Intembelo Kwihlabathi Elingafezekanga

“OKULUNGILEYO endikunqwenelayo andikwenzi, kodwa okubi endingakunqweneliyo kuko endikuqheliselayo.” Ngaba oku kunjalo kuwe? Kufanele kukhuthaze ukwazi ukuba umpostile uPawulos wayenengxaki efanayo; kodwa wayeyindoda eyayidume ngokugcina ingqibelelo yobuKristu. Ngaba oku akuphikisani? Kwileta yakhe awayibhalela amaKristu aseRoma, uPawulos wayihlalutya ngolu hlobo le ngxaki: “Ukuba, ngoku, oko ndingakunqweneliyo koko ndikwenzayo, lowo ukusebenzayo ayisendim, kodwa sisono esihleli kum.” Wayebhekisela kwisiphi isono, yaye wasoyisa njani ukuze abe ngumntu wengqibelelo?—Roma 7:19, 20.

Ngaphambilana kwincwadi yakhe, uPawulos wabhala: “Isono sangena ngamntu mnye ehlabathini nokufa ngaso isono, ngaloo ndlela ukufa kwasasazeka kubo bonke abantu ngenxa yokuba bonke bonayo.” Lo “mntu mnye” yayinguAdam. (Roma 5:12, 14) Isono sika-Adam—isono somntu wokuqala, uAdam—singunobangela wokungafezeki kohlanga loluntu nesizathu esiyintloko sokuba ukugcina ingqibelelo kube lucelomngeni lokwenene.

Imbono kaPawulos “ngesono semvelo,” njengoko siqhele ukubizwa njalo, ayamkelwa luninzi lwabantu namhlanje ngenxa yokuba ingxelo yeBhayibhile engendalo ikhatywa ngaw’ omane ngabefundisi abathanda iingcamango zendaleko. Omnye umphengululi wezi mini ethetha ngeyabaseRoma 5:12-14, uthi: “Abaphengululi baye basityeshela sonke eso sicatshulwa.” Sekunjalo kwiminyaka elikhulu eyadlulayo, abaphengululi beBhayibhile bebesoloko becacisa ukuba “xa uAdam wonayo . . . wangcoliswa sisono yaye ngenxa yomphumo waso wosulela yonke inzala yakhe.”a

Ukuphulukana Kokuqala Nengqibelelo

Kanye njengokuba ubukho buka-Adam, umntu wokuqala, bukhanyelwa ngabaninzi namhlanje, kukwanjalo nangobukho bukaSathana, uMtyholi, obugqalwa njengentsomi.b Kodwa igunya elibalaseleyo uYesu Kristu usixelela ukuba lowo “akazange eme nkqi kuyo inyaniso,” ngamanye amazwi, wayengafanelanga kuthenjwa. (Yohane 8:44) Yaye yayiyimpembelelo kaSathana eyabangela uAdam nomfazi wakhe, uEva, bavukele uYehova baze bangayigcini ingqibelelo yabo xa bevavanywa.—Genesis 3:1-19.

Ngenxa yokuba sonke siyinzala ka-Adam, sonke siluzuz’ ilifa utyekelo lwesono. Indoda esisilumko uSolomon yathi: “Akukho mntu ulilungisa ehlabathini, wenza okulungileyo, angoni.” (INtshumayeli 7:20) Sekunjalo, nabani na unokuthembeka. Kunokwenzeka njani oku? Ngenxa yokuba akuyomfuneko ukuba ude ufezeke ukuze ugcine ingqibelelo.

Isiseko Sengqibelelo

UKumkani uDavide wakwaSirayeli wenza iimpazamo ezininzi, kuquka nobungqina obubhaliweyo bokukrexeza kwakhe noBhatshebha. (2 Samuweli 11:1-27) Iimpazamo ezininzi zikaDavide zabalaselisa ukuba wayekude nokufezeka. Noko ke, yintoni eyabonwa nguYehova kule ndoda? Ebhekisa kunyana kaDavide, uSolomon, uYehova wathi: “Hamba phambi kwam, njengoko wahamba ngako uDavide uyihlo, ngentliziyo egqibeleleyo, nangokuthe tye.” (1 Kumkani 9:4, akekeliswe sithi.) Phezu kwazo nje iimpazamo zakhe ezininzi, ukuthembeka okusisiseko kukaDavide kwamkelwa nguYehova. Ngoba?

