Bazimisele Ukuphila Ngendlela KaThixo
IiNdibano “Zokuphila Ngendlela KaThixo” bezinokuninzi ezikuphathele abo bafuna ukukhonza uThixo! Olunye undwendwe luchaze le ndibano “njengexesha elimnandi lokwakhiwa, lokukhuthazwa nelokukhanyiselwa.”
UKANTI olunye luthe “ininzi gqitha into ubani ayifumeneyo, wacamngca waza wangenelwa yiyo.” Ngoku makhe siluphonononge olu cwangciso.
UYesu Kristu—Indlela, Inyaniso, Nobomi
Lo ibingumxholo wosuku lokuqala lwendibano. (Yohane 14:6) Intetho yokuqala iye yachaza injongo yokuhlanganisana ndawonye kuloo ndibano: ukufundiswa ngokubhekele phayaa ngeyona ndlela yokuphila ilungileyo kwezinokufumaneka, ukuphila ngendlela kaThixo. UYehova ufundisa abantu bakhe ngendlela abanokuhamba ngayo emendweni wakhe. Oku ukwenza ngeBhayibhile, “ikhoboka elithembekileyo neliyingqondi,” nangomoya oyingcwele. (Mateyu 24:45-47; Luka 4:1; 2 Timoti 3:16) Elinjani lona ilungelo ekulilo ukufundiswa nguMongami wendalo iphela!
Ngokuvisisana nomxholo wosuku, intetho engumxholo ibisithi “Idini likaKristu—Indlela KaThixo Yosindiso.” Xa sifuna ukuphila ngendlela kaThixo, kubalulekile ukuyigqala indima kaYesu Kristu kwinjongo kaYehova. Isithethi sathi: “Ngaphandle kwedini lentlawulelo likaYesu Kristu, akukho namnye umntu, kungakhathaliseki ukuba ukholelwa entwenini okanye wenzani, onokufumana ubomi obungunaphakade kuThixo.” Emva koko siye sacaphula uYohane 3:16, othi: “Kuba uThixo walithanda kakhulu ihlabathi kangangokuba wanikela ngoNyana wakhe okuphela kwamzeleyo, ukuze wonk’ ubani oqhelisela ukholo kuye angatshabalali kodwa abe nobomi obungunaphakade.” Ukuze siqhelisele ukholo kwidini lentlawulelo likaKristu kufuneka singenise ulwazi oluchanileyo lwenyaniso. Kukwafuneka sahlulele ubomi bethu kuYehova, sikufuzisele oko ngokubhaptizwa emanzini, size siphile ngokuvisisana nomzekelo owamiselwa nguYesu Kristu.—1 Petros 2:21.
Ucwangciso lwasemva kwemini luqalise ngentetho enomxholo othi “Indlela Yothando Ayize Isilele.” Le ntetho ibiquka ingxubusho yendinyana nganye yendlela echukumisayo uPawulos aluchaza ngayo uthando kweyoku-1 kwabaseKorinte 13:4-8. Abaphulaphuli baye bakhunjuzwa ukuba uthando lokuzincama lolunye lweempawu zokufanisa umKristu nokuba ukuthanda uThixo nommelwane kuziinkalo ezibalulekileyo zonqulo olwamkelwa nguYehova.
Emva koko kulandele ungcelele lweentetho ezintathu obelunomxholo othi “Bazali—Bethelelani Indlela KaThixo Ebantwaneni Benu.” Abazali banako ukunceda abantwana babo bakhonze uThixo ngokumisela umzekelo omhle ekuleseni nasekufundisiseni iLizwi lakhe. Banako ukuyibethelela inyaniso kubantwana babo ngesifundo sentsapho esithe rhoqo, besenza silungele iimfuno zentsapho. Kukwabalulekile nokunceda abantwana babandakanyeke kwimisebenzi yebandla nakwinkonzo yasentsimini. Nangona ukukhulisa abantwana aboyika uThixo kulucelomngeni kweli hlabathi lingendawo, ukwenjenjalo kuzisa umvuzo omkhulu.
