“Ikhoboka” Elithembekileyo Neliyingqondi
“Ngubani ngokwenene olikhoboka elithembekileyo neliyingqondi ethe inkosi yalo yalimisela phezu kwempahla yendlu yayo?”—MATEYU 24:45.
1, 2. Kutheni kubalulekile ukuba sikufumane rhoqo ukutya kokomoya namhlanje?
NGEMVAKWEMINI yangoLwesibini, ngoNisan 11, 33 C.E., abafundi bakaYesu bambuza umbuzo onentsingiselo ebalulekileyo kuthi namhlanje. Bambuza oku: “Uya kuba yintoni na umqondiso wobukho bakho nowokupheliswa kwenkqubo yezinto?” UYesu wabaphendula ngokubaxelela isiprofeto esiphawulekayo. Wathetha ngexesha elinzima leemfazwe, iindlala, iinyikima zomhlaba nezifo. Yaye oko kwakuza kuba ‘sisiqalo nje senimba.’ Zaziseza ezinye iziganeko ezingakumbi. Oko koyikisa gqitha!—Mateyu 24:3, 7, 8, 15-22; Luka 21:10, 11.
2 Ukususela ngowe-1914, iinkalo ezingakumbi zesiprofeto sikaYesu ziye zazaliseka. Lonke uluntu lubhuqwa ‘yinimba.’ Sekunjalo, amaKristu okwenyaniso akamele oyike. UYesu wathembisa ukuba uya kuwaxhasa ngokutya kokomoya okunesondlo. Ekubeni ngoku esezulwini, uYesu usilungiselela njani ukuba sifumane ukutya kokomoya apha emhlabeni?
3. Ngawaphi amalungiselelo esiwenzelwe nguYesu okufumana ukutya “ngexesha elifanelekileyo”?
3 UYesu wawuphendula ngokwakhe loo mbuzo. Kwakwesi siprofeto sakhe sibalaseleyo wabuza: “Ngubani ngokwenene olikhoboka elithembekileyo neliyingqondi ethe inkosi yalo yalimisela phezu kwempahla yendlu yayo, ukuze liyinike ukutya kwayo ngexesha elifanelekileyo?” Wandula ke wathi: “Linoyolo elo khoboka ukuba inkosi yalo yakufika ilifumana lisenjenjalo! Inene ndithi kuni, Iya kulimisela phezu kwayo yonke impahla yayo.” (Mateyu 24:45-47) Ngokwenene, kwakuza kubakho “ikhoboka” elaliza kwabelwa ukusasaza ukutya kokomoya, “ikhoboka” elaliza kuthembeka lize libe yingqondi. Ngaba eli khoboka ngumntu othile, okanye abantu abahlukahlukeneyo? Ekubeni eli khoboka lithembekileyo lilungiselela ukutya okufunwa ngamandla, sinomdla wokwazi okungakumbi ngalo.
Ngaba Ngumntu Omnye Okanye Ludidi Oluthile?
4. Sazi njani ukuba “ikhoboka elithembekileyo neliyingqondi” alingomntu mnye?
4 “Ikhoboka elithembekileyo neliyingqondi” alinakuba ngumntu omnye. Ngoba? Kuba kaloku eli khoboka laqalisa ukulungiselela ukutya kokomoya phambili phayaa ngenkulungwane yokuqala, yaye ngokutsho kukaYesu, iNkosi yalo yayiza kufika lisenjenjalo ngowe-1914. Oko bekuya kuthetha ukuba umntu omnye uza kunikela inkonzo yokuthembeka kangangeminyaka emalunga ne-1 900. NoMethusela akazange ayiphile loo minyaka!—Genesis 5:27.
