Hlala Usondele Kulawulo Lobuthixo
“Umgwebi wethu nguYehova, ummisi-mthetho wethu nguYehova, ukumkani wethu nguYehova.”—ISAYA 33:22.
1. Kutheni umbandela ongorhulumente uxhalabisa kwinkoliso yabantu?
UMBANDELA ophathelele urhulumente ngumcimbi oxhalabisa wonk’ ubani. Urhulumente olungileyo udala uxolo kunye nenkqubela. IBhayibhile ithi: “Ukumkani ulimisa ilizwe ngesiko.” (IMizekeliso 29:4) Kwelinye icala, urhulumente ongalunganga udala ukungabikho kokusesikweni, ubuqhetseba nengcinezelo. “Ekulawuleni kongendawo bayagcuma abantu.” (IMizekeliso 29:2) Ukutyhubela imbali, abantu baye bazama iintlobo ezininzi zoorhulumente, ibe okulusizi kukuba, ngokufuthi baye ‘bagcuma’ ngenxa yokucinezelwa ngabalawuli babo. (INtshumayeli 8:9) Ngaba lukho uhlobo lorhulumente oya kuphumelela ekuziseni ulwaneliseko oluhlala luhleli kubantu bakhe?
2. Kutheni kufanelekile ukubiza urhulumente wakwaSirayeli wamandulo ngokuthi “lulawulo lobuthixo”?
2 Umbhali-mbali uJosephus wakha wakhankanya uhlobo olwahlukileyo lorhulumente xa wabhala esithi: “Abanye abantu baye baphosa igunya elongameleyo lobupolitika kookumkani, abanye balinika imbinana ethile, ukanti abanye balinike abantu. Noko ke, lowo wasinika umthetho [uMoses], akazange abe namdla kulo naluphi na uhlobo lombutho wezobupolitika, kodwa kumgaqo-siseko wakhe wamkela uhlobo olusenokubizwa ngokuba—ukuba kuvumelekile ukusebenzisa eli binzana—‘lulawulo lobuthixo,’ ukunikela lonke ulongamo negunya ezandleni zikaThixo.” (Against Apion, II, 164-5) Ngokutsho kweConcise Oxford Dictionary, ibinzana elithi ulawulo lobuthixo lithetha “uhlobo lorhulumente olulawulwa nguThixo.” Eli gama aliveli eBhayibhileni, kodwa limchaza kakuhle urhulumente kaSirayeli wamandulo. Nangona ethubeni amaSirayeli aba nokumkani ongumntu, oyena mlawuli wokwenene yayinguYehova. Umprofeti wakwaSirayeli uIsaya wathi: “Umgwebi wethu nguYehova, ummisi-mthetho wethu nguYehova, ukumkani wethu nguYehova.”—Isaya 33:22.
Luyintoni Kanye Kanye Ulawulo Lobuthixo?
3, 4. (a) Luyintoni ulawulo lobuthixo lokwenene? (b) Ziziphi iintsikelelo eziya kuziswa lulawulo lobuthixo kulo lonke uluntu kungekudala?
3 Mininzi imibutho eye yachazwa njengolawulo lobuthixo, ukususela oko uJosephus waliyila eli gama. Eminye yayo ibingafuni kuphikiswa, inenzondelelo yempambano yaye inengcinezelo ekhatshwa yinkohlakalo. Ngaba ngokwenene ibilulawulo lobuthixo? Akunjalo xa sicinga ngendlela uJosephus awalisebenzisa ngayo elo gama. Ingxaki isekubeni intsingiselo yebinzana elithi “ulawulo lobuthixo” iye yandiswa. IWorld Book Encyclopedia ilichaza ngokuthi “luhlobo lorhulumente apho ilizwe lilawulwa ngumfundisi okanye abefundisi, nalapho isifundisi siba negunya kwizinto zentlalo nezonqulo.” Noko ke, olokwenene ulawulo lobuthixo alungorhulumente wabefundisi. Eneneni lulawulo lukaThixo, urhulumente woMdali wendalo iphela, uYehova uThixo.
