Ukunxibelelanisa Iintshayelelo Zethu Noncwadi
1 Xa ulungiselela intshumayelo yakho kule nyanga, usenokuqala ngokuqwalasela iingxaki ezinkulu abajamelene nazo abantu abakummandla ohlala kuwo uze ke ukhethe amazwi akumaphephancwadi akutshanje okanye kwincwadana enemifanekiso eyalatha kwisicombululo esisebenzisekayo nesisekelwe eZibhalweni.
2 Kweminye imimandla, abantu basenokuba baxhalatyiswe kukwanda kokungaqeshwa neendleko eziphakamileyo zokuphila. Ukuba udibana naloo meko, unokuyikhankanya ngokuthe ngqo le ngxaki kwintshayelelo yakho.
Usenokuthi:
◼ “Besithetha nabamelwane bethu ngento enokwenziwa ukuqinisekisa ukuba wonk’ ubani uya kuqeshwa aze afumane indlu. Ngaba ukholelwa ukuba kusengqiqweni ukulindela ukuba oorhulumente babantu baya kukwenza oku? [Mvumele umninimzi aphendule.] Kukho ubani oyaziyo indlela yokucombulula ezi ngxaki; khawuphawule isithembiso sakhe esiqinisekisayo kuIsaya 65:21-23. [Funda.] UMdali wethu wenza ukuba esi sithembiso sibhalwe ukuze kukhuthazwe thina, yaye sonke siyakufuna ukukhuthazwa kula maxesha anzima, ngaba akunjalo?”—rsXO, iphe. 14.
3 Xa ukule ndawo kwintshumayelo yakho, unokunxibelelanisa umbandela okumaphephancwadi okanye kwincwadana enemifanekiso yakutshanje. Ukuba ukumsebenzi wamaphephancwadi, usenokukhetha ingongoma efanelekileyo kwinqaku elithi “Ithemba Liyakoyisa Ukuphelelwa Lithemba!” kwinkupho kaJulayi 1 yeMboniselo. Ukuba uhambisa incwadana enemifanekiso ethi “Uyabona,” bonisa indlela umbandela wezindlu nengqesho ukwenzela abantu bonke oboniswe ngayo kumfanekiso okwiphepha elingaphambili nelingasemva lale ncwadana inemifanekiso. Unokuyivula ukuze umninimzi awubone wonke lo mfanekiso ngaxeshanye.
4 Kwintsimi apho abaninimzi baxhalatyiswe zizinto ezahlukahlukeneyo, intshayelelo evumelana ngakumbi neemeko iya kuba luncedo. Usenokuzama ukusebenzisa intshayelelo yesibini kwezidweliswe kwincwadi Ukuqiqa ngaphantsi komxholwana othi “UBukumkani.”
Usenokuthi:
◼ “UYesu wasifundisa ukuba sithandazele uBukumkani bukaThixo ukuba buze nokuba ukuthanda Kwakhe kwenziwe emhlabeni njengokuba kusenziwa ezulwini. Ngaba ucinga ukuba ukuba ukuthanda kukaThixo kunokuze kwenziwe apha, lo mhlaba ngokwenene uya kuba yiparadisi?” Emva kokuba umninimzi ephendule, tyhila uze ufunde ISityhilelo 21:3-5.
Yandula ke, ukuba unikela incwadana enemifanekiso ethi Urhulumente, ufunde iindawana ezikhethiweyo kwisiqendu esiyintshayelelo kwiphepha 3. Phawula la mazwi: “NgoBukumkani, uThixo kungekudala uya kuphelisa iimfazwe, indlala, izifo, nolwaphulo-mthetho.” Buza umninimzi ukuba uvakalelwa kukuba ziziphi kwezi ngxaki ezizezona zinkulu.
Ukuba ubalaselisa “IMboniselo” kaJulayi 15, usenokuthi:
◼ “Abantu abaninzi basengathanda ukukholelwa ukuba esi sithembiso siya kuzaliseka, kodwa abaqinisekanga enoba iBhayibhile isisikhokelo esinokuthenjwa kusini na. Ndiyaqiniseka ukuba uya kulifumanisa eli nqaku lithi, ‘Ngaba IBhayibhile Iyaziphikisa?,’ lisomeleza ukholo.”
5 Nabantu abaselula banokusinikela ngokunempumelelo isigidimi soBukumkani, kwanakubantu abakhulu.
Xa betshayelela uIsaya 65:21-23, abavakalisi abaselula banokuthi:
◼ “Ndiyazi ukuba njengomntu omkhulu unamava ngakumbi ngobomi kunokuba ndinjalo, kodwa esi sibhalo sinokusithuthuzela sonke.”
6 Qinisekisa ukuba uyibhala phantsi ngenyameko nantoni na ehanjisiweyo, kuquka negama lencwadana enemifanekiso okanye amaphephancwadi ahanjisiweyo. Le nkcazelo uya kuyifuna xa ubuyela ngenjongo yokuhlakulela umdla.