Kholosa NgoYehova Nangelizwi Lakhe
“Bakholose ngawe abalaziyo igama lakho.”—INDUMISO 9:10.
1. Kutheni sinokuqhubeka sinentembelo kuYehova nakwiLizwi lakhe nanamhlanje?
KWELI hlabathi lanamhlanje, isimemo sokukholosa ngoThixo nangeLizwi lakhe, iBhayibhile, sisenokubonakala sibubudenge yaye singekho ngqiqweni. Ukanti, ngokuhamba kwexesha ubulumko bukaThixo bungqineke buyingenelo. UMdali wendoda nomfazi nguMsunguli womtshato nentsapho, yaye iintswelo zethu uzazi ngaphezu kwakhe nabani na. Kanye njengokuba iintswelo zabantu ezisisiseko zingaguqukanga, ngoko iindlela ezisisiseko zokuhlangabezana nezo ntswelo azikaguquki. Isiluleko sobulumko esiseBhayibhileni, nangona sabhalwa kwiinkulungwane ezininzi ezadlulayo, sisanikela olona khokelo lusemagqabini lokuphumelela ebomini nasekucombululeni iingxaki. Ukusithobela kuphumela kulonwabo olugqithileyo—kwanakweli hlabathi siphila kulo lihambele phambili ngezenzululwazi!
2. (a) Sisiphi isiqhamo esihle esiveliswe kukuthobela imithetho kaThixo kubomi babantu bakaYehova? (b) Yintoni enye abathembisa yona uYehova abo bamthobelayo nabathobela iLizwi lakhe?
2 Ukukholosa ngoYehova nokusebenzisa imigaqo yeBhayibhile kuzisa iingenelo zokoqobo mihla le. Ubungqina boku bunokubonwa kubomi bezigidi zamaNgqina kaYehova asehlabathini lonke aye asamkela yaye aba nenkalipho yokusisebenzisa isiluleko seBhayibhile. Kuwo, ukukholosa ngoMdali nangeLizwi lakhe kungqineke kuyinto efanelekileyo. (INdumiso 9:9, 10) Ukuthobela imithetho kaThixo kuwenze angabantu abalunge ngakumbi xa kufikelelwa kucoceko, ukunyaniseka, ukukhuthala, ukuhlonela ubomi nezinto zabanye, nokusebenzisa ukutya neziselo ngobungcathu. Kukhokelele kuthando nakwingqeqesho efanelekileyo kwisangqa sentsapho—ukuba nomoya wokubuk’ iindwendwe, umonde, inceba nokuxolela—kwanakwezinye izinto ezininzi. Ubukhulu becala aye akwazi ukuyiphepha imiphumo emibi yomsindo, intiyo, ukubulala, umona, uloyiko, ubuvila, ikratshi, ukuxoka, ukuhleba, ukuziphatha okuvakalala nokuziphatha okubi. (INdumiso 32:10) Kodwa uThixo akabathembisi ngemiphumo emihle kuphela abo bagcina imithetho yakhe. UYesu wathi abo baphila ngendlela yamaKristu baya kwamkeliswa “kalikhulu: ngoku ngeli xesha, . . . oonina, nabantwana, namasimi, ndawonye neentshutshiso; nakwelizayo iphakade, ubomi obungunaphakade.”—Marko 10:29, 30.