UDavide waphendula xa waxelela uSolomon oku: “UYehova uyazigxoka zonke iintliziyo, akuqonde konke ukuyila kweengcinga.” (1 Kronike 28:9) UDavide wenza iimpazamo, kodwa wayethobekile, yaye wayefuna ukwenza oko kulungileyo. Ngokuthobeka wayesoloko esamkela isohlwayo nokulungiswa—eneneni, wasicela. Wathi: “Ndicikide, Yehova, undilinge; [cikida, NW] izintso zam nentliziyo yam.” (INdumiso 26:2) Ngokuqinisekileyo uDavide wacikidwa. Ngokomzekelo, umphumo wesono sakhe noBhatshebha kwanyanzeleka ukuba uhlal’ uhleli de kwaba sekupheleni kobomi bakhe. Sekunjalo, uDavide akazange azame ukusithethelela isenzo sakhe. (2 Samuweli 12:1-12) Okubaluleke nangakumbi kukuba, akazange aphambuke kunqulo lokwenyaniso. Ngenxa yeso sizathu, nangenxa yokuzisola ngokunzulu nenguquko yokwenene kaDavide, uYehova wayekulungele ukuzixolela izono zakhe aze amamkele njengomntu ogqibeleleyo.—Bona INdumiso 51.

Ukuthembeka Phantsi Kovavanyo

UYesu wavavanywa nguSathana uMtyholi esenza umgudu wokumenza angayigcini ingqibelelo yakhe. Kwakufuneka alondoloze ingqibelelo yakhe phantsi kobunzima nokubandezeleka, ngokwahlukileyo kuAdam, owavavanywa ukuthobeka kwakhe njengomntu ofezekileyo ngokunikwa imiyalelo yokuthobela umthetho kaThixo. Ukongezelela, uYesu wayexhalabile kuba esazi ukuba ukuhlangulwa kwentsapho yabantu kwakuxhomekeke ekugcineni kwakhe ingqibelelo.—Hebhere 5:8, 9.

USathana, wayezimisele ukwaphula ingqibelelo kaYesu, wathetha noYesu xa wayebuthathaka kakhulu—emva kokuba echithe iintsuku ezingama-40 ecamngca yaye ezile ukutya entlango. Wamlinga izihlandlo ezithathu uYesu—ukuba aguqule amatye abe sisonka; ukuba aziwise phezu koqoqo lwetempile, enentembelo yokuba ukungenelela kweengelosi kwakuya kumsindisa yaye ngaloo ndlela enikela umqondiso ukuzingqina ukuba unguMesiya; nokwamkela ukulawula zonke izikumkani zeli hlabathi ukuba wayenokwenza kuphela “isenzo sonqulo” esinye kuSathana. Kodwa uYesu akazange anikezele kwisilingo ngasinye, elondoloza ingqibelelo yakhe kuYehova.—Mateyu 4:1-11; Luka 4:1-13.

Ingqibelelo KaYobhi

Ukuma kukaYobhi, elondoloze ingqibelelo yakhe phantsi kovavanyo, kwaziwa ngokubanzi. Okubangel’ umdla kukuba, uYobhi wayengasazi isizathu sokuba afikelwe yintlekele. Wayengazi ukuba uSathana waxoka ngaye, etyhola uYobhi ngokuthi ukhonza uThixo ngezizathu zokuzingca yaye esithi uYobhi wayeya kuyaphula ngokuzithandela ingqibelelo yakhe ukuze asindise ulusu lwakhe. UThixo wamvumela uYobhi ukuba ajamelane nezilingo ezinzima ukuze abonise ukuba uSathana wayexoka.—Yobhi 1:6-12; 2:1-8.

Kwavela abahlobo abathathu abangamaxoki. Ngokuthe ngcembe bayimela kakubi imilinganiselo neenjongo zikaThixo. Kwanomfazi kaYobhi, engayiqondi eyona mbambano, akazange amkhuthaze umyeni wakhe ngexesha likaxakeka. (Yobhi 2:9-13) Kodwa uYobhi wahlala eqinile. “Ndoda ndiphume umphefumlo, ndingayisusi kum ingqibelelo yam. Ndobambelela ebulungiseni bam, andiyi kubuyeka; intliziyo yam ayiyi kungcikiva mini eziminini zam.”—Yobhi 27:5, 6.

Umzekelo obalaseleyo kaYobhi, kunye namanye amadoda namabhinqa amaninzi agcina ingqibelelelo, njengoko ubhalwe eBhayibhileni, umngqina uSathana elixoki.

Ingqibelelo Nobulungiseleli BobuKristu

Ngaba ingqibelelo luphawu uYehova alubeka nje ukuze kwaneliseke yena? Akunjalo. Ingqibelelo iyinxalenye yethu engokwemvelo njengabantu. Esenzela ingenelo yethu, uYesu wasiluleka esithi ‘masimthande uYehova uThixo wethu ngentliziyo yethu yonke nangomphefumlo wethu uphela nangengqondo yethu iphela.’ Ngokwenene, lo “ngowona myalelo mkhulu nowokuqala,” yaye akulula kwindoda, kwibhinqa okanye kumntwana ukugcina ingqibelelo. (Mateyu 22:36-38) Yintoni ebandakanyekileyo, yaye uba yintoni umvuzo?

