UThixo Uyakukhathalela

UMARY, ibhinqa elingumKristu elidlule kuhle kwiminyaka engama-40, uye wabandezeleka gqitha ebomini bakhe. Ukukrexeza komyeni wakhe kuye kwakhokelela kuqhawulo-mtshato kwiminyaka engaphezu kweshumi eyadlulayo. Emva koko, uMary watsala nzima ezama ukufeza indima yakhe njengomzali ongenaqabane lomtshato kubantwana bakhe abane. Kodwa useyedwa, yaye maxa wambi kubonakala ukuba uye abhuqwe kanobom bubulolo. UMary uyazibuza, ‘Ngaba oku kuthetha ukuba uThixo akandikhathalele okanye abantwana bam abangenayise?’

Enoba ukhe wahlangabezana nobunzima obunjalo okanye akunjalo, ngokuqinisekileyo unokumvela uMary kwintlungu akuyo. Sonke siye sanyamezela iimeko ezilingayo, yaye sisenokuba siye sazibuza ngexesha nangendlela uYehova aza kusinceda ngayo. Amanye ala mava abangelwa kukunamathela kwethu kwimithetho kaThixo. (Mateyu 10:16-18; IZenzo 5:29) Amanye abangelwa kukuba singabantu abangafezekanga abaphila kwihlabathi elilawulwa nguSathana. (1 Yohane 5:19) Umpostile uPawulos wabhala: “Yonke indalo iyancwina, inenimba kunye, unangoku.”—Roma 8:22.

Noko ke, isibakala sokuba ujamelene nezilingo ezinzima asithethi kuthi uYehova ukulahlile okanye akanamdla kwimpilontle yakho. Unokuqiniseka njani ngako oku? Yintoni ebonisa ukuba uThixo ukukhathalele?

Umzekelo Wamandulo

IBhayibhile isinika ubungqina obucacileyo bokuba uYehova uyabakhathalela abantu ngabanye. Khawucinge ngoDavide. UYehova wayenomdla wobuqu kulo malusi uselula, emjonga ‘njengendoda ekholekileyo entliziyweni yakhe.’ (1 Samuweli 13:14, NW) Kamva, xa uDavide walawula njengokumkani, uYehova wamthembisa oku: ‘Ndoba nawe kuko konke ohamba kuko.’—2 Samuweli 7:9.

Ngaba oku kuthetha ukuba uDavide wayephila ubomi ‘obungenazingxaki,’ obungenazinzima? Nakanye, uDavide wajamelana nezilingo ezinzima ngaphambi kokuba alawule nasebudeni bolawulo lwakhe. Kangangeminyaka eliqela ngaphambi kokuba abe ngukumkani, wayezingelwa ngokuzingisileyo nguKumkani uSawule owayenxanelwe igazi. Ebudeni beli xesha lobomi bakhe, uDavide wabhala: “Umphefumlo wam uphakathi kweengonyama . . . oonyana babantu abamazinyo aziintshuntshe neentolo.”—INdumiso 57:4.

Sekunjalo, kubo bonke obu bunzima uDavide wayeyisekile kukuba uYehova umkhathalele ngokobuqu. Kumthandazo awayewubhekisa kuYehova wathi: “Ukuphalaphala kwam ukubhalile wena.” Ewe, kuDavide yayingathi uYehova wayeyibhale phantsi yonke imeko yakhe. Wandula ke uDavide wongezelela esithi: “Yitha iinyembezi zam entsubeni yakho; azisencwadini yakho na?”a (INdumiso 56:8) Ngalo mzekeliso, uDavide wayevakalisa intembelo yokuba uYehova wayesazi kungekuphela nje imeko kodwa kwanendlela eyayimkhathaza ngayo.