5. Chaza isizathu sokuba ibinzana elithi “ikhoboka elithembekileyo neliyingqondi” lingasebenzi kumKristu ngamnye.
5 Kodwa ke, ngaba ibinzana elithi “ikhoboka elithembekileyo neliyingqondi” linokubhekisela nje kumKristu ngamnye ngokuqhelekileyo? Enyanisweni onke amaKristu amele athembeke aze abe ziingqondi; kodwa ke ngokucacileyo uYesu wayecinga ngenye into xa wayethetha “ngekhoboka elithembekileyo neliyingqondi.” Sazi njani? Kuba wathi “inkosi yalo yakufika” iya kulimisela “phezu kwayo yonke impahla yayo.” Kunokwenzeka njani ukuba mKristu ngamnye amiselwe phezu kwento yonke—phezu kwayo “yonke” impahla yeNkosi? Akunakwenzeka oko!
6. Uhlanga lwakwaSirayeli lwaluza kuba nguye njani “umkhonzi” okanye “ikhoboka” likaThixo?
6 Ngoko kusengqiqweni ukugqiba ngelithi, uYesu wayebhekisela kwiqela lamaKristu xa wayethetha ‘ngekhoboka elithembekileyo neliyingqondi.’ Ngaba kunokwenzeka ukuba iqela labantu libumbe ikhoboka elinye? Ewe. Kwiminyaka engama-700 ngaphambi kokufika kukaKristu, uYehova wabhekisela kuhlanga lwakwaSirayeli luphela ‘njengomkhonzi wakhe amnyulileyo.’ (Isaya 43:10) Lungu ngalinye lohlanga lwakwaSirayeli laliyinxalenye yolu didi lomkhonzi ukususela ngowe-1513 B.C.E., ngethuba lokudluliselwa koMthetho kaMoses ukuya kutsho ngePentekoste yowama-33 C.E. Uninzi lwamaSirayeli lwalungenagalelo ngokuthe ngqo ekulawulweni kolo hlanga okanye ekondliweni kwalo ngokomoya. UYehova wayesebenzisa ookumkani, abagwebi, abaprofeti, ababingeleli nabaLevi ukuze banyamekele loo mbopheleleko. Nakuba kunjalo, amaSirayeli njengohlanga ayeza kumela ulongamo lukaYehova aze amzukise ezintlangeni. MSirayeli ngamnye wayeza kuba lingqina likaYehova.—Duteronomi 26:19; Isaya 43:21; Malaki 2:7; Roma 3:1, 2.
“Umkhonzi” Uyagxothwa
7. Kwakutheni ukuze uhlanga lwamandulo lwakwaSirayeli lungafaneleki ‘njengomkhonzi’ kaThixo?
7 Ekubeni uSirayeli ‘wayengumkhonzi’ kaThixo kwiinkulungwane ezadlulayo, ngaba wayelikhoboka awayethetha ngalo uYesu? Akunjalo, kuba ngelishwa uSirayeli wamandulo wazingqina engathembekanga yaye engeyongqondi. UPawulos uwushwankathela kakuhle lo mba xa ecaphula amazwi kaYehova kolo hlanga, esithi: “Igama likaThixo liyanyeliswa ngenxa yenu phakathi kweentlanga.” (Roma 2:24) Enyanisweni, uSirayeli watsib’ ilitye likaPhungela kwimvukelo yakhe ngokugatya uYesu, walahlwa xa kulapho ke nguYehova.—Mateyu 21:42, 43.
