Ungaphoswa!

UNGAPHOSWA yintoni? YiNdibano YeSithili yamaNgqina kaYehova “Yabathunywa Boxolo Lobuthixo”! Kwiindawo ezininzi le ndibano iya kuqalisa ngomculo nge–9:30 kusasa ngoLwesihlanu. Emva kokuphulaphula udliwano-ndlebe olomeleza ukholo ebudeni bentetho ethi “Ukuphulaphula Abavakalisi Boxolo Abanenzondelelo,” uya kunandipha intetho elukhuthazo ethi “Yintoni UThixo Ayifunayo Kuthi?”

Imbalasane yasemva kwemini ngoLwesihlanu iya kuba yintetho engumxholo elukhuthazo ethi “Indima Yethu Njengabathunywa Boxolo Lobuthixo.” Emva koko kwintetho ethi “Ukunceda Abanye Bafunde Ngezinto Ezifunwa NguThixo” kuya kunikelwa amacebiso ngendlela yokufundisa abasebatsha. Le ntetho iya kulandelwa lungcelele lweentetho olufike ngexesha elililo olunomxholo othi “Yilumkele Imigibe Efihlakeleyo Yokuzonwabisa.” Ucwangciso lwangoLwesihlanu luya kuqukunjelwa ngentetho ethi “Mchase UMtyholi—Yiba Nekhwele” nethi “Ukubambelela Ngokunyaniseka Ekugqibeleleni KweLizwi LikaThixo.”

Ucwangciso lwentsasa yangoMgqibelo luya kugxininisa ukubaluleka komsebenzi wokwenza abafundi kungcelele lweentetho ezintathu nolunomxholo othi “Abathunywa Abashumayela Iindaba Ezilungileyo Zoxolo.” Ucwangciso lwakusasa luya kuqukunjelwa ngentetho ethi “Ukunikela Ngokuchwayita Kwintlangano KaYehova” nethi “Ukufumana Ubomi Noxolo Ngozahlulelo Nobhaptizo,” ekuya kuthi emva kwayo kubekho ithuba lokuba abafundi abatsha babhaptizwe.

Emva kwemini ngoMgqibelo intetho enomxholo othi “Hlolisisa Iingcinga ZikaYehova Ngemibandela” iya kuphendula imibuzo enjengothi ‘Ngaba amaKristu anesabelo kumsebenzi wokwahlula namhlanje?’ nothi ‘Iyintoni imbono yeBhayibhile ngesigwebo sentambo?’ Kwakhona uya kunandipha ungcelele lweentetho ezimbini ezifudumez’ intliziyo phantsi komxholo othi “UThixo Woxolo Ukukhathalele” ibe ngokukodwa intetho yokuqukumbela ethi “Sebenzela Uxolo Lobuthixo Kubomi Bentsapho.”

Ucwangciso lwentsasa yangeCawa luya kuquka ungcelele lweentetho ezintathu olunomxholo othi “Ukufanisa Abathunywa Abafanelekileyo” nentetho ethi “Liphulaphule Uze Ulithobele ILizwi LikaThixo.” Ucwangciso lwakusasa luya kuqukunjelwa ngomdlalo onabadlali abanxibe isinxibo sakudala nesala maxesha oya kubalaselisa isifundo esibalulekileyo esifumaneka kwingxelo yeBhayibhile engoMgwebi uGidiyon.

Kwinxalenye yokugqibela yocwangciso lwendibano lwasemva kwemini ngeCawa, kuya kubakho intetho yesidlangalala, enomxholo othi “Uxolo Lokwenyaniso Ekugqibeleni!—Luvela Kuwuphi Umthombo?” Ekugqibeleni, indibano iya kuqukunjelwa ngentetho ekhuthazayo ethi “Ukutyhalela Phambili Njengabathunywa Boxolo Lobuthixo.”

Yenza amalungiselelo okubakho kwangoku. Ukuze ufumane indawo eya kuqhutyelwa kuyo ekufutshane nekhaya lakho, yiya kwiHolo yoBukumkani yamaNgqina kaYehova yasekuhlaleni okanye ubhalele abapapashi beli phephancwadi.