Ibandla LamaKristu Umthombo Woncedo Olomelezayo

UPOPI, ibhinqa elisekuqaleni kwiminyaka yalo yama-20 ubudala, wayekhathezeke gqitha ngenxa yemeko yentsapho yakowabo eyayiquka ukungabi nalunxibelelwano lukhululekileyo nabazali bakhe.a Emva kokuphalaza imbilini yakhe kumdala ongumKristu nenkosikazi yakhe, wababhalela esithi: “Enkosi kakhulu ngokuzipha ithuba lokuthetha nam. Anikwazi oko kukuthethayo kum ukundikhathalela kwenu. Ndiyambulela uYehova ngokundinika abantu endinokubathemba nendinokuthetha nabo.”

UToula, ibhinqa elisandul’ ukuba ngumhlolokazi elinabantwana ababini abakwishumi elivisayo, lazifumana lisengxakini eyalicinezela ngokweemvakalelo yaza yalishiya lingenamali. Lona nabantwana balo babetyelelwa rhoqo baze bakhuthazwe sisibini esitshatileyo esingamaKristu esikwelo bandla. Xa lakwazi ukuyisingatha ngokupheleleyo imeko yalo, labathumelela ikhadi, lisithi: “Ndisoloko ndinikhumbula emithandazweni yam. Ndikhumbula izihlandlo eziliqela enanindinceda ngazo nenanindixhasa ngazo.”

Ngaba maxa wambi uvakalelwa kukuba ‘usindwa ngumthwalo’ ngenxa yeengcinezelo ezandayo zeli hlabathi? (Mateyu 11:​28) Ngaba ‘ixesha nesihlo’ ziye zabonakalisa ubomi bakho ngamava abuhlungu? (INtshumayeli 9:​11) Akuwedwa. Kodwa njengokuba amawaka abantu abaxhwalekileyo baye bafumanisa, nawe usenokufumana uncedo lokwenene kwibandla lamaKristu lamaNgqina kaYehova. Kwinkulungwane yokuqala yeXesha Eliqhelekileyo, umpostile uPawulos wafumanisa ukuba amanye amakholwa ‘ayeluncedo olomelezayo’ kuye. (Kolose 4:​10, 11) Usenokuba namava afanayo.

Inkxaso Noncedo

KwiZibhalo zamaKristu zesiGrike, igama elithi “ibandla” liguqulelwe kwigama lesiGrike elithi ek·kle·siʹa, elithetha iqela labantu elihlanganisene ndawonye. Okuqukwe kwelo gama yingcamango yokuba yimbumba nenkxaso emanyeneyo.

Ibandla lamaKristu liphakamisa inyaniso yeLizwi likaThixo lize livakalise iindaba ezilungileyo zoBukumkani bakhe. (1 Timoti 3:​15; 1 Petros 2:⁠9) Noko ke, kwakhona ibandla linikela inkxaso yokomoya lize libancede abo banxulumene nalo. Kulo, ubani unokufumana iqela labahlobo abanothando, abanenkathalo, abakulungeleyo nabakufunayo ukunceda baze bomeleze abanye xa becinezelekile.​—⁠2 Korinte 7:​5-⁠7.

Abakhonzi bakaYehova bebesoloko bekhuselekile yaye benqabisekile kwibandla lakhe. Umdumisi wabonisa ukuba wayevuya yaye enqabisekile phakathi kwabantu bakaThixo abahlanganiseneyo. (INdumiso 27:​4, 5; 55:​14; 122:⁠1) Ngokufanayo namhlanje, ibandla lamaKristu lumanyano lwamakholwa akhanayo nakhuthazanayo.​—⁠IMizekeliso 13:​20; Roma 1:​11, 12.

Amalungu ebandla afundiswa ukuba ‘asebenze oko kulungileyo kubo bonke, ngokukodwa kwabo bahlobene nawo elukholweni.’ (Galati 6:​10) Imfundiso esekelwe eBhayibhileni ayifumanayo iwashukumisela ukuba abe nothando nomsa wobuzalwana. (Roma 12:​10; 1 Petros 3:⁠8) Abazalwana noodade bokomoya ebandleni bashukumiseleka ukuba babe nobubele, babe noxolo, baze babe nomsa. (Efese 4:⁠3) Kunokuba babe ngabakhonzi nje, babonisa inkxalabo enothando ngabanye.​—⁠Yakobi 1:⁠27.

