UYehova Ulawula Ngemfesane

UKUTYHUBELA imbali uninzi lwabalawuli babantu luye lwasebenzisa igunya ngendlela engenabubele bengakukhathaleli ukubandezeleka kwabalawulwa babo. Noko ke, uYehova wenza okwahlukileyo ngokukhetha uhlanga—uSirayeli—waza walulawula ngemfesane.

Ngoxa amaSirayeli ayesengamakhoboka kwiYiputa yamandulo, uYehova wakuva ukukhala kwawo efuna uncedo. “Ebudeni bokubandezeleka kwabo konke kwakubandezeleka nakuye. . . . Ngothando lwakhe nemfesane yakhe waluhlawulela.” (Isaya 63:9, NW) UYehova wawasindisa amaSirayeli, wawanika ukutya okungummangaliso, waza wawahlangula kwilizwe lawo.

Uphawu lukaYehova oluyimfesane lwabonakaliswa ngokungakumbi kwimithetho awayinika olu hlanga. Wayalela amaSirayeli ukuba aqhubane ngemfesane neenkedama, abahlolokazi kwanabasemzini. Kwakungafanele abaqhathe abo bayimilwelwe.

UMthetho wawufuna ukuba kubonakaliswe imfesane kwabo basweleyo. Amahlwempu ayesenokubhikica emva kokuvuna. Amatyala ayerhoxiswa ngomnyaka weSabatha (wesixhenxe). Wonke umhlaba olilifa owawuthengisiwe wawumele ubuyiselwe ngomnyaka weNtlokoma (wama-50). IAncient Israel—Its Life and Institutions inikela le ngxelo: “KwaSirayeli, akuzange kubekho ucalucalulo ngentlalo ngokwendlela yezi mini.” “Kwiminyaka yokuqala yemfuduko, onke amaSirayeli ayenandipha phantse umgangatho ofanayo wokuphila.”—Levitikus 25:10; Duteronomi 15:12-14; 24:17-22; 27:18.

Ukuxelisa Imfesane KaYehova

Abakhonzi bakaThixo baphenjelelwa yimfesane yakhe. Ngokomzekelo, ukutyhubela imbali, bambi ookumkani abatsha babebabulala abo babefudula bengamalungu asebukhosini. Kodwa umkhonzi kaYehova uDavide akazange akwenze oko. Emva kokufa kukaKumkani uSawule, uDavide wakhusela uMefibhoshete, umzukulwana nendlalifa kaSawule. “Ke ukumkani wasikwa yimfesane nguMefibhoshete, unyana kaYonatan, unyana kaSawule.”—2 Samuweli 21:7, NW.

Akukho namnye umntu owakha waxelisa imfesane kaYehova njengoYesu. Uninzi lwemimangaliso yakhe lwaluphenjelelwa yimfesane yobuthixo. Ngesinye isihlandlo owayeneqhenqa wambongoza esithi: “Ukuba nje uyafuna, unako ukundenza ndihlambuluke.” UYesu washukunyiswa lusizi waza wamchukumisa, esithi: “Ndiyafuna. Yenziwa uhlambuluke.” (Marko 1:40-42) Ngesinye isihlandlo isihlwele esikhulu salandela uYesu. Phakathi kweso siphithiphithi, uYesu watsalela ingqalelo kumadoda amabini aziimfama awayekhala esithi: “‘Nkosi, yiba nenceba kuthi, Nyana kaDavide!’ . . . Eshukunyiswa lusizi, uYesu wachukumisa amehlo abo, ibe ngoko nangoko babona.”—Mateyu 20:29-34.

Isihlwele esikhulu asizange sizenze ndindisholo iimvakalelo zikaYesu ngabanye. Kuba singakhange sifumane into yokutya kangangethuba elide, ngesinye isihlandlo wathi: “Ndiyasisizela isihlwele.” Ngoko wasityisa ngokungummangaliso. (Marko 8:1-8) Xa uYesu wayekhenketha, wayengafundisi indimbane nje kuphela kodwa wayeziqwalasela iimfuno zayo. (Mateyu 9:35, 36) Emva kokhenketho olunjalo, uYesu nabafundi bakhe babengenalo ixesha lokuphumla kwanelokutya. Ingxelo yeBhayibhile isixelela oku: “Ngoko bemka ngesikhephe baya kwindawo engasese bebodwa. Kodwa abantu bababona behamba yaye abaninzi bathi bakwazi oko, ibe besuka kuzo zonke izixeko babalekela apho bonke ngeenyawo baza bafika ngaphambi kwabo. Ngoko, akuphuma, wabona isihlwele esikhulu, kodwa washukunyiswa lusizi ngaso, ngenxa yokuba sasinjengezimvu ezingenamalusi. Yaye waqala ukusifundisa izinto ezininzi.”—Marko 6:31-34.