Kuphephe Ukukholosa Ngobulumko Behlabathi
3. Maxa wambi amaKristu aye ajamelane naziphi iingxaki ngenxa yokuqhubeka ekholose ngoYehova nangeLizwi lakhe?
3 Ingxaki yabantu abangafezekanga lutyekelo lokukubetha ngoyaba okanye lokukulibala oko kufunwa nguThixo. Kulula ukuba baqalise ukucinga ukuba banolwazi olungakumbi okanye ubulumko bezilumko zeli hlabathi bungaphezulu kobukaThixo, yaye bobona busexesheni. Abakhonzi bakaThixo banokuba naso esi simo sengqondo, ekubeni bephila kweli hlabathi. Ngaloo ndlela, kwisimemo sakhe sothando sokuphulaphula iziluleko zakhe, uBawo wethu wasezulwini wongezelela nezilumkiso ezifanelekileyo: “Nyana wam, musa ukuwulibala umyalelo wam; intliziyo yakho mayiyibambe imithetho yam; kuba iya kukongeza imihla emide, neminyaka yobomi, noxolo. Kholosa ngoYehova ngentliziyo yakho yonke, ungayami okwakho ukuqonda. Uze umazi yena ezindleleni zakho zonke; wowulungelelanisa umendo wakho. Musa ukuba sisilumko kwawakho amehlo; yoyika uYehova usuke entweni embi.”—IMizekeliso 3:1, 2, 5-7.
4. Buninzi kangakanani “ubulumko beli hlabathi,” yaye kutheni ‘bububudenge kuThixo’?
4 Ubulumko beli hlabathi buyintabalala yaye bufumaneka kwimithombo emininzi. Kukho amaziko emfundo amaninzi, yaye “ukwenza iincwadi ezininzi akunakuphela.” (INtshumayeli 12:12) Ngoku oko kuthiwa nguhola wenkcazelo weekhompyutha uthembisa ukuvelisa inkcazelo engenamda ngawo nawuphi na umbandela. Kodwa olu lwazi alulwenzi lilumke ngakumbi ihlabathi okanye likwazi ukucombulula iingxaki zalo. Kunoko, imeko yeli hlabathi iba mandundu mihla le. Ngokufanelekileyo ngoko, iBhayibhile isixelela ukuba “ubulumko beli hlabathi bubudenge kuye uThixo.”—1 Korinte 3:19, 20.
5. IBhayibhile inikela ziphi izilumkiso ngokuphathelele “ubulumko beli hlabathi”?
5 Ebudeni bale nxalenye yokugqibela yemihla yokugqibela, kumele kulindelwe ukuba umkhohlisi omkhulu, uSathana uMtyholi, uya kuvelisa ubuxoki obuninzi ezama ukuphelisa ukuthenjwa kweenyaniso zeBhayibhile. Abahlalutyi beBhayibhile baye bavelisa inkitha yeencwadi ezisekelwe kwintelekelelo ezikucel’ umngeni ukuchana nokuthembeka kweBhayibhile. UPawulos walumkisa omnye umKristu esithi: “Wa, Timoti, loo nto uyiphathisiweyo yigcine, uphambuke ezintethweni ezingezizo, ezihlambelayo, nakwiinkcaso zokwazi, okubizwa njalo kuxokwa; abasuke abathile, bethe banako oku kwazi, baluphosa ukholo.” (1 Timoti 6:20, 21) IBhayibhile ihlabela mgama ilumkisa isithi: “Lumkani, kungabikho bani unithimbayo ngayo intanda-bulumko, nangokulukuhla okungento yanto, ngokwesithethe sabantu, ngokweziqalelo zehlabathi, kungengokukaKristu.”—Kolose 2:8.
Lulwe Utyekelo Lokuthandabuza
6. Kutheni sifanele sikuphaphele ukumila kwamathandabuzo entliziyweni?
6 Elinye iqhinga likaMtyholi kukuhlwayela amathandabuzo engqondweni. Usoloko ekhangela ubuthathaka obuthile elukholweni aze abusebenzise. Nabani na oqalisa ukuba namathandabuzo ufanele akhumbule ukuba umntu obangela loo mathandabuzo ikwangulowo wathi kuEva: “Utshilo na okunene uThixo ukuthi, Ze ningadli kuyo yonke imithi yomyezo?” Emva kokuba uMhendi ewahlwayele amathandabuzo engqondweni yakhe, wathabatha inyathelo elilandelayo lokumxelela ubuxoki, awabukholelwayo. (Genesis 3:1, 4, 5) Ukuze sikhusele ukholo lwethu lungatshatyalaliswa ngamathandabuzo njengolukaEva, kufuneka siphaphe. Ukuba uqalisa ukuba nentwana yamathandabuzo entliziyweni yakho ngoYehova, iLizwi lakhe okanye intlangano yakhe, waphelise ngoko nangoko ngaphambi kokuba akhule de atshabalalise ukholo lwakho.—Thelekisa eyoku-1 kwabaseKorinte 10:12.
