Waluseni Umhlambi KaThixo Ngokuzithandela
“Waluseni umhlambi kaThixo ophakathi kwenu, niwuvelela, kungengakunyanzelwa, makube ngokokuzithandela.”—1 PETROS 5:2.
1. Kutheni sifanele silindele ukuba abadala abangamaKristu ‘bawaluse umhlambi kaThixo ngokuzithandela’?
UYEHOVA ubalusa ngokuzithandela abantu bakhe. (INdumiso 23:1-4) “Umalusi olungileyo,” uYesu Kristu, ngokuzithandela wanikela ngobomi bakhe bobuntu obufezekileyo kubantu abanjengezimvu. (Yohane 10:11-15) Ngenxa yoko, umpostile uPetros wabongoza abadala abangamaKristu ukuba ‘bawaluse umhlambi kaThixo ngokuzithandela.’—1 Petros 5:2.
2. Yiyiphi imibuzo ekufuneka iqwalaselwe ngokuphathelele imisebenzi yokwalusa yabadala abangamaKristu?
2 Ukwenza izinto ngokuzithandela luphawu abanalo abakhonzi bakaThixo. (INdumiso 110:3) Kodwa kwindoda engumKristu kufuneka okungakumbi kunokwenza izinto ngokuzithandela ukuze imiselwe njengomveleli, okanye umalusi ongaphantsi. Ngoobani abafanelekayo ukuba ngabalusi abanjalo? Ukwalusa kwabo kubandakanya ntoni? Kuphunyezwa njani ngeyona ndlela ilungileyo?
Ukongamela Entsatsheni
3. Kutheni kunokuthiwa indlela indoda engumKristu eyinyamekela ngayo intsapho yayo inokuthanani nokufaneleka kwayo njengongumalusi ebandleni?
3 Ngaphambi kokuba indoda imiselwe ‘njengomveleli,’ imele ihlangabezane neemfuneko zeZibhalo. (1 Timoti 3:1-7; Tito 1:5-9) Phakathi kwezinye izinto, umpostile uPawulos wathi umveleli ufanele abe yindoda ‘eyongamele kakuhle eyayo indlu, abantwana bayo beyithobele, benokundileka konke.’ Kukho isizathu esilungileyo soku, kuba uPawulos wathi: “Ukuba umntu akakwazi ukuyongamela eyakhe indlu, angathini na ukuphatha ibandla likaThixo?” (1 Timoti 3:4, 5) Xa wayemisela amadoda amakhulu kumabandla akwisiqithi saseKrete, uTito waxelelwa ukuba akhangele “umntu ongenakumangaleleka, eyindoda yamfazi mnye enabantwana abakholiweyo, abangaswele kuthobela mntu.” (Tito 1:6) Ewe, kufanele kunikelwe ingqalelo kwindlela indoda engumKristu eyinyamekela ngayo intsapho yayo ukuze kubonwe enoba iyafaneleka kusini na ukuba ithwale imbopheleleko enzima ngakumbi yokwalusa ibandla.
4. Ukongezelela ekuqhubeni rhoqo isifundo seBhayibhile nokuthandaza, abazali abangamaKristu balubonakalisa njani uthando ngeentsapho zabo?
4 Amadoda ongamela iintsapho zawo kakuhle enza okungakumbi kunokuthandaza nokufundisisa rhoqo iBhayibhile neentsapho zawo. Asoloko ekulungele ukunceda abathandekayo bawo. Kwabo bangabazali, oku kuqalisa ngosuku azalwa ngalo umntwana. Abazali abangamaKristu bayazi ukuba okukhona bebambelela ngokusondeleyo kucwangciso lobuthixo, kokukhona umntu oselula eya kuluqhela ngokukhawuleza ucwagciso lwemisebenzi yamaKristu kubomi bemihla ngemihla. Indlela ubawo ongumKristu ongamela ngayo kakuhle kwezi nkalo ibonisa iimfaneleko zakhe zokuba ngumdala.—Efese 5:15, 16; Filipi 3:16.
