Khonza UYehova Ngaphandle Kokuphazanyiswa
1 “Hayi uyolo lwabantu abaThixo unguYehova!” (INdu. 144:15) Ngaba la mazwi kaKumkani uDavide aseyinyaniso, kwanakule mihla ingendawo? (Efe. 5:16) Ewe! AmaKristu asavuyiswa kukukhonza uYehova. Izinto azisoloko zisihambela kakuhle. USathana usitsalisa nzima kula ‘maxesha anomngcipheko,’ sekunjalo asidimazeki. (2 Tim. 3:1, 2) Iimeko eziya zisiba mbi zibubungqina obungakumbi bokuba lisondele ixesha lokuba uBukumkani bukaThixo butshabalalise eli hlabathi lidala lonakalayo buze buzise ihlabathi elitsha elicocekileyo endaweni yalo. (2 Pet. 3:13) Ubumnyama beli hlabathi abukwenzi mfiliba okanye bukucime ukuqaqamba kwethemba lethu elonwabisayo; kunoko, ithemba lethu loBukumkani liqaqambe ngakumbi nangakumbi. Ngaba akuvuyiswa kukukhonza uYehova njengesikhanyiso kweli hlabathi linobumnyama?—Fil. 2:15.
2 Njengabantu ngabanye, simele sihlale siyilumkele indlela esimkhonza ngayo uYehova. Ngoba? Kuba uSathana ungumPhazamisi omkhulu. Esinye isichazi-magama sikuchaza “ukuphazamisa” “njengokuphambukisa,” “ukutsalela okanye ukwalathisela (ingqalelo kabani) kwenye into eyahlukileyo okanye kumacala ahlukeneyo ngexesha elinye,” nangokuthi “ukukhathazwa okanye ukudidwa kukungqubana kweemvakalelo okanye iintshukumisa.” Ukususela ekuphosweni kwakhe apha emhlabeni, uSathana uye waphumelela ‘ekulahlekiseni’ uluntu. Usebenzisa amacebo amaninzi ukwenza abantu banganikeli ngqalelo kwimbambano eyinyaniso yomhla wethu. (ISityhi. 12:9) Nangona amaNgqina kaYehova eye azibhokoxa ekushumayeleni uBukumkani kwikhulu leminyaka elidluleyo, bangaphi abantu abayiqondayo imbambano ebalulekileyo yokungcwaliswa kwegama likaThixo neyokuthethelelwa kolongamo lwakhe ngoBukumkani bukaThixo? Bambalwa ngokwentelekiso. (1 Yoh. 5:19) Ukuba uSathana unokuphazamisa amawaka ezigidi zabantu kulo mhlaba, ingozi ehlala ikho yeyokuba nathi unokusiphazamisa okanye athimbe ingqalelo yethu ukuze sishiye inkonzo kaYehova. Okulusizi kukuba, bambi kubazalwana bethu baye badidwa ziziphazamiso zikaSathana. Bavumele iingqondo zabo zatsalelwa kumacala ahlukeneyo. Kukho izinto ezininzi ezisisiphazamiso namhlanje. Qwalasela nje ezimbalwa zazo.
3 Iingxaki Zezoqoqosho Nokuthanda Izinto Eziphathekayo: Kwinkoliso yamazwe omhlaba, ukungaqeshwa nokuphakama kweendleko zokuphila kuyaxhalabisa. Kuyinyaniso ukuba simele sizixhase kunye neentsapho zethu ngokutya, ngempahla nangekhusi. Kodwa ukuba siyazivumela sixhalele ngokugqith’ emgceni izinto eziyimfuneko ebomini, oku kuxhalaba kuya kulawula ukucinga kwethu. Eyona nto iya kuba yebalulekileyo kubomi bethu inokuba kukuphumelela kwethu ngokwasenyameni kunokuba sixhase imbambano engoBukumkani. Mayela noku umpostile uPawulos wanikela isiluleko esikumaHebhere 13:5, 6. UYesu Kristu usiqinisekisa ngelokuba abo bafuna uBukumkani tanci abamele babe nexhala; uYehova usinika oko kuyimfuneko ngokwenene kuthi. (Mat. 6:25-34) Oovulindlela nabanye abakhonzi abakwinkonzo yexesha elizeleyo ehlabathini lonke banokungqina ukuba oku kuyinyaniso.
