UYehova Uyabalondoloza Abo Bakholose Ngaye
“Ububele bakho bothando nokunyanisa kwakho makundilondoloze rhoqo.”—INDUMISO 40:11.
1. Yintoni uKumkani uDavide awayicela kuYehova, yaye eso sicelo siye saphendulwa njani?
UKUMKANI UDAVIDE wakwaSirayeli wamandulo ‘wayethembele kuYehova ngokunyaniseka’ ngenxa yoko wathi uYehova “wayithobela [kuye] indlebe yakhe wakuva ukukhalela [kwakhe] uncedo.” (INdumiso 40:1) Wayibona ngokuphindaphindiweyo indlela uYehova abalondoloza ngayo abo bamthandayo. Ngenxa yoko, uDavide wayenokucela ukuba uYehova amlondoloze rhoqo. (INdumiso 40:11) Ekubeni ebalwa phakathi kwamadoda namabhinqa athembekileyo athenjiswe “uvuko olulunge ngakumbi,” ngoku uDavide ukwinkumbulo kaYehova njengomnye oya kufumana loo mvuzo. (Hebhere 11:32-35) Ngenxa yoko ukhuseleko lwekamva lakhe luqinisekisiwe. Igama lakhe libhalwe ‘encwadini kaYehova yokukhumbuza.’—Malaki 3:16.
2. IZibhalo zisinceda njani siqonde oko kuthethwa kukulondolozwa nguYehova?
2 Nangona abathembekileyo abakhankanywe kumaHebhere isahluko 11 babephila ngaphambi kokuba uYesu Kristu aphile emhlabeni, sekunjalo babephila ngokuvisisana noko uYesu wakufundisayo xa wathi: “Lowo uwuthandayo umphefumlo wakhe uyawutshabalalisa, kodwa lowo uwuthiyileyo umphefumlo wakhe kweli hlabathi uya kuwulondolozela ubomi obungunaphakade.” (Yohane 12:25) Ngaloo ndlela, kuyacaca ukuba ukulondolozwa nguYehova akuthethi ukuba ubani akasayi kuze abandezeleke okanye atshutshiswe. Kodwa kuthetha ukuba ukhuselwa ngokomoya ukuze ahlale esenza okuhle kuThixo.
3. Bubuphi ubungqina esinabo bokuba uKristu Yesu walondolozwa nguYehova, yaye oko kwaba nawuphi umphumo?
3 UYesu naye watshutshiswa ngenkohlakalo kwaye egculelwa, yaye ekugqibeleni iintshaba zakhe zambulala ngendlela elihlazo nebuhlungu gqitha. Sekunjalo, oko akuthethi ukuba uThixo wasaphula isithembiso sakhe sokulondoloza uMesiya. (Isaya 42:1-6) Uvuko lukaYesu emva kosuku lwesithathu efe ngendlela elihlazo lungqina ukuba uYehova wakuva ukukhalela kwakhe uncedo—kanye njengokuba waye wamva noDavide. Esabela kwisikhalo sikaYesu, uYehova wamnika amandla okugcina ingqibelelo. (Mateyu 26:39) Ekubeni walondolozwayo, uYesu wafumana ubomi bokungafi ezulwini, yaye izigidi zabantu abanokholo kwintlawulelo banethemba lobomi obungunaphakade.
4. Sisiphi isiqinisekiso esinikwa amaKristu athanjisiweyo “nezinye izimvu”?
4 Sinokuba nentembelo yokuba uYehova ukulungele yaye unako ukulondoloza abakhonzi bakhe ngoku njengoko wenzayo ngemihla kaDavide noYesu. (Yakobi 1:17) Imbinana esasele emhlabeni yabazalwana bakaYesu abathanjisiweyo inokukholosa ngesithembiso sikaYehova esithi: “Ilifa elingenakonakala nelingadyobhekanga nelingambatshiyo. Libekelwe nina emazulwini, nina enilondolozwa ngamandla kaThixo ngokholo ngenxa yosindiso olulungele ukutyhilwa ngexesha lokugqibela.” (1 Petros 1:4, 5) “Ezinye izimvu,” ezinethemba lokuphila emhlabeni, nazo zinokukholosa ngoThixo nakwisithembiso sakhe awasenza esebenzisa umdumisi wathi: “Owu mthandeni uYehova, nonke nina banyanisekileyo bakhe. Abathembekileyo uYehova uyabalondoloza.”—Yohane 10:16; INdumiso 31:23.
