Musa Ukuvumela Amathandabuzo Atshabalalise Ukholo Lwakho

Ngenye imini ucinga ukuba ungumqabaqaba. Ngosuku olulandelayo uyagula. Ngesiquphe, uphelelwa ngamandla. Intloko yakho iba buhlungu yaye umzimba wakho uyagcuma ziintlungu. Kwenzeke ntoni? Iintsholongwane eziyingozi zingene kwinkqubo yomzimba wakho yokulwa izifo yaye zihlasela amalungu abalulekileyo. Ukuba azinyangwa, ezi ntsholongwane zihlaselayo zinokudodobalisa impilo yakho ubomi bakho bonke—zide zikubulale.

KAKADE ke, ukuba akukho mpilweni xa uhlaselwa sisifo esithile, uba sengozini ngakumbi. Umbhali ngezonyango uPeter Wingate uthi, ukuba ngokomzekelo, umzimba wakho ucekeceke ngenxa yokungondleki, amandla akho okuxhathisa izifo “aba phantsi kakhulu kangangokuba izifo ezingeyongozi ziba yinto exhomis’ amehlo.”

Ekubeni oku kunjalo, ngubani onokukhetha ukuhlala engondlekanga? Kusenokwenzeka ukuba wenza konke okusemandleni akho ukuba utye ngokufanelekileyo ukuze uhlale usempilweni. Kwakhona kusenokwenzeka ukuba wenza konke okusemandleni akho ukuba ungasulelwa ziintsholongwane. Noko ke, ngaba wenza okufanayo xa kusiziwa kumbandela wokuhlala ‘uphilile elukholweni’? (Tito 2:2) Ngokomzekelo, ngaba uyilumkele ingozi echuliweyo yokukwenza ube namathandabuzo? Anokungena lula engqondweni nasentliziyweni yakho, alwenze buthathaka ukholo lwakho nolwalamano lwakho noYehova. Bambi abantu abayiboni le ngozi. Bazenza amaxhoba amathandabuzo ngokuzilambisa ngokomoya. Ngaba kungenzeka ukuba nawe wenza okufanayo?

Amathandabuzo—Ngaba Asoloko Eyingozi?

Kakade ke, asingawo onke amathandabuzo ayingozi. Maxa wambi, kufuneka ungayamkeli zisuka nje into de ube uqinisekile ngezibakala. Izibongozo zonqulo zokuba ufanele ukholelwe uze ungathandabuzi nanye into ziyingozi yaye zibubuqhophololo. Liyinyaniso elokuba iBhayibhile ithi uthando “lukholelwa izinto zonke.” (1 Korinte 13:7) UmKristu onothando ukulungele ukuthemba abo baye bazingqina bethembekile ngaphambili. Kodwa, iLizwi likaThixo liyasilumkisa ngokuphathelele ‘ukukholwa ngamazwi onke.’ (IMizekeliso 14:15) Maxa wambi indlela ubani ebeziphethe ngayo ngaphambili ibangela ukuba athandubuzeke. IBhayibhile ilumkisa ngelithi: “Nangona elenza libe mnandi ilizwi lakhe [umkhohlisi], musa ukumkholelwa.”—IMizekeliso 26:24, 25.

Umpostile uYohane ukwalumkisa amaKristu nxamnye nokusuka nje akholelwe izinto zonke. Ubhala enjenje: “Musani ukuwakholelwa onke amazwi aphefumlelweyo.” Kunoko, “wavavanyeni amazwi aphefumlelweyo ukuze nibone enoba aphuma kuThixo kusini na.” (1 Yohane 4:1) “Amazwi,” imfundiso okanye ingcamango, isenokubonakala iphuma kuThixo. Kodwa ngaba ngokwenene iphuma kuye? Ukuthandabuza okanye ukungakholelwa zisuka nje, kunokukukhusela ngokwenene kuba, njengoko umpostile uYohane esitsho, “kungene abakhohlisi abaninzi ehlabathini.”—2 Yohane 7.