4 Kungentsuku zatywala, wonke umhlaba uza kuba phantsi kolawulo lobuthixo, ibe enjani yona intsikelelo oluya kuba yiyo! “NoThixo ngokwakhe uya kuba nalo [uluntu]. Kwaye uya kuzisula zonke iinyembezi emehlweni alo, yaye ukufa akusayi kubakho, kungayi kubakho nakukhedama nasikhalo nantlungu kwakhona. Izinto zangaphambili zidlule.” (ISityhilelo 21:3, 4) Soze ulawulo lwababingeleli abangabantu abangafezekanga luzise ulonwabo olunjalo. Lulawulo lukaThixo kuphela olunako. Ngenxa yoko, amaKristu okwenyaniso akangeneleli kwezobupolitika enyeke ukuba kulawule ulawulo lobuthixo elizweni. Ngomonde alinde ukuba uThixo aseke ulawulo lobuthixo lwehlabathi lonke ngexesha lakhe nangendlela ethandwa nguye.—Daniyeli 2:44.
5. Namhlanje kuphi apho ulawulo lobuthixo lusebenza ngamandla, ibe yiyiphi imibuzo ephakamayo ngalo?
5 Noko ke, kwanangoku lukho ulawulo lobuthixo lokwenene. Luphi? Lukwabo bazithoba ngokuzithandela kulawulo lukaThixo baze basebenzisane ekwenzeni ukuthanda kwakhe. Abathembekileyo abanjalo baye bahlanganiswa baba ‘luhlanga’ lokomoya oluphila ‘kwilizwe’ lokomoya. Yintsalela ‘kaSirayeli kaThixo’ kunye noogxa bakhe abangamaKristu angaphezu kwezigidi ezihlanu ezinesiqingatha. (Isaya 66:8; Galati 6:16) Aba baphantsi koYesu Kristu, uKumkani wasezulwini obekwe etroneni nguYehova uThixo, “uKumkani kanaphakade.” (1 Timoti 1:17; ISityhilelo 11:15) Le yintlangano yolawulo lobuthixo ngayiphi indlela? Amalungu ayo alijonga njani igunya loorhulumente beli hlabathi? Yaye umgaqo wolawulo lobuthixo uthotyelwa njani ngabo banegunya kwibutho layo lokomoya?
Intlangano Yolawulo Lobuthixo
6. Kunokwenzeka njani ukuba intlangano ebonakalayo yabantu ilawulwe nguThixo?
6 Kunokwenzeka njani ukuba intlangano yabantu ilawulwe nguYehova, ohlala emazulwini angabonakaliyo? (INdumiso 103:19) Oko kwenzeka ngokuthi amalungu ayo alandele isiluleko esiphefumlelweyo esithi: “Kholosa ngoYehova ngentliziyo yakho yonke, ungayami okwakho ukuqonda.” (IMizekeliso 2:6; 3:5) Ayavuma ukuba uThixo awalawule xa ethobela “umthetho kaKristu” aze asebenzise imigaqo ephefumlelweyo yeBhayibhile kubomi bawo bemihla ngemihla. (Galati 6:2; 1 Korinte 9:21; 2 Timoti 3:16; bona noMateyu 5:22, 28, 39; 6:24, 33; 7:12, 21.) Ukuze enze oku, kufuneka abe ngabafundi beBhayibhile. (INdumiso 1:1-3) NjengamaBhereya amandulo ‘awayechubekile,’ akalandeli bantu kodwa asoloko eziqinisekisa eBhayibhileni izinto azifundayo. (IZenzo 17:10, 11; INdumiso 119:33-36) Athandaza njengomdumisi xa esithi: “Ndifundise, ndibe nemvo nokwazi okulungileyo, ngokuba ndikholwa yimithetho yakho.”—INdumiso 119:66.
7. Busebenza njani ubuveleli kulawulo lobuthixo?
7 Kuyo nayiphi na intlangano, kumele kubekho abathile abanegunya okanye abakhokelayo. Kunjalo ke nakumaNgqina kaYehova, ibe athobela ilungiselelo legunya elichazwe ngumpostile uPawulos: “Intloko yayo yonke indoda nguKristu; ngokulandelayo intloko yomfazi yindoda; ngokulandelayo intloko kaKristu nguThixo.” (1 Korinte 11:3) Ngokuvisisana noku, ngamadoda afanelekayo kuphela akhonza njengabadala emabandleni. Yaye nangona uYesu—“intloko yayo yonke indoda”—esezulwini, basekho ‘abaseleyo’ kubazalwana bakhe abathanjisiweyo, abanethemba lokulawula naye emazulwini. (ISityhilelo 12:17; 20:6) Aba bayila “ikhoboka elithembekileyo neliyingqondi.” Xa amaKristu ezithoba kuYesu, akwazithoba nakwintloko kaYesu, uYehova, esamkela ulwalathiso ‘lwekhoboka.’ (Mateyu 24:45-47; 25:40) Ngale ndlela, ulawulo lobuthixo lutsho lube nocwangco. “UThixo unguThixo, kungekhona owesidubedube, kodwa owoxolo.”—1 Korinte 14:33.