5. Ubawo ongumKristu unokubakhulisa njani abantwana bakhe “ekuqeqesheni nasekululekeni kweNkosi”?
5 Xa esongamela intsapho yakhe, ubawo ongumKristu onenkathalo uthobela esi siluleko sikaPawulos: “Musani ukubacaphukisa abantwana benu; bondleleni ekuqeqesheni nasekululekeni kweNkosi.” (Efese 6:4) Ukufundisisa iBhayibhile rhoqo nentsapho, kukho umfazi nabantwana, kunikela amathuba amahle okufundisa ngokunothando. Ngaloo ndlela abantwana bafumana ‘uqeqesho,’ okanye isiluleko sokubalungisa. ‘Ukululeka’ okwenziwayo ngoko kunceda umntwana ngamnye ukuba ayazi imbono kaYehova ngemibandela ethile. (Duteronomi 4:9; 6:6, 7; IMizekeliso 3:11; 22:6) Xa kuhlanganisenwe kunye ngokukhululekileyo ukwenzela izinto zokomoya, ubawo onenkathalo uphulaphula ngenyameko xa abantwana bakhe bethetha. Imibuzo yobubele ebakhokelayo isetyenziselwa ukubenza bathethe ngokunyaniseka ngezinto ezibaxhalabisileyo nezimo zabo zengqondo. Ubawo akafanele athelekelele ukuba wazi yonke into ecingwa ngabantwana. Eneneni, IMizekeliso 18:13 ithi, “Ophendula ilizwi engekeva, kukumatha oko kuye, nehlazo.” Namhlanje, abazali abaninzi bafumanisa ukuba iimeko abajamelana nazo abantwana babo zahluke kakhulu kwezo babejamelana nazo ngoxa babeselula. Ngenxa yoko, ubawo uya kuzabalazela ukuqonda intsusa neenkcukacha zengxaki ngaphambi kokuchaza indlela efanele isingathwe ngayo.—Thelekisa uYakobi 1:19.
6. Kutheni ubawo ongumKristu kufuneka akhangele kwiLizwi likaThixo xa enceda intsapho yakhe?
6 Kwenzeka ntoni xa zisaziwa iingxaki, izinto ezibaxhalabisayo nesimo sengqondo sabantwana bakabani? Ubawo owongamela kakuhle ukhangela eZibhalweni, ‘ezincedayo ekufundiseni, ekohlwayeni, ekululekeni nasekuqeqesheni ngobulungisa.’ Ufundisa abantwana bakhe indlela yokusebenzisa ulwalathiso lweBhayibhile oluphefumlelweyo. Ngale ndlela, abo baselula ngeminyaka ‘bayafaneleka bexhobele wonke umsebenzi olungileyo.’—2 Timoti 3:16, 17; INdumiso 78:1-4.
7. Nguwuphi umzekelo oobawo abangamaKristu abafanele bawumisele ngokuphathelele umthandazo?
7 Ulutsha oluhlonel’ uThixo lujamelana neemeko ezinzima ezibangelwa ngabantwana behlabathi olufunda nabo. Ngoko oobawo abangamaKristu banokuluphelisa njani uloyiko abanalo abantwana babo? Enye indlela kukuthandaza nabo nokubathandazela rhoqo. Xa aba bantu baselula bejamelana neemeko ezilingayo, ngokunokwenzeka baya kuxelisa ukukholosa kwabazali babo ngoThixo. Enye intombazana eneminyaka eli-13 ubudala, kudliwano ndlebe nayo ngaphambi kokuba ibhaptizwe ifuzisela uzahlulelo lwayo kuThixo, yabalisa ukuba yayigculelwa yaye ixhatshazwa ngabantwana eyayifunda nabo. Xa yayithethelela inkolelo yayo esekelwe eBhayibhileni engobungcwele begazi, amanye amantombazana ayibetha yaye ayitshicela. (IZenzo 15:28, 29) Ngaba yaphindezela? Hayi. Icacisa isithi: “Ndandisoloko ndithandaza kuYehova ukuba andincede ndingabi namsindo. Kwakhona ndandikhumbula oko abazali bam babendifundise kona kwisifundo sethu sentsapho ngemfuneko yokunyamezela ububi.”—2 Timoti 2:24.