Ngasekupheleni kobomi bakhe, uDavide wayenokubhala oku ngokusuka kumava obuqu: “Amanyathela omfo aqiniswa nguYehova, ayithande indlela yakhe. Ewile, akayi kuqungquluza, ngokuba nguYehova umxhasi wesandla sakhe.” (INdumiso 37:23, 24) Nawe unokuba nentembelo yokuba kwanaxa izilingo zakho zizingisile yaye ziqhubeka, uYehova uyakubona yaye uyakuxabisa ukunyamezela kwakho. UPawulos wabhala: “Akanantswela-bulungisa uThixo, ukude awulibale umsebenzi wenu, nomzamo wothando enalubonakalalisa kulo igama lakhe, nabalungiselelayo nje abangcwele, nisamana nibalungiselela.”—Hebhere 6:10.

Ukongezelela, uYehova unokukunceda ngokukomeleza ukuze unyamezele nawuphi na umqobo osendleleni yakho. UDavide wabhala: “Buninzi ububi obulihlelayo ilungisa, ke uYehova ulihlangula kubo bonke.” (INdumiso 34:19) Kakade ke, iBhayibhile isixelela ukuba amehlo kaYehova “asingasinga ehlabathini lonke, ukuba azomelezele abantliziyo zipheleleyo kuye.”—2 Kronike 16:9.

UYehova Ukutsalile

Ubungqina obongezelelekileyo benkathalo yobuqu kaYehova bunokufunyanwa kumazwi kaYesu. Wathi: “Akukho namnye unako ukuza kum, engathanga uBawo owandithumayo amtsale.” (Yohane 6:44) Ewe, uYehova uyabanceda abantu ngabanye ukuze bangenelwe kwidini likaKristu. Njani? Ubukhulu becala, ubanceda ngomsebenzi wokushumayela ngoBukumkani. Kuyinyaniso ukuba lo msebenzi uba “bubungqina kuzo zonke iintlanga,” kodwa ufikelela kubantu ngabanye. Isibakala sokuba uphulaphula yaye usabela kwisigidimi seendaba ezilungileyo sibubungqina bokuba uYehova unenkxalabo yobuqu ngawe.—Mateyu 24:14.

Ngomoya wakhe oyingcwele, uYehova utsalela abantu kuNyana wakhe nakwithemba lobomi obungenasiphelo. Oku kwenza ngamnye akwazi ukufunda aze asebenzise iinyaniso zokomoya phezu kwako nje ukusikelwa umda nokungafezeki esikuzuz’ ilifa. Ngokwenene, ubani akanakuziqonda iinjongo zikaThixo ngaphandle koncedo lomoya kaThixo. (1 Korinte 2:11, 12) Kunjengokuba uPawulos wabhalela abaseTesalonika esithi, “ukholo alubantwini bonke.” (2 Tesalonika 3:2) UYehova uwunika abo bavumayo ukutsalwa nguye kuphela umoya wakhe.

UYehova ubatsala abantu kuba ebathanda njengabantu ngabanye yaye efuna ukuba bafumane usindiso. Obunjani bona ubungqina obubambekayo benkathalo yobuqu kaYehova! UYesu wathi: “Asikukuthanda kukaYihlo osemazulwini, ukuba kulahleke namnye waba bancinane.” (Mateyu 18:14) Ewe, emehlweni kaThixo umntu ngamnye ubalulekile. Kungoko uPawulos wayenokubhala athi: ‘Uya kuvuza ulowo nalowo ngokwemisebenzi yakhe.’ (Roma 2:6) Kwakhona umpostile uPetros wathi: “UThixo akamkhethi wabuso bamntu; kwiintlanga zonke, lowo [umntu ngamnye] umoyikayo, asebenze ubulungisa, wamkelekile kuye.”—IZenzo 10:34, 35.

Imimangaliso KaYesu

Umdla wobuqu uThixo anawo ebantwini wabonakaliswa ngendlela echukumisayo kwimimangaliso eyenziwa nguNyana wakhe, uYesu. Oko kuphilisa kwakukhatshwa yimvakalelo enzulu. (Marko 1:40, 41) Ekubeni uYesu ‘engenakwenza nto ngokwakhe, engathanga abone uYise eyenza,’ imfesane awayenayo ibonisa inkxalabo kaYehova enothando ngomkhonzi wakhe ngamnye.—Yohane 5:19.