7. Yintoni enokwenziwa ukutshitshisa amathandabuzo?
7 Kunokwenziwa ntoni? Kwakhona, impendulo kukukholosa ngoYehova nangeLizwi lakhe. “Ukuba ke ubani kuni uswele ubulumko, makacele kuThixo, onika bonke engenakumbi, engangcikivi; wobunikwa. Ke makacele ekholwa, engathandabuzi; kuba lowo uthandabuzayo ufana nokulatyuza kolwandle, luqhutywa ngumoya, luntsileka.” (Yakobi 1:5, 6; 2 Petros 3:17, 18) Ngoko ukuthandaza kuYehova ngokunyanisekileyo linyathelo lokuqala. (INdumiso 62:8) Emva koko, musa ukuba mathidala ukucela uncedo kubaveleli abanothando ebandleni. (IZenzo 20:28; Yakobi 5:14, 15; Yuda 22) Baya kukunceda ufumane unobangela wokuthandabuza kwakho, okusenokuba kubangelwa likratshi okanye ukucinga ngendlela engeyiyo.
8. Ngokufuthi iye iqale njani indlela abacinga ngayo abawexuki, yaye yintoni eluncedo?
8 Ngaba ukufunda okanye ukuphulaphula iingcamango zabawexuki okanye iintanda-bulumko zehlabathi zikwenze wanamathandabuzo ayingozi? Ngobulumko, iBhayibhile inikela esi siluleko: “Kukhuthalele ukuzimisa phambi koThixo ucikidekile, ungumsebenzi ongenazintloni, ulungisa ukulahlula ilizwi lenyaniso. Ke zona iintetho ezingento, ezihlambelayo, zinxweme; kuba ziya kuhambela phambili kokukhona kungahloneli Thixo. Nelizwi labo liya kudla njengesilonda esiqhenqethayo.” (2 Timoti 2:15-17) Kubangel’ umdla ukuba inkoliso yabo baye bangamaxhoba owexuko baqalisa ukulahleka ngokukhalazela indlela ababevakalelwa ukuba baphethwe ngayo kwintlangano kaYehova. (Yuda 16) Ukufumana iimpazamo kwiinkolelo kweza mva. Kanye njengokuba ugqirha wotyando esisusa ngokukhawuleza isilonda esiqhenqethayo, lucime ngokukhawuleza engqondweni yakho utyekelo lokukhalaza, lokunganeliseki yindlela ezenziwa ngayo izinto kwibandla lamaKristu. (Kolose 3:13, 14) Yibhangise nantoni na esenokuba ibangela loo mathandabuzo.—Marko 9:43.
9. Ucwangciso lobuthixo oluhle lunokusinceda njani sihlale siphilile elukholweni?
9 Namathela kuYehova nakwintlangano yakhe. Ngokuthembeka xelisa uPetros, owenza esi sigqibo: “Nkosi, sosuka siye kubani na? Nguwe onamazwi obomi obungunaphakade.” (Yohane 6:52, 60, 66-68) Zenzele ucwangciso oluhle lokufundisisa iLizwi likaYehova ukuze ukholo lwakho luhlale lomelele, lunjengekhaka elikhulu, lukwazi “ukuzicima zonke iintolo ezinomlilo zakhe ongendawo.” (Efese 6:16) Hlala ukhuthele kubulungiseleli bamaKristu, ubonakalisa uthando ngokwabelana nabanye ngesigidimi soBukumkani. Mihla le, camngca unoxabiso ngendlela akusikelele ngayo uYehova. Yiba nombulelo ngokuba uyazi inyaniso. Ukwenza zonke ezi zinto ulandela ucwangciso oluhle lwamaKristu kuya kukunceda wonwabe, unyamezele yaye uhlale ungenamathandabuzo.—INdumiso 40:4; Filipi 3:15, 16; Hebhere 6:10-12.
