Intsapho YamaKristu Iyabanceda Abalupheleyo

“Musa ukundilahla ngexesha lobuxhego; musa ukundishiya akuphela amandla am.”—INDUMISO 71:9.

1. Kumazwe amaninzi baphathwa njani abantu abalupheleyo?

“UHLOLISISO lubonisa ukuba phantse abantu abalupheleyo abathandathu kwabasixhenxe (86%) abaphethwe kakubi baphathwa kakubi ziintsapho zabo,” yatsho njalo iThe Wall Street Journal. Iphephancwadi elithi Modern Maturity lathi: “Ukuphathwa kakubi kwabalupheleyo lolona [gonyamelo lwentsapho] lusandul’ ukubhencwa kutshanje kumaphephandaba eli lizwe.” Liyinyaniso elokuba, kumazwe amaninzi abantu abalupheleyo bangamaxhoba okuphathwa kakubi nokungakhathalelwa. Ngokwenene eli xesha lethu lixesha apho abantu abaninzi ‘bengabathandi beziqu zabo, bengenambulelo, benganyanisekanga, bengenabubele.’—2 Timoti 3:1-3, NW.

2. Ngokutsho kweZibhalo zesiHebhere, uYehova ubajonga njani abalupheleyo?

² Ukanti, leyo asiyondlela abantu abalupheleyo ababemele baphathwe ngayo kwaSirayeli mandulo. UMthetho wawusithi: “Suka ume ebusweni bengwevu, ububeke ubuso bexhego, umoyike uThixo wakho: ndinguYehova.” Incwadi yemizekeliso yobulumko ephefumlelweyo iyasiluleka: “Mphulaphule uyihlo, lowo wakuzalayo, ungamdeli unyoko akuba mkhulu.” Ize ibuye isiyalele ithi: “Nyana wam, yiva uqeqesho lukayihlo, ungawulahli umyalo kanyoko.” UMthetho kaMoses wawufundisa intlonelo nokubakhathalela abantu abadala abangamadoda nababhinqileyo. Ngokucacileyo, uYehova unqwenela ukuba abantu abalupheleyo banikwe imbeko.—Levitikus 19:32; IMizekeliso 1:8; 23:22.

Ukunyamekela Abalupheleyo Ngamaxesha Okubhalwa KweBhayibhile

3. UYosefu wayibonisa njani imfesane kuyise owalupheleyo?

³ Intlonelo yayimele ibonakaliswe kungekuphela nje ngamazwi kodwa nangezenzo zolwazelelelo. UYosefu wabonisa imfesane kakhulu kuyise owalupheleyo. Wayefuna ukuba uYakobi athabathe uhambo olusuka kwaKanan oluya eYiputa, umgama weekhilomitha ezingaphezu kwama-300. Ngoko uYosefu wathumela kuYakobi “amaesile alishumi, ethwele izinto ezilungileyo zaseYiputa, neemazi zamaesile ezilishumi, zithwele ingqolowa, nesonka, nomphako kayise wendlela.” Xa uYakobi wafikayo kwaGoshen, uYosefu waya kuye waza “wawa entanyeni yakhe, walila umzuzu omkhulu entanyeni yakhe.” UYosefu wambonisa uthando olunzulu uyise. Onjani wona ukuchukumisa umzekelo ongokunyanyekelwa kwabalupheleyo!—Genesis 45:23; 46:5, 29.