4 Ihlabathi likaSathana likhuthaza ukuthanda izinto eziphathekayo. Izigidi zabantu zithe phithi kukuqokelela izinto eziphathekayo ezingakumbi okanye ukuzilondoloza. Iziphazamiso ezifanayo zazikho nangomhla kaYesu. Omnye umlawuli oselula osisityebi wabuza uYesu into awayemele ayenze ukuze abudle ilifa ubomi obungunaphakade. UYesu waphendula: “Ukuba unga ungafezeka [okanye, ungagqibelela], hamba uye kuthengisa ngeempahla zakho, uphe amahlwempu; woba nobutyebi emazulwini; uze ke undilandele.” (Mat. 19:16-23) Kuyabonakala ukuba, izinto zakhe eziphathekayo ezininzi zazimphazamisa lo mfana ekukhonzeni uThixo ngomphefumlo uphela. Intliziyo yakhe wayeyinikele kubutyebi. UYesu wayesazi ukuba lo mfana wayeya kungenelwa ukuba wayenokuzikhulula kwezi ziphazamiso. Zamthintela akazinikela ngokupheleleyo kuThixo. Kuthekani ngawe? Ngaba uzifumana usebenza iiyure ezininzi kumsebenzi wempangelo kuba ungafuni kuphulukana nendlela yokuphila oqhelene nayo? Ngaba oku kuyichaphazele inkonzo yakho kuYehova? Ngaba izinto zakho eziphathekayo ziyazongamela izilangazelelo zoBukumkani? (Mat. 6:24) Ngaba ungabuphila ngendlela eqhelekileyo ubomi bakho ukuze unikele ixesha elingakumbi kwizilangazelelo zokomoya?
5 Imicimbi Eqhelekileyo Yobomi Bemihla Ngemihla: Ukuba asiphaphanga, sisenokuxakeka gqitha yimicimbi eqhelekileyo yobomi kangangokuba side sikutyeshele ukusukela izinto zokomoya. Khumbula abantu bomhla kaNowa. Babexakeke gqitha yimicimbi yasentlalweni, babesitya besela, bezeka yaye besendisa abantwana babo, bada abasinanza isigidimi sikaNowa esasilumkisa ngoNogumbe owayesondela. Bengaqondanga, uMkhukula wafika wabatshabalalisa bonke. Iziphazamiso zathetha ukutshabalala kubo. UYesu wathi: “Koba njalo nokufika koNyana woMntu.” (Mat. 24:37-39) Eneneni, inkoliso yabantu namhlanje ixakeke gqitha zizinto zobomi bayo ukuba inganikela ingqalelo kwisigidimi esilumkisayo esisisa kuyo. Ayinamdla ngokothusayo kwizinto zokomoya.
6 Ngaba ubomi bakho buya buxakekiswa zizinto zasentlalweni kangangokuba iya isiba ncinane ingqalelo oyinikela kwizinto zokomoya? Ngesinye isihlandlo, uYesu wamenywa ukuba andwendwele ekhayeni likaMarta noMariya. UMariya wayephulaphule ngenyameko koko wayekuthetha. Kwelinye icala, uMarta “wakruthakrutheka kukulungiselela okuninzi.” UMarta wazixhalabisa ngokugqith’ emgceni ngokuba ngumamkeli zindwendwe olungileyo. Wasilela ukuqonda imfuneko yokuchitha ixesha ephulaphule uYesu. Wamchazela ngobubele uMarta ukuba wayengafuni kulungiselelwa ngokugqithisileyo; wayefanele anikele ingqalelo engakumbi kwizinto zokomoya. Ngaba kufuneka usisebenzise esi siluleko? (Luka 10:38-42) Kwakhona uYesu walumkisa ngelokuba simele sizilumkele ukuze singazingxali ngokutya size sinxile, sidodobalisa iimvakalelo zethu. Kweli xesha linomngcipheko lembali yoluntu, kufuneka siphaphe ngokupheleleyo.—Luka 21:34-36.
7 Ukusukela Iziyolo: Esinye sezona ziphazamiso uMtyholi azisebenzisayo ukususa ingqalelo yethu kwimbambano engoBukumkani kukusukela iziyolo. Izigidi kwiNgqobhoko ziye zabeka iziyolo endaweni kaThixo. Zikhetha ukonwatyiswa zizinto ezitenxileyo kunokuba zibe nomdla onzulu kwiLizwi likaThixo. (2 Tim. 3:4) Kambe ke, ukuzonwabisa nokuzihlaziya okwakhayo akuphosakele. Kodwa ukuchitha ixesha eligqithileyo veki nganye kwizinto ezinjengomabonwakude, imifanekiso eshukumayo, iivideo, imidlalo, ukufunda iincwadi zehlabathi, okanye ukwenza imisetyenzana yokuzonwabisa kusenokwenza kuvele intliziyo enenkohliso ize isisuse kuYehova. (Yer. 17:9; Heb. 3:12) Ingenzeka njani loo nto? Ebudeni beentlanganiso zamaKristu, usenokufumanisa ukuba ingqondo yakho iyabhadula; usenokude unqwenele ukuba iintlanganiso zide ziphume ukuze ukwazi ukubuyela eziyolweni. Kungekudala, usenokuzifumanisa ufuna izizathu zokuhlala ekhaya kunokuya kwiintlanganiso okanye kwinkonzo yasentsimini. Lingoku ixesha lokuphawula ngokuphandle ukuba olu sukelo luziziphazamiso kubomi bakho. (Luka 8:14) Ngaba ezinye zeeyure ezixabisekileyo ozichithela ekuzonwabiseni ubungenakuzisebenzisa ngokulunge ngakumbi kwinkqubela yokomoya?