Balondolozwa Ngokomoya
5, 6. (a) Abantu bakaThixo baye balondolozwa njani kule mihla? (b) Abathanjiswa banaluphi ulwalamano noYehova, yaye kuthekani ngabo banethemba lokuphila emhlabeni?
5 Kule mihla, uYehova uye wenza amalungiselelo okulondoloza abantu bakhe ngokomoya. Nangona engabakhuseli kwintshutshiso okanye kubunzima neenkxwaleko zobomi, ngokunyaniseka uye wabanika uncedo nokhuthazo olufunekayo ukuze balondoloze ulwalamano lwabo olusondeleyo kunye naye. Ukholo lwabo kwilungiselelo likaThixo lentlawulelo lusisiseko abakhele kuso olu lwalamano lwabo lusondeleyo. Abanye kula maKristu athembekileyo bathanjiswe ngomoya kaThixo ukuze balawule kunye noKristu ezulwini. Baye bavakaliswa bengamalungisa njengoonyana bakaThixo bokomoya, yaye la mazwi abhekisela kubo: “Wasihlangula kwigunya lobumnyama waza wasifudusela kubukumkani boNyana wothando lwakhe, ekuthe ngaye sakukhululwa ngentlawulelo, saxolelwa izono zethu.”—Kolose 1:13, 14.
6 Izigidi zamanye amaKristu athembekileyo ziqinisekiswa ukuba nazo zinokuzuza kwilungiselelo likaThixo lentlawulelo. Sifunda oku: ‘UNyana womntu weza, kungekhona ukuze alungiselelwe, kodwa ukuze alungiselele nokuze anikele ngomphefumlo wakhe ube yintlawulelo ngenxa yabaninzi.’ (Marko 10:45) Loo maKristu ajonge phambili ekunandipheni ‘inkululeko ezukileyo yabantwana bakaThixo’ ngexesha elifanelekileyo. (Roma 8:21) Okwangoku, axabisa ulwalamano lwawo noThixo yaye enza umgudu onyanisekileyo ukomeleza olo lwalamano.
7. UYehova uyilondoloza njani impilo-ntle yokomoya yabantu bakhe namhlanje?
7 Enye indlela uYehova ayilondoloza ngayo impilo-ntle yokomoya yabantu bakhe kukulungiselela ukuba baqhubeke beqeqeshwa. Oku kubenza bafumane ulwazi oluchanileyo olungakumbi ngenyaniso. UYehova uqhubeka esikhokela ngeLizwi lakhe, intlangano yakhe nangomoya wakhe oyingcwele. Besalathiswa “likhoboka elithembekileyo neliyingqondi,” abantu bakaThixo ehlabathini lonke bafana nentsapho. Udidi lwekhoboka lunyamekela iintswelo zokomoya yaye xa kuyimfuneko kwaneentswelo zokwenyama zentsapho yabakhonzi bakaYehova—kungakhathaliseki uhlanga okanye umgangatho abakuwo.—Mateyu 24:45.
8. UYehova unayiphi intembelo kwabanyanisekileyo bakhe, yaye ubaqinisekisa ngantoni?
8 Njengoko uYehova engazange amkhusele uYesu ekuhlaselweni ziintshaba zakhe, wenza okufanayo nakumaKristu namhlanje. Kodwa oku akuthethi ukuba uThixo akakholiswa ngawo. Kunoko, kubonisa ukuba unentembelo yokuba aya kuma kwicala lakhe kwimbambano enkulu yehlabathi liphela. (Yobhi 1:8-12; IMizekeliso 27:11) UYehova akasayi kuze abashiye abo banyanisekileyo kuye, “kuba uYehova ngumthandi wokusesikweni, yaye akayi kubashiya abanyanisekileyo bakhe. Ngokuqinisekileyo baya kulindwa ukusa kwixesha elingenammiselo.”—INdumiso 37:28.
Balondolozwa Ngobubele Bothando Nangenyaniso
9, 10. (a) Inyaniso kaYehova ibalondoloza njani abantu bakhe? (b) IBhayibhile ibonisa njani ukuba uYehova uyabalondoloza abanyanisekileyo bakhe ngobubele bakhe bothando?