Ukulandela Ulwalathiso LukaYehova Emtshatweni
10. Kutheni kubaluleke ngokukodwa ukulufuna kuYehova ukhokelo kumtshato wamaKristu?
10 Xa walungiselela ukuba indoda nomfazi bahlale kunye njengesibini esitshatileyo, injongo kaYehova yayingekokuzalisa umhlaba kakuhle nje kuphela kodwa kwanokuze bonwabe ngakumbi. Noko ke, isono nokungafezeki kubangele iingxaki ezinzulu kulwalamano lwentsapho. NamaKristu ayazifumana ezi ngxaki, ekubeni nawo engafezekanga yaye exinezelekile kubomi banamhlanje. Sekunjalo, ngokukholosa ngoYehova nangeLizwi lakhe, amaKristu anokuphumelela emitshatweni yawo nasekukhuliseni abantwana bawo. Uqheliselo nehambo yehlabathi azinandawo kumtshato wamaKristu. ILizwi likaThixo liyasiluleka: “Umtshato mawubekeke ngeendlela zonke, nesilili masingadyojwa; ke abenza umbulo nabakrexezi, uThixo uya kubagweba.”—Hebhere 13:4.
11. Xa kuconjululwa ingxaki yomtshato, yintoni efanele iqondwe ngawo omabini amaqabane?
11 Kumtshato ovisisaniswe neziluleko zeBhayibhile kulawula uthando, uzinikelo nonqabiseko. Indoda nomfazi bayawuqonda yaye bayawuhlonela umgaqo wobuntloko. Xa kuvela iingxaki, ngokufuthi zibangelwa kukutyeshelwa kwesiluleko seBhayibhile. Xa kuconjululwa ingxaki engapheliyo, kubalulekile ukuba omabini amaqabane anikele ingqalelo ngokunyanisekileyo kwingxaki ngokwayo aze alwe noonobangela kungekhona iimpawu zayo. Ukuba iingxubusho zakutshanje ziphele kungekho mvisiswano ingako okanye ingekho konke konke, eso sibini sisenokucela uncedo kumveleli onothando ongakhethi cala.
12. (a) Ziziphi iingxaki eziqhelekileyo enikela isiluleko kuzo iBhayibhile? (b) Kutheni kuyimfuneko ukuba amaqabane omabini enze izinto ngendlela kaYehova?
12 Ngaba ingxaki ibandakanya unxibelelwano, ukuhlonelwa kweemvakalelo zelinye iqabane, ukuhlonelwa kobuntloko, okanye indlela ezenziwa ngayo izigqibo? Ngaba inento yokwenza nokukhuliswa kwabantwana, okanye nolungelelwano ngokuphathelele iimfuno ezingokwesini? Okanye ngaba ingxaki luqingqo-mali lwentsapho, ukuzihlaziya, unxulumano, enoba umfazi ufanele aphangele, okanye indawo ekuza kuhlalwa kuyo? Enoba iyintoni na ingxaki, iBhayibhile inikela icebiso elingqalileyo eliluncedo ngemithetho okanye elingangqalanga ngemigaqo. (Mateyu 19:4, 5, 9; 1 Korinte 7:1-40; Efese 5:21-23, 28-33; 6:1-4; Kolose 3:18-21; Tito 2:4, 5; 1 Petros 3:1-7) Xa omabini amaqabane ekuphepha ukufuna izinto ngenkani aze avumele uthando lubonakale ngokupheleleyo emtshatweni wawo, onwaba ngakumbi. Omabini amaqabane omtshato afanele akunqwenele ngokunzulu ukwenza iinguqulelo ezifunekayo, ukuze izinto zenziwe ngendlela kaYehova. “Oliqiqayo ilizwi uya kufumana okulungileyo; okholose ngoYehova, hayi, uyolo lwakhe!”—IMizekeliso 16:20.
