Wakufumana Okwakunqwenelwa Yintliziyo Yakhe

NGABA entliziyweni yakho unqwenela ukubona uBukumkani obungoMesiya bulawula ngokupheleleyo emhlabeni wonke? Ukuba kunjalo, ulangazelela yaye uthandazela iintsikelelo ezithenjisiweyo zasemhlabeni phantsi kobo Bukumkani basezulwini. Ngoko ke, yiba nomonde kuba “ungumthi wobomi umnqweno ofezekileyo.”—IMizekeliso 13:12; Yakobi 5:7, 8.

Phantse kwiminyaka engama-2 000 eyadlulayo, eYerusalem kwakukho indoda enguSimon ‘eyayililungisa neyayimoyika uThixo.’ Yayinokholo kwiziprofeto ezingoMesiya yaye ngomonde ‘yayilinde intuthuzelo kaSirayeli.’—Luka 2:25.

Iziprofeto EzingoMesiya Zinika Ithemba

NguYehova owanikela isiprofeto sokuqala esingoMesiya—eso sasinika ithemba kuluntu olunesono nolufayo. UThixo waxela kwangaphambili ngeMbewu ‘yomfazi’ wakhe ezayo, okanye intlangano yendalo iphela.—Genesis 3:15.

Loo Mbewu yachazwa njengembewu ka-Abraham, yaye uYakobi wakuxela kwangaphambili ukuza kwayo. (Genesis 22:17, 18; 49:10) Uzuko loBukumkani obungoMesiya lwabongwa kwiindumiso. (INdumiso 72:1-20) UIsaya waxela kwangaphambili ukuba iMbewu yayiya kuzalwa yintombi enyulu, noMika waprofeta esithi yayiya kuzalelwa eBhetelehem. (Isaya 7:14; Mika 5:2) Ezi zezimbalwa zeziprofeto ezininzi ezingoMesiya.

UMesiya Akakabikho!

Khawube nomfanekiso-ngqondweni wexesha eladlulayo, inkulungwane yokuqala yeXesha Eliqhelekileyo sele isemnyango. Ngoku isiprofeto sokuqala sikaThixo esingoMesiya sineminyaka engama-4 000 sikho. AmaYuda aye akubona ukutshatyalaliswa kwetempile kaYehova, ukuphanziswa kwelizwe lawo, ukuthinjelwa eBhabhiloni kangangeminyaka engama-70, kwaneminyaka engama-500 engakumbi yokuba phantsi kwabalawuli beeNtlanga. UMesiya akakabikho!

Hayi indlela amaYuda awayesoyika uThixo awayekulangazelela ngayo ukuza kukaMesiya! Iintsikelelo ezivela kuye zaziya kuthululelwa kuwo nakuzo zonke iintlanga.

Indoda Emoyikayo UThixo

Phakathi kwamaYuda amoyikayo uThixo alangazelela nathandazela ukuza kukaMesiya nguSimon, umkhonzi kaYehova othembekileyo nowalupheleyo ohlala kwisixeko esilikomkhulu lakwaYuda. Kwenzeke into ethile ekhethekileyo kuSimon.

UThixo unike uSimon umoya wakhe oyingcwele yaye umvuze ngesityhilelo. USimon akasayi kufa de ambone Lowo uza kuba nguMesiya. Kodwa iintsuku neenyanga ziyaqengqeleka. Ngoku uSimon uyaluphala yaye iintsuku zakhe zokudla amazimba sele zimbalwa. Ngaba isithembiso sikaThixo siya kuzalisekiswa?

Ngenye imini (ngowesi-2 B.C.E.), isibini esiselula esivela eBhetelehem siza nomntwana waso etempileni. USimon utyhilelwa ngumoya oyingcwele ukuba lo ngumhla ekudala ewulindile. Uya etempileni, apho aza kubona Lowo babhale ngaye abaprofeti. Ekhawuleza kangangoko umzimba wakhe osele ukhulile uvuma, ubona uYosefu, uMariya kunye nosana.

Echulumancile uSimon uthabathela ezingalweni zakhe usana olunguYesu! Lo uza kuba nguMesiya othenjisiweyo—“uKristu kaYehova.” Ekubeni sele aluphele, uSimon akanakuba nethemba lokubona xa uYesu ezalisekisa uthumo lwakhe lwasemhlabeni. Sekunjalo, kuhle ukumbona eselusana. Iziprofeto ezingoMesiya ziyaqalisa ukuzaliseka. Hayi indlela avuya ngayo uSimon! Ngoku uya kulala ekufeni anelisekile de kube ngumhla wovuko.—Luka 2:25-28, NW.