Amathandabuzo Angenasihlahla

Ewe, ukuhlolisisa ngenyameko nangentobeko izibakala ukuze sifumane inyaniso kusoloko kuyimfuneko. Noko ke, oku akufani nokuvumela amathandabuzo angenasihlahla, onakalisayo ukuba akhule ezingqondweni nasezintliziyweni zethu—amathandabuzo anokuzenza buthathaka iinkolelo zethu eziqinileyo nolwalamano lwethu. La mathandabuzo achazwa “njengokuhexa kwinkolo yakho okanye ingcamango esoloko iphazamisa ukwenza kwakho izigqibo.” Ngaba usayikhumbula indlela uSathana awawatyala ngayo amathandabuzo angoYehova engqondweni kaEva? Wabuza: “Utshilo ngokwenene na uThixo ukuba nize ningadli kuyo yonke imithi yomyezo?” (Genesis 3:1) Ukuthandabuza okwashiywa nguloo mbuzo uvakala ungeyongozi kwaphazamisa ukwenza kwakhe isigqibo. Le yindlela eqhelekileyo uSathana ayisebenzisayo. Ngokufanayo nomntu obhala ileta ezaliswe yintlebendwane, lichule ekusebenziseni amazwi akwekwayo, izinto ezigqwethekileyo nezibubuxoki. USathana uphelise ulwalamano olunyanisekileyo nelokuthembana phakathi kwabantu abaninzi esebenzisa amathandabuzo achuliweyo atyalwe ngendlela efanayo.—Galati 5:7-9.

Umfundi uYakobi wawuqonda ngokucacileyo umonakalo owenziwa ngamathandabuzo alolu hlobo. Ubhala ngelungelo elikhethekileyo esinalo lokuthetha noThixo ngokukhululekileyo ukuze asincede ngexesha lobunzima. Kodwa, uYakobi usilumkisa ukuba, xa sithandaza kuThixo, sifanele ‘siqhubeke sicela ngokholo, singathandabuzi konke konke.’ Amathandabuzo kulwalamano lwethu noThixo asenza ‘sifane neliza lolwandle eliqhutywa livuthuzwa ngumoya.’ Siye sifane ‘nomntu othingazayo, ongazinzanga kuzo zonke iindlela zakhe.’ (Yakobi 1:6, 8) Siqalisa ukungaqiniseki ngeenkolelo zethu size sishiyeke sithingaza. Emva koko, njengoko kwenzekayo kuEva, siyachanabeka kuzo zonke iimfundiso neengcamango zobudemon.

Ukulondoloza Impilo Entle Yokomoya

Noko ke, ngaba sinako ukuzikhusela kula mathandabuzo onzakalisayo? Impendulo ilula gqitha: ngokuzikhaba ngaw’ omane iingcamango ezenzakalisayo zikaSathana nangokuzenza sifumaneke kuwo onke amalungiselelo kaThixo okusenza ‘siqine elukholweni.’—1 Petros 5:8-10.

Eyona nto ingundoqo kukuzondla ngokomoya. Umbhali uWingate okhankanywe ngaphambilana uthi: “Nokuba umzimba uphumle usafuna ukubonelelwa ngokuqhubekayo ngamandla ukuze inkqubo yemichiza nokusebenza kwamalungu abalulekileyo kuqhubeke; kwaye izicwili ezininzi zifuna ukuhlaziywa ngokuqhubekayo.” Kunjalo ke nangempilo yethu yokomoya. Xa singazondli ngokuqhubekayo ngokomoya, ukholo lwethu, njengomzimba ovinjwe ukutya, ngokuthe ngcembe luba buthathaka luze ekugqibeleni lufe. UYesu Kristu wakugxininisa oku xa wathi: “Akaphili ngasonka sodwa umntu, uphila ngamazwi onke aphuma emlonyeni kaYehova.”—Mateyu 4:4.

Khawucingisise ngoku. Ekuqaleni salwakha njani ukholo oluqinileyo? Umpostile uPawulos uyabhala: “Ukholo lulandela oko kuviweyo.” (Roma 10:17) Uthetha ukuba salwakha ukholo nentembelo yethu kuYehova, kwizithembiso zakhe kwakunye nentlangano yakhe ngokuzondla ngeLizwi likaThixo. Kakade ke, asizange sisuke nje sikholelwe yonke into esiyivayo. Senza oko abantu abahlala kwisixeko saseBhereya bakwenzayo. ‘Sazincina ngenyameko iZibhalo mihla le mayela nokuba zinjalo kusini na ezo zinto.’ (IZenzo 17:11) ‘Sangqina ngokwethu ukulunga nokwamkeleka nokugqibelela kokuthanda kukaThixo’ saza saqiniseka ukuba oko sasikuva kwakuyinyaniso. (Roma 12:2; 1 Tesalonika 5:21) Ukususela ngoko, siye saluqinisa ukholo lwethu njengoko sibona ngokucace ngakumbi ukuba iLizwi likaThixo nezithembiso zakhe azize zisilele.—Yoshuwa 23:14; Isaya 55:10,11.

