Indlela Ebanzi Enenkululeko Encinane

Intsapho enamalungu amathathu—utata, umama nentombazana encinane—babesekhayeni labo eSydney, eOstreliya, xa indlu yaqalisa ukutsha. Bazama ukuphuma ngeefestile, kodwa zazinemivalo yentsimbi. Ngenxa yeentsimbi ezikhuselayo, abacimi-mlilo abazange bakwazi ukubasindisa. Umama notata babulawa ngumsi nangamadangatye omlilo. Intombazana yabo yafela esibhedlele kamva.

HAYI indlela ekulusizi ngayo ukuba le ntsapho yafa ngenxa yeentsimbi ezazimele ziyikhusele! Sidandalazile namhlanje isibakala sokuba zininzi iintsapho ezikhusele amakhaya azo ngemivalo yentsimbi nangamaqhaga omeleleyo. Inkoliso yabamelwane ikwanamakhaya nemihlaba efana neenqaba. Kutheni? Bafuna unqabiseko noxolo lwengqondo. Esinjani sona isiphako kwibutho loluntu ‘elikhululekileyo’ elinabantu abaziva bekhuselekile kuphela xa bezivalele okwamabanjwa emakhayeni abo! Kwiindawo ezininzi, abantwana abasakhuselekanga xa bedlala kwipaki ekufutshane okanye xa besiya esikolweni bengaphelekwa ngumzali okanye ngomnye umntu omkhulu. Kwiinkalo ezininzi zobomi, inkululeko inyamalala okombethe wasekuseni.

Indlela Yobomi Eguqukileyo

Imihla yabazali babazali bethu yayahlukile. Xa babesengabantwana, ngokuqhelekileyo babedlala apho babethanda ukudlala khona ngaphandle kokoyika. Xa babengabantu abakhulu, babengazixakekisanga ngamaqhaga nemivalo yentsimbi. Babeziva bekhululekile, yaye ngokomlinganiselo othile babekhululekile. Kodwa indlela eliphila ngayo ibutho loluntu iye yaguquka ngoxa besaphila. Iguqukile yaba yengenceba ngakumbi, yaba yeyokuzingca ngakumbi; kwiindawo ezininzi ukuthand’ ummelwane kuye kwathatyathelwa indawo kukoyik’ ummelwane, nto leyo efake isandla kwisiganeko esiyintlekele esikhankanywe ngasentla. Oku kwanda kokungabikho kwenkululeko bekuhambisana nokuwohloka okuthe ngcembe kwemilinganiselo yokuziphatha. Ibutho loluntu liye lathabatheka “yimilinganiselo emitsha yokuziphatha,” kodwa eneneni, ngoku lifikelele kwimeko ekunzima nokuyibona imilinganiselo yokuziphatha.

Owayesakuba ngumhlohli wezemfundo kwiUniversity of Queensland, uGqr. Rupert Goodman, ubhala oku: “Ngoku abantu abaselula bachanabeke kwindlela yokuphila eyahlukileyo neyokuphilela uyolo . . . apho ‘isiqu sikabani’ siyeyona nto ibalulekileyo: ukuzifica, ukuzixhalabela ngokugqithileyo, ukuzanelisa, ukuzingca.” Kwakhona uthi: “Imilinganiselo enjengokuzeyisa, ukubeka izilangazelelo zabanye kuqala, ukusebenza nzima, uqoqosho, ukuhlonela igunya, uthando nentlonelo ngabazali . . . zizinto ezingaziwayo ngabaninzi.”

Yindlela Ebanzi Ngenene

Abo baqheleneyo nesiprofeto seBhayibhile abothuswa koku kwanda kokuzingca, kuba uYesu Kristu wabalumkisa abaphulaphuli bakhe esithi: “Libanzi isango, iphangalele nendlela, esa entshabalalweni; baninzi ke abangena ngalo. Ngokuba limxinwa isango, icuthene nendlela, esa ebomini; bambalwa ke abalifumanayo.” (Mateyu 7:13, 14) Indlela yokuqala, enkulu ngokwaneleyo ukuba kungahamba abantu abaninzi, “ibanzi” kuba ayithintelwa yimigaqo yeBhayibhile elawula ukuziphatha okuhle nobomi bemihla ngemihla. Inomtsalane kwabo bathanda ukucinga ukuthanda kwabo yaye baphile unothanda—kungekho mithetho nazimbopheleleko.

