Yamkela Umoya KaThixo, Kungekhona Owehlabathi

“Samkela, kungekhona umoya wehlabathi, kodwa umoya ovela kuThixo, ukuze sizazi izinto esizinikwe ngobubele nguThixo.”—1 KOR. 2:12.

1, 2. (a) AmaKristu asemfazweni ngayiphi ingqiqo? (b) Yiyiphi imibuzo esiza kuyixubusha?

AMAKRISTU enene asemfazweni! Utshaba lwethu lunamandla, lunamaqhinga yaye alunalusini. Lunesixhobo esinamandla kangangokuba inkitha yabantu iye yaphenjelelwa siso. Kodwa asimele sivakalelwe kukuba thina asinamandla okanye asinakuphumelela. (Isa. 41:10) Sinesixhobo esinamandla nesingenakoyiswa nto.

² Asilwi mfazwe yokoqobo kodwa silwa eyokomoya. Utshaba lwethu nguSathana uMtyholi, yaye isixhobo sakhe esiyintloko asisebenzisayo “ngumoya wehlabathi.” (1 Kor. 2:12) Isixhobo sethu esiyintloko nxamnye neentlaselo zakhe ngumoya kaThixo. Ukuze soyise kule mfazwe size sihlale somelele ngokomoya, sifanele sicele umoya kaThixo size sibonakalise iziqhamo zawo kubomi bethu. (Gal. 5:22, 23) Kodwa ke, uyintoni umoya wehlabathi, yaye kwenzeke njani ukuba ube nempembelelo engaka? Sinokubona njani ukuba siphenjelelwa ngumoya wehlabathi? Sinokufunda ntoni kuYesu ngokwamkela kwakhe umoya kaThixo nangokuxhathisa umoya wehlabathi?

Umoya Wehlabathi—Kutheni Ugqugqise Kangaka?

3. Uyintoni umoya wehlabathi?

³ Umoya weli hlabathi uvela kuSathana, “umlawuli wehlabathi,” yaye uchasene nomoya oyingcwele kaThixo. (Yoh. 12:31; 14:30; 1 Yoh. 5:19) Ihlabathi lonke lityekele kuwo, yaye ubangela ukuba abantu benze ukuthanda kwawo. La mandla abangela ukuba abantu benze izinto ezingqubana nokuthanda kukaThixo nenjongo yakhe.

4, 5. Kwenzeke njani ukuze lo moya kaSathana ugqugqise kangaka?

⁴ Kwenzeke njani ukuba lo moya kaSathana ugqugqise kangaka? Okokuqala, uSathana walahlekisa uEva kumyezo wase-Eden. Wameyisela ekucingeni ukuba ukuzimela geqe kuThixo kwakuya kumenza aphile ubomi obubhetele. (Gen. 3:13) Wangqineka elixoki ngenene! (Yoh. 8:44) Wandula ke, wasebenzisa umfazi ukuze abangele ukuba uAdam anganyaniseki kuYehova. Ngenxa yokhetho luka-Adam, abantu baba nesono, baza ngaloo ndlela baba notyekelo lokulandela umoya kaSathana wokungathobeli.—Funda eyabase-Efese 2:1-3.

⁵ USathana waphembelela nenkitha yeengelosi, ezaba ziidemon. (ISityhi. 12:3, 4) Zamshiya uThixo ngaphambi koNogumbe wexesha likaNowa. Ezo ngelosi zazikholelwa ukuba zaziya konwaba xa zishiya izigxina zazo ezulwini zize ngokulihlazo zilandele iminqweno yazo engafanelekanga emhlabeni. (Yude 6) Encediswa zezo demon, eziyimimoya ngoku, uSathana “ulahlekisa umhlaba omiweyo uphela.” (ISityhi. 12:9) Okubuhlungu kukuba, uninzi lwabantu lusamfanyekiswa yimpembelelo yeedemon.—2 Kor. 4:4.

Ngaba Uphenjelelwa Ngumoya Wehlabathi?

6. Umoya wehlabathi unokusiphembelela kuphela xa kutheni?

⁶ Uninzi aluyazi impembelelo kaSathana, kodwa akukho sizathu sokuba amaKristu enene angawazi amaqhinga akhe. (2 Kor. 2:11) Eneneni, umoya wehlabathi unokusiphembelela kuphela xa siwuvumela. Makhe sihlolisise imibuzo emine eza kusinceda sibone enoba siphenjelelwa ngumoya kaThixo okanye owehlabathi.