9 Kumthandazo wakhe obhalwe kwiNdumiso 40, uDavide wacela ukulondolozwa bububele bothando nenyaniso kaYehova. Ukuba nenyaniso kukaYehova nokuthanda kwakhe ubulungisa kwenza ayichaze ngokucacileyo imilinganiselo yakhe. Abo baphila ngale milinganiselo bakhuselekile ngandlel’ ithile kwiinkxwaleko, uloyiko neengxaki abajamelana nazo abo bayityeshelayo. Ngokomzekelo, sinokuzikhusela thina neentsapho zethu kwiingxaki ezininzi ezibuhlungu ukuba siyakuphepha ukusebenzisa kakubi iziyobisi notywala, ukuziphatha okubi ngokwesini nogonyamelo. Kwanabo baphambukayo kwindlela kaYehova yenyaniso—njengoko uDavide wenzayo ngamaxesha athile—baqinisekiswa ukuba uThixo ‘useyindawo yokuzifihla’ yaboni abaguqukayo. Abo ngovuyo banokuthi: “Uya kundilondoloza ekubandezelekeni.” (INdumiso 32:7) Le yeyona ndlela ibalaseleyo uThixo abonakalisa ngayo ububele bakhe bothando!
10 Omnye umzekelo kaThixo wokubonakalisa ububele bothando kukuba ulumkisa abakhonzi bakhe ukuba bahlale bahlukile kwihlabathi elingendawo, aza kulitshabalalisa kungekudala. Sifunda oku: “Musani ukulithanda ihlabathi nezinto ezisehlabathini. Nabani na olithandayo ihlabathi, uthando lukaBawo alukho kuye; kuba konke okusehlabathini—inkanuko yenyama nenkanuko yamehlo nokuqhayisa ngezinto zobu bomi—akuphumi kuBawo, kodwa kuphuma ehlabathini.” Ngokuphulaphula esi silumkiso size senze ngokuvisisana naso, sinokubulondoloza ngokoqobo ubomi bethu ngonaphakade, kuba le ndinyana ihlabela mgama isithi: “Ngapha koko, ihlabathi liyadlula nenkanuko yalo, kodwa lowo wenza ukuthanda kukaThixo uhleli ngonaphakade.”—1 Yohane 2:15-17.
Balondolozwa Ngamandla Okucinga, Ukuqonda Nobulumko
11, 12. Chaza indlela asilondoloza ngayo amandla okucinga, ukuqonda nobulumko.
11 Kwabo bafuna ukukholisa uThixo, uSolomon unyana kaDavide waphefumlelwa ukuba abhale athi: “Amandla okucinga aya kukulinda, ukuqonda kuya kukulondoloza.” Ukwabongoza esithi: “Zuza ubulumko . . . Musa ukubushiya, buya kukugcina. Buthande, buya kukulondoloza.”—IMizekeliso 2:11; 4:5, 6.
12 Ukuba siyacamngca ngoko sikufunda kwiLizwi likaThixo sakuba sisebenzisa amandla ethu okucinga. Ukwenza njalo kusenza sibe nokuqonda okungakumbi ukuze sibeke izinto ezibalulekileyo kwindawo yokuqala. Oku kubalulekile, ekubeni uninzi lwethu lusazi—mhlawumbi ngokusuka kumava obuqu—ukuba kuye kubekho iingxaki xa abantu ngabom okanye ngokungazi bebeka izinto ezingebobulumko kwindawo yokuqala. Ihlabathi likaSathana lisenza sibe nosukelo lobutyebi, udumo namawonga, ngoxa uYehova esikhuthaza ukuba sinikel’ ingqalelo kusukelo lokomoya nto leyo ebaluleke ngakumbi. Ukusilela ukubeka usukelo lokomoya kwindawo yokuqala kunokuqhekeza iintsapho, kuphelise ubuhlobo luze usukelo lokomoya lufadalale. Ngenxa yoko, ubani unokuzifumana ekwintlungu engathethekiyo echazwa ngamazwi kaYesu athi: “Kunayiphi na ingenelo ngomntu ukuzuza ihlabathi liphela aze aphulukane nomphefumlo wakhe?” (Marko 8:36) Ubulumko busenza sithobele isiluleko sikaYesu esithi: “Qhubekani, ke ngoko, nifuna kuqala ubukumkani nobulungisa bakhe, yaye zonke ezinye izinto ziya kongezelelwa kuni.”—Mateyu 6:33.