8 Eminye Imibandela Etya Ixesha: Abanye babanjiswe kukuzama ukucombulula iingxaki ezixhaphakileyo kwibutho labantu lanamhlanje. AmaKristu kufuneka akuphephe ukubandakanyeka kwiingxoxo zehlabathi ezingapheliyo ezingemibandela yentlalo okanye imizabalazo yalo elilize yokulungisa okungekho sikweni. (Yoh. 17:16) Konke oku kuyinxalenye yamacebo kaSathana okususa ingqalelo yethu kwisiluleko seBhayibhile nakwinyaniso esisiseko yokuba kukho isicombululo esinye kuphela esihlala sihleli—uBukumkani bukaThixo. Ukuba besiphethwe kakubi okanye ngokungekho sikweni, simele silumkele ukufuna ukuziphindezelela okanye sicaphuke gqitha side sizilibale nokuba singoobani na—amaNgqina kaYehova. Ngaphezu kwako konke, nguYehova owoniweyo, ibe ligama lakhe esimele silingcwalise.—Isa. 43:10-12; Mat. 6:9.
9 Ngoxa wonk’ ubani efuna ukuba nomlinganiselo othile wempilo entle, ukunikela ingqalelo egqithisileyo kwiingcamango ezingapheliyo nakumayeza acetyiswayo kusenokumenza ubani alawulwe yimicimbi yempilo. Kukho abaninzi abancomela iindlela ezahlukeneyo zokutya nezonyango zokunceda iingxaki zomzimba nezeemvakalelo, inkoliso yazo engqubanayo. Into eyenziwa ngumntu kwimibandela yempilo isisigqibo sobuqu, logama nje ingangqubani nemigaqo yeBhayibhile. Masihlale sikholose ngokupheleleyo ngoBukumkani bukaThixo njengonyango lokwenyaniso lwezigulo zoluntu.—Isa. 33:24; ISityhi. 21:3, 4.
10 Qina, Ungabi Nakushukuma: Njengokuba isiphelo sisondela, uSathana uya kuyandisa imigudu yakhe yokukuphazamisa ekukhonzeni uYehova. “Mchaseni lowo, nizimasekile elukholweni.” (1 Pet. 5:9) Njani? Umele uzondle ngeengcinga zikaThixo. (Mat. 4:4) Musa ukuvumela iziphazamiso zehlabathi ziphange ixesha lakho nelentsapho yakho lokucamngca nokucinga ngokuzolileyo ngeLizwi likaThixo. Ngamaxesha ezidlo zentsapho, xubushani kunye ngamava akhayo neminye imibandela yokomoya. Namathelani kucwangciso oluthe rhoqo lofundisiso lobuqu nolokulungiselela iintlanganiso.
11 Xa amaxhala esongela ukuphazamisa ingqondo yakho, lahlela umthwalo wakho kuYehova ngomthandazo. Qiniseka ukuba ukukhathalele. (1 Pet. 5:7) Vumela uxolo lukaThixo lukhokele intliziyo namandla akho engqondo. (Fil. 4:6, 7) Musa ukuvumela iziphazamiso ziyenze mfiliba indlela ozijonga ngayo izinto zokomoya. Qhubeka ubeka uYehova phambi kwakho, njengokuba uYesu wenzayo. (IZe. 2:25) Qhubeka ujonge phambili kusukelo lwakho, njengokuba IMizekeliso 4:25-27 ikhuthaza njalo: “Amehlo akho makakhangele athi gca, neenkophe zakho zithi nzo kokuphambi kwakho. Lungelelanisa umkhondo wonyawo lwakho, zonke iindlela zakho zizimaseke. Musa ukuthi gu bucala ngasekunene nangasekhohlo.”
12 Ngokuthembeka yibakho kuzo zonke iintlanganiso, uze uziqeqeshe ukuze unikele ingqalelo kumyalelo ovela kwiLizwi likaThixo. (Heb. 2:1; 10:24, 25) Yaye kunokufuna iziyolo ezikhoyo kweli hlabathi lonakeleyo, zenzele usukelo lokuba nobulungiseleli obunemveliso. Oku kuzisa uvuyo nolwaneliseko oluhlala luhleli. (1 Tes. 2:19, 20) Okokugqibela, musa ukuvumela nantoni na okanye nabani na akuphambukise kwinkonzo yakho engcwele. “Qinani, ningabi nakushukuma; nihlale niphuphuma umsebenzi weNkosi, nisazi nje ukuba ukubulaleka kwenu akulambathi eNkosini.”—1 Kor. 15:58.