Sekela Ubomi Bakho Kwinkonzo KaYehova
1 UYesu wafanisa abaphulaphuli bakhe neendidi ezimbini zabakhi. Omnye wakhela indlela yakhe yobomi phezu kolwalwa ngokuthobela uKristu yaye wakwazi ukumelana neenkqwithela zenkcaso nembandezelo. Omnye wakhela phezu kwentlabathi yokungathobeli okuqhutywa kukuzingca yaye akazange akwazi ukuxhathisa xa kweza ubunzima. (Mat. 7:24-27) Siphila ekuqoshelisweni kwale nkqubo yezinto, sifikelwa ziinkqwithela ezininzi zobunzima. Elundini phaya amafu amnyama embandezelo enkulu ayahloma ngokukhawuleza. Ngaba siya kunyamezela kuse ekupheleni lungakhange lwenzeke nto ukholo lwethu? (Mat. 24:3, 13, 21) Ubukhulu becala oku kuxhomekeke kwindlela esibakha ngayo ubomi bethu ngoku. Ngaloo ndlela, kungxamisekile ukuba sizibuze, ‘Ngaba ubomi bam bobuKristu ndibusekela kwinkonzo yokuthobela uThixo?’
2 Kuthetha ukuthini ukusekela ubomi bethu kwinkonzo kaYehova? Kuthetha ukwenza uYehova abe ngoyena ubalulekileyo kubomi bethu. Kubandakanya ukugxininisa kuBukumkani njengeyona nto iphambili esiyixhalabeleyo. Kuquka ukuthobela uThixo kuyo yonke imisebenzi yobomi bethu bemihla ngemihla. Kufuna sizibhokoxe kwisifundo sobuqu, kwesentsapho, kwisifundo sebandla seBhayibhile nakubulungiseleli bethu basentsimini, ezi zinto sizenze ezona ziza kuqala kuthi. (INtshu. 12:13; Mat. 6:33) Elo khondo lingaguqukiyo nelokuthobela lomeleza ukholo, olungayi kuwa naxa lubhudlwa ziinkqwithela zeenzima ezinokuvela.
3 Kuluvuyo ukubona izigidi zabantu ngentembelo zisekela ubomi namathemba azo exesha elizayo kwinkonzo kaThixo, kanye njengokuba uYesu wenzayo. (Yoh. 4:34) Babambelela kucwangciso oluqhubekayo lwemisebenzi yobuthixo yaye umphumo iba kukunandipha iintsikelelo ezityebileyo. Omnye umama wabalisa indlela yena nomyeni wakhe abaphumelela ngayo ukukhulisa oonyana babo ababini ekukhonzeni uYehova: “Sazixakekisa ngenyaniso—sisiya kuzo zonke iindibano, silungiselela iintlanganiso yaye sisiya kuzo, yaye ubulungiseleli sibenza eyona nkalo iphambili kubomi bethu.” Umyeni wakhe wongezelela wathi: “Inyaniso asiyonxalenye yobomi bethu, ibubomi bethu. Yonke enye into ijikeleza yona.” Ngaba nawe ngokunjalo uye wabeka inkonzo kaYehova njengeyona nto iza kuqala kwintsapho yakho?
4 Funa Ucwangciso Olusebenzisekayo Veki Nganye: Intlangano kaYehova iyasinceda silandele ucwangciso olusemagqabini lokomoya ngokulungiselela iintlanganiso ezintlanu ngeveki. AmaKristu asekela ubomi bawo kunqulo lukaYehova alungelelanisa umsebenzi wawo nezinto zentsapho ngendlela yokuba aye kuzo zonke ezi ntlanganiso zibalulekileyo. Akazivumeli izinto ezingabalulekanga ukuba ziphazamise ukuya rhoqo kwawo ezintlanganisweni.—Fil. 1:10; Heb. 10:25.
5 AmaKristu aqolileyo ayaqonda ukuba kanye njengokuba kubalulekile ukufumana ukutya kokwenyama rhoqo ngamaxesha athile suku ngalunye, ngoko ke, kubalulekile ukwenza ucwangciso olusisigxina lwesifundo sobuqu nesentsapho, kuquka nokulungiselela iintlanganiso. (Mat. 4:4) Ngaba ungabekela bucala ubuncinane imizuzu eli-15 okanye engama-20 yesifundo sobuqu suku ngalunye? Undoqo kukuba ungavumeli ezinye izinto ziphazamise ixesha lesifundo elibekelwe bucala. Kwenze umkhwa omhle. Oku kunokufuna ukuba uvuke ngakumbi kunokuba usenza ngoku ntsasa nganye. Amalungu ali-17 000 entsapho yaseBheteli ehlabathini jikelele avuka kwakusasa ukuze abe nengxubusho yetekisi yosuku. Kakade ke, ukuvuka ngethuba kufuna ukuba ulale kwangethuba ebusuku ukuze uqalise usuku olulandelayo unamandla yaye uphumle ngokwaneleyo.