Emva kolu ngcelele lweentetho kwalandela ethi “Vumela UYehova Akuxonxe Ukuze Akusebenzise Ngendlela Ebekekileyo.” Kanye njengokuba umbumbi ebumba ingqayi, uThixo uyabaxonxa abo bafuna ukumkhonza. (Roma 9:20, 21) Oku ukwenza ngokunikela isiluleko kwiLizwi lakhe esebenzisa nentlangano yakhe. UYehova uya kusinceda ukuba sisebenzise amandla ethu kangangoko sinako ukuba nje sizenza sifumaneke, sixhakamfula amathuba avelayo, yaye sikulungele ukumvumela asikhokele.
Emva koku kulandele inxalenye ebangel’ imincili yocwangciso—“Ukukhonza Kwintsimi Yobuvangeli Basemazweni.” Sithethanje kumazwe ali-148 emhlabeni wonke kukho abalungiseleli abangamaKristu abangama-2 390 abangabavangeli basemazweni. Bamisela umzekelo omhle wokunyaniseka nenzondelelo yaye banombulelo osuk’ entliziyweni ngelungelo abaye bajizekwa ngalo lokukhonza kwintsimi yasemzini. Kuthe kwakufikwa kule nxalenye kwiindibano zezizwe ngezizwe, abavangeli basemazweni babalisa ngamahla-ndinyuka obomi bobuvangeli basemazweni.
Intetho yokugqibela kusuku lokuqala ibinomxholo othi “Ngaba Kukho Ubomi Emva Kokufa?” Lo mbuzo ubuyintsindabadala kangangeenkulungwane eluntwini. Abantu bazo zonke iintlanga baye babhula besela ngalo mba. Phofu ke neempendulo eziyintelekelelo bezinganqabanga. Ziyahlukahlukana ngokwezithethe nonqulo lwabo bantu bazinikelayo. Kodwa ke abantu kufuneka beyazile inyaniso.
Ekugqibeleni, isithethi siye sakhupha isaziso sokukhululwa kwencwadana entsha enemifanekiso enamaphepha angama-32 enomxholo othi Kwenzeka Ntoni Kuthi Xa Sisifa? Le ncwadana enemifanekiso ichaza imvelaphi yemfundiso yokungafi komphefumlo yaye ibonisa indlela le ngcamango eye yazibalula ngayo phantse kuzo zonke iinkonzo zehlabathi namhlanje. Ngendlela ecacileyo nevuselel’ umdla, ixubusha oko iBhayibhile ikutshoyo ngomphefumlo, ngesizathu sokuba sife, noko kwenzekayo xa sisifa. Le ncwadana inemifanekiso ikwacacisa ithemba elikhoyo labafileyo nabaphilayo. Hayi indlela eya kuba yintsikelelo ngayo le ncwadana enemifanekiso kubo bonke abo bafuna inyaniso!
Hlalani Niyiphaphele Ngokungqongqo Indlela Enihamba Ngayo
Onjani ukufaneleka wona umxholo kusuku lwesibini lwendibano! (Efese 5:15) Ucwangciso lwakusasa lunikele ingqalelo kumsebenzi wokushumayela nowokwenza abafundi. Emva kwengxubusho yetekisi yosuku, ucwangciso luye lwaqhubeka ngentetho ethi “Ukunceda Abantu Bahambe Kwindlela Esa Ebomini.” Xa siphumeza lo msebenzi ungxamisekileyo, kubalulekile ukuba sibe nesimo sengqondo esihle, siyiqonde into yokuba ukwabelana nabanye ngenyaniso kulilungelo nembopheleleko. Ngenkulungwane yokuqala yeXesha lethu Eliqhelekileyo, uninzi lwabantu lwalichasa iLizwi likaThixo. Noko ke, phezu kwayo nje loo nkcaso, kwakukho abo ‘babenotyekelo olufanelekileyo ngobomi obungunaphakade nababa ngamakholwa.’ (IZenzo 13:48, 50; 14:1-5) Kuyafana ke nanamhlanje. Nangona abaninzi beyiheshela kude inyaniso yeBhayibhile, siyaqhubeka sifuna abo baya kuyamkela.—Mateyu 10:11-13.