8. Wamiselwa nini “umkhonzi” owathabatha indawo kaSirayeli, yaye oko kwenzeka phantsi kwaziphi iimeko?
8 Oku kungathembeki kwalo “mkhonzi” unguSirayeli kwakungathethi ukuba abanquli abathembekileyo baya kukubandezwa ngokupheleleyo ukutya kokomoya. NgePentekoste yowama-33 C.E., kwiintsuku ezingama-50 emva kokuvuka kukaYesu, kwathululwa umoya oyingcwele kubafundi bakhe abamalunga ne-120 kwigumbi eliphezulu eYerusalem. Ngeso sihlandlo, kwazalwa uhlanga olutsha. Ukuzalwa kwalo kwabhengezwa esidlangalaleni xa amalungu alo aqalisa ukuxelela abemi baseYerusalem ‘ngezinto zobungangamela zikaThixo.’ (IZenzo 2:11) Ngenxa yoko, olo hlanga lutsha lokomoya, lwaba “ngumkhonzi” owayeza kuvakalisa uzuko lukaYehova kwiintlanga aze alungiselele ukutya ngexesha elifanelekileyo. (1 Petros 2:9) Yiyo loo nto, lwabizwa ngokuba ‘nguSirayeli kaThixo.’—Galati 6:16.
9. (a) Ngoobani ababumba “ikhoboka elithembekileyo neliyingqondi”? (b) Ngoobani ‘impahla yendlu’?
9 Lungu ngalinye ‘loSirayeli kaThixo,’ lingumKristu ozahluleleyo, obhaptiziweyo nothanjiswe ngomoya oyingcwele, linethemba lokuphila ezulwini. Ngenxa yoko, ibinzana elithi “ikhoboka elithembekileyo neliyingqondi” libhekisela kulo lonke uhlanga oluthanjiswe ngomoya obelusemhlabeni ukususela ngowama-33 C.E. ukuza kuthi ga ngoku, kanye njengokuba amaSirayeli awayephila ngowe-1513 B.C.E. de kwangePentekoste yowama-33 C.E. ayeyinxalenye yodidi lomkhonzi wangaphambi kwexesha lobuKristu. Ngoko, ngoobani ‘impahla yendlu’ efumana ukutya kokomoya kweli khoboka? Ngenkulungwane yokuqala yeXesha Eliqhelekileyo, onke amaKristu ayenethemba lokuphila ezulwini. Ngoko ke, nayo impahla yendlu yayingamaKristu athanjisiweyo, kungekhona njengeqela, kodwa njengabantu ngabanye. Bonke, kuquka abo babeneembopheleleko ebandleni, babekufuna ukutya kokomoya okuvela kweli khoboka.—1 Korinte 12:12, 19-27; Hebhere 5:11-13; 2 Petros 3:15, 16.
‘Ngalinye Linomsebenzi Walo’
10, 11. Sazi njani ukuba asingawo onke amalungu odidi lwekhoboka anezabelo ezifanayo?
10 Ngoxa “uSirayeli kaThixo” eludidi lwekhoboka elithembekileyo neliyingqondi elabelwe umsebenzi, lungu ngalinye lineembopheleleko zalo. Amazwi kaYesu abhalwe kuMarko 13:34 akucacisa ngakumbi oku. Athi: “Kufana nomntu owahambela kwenye indawo washiya indlu yakhe waza wanika amakhoboka akhe igunya, ngalinye umsebenzi walo, waza wayalela umgcini-mnyango ukuba ahlale elindile.” Ngoko lungu ngalinye lodidi lomkhonzi lifumene isabelo—ukwandisa impahla kaKristu yasemhlabeni. Oku likwenza ngokwamandla nangokwamathuba alo.—Mateyu 25:14, 15.
11 Kanti ke, umpostile uPetros wathi kumaKristu athanjisiweyo awayephila ngexesha lakhe: “Njengoko ngamnye wenu wasamkelayo isiphiwo, lungiselelanani ngaso njengamagosa amahle obubele obungasifanelanga bukaThixo obubonakaliswa ngeendlela ezahlukahlukeneyo.” (1 Petros 4:10) Ngenxa yoko, abo bathanjisiweyo banembopheleleko yokulungiselelana besebenzisa izipho abazinikwe nguThixo. Ukongezelela, amazwi kaPetros abonisa ukuba asingawo onke amaKristu awayeza kuba nobuchule, iimbopheleleko, okanye amalungelo afanayo. Kodwa ke, lungu ngalinye lodidi lwekhoboka linokuba negalelo ngandlel’ ithile ekwandeni kohlanga lokomoya. Njani?