Khawuqwalasele ingxelo engommangaliso owenziwa nguYesu, ebhalwe kuMarko 7:31-37. Apha uYesu waphilisa indoda eyayisisithulu neyayilithintitha. IBhayibhile iyabalisa: “Wasishenxisa esihlweleni sasodwa.” Wandula ke, “wakhangela ezulwini, wancwina, wathi kuso, Efata, oko kukuthi, Vuleka.”

Kwakutheni ukuze uYesu ayishenxise le ndoda esihlweleni? Kaloku, umntu osisithulu nongakwaziyo kakuhle ukuthetha udla ngokuziva engonwabanga phakathi kwababukeli. UYesu usenokuba wakuphawula ukungakhululeki kwale ndoda, ibe kungoko wakhetha ukuyiphilisa ngasese. Omnye umphengululi weBhayibhile uthi: “Lilonke eli bali lisibonisa ngokucace gca ukuba uYesu akazange ayijonge njengomguli nje loo ndoda; wayijonga njengomntu ngamnye. Le ndoda yayinentswelo ekhethekileyo nengxaki ekhethekileyo, yaye enolwazelelo lothantamiso uYesu wayiphatha ngendlela engayi kuphazamisa iimvakalelo zayo nangendlela eyayinokuyiqonda.”

Le ngxelo ibonisa ukuba uYesu wayenenkxalabo yobuqu ngabantu. Unokuqiniseka ukuba unomdla ofanayo nakuwe. Kuyinyaniso ukuba ukufa kwakhe okulidini kwakuyimbonakaliso yothando analo ngalo lonke ihlabathi labantu abanokuhlawuleleka. Kodwa, unokusisebenzisa kuwe eso senzo, njengoko uPawulos wenzayo xa wabhala esithi: “UNyana kaThixo . . . wandithanda waza wazinikela ngenxa yam.” (Galati 2:20, akekeliswe sithi.) Kwakhona ekubeni uYesu wathi ‘lowo umbonileyo yena umbonile uYise,’ sinokuqiniseka ukuba uYehova unomdla kumkhonzi ngamnye wakhe.—Yohane 14:9.

UYehova Uba Ngumvuzi

Ukwamkela ulwazi lukaThixo kubandakanya ukwazi zonke iinkcukacha zobuntu bakhe njengoko zityhilwe eBhayibhileni. Igama elithi Yehova lithetha “Obangela Kubekho,” libonisa ukuba uYehova unokuba yiyo nayiphi na into afuna ukuba yiyo ukuze enze ukuthanda kwakhe. Ukutyhubela imbali, uye waphumeza iindima ezahlukeneyo, eziquka ukuba nguMdali, uBawo, iNkosi enguMongami, uMalusi, uYehova wemikhosi, uMphulaphuli wemithandazo, uMgwebi, uMyaleli Ozukileyo noMkhululi.b

Ukuze siyazi ngokupheleleyo intsingiselo yegama likaThixo, kwakhona sifanele simazi uYehova njengoMvuzi. UPawulos wabhala: “Lungekho ukholo, akunakubakho ukumkholisa kakuhle; kuba lowo uzayo kuThixo, umelwe kukukholwa ukuba ukho, nokuba ungumvuzi wabo bamfunayo.”—Hebhere 11:6.

UYehova uthembise ubomi obungunaphakade kumhlaba oyiparadisi kwabo bakhetha ukumkhonza ngentliziyo iphela namhlanje. Asikokuzingca ukujonga phambili ekuzalisekisweni kweso sithembiso sizukileyo, ingekuko nokuzigwagwisa ukuzibona sele uphila apho. UMoses “wayekhangele ukwamkela umvuzo.” (Hebhere 11:26) UPawulos ngokufanayo wayelangazelela ukuzaliseka kwesithembiso sikaThixo kumaKristu athanjisiweyo anyanisekileyo. Wabhala: “Ndiphuthume ngokoxunele umvuzo wobizo lwaphezulu lukaThixo kuKristu Yesu.”—Filipi 3:14.