Liyinyaniso elokuba, abaninzi abakhethe indlela ebanzi bathi bayayinandipha inkululeko yabo. Kodwa inkoliso yabo iqhutywa ngulo moya wesameleyo wokuzingca. IBhayibhile ithi balawulwa ‘ngumoya osebenzayo ngoku kubo abangevayo.’ Lo moya ubaqhubela ekubeni baphile ‘ngokwenyama, benze ukuthanda kwenyama,’ enoba kukuziphatha okubi, ukusebenzisa kakubi iziyobisi, okanye ukufuna ubutyebi, udumo, okanye igunya ngenkohlakalo.—Efese 2:2, 3.

Indlela Ebanzi Ikhokelela Kwintlekele

Phawula ukuba abo bahamba kwindlela ebanzi baqhutyelwa ekubeni benze “ukuthanda kwenyama.” Oku kubonisa ukuba abakhululekanga konke konke—banenkosi. Bangamakhoboka enyama. Yaye ukukhonza le nkosi kunokukhokelela kwiingxaki ezininzi—oobhubhani bezifo ezidluliselwa ngesini, amakhaya aqhekekileyo, imizimba neengqondo eziguliswa kukusetyenziswa kakubi kweziyobisi notywala, ukukhankanya ezimbalwa nje kuphela. Kwanezenzo zogonyamelo, ukuqhekeza nokudlwengula zisekelwe kwindlela yokucinga yokuzingca efumaneka kule ndlela ibanzi kavula zibhuqe. Yaye, ngoxa isekho le ‘ndlela isa entshabalalweni,’ iziqhamo zayo ziya kuba buhlungu ngakumbi.—IMizekeliso 1:22, 23; Galati 5:19-21; 6:7.

Khawucinge ngemizekelo yokwenene emibini yaseOstreliya. UMary wanikezela esilingweni, ngokusebenzisa kakubi iziyobisi ezikhobokisayo nangokuziphatha kakubi.a Kodwa akazange alufumane ulonwabo awayelufuna. Kwanasemva kokuba efumene abantwana ababini, ubomi bakhe babubonakala bulilize. Watshonelwa lilanga emini xa wafumanisa ukuba wayenoGawulayo.

UTom wenzakala ngendlela eyahlukileyo. Ubhala oku: “Ndakhulela kwindlu yecawa emntla Queensland. Xa ndandineminyaka eli-16 ubudala, ndaqalisa ukusela ngamandla. Utata, oomalume nabahlobo bethu bonke babesela ngokugqithisileyo, ngoko kwakubonakala kuyinto efanelekileyo ukuba yenziwe. Ndafikelela kwinqanaba lokuba ndisele yonke into ephambi kwam, ukususela kwibhiya ukuya kwisipirithi. Kwakhona ndaqalisa ukudlala amahashe, maxa wambi ndandiye ndiphulukane nenkoliso yomvuzo wam endiwusebenzele nzima. Yayingeyomali incinane le, kuba umsebenzi wam wokusika amazele eswekile wawunomvuzo oncumisayo.

“Emva koko ndatshata saza saba nabantwana. Kunokusingatha iimbopheleleko zam, ndandisenza oko kwakusenziwa ngabahlobo bam—ukusela, ukungcakaza nokulwa. Ndandivalelwa ngokufuthi kwintolongo yasekuhlaleni. Kodwa kwanoku akuzange kundenze ndiguquke. Ubomi bam babusiba nzima ngakumbi nangakumbi. Babuzele ziingxaki.”

Ewe, ngokunikezela kwiminqweno emibi, uTom noMary abazange benzakalise iziqu zabo kuphela kodwa kwaneentsapho zabo. Okulusizi kukuba, abanye abantu abaselula abaninzi batyekela ekukhohlisweni ngumoya olahlekisayo wenkululeko kavula zibhuqe, okule ndlela ibanzi. Ukuba nje abaselula bebenokubona ngaphaya kobuhle bekhiwane, uhanahaniso. Ukuba nje bebenokububona ubunyani bendlela ebanzi—imiphumo ebuhlungu ekugqibeleni efunyanwa ngabo bonke abahamba kuyo. Liyinyaniso elokuba ibanzi yaye kulula ukuhamba kuyo. Kodwa ububanzi bayo buyenza ibe sisiqalekiso. Ikhondo lobulumko kukwamkela isibakala esingenakukhanyelwa sokuba “lowo uhlwayelela eyakhe inyama, wovuna ukonakala ngokwasenyameni.”—Galati 6:8.

Noko ke, ikho into elunge ngakumbi enokukhethwa. Yindlela emxinwa. Kodwa ngaba inemiqathango, yaye imxinwa kangakanani le ndlela? Yaye ikhokelela phi?

[Umbhalo osemazantsi]