Ukuxelisa UThixo Wenyaniso
“Yibani ngabaxelisa uThixo, njengabantwana abaziintanda.”—EFESE 5:1.
1. Yintoni abanye abayikholelwayo ngokuphathelele inyaniso, yaye kutheni ingcamango yabo iphosakele nje?
“YINTONI na inyaniso?” (Yohane 18:38) Loo mbuzo wempoxo owabuzwa nguPontiyo Pilato malunga nama-2 000 eminyaka eyadlulayo, ubonisa ukuba akulula ukuyiqonda inyaniso. Abaninzi namhlanje bayakuvuma oko. Isiseko senyaniso siyahlaselwa. Mhlawumbi wakha weva kusithiwa mntu ngamnye uyazigqibela ngoko kuyinyaniso, okanye kusithiwa ayikho inyaniso epheleleyo, okanye inyaniso isoloko iguquguquka. Ingcamango enjalo iphosakele. Eyona njongo iyintloko yokuba abantu bafunde baze benze nophando, kukuba bazi inyaniso ngehlabathi esiphila kulo. Inyaniso ayixhomekekanga kuluvo lomntu ngamnye. Ngokomzekelo, umphefumlo womntu uyafa okanye awufi. USathana ukho okanye akakho. Ubomi bunenjongo okanye abunayo. Kwimeko nganye kwezi, inye kuphela impendulo echanileyo. Enye iyinyaniso, enye ibubuxoki; azinakuba yinyaniso zombini.
2. UYehova unguThixo wenyaniso ngaziphi iindlela, yaye yiyiphi imibuzo esiza kuxubusha ngayo ngoku?
2 Kwinqaku elingaphambi kweli, siye sachaza ukuba uYehova unguThixo wenyaniso. Uyayazi inyaniso ngayo yonke into. Ngokwahluke ngokupheleleyo kutshaba lwakhe olungumkhohlisi uSathana uMtyholi, uYehova usoloko enyanisekile. Kanti okungakumbi kukuba, uYehova uyayidandalazisa inyaniso kwabanye. Umpostile uPawulos wabongoza amaKristu esithi: “Yibani ngabaxelisa uThixo, njengabantwana abaziintanda.” (Efese 5:1) NjengamaNgqina kaYehova, sinokumxelisa njani ekuthetheni inyaniso nasekuphileni ngokuvisisana nayo? Kutheni kubalulekile nje oko? Yaye siqiniseka njani ukuba uYehova uyakholiswa ngabo benza umzamo wokuhlala benyanisekile? Makhe sibone.
3, 4. Umpostile uPawulos noPetros bakuchaza njani oko kwakuza kwenzeka “ngemihla yokugqibela”?
3 Namhlanje ubuxoki bande kakhulu elunqulweni. Njengoko isitsho ingxelo ephefumlelweyo yompostile uPawulos, abantu abaninzi kule “mihla yokugqibela” banembonakalo yozimiselo lobuthixo kodwa abaphili ngokuvisisana nalo. Abanye ‘abonakele ngokupheleleyo engqondweni’ bayayigatya inyaniso. Kanti bona ‘abantu abangendawo namabhedengu bahambela phambili ebubini, belahlekisa yaye belahlekiswa.’ Nangona abantu abanjalo behlala befunda, abaze bafikelele “kulwazi oluchanileyo lwenyaniso.”—2 Timoti 3:1, 5, 7, 8, 13.
4 Naye umpostile uPetros waphefumlelwa ukuba abhale ngemihla yokugqibela. Kanye njengokuba wayeprofetile, abantu abaneli nje ukugatya inyaniso kodwa bakwanyelisa neLizwi likaThixo kwanabo bavakalisa inyaniso ekulo. “Ngokweminqweno yabo,” abo bagculeli bayayilibala into yokuba ihlabathi lomhla kaNowa lakhukuliswa ngamanzi kanogumbe, nto leyo eyayifuzisela umhla womgwebo ozayo. Iza kubhanga iminqweno yabo xa lifika ixesha likaThixo lokutshabalalisa abo bangamhloneliyo.—2 Petros 3:3-7.