Nawe usenokujonga phambili kumvuzo uYehova awuthembise abo banyamezelayo. Ukulangazelela loo mvuzo kuyinto ebalulekileyo ekwazini kwakho uThixo nasekunyamezeleni enkonzweni yakhe. Ngoko camngca imihla ngemihla ngeentsikelelo uYehova akugcinele zona. UMary, okhankanywe ekuqaleni, wenze umgudu okhethekileyo wokwenza oku. Uthi: “Kutshanje, ndiye ndayamkela okokuqala ebomini bam into yokuba idini likaYesu lentlawulelo liyasebenza kum. Ndiqalisa ukuvakalelwa kukuba uYehova undikhathalele njengomntu. BendingumKristu kangangeminyaka engaphezu kwama-20, kodwa ndiqale ukuyikholelwa ngokwenene kutshanje le nto.”

Ngokufundisisa nangokucamngca ngokusuk’ entliziyweni ngeBhayibhile, uMary, kunye nabanye abazizigidi, ufunda ukuba uYehova uyabakhathalela abantu bakhe kungekuphela njengeqela kodwa nanjengabantu ngabanye. Umpostile uPetros wayeyisekile koku kangangokuba wabhala: “Lonke ixhala lenu liphoseni phezu kwakhe [uThixo], ngokuba yena enikhathalele.” (1 Petros 5:7) Ewe, uThixo uyakukhathalela!

[Imibhalo esemazantsi]

[Ibhokisi ekwiphepha 6]

Uvuko—ubungqina Bokuba Uthixo Uyakhathala

UBUNGQINA obeyisayo bomdla anawo uThixo kumntu ngamnye bufumaneka eBhayibhileni kuYohane 5:28, 29: “Kuza ilixa abaya kuthi ngalo bonke abasemangcwabeni balive ilizwi [likaYesu]; baphume ke.”

Okubangel’ umdla kukuba apha kusetyenziswe igama lesiGrike elithi mne·meiʹon (ingcwaba lenkumbulo) endaweni yelithi taʹphos (ingcwaba). Igama elithi taʹphos lichaza nje ukungcwaba. Kodwa elithi mne·meiʹon libonisa ukuba iinkcukacha zaloo mntu ufileyo ziyakhunjulwa.

Ngenxa yoko, khawucinge nje ngoko uvuko luya kufuna uYehova uThixo akwenze. Ukuze abuyisele umntu othile ebomini, ufanele azi yonke into ngaloo mntu—kuquka utyekelo aluzuz’ ilifa nenkumbulo epheleleyo. Kungoko kuphela apho aya kuthi loo mntu abuyiselwe ebomini esenguye.

Kakade ke, ngokwembono yabantu oku akunakwenzeka, kodwa “zonke izinto zinako ukwenzeka kuye uThixo.” (Marko 10:27) Unokude aqonde noko kusentliziyweni yomntu. Kwanokuba umntu ebefile kangangeenkulungwane ezininzi, inkumbulo kaThixo ngaye ayisileli; ayibi mfiliba. (Yobhi 14:13-15) Ngaloo ndlela, xa wayekhankanya uAbraham, uIsake noYakobi, nangona babefe kwiinkulungwane ezadlulayo uYesu wayenokutsho ukuba uYehova “akaThixo ke wabafileyo, ungowabaphilileyo; kuba bonke baphile ngaye.” (Akekeliswe sithi.)—Luka 20:38.

Ngaloo ndlela, iinkcukacha ezipheleleyo zamawaka ezigidi abantu abafileyo zikwinkumbulo kaYehova uThixo. Obunjani bona ukumangalisa ubungqina bokuba uThixo uyamkhathalela umntu ngamnye!

[Imifanekiso ekwiphepha 7]

UYesu wayenomdla wobuqu kwabo wayebaphilisa