12. Amalungu odidi lwekhoboka, amadoda namabhinqa, aba negalelo njani ekwandeni kwekhoboka?
12 Okokuqala, ngamnye kubo wayemele abe lingqina likaYehova, elishumayela iindaba ezilungileyo zoBukumkani. (Isaya 43:10-12; Mateyu 24:14) Ngaphambi nje kokuba anyukele ezulwini, uYesu wayalela bonke abafundi bakhe abathembekileyo, amadoda namabhinqa, ukuba babe ngabafundisi. Wathi: “Hambani ke ngoko niye kubenza abafundi abantu beentlanga zonke, nibabhaptiza egameni loYise neloNyana nelomoya oyingcwele, nibafundisa ukuba bazigcine zonke izinto endiniyalele zona. Yaye, khangelani! ndinani yonke imihla de kube sekuphelisweni kwenkqubo yezinto.”—Mateyu 28:19, 20.
13. Liliphi ilungelo elinanditshwa ngabo bonke abathanjisiweyo?
13 Xa befunyenwe, abafundi abatsha babeza kufundiswa ngenyameko ukuba bagcine zonke izinto uKristu awayeziyalele abafundi bakhe. Ekuhambeni kwexesha, abo basabela kakuhle babeza kukufanelekela ukufundisa abanye. Ukutya kokomoya okunentswane kwakunikwa abo babezakuba ngamalungu odidi lwekhoboka abaphuma kwiintlanga ezininzi. Onke amaKristu athanjisiweyo, amadoda namabhinqa, aba negalelo kulo msebenzi wokwenza abafundi. (IZenzo 2:17, 18) Lo msebenzi wawuza kuqhubeka ukususela kwixesha lokuqalisa komsebenzi wekhoboka de kube sekupheleni kwale nkqubo yezinto.
14. Ilungelo lokufundisa ebandleni laliphelela koobani, yaye amabhinqa athanjisiweyo nathembekileyo ayevakalelwa njani koko?
14 Abo babesandul’ ukubhaptizwa nabathanjisiweyo babesiba yinxalenye yekhoboka, yaye kungakhathaliseki ukuba babeqale bafundiswa ngubani na, babeqhubeka befumana imiyalelo kumalungu ebandla awayezifikelela iimfaneleko ezingokweZibhalo zokukhonza njengamadoda amakhulu. (1 Timoti 3:1-7; Tito 1:6-9) La madoda amiselweyo ayenelungelo lokuba negalelo elikhethekileyo ekukhuleni kolo hlanga. Amabhinqa angamaKristu athanjisiweyo nathembekileyo akazange akhathazwe sisibakala sokuba yayingamadoda angamaKristu kuphela afundisayo ebandleni. (1 Korinte 14:34, 35) Kunoko, la mabhinqa ayewuxabisa umsebenzi onzima wamalungu ebandla angamadoda yaye ayanelisekile ngamalungelo awayenawo, kuquka lawo okuxelela abanye ngesigidimi esichulumancisayo. Oodade abanenzondelelo nabathanjisiweyo namhlanje babonisa isimo sengqondo sokuthobeka esifanayo, enoba abadala abamiselweyo bangabathanjiswa okanye abangabo.
15. Nguwuphi omnye wemithombo ephambili yokutya kokomoya ngenkulungwane yokuqala, yaye ngoobani ababekhokela ekukusasazeni?
15 Ukutya kokomoya okusisiseko okwakulungiselelwa kwinkulungwane yokuqala kwakufumaneka kwiileta ezazibhalwa ngabapostile nabanye abafundi ababekhokela. Iileta abazibhalayo—ingakumbi ezo ziphakathi kweencwadi eziphefumlelweyo ezingama-27 ezibumba iZibhalo ZamaKristu ZesiGrike—zasasazwa emabandleni yaye ngaphandle kwamathandabuzo zaba sisiseko seemfundiso zabadala. Ngale ndlela, abameli bekhoboka elithembekileyo bakusasaza ngokuthembeka ukutya okunesondlo kokomoya kumaKristu anyanisekileyo. Udidi lwekhoboka lwenkulungwane yokuqala lwathembeka kuthumo lwalo.