Lutsha—Liphulaphuleni ILizwi LikaThixo
13. Kutheni kungekho lula ngolutsha olungamaKristu ukuba lukhule lunokholo olomeleleyo kuYehova nakwiLizwi lakhe?
13 Akulula ngolutsha olungamaKristu ukuba lukhule lomelele elukholweni xa luphila kwihlabathi elingendawo. Esinye isizathu sikukuba “ihlabathi liphela lilele kongendawo,” uSathana uMtyholi. (1 Yohane 5:19) Ulutsha luhlaselwa lolu tshaba lukhohlakeleyo olunokwenza okubi kubonakale kulungile. Isimo sengqondo sokuzingca, iminqweno yekratshi, ukulangazelela izinto ezikukuziphatha okubi nezenkohlakalo, nokusukelwa kokuzonwabisa ngokungekho ngqiqweni—zonke ezi zinto ziyinxalenye yendlela yokucinga esasazekileyo echazwa eBhayibhileni ‘njengomoya osebenzayo kubo abangevayo.’ (Efese 2:1-3) Ngobuqili uSathana uye wawukhuthaza lo “moya” kwiincwadi zesikolo, kwinkoliso yomculo okhoyo, kwezemidlalo, kwanakwezinye iintlobo zokuzonwabisa. Abazali kufuneka bakuphaphele ukuziphelisa iimpembelelo ezinjalo ngokubanceda abantwana babo bakhule bekholose ngoYehova nangeLizwi lakhe.
14. Abaselula ‘banokuzibaleka njani iinkanuko zobutsha’?
14 UPawulos wanikela icebiso elifana neloyise kwisinxulumani sakhe esiselula uTimoti: “Zibaleke iinkanuko zobutsha; phuthuma ke ubulungisa, ukholo, uthando, uxolo nabo bayinqulayo iNkosi ngokwasentliziyweni ehlambulukileyo.” (2 Timoti 2:22) Ngoxa zingekho mbi zonke “iinkanuko zobutsha,” abaselula bafanele ‘bazibaleke’ ngengqiqo yokuba bangazivumeli zibaxakekise gqitha, de zilithabathe phantse lonke ixesha losukelo lobuthixo. Ukwakha izihlunu zomzimba, imidlalo, umculo, ulonwabo, imisetyenzana yokuzonwabisa, nokukhenketha, ngoxa eneneni zingaphosakelanga ezo zinto, zinokuba ngumgibe ukuba zithabatha indawo yokuqala ebomini. Zinxweme ngokupheleleyo kwiincoko ezingenanjongo, kwiimbutho, kumdla ongaqhelekanga kwisini, ukuba livila de ukruquke, nasekukhalazeleni abazali bakho usithi abakuqondi kakuhle.