8. Abadala abangamaKristu bawuxhasa njani umgaqo wolawulo lobuthixo?
8 Abadala abangamaKristu bayawuxhasa umgaqo wolawulo lobuthixo kuba bayaqonda ukuba baza kuphendula kuYehova ngendlela abawusebenzisa ngayo umlinganiselo wegunya abanalo. (Hebhere 13:17) Kwaye xa besenza izigqibo, bayama ngobulumko bukaThixo, kungekhona obabo. Kulo mba, balandela umzekelo kaYesu. Wayengoyena mntu ulumkileyo kwabakha badl’ amazimba. (Mateyu 12:42) Noko ke, waxelela amaYuda oku: “UNyana akanakwenza nanye into ngokwakhe, kodwa kuphela oko abona uYise ekwenza.” (Yohane 5:19) Abadala bakwanesimo sengqondo esifana nesikaKumkani uDavide. Wayenegunya elikhulu kulawulo lobuthixo. Sekunjalo, wayefuna ukulandela indlela kaYehova, kungekhona eyakhe. Wathandaza esithi: “Ndiyalele, Yehova, indlela yakho, ndikhaphe emendweni othe tye.”—INdumiso 27:11.
9. Ngokuphathelele amathemba namalungelo enkonzo ahlukeneyo kulawulo lobuthixo, yiyiphi imbono elungeleleneyo anayo amaKristu azahluleleyo?
9 Bambi baye babuza enoba akukhethwa buso kusini na xa ebandleni igunya linikwa amadoda afanelekayo kuphela okanye xa abanye besiba nethemba lokuphila ezulwini ngoxa abanye benelokuphila emhlabeni. (INdumiso 37:29; Filipi 3:20) Noko ke, amaKristu azahluleleyo ayazi ukuba la malungiselelo avela kwiLizwi likaThixo. Asekelwe kulawulo lobuthixo. Abo bawathandabuzayo, ngokuqhelekileyo ngabo basukuba bengayazele nto imigaqo yeBhayibhile. Ngaphezu koko, amaKristu ayazi ukuba amadoda namabhinqa ayalingana emehlweni kaYehova xa kufikwa kumba wokusinda. (Galati 3:28) KumaKristu okwenyaniso, kwaukuba ngumnquli woMongami wendalo iphela kulelona lungelo likhulu anokulifumana, ibe avuyela nayiphi na indima uYehova awanika ukuba ayiphumeze. (INdumiso 31:23; 84:10; 1 Korinte 12:12, 13, 18) Ukongezelela, ubomi obungunaphakade, enoba busezulwini okanye bukumhlaba oyiparadesi, bulithemba elimangalisa ngokwenene.
10. (a) Sisiphi isimo sengqondo esihle awayenaso uYonatan? (b) Namhlanje amaKristu asibonakalisa njani isimo sengqondo esifana nesikaYonatan?
10 Ngaloo ndlela, amaNgqina kaYehova axelisa uYonatan, unyana kaKumkani uSawule owayesoyika uThixo. Mhlawumbi uYonatan ngewayebe ngukumkani onesandla esihle ekuphatheni. Noko ke, ngenxa yokungathembeki kukaSawule, uYehova wanyula uDavide ukuba abe ngukumkani wesibini kwaSirayeli. Ngaba le nto yamkhwinisa uYonatan? Nakanye. Waba ngumhlobo osenyongweni kaDavide wada wamkhusela kuSawule. (1 Samuweli 18:1; 20:1-42) Ngokufanayo, abo banethemba lokuphila emhlabeni ababamoneli abo banethemba lokuphila ezulwini. Kwaye amaKristu okwenyaniso akabamoneli abo banikwe igunya lolawulo lobuthixo ebandleni. Kunoko, ‘abanika ingqalelo engaqhelekanga ngakumbi ngothando,’ ephawula ukuba bayazibhokoxa ngenxa yabazalwana noodade babo bokomoya.—1 Tesalonika 5:12, 13.