8. Umdala ongenabantwana unokuyongamela njani intsapho yakhe kakuhle?
8 Umdala ongenabo abantwana usenokubalungiselela ngokwaneleyo ngokomoya nangokwenyama abo bakwintsapho yakhe. Oku kuquka iqabane lakhe lomtshato yaye mhlawumbi nezalamane ezingamaKristu ezixhomekeke kuye ezihlala ekhayeni lakhe. (1 Timoti 5:8) Ngaloo ndlela ukongamela kakuhle yenye yeemfuneko ekufuneka ihlangabezane nazo indoda emiselweyo ukuba ithwale imbopheleleko njengomdala webandla. Ngoko, amadoda amakhulu amiselweyo afanele aligqale njani ilungelo lawo leembopheleleko ebandleni?
Ukongamela ‘Ngokunyamekileyo’
9. Sisiphi isimo sengqondo abadala abangamaKristu abafanele babe naso ngezabelo zabo zenkonzo?
9 Ngenkulungwane yokuqala yeXesha Eliqhelekileyo, umpostile uPawulos wayekhonza njengegosa endlwini kaThixo, ibandla lamaKristu elikhokelwa nguKristu. (Efese 3:2, 7; 4:15) Ngokulandelayo, uPawulos wabongoza amakholwa awayekunye naye eRoma esithi: “Sinezibabalo . . . ezahlukeneyo, ngokobabalo esababalwa ngalo, nokuba sinokuprofeta, masiprofete ngokomlinganiselo wokholo; nokuba sinobulungiseleli, masihlale ebulungiselelini obo; nokuba ngofundisayo, makahlale emfundisweni leyo; nokuba ngovuselelayo, makahlale ekuvuseleleni oko; owabayo makabe engenakumbi; owangamelayo, makongame enyamekile; owenza inceba makayenze inceba echwayithile.”—Roma 12:6-8.
10. Ekunyamekeleni umhlambi kaThixo, uPawulos wabamisela wuphi umzekelo abadala banamhlanje?
10 UPawulos wawakhumbuza oku amaTesalonika: “Besixelisa uyise kubantwana bakhe, siniyala, sinikhuza, siniqononondisa, ukuba nihambe ngokumfaneleyo uThixo, onibizelayo kobakhe ubukumkani nobuqaqawuli.” (1 Tesalonika 1:1; 2:11, 12) Isiluleko sasinikelwe ngendlela ethantamisayo nenothando kangangokuba uPawulos wayenokubhala athi: “Sisuke sathantamisa phakathi kwenu njengomdlezana osukuba ebagcinile abakhe abantwana; ngokunjalo silangazelela nje, kwakholeka kuthi ukuba singaneli kunabela iindaba ezilungileyo zikaThixo nje kodwa, sinabele nobomi bethu, ngenxa enokuba naba ziintanda kuthi.” (1 Tesalonika 2:7, 8) Ngokuvisisana nomzekelo kaPawulos wokwenza izinto njengobawo, amadoda amakhulu anyanisekileyo abaxhalabele ngokunzulu bonke abasebandleni.