Abakhonzi BakaYehova Bayayazi Inyaniso
5. Yintoni umprofeti uDaniyeli awathi iza kwenzeka ‘ngexesha lesiphelo,’ yaye sizaliseke njani esi siprofeto?
5 Xa wayechaza “ixesha lesiphelo,” umprofeti uDaniyeli wachaza imeko eyahlukileyo eyayiza kubakho phakathi kwabantu bakaThixo—ukuhlaziywa konqulo lwenyaniso. Wabhala wathi: “Abaninzi baya kuphengulula, yaye ulwazi lokwenyaniso luya kuba luninzi.” (Daniyeli 12:4) Abantu bakaYehova abalahlekiswa okanye bamfanyekiswe nguMkhohlisi omkhulu. Ngokuphengulula kwabo iBhayibhile, baye bafumana ulwazi lokwenene. Ngenkulungwane yokuqala, uYesu wabakhanyisela abafundi bakhe. “Wazivula ngokupheleleyo iingqondo zabo ukuba zicacelwe yintsingiselo yeZibhalo.” (Luka 24:45) Nanamhlanje, uYehova uye wenza okufanayo. NgeLizwi lakhe, ngomoya wakhe, nangentlangano yakhe, uye wenza ukuba izigidi zabantu emhlabeni wonke ziyiqonde inyaniso.
6. Yiyiphi inyaniso eseBhayibhileni abayiqondayo abantu bakaThixo namhlanje?
6 Thina bantu bakaThixo sinezinto ezininzi esizaziyo ebesingazazi ngaphambili. Siyazazi iimpendulo zemibuzo eye yadida izilumko zeli hlabathi kangangamawaka eminyaka. Ngokomzekelo, siyasazi isizathu sokuba abantu babandezeleke, bafe, yaye bangakwazi ukuzisa uxolo nonqabiseko emhlabeni. Kwakhona siye sanikwa umfanekiso-ngqondweni wekamva elihle—uBukumkani bukaThixo, umhlaba oyiparadesi, nobomi obufezekileyo obungunaphakade. Siyamazi uYehova, onguLowo Wongamileyo. Siye safunda ngobuntu bakhe obunomtsalane nangoko simele sikwenze ukuze asisikelele. Ukwazi kwethu inyaniso kwenza ukuba singakhohliswa bubuxoki. Ukuphila ngokuvisisana nenyaniso kuyasikhusela ekuchitheni ixesha kwizinto ezingabalulekanga, kwenza sizuze okuhle ebomini, yaye kusinika ithemba lekamva elimangalisayo.
7. Ngoobani abanokuyiqonda inyaniso eseBhayibhileni, yaye ngoobani abangenakuyiqonda?
7 Ngaba uyayiqonda inyaniso eseBhayibhileni? Ukuba kunjalo, usikelelekile ngokwenene. Umbhali wencwadi udla ngokubhala ngendlela eza kuba nomtsalane kwiqela elithile labantu. Ezinye iincwadi zibhalelwe izifundiswa, ezinye zibhalelwe abantwana, kanti ezinye zibhalelwe abantu abanobugcisa obuthile. Nangona iBhayibhile ifumaneka kumntu wonke, kodwa inokuqondwa ize inanditshwe kuphela liqela elithile labantu. UYehova uyibhalele abantu abathobekileyo, nabalulamileyo emhlabeni. Abantu abanjalo banokuyiqonda iBhayibhile, ingakhathaliseki imfundo yabo, izithethe zabo, ukubaluleka kwabo, nohlanga abalulo. (1 Timoti 2:3, 4) Kanti bona abantu abangatyekelanga kokulungileyo abanakuyiqonda inyaniso eseBhayibhileni, nokuba bangaba krelekrele okanye bafunde kangakanani na. Abantu abazikhukhumalisayo nabanekratshi abanakuyiqonda inyaniso exabisekileyo eseLizwini likaThixo. (Mateyu 13:11-15; Luka 10:21; IZenzo 13:48) NguThixo kuphela onokubhala incwadi elolo hlobo.
Abakhonzi BakaYehova Banyanisekile
8. Kwakutheni ukuze uYesu abe ngumfuziselo wenyaniso?
8 NjengoYehova, amaNgqina akhe athembekileyo nawo anyanisekile. UYesu Kristu oliNgqina eliyintloko likaYehova, wayingqina inyaniso ngezinto awazifundisayo nangendlela awaphila nawafa ngayo. Wanamathela kwinyaniso yoko uYehova wakuthethayo nawakuthembisayo. Ngaloo ndlela, uYesu yena ngokwakhe waba ngumfuziselo wenyaniso, njengoko naye watshoyo.—Yohane 14:6; ISityhilelo 3:14; 19:10.