6 Ukuba uyintloko-ntsapho, khokela ekucebeni nasekulungelelaniseni ucwangciso lwentsapho lwezinto zobuthixo. Zimbi iintsapho zifunda iBhayibhile kunye, Incwadi Yonyaka, okanye enye impapasho xa ziphumle emva kwesidlo sasebusuku. Abazali abaninzi abaye babona abantwana babo bekhula besiba ngamaKristu omeleleyo ngokomoya bathi omnye uthunywashe owaba negalelo kwimpumelelo yabo yayiluqheliselo lwentsapho lokubekela bucala urhatya veki nganye ababenandipha ixesha lokuba kunye benandipha izinto zokomoya. Omnye ubawo onjalo wathi: “Ndivakalelwa kukuba ukuhambela phambili ngokomoya kwabantwana bethu kwakungenxa yendima yethu enkulu kwisifundo sethu esithe rhoqo ngobusuku bangoLwesithathu, esaqalisa kwiminyaka engama-30 eyadlulayo.” Bobathathu abantwana bakhe babhaptizwa beselula, kamva bobathathu bangenela ubulungiseleli bexesha elizeleyo. Ukongezelela kwisifundo sentsapho, iinxalenye zentlanganiso okanye isigidimi senkonzo yasentsimini sinokuqheliselwa, yaye eminye imisebenzi eyakhayo inokwenziwa kunye.
7 Kucwangciso lwakho lweveki nganye, ngaba ‘ulicwangcisile ixesha’ lokushumayela ngoBukumkani? (Kol. 4:5) Inkoliso yethu iphila ubomi obuxakekileyo, sineentsapho neembopheleleko zebandla ekufuneka sizinyamekele. Ukuba asiwenzi amalungiselelo aqinisekileyo okuba nenxaxheba kumsebenzi wokushumayela nowokufundisa veki nganye, kuya kuba lula ukuba ezinye izinto ziphazamise lo msebenzi ubalulekileyo. Umnini wefama yenkomo wathi: “Malunga nowe-1944 ndaqonda ukuba ekuphela kwendlela endandinokuba nesabelo ngayo enkonzweni yayikukuyicwangcisela usuku oluthile. Kude kube namhlanje ndisathabatha usuku evekini ukuze ndiye enkonzweni.” Omnye umdala ongumKristu wafumanisa ukuba ukuba nocwangciso lokunikela ubungqina kumenza akwazi ukuba nomlinganiselo weeyure ezili-15 ngenyanga kumsebenzi wokushumayela. Ukuba unomsebenzi wempangelo ngoMgqibelo, uwenza emva kwenkonzo yakusasa yasentsimini. Ngaba wena nentsapho yakho ningacwangcisa ukuya kwinkonzo yasentsimini veki nganye ubuncinane usuku olunye, oku nikwenze inxalenye yenu yokuphila ngendlela yokomoya?—Fil. 3:16.
8 Hlolisisa Izinto Ozenza Mihla Le: Kukho izinto ezisithintelayo ukuba sisekele ubomi bethu kwinkonzo kaYehova. Iimeko ezingalindelekanga zinokuluphazamisa ucwangciso lwethu lwesifundo, iintlanganiso, nenkonzo. UTshaba lwethu, uSathana, luya kwenza konke okusemandleni ‘ukuxaba kumendo wethu’ aze aphazamise ucwangciso lwethu. (1 Tes. 2:18; Efe. 6:12, 13) Musa ukuvumela le miqobo ikudimaze, uze unikezele. Yenza naluphi na uhlengahlengiso olufunekayo ukuze wenze ucwangciso lomsebenzi wobuthixo. Kufuneka sizimisele size sinyamezele ukuze sifeze izinto ezibalulekileyo.