Intetho eye yalandela ixubushe ngocelomngeni lokufikelela abanye ngesigidimi sobomi. Ekubeni ngoku kunzima nangakumbi ukufumana abantu emakhayeni abo, kufuneka sicokise yaye sibe namacebo ukuze sifikelele abaninzi kangangoko kunokwenzeka ngesigidimi soBukumkani. Kumazwe amaninzi, abavakalisi beendaba ezilungileyo bafumana imiphumo encumisayo ngokunikela ubungqina ngomnxeba nangokushumayela kwiindawo zoshishino, ngaloo ndlela befikelela kwanabo kunzima ukubafumana.
Intetho enomxholo othi “Ukufundisa Abafundi Zonke Izinto UKristu Awaziyalelayo” iye yagxininisa ukubaluleka kokuba nobuchule kubulungiseleli bethu. Ubuchule bethu bokufundisa buyaloleka xa sifunda kwabanye size sisebenzise uqeqesho olusemagqabini esilufumana kwiintlanganiso zebandla. Njengoko sisiba nobuchule ekufundiseni, sifumana uvuyo nolwaneliseko olungakumbi kumsebenzi wethu wokunceda abantu bafunde inyaniso yeBhayibhile.
Ucwangciso lwakusasa luqukunjelwe ngentetho ebixubusha ngentsingiselo yokuzahlulela nokubhaptizwa. Enye yeengongoma ezikhankanywe sisithethi yethi ukuba sikholose ngokupheleleyo ngoThixo yaye sizabalazela ukwenza ukuthanda kwakhe ngokusuk’ entliziyweni, uya kusisikelela aze asilondoloze. Esinye isilumko sakha sabhala sisithi: “Uze umazi yena [uThixo] ezindleleni zakho zonke; wowulungelelanisa umendo wakho.” (IMizekeliso 3:6) Ubhaptizo obelubangel’ imigcobo luye lwayimbalasane yale ndibano lubonisa ukuba abaninzi baqalisile ukuphila ngendlela kaThixo.
Emva kwekhefu, ucwangciso lwasemva kwemini luqalise ngentetho enomxholo othi “Ukukhonza Sikhangele Kubomi Obungapheliyo.” Injongo kaThixo yokuba abantu abathobelayo bamkhonze ngonaphakade emhlabeni iza kuzaliseka. Ngoko, hayi indlela ekufaneleke ngayo ukuba sijolise iingcamango, iinjongo namathemba ethu ekukhonzeni uYehova ngonaphakade! Ngoxa sifuna ukuyigcina ngokusondeleyo engqondweni ‘imini kaYehova,’ kubalulekile ukuba sikhumbule ukuba usukelo lwethu kukumkhonza ngonaphakade. (2 Petros 3:12) Ukungalazi elona xesha uYesu aya kuyiphumeza ngalo impindezelo kaThixo kusigcina sithe qwa yaye yonke imihla kusinika ithuba lokubonisa ukuba ukukhonza kwethu uYehova akuqhutywa kukuzingca.
Iintetho ezimbini eziye zalandela zixubushe isahluko sesi-4 sencwadi kaPawulos eya kwabase-Efese. Phakathi kwezinto eziye zaxutyushwa yintsikelelo yokuba ‘nezipho ezikuhlobo lwabantu,’ amadoda aneemfaneleko zokomoya namiselwe ngomoya oyingcwele. Aba badala banikela iziluleko nolwalathiso olwenza kungenelwe kwathina ngokomoya. Incwadi ephefumlelweyo kaPawulos ikwabongoza amaKristu ukuba ambathe “ubuntu obutsha.” (Efese 4:8, 24) Ubuntu bobuthixo buquka iimpawu ezinjengemfesane, ububele, ukuthobeka kwengqondo, ubulali, ukuzeka kade umsindo nothando.—Kolose 3:12-14.
Ukubeka iliso elibukhali kwindlela esihamba ngayo kubandakanya ukuzigcina singenabala ehlabathini—itshilo intetho eye yalandela. Kufuneka silungelelane xa sikhetha indlela yokuzonwabisa, izinto esizenzayo ekuhlaleni nosukelo lwezinto eziphathekayo. Ngokusebenzisa isiluleko esikuYakobi 1:27 sokuba sizigcine singenabala ehlabathini, sinandipha ukuma okucocekileyo noThixo nesazela esikhululekileyo. Kwakhona sinokuphila ubomi obunenjongo size sisikelelwe ngoxolo, inkqubela yokomoya nangabahlobo abalungileyo.