Imbono Yobuthixo Ngabalawuli Behlabathi
11. AmaKristu aphantsi kolawulo lobuthixo awagqala njani amagunya ehlabathi?
11 Ukuba amaNgqina kaYehova aphantsi kolawulo lobuthixo, ulawulo lukaThixo, abajonga njani abalawuli bamazwe? UYesu wathi abalandeli bakhe babengayi kuba ‘yinxalenye yehlabathi.’ (Yohane 17:16) Noko ke, amaKristu ayayiqonda into amtyala yona “uKesare,” oorhulumente behlabathi. UYesu wathi afanele ‘abuyisele izinto zikaKesare kuKesare, kodwa izinto zikaThixo kuThixo.’ (Mateyu 22:21) Ngokutsho kweBhayibhile oorhulumente babantu ‘babekwe nguThixo kwizikhundla zabo ezilinganiselweyo.’ UYehova, uMthombo wawo onke amagunya, uvumela ukuba oorhulumente babekho, yaye ulindele ukuba babaphathe kakuhle abantu abaphantsi kwabo. Xa besenjenjalo, baba “ngumlungiseleli kaThixo.” AmaKristu amele amthobele urhulumente welizwe aphila kulo “ngenxa yesazela [sawo].” (Roma 13:1-7) Kakade ke, ukuba urhulumente ufuna into engqubana nomthetho kaThixo, amaKristu aya ‘kuthobela uThixo njengomphathi kunabantu.’—IZenzo 5:29.
12. Xa amaKristu etshutshiswa ngabasemagunyeni, ngumzekelo kabani awulandelayo?
12 Kuthekani ke xa amagunya aseburhulumenteni etshutshisa amaKristu okwenyaniso? Aye alandele umzekelo wamaKristu okuqala, enyamezela amaxesha eembandezelo ezinkulu. (IZenzo 8:1; 13:50) Ezi mvavanyo zokholo zazingengomnqa, kuba uYesu wayelumkisile esithi ziyeza. (Mateyu 5:10-12; Marko 4:17) Sekunjalo, loo maKristu okuqala akazange abuyis’ izitya kubatshutshisi bawo; lungazange kananjalo lube buthathaka ukholo lwawo phantsi kwengcinezelo. Kunoko, alandela umzekelo kaYesu: “Xa wayetshabhiswa, akazange aphindise atshabhise. Xa wayebandezeleka, akazange asongele, kodwa wahlala ezinikele kulowo ugweba ngobulungisa.” (1 Petros 2:21-23) Ewe, imigaqo yamaKristu yalukatyisa uchuku lukaSathana.—Roma 12:21.
13. AmaNgqina kaYehova aye asabela njani kwintshutshiso nakwizinto ezimbi ezithethwa ngawo?
13 Kunjalo ke nanamhlanje. Ebudeni bale nkulungwane, oozwilakhe abathile baye bawatshutshisa kanobom amaNgqina kaYehova—kanye njengokuba uYesu wayexele kwangaphambili. (Mateyu 24:9, 13) Kwamanye amazwe kuye kwasasazwa ubuxoki kunye neengcamango ezigqwethekileyo ngenjongo yokuthofiyela abasemagunyeni ukuba bathabathe amanyathelo nxamnye nala maKristu anyanisekileyo. Sekunjalo, phezu kwayo nje ‘ingxelo enjalo ukuba mbi,’ amaNgqina aye azibonakalisa engabalungiseleli bakaThixo ngehambo yawo entle. (2 Korinte 6:4, 8) Xa efumana ithuba, aye ayandlale kumagosa nasezinkundleni zelo lizwe imeko yawo ukuze abonise ukuba abhutywa ngobubende engadlanga nyama. Asebenzisa zonke iindlela anokuzisebenzisa ukuze azithethelele ekuhleni iindaba ezilungileyo. (Filipi 1:7) Kodwa ke athi, akuba enze konke anokukwenza okuvisisana nomthetho, awuphose ezandleni zikaYehova loo mbandela. (INdumiso 5:8-12; IMizekeliso 20:22) NjengamaKristu okuqala, xa kuyimfuneko, akakoyiki ukubandezeleka ngenxa yobulungisa.—1 Petros 3:14-17; 4:12-14, 16.