9 Asimele sivumele impembelelo yehlabathi nenyama yethu engafezekanga ukuba ivelise imisebenzi engeyeyokomoya enokulitya ngakumbi ixesha nengqalelo yethu. Ukuzihlolisisa kuyafuneka, usebenzisa imibuzo enjengothi: ‘Ngaba ikhondo lobomi bam ngokuthe ngcembe liye alalungelelana okanye alabi nanjongo, njengokuba lalinjalo? Ngaba ndiqalise ukusekela ubomi bam kwizinto zeli hlabathi ezidlulayo? (1 Yoh. 2:15-17) Lingakanani ixesha endilichithela kwizilangazelelo zobuqu, ukukhenketha, kwezemidlalo, okanye kwezinye iziyolo—kuquka nexesha elichithwa kubukelwe umabonwakude okanye uqolozele I-Internet—njengokuba ulithelekisa nexesha elichithelwa kwizinto zokomoya?’
10 Ukuba uvakalelwa kukuba ubomi bakho buxakekiswe zizinto ezingabalulekanga, yintoni onokuyenza? Kanye njengokuba uPawulos wathandazela ukuba abazalwana bakhe ‘balungiswe ngokutsha’ okanye “babuyiselwe kulungelelwano olufanelekileyo,” kutheni ungakhungi uYehova ukuze akuncede uphinde usekele ubomi bakho kwinkonzo yakhe? (2 Kor. 13:9, 11, umbhalo osemazantsi weNW) Ngoko zimisele ukuphila ngokuvisisana nesigqibo sakho uze wenze uhlengahlengiso oluyimfuneko. (1 Kor. 9:26, 27) UYehova uya kukunceda ungaphambukeli ngasekunene okanye ngasekhohlo ekumthobeleni.—Thelekisa uIsaya 30:20, 21.
11 Hlala Uxakekile Kwinkonzo Evuyisayo KaThixo: Izigidi ezingenathemba zisukela ulonwabo kuba ziyabona ukuba isiphelo sobomi sisondele, izinto eziphathekayo abazisukelayo azikhange zibazisele ulonwabo oluhlala luhleli. Iye ‘yakukusukelana nomoya.’ (INtshu. 2:11) Kwelinye icala, xa sisekela ubomi bethu kuYehova, ‘simbeke ngaphambili amaxesha onke,’ sifumana ulwaneliseko olukhulu. (INdu. 16:8, 11) Oku kunjalo ngenxa yokuba uYehova nguye obangele sakho. (ISityhi. 4:11) Ngaphandle kwakhe, oneeNjongo Ezizukileyo, ubomi bethu abunakuba nantsingiselo. Ukukhonza uYehova kuzalisa ubomi bethu ngolwaneliseko, umsebenzi onenjongo ekungenelwa abanye kwakunye nathi ngonaphakade, ewe, ubomi obungunaphakade.
12 Kubalulekile ukuba singabi ngabangakhathaliyo size siphulukane nemvo yongxamiseko ngokuphathelele isiphelo esisondela ngokukhawuleza sehlabathi likaSathana. Ukuphila kwethu kwemihla ngemihla kuphenjelelwa yimbono yethu ngekamva. Abantu bomhla kaNowa, ababengakholelwa ukuba kwakuza kubakho unogumbe womhlaba wonke, “abazange banikele ngqalelo,” basekela ubomi babo bemihla ngemihla kusukelo lobuqu—besidla, besela, betshata—wada wafika unogumbe “waza wabatshayela bonke.” (Mat. 24:37-39) Namhlanje, abo basekela ubomi babo kweli hlabathi baya kubona amathemba abo ekamva ebhanga phambi kwabo kweyona ntshabalalo inkulu engazange ibonwe luluntu, “imini kaYehova.”—2 Pet. 3:10-12.
13 Qhubeka ngoko, usekela ubomi bakho kuThixo ophilayo, uYehova, nokwenziwa kokuthanda kwakhe. Akukho kamva unokulakha kobu bomi elifana nelo loMxhasi othembekileyo uYehova. Akanakuxoka—uya kunyaniseka kumadinga akhe. (Tito 1:2) Akanakufa—ayikho into ebekwe kuYehova eya kulahleka. (Hab. 1:12; 2 Tim. 1:12) Ubomi bokuthobela nokuba nokholo esibakhayo ngoku sisiqalo nje sobomi obuya kubakho ngonaphakade kwinkonzo echwayitisayo yoThixo wethu owonwabileyo!—1 Tim. 1:11; 6:19.
[Blurb on page 3]
“Inyaniso asiyonxalenye yobomi bethu, ibubomi bethu. Yonke enye into ijikeleza yona.”