11. Abadala abamiselweyo banokuyibonakalisa njani intumekelelo?
11 Ukuthantamisa, nentumekelelo imele ibalasele ekuveleleni ngothando kwabalusi bethu abangamaKristu. Indlela abazenza ngayo izinto ithetha lukhulu. UPetros unikela isiluleko kubadala ukuba bawaluse umhlambi kaThixo “kungengakunyanzelwa” okanye “ngenxa yenzuzo embi.” (1 Petros 5:2) Kule nkalo, umphengululi uWilliam Barclay elumkisa, wabhala oku: “Kukho indlela yokwamkela isigxina esithile ngokungathi unyanzelwe yaye singumsebenzi ongonwabisiyo, okruqulayo, oluxanduva olufanele lucatshukelwe. Kunokwenzeka ukuba umntu acelwe ukuba enze into ethile, yaye ayenze, kodwa ayenze ngendlela engathandekiyo kangangokuba konakale yonke into. . . . Kodwa [uPetros] uthi umKristu ngamnye ufanele azinikele ngentobeko ukuba enze inkonzo enjalo kangangoko enako, nangona eqonda ngokupheleleyo indlela angakufanelekelanga ngayo ukuyenza.”
Abalusi Abenza Izinto Ngokuzithandela
12. Abadala abangamaKristu banokukubonakalisa njani ukwenza izinto ngokuzithandela?
12 Kwakhona uPetros ubongoza esithi: “Waluseni umhlambi kaThixo ophakathi kwenu, . . . ngokokuzithandela.” Umveleli ongumKristu onyamekela izimvu ukwenza oko ngokuzithandela, ngokuzinikela, ekhokelwa nguMalusi Olungileyo, uYesu Kristu. Ukukhonza ngokuzithandela kukwathetha ukuba umalusi ongumKristu uyazithoba kwigunya likaYehova, ‘umalusi nomveleli wemiphefumlo yethu.’ (1 Petros 2:25) Ngokuzithandela umalusi ongaphantsi ongumKristu ubonakalisa intlonelo ngelungiselelo lolawulo lobuthixo. Oko ukwenza xa esalathisela abo bafuna icebiso kwiLizwi likaThixo, iBhayibhile. Nangona amava eya kumnceda umdala ukuba akhe uvimba wesiluleko esisekelwe eBhayibhileni, oku akuthethi ukuba uya kuba nesicombululo seZibhalo kuzo zonke iingxaki ngoko nangoko. Kwanaxa eyazi impendulo yombuzo othile, usenokufumanisa kububulumko ukuba ekunye nalowo ubuzayo akhangele iWatch Tower Publications Index okanye iimbekiselo ezifanayo. Ngaloo ndlela ufundisa ngeendlela ezimbini: Ubonisa indlela yokufumana inkcazelo eluncedo aze ngokuthobeka abonise intlonelo kuYehova ngokwalathisel’ ingqalelo koko kupapashwe yintlangano kaThixo.
13. Ngawaphi amanyathelo anokuthatyatywa anokunceda abadala ukuze banikele icebiso lobulumko?
13 Unokwenza ntoni umdala ukuba akukho nto ipapashwe kuncwadi loMbutho ngengxaki ethile ajamelene nayo ngelo xesha? Ngokungathandabuzekiyo, uya kuthandazela ubulumko yaye uya kuphanda imigaqo yeBhayibhile engombandela lowo. Kwakhona usenokufumanisa kuyingenelo ukucebisa ukuba umntu ofuna uncedo aqwalasele umzekelo kaYesu. Umdala usenokubuza athi: “Ukuba uYesu, uMfundisi Omkhulu, ebekwimeko okuyo, ucinga ukuba ebenokwenza ntoni?” (1 Korinte 2:16) Ukuqiqa ngolo hlobo kusenokumnceda umntu ofuna ukwazi ukuba enze isigqibo sobulumko. Kodwa hayi indlela ebekungayi kuba bubulumko ngayo ukuba umdala anikele imbono nje yobuqu ngokungathi licebiso elifanelekileyo leZibhalo! Kunoko, abadala banokuxubusha iingxaki ezinzima nabanye abadala. Basenokusa imibandela ebalulekileyo ukuba ixutyushwe kwintlanganiso yequmrhu labadala. (IMizekeliso 11:14) Izigqibo ekufikelelwe kuzo ziya kwenza ukuba bonke bathethe into enye.—1 Korinte 1:10.
