Ngaba Ufanele Uthandaze KuYesu?

BAMBI abantu bakugqala kufanelekile ukuthandaza kuYesu. EJamani abaninzi bafundiswe besengabantwana ukuba ngaphambi kokuba batye bafanele basonge izandla baze babulele kuYesu Kristu.

Ngokutsho kweBhayibhile, eneneni uYesu unesigxina esiphakame kakhulu ezulwini. Noko ke, ngaba oko kuthetha ukuba sifanele sithandaze kuye? Usenokuba uphakathi kwabo bathi, ngenxa yokumthanda uYesu, babhekise imithandazo kuye, kodwa ngaba uYesu ucinga ntoni ngemithandazo enjalo?

Okokuqala, kutheni ifanele ibuzwe kwaukubuzwa le mibuzo? Ngenxa yokuba iBhayibhile ithi uYehova uThixo ‘ngumphulaphuli wemithandazo.’ Ngoko, akumangalisi ukuba abakhonzi bakaThixo kumaxesha amandulo, njengamaSirayeli, babethandaza kuYehova uThixo uSomandla, kuphela.—INdumiso 5:1, 2; 65:2.

Ngaba izinto zaguquka xa uYesu, uNyana kaThixo, weza emhlabeni ukuze akhulule uluntu kwisono nokufa? Akunjalo, imithandazo yayisabhekiswa kuYehova. Xa wayesemhlabeni uYesu naye wayethandaza rhoqo kuYise wasezulwini, yaye wafundisa abanye ukuba benze okufanayo. Khawucinge nje ngomthandazo ongumzekelo, maxa wambi obizwa ngokuba nguMthandazo weNkosi okanye uBawo Wethu Osezulwini, ongomnye weyona mithandazo yaziwayo ehlabathini. UYesu akazange asifundise ukuthandaza kuye; wasimisela lo mzekelo: “Bawo wethu osemazulwini, malingcwaliswe igama lakho.”—Mateyu 6:6, 9; 26:39, 42.

Ngoku makhe siwukhangele ngokucokiseke ngakumbi lo mbandela ngokuhlolisisa oko umthandazo ukuko ngokwenene.

Yintoni Umthandazo?

Yonke imithandazo luhlobo oluthile lonqulo. IThe World Book Encyclopedia iyakungqinela oku, isithi: “Umthandazo luhlobo oluthile lonqulo anokuthi ngalo umntu abonakalise ukuzinikela, umbulelo, avume izono, okanye akhunge kuThixo.”

Ngesinye isihlandlo uYesu wathi: “Kubhaliwe kwathiwa, Uze uqubude eNkosini uThixo wakho, ukhonze yena yedwa.” UYesu wanamathela kwinyaniso esisiseko yokuba unqulo—ngenxa yoko nemithandazo—lufanele lubhekiswe kuYise, uYehova uThixo, kuphela.—Luka 4:8; 6:12.

Ukumvuma UYesu Kwimithandazo Yethu

UYesu wafa njengedini lokuhlawulela uluntu, wavuswa nguThixo, waza waphakanyiselwa kwisigxina esiphakamileyo. Njengoko usenokuthelekelela, konke oku kwazisa inguqulelo ngokuphathelele imithandazo eyamkelekileyo. Ngayiphi indlela?

Umpostile uPawulos uchaza impembelelo enkulu esinayo isigxina sikaYesu kwimithandazo esithi: “Kungoko athe uThixo wamphakamisa kakhulu, wamnika igama elingaphezu kwawo onke amagama; ukuze ngegama likaYesu onke amadolo agobe, awabasemazulwini, nawabasemhlabeni, nawabaphantsi komhlaba; zithi zonke iilwimi zixele ukuba uYesu Kristu uyiNkosi, kuze kuzukiswe uThixo uYise.”—Filipi 2:9-11.