7. Yiyiphi indlela uSathana azama ngayo ukusahlukanisa noYehova?

⁷ Iindlela endizonwabisa ngazo zityhila ntoni ngam? (Funda uYakobi 3:14-18.) USathana uzama ukusahlukanisa noThixo ngokusihendela ekuthandeni ugonyamelo. UMtyholi uyazi ukuba uYehova umthiyile nabani na othanda ugonyamelo. (INdu. 11:5) Ngoko, uSathana uzama ukusebenzisa iincwadi, iimovie, umculo, nemidlalo ye-elektroniki—eminye yayo ekhuthaza abadlali ukuba baziphathe kakubi baze babulale—ukuze zikhulise iminqweno yethu yenyama. USathana uyavuya lo gama nje inxalenye yentliziyo yethu ithanda okubi, enoba sisabuthanda ubulungisa.—INdu. 97:10.

8, 9. Yiyiphi imibuzo ephathelele ukuzonwabisa esimele sizibuze yona?

⁸ Kwelinye icala, umoya kaThixo ubangela ukuba abo bawamkelayo babe nyulu, babe noxolo baze babe nenceba. Kuya kuba kuhle ukuzibuza ukuba, ‘Ngaba iindlela endizonwabisa ngazo zindikhuthaza ukuba ndibe neempawu ezintle?’ Ubulumko obuvela phezulu “abunaluhanahaniso.” Abo baphenjelelwa ngumoya kaThixo abashumayeli kubamelwane babo ngokuba nyulu nokuba noxolo baze bona bonwatyiswe kukubukela ugonyamelo nokuziphatha okubi emakhayeni abo.

⁹ UYehova ulindele ukuba sizinikele ngokupheleleyo kuye. Noko ke, uSathana uya kufuna enoba nje sisenzo esinye sonqulo, njengoko wenzayo kuYesu. (Luka 4:7, 8) Sinokuzibuza: ‘Ngaba indlela endizonwabisa ngayo indenza ndikwazi ukuzinikela ngokupheleleyo kuThixo? Ngaba yenza kube nzima okanye kube lula ngam ukuxhathisa umoya wehlabathi? Ngaba kufuneka ndilutshintshe ukhetho lwam kwixesha elizayo?’

10, 11. (a) Ngokuphathelele izinto eziphathekayo, umoya wehlabathi ukhuthaza isimo sengqondo esinjani? (b) ILizwi likaThixo eliphefumlelweyo likhuthaza ukuba sibe nesimo sengqondo esinjani?

¹⁰ Sinjani isimo sam sengqondo ngokuphathelele izinto eziphathekayo? (Funda uLuka 18:24-30.) Umoya wehlabathi uphembelela abantu ukuba babe “nenkanuko yamehlo” ngokukhuthaza ukubawa nokuthanda izinto eziphathekayo. (1 Yoh. 2:16) Ubangele ukuba uninzi luzimisele ukuba zizityebi. (1 Tim. 6:9, 10) Lo moya ubunokusenza sikholelwe ukuba xa sinezinto eziphathekayo ezininzi siya kuhlala sinqabisekile. (IMize. 18:11) Kodwa ke, ukuba sithanda imali ngaphezu kokuba sithanda uThixo, uya kuba usoyisile uSathana. Simele sizibuze, ‘Ngaba eyona nto ndiyixabisileyo ebomini bam kukuba nezinto eziphathekayo neziyolo?’

¹¹ Ngokwahlukileyo, iLizwi likaThixo eliphefumlelwe ngomoya oyingcwele lisikhuthaza ukuba sibe nembono elungeleleneyo ngemali size sisebenze nzima ukuze silungiselele thina neentsapho zethu izinto eziyimfuneko. (1 Tim. 5:8) Umoya kaThixo unceda ukuba abo bawamkelayo babe nesisa njengoYehova. Abantu abanjalo baziwa njengabaphayo, kungekhona abamkelayo kuphela. Baxabisa abantu ngaphezu kwezinto eziphathekayo yaye babelana nabantu ngaloo nto banayo xa kusemandleni abo. (IMize. 3:27, 28) Ibe abaze bavumele ukusukela imali kube yeyona nto iphambili kunokukhonza uThixo.

12, 13. Ngokwahlukileyo kumoya wehlabathi, umoya kaThixo unokusinceda njani?

¹² Ubuntu bam bubonakalisa ukuba ndilawulwa nguwuphi umoya? (Funda eyabaseKolose 3:8-10, 13.) Umoya wehlabathi ukhuthaza imisebenzi yenyama. (Gal. 5:19-21) Umoya osiphembelelayo uye ubonakale ngakumbi xa izinto zingahambi kakuhle, njengaxa abazalwana okanye oodade wethu besingasikhathaleli, besikhubekisa, okanye bade basone. Ukongezelela, emakhayeni ethu, usenokubonakala umoya osilawulayo. Simele sizihlole. Zibuze, ‘Kwiinyanga ezintandathu ezidlulileyo, ngaba ubuntu bam bebufana nobukaKristu okanye ngaba ndikhe ndathetha ndaza ndaziphatha ngendlela engafanelekanga?’