15. Ziintoni ezinokwenzeka ekhaya ezinokuba negalelo ekubeni abaselula baphile ubomi obumbaxa?
15 Kwanaxa bezihlelele ekhaya, abaselula basenokungena engozini. Ukuba babukela imiboniso kamabonwakude yokuziphatha okubi okanye yogonyamelo, iinkanuko zokwenza izinto ezimbi zinokumila ezingqondweni zabo. (Yakobi 1:14, 15) IBhayibhile iluleka ngelithi: “Bathandi bakaYehova, kuthiyeni okubi.” (INdumiso 97:10; 115:11) UYehova uyazi xa ubani ezama ukuphila ubomi obumbaxa. (IMizekeliso 15:3) Lutsha olungamaKristu, khangelani emagumbini enu. Ngaba ezindongeni nixhome imifanekiso yabantu abadumileyo kwimidlalo okanye kumculo wehlabathi, okanye ngaba kukho izinto ezakhayo ezinikhumbuza ngezinto ezilungileyo? (INdumiso 101:3) Kwindawo yakho yempahla, ngaba uneempahla ezindilisekileyo, okanye ngaba ezinye zeempahla zakho zibonakalisa izimbo zokunxiba ezibaxiweyo zeli hlabathi? UMtyholi unokukufaka emgibeni ungaqondanga ukuba uyanikezela kwisilingo sokungcamla izinto ezimbi. Isiluleko sobulumko seBhayibhile sithi: “Yibani nobungcathu, phaphani; ngokuba ummangaleli wenu, uMtyholi, uhamba njengengonyama egqumayo, efuna ubani angamginyayo.”—1 Petros 5:8.
16. Isiluleko seBhayibhile sinokumnceda njani oselula enze bonke abantu abamthandayo babe neqhayiya ngaye?
16 IBhayibhile ithi lulumkele unxulumano lwakho. (1 Korinte 15:33) Amaqabane akho afanele abe ngabantu abamoyikayo uYehova. Musa ukunikezela kwingcinezelo yoontanga. (INdumiso 56:11; IMizekeliso 29:25) Bathobele abazali bakho aboyika uThixo. (IMizekeliso 6:20-22; Efese 6:1-3) Yiya kubadala ukuze ufumane ukhokelo nokhuthazo. (Isaya 32:1, 2) Ingqondo namehlo akho wagcine etsoliswe kwimilinganiselo nakusukelo lokomoya. Khangela amathuba okwenza inkqubela yokomoya nawokuba nenxaxheba kwizinto ezenzekayo ebandleni. Funda ubuchule bokwenza izinto ngezandla zakho. Hlala womelele yaye uphilile ngokomoya, xa usenjenjalo uya kuzingqina ungumntu ngenene—ungumntu okufanelekeleyo ukuba kwihlabathi elitsha likaYehova! UBawo wethu wasezulwini uya kuba neqhayiya ngawe, abazali bakho basemhlabeni baya kuba nebhongo ngawe, yaye uya kuba lukhuthazo kubazalwana noodade abangamaKristu. Yeyona nto ibalulekileyo leyo!—IMizekeliso 4:1, 2, 7, 8.
17. Ziziphi iingenelo ezifunyanwa ngabo bakholose ngoYehova nangeLizwi lakhe?
17 Ngamazwi abumbongorha umdumisi waphefumlelwa ukuba abhale athi: “Abahamba ngokugqibeleleyo [uYehova] akabavimbi nto ilungileyo. Yehova wemikhosi, hayi, uyolo lomntu okholose ngawe!” (INdumiso 84:11, 12) Ewe, bonke abakholose ngoYehova nangeLizwi lakhe, iBhayibhile, baya kufumana ulonwabo nempumelelo, kungekhona ukuphoxeka nokatyo.—2 Timoti 3:14, 16, 17.
Ubuya Kuphendula Uthini?
◻ Kutheni amaKristu engafanele akholose ‘ngobulumko beli hlabathi’?
◻ Kufanele kwenziwe ntoni xa ubani enamathandabuzo?
◻ Ukwenza izinto ngendlela kaYehova kunceda njani ekuziseni impumelelo nolonwabo emtshatweni?
◻ IBhayibhile ilunceda njani ulutsha ‘luzibaleke iinkanuko zobutsha’?
[Umfanekiso okwiphepha 23]
AmaKristu abhenela kuYehova nakwiLizwi lakhe, ngoxa ebutyeshela njengobubudenge “ubulumko beli hlabathi”
[Umfanekiso okwiphepha 25]
Iintsapho ezikholose ngoYehova nangeLizwi lakhe ziyaphumelela yaye zonwabile