kwafuneka zibuye zakhiwe.
19. Ukuba siye sona kodwa saxolelwa, yintoni eya kuba yefanelekileyo ukuyithandazela?
19 Ukuba siye sona ngokunzulu kodwa siye saxolelwa nguThixo, kuya kuba kokufanelekileyo ukuthandazela ukuba ngandlel’ ithile alungise nawuphi na umonakalo obangelwe yihambo yethu. Sisenokuba siye sazisa ugculelo kwigama lakhe elingcwele, sisenokuba siye salithob’ isidima ibandla, yaye sisenokuba siye sazisa intlungu kwintsapho yethu. UBawo wethu wasezulwini onothando unokulushenxisa naluphi na ugculelo oluziswa kwigama lakhe, unokulakha ibandla ngomoya wakhe oyingcwele, yaye unokuzithuthuzela iintliziyo zabathandekayo bethu abamthandayo nabamkhonzayo. Kambe ke, enoba kubandakanyeke isono okanye akunjalo, ukungcwaliswa kwegama likaYehova nempilo-ntle yabantu bakhe ifanele isoloko iyeyona nto siyixhalabeleyo.—Mateyu 6:9.
20. Kuphantsi kwaziphi iimeko awayeya kuthi uYehova akholiswe ngamadini nemibingelelo yamaSirayeli?
20 Ukuba uYehova wabuya wazakha iindonga zeZiyon, yintoni enye eyayinokwenzeka? UDavide wavuma esithi: “Kuya kwandula ukuba mnandi kuwe [Yehova] imibingelelo yobulungisa, amadini apheleleyo; ziya kwandula ukunyuswa iinkunzi ezintsha zeenkomo esibingelelweni sakho.” (INdumiso 51:19) Ngokunyanisekileyo uDavide wayenqwenela ukuba yena nohlanga uYehova akholiswe ngabo ukuze bakwazi ukunqula Yena ngokwamkelekileyo. Wayeya kwandula ke uThixo avuyiswe ngamadini atshiswayo nemibingelelo yabo epheleleyo. Oku kwakuya kuba njalo kuba la yayiya kuba ngamadini obulungisa awayenikelwa ngabantu abazahluleleyo, abanyanisekileyo nabaguqukileyo uThixo akholiswayo ngaba. Benombulelo ngenceba kaYehova, babeya kunikela ngeenkunzi zeenkomo kwisibingelelo sakhe—awona madini alungileyo nanexabiso eliphakamileyo. Namhlanje, sihlonela uYehova ngokumnika okona kulungileyo esinako. Yaye imibingelelo yethu iquka “iinkunzi zeenkomo ezintsha, imibulelo yomlomo wethu,” amadini endumiso kuThixo wethu onenceba, uYehova.—Hoseya 14:2; Hebhere 13:15.
UYehova Uyakuva Ukukhala Kwethu
21, 22. Ziziphi izifundo eziyingenelo kuthi eziqulethwe yiNdumiso 51?
21 Umthandazo kaDavide osuka entliziyweni obhalwe kwiNdumiso 51 usibonisa ukuba sifanele sibe nomoya wokuguquka ngokwenene kwisono sethu. Kwakhona le ndumiso iqulethe izifundo ezingqalileyo ukuze singenelwe. Ngokomzekelo, ukuba siyona kodwa siguquke, sinokuthembela kwinceba kaThixo. Noko ke, masixhalabele ngokuyintloko naluphi na ugculelo esisenokuba siye saluzisa kwigama likaYehova. (Nd 51 Indinyana 1-4) NjengoDavide, sinokucela ukwenzelwa inceba kuBawo wethu osemazulwini ngenxa yesono sethu esasizuz’ ilifa. (Nd 51 Indinyana 5) Sifanele sinyaniseke, yaye sifanele sifune ubulumko bukaThixo. (Nd 51 Indinyana 6) Ukuba siye sona, sifanele sibongoze uYehova ukuba asihlambulule, asinike intliziyo enyulu nomoya owomeleleyo.—Nd 51 Indinyana 7-10.
22 Kwakhona kwiNdumiso 51 sinokubona ukuba sifanele singaze sizivumele ukuba siqaqadeke esonweni. Ukuba sinokwenjenjalo, uYehova uya kuwushenxisa kuthi umoya wakhe oyingcwele, okanye amandla asebenzayo. Noko ke, xa sinomoya kaThixo, sinokufundisa abanye iindlela zakhe ngokunempumelelo. (Nd 51 Indinyana 11-13) Ukuba siyona kodwa siguquke, uYehova uya kusivumela ukuba siqhubeke simdumisa kuba akaze ayidele intliziyo eyaphukileyo netyumkileyo. (Nd 51 Indinyana 14-17) Le ndumiso ibonisa ngokubhekele phaya ukuba imithandazo yethu ayifanele yalathiselwe kuthi kuphela. Kunoko, sifanele sithandazele intsikelelo nempilo-ntle yokomoya yabo bonke abo bakunqulo olunyulu lukaYehova.—Nd 51 Indinyana 18, 19.
23. Kutheni INdumiso 51 ifanele isishukumisele ukuba sibe nenkalipho kunye nethemba lokuphumelela?
23 Le ndumiso kaDavide ichukumisayo ifanele isishukumisele ekubeni sibe nenkalipho kunye nethemba lokuphumelela. Iyasinceda siqonde ukuba asifanele sicinge ukuba siphulukene nento yonke nokuba siye sawela esonweni. Ngoba? Kuba ukuba siyaguquka, inceba kaYehova inokusisindisa ekuphelelweni lithemba. Ukuba siyazisola yaye sizinikela ngokupheleleyo kuBawo wethu osemazulwini, uyakuva ukukhalela kwethu inceba. Yaye hayi indlela ekuthuthuzela ngayo ukwazi ukuba uYehova akayideli intliziyo eyaphukileyo!
Unokuphendula Njani?
◻ Kutheni amaKristu efuna intliziyo ehlambulukileyo nomoya oyingcwele kaThixo?
◻ Yintoni umntu oguqukileyo anokuyifundisa abakreqayo ngomthetho kaYehova?
◻ UYehova uyijonga njani intliziyo eyaphukileyo netyumkileyo?
◻ Ziziphi izifundo ezifumaneka kwiNdumiso 51?
[Umfanekiso okwiphepha 15]
Ngaba uyawuthandazela umoya oyingcwele uze uzilinde ekubeni uwenze buhlungu?
[Umfanekiso okwiphepha 17]
Bonakalisa uxabiso ngobabalo lukaYehova ngokuvakalisa inyaniso yakhe