4. Kutheni uRute engumzekelo omhle wokulandelwa?

⁴ Omnye umzekelo omhle wokubonakalisa ububele kwabalupheleyo esinokuwulandela ngokaRute. Nangona wayengoweeNtlanga, wanamathela kumhlolokazi owalupheleyo womYuda owayenguninazala, uNahomi. Walahla abantu bakowabo waza wazichanaba engozini yokungafumani omnye umyeni. Xa uNahomi wambongoza esithi makabuyele kubantu bakowabo, uRute waphendula ngamanye awona mazwi amyoli eBhayibhileni: “Musa ukundibongoza ngokuthi mandikushiye, ndibuye, ndingakulandeli; ngokuba apho uya khona, ndiya kuya nam; apho uya kuthi vu khona, ndiya kuthi vu khona; abantu bakowenu baya kuba ngabantu bam, uThixo wakho abe nguThixo wam; apho ufela khona, ndiya kufela khona, ndingcwatyelwe khona. Makenjenje uYehova kum, aphinde ukwenjenje: kukufa kodwa okuya kundahlula nawe.” (Rute 1:16, 17) Kwakhona uRute wabonisa iimpawu ezintle xa wakulungelayo ukutshatela kuBhohazi owalupheleyo ngaphantsi kwelungiselelo lomtshato wongeno.—Rute, isahluko 2 ukusa kwesesi-4.

5. Ziziphi iimpawu uYesu awazibonisayo ekuqhubaneni nabantu?

⁵ UYesu wamisela umzekelo ofanayo kwindlela awayeqhubana ngayo nabantu. Wayenomonde, enemfesane, enobubele yaye ehlaziya. Wabonisa umdla wobuqu kwindoda elihlwempu eyayisisilima, ingakwazi kuhamba, kangangeminyaka engama-38 waza wayiphilisa. Wabonisa ulwazelelelo ngabahlolokazi. (Luka 7:11-15; Yohane 5:1-9) Kwanangexesha lentlungu engcungcuthekisayo yokufa kwakhe kabuhlungu kumthi wentuthumbo, waqinisekisa ukuba unina, mhlawumbi owayesekuqaleni kwama-50 eminyaka, wayeya kunyanyekelwa. Ngaphandle kwakwiintshaba zakhe ezazihanahanisa, ukuba kunye noYesu kwakuhlaziya kubo bonke abantu. Ngaloo ndlela, wakwazi ukuthi: “Yizani kum nonke nina nibulalekayo, nisindwayo ngumthwalo, ndoninika ukuphumla. Thabathani idyokhwe yam niyithwale, nifunde kum; ngokuba ndinobulali, ndithobekile ngentliziyo; noyifumanela ukuphumla imiphefumlo yenu.”—Mateyu 9:36; 11:28, 29; Yohane 19:25-27.

Ngoobani Ekufanele Kuboniswe Ulwazelelelo Kubo?

6. (a) Ngoobani abafanelwe yinyameko ekhethekileyo? (b) Yiyiphi imibuzo esisenokuzibuza yona?

⁶ Ekubeni uYehova uThixo noNyana wakhe, uYesu Kristu, bemisela imizekelo emihle kangako kumbandela wokunyamekela abanye, kufanelekile ke ukuba amaKristu azahluleleyo axelise umzekelo wabo. Phakathi kwethu sinabathile abebebulaleka betsala nzima kangangeminyaka emininzi—abazalwana noodade abalupheleyo abaminyaka yabo esele ihambile kakhulu. Bambi basenokuba ngabazali bethu okanye abazali babazali bethu. Ngaba asibaxabisi? Ngaba sibenza abantwana size sibajongele phantsi? Okanye ngaba siwaxabisa ngokwenene amava nobulumko babo obungathethekiyo? Liyinyaniso elokuba bambi basenokuwuvavanya umonde wethu ngezimbo neentsilelo zabo ezibangelwa kukwaluphala. Ko-dwa khawuzibuze, ‘Ngaba mna bendiya kwahluka kubo ngaphantsi kwezo meko?’

7. Yintoni ebonisa imfuneko yokuba novelwano kubantu abalupheleyo?

⁷ Kukho ibali elichukumisayo lakuMbindi Mpuma lentombazana eselula eyayinemfesane kwabalupheleyo. Uninakhulu wayencedisa kwigumbi lokuphekela waza ngempazamo wawisa ipleyiti eyophukayo yaza yaphuka. Wakhathazeka ngenxa yobu butatasholo bakhe; intombi yakhe yayicaphuke ngakumbi. Yandula ke yabiza intombazana yayo eselula yaza yayithuma kwivenkile yasekuhlaleni ukuya kuthengela uninakhulu ipleyiti eyenziwe ngomthi. Le ntombazana yabuya neepleyiti ezenziwe ngomthi ezimbini. Unina wayibuza: “Kutheni uthenge iipleyiti ezimbini?” Umzukulwana, emathidala, waphendula: “Enye yekamakhulu enye yeyakho xa nawe waluphele.” Ewe, kweli hlabathi sonke ngaminazana ithile siza kwaluphala. Ngaba asiyi kukuxabisa ukuphathwa ngomonde nangobubele?—INdumiso 71:9.