¹³ Umoya kaThixo unokusinceda ‘sibuhlube ubuntu obudala kunye noqheliselo lwabo’ size sinxibe “ubuntu obutsha.” Oko kuya kusinceda sibe nothando nobubele ngakumbi. Kuya kuba lula ngathi ukuxolela abanye ngesisa, kwanokuba sinesizathu esivakalayo sokubakhalazela. Xa siphathwa ngokungekho sikweni asisayi kuphendula ‘ngobukrakra bolunya nomsindo nengqumbo nokumemeza nokutshabhisa.’ Kunoko, siya kwenza umgudu wokuba “nemfesane.”—Efe. 4:31, 32.

14. Abantu abaninzi ehlabathini balijonga njani iLizwi likaThixo?

¹⁴ Ngaba ndiyayihlonela yaye ndiyayithanda imilinganiselo yeBhayibhile yokuziphatha? (Funda iMizekeliso 3:5, 6.) Umoya wehlabathi uvukela iLizwi likaThixo. Abo baphenjelelwa ngulo moya bayakutyeshela oko bakujonga njengeenxalenye zeBhayibhile ezingekho ngqiqweni, bekhetha amasiko abantu neentanda-bulumko. (2 Tim. 4:3, 4) Abanye abafuni nokulibona iLizwi likaThixo. Bathandabuza ukufaneleka nokuchana kweBhayibhile, besiba zizilumko kwawabo amehlo. Bangxenga imilinganiselo yayo enyulu ephathelele ukukrexeza, ubufanasini nokuqhawula umtshato. Bafundisa ukuba “okulungileyo kubi nokubi kulungile.” (Isa. 5:20) Ngaba nathi siphenjelelwa ngulo moya? Ngaba sithembela ngobulumko babantu, kuquka iimbono zethu, xa sijamelene neengxaki? Okanye ngaba sizama ukulandela isiluleko seBhayibhile?

15. Kunokuba sayame ngobulumko bethu, yintoni esimele siyenze?

¹⁵ Umoya kaThixo usenza siyihlonele iBhayibhile. Njengomdumisi, iLizwi likaThixo silijonga njengesibane elunyaweni lwethu nanjengokukhanya endleleni yethu. (INdu. 119:105) Kunokuba sayame ngobulumko bethu, sithembela kwiLizwi likaThixo elibhaliweyo ukuba lisincede sahlule okulungileyo kokubi. Sifunda kungekuphela nje ukuhlonela iBhayibhile kodwa nokuthanda umthetho kaThixo.—INdu. 119:97.

Funda Kumzekelo KaYesu

16. Kuquka ntoni ukuba ‘nengqondo kaKristu’?

¹⁶ Ukuze sifumane umoya kaThixo, simele sibe ‘nengqondo kaKristu.’ (1 Kor. 2:16) Ukuze sibe “nesimo sengqondo esifanayo neso wayenaso uKristu Yesu” kufuneka sazi indlela awayecinga nawayesenza ngayo izinto size simxelise. (Roma 15:5; 1 Pet. 2:21) Khawuhlole ezinye zeendlela esinokukwenza ngazo oko.

17, 18. (a) Sifunda ntoni kuYesu ngokuphathelele umthandazo? (b) Kutheni sifanele ‘siqhubeke sicela’?

¹⁷ Thandazela umoya kaThixo. Ngaphambi kokujamelana neemvavanyo, uYesu wathandazela umoya kaThixo ukuba umncede. (Luka 22:40, 41) Nathi simele sicele umoya oyingcwele kaThixo. UYehova unika ngesisa bonke abo bawucela ngokholo. (Luka 11:13) UYesu wathi: “Qhubekani nicela, niya kunikwa; qhubekani nifuna, niya kufumana; qhubekani ninkqonkqoza, niya kuvulelwa. Kuba wonk’ ubani ocelayo uyamkela, nalowo ufunayo uyafumana, nalowo unkqonkqozayo uya kuvulelwa.”—Mat. 7:7, 8.

¹⁸ Xa ufuna umoya kaYehova noncedo lwakhe, musa ukukhawuleza uyeke ukuwucela. Kusenokufuneka sithandaze rhoqo size sizingise emthandazweni. Ngamanye amaxesha, uYehova uvumela abo bamcelayo ukuba babonakalise ubunzulu benkxalabo yabo nokunyaniseka kokholo lwabo ngaphambi kokuphendula imithandazo yabo.a

19. Yintoni eyayisoloko isenziwa nguYesu, yaye kutheni sifanele simxelise?

¹⁹ Mthobele ngokupheleleyo uYehova. UYesu wayesoloko esenza izinto ezimkholisayo uYise. Ngesinye isihlandlo, indlela uYesu awayefuna ukujamelana ngayo nemeko ethile yakha yahluka kuleyo yayifunwa nguYise. Sekunjalo, eqinisekile wathi kuYise: “Makwenzeke kungekhona ukuthanda kwam, kodwa okwakho.” (Luka 22:42) Zibuze, ‘Ngaba ndimthobela uThixo nokuba sekunzima?’ Ukuthobela uThixo kubalulekile ukuze siphile. Sifanele simthobele ngokupheleleyo njengoMenzi wethu, uMthombo noMlondolozi wobomi bethu. (INdu. 95:6, 7) Akukho nto ebaluleke njengokuthobela. Asinakuze simkholise uThixo ukuba asimthobeli.