9. Zithini iZibhalo ngokuthetha inyaniso?
9 UYesu “wayezele bububele obungasifanelanga nayinyaniso” yaye ‘kwakungekho nkohliso emlonyeni wakhe.’ (Yohane 1:14; Isaya 53:9) AmaKristu okwenyaniso alandela umzekelo kaYesu wokunyaniseka kwabanye. UPawulos wawalumkisa wathi amakholwa: “Ngamnye kuni makathethe inyaniso nommelwane wakhe, ngenxa yokuba singamalungu omnye elomnye.” (Efese 4:25) Ngaphambilana, umprofeti uZekariya wabhala wathi: “Thethani inyaniso omnye nomnye.” (Zekariya 8:16) AmaKristu anyanisekile kuba afuna ukukholisa uThixo. UYehova unyanisekile yaye uyayazi intlungu ebangelwa bubuxoki. Ngoko, ngokufanelekileyo ulindele ukuba abakhonzi bakhe bathethe inyaniso.
10. Yintoni ebangela abantu baxoke, yaye oko kunayiphi imiphumo emibi?
10 Abaninzi bakubona ukuxoka kuyindlela elula yokufumana oko bakufunayo. Abantu babhenela ekuxokeni ukuze baphephe isohlwayo, bazuze okuthile, okanye badunyiswe ngabanye. Kodwa ukuziqhelisa ukuxoka kungumkhuba ombi. Okubi nangakumbi kukuba, umntu olixoki akamkholisi uThixo. (ISityhilelo 21:8, 27; 22:15) Xa abantu besazi ukuba sisoloko sithetha inyaniso, bayakukholelwa oko sikuthethayo; bayasithemba. Kodwa ukuba basibhaqe sixoka, nokuba kukanye nje, abasathembi kwanto esiyithethayo emva koko. Intetho yaseAfrika ithi: “Ubuxoki obunye bonakalisa iinyaniso eziliwaka.” Enye ithi: “Ixoki alikholelwa nokuba selithetha inyaniso.”
11. Ukunyaniseka kubandakanya okungakumbi kunokuthetha nje inyaniso ngayiphi indlela?
11 Ukunyaniseka akupheleli nje ngokuthetha inyaniso. Kubandakanya indlela ophila ngayo. Ubuntu bakho. Sibachazela inyaniso abanye kungekuphela nje ngoko sikuthethayo kodwa kwanangoko sikwenzayo. Umpostile uPawulos wabuza wathi: “Wena ufundisa uthile ongomnye, akuzifundisi na wena? Wena, ushumayela usithi ‘Uze ungebi,’ ngaba uyeba na? Wena, uthi ‘Uze ungakrexezi,’ ngaba uyakrexeza na?” (Roma 2:21, 22) Ukuze sikwazi ukudlulisela inyaniso kwabanye, simele sinyaniseke ngalo lonk’ ixesha. Ukuba sidume ngokunyaniseka, oko kuya kuba nempembelelo enkulu kwindlela abantu abasabela ngayo koko sikufundisayo.
12, 13. Wabhala wathini omnye osemtsha ngokuphathelele ukunyaniseka, yaye yintoni eyamenza waba nemilinganiselo ephakamileyo yokuziphatha?
12 Abakhonzi bakaYehova abasebatsha nabo bayakuqonda ukubaluleka kokunyaniseka. Kwisincoko sakhe sasesikolweni, uJenny owayeneminyaka eli-13 ubudala ngoko, wabhala wathi: “Ndikuxabisa gqitha ukunyaniseka. Ngelishwa, bambalwa abantu abanyanisekileyo namhlanje. Ndigqibe kwelokuba ndihlale ndinyanisekile ngalo lonke ixesha ebomini bam. Ndakusoloko ndinyanisekile kwanokuba ukuthetha inyaniso akuyi kundizisela iingenelo ngoko nangoko mna nabahlobo bam. Ndikhetha kuphela abahlobo abathetha inyaniso nabanyanisekileyo.”
13 Umfundisi-ntsapho kaJenny wathi kuye ngesi sincoko: “Nangona usemncinane kangaka unemilinganiselo ephakamileyo yokuziphatha. Ndiyazi ukuba uza kunamathela kule milinganiselo kuba ndibona indlela entle oziphethe ngayo.” Yintoni eyenza ukuba le ntombazana yesikolo ibe nemilinganiselo enjalo yokuziphatha? Kwintshayelelo yesincoko sakhe, uJenny wathi lunqulo lwakhe “oluphembelele imilinganiselo [yakhe] ebomini.” Sekudlule iminyaka esixhenxe ukususela oko uJenny wabhala eso sincoko. Njengoko umfundisi-ntsapho wakhe wayetshilo, uJenny usaqhubeka enamathele kwimilinganiselo yakhe ephakamileyo yokuziphatha njengomnye wamaNgqina kaYehova.