8, 9. (a) Sifanele sibaphathe njani abalupheleyo abaphakathi kwethu? (b) Yintoni abathile kwabo basandul’ ukuba ngamaKristu ekufuneka bayikhumbule?

⁸ Ungaze ulibale ukuba abaninzi kubazalwana noodade wethu abalupheleyo baneminyaka emininzi abayichithele kwimisebenzi yamaKristu ngokuthembeka. Ngokuqinisekileyo kufuneka sibabonise imbeko nolwazelelelo, sibancede ngobubele yaye sibakhuthaze. Ngokuchanileyo indoda esisilumko yathi: “Isithsaba sokuhomba zizimvi, sifunyanwa endleleni yobulungisa.” Yaye loo ntloko inezimvi, enokuba yeyendoda okanye yeyebhinqa, ifanele ihlonelwe. Abanye bala madoda namabhinqa alupheleyo basakhonza njengoovulindlela abathembekileyo, yaye amadoda amaninzi asaqhubeka ekhonza ngokuthembeka njengabadala emabandleni; amanye enza umsebenzi ongumzekelo njengabaveleli abahambahambayo.—IMizekeliso 16:31.

⁹ UPawulos waluleka uTimoti wathi: “Indoda enkulu musa ukuyithethisa kabukhali, yiyale njengoyihlo; amancinane, njengabazalwana; abafazi abakhulu, njengoonyoko; abancinane, njengoodade, unobunyulu bonke.” (1 Timoti 5:1, 2) Abo basandul’ ukungena kwibandla lamaKristu bephuma kwihlabathi elingenantlonelo bafanele bawanikele ingqalelo ngokukodwa amazwi kaPawulos, asekelwe kuthando. Nina baselula, musani ukuxelisa izimo zengqondo ezibi enisenokuba nizibone esikolweni. Musani ukusicekisa isiluleko sobubele samaNgqina akhulileyo. (1 Korinte 13:4-8; Hebhere 12:5, 6, 11) Phofu ke, xa abantu abalupheleyo ngenxa yempilo enkenenkene okanye iingxaki zemali befuna uncedo, ngoobani ngokuyintloko abanembopheleleko yokubanceda?

Indima Yentsapho Ekunyamekeleni Abalupheleyo

10, 11. (a) Ngokutsho kweBhayibhile, ngoobani abafanele bakhokele ekunyamekeleni abalupheleyo? (b) Kutheni kungasoloko kulula ukunyamekela abalupheleyo?

¹⁰ Kwibandla lamaKristu okuqala, kwavela iingxaki ngokunyanyekelwa kwabahlolokazi. Umpostile uPawulos wabonisa ukuba iintswelo ezinjalo kufanele kuhlangatyezwane njani nazo? “Babeke abahlolokazi abangabahlolokazi ngenene. Ke ukuba kukho mhlolokazi uthile unabantwana, nokuba ngabazukulwana, ukuqala mabafunde ukuhlonela elabo ikhaya, bababuyekezele umbuyekezo ooninakhulu; kuba oko kuhle, kwamkelekile emehlweni kaThixo. Ukuba ke umntu akabakhathalele abakhe, ngokukodwa abendlu yakhe ulukhanyele ukholo, unobubi ngaphezu kongakholwayo.”—1 Timoti 5:3, 4, 8.