Oko kwashukumisa uYesu kwakungekhona ukugula nobuhlwempu babantu nje kuphela kodwa isimo sabo sokomoya. Inkokheli zabo zazibaqhatha, ngoko uYesu ‘washukunyiswa lusizi ngabo.’ Igama lesiGrike elithi “washukunyiswa lusizi” lithetha “ukuvakalelwa ngokusuka embilinini.” Ngokwenene uYesu wayeyindoda enemfesane!

Imfesane Kwihlabathi Elinenkohlakalo

Ngoku uYesu Kristu unguKumkani woBukumkani bukaYehova basezulwini. Njengokuba wenjenjalo kuSirayeli wamandulo, namhlanje uThixo ulawula abantu bakhe ngemfesane. “‘Yaye ngokuqinisekileyo baya kuba ngabam,’ utsho uYehova wemikhosi, ‘ngemini yokuvelisa kwam inqobo. Kwaye ndiza kubonisa imfesane.’”—Malaki 3:17, NW.

Abo bafuna imfesane kaYehova bamele baxelise iindlela zakhe. Liyinyaniso elokuba, siphila kwihlabathi apho abantu banomdla wokulondoloza intlalontle yabo kuphela kunokuba bancede abanye. Abantu abasemagunyeni ngokufuthi bafuna inzuzo ngabasebenzi nangabathengi ngoxa betyeshela ukhuseleko lwabo. Kweyesi-2 kuTimoti 3:1-4, iBhayibhile ichaza ngokucacileyo ngemeko yokuziphatha yexesha lethu ethe yaphelisa imfesane ezintliziyweni zabaninzi.

Sekunjalo, sisenokuwafumana amathuba okubonakalisa imfesane. Ngaba sinokunikela uncedo olufunekayo kubamelwane bethu? Ngaba kukho ubani ogulayo esinokumtyelela? Ngaba sinokukhuthaza abo badandathekileyo, silandela eli cebiso: “Thethani ngokuthuthuzelayo kwimiphefumlo edandathekileyo, baxhaseni ababuthathaka”?—1 Tesalonika 5:14.

Kwakhona imfesane iza kusinceda siphephe ukuba rhabaxa xa abanye besenza iimpazamo. Sixelelwa oku: “Mabususwe kuni bonke ubukrakra bolunya nomsindo nengqumbo nokunkqangaza nentetho etshabhisayo kunye nabo bonke ububi. Kodwa yibani nobubele omnye komnye, ninemfesane yofefe, nixolelana ngesisa kanye njengokuba noThixo wanixolelayo ngesisa ngaye uKristu.”—Efese 4:31, 32.

Imfesane iya kusinceda sikuphephe ukusebenzisa kakubi igunya. IBhayibhile ithi: “Yambathani umsa onofefe wemfesane, ububele, ukuthobeka kwengqondo, ubulali, nokuzeka kade umsindo.” (Kolose 3:12) Ukuthobeka kwengqondo kusenza sizibeke kwimeko yabo sibongamelayo. Ukuba nemfesane kuquka ukuthobeka nokuba sengqiqweni kunokuba kube nzima ukukholiswa. Ubuchule bethu abumele bube sisizathu sokubajongela phantsi abanye. Kwakhona, entsatsheni abayeni ebanemfesane bayakhumbula ukuba abafazi babo bazizitya ezibuthathaka ngakumbi. (1 Petros 3:7) Ukucingisisa ngokunzulu ngomzekelo wemfesane kaYesu kunokusinceda kuko konke oku.

Ekubeni uYesu wavakalelwa ngokunzulu kakhulu ngabantu ebudeni bobulungiseleli bakhe basemhlabeni, sinokuqiniseka ukuba ngoku, yaye uya kuqhubeka enguMlawuli onemfesane. INdumiso 72 iprofeta isithi ngaye: “Makagwebe ityala labaziintsizana ebantwini, asindise oonyana bamahlwempu, abatyumze abacudisi. Makaphathe ubukhosi ethabathela elwandle ase elwandle, ethabathela kuwo uMlambo ase eziphelweni zehlabathi. Abenzele inceba abasweleyo nabangamahlwempu; asindise imiphefumlo yamahlwempu.”—INdumiso 72:4, 8, 13.

ILizwi likaThixo laxela kwangaphambili lisithi: “Uya kuligweba ityala lezisweli ngobulungisa, abalungiselele abalulamileyo behlabathi ngokuthe tye, . . . ambulale ongendawo.” Emva kokuba echaze ngendlela abantu abakhohlakeleyo nababulwanyanarha abaya kuguquka ngayo, esi siprofeto siqhubeka sisithi: “Ezo zinto aziyi kwenza bubi, aziyi konakalisa ezintabeni zam zonke ezingcwele; ngokuba ilizwe liya kuzala kukwazi uYehova njengamanzi egubungele ulwandle.” (Isaya 11:4-9) Esi siprofeto sithembisa ngebutho labantu abasemhlabeni wonke abamaziyo uYehova nabaxelisa iindlela zakhe zemfesane!