Emva koko kulandele ungcelele lweentetho ezintathu olunomxholo othi “Lutsha—Landelani Indlela KaThixo.” Ekubeni besazi ukuba uThixo uyabathanda yaye uyayixabisa imigudu yabo yokuxhasa unqulo olunyulu, abaselula bafanele baqeqeshe amandla abo okucinga baze bamkhonze ngokuthembeka. Enye indlela yokukhulisa amandla kukufunda iLizwi likaThixo imihla ngemihla nokucamngca ngalo. Xa sisenjenjalo, sinokufikelela ekuzazini iindlela zikaYehova. (INdumiso 119:9-11) Amandla engqondo akhuliswa nakukwamkela isiluleko esihle esivela kubazali, kubadala nakwiimpapasho zoMbutho. Ngokusebenzisa amandla alo engqondo ngendlela efanelekileyo, ulutsha luyakuxhathisa ukuthi swii zizinto eziphathekayo, intetho engcolileyo nokuzonwabisa ngokugqithisileyo okulufanisa neli hlabathi licezela kude kuThixo. Ngokuphila ngendlela kaThixo, abaselula nabakhulileyo banako ukuphumelela.
Intetho yokugqibela yolo suku ibinomxholo othi “Umdali—Ubuntu Bakhe Neendlela Zakhe.” Emva kokuchaza ukuba amawaka ezigidi zabantu akamazi uMdali, isithethi sithe: “Eyona ntsingiselo yobomi ixhomekeke ekwazini uMdali, uThixo wethu ongumntu; ukwazi ubuntu bakhe; nokulandela iindlela zakhe. . . . Kukho izinto ezingehlabathi lethu nangathi onokuzalatha ukunceda abantu bamkele uMdali baze bamazi kakuhle.” Emva koko isithethi sixubushe ngobungqina obubonisa ukuba ukho uMdali olumkileyo nonothando. Le ntetho ifikelele incopho ngokukhululwa kwencwadi entsha ethi—Is There a Creator Who Cares About You?
“Nantsi Indlela; Hambani Ngayo”
Lo ibingumxholo wosuku lwesithathu lwendibano. (Isaya 30:21) Ucwangciso luqalise ngodlwabevu longcelele lweentetho ezintathu ebezixubusha ngombono kaHezekile wetempile. Lo mbono unentsingiselo ebalulekileyo kubantu bakaThixo namhlanje, ekubeni uphathelele unqulo olunyulu kwixesha lethu. Ukuze uwuqonde lo mbono kufuneka wazi oku: ilungiselelo letempile kaYehova enkulu yokomoya limela ilungiselelo lakhe lonqulo olunyulu. Njengoko bekungenwa nzulu kwiinkalo zalo mbono, abaphulaphuli baye bacingisisa ngoko bakwenzayo ukuxhasa umsebenzi owenziwa ngabaveleli abanothando bentsalela ethanjisiweyo kunye nabo baza kuba ngamalungu odidi lwenkosana.
Ithe yakuya iqina imini, kwabakho umdlalo weBhayibhile omhle nobunabadlali abanxibe izinxibo zamandulo. Lo mdlalo ubunomxholo othi “Zintsapho—Yenzani Ufundisiso LweBhayibhile Lwemihla Ngemihla Lube Yindlela Yenu Yokuphila!” Ububonisa ukholo nenkalipho yamaHebhere amathathu angazange avume ukuqubuda kumfanekiso wegolide owawumiswe nguKumkani uNebhukadenetsare waseBhabhiloni. Eyona njongo yalo mdlalo ibikukubonisa ukuba iBhayibhile asiyoncwadi nje equlethe imbali yamandulo kodwa isiluleko sayo siyingenelo ngokwenene kwabaselula nakwabakhulileyo ngokufanayo namhlanje.
