Imibuzo Evela Kubafundi
Wayethetha ukuthini umfundi uYakobi xa wayesithi: “Musani ukuba ngabafundisi abaninzi, bazalwana bam, nisazi nje ukuba siya kwamkela olona lukhulu ugwebo”?—Yakobi 3:1.
Ngokuqinisekileyo uYakobi wayengakhuthazi amaKristu ukuba ayeke ukufundisa abanye inyaniso. KuMateyu 28:19, 20, uYesu wayalela abafundi bakhe ukuba baye “kuzenza abafundi zonke iintlanga, . . . nibafundisa ukuba bazigcine zonke izinto endiniwisele umthetho ngazo.” Ngenxa yoko, onke amaKristu afanele abe ngabafundisi. Umpostile uPawulos wawaluleka amaKristu angamaHebhere kuba ayengekabi ngabafundisi. Wabhala: “Nakuba benifanele ukuba ngabafundisi, ngenxa yokuba sekumzuzu nakholwayo, nibuye naswela umntu wokunifundisa iziqalelo zokuqala zezihlabo zikaThixo.”—Hebhere 5:12.
Ngoko, wayethetha ngantoni uYakobi? Wayebhekisela kwabo banamalungelo akhethekileyo okufundisa ebandleni. Kwabase-Efese 4:11, sifunda oku: “[UYesu Kristu, iNtloko yebandla] wabapha ukuba babe ngabapostile, abanye babe ngabaprofeti, abanye babe ngabashumayeli beendaba ezilungileyo, abanye babe ngabalusi nabafundisi.” Kumabandla enkulungwane yokuqala kwakukho amalungelo akhethekileyo okufundisa njengoko kunjalo nanamhlanje. Ngokomzekelo, iQumrhu Elilawulayo limela ‘umkhonzi othembekileyo noqondayo’ yaye linembopheleleko ekhethekileyo yokuvelela umsebenzi wokufundisa kumabandla asehlabathini lonke. (Mateyu 24:45) Abaveleli abahambahambayo nabadala bebandla nabo baneembopheleleko ezikhethekileyo zokufundisa.
Ngaba uYakobi wayexelela amadoda angamaKristu afanelekayo ukuba ayengafanele amkele isikhundla sokufundisa ngenxa yokoyika isigwebo sikaThixo esiqatha? Ngokuqinisekileyo akunjalo. Ukuba ngumdala kulilungelo elikhulu njengoko kuboniswa yeyoku-1 kuTimoti 3:1, ethi: “Ukuba ubani ungxamele ubuveleli, unqwenela umsebenzi omhle.” Olunye lweempawu ezifunekayo ukuze ubani afanelekele ukumiselwa njengomdala ebandleni kukuba loo ndoda ibe ngumntu “okwaziyo ukufundisa.” (1 Timoti 3:2, TE) UYakobi wayengawaphikisi amazwi aphefumlelweyo kaPawulos.
Noko ke, kubonakala ukuba ngenkulungwane yokuqala yeXesha lethu Eliqhelekileyo, bambi babezimisela ngokwabo ukuba babe ngabafundisi, nangona babengafaneleki yaye bengamiselwanga. Kusenokuba babevakalelwa kukuba kukho ukuphakama okuthile kweso sikhundla, ibe babezifunela uzuko. (Thelekisa uMarko 12:38-40; 1 Timoti 5:17.) Umpostile uYohane wakhankanya uDiyotrefe, ‘lowo uthanda ukuzenza mkhulu kubo, engamkeli nantoni na kuYohane ngembeko.’ (3 Yohane 9, NW) Eyoku-1 kuTimoti 1:7 ithetha ngabathile ‘ababethanda ukuba ngabafundisi bomthetho, phofu bengaziqiqi izinto abazithethayo, kwanezo bazingqinayo.’ Amazwi akuYakobi 3:1 afanelekile ngokukodwa kumadoda anqwenela ukuba ngabafundisi kodwa anentshukumisa ephosakeleyo. Amadoda anjalo ebenokuwenzakalisa umhlambi aze ngokufanelekileyo afumane isigwebo esiqatha ngakumbi.—Roma 2:17-21; 14:12.
Kwakhona amazwi akuYakobi 3:1 afanelekile ukukhumbuza abo bafanelekayo nabakhonza njengabafundisi. Ekubeni kukuninzi abakuphathisiweyo, kuninzi okuya kufunwa kubo. (Luka 12:48) UYesu wathi: “Onke amazwi angewani abathe bawathetha abantu, baya kuphendula ngawo ngomhla womgwebo.” (Mateyu 12:36) Oku kuyinyaniso ngokukodwa kwabo banempembelelo engakumbi, abadala abamiselweyo.
Abadala baya kuphendula ngendlela abaqhubana ngayo nezimvu zikaYehova. (Hebhere 13:17) Into abayithethayo ichaphazela ubomi babantu. Ngenxa yoko, umdala ufanele akulumkele ukubalaselisa iimbono zakhe okanye ukuxhaphaza izimvu njengoko abaFarisi babesenza. Umele azabalazele ukubonakalisa uthando olunzulu olufana nolo lwabonakaliswa nguYesu. Ngalo lonke ixesha efundisa, yaye ngokukodwa xa ebandakanyeke kwimibandela yokugweba, umdala ufanele awalumkele amazwi awathethayo, angasebenzisi amabinzana angawacingisisanga okanye avakalise iingcamango ezizezakhe. Ngokukholosa ngokupheleleyo ngoYehova, iLizwi lakhe, nolwalathiso lwentlangano yakhe, umalusi uya kufumana iintsikelelo ezityebileyo zikaThixo, angafumani “olona lukhulu ugwebo.”