Ngaba amazwi athi “ngegama likaYesu onke amadolo agobe” athetha ukuba sifanele sithandaze kuye? Akunjalo. Ibinzana lesiGrike elisetyenzisiweyo apha “lichaza igama ekuthi ngalo abo banqulayo bamanyane, ekuthi ngalo bamanyane bonke (πᾶν γόνυ) elunqulweni. Igama elifunyenwe nguYesu lishukumisela bonke kunqulo olumanyeneyo.” (A Grammar of the Idiom of the New Testament, nguG. B. Winer) Eneneni, ukuze umthandazo wamkeleke, umele wenziwe “ngegama likaYesu,” kodwa, sekunjalo, ufanele ubhekiswe kuYehova uThixo yaye uzukise yena. Ngenxa yesi sizathu, uPawulos uthi: “Mazithi iingcelo zenu ezintweni zonke, ngako ukuthandaza nokukhunga, ndawonye nokubulela, zaziswe kuye uThixo.” (Akekeliswe sithi.)—Filipi 4:6.

Kanye njengokuba indlela ikhokelela emvuzweni, ngoko uYesu ‘yindlela’ ekhokelela kuThixo uSomandla. UYesu wabafundisa oku abapostile: “Ndim indlela, ndim inyaniso, ndim ubomi; akukho namnye uzayo kuBawo, engezi ngam.” (Yohane 14:6) Ngenxa yoko, sifanele sinikele imithandazo yethu kuThixo ngoYesu kungekhona ngokuthe ngqo kuYesu.a

Bambi basenokubuza, ‘Kodwa ngaba iBhayibhile ayithi umfundi uStefano nompostile uYohane bathetha noYesu esezulwini?’ Kuyinyaniso oko. Noko ke, ezi ziganeko, zazingabandakanyi imithandazo, njengoko uStefano noYohane babona uYesu embonweni baza bathetha naye ngokungqalileyo. (IZenzo 7:56, 59; ISityhilelo 1:17-19; 22:20) Khumbula ukuba kwanokuthetha noThixo akuthi ngokuzenzekelayo kube ngumthandazo. UAdam noEva bathetha noThixo, bethethelela isono sabo esinzulu, xa wayebagweba emva kwesono sabo e-Eden. Ukuthetha kwabo naye ngaloo ndlela kwakungengomthandazo. (Genesis 3:8-19) Ngenxa yoko, bekuya kokuba kokuphosakeleyo ukujonga ukuthetha kukaStefano okanye uYohane noYesu njengobungqina bokuba eneneni sifanele sithandaze kuye.

‘Kubizwa’ Njani Egameni LikaYesu?

Ngaba usenamathandabuzo, usacinga ukuba kufanelekile ukuthandaza kuYesu? Elinye ibhinqa labhalela iofisi yesebe yeWatch Tower Society: “Ngelishwa, andikayamkeli into yokuba amaKristu okuqala ayengathandazi kuYesu.” Lalicinga ngamazwi kaPawulos akweyoku-1 kwabaseKorinte 1:2, apho wakhankanya “bonke ababiza egameni leNkosi yethu uYesu Kristu ezindaweni zonke.”(NW) Noko ke, ubani ufanele aphawule ukuba kulwimi lwantlandlolo, ibinzana “ukubiza” linokuthetha ezinye izinto ezingenguwo umthandazo.

‘Kwakubizwa’ njani egameni likaYesu ezindaweni zonke? Enye indlela yayikukuba abalandeli bakaYesu waseNazarete bakuvuma ngokuphandle ukuba wayenguMesiya ‘noMsindisi wehlabathi,’ besenza imimangaliso emininzi egameni lakhe. (1 Yohane 4:14; IZenzo 3:6; 19:5) Ngoko ke, iThe Interpreter’s Bible ithi ibinzana elithi “ukubiza egameni leNkosi yethu . . . lithetha ukuvuma ukuba uyinkosi kunokuthetha ukuthandaza kuye.”