Ubulali Bubalulekile
14, 15. Yintoni efunekayo kubadala xa beluleka umKristu ‘oqutyulwe sisiphoso’?
14 Umdala ongumKristu kufuneka abe nobulali xa efundisa abanye, ngokukodwa xa ebaluleka. UPawulos unikela esi siluleko: “Bazalwana, ukuba umntu uthe waqutyulwa nokuqutyulwa sisiphoso esithile, nina bangaboMoya, mlulekeni onjalo ninomoya wobulali.” (Galati 6:1) Okubangel’ umdla kukuba, igama lesiGrike apha eliguqulelwe ngokuthi “mlulekeni” linxulumene negama lezotyando elisetyenziselwa ukuchaza ukulungiswa kwethambo ukuze kuthintelwe isiphene ubani anokuba naso ubomi bakhe bonke. Umbhali wesichazi-magama uW. E. Vine oku ukufanisa nokubuyiselwa “kwalowo uqutyulwe sisiphoso, ngabo bafanelekayo ngokomoya, ekubeni lowo enjengelungu elilahlekileyo lomzimba wokomoya.” Ezinye iinguqulelo zithi, “ukubuyisela kwindawo efanelekileyo; ukubuyisela kulungelelwano olufanelekileyo.”
15 Ukulungelelanisa indlela ubani acinga ngayo akulula, yaye kunokuba nzima gqitha ukubuyisela kulungelelwano olufanelekileyo iingcinga zomntu owenze isiphoso. Kodwa uncedo olunikelwa ngomoya wobulali lunokwamkelwa ngoxabiso. Ngenxa yoko, abadala abangamaKristu bafanele bathobele isiluleko sikaPawulos esithi: “Yambathani ngoko, njengabanyulwa bakaThixo, abangcwele, abathandiweyo, iimfemfe, ububele, ukuthobeka kwentliziyo, ubulali, ukuzeka kade umsindo.” (Kolose 3:12) Abadala bafanele benze ntoni xa umntu ekufuneka elulekiwe enesimo sengqondo esibi? Bafanele ‘baphuthume ubulali.’—1 Timoti 6:11.
Ukwalusa Ngobulumko
16, 17. Ziziphi iingozi abafanele bazilumkele abadala xa beluleka abanye?
16 Kukho okungakumbi kwisiluleko sikaPawulos esikumaGalati 6:1. Ubongoza amadoda afanelekayo ngokomoya esithi: “Mlulekeni [lowo wenze isiphoso] ninomoya wobulali; uzilumkela ukuba ungahendwa nawe.” Enjani yona ukuba yintlekele imiphumo enokubakho ukuba elo cebiso alithotyelwa! Ishukunyiswe ziingxelo ezingomfundisi waseTshetshi owafunyaniswa enetyala lokukrexeza namarhamente amabini, iThe Times yaseLondon yathi “ubani unokuzifumanisa ekule meko naninina: enoba uyindoda eqhele ukululeka abanye, eneempawu zokuba ngubawo okanye umzalwana unokuwela esilingweni ngenxa yokuba ethenjiwe.” Umcholacholi weendaba ngoko wabhekisela koko kwathethwa nguGqr. uPeter Rutter esithi “ukuthandana kokuxhaphaza phakathi kwabaguli namadoda anikela uncedo kubo—oogqirha, amagqwetha, abefundisi nabaqeshi—kwibutho lethu likavula zibhuqe ngokwesini, kuye kwaba ngubhubhani ongamkelekanga, owonakalisayo nolihlazo.”
17 Asifanele sicinge ukuba abantu bakaYehova abachatshazelwa zizilingo ezinjalo. Omnye umdala owayehlonelwa nowayekhonze ngokuthembeka kangangeminyaka wabandakanyeka ekuziphatheni okubi kuba wenza amatyelelo okwalusa kudade otshatileyo ngoxa wayeyedwa. Nangona waguqukayo, lo mzalwana waphulukana nawo onke amalungelo akhe enkonzo. (1 Korinte 10:12) Ngoko, amadoda amakhulu amiselweyo anokuwenza njani amatyelelo okwalusa ngendlela yokuba angaweli esilingweni? Anokulungiselela njani ukuze kuthethwe nobani ngasese, abe nethuba lokuthandaza nelokukhangela iLizwi likaThixo neempapasho zamaKristu?