Ucwangciso lwasemva kwemini ibilixesha lentetho yesidlangalala enomxholo othi “Ekuphela Kwendlela Esa Kubomi Obungunaphakade.” Emva kokulanda imbali yokuwela koluntu esonweni nasekufeni, isithethi siqukumbele ngala mazwi axhokonx’ iingcinga: “Umxholo weBhayibhile wosuku lwanamhlanje lwendibano nguIsaya isahluko 30, indinyana 21, ethi: ‘Iindlebe zakho zive ilizwi ngasemva kwakho, lisithi, Nantsi indlela; hambani ngayo, nokuba nisinga ekunene, nokuba nisinga ekhohlo.’ Siliva njani eli lizwi? Siliva ngokuphulaphula iLizwi likaThixo, iBhayibhile Engcwele nangokulandela ulwalathiso uMyaleli wethu Ozukileyo, uYehova uThixo, asinika lona ngayo nangentlangano yakhe yamaKristu ale mihla. Eneneni, ukwenza oku kuphela kwendlela esa ebomini obungunaphakade.”
Emva koshwankathelo lwenqaku elifundisiswayo leMboniselo laloo veki kuye kwalandela intetho yokuqukumbela, ebinomxholo othi “Qhubekani Nihamba Kwindlela KaYehova.” Inxalenye yayo ibiyimpinda yeengongoma eziyintloko zocwangciso. Emva koko isithethi siye safunda isigqibo esivakalisa uzimiselo lwethu lokuqhubeka siphila ngendlela kaThixo.
Esi sigqibo siqukumbele ngala mazwi ahlab’ umxhelo: “Siqinisekile ukuba ukuphila ngemigaqo, isiluleko noqeqesho lweZibhalo kuyeyona ndlela ifanelekileyo yokuphila kule mihla yaye kusibekela isiseko soko kuza kwenzeka kwixesha elizayo, ukuze sibubambe nkqi ubomi bokwenene. Ngaphezu kwako konke, senza esi sigqibo ngenxa yokuba siyamthanda uYehova uThixo ngentliziyo, ngomphefumlo, ngengqondo nangamandla ethu ephela!” Bonke abebekho baye bangqina ngoewe ovakalayo!
[Ibhokisi/Umfanekiso okwiphepha 8]
Ngaba Ukho UMdali Okukhathalelayo?
Le ncwadi intsha enalo mxholo inikela ubungqina obeyisayo bobukho boMdali, uYehova, ibe ixubusha iimpawu zakhe. Ilungiselelwe ngokukhethekileyo abo banemfundo yehlabathi kodwa abangakholelwa kuThixo. Kwakhona le ncwadi enamaphepha ali-192 iza kuqinisa ukholo lwabo basele bekholelwa kuThixo, yandise ulwazi lwabo ngobuntu nangeendlela zakhe.
Incwadi ethi Is There a Creator Who Cares About You? ayiqikeleli ukuba umfundi uyakholelwa kuThixo. Kunoko, ixubusha indlela izinto ezifunyaniswe zizazinzulu kunye neengcamango zazo ezibungqinela ngayo ubukho boMdali. Phakathi kwezahluko zayo kukho esinomxholo othi “What Can Add Meaning to Your Life? [Yintoni Enokwenza Ubomi Bakho Bube Nentsingiselo?],” nesithi “How Did Our Universe Get Here?—The Controversy [Wabakho Njani Ummandla Wethu Wendalo?—Imbambano],” kunye nesithi “How Unique You Are! [Indlela Odalwe Ngokwahluke Ngayo!]” Ezinye izahluko zixubusha ngesizathu sokuba siqiniseke ukuba iBhayibhile iphefumlelwe nguThixo. Le ncwadi intsha ikwasibonisa umfanekiso opheleleyo weBhayibhile, osityhilela ngobuntu nangeendlela zoMdali. Le ncwadi ayaneli kuxubusha ngesizathu sokuba uThixo evumele ukubandezeleka okungaka kodwa ikwachaza nendlela aza kukuphelisa ngayo ngonaphakade.
[Imifanekiso ekwiphepha 7]
Baninzi abaye babhaptizwa
[Imifanekiso ekwiphepha 7]
Incwadana entsha enemifanekiso yakhululwa nguA. D. Schroeder, ilungu leQumrhu Elilawulayo lamaNgqina kaYehova
[Imifanekiso ekwiphepha 8, 9]
Umdlalo omnandi uye wakhuthaza ukufunda iBhayibhile imihla ngemihla