Abakhonzi BakaYehova Bayayidandalazisa Inyaniso
14. Kutheni abakhonzi bakaThixo benembopheleleko enkulu ngokukhethekileyo yokunamathela enyanisweni?
14 Kakade ke, bakho nabanye abantu abangengomaNgqina kaYehova abayithethayo inyaniso nabanyanisekileyo. Kodwa ke, thina bakhonzi bakaThixo, sinembopheleleko enkulu ngokukhethekileyo yokunamathela enyanisweni. Siphathiswe inyaniso yeBhayibhile—nyaniso leyo enokukhokelela abanye kubomi obungunaphakade. Ngoko, sinembopheleleko yokwabelana nabanye ngolo lwazi. UYesu wathi: “Wonk’ ubani onikwe okuninzi, kuya kufunwa okuninzi kuye.” (Luka 12:48) Ngokuqinisekileyo “kufunwa okuninzi” kwabo basikelelwe ngokunikwa ulwazi oluxabisekileyo lukaThixo.
15. Luluphi uvuyo oba nalo xa udlulisela inyaniso yeBhayibhile kwabanye?
15 Kuyavuyisa ukudlulisela inyaniso yeBhayibhile kwabanye. Njengabafundi bakaYesu benkulungwane yokuqala, sivakalisa iindaba ezilungileyo—isigidimi esinik’ ithemba—kwabo ‘bahlinzekileyo nabalahliweyo njengezimvu ezingenamalusi’ nakwabo bamfanyekisiweyo nabakhohlisiweyo ‘ziimfundiso zeedemon.’ (Mateyu 9:36; 1 Timoti 4:1) Umpostile uYohane wabhala wathi: “Andinaluvuyo lungaphezu kolu lokuba ndive ukuba abantwana bam bahamba enyanisweni.” (3 Yohane 4) Ukuthembeka ‘kwabantwana’ bakaYohane—ekusenokwenzeka ukuba ngabo wayebangenise enyanisweni—kwamzisela uvuyo olukhulu. Kuyasivuyisa ukubona abantu bekuxabisa oko kuseLizwini likaThixo.
16, 17. (a) Kutheni ingengabo bonke abantu abayamkelayo inyaniso? (b) Luluphi uvuyo onokuba nalo njengoko uvakalisa inyaniso eseBhayibhileni?
16 Kambe ke, asingabo bonke abantu abayamkelayo inyaniso. UYesu wathetha inyaniso ngoThixo, nangona abanye babengakuthandi oko. Wathi kubachasi abangamaYuda: “Kutheni ningandikholelwa nje? Lowo uphuma kuThixo uyawaphulaphula amazwi kaThixo. Kungenxa yoko le nto ningaphulaphuli, kuba aniphumi kuThixo.”—Yohane 8:46, 47.
17 Nathi, njengoYesu, asiyeki ukuxelela abanye inyaniso exabisekileyo ngoYehova. Asilindelanga ukuba bonke abantu bakwamkele oko sibaxelela kona, kuba asingabo bonke abantu abakwamkelayo noko kwakuthethwa nguYesu. Noko ke, sivuyiswa kukwazi ukuba senza into elungileyo. Ngobubele bakhe bothando uYehova ufuna ukuba inyaniso ichazelwe bonke abantu. Njengoko enenyaniso, amaKristu aba zizikhanyiso kweli hlabathi lisebumnyameni. Ngokwenza inyaniso ikhanyise ngemilomo nangezenzo zethu, sinokunceda abanye ukuba bazukise uBawo osemazulwini. (Mateyu 5:14, 16) Siyibonisa esidlangalaleni into yokuba siyakuchasa ukugqwetha kukaSathana inyaniso yaye sinamathela eLizwini likaThixo elisulungekileyo nelingangxengwanga. Inyaniso esiyaziyo nesabelana ngayo nabanye inokubazisela inkululeko yokwenene abo bayamkelayo.—Yohane 8:32.
Zabalazela Ukuhlala Unyanisekile
18. Kwakutheni ukuze uYesu akholiswe nguNathaniyeli, yaye wakubonisa njani oko?
18 UYesu wayeyithanda inyaniso yaye wayethetha inyaniso. Ngethuba lobulungiseleli bakhe basemhlabeni, wayekholiswa ngabo banyanisekileyo. UYesu wathi ngoNathaniyeli: “Yabona, umSirayeli ngokuqinisekileyo, ekungekho nkohliso kuye.” (Yohane 1:47) Ngenxa yoko, uNathaniyeli, ekusenokwenzeka ukuba wayekwabiza nangokuba nguBhartolomeyu, wakhethwa ukuba abe ngomnye wabapostile abali-12. (Mateyu 10:2-4) Hayi uzuko awalufumanayo!