¹¹ Ngamaxesha eentswelo, amalungu asondeleyo entsapho afanele abe ngawokuqala ukunceda abalupheleyo.a Ngale ndlela, abantwana abakhulileyo banokubonisa uxabiso ngeminyaka yothando, umsebenzi, nenyameko abazali babo abayinikelayo. Oku kusenokungabi lula. Njengokuba abantu besaluphala, ngokuzenzekelayo bayacotha, abanye bade bangabi nakuzenzela nto. Abanye basenokufuna ezabo izilangazelelo kuphela yaye bafune izinto ngenkani, mhlawumbi bona bengaqondi. Kodwa xa sasiziintsana, ngaba nathi sasingafuni ezethu izilangazelelo kuphela yaye sifuna izinto ngenkani? Yaye ngaba abazali bethu babengasoloko besinceda ngokukhawuleza? Ngoku izinto ziguqukile ekubeni baluphele. Ngoko, kufuneka ntoni? Imfesane nomonde.—Thelekisa eyoku-1 kwabaseTesalonika 2:7, 8.

12. Ziziphi iimpawu ezifunekayo ekunyamekeleni abalupheleyo—nabo bonke abanye kwibandla lamaKristu?

¹² Umpostile uPawulos wanikela isiluleko esisebenzisekayo xa wabhala wathi: “Yambathani ngoko, njengabanyulwa bakaThixo, abangcwele, abathandiweyo, iimfesane zeemfefe, ububele, ukuthobeka kwentliziyo, ubulali, ukuzeka kade umsindo, ninyamezelana, nixolelana, ukuba ubani uthi abe nokusola ngakubani; njengokuba naye [“uYehova,” NW] wanixolelayo, yenjani njalo nani. Ke, phezu kwazo zonke ezo zinto, yalekani uthando, oluyintambo yogqibelelo.” Ukuba kufuneka sibonise imfesane nothando olunjalo ebandleni, ngaba asifanele sizibonakalise ngakumbi entsatsheni?—Kolose 3:12-14.

13. Ngoobani, ngaphandle kwabazali okanye abazali babazali abalupheleyo, abasenokufuna uncedo?

¹³ Maxa wambi olu hlobo loncedo lusenokungafunwa ngabazali okanye abazali babazali kuphela kodwa nazezinye izalamane ezalupheleyo. Abanye abalupheleyo abangenabo abantwana baye bakhonza iminyaka emininzi kwinkonzo yobuvangeli basemazweni, ubulungiseleli bokuhambahamba, neminye imisebenzi yexesha elizeleyo. Ngokwenene baye babeka uBukumkani kuqala kubo bonke ubomi babo. (Mateyu 6:33) Ngoko, ngaba bekungayi kuba yinto efanelekileyo ukubabonisa umoya wenkathalo? Ngokuqinisekileyo sinomzekelo omhle wendlela iWatch Tower Society ewanyamekela ngayo amalungu ayo alupheleyo aseBheteli. Kwikomkhulu leBheteli eBrooklyn nakumasebe oMbutho aliqela, abazalwana noodade abalupheleyo abaliqela banikelwa ingqalelo mihla le ngamalungu entsapho aqeqeshiweyo abelwe lo msebenzi. Ayakuvuyela ukunyamekela aba balupheleyo ngokungathi ngabazali okanye abazali babazali babo. Kwangaxeshanye, bafunda lukhulu kumava aba balupheleyo.—IMizekeliso 22:17.

