“Inyaniso Iya Kunikhulula”
“Niya kuyazi inyaniso, ibe inyaniso iya kunikhulula.” UYesu wakuthetha oko ngoxa wayefundisa izihlwele eYerusalem. (Yohane 8:32) Abapostile bakaYesu bakwazi ukuzahlula ngokukhawuleza iimfundiso zikaYesu njengeziyinyaniso. Babesele bebone ubungqina obuyintabalala bemvelaphi engokobuthixo yomfundisi wabo.
NOKO KE, namhlanje, abaninzi basenokufumanisa kunzima ukufumanisa inyaniso awathetha ngayo uYesu. Njengokuba kwakunjalo ngemihla yomprofeti uIsaya, namhlanje kukho ‘abo bathi okubi kulungile, okulungileyo kubi; abamisa ubumnyama endaweni yokukhanya, ukukhanya endaweni yobumnyama; abamisa ubukrakra endaweni yobumnandi, ubumnandi endaweni yobukrakra.’ (Isaya 5:20) Ngenxa yobuninzi bezimvo, iintanda-bulumko, neendlela zokuphila ezikhuthazwayo namhlanje, abantu abaninzi bavakalelwa kukuba yonke into abayenzayo ilungile yaye ayikho into ekuthiwa yinyaniso.
Xa uYesu wathi kubaphulaphuli bakhe inyaniso iya kubakhulula, baphendula ngelithi: “Siyinzala ka-Abraham kwaye asizange sibe ngamakhoboka kuye nabani na. Kwenzeka njani ukuba uthi, ‘Niya kukhululeka’?” (Yohane 8:33) Babengayiboni imfuneko yokuba kubekho umntu okanye nantoni na eyayiya kubakhulula. Kodwa emva koko uYesu wabacacisela wathi: “Ngokona kuyinyaniso ndithi kuni, Wonke umenzi wesono ulikhoboka lesono.” (Yohane 8:34) Inyaniso awayethetha ngayo uYesu ingavula indlela esa kwinkululeko esonweni. UYesu wathi: “Ukuba uNyana uyanikhulula, okunene niya kukhululeka.” (Yohane 8:36) Ngoko ke inyaniso ekhulula abantu yinyaniso engoYesu Kristu, uNyana kaThixo. Kuphela kungokholo kwidini likaYesu lobomi bomntu ofezekileyo anokuthi ubani akhululwe esonweni nasekufeni.
Ngesinye isihlandlo uYesu wathi: “Bangcwalise ngayo inyaniso; ilizwi lakho liyinyaniso.” (Yohane 17:17) Ilizwi likaThixo njengokuba licacisiwe eBhayibhileni liyinyaniso enokuzisa inkululeko kwiinkolelo nakunqulo lobuxoki. IBhayibhile iqulethe inyaniso engoYesu Kristu, ebangela abantu babe nokholo kuye ize ivule indlela esa kwithemba eliqaqambileyo ngekamva. Kuyinto ezuke gqitha ukwazi inyaniso engeLizwi likaThixo!
Kubaluleke kangakanani ukwazi inyaniso? Namhlanje iinkonzo ezininzi, ngoxa zizibanga zilandela iBhayibhile, ziye ziphenjelelwe kanobom yintanda-bulumko yabantu namasiko. Ngokufuthi, iinkokeli zonqulo azibonakali zikuxhalabele ukuchana kwesigidimi sazo kunokuba zinjalo ngokwamkelwa kwaso. Zimbi zivakalelwa kukuba uThixo uyaneliswa lulo naluphi na uhlobo lonqulo, ukuba nje lunyanisekile. Kodwa uYesu Kristu wacacisa wathi: “Liyeza ilixa, ibe likho ngoku, xa abanquli bokwenyaniso baya kumnqula uBawo ngomoya nenyaniso, kuba, eneneni, uBawo ufuna abanjalo ukumnqula.”—Yohane 4:23.
Ukuba sifuna ukunqula uThixo ngokwamkelekileyo, simele siyazi inyaniso. Le yinkalo ebalulekileyo. Ulonwabo lwethu olungenasiphelo luxhomekeke kuyo. Ngoko ke, mntu ngamnye umele azibuze: ‘Ngaba indlela yam yokunqula yamkelekile kuThixo? Ngaba ndinomdla wokwenene ekufundeni inyaniso engeLizwi likaThixo? Okanye ngaba ndoyika oko kusenokutyhilwa kukuzihlolisisa ngenyameko?’