Amazwi Esiprofeto KaSimon

Njengoko uSimon ephakamisa ilizwi lakhe edumisa uYehova, simva esithi: “Uyamndulula ngoku umkhonzi wakho enoxolo, Mnini-nto-zonke, ngokwelizwi lakho; ngokuba amehlo am alubonile usindiso lwakho, olulungisileyo ebusweni bazo zonke izizwe, isikhanyiso sokutyhilela iintlanga, uzuko lwabantu bakho, amaSirayeli.” Uyise kaYesu owayeza kumkhulisa, uYosefu, kunye nonina, uMariya, bayamangaliswa ngala mazwi.—Luka 2:29-33.

Inkangeleko kaSimon iqaqambile njengoko esikelela uYosefu noMariya, ngokucacileyo ebanqwenelela intsikelelo kaYehova ekusingatheni imbopheleleko yabo kolo sana. Landula ke ixhego litshintshe ebusweni. Libhekisa kuMariya kuphela, longezelela lithi: “Uyabona, lo umiselwe ukuwa nokuvuka kwabaninzi kwaSirayeli, nokuba abe ngumqondiso ochasiweyo; ngokokuze zibe nokutyhilwa izicamango eziphuma ezintliziyweni ezininzi; ewe ke, nowakho umphefumlo ikrele liya kuwutyhutyha.”—Luka 2:34, 35.

Amazwi KaSimon KuMariya

Khawuthelekelele indlela awavakalelwa ngayo uMariya. Wayethetha ukuthini uSimon? Bambi babeya kumamkela uKristu baze baphakanyiswe kwimeko yesono ababekuyo. Noko ke, abanye babengayi kumamkela, bakhubeke kuye, baze bawe. Njengoko kwakuxelwe kwangaphambili, uYesu wangqineka elilitye lesikhubekiso kumaYuda amaninzi. (Isaya 8:14; 28:16) Amazwi kaSimon akathethi kuthi ekuqaleni mntu ngamnye kumaSirayeli wayeya kuba ngongakholwayo aze andule ke akholwe ngenxa yokuba esamkela uYesu. Kunoko, babeza kumjonga ngeendlela ezahlukeneyo ngokwabantu ngabanye, kutyhileke izicamango eziphuma ezintliziyweni ezininzi kuze oko kukhokelele kumgwebo kaThixo ngenxa yokwenza kwabo okulungileyo okanye okubi. Kwabo bangakholwayo, wayeya kuba njengomqondiso, okanye athiywe. Ngenxa yokukholwa kuye, abanye babeya kuvuswa ekufeni zizikreqo nezono yaye babeya kunandipha ukuma okulungileyo noThixo. Izenzo zabantu ngakuMesiya zaziya kubonisa oko kwakusezintliziyweni zabo.

Kuthekani ngamazwi kaSimon athi: “Nowakho umphefumlo ikrele liya kuwutyhutyha”? Ayikho ingxelo yeZibhalo ebonisa ukuba kwakukho ikrele lokwenene elahlaba uMariya. Kodwa, ukungamkelwa kukaYesu ngabaninzi kwakuza kumenza buhlungu. Yaye hayi indlela awaba buhlungu ngayo uMariya xa ebona uYesu ebethelelwa emthini! Oku kwakufana nekrele elatyhutyha umzimba wakhe.

USimon Uchaza Ukusebenza Kweziprofeto EzingoMesiya

Umoya kaThixo wawuqhubele uSimon ekubeni asebenzise iziprofeto ezingoMesiya kuYesu. USimon wayeza kufa eseluxolweni, okanye ezolile, ‘ngokuba amehlo akhe ayelubonile usindiso lukaThixo, olulungisileyo ebusweni bazo zonke izizwe, isikhanyiso sokutyhilela iintlanga, uzuko lwabantu bakhe, amaSirayeli.’ (Luka 2:30-32) Hayi indlela okwawazalisekisa kakuhle ngayo oku amazwi esiprofeto kaIsaya!

Eso siprofeto sakuxela kwangaphambili oku: “Butyhileke ubuqaqawuli bukaYehova, ibubone inyama yonke kunye.” “Kananjalo [mna Yehova] ndiya kukwenza [uMesiya] isikhanyiso seentlanga, ukuba ube lusindiso lwam, ude uze eziphelweni zehlabathi.” (Isaya 40:5; 42:6; 49:6; 52:10) IZibhalo zamaKristu zesiGrike nezibakala ezidandalazileyo bezisoloko zingqina ukuba uMesiya, uYesu Kristu, usisikhanyiselo sokwenene seentlanga, Lowo utyhila isigqubuthelo esibangela ubumnyama bokomoya aze asindise abantu.

Akukho nto iphinda ithethwe ngoSimon owalupheleyo kwiLizwi likaThixo. Ngokucacileyo wafa ngaphambi kokuba uKristu avule indlela yokufumana ubomi basezulwini. Ngoko ke, kungekudala uSimon uya kuvuselwa ebomini apha emhlabeni. Olunjani uvuyo yena—nawe—eninokuba nalo kwihlabathi elitsha phantsi koBukumkani bukaThixo obungoMesiya!