Indima Yebandla Ekubanyamekeleni

14. Liliphi ilungiselelo elalenzelwe abalupheleyo kwibandla lamaKristu okuqala?

¹⁴ Kumazwe amaninzi namhlanje kukho amalungiselelo emali yomhlalaphantsi kwanelungiselelo likaRhulumente lokunyamekela impilo yabalupheleyo. AmaKristu anokuwasebenzisa ngokupheleleyo la malungiselelo apho anelungelo lokwenjenjalo. Noko ke, kwinkulungwane yokuqala, ayengekho amalungiselelo anjalo. Ngoko ke ibandla lamaKristu lathabatha amanyathelo okunceda abahlolokazi ababeswele. UPawulos wanikela olu lwalathiso: “Makangabalelwa enanini labahlolokazi [abancedwa libandla] umhlolokazi ongaphantsi kweminyaka emashumi mathandathu; owayengumfazi wandoda-nye, engqinelwe ngemisebenzi emihle, ukuba wondle abantwana, ukuba wamkele iindwendwe, ukuba uzihlambile iinyawo zabangcwele, ukuba ubasizile ababandezelweyo, ukuba usukelene nemisebenzi yonke elungileyo.” Ngaloo ndlela, uPawulos wabonisa ukuba ibandla nalo linendima ekunyamekeleni abalupheleyo. Abafazi abaxhalabele izinto zokomoya ababengenabo abantwana abakholwayo babelufanelekela uncedo olunjalo.—1 Timoti 5:9, 10.

15. Kutheni kusenokufuneka uncedo ukuze kufunyanwe uncedo lukaRhulumente?

¹⁵ Apho uRhulumente enamalungiselelo abantu abalupheleyo, ngokuqhelekileyo oku kubandakanya ukuzalisa iifomu okusenokubonakala kuluxanduva. Kwiimeko ezinjalo kufanelekile ngabaveleli ebandleni ukuba balungiselele ukuba kunikelwe uncedo ukuze abalupheleyo bafake izicelo, balulande, okanye bade baluphucule uncedo olunjalo. Maxa wambi ukuguquka kweemeko kusenokubangela ukuba imali yomhlalaphantsi yande. Kodwa kukwakho nezinye izinto ezininzi eziluncedo abaveleli abanokuzilungiselela ukuze abantu abalupheleyo banyanyekelwe. Ziziphi ezinye zezi?

16, 17. Sinokukubonakalisa ngaziphi iindlela ezahlukahlukeneyo ukubuk’ iindwendwe kwabalupheleyo ebandleni?

¹⁶ Ukubonisa umoya wokubuk’ iindwendwe sinokukulanda emva kumaxesha okubhalwa kweBhayibhile. Nanamhlanje kumazwe amaninzi kuMbindi Mpuma, abantu basemzini basaboniswa umoya wokubuk’ iindwendwe, ubuncinane de baphiwe ikomityi yeti okanye yekofu. Ngoko, akumangalisi ukuba uPawulos wabhala wathi: “Mayela neentswelo zabangcwele, yibani nobudlelane; ukubuka iindwendwe kusukeleni.” (Roma 12:13) Igama lesiGrike eliguqulelwe ngokuthi ukubuka iindwendwe, phi·lo·xe·niʹa, ngokoqobo lithetha “ukuthanda (okanye ukuba nobubele) abantu basemzini.” Ukuba umKristu ufanele abe nokubuk’ iindwendwe kubantu basemzini, ngaba akafanele abe nako ngokude kwangakumbi kwabo bahlobene naye elukholweni? Ngokufuthi ukummemela kwisidlo kuba lutshintsho oluvuyisayo kubomi bomntu owalupheleyo. Ukuba ufuna ilizwi lobulumko okanye amava kwimbutho yakho, quka abalupheleyo.—Thelekisa uLuka 14:12-14.

¹⁷ Zininzi iindlela abalupheleyo abanokukhuthazwa ngazo. Ukuba siza kuhamba ngenqwelo-mafutha njengeqela ukuya kwiHolo yoBukumkani okanye endibanweni, ngaba akukho bantu balupheleyo abasenokukuvuyela ukuhamba nathi? Musa ukulinda de bacele. Baxelele ukuba ungabanceda. Enye indlela esinokubanceda ngayo kungokubathengela izinto abazifunayo. Okanye ukuba banako, ngaba asinakuhamba nabo xa sisiya kuthenga ezethu izinto? Kodwa qinisekisa ukuba zikho iindawo abanokuphumla baze bazihlaziye kuzo xa kunokwenzeka oko kube yimfuneko. Alithandabuzeki elokuba kuya kufuneka umonde nobubele, kodwa umbulelo ongazenzisiyo womntu owalupheleyo unokuba ngumvuzo ngokwenene.—2 Korinte 1:11.