Ukwamkela uKristu nokubonakalisa ukholo kwigazi lakhe elaphalalayo, elenza zikwazi ukuxolelwa izono, kukwathetha ‘ukubiza egameni leNkosi yethu uYesu Kristu.’ (Thelekisa IZenzo 10:43 nesahluko 22:16.) Yaye silivakalisa ngokoqobo igama likaYesu nanini na sithandaza kuThixo egameni lakhe. Ngoko, ngoxa ibonisa ukuba sinokubiza egameni likaYesu, iBhayibhile ayibonisi ukuba sifanele sithandaze kuye.—Efese 5:20; Kolose 3:17.

Oko Anokusenzela Kona UYesu

UYesu wabathembisa ngokucacileyo abafundi bakhe: “Ukuba nithe nacela into ngegama lam, ndoyenza mna.” Ngaba oku kuthetha ukuba kufuneka kuthandazwe kuye? Akunjalo. Kucelwa kuYehova uThixo—kodwa egameni likaYesu. (Yohane 14:13, 14; 15:16) Sibongoza uThixo ukuba uNyana Wakhe, uYesu, asincede esebenzisa amandla negunya lakhe elikhulu.

UYesu unxibelelana njani nabalandeli bakhe bokwenyaniso namhlanje? Indlela uPawulos awalichaza ngayo ibandla lamaKristu athanjisiweyo isenokuba ngumzekelo. Walifanisa nomzimba yaye uYesu Kristu nentloko. “Intloko” ixhasa amalungu omzimba wokomoya kwiintswelo zawo ‘ngamalungu nemisipha,’ okanye ngeendlela namalungiselelo okuxhasa ibandla lakhe ngokudla nangokhokelo lokomoya. (Kolose 2:19) Ngendlela efanayo, namhlanje uYesu usebenzisa ‘izipho ezingabantu,’ okanye amadoda aneemfaneleko zokomoya, ukukhokela ebandleni, kwanokohlwaya ukuba kuyimfuneko. Akukho lungiselelo lokuba amalungu ebandla anxibelelane ngokuthe ngqo noYesu okanye athandaze kuye, kodwa ngokuqinisekileyo—ewe, amele—athandaze kuYise kaYesu, uYehova uThixo.—Efese 4:8-12.

Umhlonela Njani UYesu?

Ngokuphathelele ukusindiswa kwabantu, enjani yona ukubalasela indima anayo uYesu! Umpostile uPetros wathi: “Usindiso alukho kuwumbi; kuba akukho gama limbi phantsi kwezulu, linikiweyo phakathi kwabantu, esimele ukusindiswa ngalo.” (IZenzo 4:12) Ngaba uyakuqonda ukubaluleka kwegama likaYesu?

Ngokungayibhekisi kuYesu ngokuthe ngqo imithandazo, asisithobi isigxina sakhe. Kunoko, siyamhlonela uYesu xa sithandaza egameni lakhe. Yaye kanye njengokuba abantwana bebahlonela abazali babo ngokubathobela, nathi uYesu Kristu simhlonela ngokuthobela imithetho yakhe, ngokukodwa umthetho omtsha wokuthandana.—Yohane 5:23; 13:34.

Imithandazo Eyamkelekileyo

Ngaba unqwenela ukwenza imithandazo eyamkelekileyo? Ngoko yibhekise kuYehova uThixo, yaye wenjenjalo egameni loNyana wakhe, uYesu. Kwazi ukuthanda kukaThixo, ize imithandazo yakho ibonakalise ukuba uyakuqonda oko. (1 Yohane 3:21, 22; 5:14) Yomelezwa ngamazwi eNdumiso 66:20: “Makabongwe uThixo, yena ungawugxothanga umthandazo wam, nobubele bakhe kum.”

Njengoko siye sabona, imithandazo iluhlobo lonqulo olumele lubhekiswe kuThixo uSomandla kuphela. Ngokubhekisa imithandazo yethu kuYehova uThixo, sibonisa ukuba siluthabathele entliziyweni ulwalathiso lukaYesu lokuthandaza sithi: “Bawo wethu osemazulwini.”—Mateyu 6:9.

[Umbhalo osemazantsi]