Ingozi Yokuzingca
13, 14. Kuthetha ukuthini ukuzingca, yaye kutheni kungebobulumko ukwenjenjalo?
13 Yinto yemvelo ukuba abantu bazithande. Noko ke, xa izinto ubani azinqwenelayo nanomdla kuzo ziba zezona zibalulekileyo ebomini bakhe, zidla ngokubangela ingxaki. Ngoko ke, ukuze silondoloze ubuhlobo bethu noYehova, usiyalela ukuba sikuphephe ukuzingca. Ukuzingca kuthetha “ukuxhalabela kuphela iminqweno, iintswelo neemfuno zakho.” Ngaba oku akuyichazi ngokuchanileyo indlela abayiyo abantu abaninzi namhlanje? Okubalulekileyo kukuba, iBhayibhile yaxela kwangaphambili ukuba “ngemihla yokugqibela” yenkqubo engendawo kaSathana, “abantu baya kuba ngabazithandayo,” okanye baya kuzingca.—2 Timoti 3:1, 2.
14 AmaKristu ayabuqonda ubulumko bokuthobela umyalelo weBhayibhile wokuba nomdla kwabanye, ukubathanda njengoko ubani ezithanda. (Luka 10:27; Filipi 2:4) Abantu banokukujonga oku njengento engenakwenzeka, ukanti kubalulekile ukuze imitshato iphumelele, iintsapho zibe nolwalamano oluhle nokuba nobuhlobo obanelisayo. Ngenxa yoko umkhonzi kaYehova onyanisekileyo akamele avumele izinto anomdla kuzo zilawule ubomi bakhe de atyeshele ezona zinto zibalulekileyo. Eyona nto ibalulekileyo kukwenza oko kunxulumene nokunqula uThixo wakhe, uYehova.
15, 16. (a) Ukuzingca kunokukhokelela entwenini, yaye oko sikubona kumzekelo woobani? (b) Enyanisweni, yintoni ubani ayenzayo xa ekhawuleza ukugweba abanye?
15 Ukuzingca kunokwenza ubani azenze ilungisa, nto leyo enokumenza angaphangalali aze azikhukhumalise. Ngokuchanileyo iBhayibhile ithi: “Akunakungxengxezeleka, mntundini, nokuba ungubani na, ukuba uyagweba; kuba kwinto omgweba kuyo omnye, uzigwebela isohlwayo wena ngokwakho, kwanjengokuba wena lo ugwebayo uqhelisela izinto ezifanayo.” (Roma 2:1; 14:4, 10) Iinkokeli zonqulo zomhla kaYesu zaziqinisekile ukuba zingamalungisa kangangokuba zaziva zifanelekile ukuba zigwebe uYesu nabalandeli bakhe. Ngokwenjenjalo, zazenza abagwebi. Zingazinanzanga iintsilelo zazo, zazizisela umgwebo.
16 UYudas, umlandeli kaYesu owamngcatshayo, wayebagweba abanye. Ngesinye isihlandlo eBhethani xa uMariya, udadeboLazaro, wathambisa uYesu ngeoli yobulawu, uYudas wakugxeka kabukhali oko. Ecaphuka wathi: “Kutheni le oli yobulawu ibingathengiswa ngeedenariyo ezingamakhulu amathathu zize zinikwe amahlwempu?” Kodwa le ngxelo ihlabela mgama icacisa isithi: “Wakutsho oku, kungekhona ngenxa yokuba wayexhalabele amahlwempu, kodwa ngenxa yokuba wayelisela yaye wayenebhokisi yemali ibe wayedla ngokuyithabatha imali eyayifakwa kuyo.” (Yohane 12:1-6) Masingaze sifane noYudas okanye iinkokeli zonqulo, ezazikhawuleza ukugweba abanye, nto leyo eyaphumela ekubeni zigwetywe.