18. (a) Ukusebenzisa umgaqo wobuntloko kunokubanceda njani abadala baphephe iimeko ezinokubenza balalanise? (b) Ngawaphi amalungiselelo anokwenziwa otyelelo lokwalusa kudade?
18 Enye ingongoma ekufuneka bayikhumbule abadala ngumgaqo wobuntloko. (1 Korinte 11:3) Ukuba umntu oselula ufuna ulwalathiso, zabalazelani ukubandakanya abazali bakhe kuloo ngxubusho xa kufanelekile. Xa udade otshatileyo ecela ukuncedwa ngokomoya, ngaba ninokulungiselela ukuba umyeni wakhe abekho ebudeni botyelelo? Kuthekani ukuba oku akunakwenzeka okanye ungumntu ongakholwayo obemxhaphaza ngandlel’ ithile? Ngoko yenzani amalungiselelo ebeniya kuwenza xa kusenziwa utyelelo lokwalusa kudade ongatshatanga. Kuya kuba bubulumko ukuba abazalwana ababini abafanelekayo ngokomoya bamtyelele kunye loo dade. Ukuba oku akwenzeki, mhlawumbi kunokukhethwa ixesha elifanelekileyo lokuba abazalwana ababini baxubushe naye kwiHolo yoBukumkani, kucebiseka ukuba kube kwigumbi abanokuthetha naye ngasese. Xa kukho abanye abazalwana noodade eholweni, nangona bengenakubona okanye beve oko kuxutyushwayo, ngokunokwenzeka kuya kuphetshwa nayiphi na into enokubangela ukuwela esonweni.—Filipi 1:9, 10.
19. Ukwalusa izimvu zikaThixo ngokuzithandela kuzisa yiphi imiphumo emihle, yaye ngubani esinombulelo kuye ngabalusi abenza ngokuzithandela?
19 Ukwalusa umhlambi kaThixo ngokuzithandela kuzisa imiphumo emihle—umhlambi owomeleleyo ngokomoya, owalathiswa kakuhle. Njengompostile uPawulos, abadala abangamaKristu banamhlanje babaxhalabele kakhulu abo bakholwa nabo. (2 Korinte 11:28) Imbopheleleko yokwalusa abantu bakaThixo inzima ngokungakumbi kula maxesha anomngcipheko. Ngoko ke, sinombulelo ngokwenene ngomsebenzi omhle owenziwa ngabazalwana bethu abakhonza njengabadala. (1 Timoti 5:17) Ngokusisikelela ‘ngezipho kubantu’ ezalusa ngokuzithandela, siyamdumisa uMniki ‘waso sonke isipho esigqibeleleyo,’ uMalusi wethu onothando wasezulwini, uYehova.—Efese 4:8; Yakobi 1:17.
Ubuya Kuphendula Uthini?
◻ Indoda inokuyongamela njani intsapho yayo kakuhle?
◻ Ziziphi iimpawu ezifanele zibalasele kumsebenzi wokuvelela wabadala abangamaKristu?
◻ Abadala basenokukubonakalisa njani ukuthobeka nobulali xa benikela isiluleko?
◻ Yintoni encedayo ekwenzeni ukulungiswa ngokomoya kuphumelele?
◻ Abadala banokuziphepha njani iimeko ezinokwenza ukuba balalanise xa besalusa umhlambi?
[Umfanekiso okwiphepha 18]
Umdala ongumKristu umele ayongamele kakuhle intsapho yakhe
[Umfanekiso okwiphepha 21]
Ukwalusa kobuKristu kufanele kwenziwe ngobulali nangobulumko