Ngoko ke, ebandleni, abo baxinezelekileyo bazuza uyolo lokuba kwimeko efana neyentsapho. (Marko 10:​29, 30) Ukuziva beyinxalenye yeqela elinobunye nelinothando kuyabomeleza. (INdumiso 133:​1-⁠3) Ngebandla, ‘ikhoboka elithembekileyo neliyingqondi’ linikela ‘ukutya kokomoya ngexesha elifanelekileyo.’​—⁠Mateyu 24:⁠45.

Uncedo Oluvela Kubaveleli Abanothando

Amalungu ebandla lamaKristu anokulindela ukufumana kulo abalusi abafanelekayo abanothando nabaqondayo, abanikela inkxaso yokomoya nokhuthazo. Abalusi abaneempawu ezinjalo ‘banjengendawo yokuzimela umoya, neyokusithela esiphangweni; baba njengemijelo yamanzi emqwebedwini.’ (Isaya 32:​1, 2) Abadala abanyulwe ngomoya, okanye abaveleli, banyamekela abantu bakaThixo abanjengezimvu, bakhuthaze abagulayo nabaxhwalekileyo, baze bazabalazele ukubuyisela abo banxaxhayo.​—⁠INdumiso 100:⁠3; 1 Petros 5:​2, 3.

Kakade ke, iqumrhu labadala bebandla asiloqela labanyangi abaqeqeshiweyo okanye oogqirha abakwazi ukunyanga izigulo zomzimba nezengqondo ajamelana nazo amanye amakholwa. Kule nkqubo yezinto, abagulayo ‘basafuna ugqirha.’ (Luka 5:​31) Noko ke, abalusi abanjalo banokubanceda abo banentswelo yokomoya. (Yakobi 5:​14, 15) Nanini na kunokwenzeka, abadala baphinda balungiselele olunye uncedo.​—⁠Yakobi 2:​15, 16.

Ngubani oxhasa elo lungiselelo lothando? NguYehova uThixo ngokwakhe! Umprofeti uHezekile umchaza uYehova njengothi: “Ndiya kuwukhathalela umhlambi wam, ndiwuvelele. . . . Ndiwuhlangule ezindaweni zonke, owaba lusali kuzo . . . Mna ndiya kuwalusa umhlambi wam, ndiwenze ubuthe nam.” Kwakhona uThixo uzixhalabele izimvu ezingenamandla nezibuthathaka.​—⁠Hezekile 34:​11, 12, 15, 16.

Uncedo Lokwenene Ngexesha Elifanelekileyo

Ngaba lukho ngokwenene uncedo lwentsapho kwibandla lamaKristu? Ewe, yaye le mizekelo ilandelayo ibonisa iimeko ezahlukeneyo ibandla elinceda kuzo.

◆ Ukufelwa ngomthandayo. Umyeni ka-Anna wafa emva kokugula gqitha. Uthi: “Ukususela ngoko, abazalwana abangamaKristu baye babonakalisa kum uthando olufudumeleyo. Amazwi anothando nenkxaso nokhuthazo oluqhubekayo oluvela kwamanye amakholwa, kuquka nokundanga kwawo okusuka entliziyweni, kuye kwandinceda kwandikhuthaza kunokuba ndidandatheke, yaye ndiyambulela uYehova. Uthando lwabo luye lwandenza ndaziva ndixhaswe ngokwenene, ndomelele, ndinyanyekelwe ngobubele.” Nawe usenokuba namava anjalo ukuba buhlungu okufelwa ngomthandayo. Ngamaxesha anjalo, amalungu ebandla anokunikela ukhuthazo olufuneka ngokwenene nenkxaso engokweemvakalelo.