20. Yiyiphi eyona nto eyayiphambili kubomi bukaYesu, yaye sinokumxelisa njani?

²⁰ Yazi kakuhle iBhayibhile. Xa wayevavanywa ukholo nguSathana, uYesu wacaphula iZibhalo. (Luka 4:1-13) Xa wayethetha nxamnye neenkokeli zonqulo, uYesu wasebenzisa iLizwi likaThixo njengegunya lakhe. (Mat. 15:3-6) Ngalo lonke ixesha uYesu awayephila ngalo, wayewazi yaye ewufezekisa umthetho kaThixo. (Mat. 5:17) Nathi sifanele sizondle ngeLizwi likaThixo elomeleza ukholo. (Fil. 4:8, 9) Ukufumana ixesha lesifundo sobuqu nesentsapho kunokuba lucelomngeni kwabanye bethu. Kunokuba sizifumanele ixesha, kusenokufuneka sizenzele ixesha.—Efe. 5:15-17.

21. Liliphi ilungiselelo elinokusinceda silazi ngakumbi iLizwi likaThixo size silisebenzise?

²¹ ‘Ikhoboka elithembekileyo neliyingqondi’ liye lasinceda ukuba sibe nexesha lesifundo sobuqu nesentsapho ngokulungiselela ingokuhlwa yoNqulo Lwentsapho veki nganye. (Mat. 24:45) Ngaba ulisebenzisa kakuhle eli lungiselelo? Ukuze ufumane ingqondo kaKristu, ngaba kwisifundo sakho awunakuquka ukufunda oko kwafundiswa nguYesu kumbandela owukhethileyo? Unokusebenzisa iWatch Tower Publications Index ukuze uphande ngombandela onomdla kuwo. Ngokomzekelo, ukususela ngowama-2008 ukuya kowama-2010, uhlelo lukawonke-wonke lweli phephancwadi belunamanqaku ali-12 anomxholo othi “Oko Sikufunda KuYesu.” Usenokusebenzisa la manqaku xa ufundisisa. Ekuqaleni kowama-2006, kuVukani! bekusoloko kukho inqaku elithi “Unokuphendula Uthini?” Eli nqaku lalinemibuzo eyenzelwe ukukunceda ulazi ngakumbi iLizwi likaThixo. Kutheni ungaquki le nkcazelo kucwangciso lwakho loNqulo Lwentsapho ngamaxesha athile?

Sinako Ukuloyisa Ihlabathi

22, 23. Yintoni esimele siyenze ukuze siloyise ihlabathi?

²² Ukuze sikhokelwe ngumoya kaThixo, sifanele sixhathise umoya wehlabathi. Akukho lula ukuwuxhathisa. Kunokuba ngumlo onzima. (Yude 3) Kodwa sinako ukoyisa! UYesu wathi kubafundi bakhe: “Ehlabathini ninembandezelo, kodwa yomelelani! Mna ndiloyisile ihlabathi.”—Yoh. 16:33.

²³ Nathi sinokuloyisa ihlabathi ukuba sixhathisa umoya walo size senze konke esinako ukuze samkele umoya kaThixo. Eneneni, “ukuba uThixo ungakuthi, ngubani na oya kuba nxamnye nathi?” (Roma 8:31) Xa sisamkela umoya kaThixo size silandele ukhokelo lwawo oluseBhayibhileni, siya kwaneliseka, sibe noxolo, sonwabe size siqiniseke ukuba siya kuphila ubomi obungunaphakade kwihlabathi elitsha elisemnyango.

[Umbhalo osemazantsi]

Ngaba Uyakhumbula?

• Kutheni umoya wehlabathi ugqugqise kangaka?

• Yiyiphi imibuzo emine esifanele sizibuze yona?

• Ziziphi izinto ezintathu esizifunda kuYesu ngokuphathelele ukwamkela umoya kaThixo?

[Umfanekiso okwiphepha 8]

Kwenzeka njani ukuze iingelosi ezithile zibe ziidemon?

[Umfanekiso okwiphepha 10]

USathana usebenzisa umoya wehlabathi ukulawula abantu, kodwa sinokuyiphepha impembelelo yawo