Unqulo—Ngaba Ngumbandela Ekungamele Kuthethwe Ngawo?
“KUKHO imibandela emibini endingaze ndithethe ngayo: unqulo nezobupolitika!” Ngokuqhelekileyo abanye baye basabele ngaloo ndlela xa amaNgqina kaYehova ethetha nabo ngeBhayibhile. Yaye imbono yabo iyaqondakala.
Xa abantu bexoxa ngezobupolitika, kusenokugqabhuka imisindo kuze kulandele ingxabano. Abaninzi abakhohliswa zizithembiso ezililize yaye bayaqonda ukuba ngokufuthi ekuphela kwento efunwa ngabezobupolitika ligunya, udumo, nemali. Okulusizi kukuba maxa wambi ukungavumelani ngezobupolitika kuye kukhokelele kugonyamelo.
Usenokuqiqa ngelithi, ‘Kodwa, ngaba akunjalo ngonqulo? Ngaba ungquzulwano oluninzi namhlanje aluphenjelelwanga kukuthanda unqulo?’ EMntla Ireland, amaRoma Katolika namaProtestanti ebesoloko eziintshaba. Kumazwana aseBalkan, amarhamente eCawa yamaOthodoki aseMpuma, amaRoma Katolika, nawezinye iinkonzo alwela umhlaba. Ube yintoni umphumo? Inkohlakalo nobutshaba obungapheliyo.
Bejamelene nesisongelo sokufa, abaninzi bazama ukukufihla oko bona neentsapho zabo bakukholelwayo. Ubutshaba obubangelwa lunqulo obebuqhubeka kangangeenkulungwane eAfrika phakathi kwabantu beNgqobhoko nabalandeli beenkonzo ezikwamanye amazwe nawabeenkonzo ezingokwesithethe bubangele ukuba abazali bathiye abantwana babo amagama amabini abanika umlinganiselo othile wenkuseleko, isiko elisaqhubekayo nanamhlanje. Ngaloo ndlela, inkwenkwana ethile isenokuzenza ilungu lecawa ethile okanye izichaze njengelungu lolunye unqulo. Xa iinkolelo zonqulo zomntu othile zinokumbulalisa, akumangalisi ukuba abe mathidala ukuxubusha ngonqulo ngokukhululekileyo.
Kwabanye, unqulo ngumbandela abangafuni kuthetha ngawo kwanaxa ubomi babo bungasongelwa. Banoloyiko lokuba ukuthetha ngeenkolelo zabo nomntu wolunye unqulo kuya kukhokelela kwingxoxo engenantsingiselo. Kanti abanye bakholelwa kwelokuba lonke unqulo lulungile. Bathi, logama nje umntu esaneliswa koko akukholelwayo, ukuthetha ngeeyantlukwano kulilize.
Kwanabo bazimisele ukufunda ngentsingiselo yonqulo bayaphikisana. Kwinqaku layo elithi “Izifundo Ngeenkonzo Nokwahlulwahlulwa Kwazo,” iThe New Encyclopædia Britannica iyavuma: “Kunqabile ukuba . . . abaphengululi bavumelane ngokuphathelele intsingiselo [yonqulo] . . . Ngaloo ndlela, kuyo yonke imbali yawo, lo mbandela ubusoloko unembambano.”
Esinye isichazi-magama sichaza unqulo ‘njengendlela yomntu yokubonisa ukholo noloyiko ngegunya elinamandla angaphezu kwawomntu eligqalwa njengomdali nomlawuli wendalo iphela.’ Oku bekuya kufuna ukuba unqulo luphumeze indima ebalulekileyo ebomini. Ngenene, unqulo belunguthunywashe oyintloko ekuyileni imbali yoluntu ehlabathini lonke. IOxford Illustrated Encyclopedia of Peoples and Cultures, ithi: “Alikho ibutho loluntu elingasebenzisanga uhlobo oluthile lonqulo ukuzama ukulungelelanisa nokwenza ubomi balo bube nentsingiselo.” Ekubeni lubandakanya izinto ezisisiseko ‘ezinjengolungelelwano’ ‘nentsingiselo’ yobomi, ngokuqinisekileyo unqulo alufanele lube yinto yempikiswano okanye yengxoxo. Kunoko, kufanele kuxutyushwe ngalo—oko kukuthi, luhlolisiswe ngokucokisekileyo—nomnye umntu. Kodwa kunye nabani, yaye ziziphi iingenelo ezinokufumaneka ngokwenjenjalo?