Umntu ogcina ingqibelelelo unokuthenjwa, kungekhona nje ngomnye umntu kodwa, okubaluleke ngakumbi, nguThixo. Intliziyo yakhe ehlambulukileyo ibonakaliswa zizenzo zakhe; akahanahanisi. Akamntu onamaqhinga okanye onganyanisekanga. Umpostile uPawulos ukubeka ngolu hlobo oku: “Siye sazilahla izinto ezinyebeleziswayo ezibangela iintloni, singahambi ngobuqhokolo, singalingxengi nelizwi likaThixo, kodwa ngokuyenza ibonakale inyaniso siyazincomela kuso sonke isazela sabantu emehlweni kaThixo.”—2 Korinte 4:2.

Phawula ukuba uPawulos ukhankanya izimo zengqondo ezibandakanya ubulungiseleli bobuKristu. Unokukwazi njani umlungiseleli ongumKristu ukukhonza abanye ukuba izenzo zakhe azithanga tye, ukuba akangomntu ogcina ingqibelelo? Inkokeli yomanyano lonqulo lwaseIreland esandul’ ukurhoxa kutshanje iyizekelisa ngokucacileyo le ngongoma. Yavuma ukuba “yamvumela umfundisi oxhaphaza abantwana ngokwesini aqhubeke esebenza nabantwana emva kokwaziwa ukuba wayexhaphaze abantwana,” ngokutsho kwephephendaba iThe Independent. Ingxelo icacisa ukuba oko kuxhatshazwa kwabantwana kwaqhubeka iminyaka engaphezu kwengama-24. Lo mfundisi wabanjwa iminyaka emine, kodwa khawucinge ngokubandezeleka kwabantwana awabahlaselayo ebudeni baloo minyaka ngenxa yokuba umphathi wakhe wayengenayo ingqibelelo engokuziphatha ukuze athabathe inyathelo!

Ingqibelelo—Umvuzo

Umpostile uYohane wayengumntu ongenadyudyu. Ngenxa yehlombe elibalaseleyo awayenalo yena nomntakwabo uYakobi, uYesu wathi “ngooNyana beNdudumo.” (Marko 3:17) Umntu owayebalasele ngengqibelelo, uYohane, ekunye noPetros, wacacisa kubalawuli abangamaYuda ukuba ‘akanakuyeka ukuthetha’ ngezinto awazibonayo nawazivayo ngoxa wayenoYesu. UYohane wayekwangomnye wabapostile abathi: “Simele sithobele uThixo njengomphathi kunabantu.”—IZenzo 4:19, 20; 5:27-32.

Kubonakala ukuba uYohane wayengaphezu kwama-90 eminyaka ubudala xa wagxothelwa kwiSiqithi sasePatmos “ngenxa yokuthetha ngoThixo nokunikela ubungqina ngoYesu.” (ISityhilelo 1:9) Kobo budala, wayesenokucinga ukuba ubulungiseleli bakhe babusele buphelile. Kodwa kuphela ngumntu ogqibeleleyo owayenokuphathiswa isabelo sokubhala loo mbono uchukumisayo weSityhilelo. Ekuphumezeni eso sabelo, uYohane wayethembekile. Elinjani ilungelo awaba nalo! Ibe kwakusekho amanye awayeza kulandela. Kamva, kuyabonakala ukuba kummandla wase-Efese, wabhala ingxelo yakhe yeVangeli neeleta ezintathu. Hayi indlela azuke ngayo loo malungelo enkonzo yokuthembeka yeminyaka engama-70!

Ukuba ngumntu ogqibeleleyo ngokuqhelekileyo kunika ulwaneliseko olunzulu. Ukuthembeka emehlweni kaThixo kunika umvuzo ongunaphakade. Namhlanje, “isihlwele esikhulu” sabanquli bokwenyaniso silungiselelwa ukungena kwihlabathi elitsha loxolo nemvisiswano, sinethemba lobomi obungunaphakade. (ISityhilelo 7:9) Ingqibelelo kwimibandela ebalulekileyo yokuziphatha neyonqulo imele ilondolozwe, phezu kwazo nje izilingo zale nkqubo yezinto nocelomngeni uSathana asenokusibekela lona. Qiniseka ukuba ngamandla kaYehova, unokuphumelela!—Filipi 4:13.

Ethetha ngale mihla nangekamva, umdumisi uDavide uphinda asiqinisekise sonke kumthandazo wakhe wokubulela uYehova esithi: “Mna ekugqibeleleni kwam uyandixhasa, undimisa phambi kwakho ngonaphakade. Makabongwe uYehova . . . Amen, amen.”—INdumiso 41:12, 13.

[Imibhalo esemazantsi]

[Umfanekiso okwiphepha 4]

Phezu kwazo nje iimpazamo zakhe, uDavide wangqineka ekufanele ukuthenjwa

[Umfanekiso okwiphepha 5]

UYesu wasishiya nomzekelo obalaseleyo wokuthembeka

[Umfanekiso okwiphepha 7]

Ukuthembeka kuzisa ulwaneliseko olukhulu