17. Chaza iingozi ezibangelwa kukuzikhukhumalisa okanye kukuzithemba ngokugqithiseleyo.
17 Okulusizi kukuba, amanye amaKristu enkulungwane yokuqala, nangona ayengengomasela njengoYudas, aba nekratshi ezigwagwisa. Ebhala ngawo uYakobi wathi: “Niqhayisa ngokuzigwagwisa kwenu ngokuzidla.” Wongezelela esithi: “Konke ukuqhayisa okunjalo kungendawo.” (Yakobi 4:16) Ukuqhayisa ngezinto esizenzileyo okanye ngamalungelo esinawo kwinkonzo kaYehova kukuzibeka engozini. (IMizekeliso 14:16) Siyakukhumbula okwenzeka kumpostile uPetros, owathi ngokuzithemba waqhayisa esithi: “Nangona bonke abanye beya kukhubeka ngawe, andisayi kuze ndikhubeke! . . . Kwanokuba kuya kufuneka ndife nawe, andisayi kuze ndikukhanyele.” Eneneni, ayikho into esinokuqhayisa ngayo. Yonke into esinayo siyifumene ngenxa yobubele bothando bukaYehova. Ukukhumbula oku kuya kusenza singazigwagwisi.—Mateyu 26:33-35, 69-75.
18. UYehova ulijonga njani ikratshi?
18 Sixelelwa oku: “Ikratshi liphambi kokuwa, yaye umoya wekratshi uphambi kokukhubeka.” Ngoba? UYehova uyaphendula: “Ukuziphakamisa nekratshi . . . ndikuthiyile.” (IMizekeliso 8:13; 16:18) Akumangalisi ke ngoko ukuba uYehova wacatshukiswayo ‘kukusa kwentliziyo kakumkani waseAsiriya nokuzigwagwisa ngokuphakama kwamehlo akhe’! (Isaya 10:12) UYehova wamohlwaya. Kungekudala lonke ihlabathi likaSathana, kunye neenkokeli zalo ezinekratshi, ezizikhukhumalisayo, ezibonakalayo nezingabonakaliyo, nazo ziya kuphenduliswa. Ngamana singangaze sizingce njengeentshaba zikaYehova!
19. Abantu bakaThixo baneqhayiya baze sekunjalo bathobeke kweyiphi inkalo?
19 AmaKristu okwenyaniso anesizathu sokuba neqhayiya ngokuba ngabakhonzi bakaYehova. (Yeremiya 9:24) Kwangaxeshanye, anesizathu sokuhlala ethobekile. Ngoba? Kuba ‘onke onile aza asilela kuzuko lukaThixo.’ (Roma 3:23) Ngoko ke ukuze silondoloze ukuma kwethu njengabakhonzi bakaYehova, simele sibe nesimo sengqondo sompostile uPawulos, owathi: “UKristu Yesu weza ehlabathini ukuze asindise aboni,” waza wahlabela mgama esithi: “Ndingobalaseleyo kubo.”—1 Timoti 1:15.
20. UYehova ubalondoloza njani abantu bakhe ngoku, yaye uya kubalondoloza njani kwixesha elizayo?
20 Ekubeni abantu bakaYehova ngovuyo bebeka izilangazelelo zikaThixo ngaphambi kwezabo, sinokuqiniseka ukuba uYehova uya kuqhubeka ebalondoloza ngokomoya. Kwakhona sinokuqiniseka ukuba xa kufika imbandezelo enkulu, uYehova uya kubalondoloza abantu bakhe kungekhona ngokomoya kuphela kodwa nangokoqobo. Xa bengena kwihlabathi likaThixo elitsha, baya kumemelela besithi: “Khangela! Lo nguThixo wethu. Besithembele kuye, ibe uya kusisindisa. Lo nguYehova. Besithembele kuye. Masivuye sibe nemihlali ngosindiso lwakhe.”—Isaya 25:9.
Ngaba Usakhumbula?
• UKumkani uDavide noYesu Kristu balondolozwa njani?
• Abantu bakaYehova balondolozwa njani namhlanje?
• Kutheni sifanele sikuphephe ukuzingca?
• Kutheni sinokuba neqhayiya kodwa sekunjalo sithobeke?
[Imifanekiso ekwiphepha 9]
UYehova wamlondoloza njani uDavide noYesu?
[Imifanekiso ekwiphepha 10, 11]
Abantu bakaThixo balondolozwa njani ngokomoya namhlanje?
[Imifanekiso ekwiphepha 12]
Nangona sineqhayiya ngokukhonza uYehova, simele sihlale sithobekile