Nina Bantu Badala​—Nibalulekile Ebandleni

Mhlawumbi nawe unezinto ongasakwaziyo ukuzenza ngenxa yeminyaka. Ngoxa sele uneminyaka umkhonza uthembekile uYehova, loo nto isenokukutyhafisa. Ngokomzekelo, unokuthelekisa indlela owawukade uzenza ngayo izinto nendlela ozenza ngayo ngoku. Yintoni enokukunceda uyeke ukucinga ngolu hlobo?

YINTONI UYEHOVA AYILINDELEYO KUWE?

Khawuzibuze, ‘Yintoni uYehova ayilindeleyo kum?’ Unokuthuthuzelwa ngamazwi akwiDuteronomi 6:​5, athi: “Umele umthande uYehova uThixo wakho ngentliziyo yakho yonke nangomphefumlo wakho wonke nangamandla akho onke.”

Ngokutsho kwale vesi, uYehova ulindele ukuba umkhonze ngentliziyo yakho yonke, ngomphefumlo wakho wonke, nangamandla akho onke. Le nto inokukunceda ungazithelekisi nabanye, okanye uthelekise indlela ozenza ngayo ngoku izinto nendlela owawukade uzenza ngayo.

Cinga ngale nto kaloku: Ngokuya wawusemtsha, ziintoni owawumenzela zona uYehova? Abantu bakaYehova abaninzi bebeza kuthi babemenzela konke okusemandleni abo. Nawe, wawumenzela konke owawunamandla okukwenza ngelo xesha. Ngoku yintoni okwaziyo ukumenzela yona uYehova? Mhlawumbi, umenzela konke okusemandleni akho ngoku. Ukuba izinto uzijonga ngolu hlobo, unokubona ukuba uYehova usamsebenzela ngamandla akho onke njengakuqala. Wawusenza konke owawunokukwazi ukumenzela kona ngelo xesha, usenza loo nto ke nangoku.

UNOKUBANCEDA KAKHULU ABANYE

Nantsi ke enye into: Kunokuba ucinge ngezinto ongasakwaziyo ukuzenza ngenxa yokuba umdala, cinga ngamathuba amaninzi onawo okunceda abanye abantu. Ekubeni ngoku sele ungumKristu okhulileyo, unokukwazi ukwenza izinto owawungenakukwazi ukuzenza ngokuya wawusemtsha. Ngokomzekelo, nazi ezinye izinto onokukwazi ukuzenza:

Balisela abanye abantu ngezinto ezenzekileyo ebomini bakho. Cinga ngala mazwi aseBhayibhileni:

AkaKumkani uDavide: “Ndakha ndangumfana, ngoku ndimdala, kodwa andikamboni umntu olilungisa elahliwe, okanye abantwana bakhe bedinga isonka.”​—INdu. 37:25.

AkaYoshuwa: “Ngoku jongani! Sele ndiza kufa, ibe niyazi ngentliziyo yenu yonke nangomphefumlo wenu wonke ukuba, akukho nasinye isithembiso esingenzekanga kuzo zonke izithembiso ezilungileyo azithethileyo kuni uYehova uThixo wenu. Ziye zenzeka zonke. Akukho nalinye ilizwi elingenzekanga.”​—Yosh. 23:14.

Mhlawumbi xa wawusemtsha wawuthetha izinto ezifana nezo zathethwa nguDavide noYoshuwa ukuze ukhuthaze abanye. UDavide noYoshuwa bazibona zisenzeka kaninzi kubo ezi zinto kangangeminyaka, izinto abazithethayo zazinamandla kakhulu.

Ukuba nawe sele uneminyaka ukhonza uYehova, unokuthetha ngendlela uYehova aye wakusikelela ngayo okanye aye wabasikelela ngayo abanye abantu abamkhonzayo. Likhona ixesha olikhumbulayo apho wabona indlela uYehova abasikelela ngayo abantu bakhe? Ukuba likhona, balisela abanye ngalo. Loo nto inokubahlaziya ngendlela nawe eyakuhlaziya ngayo. Ngoko, xa abanye besiva izinto ezenzekayo kuwe ngenxa yokuba ukhonza uYehova, banokukhuthazeka kakhulu.​—Roma 1:​11, 12.