◆ Ukugula. UArthur, umveleli ohamba-hambayo wasePoland, wayetyelela amabandla akuMbindi weAsia ukuze awakhuthaze ngokomoya. Ngesinye isihlandlo xa wayetyelele wagula gqitha, yaye waba neengxaki eziliqela ngoxa wayechacha. Enoxabiso olunzulu uArthur ukhumbula esithi: “Ndifuna ukunixelela indlela abazalwana noodade [kwisixeko esiseKazakhstan] abandinyamekela ngayo. Abazalwana noodade, uninzi lwabo endingabaziyo​—⁠kwanabo banomdla​—⁠bandiphathela imali, ukudla, namayeza. . . . Yaye bakwenza oko ngovuyo olukhulu.

“Khawufan’ ucinge indlela endavakalelwa ngayo xa ndafumana imvulophu enemali nale leta ilandelayo: ‘Mzalwana, ndikuthumelela imibuliso efudumeleyo. Umama undiphe imali ukuba ndithenge i-ice cream, kodwa ndiye ndagqiba kwelokuba ndikuphe yona ukuze uthenge amayeza. Nceda ube bhetele ngokukhawuleza. UYehova ufuna siphile ixesha elide. Ngeminqweno emihle. Yaye sibalisele amanye amabali amnandi nafundisayo. Ngokubhalwa nguVova.’ ” Ewe, njengokuba kubonisiwe kule meko, abaselula nabakhulileyo ebandleni banokunikela ngoncedo olomelezayo xa kugulwa.​—⁠Filipi 2:​25-⁠29.

◆ Udandatheko. UTeri wayenomnqweno onzulu wokukhonza njengovulindlela, okanye umvakalisi woBukumkani wexesha elizeleyo. Noko ke, ngenxa yobunzima, kwafuneka ayeke ukuba nguvulindlela. Uthi: “Ndaziva ndinetyala gqitha lokuzama ukukhonza kwesi sigxina ndize ndingagqibi nonyaka lo.” UTeri exhalabile wayekholelwa kwelokuba ukukholisa uYehova kwakuxhomekeke kubungakanani benkonzo oyinikela kuye. (Thelekisa uMarko 12:​41-44.) Edandatheke ngokwenene, wazinxwema ebantwini. Kodwa uncedo oluhlaziyayo lwavela ebandleni.

UTeri ukhumbula oku: “Omnye udade onguvulindlela wayekulungele ukundinceda waza wandiphulaphula njengokuba ndandichaza indlela endivakalelwa ngayo. Kwikhaya lakhe ndaphuma ndivakalelwa ngathi ndothulwe owona mthwalo ubunzima. Ukususela ngoko, lo dade unguvulindlela nomyeni wakhe, ongumdala ebandleni, bandinceda gqitha. Babenditsalela umnxeba yonke imihla befuna ukuqonda ukuba ndinjani na. . . . Babendivumela ukuba ndibekho kwisifundo sabo sentsapho ngamaxesha athile, esiye sandinceda ukuba ndibone ukubaluleka kokuba iintsapho zihlale zisondelelene.”

Asinto ingaqhelekanga ukuba abaninzi​—⁠kwanamaKristu azahluleleyo​—⁠adandatheke, adimazeke, aze abe ngamalolo. Hayi indlela esinokuvuya ngayo ngenxa yoncedo lothando nolokungazingci olufumaneka kwibandla likaThixo!​—⁠1 Tesalonika 5:⁠14.

◆ Iintlekele neengozi. Zithelekelele ukwimeko efanayo neyentsapho yabantu abane abaphulukene nazo zonke izinto zabo xa kwatsha indlu yabo. Kungekudala bafumana oko bakubiza ngokuba “ngamava akhuthazayo aya kusoloko esichukumisa nawabethelela kuthi uthando lokwenene phakathi kwabantu bakaYehova.” Bacacisa besithi: “Phantse kwangoko satsalelwa iminxeba ngabazalwana noodade bethu bokomoya abaninzi besixhasa yaye bevakalisa uvelwano. Kwangena umnxeba emva komnye. Inkxalabo nothando lwabo bonke lwasishukumisa kangangokuba sasilila ngenxa yombulelo.”

Kungekudala, abadala bebandla baqokelela iqela labazalwana, yaye kwintsuku nje ezimbalwa, bayakhela indlu entsha le ntsapho. Ummelwane wakhuza: “Onjani wona umbono! Phaya kusebenza zonke iintlobo zabantu​—⁠amadoda, amabhinqa, abantu abantsundu, nabantu abathetha iSpanish nesiPhuthukezi!” Obu yayibubungqina obucacileyo bothando lobuzalwana.​—⁠Yohane 13:⁠35.

