Zigcine Womelele Ngokomoya, Hlala Ucocekile Ukwenzela Inkonzo KaYehova
1 KuIsaya 60:22, uYehova wenza idinga esizibonela ngawethu amehlo ukuzaliseka kwalo: “Omncinanana uya kuba liwaka, noweyeleyo abe luhlanga olunamandla. Mna, Yehova, ndiya kukukhawulezisa oko ngexesha lako oko.” Xa sicinga ngohlanga, ezingqondweni zethu siba nomfanekiso wabantu abaninzi abahlanganiswe zizilangazelelo ezifanayo nabasebenza ngaphantsi kwegunya lorhulumente omiselweyo.
2 Ingxelo yenkonzo yasentsimini yowe-1991 iye yabonisa incopho yabavakalisi beendaba ezilungileyo ehlabathini lonke abazizi-4278 820, ulwando lwe-6,5 ekhulwini ngaphezu konyaka odluleyo. Ngokwenene uYehova uye wahlanganisa isihlwele esikhulu sabantu abanyanisekileyo abanqwenela ukuzahlula kule nkqubo icinezelayo baze babe ngabalawulwa abanyanisekileyo borhulumente woBukumkani bukaMesiya obulawulwa nguNyana wakhe, uYesu Kristu. Nyaka ngamnye inani labahlanganiswayo liyaqhubeka lisanda. Siyakuvuyela ukuba yinxalenye yolu hlanga olunokuchazwa ngokoqobo njengebutho labantu behlabathi elitsha. KwiSikhumbuzo sowe-1991, bebonke ababezile babezizi-10 650-158, ulwando lwesi-7 ekhulwini kunabo babeze ngowe-1990. Oku kubonisa ukuba kusekho ithemba elikhulu lokuba abaninzi ngakumbi baza kusithelela njengabalawulwa boBukumkani.
3 Kambe ke, siyaqonda ukuba asingabo bonke abantu abaqukiweyo kweli nani lababeze eSikhumbuzweni elingasentla abasele bezahlule ngokwaneleyo kweli hlabathi ukuba bangamkeleka ngokupheleleyo njengabantu bakaYehova. Abantu abasuka kuzo zonke iintlanga ‘bangumsinga ukuza endlwini kaYehova,’ kodwa kufuneka ‘bayalelwe ngeendlela zakhe’ ngokupheleleyo ukuze bakwazi ‘ukuhamba ngomendo wakhe.’ (Isa. 2:2-4) Abangaphezu kwezigidi ezine ababekho eSikhumbuzweni sele beyamkele imiyalelo kaThixo, bazuza ukomelela ngokomoya okuye kwabashukumisela ukuba bagcine ihambo ecocekileyo baze bafanelekele ukuba nesabelo kumsebenzi wokushumayela ngoBukumkani owenziwayo ngoku. (Mat. 24:14) Abanjalo banokuma okuhle emehlweni kaYehova yaye banandipha iingenelo zawo onke amalungiselelo amangalisayo abenzele wona. Yintoni emele yenziwe ngabanye abangaphezu kwezigidi ezithandathu abaseleyo ukuba nabo bafuna ukomelela ngokomoya baze bacoceke ukwenzela inkonzo kaYehova?
4 Bafanele ‘balwele ukholo.’ (Yuda 3, NW) Besakuba bekhethe ukuhamba ngomendo kaYehova, uMtyholi ubazisela ingcinezelo ngokubavavanya, ngokubalinga nangeempembelelo ezimbi. NjengoPawulos, bamele bakholose ngoYehova ukuze bafumane amandla okunyamezela. (Fil. 4:13) UYehova usebenzisa abo sele bomelele elukholweni ukomeleza abanjalo. UPawulos ululeka ngelithi “thina . . . bomeleleyo sifanele ukukuthwala ukuswela amandla kwabangomeleleyo.” (Roma 15:1, 2) Xa abomeleleyo nababuthathaka bemanyene, baba namandla okuma ngokuqinileyo. “Kulungile ukuba babe ngababini kunokuba abe mnye. . . . Ukuba umntu uthe wamgagamela oyedwa, bona ababini baya kumisa phambi kwakhe.”—INtshu. 4:9, 12.
5 Oku kuthetha ukuba abasebatsha ngokufanelekileyo baxhomekeke kuthi njengomthombo abanokufumana kuwo amandla avela kuYehova. Thina bangamaKristu azahluleleyo simele sizigcine somelele ngokomoya ukuba siza kunceda abasebatsha. AmaKristu omeleleyo ayakwazi ‘ukudlulisela izibabalo zokomoya,’ ezithi ziphumele ‘ekuvuselelaneni.’ (Roma 1:11, 12) Le yenye yeendlela eziphambili uYehova azisebenzisayo ukusimanyanisa nokusenza ‘sizimaseke yaye somelele’ sonke.—1 Pet. 5:9-11.
6 Sifanele sikwenze kube lusukelo lwethu ukunceda aba basebatsha ngoxa kwangaxeshanye siphaphele ezethu iintswelo zokomoya. (Mat. 5:3) Ubumoya bungundoqo ekomeleleni kwethu. Olu phawu lumele lomelezwe yaye luqiniswe ngokuzondla rhoqo ngokudla kokomoya. Ngentlangano yakhe, uYehova ulungiselela ucwangciso olulungelelanisiweyo lokufundisisa iLizwi lakhe. Iintlanganiso zebandla ezintlanu ngeveki zinendima ebalulekileyo ekusomelezeni, ‘zisilola eluthandweni nasemisebenzini emihle.’—Heb. 10:24.