Kuphephe Ukuzilambisa Ngokomoya

Ngoku ucelomngeni kukugcina ukholo lwethu size sikuphephe ukuzithandabuza izinto esizikholelwayo nto leyo enokuyenza buthathaka intembelo yethu kuYehova nakwintlangano yakhe. Ukuze sikwazi ukukwenza oku sifanele siqhubeke sihlola iZibhalo imihla ngemihla. Umpostile uPawulos ulumkisa ngelithi “kuya kubakho ixesha laxa abathile [ababonakala benokholo ekuqaleni] beya kuphambuka elukholweni, benikela ingqalelo kumazwi aphefumlelweyo alahlekisayo nakwiimfundiso zeedemon.” (1 Timoti 4:1) La mazwi neemfundiso ezilahlekisayo zibangela amathandabuzo ezingqondweni zabathile zize zibashenxise kuThixo. Yintoni enokusikhusela? Kukuqhubeka ‘sisondliwa ngamazwi okholo nawemfundiso entle [esiye] sayilandela ngokusondeleyo.’—1 Timoti 4:6.

Noko ke, ngelishwa abathile namhlanje bakhethe ‘ukungondliwa ngamazwi okholo’—nakubeni ukutya okunjalo kufumaneka ngesisa. Njengoko omnye wababhali bencwadi yeMizekeliso ebonisa, kunokwenzeka singqongwe kukutya kokomoya okulungileyo, isidlo sokomoya esilungiselelweyo, ngokungathi kunjalo, intabalala yokudla kokomoya, kodwa singakutyi size sikwetyise oko kutya.—IMizekeliso 19:24; 26:15.

Oku kuyingozi. Umbhali uWingate uthi: “Ngokukhawuleza usakuba umzimba uqalisile ukusebenzisa iiprotini zawo impilo yawo iqalisa ukuwohloka.” Xa ungatyi, umzimba wakho uqalisa ukusebenzisa amafutha agcinwe kwiindawo ezahlukahlukeneyo zomzimba. Xa aba vimba beqongqothiwe, umzimba uqalisa ukusebenzisa iiprotini ezisetyenziselwa ukuba ukuhlaziywa kwezicwili kuqhubeke. Amalungu abalulekileyo aqalisa ukungasebenzi ngendlela yawo. Ize iwohloke impilo yakho ngokukhawuleza.

Oku koko kwenzekayo kwimpilo yokomoya yabathile kwibandla lamaKristu lamandulo. Bazama ukuphila ngokuthabatha koovimba babo bokomoya. Kusenokwenzeka ukuba, abazange balunanze ufundisiso lobuqu, baza baba buthathaka ngokomoya. (Hebhere 5:12) Umpostile uPawulos wayicacisa ingozi yokwenza oku xa wabhalela amaKristu angamaHebhere esithi: “Simele sinikele ingqalelo engaphezu kweqhelekileyo kwizinto esizivileyo, ukuze singakhukuliseki.” Wayeyazi indlela ekulula ngayo ukukhukulisekela kwimikhwa emibi ukuba “siye asalukhathalela usindiso olungaka ukuba lukhulu.”—Hebhere 2:1, 3.

Okubangel’ umdla kukuba, umntu ongondlekanga akasoloko ebonakala egula okanye ebhityile. Ngokufanayo, kusenokungabonakali ngokukhawuleza ukuba ubani ulambile ngokomoya. Usenokubonakala njengomntu owondlekileyo ngokomoya nangona engondliwa ngokufanelekileyo—kodwa okwexeshana! Ngokuqinisekileyo uya kuba buthathaka ngokomoya, ube sengozini yamathandabuzo angenasihlahla, uze ungakwazi ukumelana nomlo onzima wokholo. (Yuda 3) Uwazi ngokwakho—nokuba akakho omnye umntu owaziyo—umlinganiselo ozondla ngawo ngokomoya.