“Ikhoboka” Kwiinkulungwane Ezili-19 Kamva
16, 17. Udidi lwekhoboka lwathembeka njani ekunyamekeleni isabelo salo de kwangowe-1914?
16 Kuthekani namhlanje? Ngowe-1914, ngaba uYesu wafika kukho iqela lamaKristu athanjisiweyo elalikusasaza ngokuthembeka ukutya ngexesha elifanelekileyo? Ngokuqinisekileyo kunjalo. Eli qela lalibonakala ngokucacileyo ngeziqhamo ezihle elalinazo. (Mateyu 7:20) Ukususela ngelo xesha, imbali iye yakungqina kuyinyaniso oko.
17 Ekufikeni kukaYesu, amalungu empahla yendlu amalunga nama-5 000 ayexakekile ekusasazeni inyaniso yeBhayibhile. Abasebenzi babembalwa, kodwa ikhoboka lasebenzisa iindlela eziliqela ezichuliweyo zokusasaza iindaba ezilungileyo. (Mateyu 9:38) Ngokomzekelo, kwenziwa amalungiselelo okuba iintshumayelo eziphathelele imibandela yeBhayibhile zisasazwe kumaphephandaba angama-2 000. Ngale ndlela, inyaniso yeLizwi likaThixo yafikelela amawakawaka abafundi ngaxeshanye. Kanti, kwalungiselelwa ucwangciso lweeyure ezisibhozo olubandakanya imifanekiso emibalabala neshukumayo. Ngenxa yolu cwangciso lulungiselelwe kakuhle, isigidimi seBhayibhile esisusela kwisiqalo seNdalo ukuya kutsho ekupheleni koLawulo lukaKristu Lwewaka Leminyaka, safikelela abantu abangaphezu kwezigidi ezisithoba abakumazwekazi amathathu. Enye indlela eyayisetyenziswa luncwadi olushicilelweyo. Ngokomzekelo, ngowe-1914 kwapapashwa imibhalo engama-50 000 yalo lindixesha.
18. UYesu walimisela nini ikhoboka phezu kwayo yonke impahla yakhe, yaye ngoba?
18 Ngokwenene, yathi yakufika iNkosi yafumana ikhoboka layo elithembekileyo liwondla ngokuzimisela amalungu empahla yendlu, yaye lishumayela iindaba ezilungileyo. Ngelo xesha, elo khoboka lalisalindelwe ziimbopheleleko ezingakumbi. UYesu wathi: “Inene ndithi kuni, Iya kulimisela phezu kwayo yonke impahla yayo.” (Mateyu 24:47) UYesu wakwenza oku ngowe-1919, emva kokuba ikhoboka liye latyhubela ixesha lovavanyo. Kodwa ke, kwakutheni ukuze “ikhoboka elithembekileyo neliyingqondi” linikwe iimbopheleleko ezingakumbi? Kungenxa yokuba impahla yeNkosi yayandile. UYesu wayemiselwe njengokumkani ngowe-1914.