Isiphiwo Esixabisekileyo Ebandleni

18. Kutheni abalupheleyo beyintsikelelo ebandleni?

¹⁸ Hayi indlela ekuyintsikelelo ngayo ukubona iinwele ezingwevu (kwaneentloko ezinempandla ngenxa yobudala) ebandleni! Kuthetha ukuba phakathi kwamandla abaselula, kukho ubulumko namava athe saa—isiphiwo sokwenene kulo naliphi na ibandla. Ulwazi lwabo lufana namanzi ahlaziyayo afanele akhiwe equleni. Kunjengokuba IMizekeliso 18:4 ikubeka oku: “Ngamanzi anzulu amazwi omlomo wendoda, ngumlanjana obalekayo, lithende lobulumko.” Hayi indlela okubakhuthaza ngayo abantu abalupheleyo ukuvakalelwa kukuba basafunwa yaye bayaxatyiswa!—Thelekisa INdumiso 92:14.

19. Bambi baye bazincama njani ngenxa yabazali babo abalupheleyo?

¹⁹ Abathile abakwinkonzo yexesha elizeleyo baye bavakalelwa kukuba bafanele bawancame amalungelo abo ukuze babuyele ekhaya ngenjongo yokunyamekela abazali abalupheleyo nabagulayo. Baye bazincama ngenxa yabo babefudula bezincama ngenxa yabo. Esinye isibini, esasisakuba ngabavangeli basemazweni yaye esisekwinkonzo yexesha elizeleyo, sabuyela ekhaya ukuze sinyamekele abazali baso abalupheleyo. Oku siye sakwenza ngaphezu kweminyaka engama-20. Kwiminyaka emine edluleyo unina wendoda uye wangeniswa kwikhaya labalupheleyo. Le ndoda, ngoku ekwiminyaka yayo yama-60, iyamtyelela unina oneminyaka engama-93 ubudala yonke imihla. Iyacacisa: “Ndinokuthini ukumlahla? Ngumama!” Kwezinye iimeko amabandla nabantu abathile baye bazinikela ukuba banyamekele abalupheleyo ukuze abantwana babo baqhubeke kwizabelo zabo. Uthando olunjalo lokungazingci nalo lukwafanele lunconywe. Meko nganye imele isingathwe ngenyameko kuba abantu abalupheleyo abamele bangakhathalelwa. Bonisa ukuba uyabathanda abazali bakho abalupheleyo.—Eksodus 20:12; Efese 6:2, 3.

20. Nguwuphi umzekelo uYehova asinike wona ekunyamekeleni abalupheleyo?

²⁰ Liyinene elokuba, abazalwana noodade wethu abalupheleyo basisithsaba sobuhle entsatsheni okanye ebandleni. UYehova wathi: “Kude kuse ebudaleni ikwandim, kude kuse ezimvini ndiya kunityatha emagxeni mna. Ndikwenzile mna; ndiya kunithwala mna, ndiya kunityatha emagxeni mna, ndinisize.” Ngamana singabonisa umonde nenyameko efanayo kubazalwana noodade wethu abalupheleyo kwintsapho yamaKristu.—Isaya 46:4; IMizekeliso 16:31.

[Umbhalo osemazantsi]

Uyakhumbula Na?

◻ Yiyiphi imizekelo yeBhayibhile esinayo yokunyamekela abalupheleyo?

◻ Sifanele sibaphathe njani abalupheleyo?

◻ Amalungu entsapho anokubanyamekela njani abathandekayo bawo abalupheleyo?

◻ Ibandla linokwenza ntoni ukunceda abalupheleyo?

◻ Kutheni abalupheleyo beyintsikelelo kuthi sonke?

[Umfanekiso okwiphepha 23]

URute wabonisa ububele nentlonelo kuNahomi owalupheleyo

[Umfanekiso okwiphepha 24]

Abalupheleyo bangamalungu axabisekileyo ebandla