19-21. Yasikelelwa njani indoda eyayikade iyimfama ngenxa yokunyaniseka kwayo ngenkalipho?
19 Isahluko sonke sencwadi yeBhayibhile kaYohane sichaza ingxelo yenye indoda enyanisekileyo eyasikelelwayo nguYesu. Asilazi igama layo. Into esiyaziyo kukuba le ndoda yayingqiba ibe yayizelwe iyimfama. Abantu bamangaliswa xa uYesu wayenza yabona. Iindaba zokuphiliswa kwayo zafikelela ezindlebeni zabanye babaFarisi, ababeyithiyile inyaniso, nababevumelene ukuba nabani na okholwayo kuYesu wayefanele agxothwe endlwini yesikhungu. Ekubeni babesazi esi sivumelwano, abazali bale ndoda yayikade iyimfama baxoka kubaFarisi, besithi abazi ukuba kwenzeke njani ukuba unyana wabo abone, bengazi nokuba ngubani omphilisileyo.—Yohane 9:1-23.
20 Ngoko abaFarisi bayibiza le ndoda iphilisiweyo. Ngenkalipho yathetha inyaniso, ingakhathalele ukuba iya kuba yintoni na imiphumo yoko. Yachaza indlela ephiliswe ngayo, yachaza nokuba nguYesu oyiphilisileyo. Imangalisiwe yinto yokuba aba bantu badumileyo nabafunde kangaka bengakholelwa ukuba uYesu wayevela kuThixo, ngenkalipho le ndoda iphilisiweyo yabaval’ umlomo ngokuthi: “Ukuba lo mntu ebengaveli kuThixo, ebengenakwenza nto konke konke.” Bengenandlela yakuyiphikisa, aba baFarisi bayimangalela le ndoda ngokuthi isile baza bayikhuphela ngaphandle.—Yohane 9:24-34.
21 Akuba uYesu evile ngako oku, ngothando wazipha ithuba lokuba ayikhangele loo ndoda. Akuba eyifumene, waluqinisa ukholo eyayilubonisile loo ndoda yayikade iyimfama. UYesu wayichazela ngokuphandle ukuba unguMesiya. Hayi indlela eyasikelelwa ngayo loo ndoda ngokuthetha kwayo inyaniso! Ngokuqinisekileyo uThixo uyakholiswa ngabo bathetha inyaniso.—Yohane 9:35-37.
22. Kutheni sifanele sizabalazele ukuhlala sinyanisekile?
22 Sifanele sikuthabathe nzulu ukuziqhelisa ukuthetha inyaniso. Oko kubalulekile ukuba sifuna ukuba nolwalamano oluhle nabantu kunye noThixo. Ukunyaniseka kuquka ukuthetha ngokuphandle, ukuba ngumntu ongeneka lula, nonokuthenjwa, yaye oko kumenza ubani akholeke emehlweni kaYehova. (INdumiso 15:1, 2) Ukunganyaniseki kuthetha ukukhohlisa, ukungathembeki, nokuxoka, yaye kumenza ubani angakholeki emehlweni kaYehova. (IMizekeliso 6:16-19) Ngoko ke, zimisele ukuhlala unyanisekile. Eneneni, ukuba sifuna ukuxelisa uThixo wenyaniso, simele siyazi inyaniso, sithethe inyaniso, yaye siphile ngokuvisisana nenyaniso.
Ubunokuphendula Uthini?
• Kutheni sifanele sibe nombulelo ngokwazi kwethu inyaniso?
• Sinokuwuxelisa njani umzekelo kaYehova wokuhlala enyanisekile?
• Ziziphi iingenelo zokuyidlulisela kwabanye inyaniso eseBhayibhileni?
• Kutheni kubalulekile nje ukuzabalazela ukuhlala sinyanisekile?
[Imifanekiso ekwiphepha 17]
Njengoko ephathiswe inyaniso yeBhayibhile, amaKristu abelana ngayo nabanye ngenzondelelo
[Imifanekiso ekwiphepha 18]
Indoda eyimfama eyaphiliswa nguYesu yasikelelwa kakhulu ngokuthetha kwayo inyaniso