7 Iingenelo zezi ntlanganiso ziba zezingathethekiyo xa ukwanemikhwa elungileyo yofundisiso lobuqu nolwentsapho. Ubuncinane, sonke sifanele sibe nosukelo lokufunda nokuqwalasela itekisi yosuku, sihambisane nocwangciso lokufundwa kweBhayibhile olwandlalwe kuCwangciso LweSikolo Sobulungiseleli Sobuthixo, yaye silungiselele iSifundo Sencwadi Sebandla neSifundo SeMboniselo. Ntsapho nganye imele izigqibele ngendlela eya kukucwangcisa ngayo oku, iqinisekise ukuba kwenziwa rhoqo. Kwakhona, intloko-ntsapho ifanele iqinisekise ukuba ucwangciso lofundisiso lwenziwe ukuze luhlangabezane neentswelo zokomoya ezikhethekileyo zentsapho. Ngale ndlela ‘indlu iya kwakhiwa ize izinziswe.’ (IMize. 24:3) Ukuba siyixhalabele imikhwa yethu yofundisiso njengabantu ngabanye nanjengeentsapho, sinokuqiniseka ukuba uYehova uya kusisikelela yaye umoya wakhe uya kusinceda sizinyamezele ngokunempumelelo iimvavanyo ezahlukahlukeneyo.—Yak. 1:2, 3; 1 Pet. 4:11.
8 Ukuhlala Sicocekile Yaye Singenakubekwa Bala: Ngoxa uYehova esimema ngobubele ukuba sisondele kuye, kwangaxeshanye, ukwenza kucace ukuba oku sikwenza ngokuba nokholo kwigazi likaYesu elaphalalayo, ‘elisihlambululayo kuso sonke isono.’ (1 Yoh. 1:7; bona kwanamaHebhere 9:14.) Sinokuqhubeka silomeleza ukholo lwethu ngofundisiso lobuqu lweLizwi likaThixo nangokusebenzisa oko sikufundayo. Kamva abanye baphelelwa lukholo ngenxa yokuba bayayeka ukuzondla ngokudla kokomoya okanye abenzi mgudu ungako wokukusebenzisa kubomi babo. Oku kubashiya bechanabeke kwiintlaselo zikaSathana. Abanye baye babuthathaka ngokomoya, nto leyo eye yabangela ukuba baphole. Okulusizi kukuba abanye baye bazivumela ukuba beyele kwisenzo esiphosakeleyo esinzulu, nto leyo ebangele ukuba basuswe kubudlelane. UPawulos walumkisa: “Lowo uba umi, makalumke angawi.” (1 Kor. 10:12) Ukuba ngabom siyakutyeshela ukufundisisa, ukubakho kwiintlanganiso nenkonzo, sinokurhintyelwa ngokulula ziimpembelelo nezilingo ezingengcwele.—Heb. 2:1; 2 Pet. 2:20-22.
9 Kubalulekile ukuba sizigcine sicocekile ngazo zonke iindlela: emzimbeni, engqondweni, ngokomoya nangokokuziphatha. (2 Kor. 7:1) Ihlabathi elisingqongileyo liya lisonakala yaye liphelelwa yimilinganiselo qho kusisa. UMtyholi uyaqhubeka ebuphucula ubuchule bakhe bokusihenda. Ukuzigcina somelele ngokomoya kuqinisekisa ukuba asiyi ‘kubonelelwa nguye kuba amaqhinga akhe siyawazi.’ (2 Kor. 2:11) Imiyalelo neziluleko esizifumanayo kwintlangano kaYehova ziyasinceda siziqonde size sizixhathise iimpembelelo ezimbi.
10 Abo bakhokelayo ebandleni banembopheleleko yokumisela abanye umzekelo omhle wokuhlala bomelele yaye becocekile. UPawulos wayigxininisa le mbopheleleko xa wathi: “Bakhumbuleleni abakhokeli benu. . . . Nisingasinga impumelelo yehambo yabo, nixelise bona elukholweni lwabo.” (Heb. 13:7) Kubalulekile ukuba abadala nezicaka zolungiselelo abamiselweyo babe ngumzekelo ngehambo yabo yobuqu kwanasekunyamekeleni iimbopheleleko zabo njengeentloko-ntsapho. Bafanele bazabalazele ukufana noTimoti oselula, owabongozwa ukuba “[abe] ngumzekelo . . . ngentetho, ngehambo, ngothando, ngokholo, ngobunyulu.” (1 Tim. 4:12; 1 Pet. 5:3) Nathi sonke sikwanembopheleleko yokumisela imizekelo emihle ngokugcina ihambo yethu iyebekekileyo. Abasebatsha basoloko besenza isigqibo ngenyaniso, kwanentlangano kaYehova, ngoko bakubona kuthi. Sifanele siqinisekise ukuba oko bakubonayo kuyabakhuthaza ukuba bangene kwintlangano kaYehova ecocekileyo.
11 Isantya somsebenzi wokuhlanganisa abo baya “embandezelweni enkulu” siyaqhubeka sikhula. (ISityhi. 7:14) Kuphela ngabo bomeleleyo ngokomoya nabazigcina becocekile abaya kusinda ekugqibeleni. Okuninzi kuxhomekeke kwaba thunywashe: (1) ukugcina imikhwa elungileyo yofundisiso lobuqu nokucamngca ngeLizwi likaThixo; (2) ukubonakalisa umdla wokwenyaniso wobuqu omnye komnye ngomnqweno wokukhuthazana; kunye (3) nokusebenza kunye ngokumanyeneyo ekugcineni ihambo ecocekileyo eya kuzukisa igama likaYehova. Ukwenza ezi zinto kuya kuqinisekisa ukuba siya kufumana intsikelelo nenkuselo kaYehova xa eli hlabathi lipheliswa. Sinokuba nentembelo yokuba siya kuba phakathi ‘kwabanyanisileyo uYehova angumlondolozi wabo.’—INdu. 31:23.