Oko Kuthethwa Ngabaphengululi Ngeencwadi ZeVangeli
“IZIHLWELE zithi ndingubani na?” (Luka 9:18) UYesu wababuza oko abafundi bakhe kwiminyaka emalunga namawaka amabini eyadlulayo. Lo mbuzo wawudala impikiswano ngelo xesha. Ngoku ubonakala uyidala nangaphezulu, ngokukodwa ngexesha leKrismesi, ekunikelwa ngalo ingqalelo kuYesu. Abaninzi bakholelwa ukuba uYesu wathunyelwa evela ezulwini ukuze ahlangule uluntu. Ngaba ucinga njalo?
Bambi abaphengululi banenye imbono. UMarcus J. Borg, ongunjingalwazi wonqulo nenkcubeko uthi: “Ukugqala uYesu njengalowo wayefundisa ukuba unguNyana kaThixo owayeza kufela izono zehlabathi akuchananga ngokwembali.”
Abanye abaphengululi bathi uYesu wokwenene wayohlukile kulowo sifunda ngaye eBhayibhileni. Bambi bakholelwa kwelokuba zonke iincwadi zeVangeli zabhalwa kwiminyaka engama-40 okanye ngaphezulu emva kokufa kukaYesu yaye ngelo xesha oko uYesu wayekuko ngokwenene kwakusele kufakelelwe. Aba baphengululi bathi ingxaki yayingekokuba ababhali beencwadi zeVangeli babelibele, kodwa yayiyindlela ababechaza ngayo. Emva kokufa kukaYesu abafundi bamjonga ngendlela eyahlukileyo—njengoNyana kaThixo, uMsindisi noMesiya. Bambi bami ngelithi uYesu wayelinyange elalibhadula, umguquli wentlalo. Aba baphengululi bathi leyo yinyaniso yencwadi yevangeli.
Imbono “Yophengululo” NgoYesu
Ukuze bathethelele imbono “yophengululo” lwabo, abahlalutyi babonakala bezimisele ukuhlaba nantoni na ebonisa ukuba uYesu wayenamandla angaphezu kwawemvelo. Ngokomzekelo, bambi bathi ingxelo yokuzalwa kwakhe yintombi enyulu yayifihla ukuba ngumgqakhwe kukaYesu. Abanye abazamkeli iziprofeto zikaYesu zokutshatyalaliswa kweYerusalem, besithi zafakelelwa kwiincwadi zeVangeli emva “kokuzaliseka” kwazo. Bambi bade bathi uYesu wayephilisa izigulo zokuphazamiseka kwengqondo. Ngaba ezo ngcamango uzifumanisa zisengqiqweni okanye azinasihlahla?
Abaphengululi abathile bade bathi abafundi bakaYesu bayila ibali lovuko ukuze unqulo lwabo lungabhangi. Aba baphengululi baqiqa ngelithi, eneneni abalandeli bakaYesu babengenakwenza nto ngaphandle kwakhe, ngoko kwanyanzeleka ukuba iNkosi yabo ivele kwizinto abazibhalayo. Ngamanye amazwi, bubuKristu, kungekhona uKristu, obavuswayo. Ukuba oku kubonakala kuluphengululo lobuxoki, kuthekani ngengcamango yengcali yezakwalizwi uBarbara Thiering yokuba uYesu akazange abulawe konke konke? Ukholelwa ukuba uYesu wasinda xa wayebethelelwa emthini waza watshata kabini yaye waba nguyise wabantwana abathathu.
Zonke ezi ngcamango zimchaza uYesu ngendlela eyamkelwa ngabaphengululi abaninzi: leyo yokuba wayeyindoda esisilumko, umYuda oqhelekileyo, umhlaziyi wentlalo—wayeyiyo nantoni na ngaphandle koNyana kaThixo, oweza ‘kunikela ngomphefumlo wakhe waba yintlawulelo ngenxa yabaninzi.’—Mateyu 20:28.
Mhlawumbi malunga neli xesha lonyaka, usenokuba uye wafunda iindinyana ezithile zeencwadi zeVangeli, ezinjengokuzalwa kukaYesu esitalini. Okanye usenokuba ukhe weva ngento enjalo ecaweni. Ngaba uye wazamkela iingxelo zeencwadi zeVangeli njengezixabisekileyo nonokuzikholelwa? Ngoko ke khawuqwalasele esi siganeko sothusayo. Koko kubizwa ngokuba yiNgqungquthela kaYesu, iqela labaphengululi belihlanganisana kabini ngonyaka ukususela ngowe-1985 ukuze lihlole ukuchana kwamazwi kaYesu. Ngaba ngokwenene uYesu wazithetha izinto ethi iBhayibhile wazithetha? Amalungu aloo ngqungquthela ayevota ngamaso ayimibalabala kwinto nganye awayeyithetha. Amaso abomvu ayethetha ukuba amazwi athile ngokuqinisekileyo ayethethwe nguYesu; amaso apinki ayethetha ukuba kusenokwenzeka ukuba uYesu wawathetha; amaso angwevu ayebonakalisa amathandabuzo; yaye amaso amnyama ayebonisa ukuba ayebubuxoki.
Kusenokukuphazamisa ukuva ukuba iNgqungquthela kaYesu yathi izinto ezingama-82 ekhulwini ekuthiwa zathethwa nguYesu kusenokwenzeka ukuba azizange zithethwe nguye. Kuphela yingcaphulo enye evela kwincwadi yeVangeli kaMarko eyagqalwa njengenokuthenjwa. Incwadi yeVangeli kaLuka kwathiwa izaliswe yinkcazelo engachananga kangangokuba “ayisenakuncedakala.” Yonke incwadi yeVangeli kaYohane yavotelwa ngamaso amnyama abonakalisa ukuba ibubuxoki ngaphandle kwezivakalisi ezintathu, ibe ezo zivakalisi zanikwa amaso angwevu abonakalisa ukuba zazithandatyuzwa.
Ungaphaya Kwezifundiswa
Ngaba uyavumelana naba baphengululi? Ngaba basinika inkcazelo echane ngakumbi ngoYesu kunaleyo ifumaneka eBhayibhileni? Le mibuzo ayingombandela nje wempikiswano yabaphengululi. Ngeli xesha lonyaka, usenokukhumbula ukuba, ngokutsho kweBhayibhile, uThixo wathumela uYesu “ukuze wonk’ ubani oqhelisela ukholo kuye angatshabalali kodwa abe nobomi obungunaphakade.”—Yohane 3:16.
Ukuba uYesu wayelinyange nje elalibhadula esisenokuba asazi nto ingako ngalo, bekuya kuba lilize ‘ukuqhelisela ukholo’ kuye. Kwelinye icala, ukuba inkcazelo yeBhayibhile ngoYesu iyinyaniso, ukusindiswa kwethu ngonaphakade kubandakanyekile. Ngoko ke, kufuneka sazi—ngaba iBhayibhile iqulethe inyaniso ngoYesu?