19. Chaza indlela iimfuno zokomoya ‘zesihlwele esikhulu’ eziye zanyanyekelwa ngayo.
19 Yiyiphi le mpahla ikhoboka elithembekileyo elamiselwa phezu kwayo yiNkosi esandul’ ukuthwesw’ isithsaba? Zizo zonke izinto Zayo zokomoya ezisemhlabeni. Ngokomzekelo, kumashumi amabini eminyaka emva kokubekwa etroneni kukaKristu ngowe-1914, kwabonakala “isihlwele esikhulu” ‘sezinye izimvu.’ (ISityhilelo 7:9; Yohane 10:16) Sasingengawo amalungu athanjisiweyo ‘oSirayeli kaThixo,’ kodwa sasingamadoda namabhinqa anyanisekileyo anethemba lokuphila emhlabeni, athanda uYehova, nawayefuna ukumkhonza kanye ngendlela ababesenza ngayo abathanjiswa. Eneneni, athi ‘kwikhoboka elithembekileyo neliyingqondi’: “Siza kuhamba nani, kuba sivile ukuba uThixo unani.” (Zekariya 8:23) La maKristu asandul’ ukubhaptizwa ayesitya ukutya kokomoya okunesondlo okwakutyiwa ngamalungu empahla yendlu athanjisiweyo, yaye zombini ezi ndidi bezisitya ukutya kokomoya okufanayo ukususela ngelo xesha. Oku kube yintsikelelo ngokwenene kumalungu ‘esihlwele esikhulu’!
20. ‘Isihlwele esikhulu’ sibe nayiphi indima ekwandeni kwempahla yendlu yeNkosi?
20 Amalungu ‘esihlwele esikhulu’ aye aluthelela ngovuyo udidi lwekhoboka elithanjisiweyo njengabashumayeli beendaba ezilungileyo. Ngenxa yokushumayela kwaso, amalungu empahla yendlu yeNkosi asemhlabeni aye anda, ngaloo ndlela kusongezeleleka iimbopheleleko ‘zekhoboka elithembekileyo neliyingqondi.’ Ngenxa yokwanda kwabo bafuna inyaniso, kuye kwafuneka kwandiswe iindawo zokushicilela ukuze kuveliswe uncwadi olungakumbi lweBhayibhile. Kuye kwamiselwa iiofisi zamaNgqina kaYehova kumazwe amaninzi. Bona abavangeli basemazweni baye bathunyelwa “nakwezona nxalenye zikude zomhlaba.” (IZenzo 1:8) Nakuba ngowe-1914 kwakukho abathanjiswa abamalunga namawaka amahlanu, abadumisi bakaThixo baye banda befikelela ngaphezu kwezigidi ezithandathu namhlanje, yaye abaninzi kubo ‘ngabesihlwele esikhulu.’ Ewe, amalungu empahla yendlu kaKumkani aye anda ngokuphindaphindiweyo ukususela ekubekweni kwakhe etroneni ngowe-1914!
21. Yiyiphi imizekeliso emibini esiza kuyihlolisisa kwinqaku elilandelayo?
21 Konke oku kubonisa ukuba eli khoboka ‘belithembekile yaye liyingqondi’. Ngokukhawuleza emva kokuba ethethe ‘ngekhoboka elithembekileyo neliyingqondi,’ uYesu wenza imizekeliso emibini ngenjongo yokubethelela ezo mpawu: umzekeliso weentombi ezinyulu eziziingqondi nezizizidenge kwakunye nomzekeliso weetalente. (Mateyu 25:1-30) Ngokwenene oku kuyasichukumisa! Loo mizekeliso inayiphi intsingiselo kuthi namhlanje? Oko siya kukuhlolisisa kwinqaku elilandelayo.
Ucinga Ntoni?
• Ngoobani ababumba “ikhoboka elithembekileyo neliyingqondi”?
• Ngoobani amalungu ‘empahla yendlu’?
• Lamiselwa nini ikhoboka elithembekileyo phezu kwayo yonke impahla yeNkosi, yaye kwakutheni ukuze limiselwe ngelo xesha?
• Ngoobani abaye banegalelo ekwandeni kwempahla yeNkosi kumashumi eminyaka yakutshanje, yaye njani?
[Imifanekiso ekwiphepha 10]
Udidi lwekhoboka lwenkulungwane yokuqala lwabonisa ukuthembeka kuthumo lwalo