Enye indlela onokubakhuthaza ngayo kukuya ngokoqobo kwiintlanganiso qho iimeko zikuvumela. Xa uyile unokubakhuthaza abazalwana noodade, nawe ukhuthazeke. UConnie, ebekuthethwe ngaye ekuqaleni, uthi: “Ukuya kwiintlanganiso kundenza ndingatyhafi. Ndinokutyhafa njani ekubeni ndifumana uthando olungaka eHolweni YoBukumkani? Ndiye ndizame ukubabonisa indlela endibabulela ngayo abazalwana noodade ngokubapha izinto nje ezincinci. Ndiyaqiniseka nokuba ndenza izinto eziqinisa ukholo kunye nabazalwana noodade.”

UYEHOVA UYAYIXABISA INDLELA OTHEMBEKE NGAYO

Baninzi abantu ekuthethwa ngabo eBhayibhileni ababethandwa nguYehova ngoxa babengasakwazi ukwenza izinto ngendlela ababekade bezenza ngayo. Omnye wabo ngumSirayeli owayesele emdala uSimeyon, nowayesaphila xa kwakuzalwa uYesu. Xa eye etempileni, mhlawumbi wayebona abafana besenza imisebenzi ebalulekileyo apho. Mhlawumbi wayeye acinge ukuba akusekho nto ingako anokumsebenzisa kuyo uYehova, kuba akasenakukwazi ukumsebenzela ngendlela abo bafana abanokumsebenzela ngayo. Kodwa uYehova wayengaboni ngolo hlobo. Kuye uSimeyon ‘wayelilungisa yaye esoyika uThixo,’ ngoko wamsikelela ngokumenza abone usana olunguYesu. Wade wamsebenzisa ukuba aprofete ngolu sana lwaluza kuba nguMesiya. (Luka 2:​25-35) Kucacile ukuba, uYehova zange abone ixhego elinguSimeyon, kodwa wabona indoda eyayinokholo oluqinileyo, “neyayinomoya oyingcwele.”

Nawe ke qiniseka ukuba uYehova uyayixabisa indlela othembeke ngayo kuye nokuba kukho izinto ongasakwaziyo ukumenzela zona. Kaloku, “uThixo akalindelanga ukuba umntu anikele ngento angenayo, ufuna anikele ngalo nto anayo.”​—2 Kor. 8:12.

Ngenxa yaloo nto yenza ezo zinto ukwaziyo ukuzenza. Ngokomzekelo, zeziphi iindlela onokukwazi ukushumayela ngazo nokuba lixeshana nje elincinci? Unokukwazi ukukhuthaza abanye ngokubafowunela okanye ngokuba bhalela nje ikhadi? Izinto ezincinci ozenzayo ngenxa yokuba ubathanda abazalwana noodade zinokuba khuthaza kakhulu, ngokukodwa xa zisenziwa ngumntu ekudala ekhonza uYehova.

Ngoxa umzimba wakho ungasavumi, ininzi into onokumenzela yona uYehova. Khawujonge into eyenzeka eMpuma Afrika kwibhokisi ethi “Yasindisa Ubomi Bakhe.”

Khumbula ukuba indlela onokholo nothembeke ngayo inokubakhuthaza abanye. Ukunyamezela kwakho kungumzekelo kwabanye, futhi unokuqiniseka ukuba ‘uThixo akangoThixo ongenabulungisa ukuba angade awulibale umsebenzi wakho nendlela obonise ngayo ukuba uyalithanda igama lakhe, ngokuthi ubalungiselele abo bangcwele, yaye usaqhubeka ubalungiselela.’​—Heb. 6:10.

HLALA UXAKEKILE KANGANGOKO UNAKO

Uphando lubonisa ukuba amadoda namabhinqa amaninzi asele ekhulile naxakeke kukunceda abanye abantu aba nempilo ebhetele, acinge kakuhle, aze aphile ixesha elide.

Kakade ke, ukwenza izinto ezintle akuziphelisi zonke iingxaki ezibangelwa kukwaluphala. BuBukumkani BukaThixo kuphela obuza kuyenza loo nto, ngokususa isono esenza abantu baluphale baze basweleke.​—Roma 5:12.

Sekunjalo, izinto ozenzela uYehova njengokunceda abantu bamazi, zinokuliqinisa ithemba onalo, futhi zinokude ziyenze bhetele impilo yakho. Bazalwana noodade asebekhulile, yazini ukuba uYehova uyazixabisa izinto enimenzela zona nendlela eninokholo ngayo iyalikhuthaza ibandla.