Ngoko ke, qhubeka usenza ufundisiso lobuqu. Kulwe ngamandla ukuba namathandabuzo. Ukukugatya oko kusenokubonakala kuyintsholongwane engenamsebenzi, ukungathabathi manyathelo ngamathandabuzo athe gqolo, kusenokuba nemiphumo emibi. (2 Korinte 11:3) ‘Ngaba ngokwenene siphila kwimihla yokugqibela? Ngaba unokuyikholelwa yonke into ethethwa yiBhayibhile? Ngaba ngokwenene le yintlangano kaYehova?’ USathana angakuvuyela ukutyala amathandabuzo afana nala engqondweni yakho. Ungavumeli isimo sengqondo sokungakhathali ngezinto zokomoya sikushiye ulixhoba elilula leemfundiso ezikhohlisayo. (Kolose 2:4-7) Landela icebiso elanikelwa kuTimoti. Yiba ngumfundi olungileyo ‘wemibhalo engcwele’ ukuze ‘ume ezintweni owazifundayo waza weyiselwa ekuzikholelweni.’—2 Timoti 3:13-15.

Usenokufuna uncedo ukuze ukwazi ukukwenza oku. Umbhali ocatshulwe ngaphambilana uhlabela mgama athi: “Xa ulambe kakhulu amalungu okucola ukutya anokwenzakaliswa kukungabikho kweevithamini nezinye izinto eziyimfuneko aze angakwazi ukwamkela ukutya okufikayo. Kangangethuba elithile abantu abakule meko kusenokufuneka batye ukutya okungafuni kucolwa kangako.” Kufuneka inyameko ekhethekileyo ukuze kulungiswe imiphumo yokungawondli umzimba. Ngokufanayo, umntu olutyeshela ngokupheleleyo ufundisiso lobuqu lweBhayibhile kufuneka ancedwe aze omelezwe ukuze afumane umdla wokutya ukutya kokomoya. Ukuba kunjalo ngawe, funa olo ncedo uze wamkele ngokufudumeleyo naziphi na iinzame ezenziwayo zokwakha impilo namandla akho okomoya.—Yakobi 5:14, 15.

‘Ungaxengaxengiswa Kukuswela Ukholo’

Xa behlolisisa iimeko zikasolusapho uAbraham, abanye banokuvakalelwa kukuba uAbraham wayenezizathu ezivakalayo zokuthandabuza. Kunokubonakala kusengqiqweni ukugqiba kwelokuba ‘lalisele liphelile ithemba lokuba angaze abe nguyise weentlanga’—nangona uThixo wayethembise njalo. Ngoba? Eneneni, ngokwembono yabantu, izinto zazingathembisi. Ingxelo yeBhayibhile ithi: ‘Wawuqwalasela umzimba wakhe, owawusele ufile kwakunye nesibeleko sikaSara esasifile.’ Sekunjalo, ngenkalipho akazange avumele amathandabuzo ngezithembiso zikaThixo ukuba akhule engqondweni nasentliziyweni yakhe. Umpostile uPawulos uyabhala: ‘Akazange abe buthathaka elukholweni,’ okanye “axengaxengiswe kukuswela ukholo.” UAbraham wahlala “eyiseke ngokupheleleyo ukuba oko akuthembisileyo [uThixo] wayekwazi nokukwenza.” (Roma 4:18-21) Wayakhe ulwalamano oluqinileyo, lobuqu noluthembekileyo noYehova kangangeminyaka emininzi. Wawakhaba ngaw’ omane nawaphi na amathandabuzo awayenokudodobalisa olo lwalamano.

Unokwenza okufanayo ukuba ‘ubambelela emazwini aphilileyo’—ukuba uyazondla kakuhle ngokomoya. (2 Timoti 1:13) Yijonge njengenzulu ingozi yokuba namathandabuzo. USathana uxakeke koko kunokubizwa ngokuba luhlaselo lokomoya esebenzisa izinto ezincinane kakhulu. Ukuba akuzondli ngokomoya ngofundisiso lobuqu lweBhayibhile, ngokuya kwiintlanganiso zamaKristu, uzenza ixhoba lohlaselo olulolo hlobo. Kusebenzise ngokufanelekileyo ukutya kokomoya okufumaneka ngesisa nangexesha elililo okulungiselelwa “likhoboka elithembekileyo neliyingqondi.” (Mateyu 24:45) Qhubeka ‘uhambisana namazwi aphilileyo’ uze uhlale ‘uphilile elukholweni.’ (1 Timoti 6:3; Tito 2:2) Ungavumeli amathandabuzo atshabalalise ukholo lwakho.

[Imifanekiso ekwiphepha 21]

Uzondla futhi kangakanani ngokomoya?