Kwakhona amanye amaKristu anikela kule ntsapho ngempahla, ngokutya nangemali. Lo bawo ugqabaza enjenje: “Oku kwakusebudeni bexesha leKrismesi xa bonke abantu bephana izipho, kodwa sinyanisekile sisenokuthi akakho omnye umntu owanandipha ububele nesisa njengathi.” Bongezelela besithi: “Ukucinga ngomlilo kuyaphela ngokuthe ngcembe yaye kuthatyathelwa indawo kukucinga ngezinto ezixabisekileyo nobubele babahlobo abalungileyo. Simbulela gqitha uBawo wethu wasezulwini onothando, uYehova, ngokuba sinentsapho emanyeneyo yabazalwana emhlabeni, yaye sikuvuyela gqitha ukuba yinxalenye yayo!”

Kakade ke, uncedo olunjalo asinto isoloko isenzeka, okanye elindelekileyo,kuzo zonke iintlekele ezinjalo. Kodwa esi sihlandlo sisiqinisekisa ngenkxaso esenokunikelwa libandla.

Ubulumko Baphezulu

Abaninzi baye bafumana omnye umthombo woncedo namandla kwibandla lamaKristu. Nguwuphi lowo? Iimpapasho ezilungiselelwa ‘likhoboka elithembekileyo neliyingqondi.’ Ezibalasele ngakumbi kwezi ngulindixesha IMboniselo noVukani! Ukuze zinikele isiluleko esikhanyayo nolwalathiso olusebenzisekayo, ezi mpapasho zithembela ngokuyintloko kubulumko bukaThixo obufumaneka eBhayibhileni. (INdumiso 119:​105) Inkcazelo yeZibhalo yongezelelwa luphando olusengqiqweni nolunokuthenjwa kwimibandela enjengodandatheko lwasengqondweni, ukuchacha ekuxhatshazweni, iingxaki zasekuhlaleni nezemali, ucelomngeni abajamelana nalo abaselula, neenzima ezikumazwe asakhasayo. Ngaphezu kwako konke, ezi mpapasho ziphakamisa indlela kaThixo njengeyona ndlela ibalaseleyo yokuphila.​—⁠Isaya 30:​20, 21.

Nyaka ngamnye, iWatch Tower Society ifumana amawaka eeleta ezibonakalisa uxabiso. Ngokomzekelo, ngokuphathelele elinye inqaku likaVukani! elithetha ngokuzibulala, umfana waseRashiya wabhala: “Ngenxa yokusoloko ndidandathekile, . . . ndiye ndacinga ngokuzibulala amaxesha amaninzi. Eli nqaku liye lalomeleza ukholo lwam lokuba uThixo uya kundinceda ndikwazi ukuhlangabezana neengxaki zam. Ufuna ndiphile. Ndiyambulela ngenkxaso yakhe enikelwe kweli nqaku.”

Ukuba iingxaki ezingapheliyo kweli hlabathi kubonakala kunzima ukuhlangabezana nazo, unokuqiniseka ukuba kukho indawo yokuzimela ekhuselekileyo kwibandla lamaKristu. Enyanisweni, ukuba le ntlango ileli hlabathi lingenaluthando ikugqiba amandla, usenokufumana uncedo lokukomeleza kwintlangano kaYehova. Emva kokufumana inkxaso enjalo, nawe usenokuphinda amazwi ebhinqa elingumKristu elajamelena ngokuphumelelayo nokugula okungamandla komyeni walo elabhala lathi: “Ngenxa yothando nenyameko eniyibonisileyo kuthi, ndivakalelwa ngathi uYehova uye wasithwala kule ngxaki ngentende yesandla sakhe. Hayi indlela endinombulelo ngayo ngokuba yinxalenye yentlangano ebalaseleyo!”

[Imibhalo esemazantsi]

[Imifanekiso ekwiphepha 26]

Sinokunikela ngoncedo olomelezayo kwabagulayo, kwabafelweyo, nakwabanye