Beka Uzuko LukaThixo Kwindawo Yokuqala
14, 15. (a) Yintoni eyona nto ibalulekileyo kwabo baxhasa umgaqo wolawulo lobuthixo? (b) Kungasiphi isihlandlo awathi uSolomon wamisela umzekelo omhle wokuzithoba kwisikhundla sakhe sobuveleli?
14 Xa uYesu wayefundisa abalandeli bakhe ukuthandaza, into yokuqala awayikhankanyayo kukungcwaliswa kwegama likaYehova. (Mateyu 6:9) Ngokuvisisana noku, abo baphantsi kolawulo lobuthixo bafuna uzuko lukaThixo, kungekhona olwabo. (INdumiso 29:1, 2) IBhayibhile ithi ngenkulungwane yokuqala, oku kwaba ngumqobo kwabathile ababengafuni ukulandela uYesu kuba “babethanda uzuko lwabantu,” bethanda ukuzukiswa ngabantu. (Yohane 12:42, 43) Ngokwenene, into efunekayo nje kukuthobeka ukuze ubani amgqale uYehova njengobalulekileyo kunaye.
15 USolomon wabonakalisa isimo sengqondo esihle ngokuphathelele oku. Khawuthelekise amazwi akhe okunikezela itempile ezukileyo awayeyakhile nakaNebhukadenetsare xa wayethetha ngezakhiwo zakhe. Ethe nqi impumlo, uNebhukadenetsare waqhayisa esithi: “Le asiyiyo na iBhabheli enkulu, endiyakhele ukuba ibe yindlu yobukumkani ngokuqina kwamandla am, nangenxa yobuhandiba bobungangamsha bam?” (Daniyeli 4:30) Ngokwahlukileyo koko, ngobulali uSolomon wakuphepha ukuzingomb’ isifuba ngoko wayekuphumezile, esithi: “Gxebe, uThixo angade ahlale nabantu emhlabeni na? Yabona izulu, izulu lawo amazulu, alikulingene; hina ke, yona le ndlu ndiyakhile?” (2 Kronike 6:14, 15, 18; INdumiso 127:1) USolomon akazange aziphakamise. Wayesazi ukuba wayengummeli nje kaYehova ibe wabhala: “Kwafika ukukhukumala, kofika ukucukucezwa; bunabathozamileyo ubulumko.”—IMizekeliso 11:2.
16. Abadala baye bazingqina njani beyintsikelelo yokwenene ngokungazizukisi?
16 Nabadala abangamaKristu baphakamisa uYehova, kungekhona iziqu zabo. Balandela isiluleko sikaPetros esithi: “Ukuba nabani na uyalungiselela, makalungiselele exhomekeke emandleni awanikwa nguThixo; khon’ ukuze kuzo zonke izinto uThixo azukiswe ngoYesu Kristu.” (1 Petros 4:11) Umpostile uPawulos akazange achaze “isikhundla sobuveleli” njengokuba semaqhuzwini, kodwa wathi ‘singumsebenzi omhle.’ (1 Timoti 3:1) Abadala bamiselwe ukuze bakhonze, abamiselwanga kulawula. Bangabafundisi nabalusi bomhlambi kaThixo. (IZenzo 20:28; Yakobi 3:1) Abadala abathobekileyo nabazincamayo bayintsikelelo yokwenene ebandleni. (1 Petros 5:2, 3) “Hlalani nibaphatha ngembeko abantu abalolo hlobo,” kwaye nimbulele uYehova ngenxa yokuba eye walungiselela abadala abafanelekayo abaninzi kangaka ukuba bamele ulawulo lobuthixo kule “mihla yokugqibela.”—Filipi 2:29; 2 Timoti 3:1.
“Yibani Ngabaxelisa UThixo”
17. Abo baphantsi kolawulo lobuthixo bamxelisa ngaziphi iindlela uThixo?
17 Umpostile uPawulos wabongoza: “Yibani ngabaxelisa uThixo, njengabantwana abaziintanda.” (Efese 5:1) Abo bathobela ulawulo lobuthixo bazabalazela ukuba njengoThixo kangangoko kunokwenzeka kubantu abangafezekanga. Ngokomzekelo, iBhayibhile ithetha yenjenje ngoYehova: “NguLiwa; ugqibele umsebenzi wakhe, ngokuba zonke iindlela zakhe zisesikweni; nguThixo wentembeko, tu ubugqwetha; lilungisa, uthe tye yena.” (Duteronomi 32:3, 4) Ukuze axelise uThixo kulo mba, amaKristu kufuneka athembeke, abe nobulungisa yaye alungelelane ngokusesikweni. (Mika 6:8; 1 Tesalonika 3:6; 1 Yohane 3:7) Ayaziphepha izinto ezininzi ezamkelwa lihlabathi, ezinjengokuziphatha okubi, ukunyoluka nokubawa. (Efese 5:5) Ngenxa yokuba abakhonzi bakaYehova belandela imilinganiselo engokobuthixo, kungekhona eyabantu, intlangano yakhe iphantsi kolawulo lobuthixo, icocekile yaye iluncedo.
18. Luluphi olona phawu lubalaseleyo lukaThixo, yaye amaKristu alubonakalisa njani?
18 Uthando lolona phawu lubalaseleyo lukaYehova uThixo. Umpostile uYohane uthi: “UThixo uluthando.” (1 Yohane 4:8) Ekubeni ulawulo lobuthixo ilulawulo lukaThixo, lululawulo lothando. UYesu wathi: “Bonke baya kwazi ukuba ningabafundi bam, ukuba ninothando phakathi kwenu.” (Yohane 13:35) Le ntlangano iphantsi kolawulo lobuthixo iye yalubonakalisa ngendlela ebalaseleyo uthando ebudeni bale mihla yokugqibela ezaliswe ngamajingi-qhiwu. Ebudeni bokubulalana kweentlanga eAfrika, amaNgqina kaYehova abonakalisa uthando kubo bonke abantu, kungakhathaliseki ukuba babengabaluphi na uhlanga. Ebudeni bemfazwe yaseYugoslavia, amaNgqina kaYehova azo zonke iindawo ayencedana, ngoxa ezinye iinkonzo zazitshone zwabha ekutshatyalalisweni kohlanga oluthile. Njengabantu ngabanye, amaNgqina kaYehova azabalazela ukugcina isiluleko sikaPawulos esithi: “Mabususwe kuni bonke ubukrakra bolunya nomsindo nengqumbo nokumemeza nentetho etshabhisayo kunye nabo bonke ububi. Kodwa yibani nobubele omnye komnye, ninemfesane yofefe, nixolelana ngesisa kanye njengokuba noThixo wanixolelayo ngesisa ngaye uKristu.”—Efese 4:31, 32.
19. Ziziphi iintsikelelo ezizayo neziseza kuza kwixesha elizayo kwabo bazithoba kulawulo lobuthixo?
19 Abo bazithoba kulawulo lobuthixo banandipha intaphane yeentsikelelo. Baseluxolweni noThixo kunye namanye amaKristu. (Hebhere 12:14; Yakobi 3:17) Banenjongo ebomini babo. (INtshumayeli 12:13) Banqabisekile ngokomoya yaye banethemba eliqinisekileyo ngekamva. (INdumiso 59:9) Eneneni sele bekungcamla oko kuya kufunyanwa luluntu phantsi kolawulo lobuthixo. Yandula ke iBhayibhile ithi, ‘abayi kwenza bubi, aziyi konakalisa ezintabeni zam zonke ezingcwele; ngokuba ilizwe liya kuzala kukwazi uYehova, njengamanzi egubungele ulwandle.’ (Isaya 11:9) Elinjani ukuzuka ixesha ekuya kuba lilo! Ngamana singaqiniseka ngendawo yethu kwiParadesi yexesha elizayo ngokuhlala sisondele kwangoku kulawulo lobuthixo.
Ngaba Unokuchaza?
◻ Luyintoni ulawulo lobuthixo lokwenene yaye lunokufumaneka phi namhlanje?
◻ Abantu bazithoba njani kulawulo lobuthixo ebomini babo?
◻ Kungaziphi iindlela abathi bonke abo baphantsi kolawulo lobuthixo balubeke kwindawo yokuqala uzuko lukaThixo kunolwabo?
◻ Ziziphi ezinye iimpawu zikaThixo ezixeliswa ngabo baxhasa ulawulo lobuthixo?
[Umfanekiso okwiphepha 17]
USolomon wabeka uzuko lukaThixo kwindawo yokuqala kunolwakhe